ᕑᐃᐠ ᑲᕑᐃᐠ ᐊᐧᐊᐧᑌ ᐊᒋᒧᐃᐧᓇᐣ

ᐊᓂᔑᓇᐯ ᐊᐢᑭ ᐅᑭᒪᐃᐧᐣ ᐅᑐᐱᑲᐸᐃᐧᑕᓇᐊᐧ ᐊᓂᔑᓂᓂᐊᐠ ᐅᒪᐣᑐᒥᓂᑯᓯᐃᐧᓂᐊᐧ ᒥᓇ ᐅᑐᑭᒪᐃᐧ ᐊᔓᑕᒪᑯᐃᐧᓂᐊᐧᐠ ᐃᐧᓇᐊᐧ ᒋᐱᒧᑕᒪᓱᐊᐧᐨ ᐃᐡᑯᓄᐃᐧᓂ ᐊᐱ ᑲᑭᐃᐡᑲᐧ ᐸᑭᑎᓇᑭᐸᐣ ᑲᓇᑕ ᐅᑭᒪᐃᐧᐣ ᐊᓂᐣ ᑲᐃᐧᐃᔑ ᐅᓇᑐᐨ ᐊᓂᔑᓂᓂᐊᐧᐠ ᐅᑎᐡᑯᓄᐃᐧ ᐱᒧᑕᒪᑯᐃᐧᓂᐊᐧ.
“ᓄᑯᑦ ᑲᑭᔑᑲᐠ ᓂᐃᐧᒋᑲᐸᐃᐧᑕᑎᒥᐣ ᐁᑲᓄᑕᒪᐠ ᐁᐧᑎ ᐊᓂᓂᑲᐣ ᑫᓂᔑᓇᑲᐧᓂᐠ ᐅᑎᐡᑯᓄ ᑲᓇᐊᐧᐸᒋᑫᐃᐧᐣ ᐊᓂᔑᓇᐯ ᐊᐢᑭ ᑲᐃᐧᐣ ᐅᑲᐱᒥᓂᔕᐦᐊᓯᐣ ᑲᓇᑕ ᐅᑭᒪᐃᐧᐣ ᐅᑐᓇᑯᓂᑫᐃᐧᐣ ᐁᑲᐧ ᐱᑯ ᓂᓇᐃᐧᐟ ᓂᒪᐣᑐᒥᓂᑯᐃᐧᓂᓇᐣ ᓂᑲᐊᐸᒋᑐᒥᐣ ᒋᐱᒧᓂᑎᓱᔭᐠ, ᐊᔑᐨ ᑲᔦ ᒋᐱᒧᑐᔭᐠ ᐃᐡᑯᓄ ᐱᒧᒋᑫᐃᐧᐣ,” ᑭᐃᑭᑐ ᑭᒋᐅᑭᒪᑲᐣ ᐦᐊᕑᐱ ᔦᐢᓄ. “ᑲᓇᑕ ᐅᑭᒪᐅᐣ ᐅᑭᐱᐸᐧᓇᐃᐧᑐᐣ ᒋᑭᑎᐱᑐᑕᐠ ᑲᐧᔭᐠ ᒋᔑᓇᑯᑐᐨ ᐊᓂᔑᓂᓂᐃᐧ ᐅᑎᐡᑯᓂᐠ ᐅᑭᑭᓄᐦᐊᒪᑯᐃᐧᓂᐊᐧ ᑕᐱᐡᑯᐨ ᑲᐃᔑᒥᓇᐧᔑᑐᐨ ᐅᑎᐡᑯᓄᐃᐧ ᐃᐧᒋᐦᐃᑯᐃᐧᓂᐊᐧ ᑯᑕᑭᔭᐠ ᐅᑎᐡᑯᓂᐠ ᐅᒪ ᒥᓯᐁᐧ ᑲᓇᑕ ᐊᐦᑭᐠ.”

ᓄᑯᒥᑫ ᐊᑎᑯᓴᑲᐃᑲᓂᐠ ᑭᑭᔑᒋᑲᑌ ᒪᐊᐧᐨ ᐁᒥᔕᐠ ᐱᓯᒧ ᐃᐡᑯᑌ ᐁᑭᐅᔑᒋᑲᑌᐠ ᒥᓂᑯᐠ ᐅᒪ ᐊᐧᓂᓇᐊᐧᑲᐠ ᑲᐃᑯᑲᓇᐊᐧᐸᒋᑫᒪᑲᐠ ᐁᑭᐅᓇᑯᑲᒋᑲᑌᐠ ᐱᓯᒧᐠ ᑲᐅᒋ ᐊᓄᑭᒪᑲᐠ ᐃᐡᑯᑌ ᒋᐅᒋᐊᐧᑌᓂᑫᒪᑲᐠ ᐅᑎᐡᑯᓄᑲᒥᑯᐊᐧ.
“ᒧᔕᐠ ᓂᓇᓇᑐᓇᒥᐣ ᑫᐅᐣᒋᐁᐧᒋᓭᐠ ᐃᐡᑯᑌ ᑫᐊᐸᒋᒋᑲᑌᐠ,” ᐃᑭᑐ ᐊᑎᑯᓴᑲᐃᑲᓂ ᐅᑭᒪᑲᐣ ᕑᐊᔭᓫ ᒥᑭᐢ. “ᓂᑭᓇᓇᑕᐃᐧᑭᑫᒋᑫᒥᓇᐸᐣ ᓂᑕᓇᐱᐃᐧᓂᓇᓂᐠ ᐁᑲᐧ ᓂᑭᐅᓀᑕᒥᐣ ᒋᑯᒋᒋᑲᑌᐠ ᐱᓯᒧ ᐃᐡᑯᑌ ᑭᐡᐱᐣ ᐃᒪ ᒋᑭᐅᐣᒋ ᐊᒋᐃᐧᓭᑫᐧᐣ ᑲᐃᓇᑭᐣᑌᐠ ᐊᓂᒥᑭᐃᐧ ᐃᐡᑯᑌ ᑲᐊᐸᒋᑐᔭᐠ.”
ᐊᑎᑯᓴᑲᐃᑲᓂᐠ 1,100 ᑲᑲᐯᔑᐊᐧᐨ ᐃᐡᑯᓂᑲᓂᐠ ᐅᑐᐣᒋ ᒪᒪᐃᐧ ᐊᐸᒋᑐᓇᐊᐧ 149 ᑭᓫᐅᐊᐧᐟ ᓂᐱᑲᐣᐠ ᑲᐅᐣᒋᐊᓄᑭᒪᑲᓂᐠ ᐅᑎᐡᑯᑌᒥᐊᐧ, ᒣᑲᐧᐨ ᐊᐱ 1998 ᑲᔭᑭᐊᐧᓂᐠ ᑲᑭᐅᔑᒋᑲᑌᑭᐸᐣ ᐃᒪ ᐊᐧᔕᐦᐅᐃᐧᓯᐱᐠ ᐁᑲᐧ ᐊᔑᐨ ᐱᒥᐸᓂᒋᑫᐃᐧᑲᒥᐠ ᑲᐅᒋᐊᓄᑭᒪᑲᐠ ᐃᐡᑯᑌ.

ᒥᔑᐣ ᐅᐣᑌᕑᐃᔪ ᐅᑭᒪᑲᓇᐠ ᑲᐱᑭᓯ ᒪᒪᐊᐧᓄᑭ ᐱᒧᒋᑫᐊᐧᐨ ᒥᓇ ᑯᑕᑭᔭᐠ ᑲᐅᒋᒥᓯᐁᐧ ᑲᓇᐊᐧᐸᒋᑫᑕᒪᑫᐊᐧᐨ ᐅᑭᒪᑲᓇᐠ ᑕᑭᐡᑭᓇᒪᐊᐧᑲᓄᐊᐧᐠ ᔓᓂᔭᐣ ᑲᐱᒥ ᐸᑭᑎᓇᒪᐃᐧᑕᐧ ᐊᑯᓇᐠ 64 ᐳᕑᓭᐣᐟ ᑲᐃᔑᐱᒥ ᒪᒪᐃᐧ ᒥᓂᑕᐧ ᑕᓱᔭᑭ.
ᐅᐣᑌᕑᐃᔪ ᑭᒋᐅᑭᒪᑲᐣ ᐢᑕᐣ ᐯᕑᑎ ᐅᑎᔑᐊᐧᐸᑕᐣ ᓄᑯᒥᑫ ᑲᓇᑕ ᒥᓇ ᐅᐣᑌᕑᐃᔪ ᑭᒋᐅᑭᒪᐠ ᑲᑭ ᑭᐡᑭᓇᐊᐧᐨ ᔓᓂᔭᐣ ᐊᓂᔑᓂᓂᐃᐧ ᐱᒧᒋᑫᐃᐧᓇᐣ ᑲᐃᔑᐸᑭᑎᓇᑲᓄᐸᐣ ᐁᑲ ᐊᐱᐣ ᐃᒪ ᒋᑭᐅᐣᒋ ᑲᐧᔭᐠ ᑲᑲᓄᑕᒧᐊᐧᐨ ᐅᑎᓯᓭᐃᓂᐊᐧ ᐊᓂᔑᓂᓂᐊᐧᐠ.
“ᒥᑐᓂ ᐱᑯ ᓂᓯᑕᐃᐧᓇᑲᐧᓂ ᑫᑯᓀᐣ ᑲᑭᐅᒋ ᑭᐡᑭᓇᒪᑯᔭᐠ ᔓᓂᔭᐣ ᐁᐃᐧᐅᒋ ᑭᐸᑯᐡᑲᒪᑯᔭᐠ ᐁᑲ ᐃᒪ ᒋᑭᐅᒋ ᔕᑯᒋᐡᑭᑫᔭᐠ ᑫᑭᓇᐃᐧᐟ ᑲᐃᓀᑕᑯᓯᔭᐠ ᒋᔑᐱᒥᔭᓄᑕᒪᐠ ᑲᑲᑫᐧ ᑲᓇᐁᐧᑕᒪᓱᔭᐠ ᑭᑕᑭᒥᓇᐣ ᒥᓇ ᑭᓇᐃᐧᐟ ᑲᑲᑫᐧ ᐅᓇᔓᐊᐧᑕᒪᐠ ᑫᑭᔑ ᐱᒥᓂᔕᐦᐃᑲᑌᑭᐸᐣ ᑲᐃᐧᐱᑲᑫᐧ ᒪᑕᓄᑭᐊᐧᐨ ᑭᑕᑭᒥᓇᓂᐠ ᑲᐃᐧᐱᒪᓂᔓᓂᔭᐊᐧᑕᒧᐊᐧᐨ ᐱᒥᑌ, ᐃᐡᑯᑌ ᒥᓇ ᐱᐊᐧᐱᑯᑫᐃᐧ ᐱᒧᒋᑫᐃᐧᓇᐣ ᑲᑎᐯᑕᒧᐊᐧᐨ,” ᐃᑭᑐ ᐯᕑᑎ.

ᐅᐣᑌᕑᐃᔪ ᐦᐊᔾ ᐢᑯᓫ ᐯᔑᑯᔭᑭ ᐁᑭᑕᔑ ᑭᑭᓄᐦᐊᒪᑯᓯᐨ ᐅᑕᓇᐠ ᑲᔭᑭᐊᐧᓂᐠ ᐅᑭᐊᓂᒥᐦᐃᑯᐣ ᐁᐧᐱᑫᐧ ᐁᐅᐣᒋᐨ ᑭᓫᐊᔾᐟ ᒧᓂᔭᐢ ᐅᑭᐃᐧᒋᐦᐃᑯᐣ ᑲᑭᐊᐣᒋᐡᑲᐸᐣ ᒋᑭᑭᓄᐦᐊᒪᑯᓯᐨ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ, ᒥᐦᐃᒪ ᑲᑭ ᑭᔑᑐᐨ ᐅᑭᑭᓄᐦᐊᒪᑯᓯᐃᐧᐣ ᒣᑲᐧᐨ ᒪᑯᐱᓯᑦ 13 ᐁᑲᐧ ᐊᔑᐨ ᑯᑕᑭᔭᐠ 22 ᑭᑭᓄᐦᐊᒪᐊᐧᑲᓇᐠ.
“ᐊᐱ ᑲᑭᐊᐧᓂᐦᐊᑭᐸᐣ ᓂᐢᑌᐢ, ᓂᑭᒪᒋᔭᐸᒋᑐᐣ ᒥᓂᑫᐧᐃᐧᐣ ᐁᐅᒋ ᑲᑫᐧᓇᑕᐃᐧᐦᐃᑎᓱᐊᐧᑫᔭᐣ,” ᐃᑭᑐ ᒧᓂᔭᐢ. “ᓂᑭᐊᐧᓂᑐᑕᐣ ᑕᐡ ᐃᐁᐧ ᑲᑭᑐᑕᒪᐣ. ᐊᐱ ᐊᐊᐧᔑᒣ ᑲᑭᔭᓂ ᒥᓂᑫᐧᔭᐣ, ᓂᑭᔭᓂ ᐊᐧᓂᑫᐣᑕᐊᐧᐠ ᓂᐊᐧᑯᒪᑲᓇᐠ ᒥᓇ ᓂᑐᑌᒪᐠ. ᐁᑲᐧ ᑕᐡ ᓄᑯᑦ ᑲᓂᐊᐧᑲᒥᐱᒪᑎᐢ, ᓂᐱᒥᓂᔕᐦᐊᐣ ᓂᑕᓂᔑᓂᓂᐃᐧ ᐱᒪᑎᓯᐃᐧᐣ ᑫᓄᒋᐱᒥ ᒥᓄᔭᔭᐣ. ᓂᑭᒋᓀᑕᐣ ᑲᑭ ᑭᔑᑐᔭᐣ ᓂᑭᑭᓄᐦᐊᒪᑯᐃᐧᐣ, ᓂᑭᒋᓀᑕᐣ ᑲᔦ ᐁᓂᒥᔭᐣ ᒥᓇ ᐁᒪᑌᐧᐦᐃᑫᔭᐣ.”
ᒧᓂᔭᐢ ᐅᑭᐊᐧᓂᐦᐊᐸᓂᐣ ᐅᐢᑌᓴᐣ, ᕑᐊᐣᑎ ᒧᓂᔭᐢ, ᒣᑲᐧᐨ ᒍᓫᐊᔾ ᐱᓯᑦ 2012.