ᐊᓂᔑᓇᐯ ᐊᐢᑭ ᑭᒪᓯᓇᐃᐧᑎᓭ ᑭᐃᐧᑕᓄᑭᒪᐨ ᐅᐣᑌᕑᐃᔪ ᐁᑲᐧ ᑲᓇᑕ ᐊᐦᐃ ᑭᑭᓄᐊᒪᑫᐃᐧᐣ ᐱᒧᒋᑫᐃᐧᐣ ᐅᒋ

ᐊᓂᔑᓇᐯ ᐅᑭᒪᓯᓇᐦᐊᐣ ᓇᐦᑯᒥᑐᐃᐧᐣ ᓂᓯᑐᑕᑐᐃᐧᐣ ᐁᐃᐧᐃᐧᑕᓄᑭᒪᐨ ᐅᐣᑌᕑᐃᔪ ᐁᑲᐧ ᑲᓇᑕ ᐅᑭᒪᐃᐧᓇᐣ ᐊᐊᐧᔑᒣ ᑲᐧᔭᐠ ᒋᐊᓄᑲᑌᐠ ᐃᐡᑯᓄᐃᐧ ᐱᒧᒋᑫᐃᐧᐣ ᐃᐃᒪ ᐅᑎᐢᑯᓂᐠ ᑲᑲᐯᔑᐊᐧᐨ ᐊᓂᔑᓇᐯ ᐊᐢᑭ᙮
ᐅᐅᐁᐧ ᓇᑭᒧᐁᐧᐃᐧᐣ ᑭᒪᓯᓇᐦᐃᑲᑌ ᒥᑲᐧᐨ ᐅᑭᒪᑲᓇᐠ ᑲᑭᒪᐊᐧᒋᐦᐃᑐᐊᐧᐨ ᐃᐃᒪ ᒪᑕᐧᑲᒥ ᑕᔑᑫᐃᐧᓂᐠ ᒣᑲᐧᐨ ᓴᑲᓱ ᒥᑭᓯ ᐱᓯᑦ ᑲᐃᓇᑭᓯᐨ ᐁᑲᐧ ᐅᐅᐁᐧ ᓇᐦᑯᒥᑐᐃᐧᐣ ᐃᔑᑲᓇᐊᐧᐸᒋᑲᑌ ᐊᐧᔑᒣ ᒋᐃᐧᒋᔭᑲᓄᐊᐧᐨ ᓇᐣ ᐅᑎᐢᑯᓂᐠ ᐊᐦᐃᐠ ᑲᑕᔑᐡᑯᓄᐊᐧᐨ ᐅᑕᔑᑫᐃᐧᓂᐊᐧᐠ ᒥᓇ ᑕᐃᐧᓂᐠ᙮
“ᐅᐅᐁᐧ ᓇᐦᑯᒥᑐᐃᐧᐣ ᓂᓯᑐᑕᑐᐃᐧᐣ ᐊᐧᐸᑕᐦᐃᐁᐧᒪᑲᐣ ᑫᐃᐧᐣ ᓇᐣ ᑕᔑᑭᐃᐧᓇᐣ ᒋᑭᐱᒧᑕᒪᓯᐊᐧᐨ ᓇᓇᑐᐠ ᐱᒧᒋᑫᐃᐧᓇᐣ ᐃᐃᒪ ᐅᒋ ᒪᔭᑦ ᓂᐢᑕᑦ ᑭᒋᓇᑯᒥᑐᐃᐧᐣ ᑲᑭᓇᑌᑭᐸᐣ ᑕᐱᐡᑯᐨ ᐃᐃᐁᐧ ᐊᓂᔑᓂᓂ ᑲᐱᒧᑕᒪᓯᐨ ᐊᓂᔑᓂᓂᐃᐧ ᑭᑭᓄᐊᒪᑫᐃᐧ ᐱᒧᒋᑫᐃᐧᐣ,” ᐃᑭᑐ ᑭᒋᐅᑭᒪᑲᓀᐡ ᐊᕑᐱ ᔦᐢᓇ ᐅᑎᐸᒋᒧᐃᐧᐣ ᑲᑭᐸᑭᑎᓇᐠ᙮ “ᑲᑭᓇ ᐃᐧᑕᓄᑭᒥᑎᔭᐠ ᑲᐧᔭᐠ ᑲᐅᒋ ᐃᐧᒋᔭᒥᓇᐠ ᐅᑎᐢᑯᓂᐠ ᒥᓇ ᑲᐧᔭᐠ ᒋᔑᐡᑯᓄᐊᐧᐨ ᐁᑲᐧ ᒥᓇ ᒋᐊᓂ ᑌᐱᓇᒪᓯᐊᐧᐨ ᓇᓇᑐᐠ ᑫᑲᓇᐣ᙮”
ᐅᐅᐁᐧ ᓇᐦᑯᒥᑐᐃᐧᐣ ᓂᓯᑐᑕᑐᐃᐧᐣ ᓂᔭᓇᐣ ᑫᑯᓇᐣ ᑲᓇᐊᐧᐸᒋᑲᑌᐊᐧᐣ ᐁᐦᐊ ᐅᑕ ᐊᓂᔑᓇᐯ ᐊᐢᑭ ᑲᐃᐧᐃᐧᑕᓄᑭᒪᐨ ᐅᐣᑌᕑᐃᔪ ᒥᓇ ᑲᓇᑕ ᐅᑭᒪᐃᐧᓇᐣ ᐅᐅᐁᐧ ᑭᑭᓄᐊᒪᑫᐃᐧᐣ ᐱᒧᒋᑫᐃᐧᐣ ᐅᒋ᙮
ᐅᑫᐧᓂᐊᐧᐣ ᒪᐊᐧᐨ ᑲᑲᓇᐊᐧᐸᒋᑲᑌᑭᐣ ᐊᐦᐃ ᒪᐊᐧᐨ ᑲᐧᔭᐠ ᐅᑎᐢᑯᓂᐃᐧ ᐃᐧᒋᐦᐃᐁᐧᐃᐧᐣ ᒋᑕᑲᐧᐠ ᒥᑲᐧᐨ ᐊᐧᓴ ᑲᑕᐃᐧᐡᑯᓄᐊᐧᐨ ᐅᐡᑲᑎᓴᐠ ᒥᓇ ᐊᓂᔑᓂᓂᐃᐧ ᐱᒪᑎᓯᐃᐧᐣ ᒥᓇ ᐃᐧᐡᑲᐨ ᑭᑭᓄᐊᒪᑫᐃᐧᐣ ᒥᓇ ᐊᓂᔑᓂᓂᒧᐃᐧᐣ ᒋᑭᑭᓄᐊᐧᒪᑲᓂᐊᐧᐠ ᐁᑲᐧ ᑲᔭ ᒋᐊᓂ ᒥᔑᓂᐊᐧᐨ ᐊᓂᔑᓂᓂᐃᐧ ᐅᑭᑭᓄᐊᒪᑫᐠ ᐁᑲᐧ ᑲᔭ ᑭᒋᐦᐊᐠ ᐃᐃᒪ ᐃᐡᑯᓄᑲᒥᑯᐣ᙮
ᐁᑲᐧ ᒥᓇ ᐊᐊᐧᔑᒣ ᒋᑲᓇᐊᐧᐸᒋᑲᑌᐠ ᐊᓂᐣ ᐊᓂᔑᓂᓂᐃᐧ ᑫᑭᐃᔑᐃᐧᒋᐦᐃᐁᐧᐸᐣ ᐃᐃᒪ ᑕᐃᐧᓂᐠ ᑲᑕᑲᐧᑭᐣ ᐃᐡᑯᓄᑲᒥᑯᐣ ᐁᑲᐧ ᒥᓇ ᒋᑭᐊᐱᑕᒪᑫᐊᐧᐸᐣ ᐁᑲᐧ ᑯᑕᑭᔭᐣ ᒪᒋᒋᑫᐃᐧᓇᐣ ᒋᑲᓇᐊᐧᐸᒋᑲᑌᑭᐣ ᐊᓂᐣ ᐊᐊᐧᔑᒣ ᑲᑭᐃᔑᐃᐧᒋᒋᑲᑌᑲᐧᐸᓂᐣ ᐊᓂᔑᓂᓂᐃᐧ ᐃᐡᑯᓄᑲᒥᑯᐣ᙮
ᐅᑫᐧᓂᐊᐧᐣ ᑐᑲᐣ ᓂᐦᓴᐧᔦᐠ ᓇᐦᑯᒥᑐᐃᐧᓇᐣ ᐊᐦᐃᐠ ᑭᒪᓯᓇᐦᐃᑲᑌᐸᓂᐣ ᐊᕑᐯᑕ ᒥᓇ ᓂᐤ ᐯᕑᐊᐣᐢᐃᐧᐠ ᒥᓇ ᒪᓇᑐᐸ ᐁᑲᐧ ᑫᐧᐦᐃᐯᐠ᙮ ᔕᑯᐨ ᐅᐅᐁᐧ ᒪᐊᐧᐨ ᓂᐢᑕᑦ ᐁᐃᔑᓇᑲᐧᐠ ᐅᐅᒪ ᐅᐣᑌᕑᐃᔪ ᑲᑭᒪᓯᓇᐦᑲᑌᐠ᙮
ᑭᒋᐊᓂᔑᓂᓂᐃᐧ ᐅᑭᒪ ᐯᕑᓇᕑᐟ ᐸᓫᑲᐧᕑᐟ ᑭᐃᑭᑐ ᐅᐅᐁᐧ ᓇᐦᑯᒥᑐᐃᐧᐣ ᐅᒋᐊᐧᐸᑕᐦᐃᐁᐧᓭ ᐁᐦᐊᐠ ᓇᓇᑐᐠ ᐅᑭᒪᐃᐧᓇᐣ ᒥᓇ ᐊᓂᔑᓂᓂᐃᐧ ᑕᔑᑫᐃᐧᓇᐣ ᑲᐧᔭᐠ ᒋᑭᐃᐧᑕᓄᑭᒥᑎᐊᐧᐨ᙮
“ᐅᑫᐧᓂᐊᐧᐣ ᓇᐦᑯᒥᑐᐃᐧᓇᐣ ᐅᒋᓂᓯᑕᐃᐧᓇᑲᐧᐣ ᐊᓂᐣ ᐁᐃᔑᐸᑯᓭᓂᒧᐊᐧᐨ ᑕᔑᑫᐃᐧᓇᐣ ᑲᐃᐧᑕᓄᑭᒪᔭᑲᐧ ᐁᑲᐧ ᒥᓇ ᐊᒥᐅᐁᐧ ᑲᐅᒋᐅᓇᑐᔭᐠ ᑭᑭᓄᐊᒪᑫᐃᐧ ᐅᓇᒋᑫᐃᐧᓇᐣ ᒋᐃᐧᒋᐦᐃᑯᐊᐧᐨ ᐊᓂᔑᓂᓂᐃᐧ ᐅᑎᐢᑯᓂᐠ,” ᐸᓫᑲᐧᕑᐟ ᐃᑭᑐ᙮
ᑭᒋᐊᓂᔑᓂᓂᐃᐧ ᐅᑭᒪ ᒣᑲᐧᐨ ᑲᑭᐊᔭᒥᐨ ᐅᑭᐅᒋ ᐃᐧᑕᒧᐊᐧᐣ ᐊᓂᔑᓇᐯ ᐊᐢᑭ ᐅᓂᑲᓂᑕᒪᑫᐣ ᑫᐃᐧᓇᐊᐧ ᒋᑭᐃᐧᒋᐦᐃᐁᐧᐊᐧᐸᐣ ᐅᐅᐁᐧ ᒣᑲᐧᐨ ᐅᐡᑭ ᐊᓂᔑᓂᓂᐃᐧ ᑭᑭᓄᐊᒪᑫᐃᐧᐣ ᐅᓇᑯᓂᑫᐃᐧᐣ ᑲᐱᒥᐅᓇᒋᑲᑌᐟ᙮
“ᒪᐊᐧᐨ ᑭᒋᓀᐣᑕᑲᐧᐣ ᐊᐃᐧᔭᐠ ᐃᐃᒪ ᐊᓂᔑᓂᐯ ᐊᐢᑭ ᑕᔑᑫᐃᐧᓇᐣ ᑭᐃᐧᒋᑕᐧᐊᐧᐨ ᐅᐅᐁᐧ ᑲᐃᐧ ᐊᓂᐊᓂᒧᒋᑲᑌᐠ ᐁᑲᐧ ᑲᔭ ᐅᐅᐁᐧ ᑲᐅᐡᒋᑲᑌᐠ ᓇᐦᑯᒥᑐᐃᐧᐣ ᑭᔭᑦ ᐱᑯ ᑫᐃᐧᓇᐊᐧ ᑯᑕᑭᔭᐠ ᓇᓇᑐᐠ ᐅᐱᒧᒋᑫᐠ ᒋᒥᓇᑲᓄᐊᐧᐨ,” ᐸᓫᑲᐧᕑᐟ ᐃᑭᑐ᙮
ᓇᐣ ᔕᑯᐨ ᑭᐃᑭᑐ ᐊᓂᔑᓇᐯ ᐊᐢᑭ ᑭᔭᐱᐨ ᐁᓇᑲᔑᑲᐠ ᐅᐅᐁᐧ ᐅᐡᑭ ᐊᓂᔑᓂᓂᐃᐧ ᑭᑭᓄᐊᒪᑫᐃᐧᐣ ᐅᓇᑯᓂᑫᐃᐧᐣ ᒥᑲᐧᐨ ᐅᐅᐁᐧ ᓇᐦᑯᒥᑐᐃᐧᐣ ᓂᓯᑐᑕᑐᐃᐧᐣ ᓇᐣ ᒥᑲ ᐅᐣᑌᕑᐃᔪ ᐁᑲᐧ ᑲᓇᑕ ᑲᑭᒪᓯᓇᐃᐧᑎᓯᐊᐧᐨ᙮
“ᐅᐅᐁᐧ ᑲᑭᒪᓯᓇᐦᐃᑲᑌᐠ ᓇᐦᑯᒥᑐᐃᐧᐣ ᑲᐧᓂᐣ ᑕᐅᒋ ᒪᔭᑭᓭᓯᓄᐣ ᐅᐅᐁᐧ ᒣᑲᐧᐨ ᑲᓇᑲᐡᑲᒪᐠ ᐅᐅᐁᐧ ᐅᐡᑭ ᐊᓂᔑᓂᓂᐃᐧ ᑭᑭᓄᐊᒪᑫᐃᐧᐣ ᐅᓇᑯᓂᑫᐃᐧᐣ,” ᐃᑭᑐ ᑭᒋᐅᑭᒪᑲᓂᐡ ᑲᐧᔨᐢ ᑲᑭᑫᑲᒥᐠ᙮
“ᑭᑭᓄᐊᒪᑫᐃᐧᐣ ᑭᓇᑕᐁᐧᐣᑕᒥᐣ ᑲᐧᓂᐣ ᐅᓇᑯᓂᑫᐃᐧᐣ ᐁᑲᐧ ᒥᓇ ᑲᐧᔭᐠ ᔓᓂᔭᐣ ᒋᐸᑭᑎᓇᑲᓄᐨ ᒥᐡᑯᐨ ᑲᐧᔭᐠ ᒋᑭᑭᓄᐊᒪᐊᐧᑲᓄᐊᐧᐨ ᐊᓂᔑᓂᓂᐃᐧ ᐅᑎᐢᑯᓂᐠ ᐁᑲᐧ ᒥᓇ ᑲᐧᔭᐠ ᒋᑭᑫᐣᑕᓯᐊᐧᐨ ᐅᐅᒪ ᒥᓯᐁᐧ ᑲᓇᑕ᙮”
ᐅᑎᐢᑯᓂᐠ ᑲᐃᐡᑯᓄᐊᐧᐨ ᐅᑕᔑᑫᐃᐧᓂᐊᐧ $2000 ᓄᑕᒥᓇᑲᓄᐊᐧᐠ ᐊᐱᒋᐃᐧᐣ ᑕᐃᐧᓂᐠ ᑲᑕᑲᐧᑭᐣ ᐃᐡᑯᓄᐃᐧᑲᒥᑯᐣ᙮
ᒣᑲᐧᐨ 2004 ᑲᔭᑭᐊᐧᐠ ᐅᐅᒪ ᑲᓇᑕ ᑭᒋᔓᓂᔭᐃᐧᑭᒪ ᑭᐃᑭᑐᐸᐣ ᑕᐡᐱᑯᐨ ᓂᔑᑕᓇ ᐁᐃᓇᓀᐤᐅᔕᐱᔭᑭ ᒋᐱᒪᓄᑭᓇᓂᐊᐧᐠ ᐃᓂᑯᐠ ᐊᓂᔑᓂᓂᐃᐧ ᑕᔑᑭᐃᐧᓇᐣ ᐁᑲᐧ ᐅᑭᑭᓄᐊᒪᑫᐃᐧ ᐱᒧᒋᑫᐃᐧᓂᐊᐧ ᒋᑕᐱᑕᐃᐧᐡᑲᒪᑲᓂᓂᐠ ᐅᐅᒪ ᒥᓯᐁᐧ ᑲᓇᑕ᙮
“ᑲᓇᑕ ᐅᑭᒪᐃᐧᐣ ᑭᔭᐱᐨ ᐅᓇᑕᐸᑭᑎᓇᐣ ᔓᓂᔭᓇᐣ ᐃᐃᒪ ᐅᑎᐢᑯᓂᐠ ᑲᔭᐸᒋᔭᐊᐧᐨ ᑕᔑᑫᐃᐧᓂᐠ ᒥᐡᑯᐨ ᑕᐃᐧᓂᐠ ᒥᐡᑕᐦᐃ ᐃᔑᐸᑭᑎᓇᑲᓄ,” ᐃᑭᑐ ᑲᐧᔨᐢ ᑲᑭᑫᑲᒥᐠ᙮ “ᐅᑫᐧᓂᐊᐧᐣ ᐅᓇᒋᑫᐃᐧᓇᐣ ᑲᐅᒋᓯᓭᐠ ᐁᑲ ᐊᐊᐧᔑᒣ ᑭᑐᐡᑲᑎᓯᒥᓇᓇᐠ ᑲᐅᒋ ᐃᐧᒋᔭᑲᓄᐊᐧᐨ ᑕᐱᐡᑯᐨ ᐊᔕ ᐱᐅᑕᓇᐠ ᑭᒋᓇᐦᑯᒥᑐᐃᐧᐣ ᑲᑭᐅᓇᒋᑲᑌᑯᐸᓀᐣ᙮”
ᐊᓂᔑᓇᐯ ᐊᐢᑭ ᑲᔭ ᐅᑭᐃᐧᒋᑲᐸᐃᐧᑕᐣ ᐃᐃᐁᐧ ᒣᑲᐧᐨ ᑲᑭᐱᒪᑲᐧᐦᐃᑲᓂᐠ ᐃᐃᒪ ᐃᐧᑫᐧᑐᐣᐠ ᐯᔑᑯᔕᑊ ᒥᑭᓯ ᐱᓯᑦ ᑲᐃᓇᑭᓯᐨ᙮ ᐅᐅᐁᐧ ᑲᐅᒋᑐᒋᑲᑌᐠ ᐃᐃᐁᐧ ᒣᑲᐧᐨ ᐁᑭᐊᓂᒧᒋᑲᑌᐠ ᐅᐅᐁᐧ ᐅᐡᑭ ᑭᑭᓄᐊᒪᑫᐃᐧᐣ ᐅᓇᑯᓂᑫᐃᐧᐣ᙮