ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐅᑕᓀᐧᑕᓇᐊᐧ ᐅᑭᒪᐃᐧᐣ ᐅᑐᐡᑭᐅᓇᑯᓂᑲᐣ Bill C-33

ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐅᑕᓀᐧᑕᓇᐊᐧ ᑲᓇᑕ ᐅᑭᒪᐃᐧᐣ ᐅᑐᐡᑭ ᐅᓇᑯᓂᑫᐃᐧᐣ Bill C-33, ᐊᓂᔑᓂᓂᐊᐧᐠ ᒋᑎᐯᐣᑕᒧᐊᐧᐨ ᐊᓂᔑᓂᓂᐃᐧ ᐃᐡᑯᓄᐱᒧᒋᑫᐃ ᐅᓇᑯᓂᑫᐃᐧᐣ ᑲᐃᔑᓂᑲᑌᐠ, ᒣᑲᐧᐨ ᐊᐱ ᒪᑯᐱᓯᑦ 6 ᒥᓇ 7 ᑲᐃᓇᑭᓱᐨ ᑲᑭᒪᐊᐧᒋᐦᐃᑐᐊᐧᐨ ᐁᐧᑎ ᑕᐣᑐᕑ ᐯ ᐅᑌᓇᐠ.
“ᓂᑕᓂᔑᓂᓂᒥᓇᓂᐠ ᐅᑭᑫᑕᓇᐊᐧ ᐊᓂᐣ ᑲᐃᔑᓇᑕᐁᐧᑕᒧᐊᐧᐨ,” ᐃᑭᑐ ᑭᒋᐅᑭᒪᑲᓂᔑᐡ ᑲᐧᔾᐢ ᑲᑭᑲᒥᐠ. “ᒥᑕᐡ ᐁᔑᑌᐯᐧᑕᒪᐠ ᐁᐧᑎ ᐊᓂᓂᑲᐣ ᑫᓂᔑᓇᑲᐧᐠ ᐊᓂᔑᓇᐯ ᐊᐢᑭ ᑎᐯᒋᑫᐃᐧᓂᐠ ᒥᐦᐅᐁᐧ ᑫᐊᐸᑕᐠ ᑲᐃᔑᑭᑫᑕᒧᐊᐧᐨ ᒋᐃᔑᓇᑲᐧᓂᐠ ᑭᑎᐡᑯᓄᐱᒧᑕᒪᑯᐃᐧᓂᓇᐣ ᑭᑕᓇᐱᐃᐧᓂᓇᓂᐠ.”
ᑲᑭᑲᒥᐠ ᐃᑭᑐ ᐊᔕ ᒥᑕᓱᔭᑭ ᐊᓂᔑᓇᐯ ᐊᐢᑭ ᐅᓂᑲᓂᑕᑫᐠ ᐅᑐᐣᒋᐱᒥᓇᓇᑭᐡᑲᐊᐧᐊᐧᐣ ᑲᓇᑕ ᐅᑭᒪᐃᐧᓇᐣ ᐁᐱᒥᐊᓂᒧᑕᒪᐊᐧᑲᓄᐨ ᐃᐡᑯᓄᐃᐧ ᑲᓇᐊᐧᐸᒋᑫᐃᐧᓂ ᐅᒋ.
“ᐁᑲᐧ ᐊᑯᓇᐠ ᓂᐅᐊᐦᑭ ᐅᑕᓇᐠ ᑲᐃᐧᐣ ᑲᓇᑫ ᓇᐣᑕ ᒋᑭᐱᐅᐣᒋ ᐊᐧᑲᐃᐧᑲᒪᑲᐠ ᐅᐁᐧ ᐊᓂᒧᒋᑫᐃᐧᐣ,” ᐃᑭᑐ ᑲᑭᑲᒥᐠ. “ᐊᔕ ᑕᐡ ᓂᑭ ᑭᑫᑕᒥᐣ ᑫᑯᓀᐣ ᑲᑭᐅᐣᒋ ᐃᓯᓭᐠ, ᐁᑭᐃᔑᓂᓯᑕᐃᐧᓇᑲᐧᐠ, ᐊᔕ ᐁᑭᐅᐣᒋ ᑭᒧᒋᐅᓇᑐᐊᐧᑯᐸᓀᐣ ᐅᑐᓇᒋᑫᐃᐧᓂᐊᐧ (Bill C-33).”
ᐊᓇᐃᐧᐣ ᐅᐁᐧ ᐅᓇᑯᓂᑲᐣ ᐃᔑᓂᑲᓂ ᐃᐧᐣᒋᑫᒪᑲᐣ ᐃᐧᓇᐊᐧ ᐊᓂᔑᓂᓂᐊᐧᐠ ᒋᒥᓯᐁᐧ ᐱᒧᑐᐊᐧᐸᐣ ᐅᑎᐡᑯᓄ ᑲᓇᐊᐧᐸᒋᑫᐃᐧᓂᐊᐧ, ᔕᑯᐨ ᑲᑭᑲᒥᐠ ᐃᑭᑐ ᑲᓇᑕ ᐅᑭᒪᐃᐧᐣ ᐅᑭᐃᔑ ᐅᓇᑐᐣ ᐅᐁᐧᓂ ᐃᐧᓂᑯ ᒥᓯᐁᐧ ᒋᐅᒋᑎᐯᐣᑕᒪᑫᐨ ᐊᓂᔑᓂᓂᐃᐧ ᐃᐡᑯᓄᐃᐧ ᐱᒧᒋᑫᐃᐧᓂ.
“ᒥᐱᑯ ᑭᔭᐱᐨ ᑫᐃᔑᓇᑲᐧᐠ ᐃᐧᓇᐊᐧ ᐁᐧᑎ ᒋᐅᒋ ᒥᓯᐁᐧ ᐅᓇᔓᐊᐧᑕᒪᑫᐊᐧᐨ,” ᑲᑭᑲᒥᐠ ᐃᑭᑐ. “ᒥᑕᐡ ᐅᐁᐧ ᐁᑲ ᑲᓇᐦᐃᐡᑲᑯᔭᐠ, ᐁᑲ ᑲᑭᑫᑕᑲᐧᐠ ᐊᐣᑎ ᒪᔭᑦ ᑫᐅᐣᒋ ᓂᑲᓂᐅᓇᔓᐊᐧᑌᐠ. ᑭᐡᐱᐣ ᑕᐡ ᐁᑲ ᐊᐱᐣ ᐱᒥᓂᔕᐦᐊᒪᐠ ᑲᐃᓇᑯᓂᑯᔭᐠ, ᐃᐧᐣ ᑭᒋᐅᑭᒪ ᑲᑭᓇ ᑫᑯᓇᐣ ᐅᑎᐯᑕᓇᐣ, ᐅᑲᑲᐡᑭᑐᐣ ᑲᔦ ᒋᔭᓄᓇᐨ ᐸᑲᐣ ᐊᐃᐧᔭᐣ ᒋᐱᐊᓄᑭᑕᒪᑯᔭᑭᑕᐧ ᑭᑕᔑᑫᐃᐧᓂᓇᓂᐠ.”
ᑲᑭᑲᒥᐠ ᑕᐡ ᐃᑭᑐ ᐊᓂᔑᓇᐯ ᐊᐢᑭ ᑭᔭᐱᐨ ᐅᓇᓇᑐᓇᓇᐊᐧ ᐊᓂᐣ ᑲᐃᐧᐃᔑ ᑲᑫᐧ ᑭᔑᐊᐧᐁᐧᓇᑐᐊᐧᐨ ᐅᑎᐡᑯᓄᐃᐧ ᐱᒥᐃᐧᑕᒪᓱᐃᐧᓂᐊᐧ ᑫᑭᐃᔑᓇᑲᐧᓂᑭᐸᐣ.
“ᐊᔕ ᓂᑭᐅᓇᒋᑫᒥᓇᐸᐣ, ᐊᓂᐣ ᑫᐃᔑᓇᑲᐧᐠ ᑫᓂᔑᐱᒥᐃᐧᒋᑫᔭᐠ ᒥᑕᐡ ᐅᐁᐧ ᑲᒥᓴᐁᐧᑕᒪᐠ ᒋᔭᓂᑲᑫ ᒪᒋᐃᐧᒋᐃᐧᑐᔭᐠ,” ᐃᑭᑐ ᑲᑭᑲᒥᐠ. “ᐊᔕ ᑲᔦ ᒥᔑᐣ ᑭᐱᔭᓂᒧᒋᑲᑌᐊᐧᐣ ᑫᑯᓇᐣ ᐃᒪ ᐊᓂᔑᓂᓂᐊᐧᐠ ᑲᐃᐧᑎᐱᓇᐁᐧ ᐱᒧᑕᒪᓱᐊᐧᐨ ᐅᑎᐡᑯᓄᐃᐧ ᐅᓇᑯᓂᑫᐃᐧᓂᐊᐧ ᑫᐃᔑᐱᒧᓭᒪᑲᓂᐠ, ᑲᐧᔭᐠ ᒋᔑᓇᑲᐧᐠ ᑭᑭᓄᐦᐊᒪᑫᐃᐧᐣ ᒥᓇ ᒋᓂᑕᑭᑭᓄᐦᐊᒪᑫᐊᐧᐨ ᐅᑎᐡᑯᓄᐦᐃᐁᐧᐠ, ᒥᐅᓄ ᑲᐊᐣᑕᐁᐧᑕᒪᑭᐣ. ᐃᐁᐧ ᑕᐡ ᐣᑎᔑᐊᓂᒥᓭᐦᐃᑯᒥᐣ ᐃᐧᐣ ᐊᐁᐧ ᐅᑭᒪᐃᐧᐣ ᑲᑭᓇ ᑫᑯᓇᐣ ᐁᐱᒥᐱᐃᐧᒋᑫᑕᒪᑯᔭᐠ.”
ᑲᑭᑲᒥᐠ ᑭᐃᑭᑐ ᑫᐃᐧᓇᐊᐧ ᑲᑭᐃᓀᑕᒧᐊᐧᐸᐣ ᒋᔑᓇᑲᐧᓂᐠ ᐅᑎᐡᑯᓄᐃᐧ ᐱᒧᒋᑫᐃᐧᓂᐊᐧ ᐁᑲᐧ ᐃᐧᐣ ᑫᐃᐧᐣ ᑲᓇᑕ ᐅᑭᒪᐃᐧᐣ ᑲᐃᐧᐃᔑ ᑲᑫᐧᐅᓇᑕᒪᐊᐧᐨ ᐊᓂᔑᓂᓂᐊᐧᐣ ᑫᐃᔑᓇᑲᐧᑲᓂᐠ ᐅᑎᐡᑯᓄ ᐱᒥᐃᐧᒋᑫᐃᐧᓂᓂᐣ ᐃᐧᓂᑯ ᐃᒪ ᒥᓯᐁᐧ ᑕᐅᐣᒋ ᓂᑲᓂ ᐱᒥᐃᐧᑕᒪᑫᐸᐣ.
“ᑭᓇᐃᐧᐟ ᑕᐡ ᒥᓯᐁᐧ ᑭᑕᐅᓀᑕᒥᐣ ᑫᐃᔑᐱᒧᑕᒪᓱᔭᑭᐸᐣ,” ᐃᑭᑐ ᑲᑭᑲᒥᐠ ᐃᐁᐧᓂ ᐊᓂᔑᓂᓂᐊᐧᐠ ᑫᐃᐧᓇᐧᐊ ᑲᑭᐅᓇᐸᑕᒧᐊᐧᐸᐣ ᑫᐃᔑᓇᑲᐧᓂᐠ ᐅᑎᐡᑯᓄᐃᐧ ᐅᓇᒋᑫᐃᐧᓂᐊᐧ. “ᓂᓂᓯᑕᐃᐧᓇᒥᐣ ᐊᓂᐣ ᒪᔭᑦ ᑫᐃᔑᐱᒧᑕᒪᓱᔭᐠ, ᒥᓇᐧᔑᐣ ᐃᐁᐧ ᑲᑭᐃᔑᐅᓇᒋᑫᔭᐠ, ᐊᔕ ᐊᐊᐧᔑᒣ ᒥᑕᓱᔭᑭ ᓂᑐᒋᐱᒥ ᐊᓂᒧᑕᒪᐊᐧᒥᐣ ᐅᑭᒪᐃᐧᐣ ᐅᐁᐧ ᑲᐃᔑᓇᑕᐁᐧᑕᒪᐠ ᒋᔑᐅᑕᐱᓇᐠ. ᒥᑕᐡ ᐁᔑᐃᐧᐣᑕᒪᐊᐧᔭᐠ ᒋᐱᐃᐧᑕᐱᒥᑯᔭᐠ ᐁᑲᐧ ᒋᑭᑲᑫᐧᑭᔑᒋᑲᑌᑭᐸᐣ.”
ᐊᓂᔑᓇᐯ ᐊᐢᑭ ᑭᒪᓯᓇᐦᐅᑎᓱᐸᓂᐠ ᐃᐧᑕᓄᑭᒥᑐᐃᐧ ᓇᑐᒥᑐᐃᐧ ᐯᐸᓂ ᑫᐃᔑᓇᑲᐧᐠ ᑎᐱᓇᐁᐧ ᐱᒧᓂᑎᓱᐃᐧᐣ ᒥᓇ ᐃᐡᑯᓄᐃᐧ ᐱᒧᒋᑫᐃᐧᐣ ᐁᑲᐧ ᐊᔑᐨ ᑲᓇᑕ ᐅᑭᒪᐃᐧᐣ ᒣᑲᐧᐨ 1999; ᐁᑲᐧ ᑕᐡ ᐅᓄᐁᐧᓂᐊᐧᐣ ᑲᑭ ᐅᓇᓯᓇᐦᐃᑲᑌᑲᐧᐸᐣ ᓇᑯᒥᑐᐃᐧ ᐯᐸᓄᐣ ᑫᐃᔑᓇᑲᐧᐠ ᑎᐱᓇᐁᐧ ᐱᒧᓂᑎᓱᐃᐧᐣ ᒥᓇ ᐃᐡᑯᓄᐃᐧ ᐱᒧᒋᑫᐃᐧᐣ ᑭᔭᓂ ᒪᒋᐊᓂᒧᒋᑲᑌᐊᐧᐣ ᓴᑭᐸᑲᐃᐧᐱᓯᑦ 2007 ᑲᔭᑭᐊᐧᐠ ᐁᑲᐧ ᐊᐱᐣ ᒥᓇᐊᐧ ᑭᔭᓂ ᒐᑭᐱᐦᐅᑎᓱᓇᓂᐊᐧᐣ ᒣᑲᐧᐨ ᐅᐸᐡᑯᐃᐧᐱᓯᑦ 2009 ᑲᔭᑭᐊᐧᐠ.
ᒪᑕᑲᒥ ᐅᑭᒪᑲᐣ ᐊᐧᓫᑐᕑ ᓀᐳ ᐅᑭᐃᑕᐣ ᐅᐁᐧᓂ ᐅᑭᒪᐃᐧᐣ ᑲᐃᐧᐅᓇᑐᐨ Bill C-33 ᑲᐃᐧᐣ ᒋᑭᑲᑌᐠ ᐊᓂᔑᓂᓂᐃᐧᑭᔐᐧᐃᐧᓇᐣ ᒥᓇ ᐊᓂᔑᓂᓂᐊᐧᑎᓯᐃᐧᓇᐣ ᑫᑭᑭᓄᐦᐊᒪᑲᓄᐊᐧᐠ.
“ᐊᑎᑲ ᐁᑲᓇᐊᐧᐸᒋᑲᑌᓂᐠ (ᐅᑭᒪᐃᐧᐣ ᑲᓂᑲᓂᐡᑲᐠ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓇᐣ ᒥᓇ ᑭᐁᐧᑎᓄᐠ ᒪᒋᑕᐃᐧᓇᐣ ᐳᓇᕑᐟ ᐸᓫᑯᕑ) ᑲᑭᐃᐧᐣᑕᒪᑫᐨ ᐅᑭᒪᐃᐧᐣ ᐅᑐᓇᒋᑲᐣ, ᐅᑕᓂᒧᑕᓇᐣ ᐃᔑᑭᔐᐧᐃᐧᓇᐣ, ᐃᔑᐱᒪᑎᓯᐃᐧᓇᐣ, ᔕᑯᐨ ᐃᒪ ᐸᓂᐢᑫᐧ ᐁᑕ ᐁᐧᒥᑎᑯᔑᒧᐃᐧᐣ ᒥᓇ ᐸᑲᐧᐃᔑᒧᐃᐧᐣ ᐊᓂᒧᒋᑲᑌᐊᐧᐣ. ᐊᐣᑎ ᑕᐡ ᑫᐅᐣᑎᓇᔭᐠ ᑭᓇᐃᐧᐟ ᑭᑎᔑᑭᔐᐧᐃᐧᓂᓇᐣ ᐃᐧᑭᑭᓄᐦᐊᒪᑫᔭᐠ ᔓᓂᔭ ᑫᐊᐸᒋᐦᐊᔭᐠ.”
ᒪᑲᓇᐟ ᑭᓂᑲᐧᓇᐡ, ᔑᐸᐧᑲᒪ ᐅᑭᒪᑲᓇᐠ ᐱᒧᒋᑫᐃᐧᓂᐠ ᑲᐅᑭᒪᐃᐧᐨ, ᑭᐃᑭᑐ ᑫᐃᐧᐣ ᐅᑐᑭᒪᑲᓂᒪᐦᐃ ᑲᐃᐧᐣ ᐅᒥᓀᐧᑕᓯᓇᐊᐧ ᐅᐁᐧᓂ Bill C-33.
“ᐊᒥ ᑫᓂᐣ ᒧᔕᐠ ᐁᔑᑲᓄᑕᒪᐣ ᐅᓄᐁᐧᓂᐊᐧᐣ ᐅᓇᑯᓂᑫᐃᐧᓇᐣ ᑲᓂᐅᓇᒋᑲᑌᑭᐣ ᐁᑲ ᓄᐣᑕᐦᐃ ᒋᔑᑲᓇᐊᐧᐸᒋᑲᑌᑭᐣ ᑲᑭᒋᓀᑕᒪᐠ ᒪᐣᑐ ᑲᑭᒥᓂᑯᔭᐠ: ᑲᑭᐃᔑᓇᑯᐦᐃᑯᔭᐠ, ᑭᑎᔑᑭᔐᐧᐃᐧᓂᓇᐣ, ᑭᑎᓇᑎᓯᐃᐧᓂᓇᐣ, ᑭᑕᒐᑯᐱᒪᑎᓯᐃᐧᓂᓇᐣ, ᑭᑐᓇᔓᐁᐧᐃᐧᓇᐣ,” ᐃᑭᑐ ᑭᓂᑲᐧᓇᐡ. “ᑭᑲᓇᐊᐧᐸᒥᑯᐃᐧᓯᒥᐣ ᑲᔦ ᒋᑲᓇᐁᐧᑕᒪᐠ ᑲᑭᐊᔓᑕᒪᑯᔭᑭᐸᐣ ᐃᐡᑯᓄᐃᐧᐣ ᑫᑭᓇᐃᐧᐟ ᒋᒥᓂᑯᔭᐠ.”
ᑭᓂᑲᐧᓇᐡ ᐃᑭᑐ ᐊᐣᑕᐡ ᐃᐧᐣ ᓇᑐᐠ ᐁᑭᐅᐣᒋᐸᐸᔑ ᐃᐡᑲᐧᑕᐸᓂᐦᐅᐨ ᑲᓇᑕ ᑭᒋᐅᑭᒪᑲᐣ ᔕᐧᐣ ᐊᐟᓫᐃᐅ ᐃᐁᐧᓂ ᐁᑲ ᑲᑭᐅᐣᒋ ᓇᐦᐊᐸᒪᑲᓄᐨ ᑲᑭᐃᐧᒋᑲᐸᐃᐧᑕᐠ Bill C-33.
“ᑭᐡᐱᐣ ᐃᔑᑌᐯᐧᑕᒪᐣ ᑫᑯᐣ ᑲᐃᐧᓂᐸᐃᐧᑕᒪᐣ, ᑲᐃᐧᐣ ᑭᐸᑭᑎᓇᓯᐣ,” ᐃᑭᑐ ᑭᓂᑲᐧᓇᐡ. “ᑭᐡᐱᐣ ᑕᐡ ᐁᑲ ᐃᐁᐧ ᐃᔑᑲᐡᑭᑐᔭᐣ, ᑲᐃᐧᐣ ᑲᓇ ᐃᐁᐧ ᑕᑭᐃᓯᓭ.”
ᐅᐁᐧ ᑕᐡ ᐅᓇᑯᓂᑲᐣ Bill C-33 ᐅᑭᐅᐡᑭᐸᑭᑎᓇᐣ ᑲᓇᑕ ᐅᑭᒪᐃᐧᐣ ᒣᑲᐧᐨ ᓂᑭᐱᓯᑦ 10 ᑲᐃᓇᑭᓱᐨ ᐁᑲᐧ ᐱᓇᒪ ᐊᐱᐣ ᑭᐳᓂᒋᑲᑌ ᐸᓂᒪ ᐅᑭᒪᑲᓇᐠ ᑭᑭᔑ ᐅᓇᒋᑫᐊᐧᐨ ᐊᐱᐣ ᐊᐟᓫᐃᐅ ᒪᑯᐱᓯᑦ 2 ᑲᐃᓇᑭᓱᓂᐨ ᑲᑭᐃᐡᑲᐧᑕᐨ ᐅᑭᒋᐅᑭᒪᑲᓂᐃᐧᓂᐠ.
ᑲᑭᑲᒥᐠ ᑭᐃᑭᑐ ᐊᓂᔑᓇᐯ ᐊᐢᑭ ᑲᐃᐧᐣ ᑕᐃᔑᒋᑫᓯᐊᐧᐠ ᒋᑕᔑᐸᐱᐦᐅᐊᐧᐨ ᒣᑲᐧᐨ ᐃᑭᐁᐧᓂᐊᐧᐠ ᑯᑕᑭᔭᐠ ᐊᓂᔑᓂᓂᐊᐧᐠ ᐱᒥᐅᓀᑕᒧᐊᐧᐨ ᐊᓂᐣ ᑫᑭᐃᔑᒥᓄᓭᐊᐧᐸᐣ ᐊᓂᔑᓇᐯ ᐊᐢᑭ ᐊᓂᔑᓂᓂᐊᐧᐠ.
“ᐊᓂᐡ ᑭᓄᒋᑐᒥᐣ ᑭᑕᓂᔑᓂᓂᒥᓇᓂᐠ ᑫᓂᔑᒥᓄᓭᓂᐠ ᐅᑎᐡᑯᓄᐦᐃᑯᐃᐧᓂᐊᐧ ᒥᓇ ᑲᐧᔭᐠ ᒋᑲᑫᐧ ᐅᓇᒋᑲᑌᓂᐠ,” ᐃᑭᑐ ᑲᑭᑲᒥᐠ.
“ᓂᑭᑲᓄᓇᒥᐣ ᑲᓇᑕ ᐅᑭᒪᐃᐧᐣ ᒋᐊᓂᒪᒋᐊᓄᑲᑕᑭᐣ ᑲᐃᔑᓇᓄᑌᓭᐊᐧᐨ ᓂᑕᓂᔑᓂᓂᒥᓇᓂᐠ ᒋᑎᐸᑕᒪᐃᐧᑕᐧ ᑐᑲᐣ ᐃᑯ ᑲᐃᑭᑐᒪᑲᐠ ᓂᑕᔓᑕᒪᑯᐃᐧᓂᓇᐣ, ᒥᓇ ᒋᑭᑕᑭᒋᑲᑌᐠ ᑭᐃᐧᒋᐃᐧᑎᐃᐧᓂᓇᐣ ᑲᑭᐅᐣᒋᓭᑭᐸᐣ ᑭᒋᐅᑭᒪᐃᐧᓂᐠ ᒋᐱᒥᓂᔕᐦᐊᐠ ᑲᓇᑕ ᐅᑭᒪᐃᐧᐣ. ᑭᒋᓀᑕᑲᐧᐣ ᐃᐡᑯᓄᐃᐧᐣ ᒋᐱᒥᐊᓄᑲᑌᐠ ᓂᑐᑭᒪᑲᓂᒥᓇᓂᐠ ᑲᑭᐸᑭᑎᓂᑎᓱᐊᐧᐨ ᒋᐱᒥᐃᐧᑕᒪᑫᐊᐧᐨ, ᐁᑲᐧ ᒥᓇ ᐁᔑᐸᑯᓭᑕᒧᐊᐧᐨ ᒋᐅᒋ ᐃᐧᒋᐦᐃᑯᐊᐧᐨ ᑭᑕᐊᐧᔑᔑᒥᓇᓂᐠ ᐁᐧᑎ ᐅᓂᑲᓂᒥᐊᐧ.”