ᑭᒋᓇᒣᑯᓯᑊ ᐃᓂᓂᐗᐠ ᑲᓂᐊᐣᒋᑭᔑᑲᐠ ᒪᓯᓇᑌᓯᒋᑲᓂᔭᑊ ᐅᐸᑯᓭᑕᓇᐗ ᒋᐊᓄᑲᑌᐠ ᒥᓯᐌ ᐊᑭᐠ ᑐᑭᐎᐣ

ᐊᓂᔑᓂᓂᐗᐠ ᑲᐯᔑᓇᑯᑎᓂᐠ ᑲᐃᔑᑲᐯᔑᐗᐨ ᐊᐦᑭᐠ ᐃᐃᒪ ᑭᒋᓇᒣᑯᓯᑊ ᐃᓂᓂᐗᐠ ᐅᑕᓂᑭᑫᑕᓇᐗ ᑲᓂᓯᓭᐠ ᑲᓂᑭᔡᔭᐠ ᐅᐅᒪ ᐊᐦᑭᐠ᙮
ᑲᑲᑭᑫᑕᑯᐠ ᑫᓂᔑᑭᔑᑲᐠ ᐊᓂᐅᒋ ᐊᓂᒥᓭᐗᐠ ᑲᐸᐸᒥᔭᔭᐗᐨ ᒋᒪᓂᐠ ᐃᐃᒪ ᑭᒋᓇᒣᑯᓯᐱᐠ, ᑲᔭᔭᐣᒋᓭᐠ ᑲᐃᔑᑭᔑᑲᐠ ᒣᑾᐨ ᑲᐱᐳᐠ ᓂᓂᑌᑕᑯᐣ ᑲᐸᐸᒥᔭᔭᓂᐗᐠ ᐃᐃᒪ ᐅᑭᑎᒥᑯᒼ, ᒥᓇ ᑲᐅᒋᑭᑫᒋᑲᑌᐠ ᑫᓂᔑᑭᔑᑲᐠ ᑎᓄᑲᐣ ᑲᐗᐗᑌᐠ ᑭᐌᑎᓄᐠ ᑲᐎᐣ ᒋᓇᒋᒧᒪᑲᐠ ᑲᑭᐱᔑᑭᑫᒋᑲᑌᐠ ᑲᐃᓇᒋᒧᒪᑲᑭᐣ ᑫᓂᔑᑭᔑᑲᐠ᙮
ᑫᑭᑐᑕᒧᐗᐨ, ᑭᒋᓇᒣᑯᓯᑊ ᐃᓂᓂᐗᐠ ᐅᐸᑭᑎᓇᓇᐗ ᐃᑭᑐᐎᓇᐣ ᒥᓇ ᑭᑫᑕᒪᐎᓇᐣ ᑲᐃᔑᑭᑫᑕᒧᐗᐨ ᑭᒋᔭᔭᐠ ᒥᓇ ᐅᓂᑲᓂᑕᒪᑫᐠ ᐃᐃᐌ ᐅᐣᒋ ᑲᓂᑭᔡᔭᐠ ᐁᑭᒪᓯᓇᑌᓯᑐᐗᒋᐣ ᐁᐃᔑᓂᑲᑌᐠ ᑲᐸᑭᑕᓇᒧᒪᑲᐠ ᐊᐦᑭᐣ᙮
“ᑭᒋᔭᔭᐠ ᐅᑕᓂᓂᓯᑕᐎᓇᓇᐗ ᑲᓂᐊᐣᒋᓭᐠ ᑲᐃᔑᑭᔑᑲᐠ ᒥᓇ ᑲᓂᔑᑭᔑᑲᐠ,” ᐃᑭᑐ ᑲᑭᑐᒋᑫᑕᒪᑫᐨ ᑭᒋᓇᒣᑯᓯᐃ ᐃᓂᓂᐗᐠ ᒑᐣ ᑲᐟᐱᐟ᙮ “ᓂᓇᐎᐟ ᑲᐅᑕᑎᓯᔭᐠ ᐊᐦᑭᑲᐠ, ᑲᔦᒪ ᐯᔓᐣᐨ ᑲᑲᐯᔑᔭᐠ ᐊᐦᑭᑲᐠ, ᒪᐗᐨ ᐊᓂ ᓂᓂᑌᑕᑯᐣ᙮”
ᑲᐟᐱᐟ ᐃᑭᑐ ᐃᑭᐌᓂᐗᐠ ᑭᒋᓇᒣᑯᓯᐱᐠ ᐃᓂᓂᐗᐠ ᑭᒋᔭᔭᐠ ᐃᔑᐎᑕᒪᑫᐗᐠ ᑭᒋᓇᒣᑯᓯᐱᐠ ᐃᓂᓂᐗᐠ ᐊᐗᔑᒣ ᒋᑭᑐᑕᒧᐗᐸᐣ ᒋᒪᓇᒋᒋᑲᑌᐠ ᓯᐱ ᒥᓇ ᐊᐦᑭ ᐁᑲ ᒋᒪᒋᑕᓂᐗᐠ᙮
“ᑭᒋᔭᔭᐠ ᐃᑭᑐᐗᐠ ᐃᐃᐌ ᑲᒪᓇᒋᒋᑲᑌᐠ ᐊᐦᑭ, ᑲᐎᓂᐣ ᐃᑴᑕ ᐊᐦᑭᐤ ᒪᒋᑕᐎᓇᐣ ᑲᒪᒋᒋᑫᒪᑲᑭᐣ ᒥᓇ ᑲ ᐊᓂᒥᓭᐦᐃᐌᒪᑲᐠ ᑲᓂᑭᔡᔭᐠ ᒋᑭᐊᓄᑭᒋᑲᑌᐠ,” ᑲᐟᐱᐟ ᐃᑭᑐ᙮ “ᑲᓂᐊᐣᒋᑭᔑᑲᐠ ᒥᓇ ᑲᓂᑭᔡᔭᐠ ᑲᑭᒪᐡᑲᐎ ᑲᓇᐗᐸᑕᒥᐣ᙮ ᑭᒋᓀᑕᑯᐣ ᒋᐎᑕᒪᐗᑲᓀᐗᐨ ᐊᓂᔑᓂᓂᐗᐠ ᐁᓯᓭᐠ ᑲᓂᑭᔡᔭᐠ ᐁᓯᓭᐦᐃᐌᒪᑲᐠ ᐃᑭᐌᓂᐗᐠ ᑲᐅᑕᑎᓯᐗᐨ ᐊᐦᑭᑲᐠ᙮”
ᑲᐸᑭᑕᓇᒧᒪᑲᐠ ᐊᐦᑭᐣ ᑭᐸᑭᑎᓂᑲᑌᐠ ᐁᓂᔕᑭᐣ ᐃᐃᒪ ᐱᐗᐱᑯᐠ, ᒋᑭᐅᒋ ᑭᑫᑕᒧᐗᐨ ᐃᑭᑐ ᑲᐟᐱᐟ ᒋᐎᒋᐦᐃᑯᐗᐨ ᐊᓂᔑᓂᓂᐗᐠ ᐅᐎᑕᒪᑫᐎᓂᐗ ᒥᓯᑌᑲᒥᐠ᙮
ᑲᑭᒪᓯᓇᑌᓯᒋᑲᑌᐠ ᑲᐃᔑᓂᑲᑌᐠ ᐅᑭᐎᑕᓇᐗ ᑭᒋᔭᔭᐠ ᑲᑭᔑᓂᑲᒋᑲᑌᐠ ᐃᐃᐌ ᒪᐡᑭᐠ -- ᐁᐅᒋᑭᑭᓇᐗᒋᒋᑲᑌᐠ ᑲᐅᒋ ᐸᑭᑕᓇᒧᒪᑲᐠ ᐊᐦᑭ ᒥᓇ ᐁᑭᒋᓀᑕᑯᐠ ᒋᒪᓇᒋᒋᑲᑌᐠ ᑭᐌᑎᓄᐠ ᑲᔑᐱᒥᐎᒋᑫᒪᑲᐠ ᐊᐦᑭᐣ᙮
ᓂᑕᒼ ᑲᑭᒪᓯᓇᑌᓯᒋᑲᑌᐠ ᑭᓇᑲᒋᒋᑲᑌ ᑲᓂ ᐊᐣᒋᓭᐠ ᐊᐦᑭᐣ ᑭᒋᔭᔭᐠ, ᐅᓂᑲᓂᑕᒪᑫᐠ ᒥᓇ ᐅᐡᑲᑎᓴᐠ ᑲᐸᐸᒥᓯᐗᐨ ᐁᓇᑲᒋᑐᐗᐨ᙮
“ᒥᐌ ᑲᐃᓯᓭᑭᐸᐣ ᐅᑕᓇᐠ ᐁᑭᑭᑫᒋᑲᑌᐠ ᑫᐃᔑ ᑭᔑᑲᐠ ᐗᐸᐠ ᑲᓂᐸᑭᔑᒧᐠ ᒥᓇ ᑲᒥᐢᑾᑌᐠ,” ᐃᑭᑐ ᑭᒋᔭᔭ ᒍᓯ ᒪᑫ ᑲᓂᒪᒋ ᒪᓯᓇᑌᓭᐠ ᒪᓯᓇᑌᓯᒋᑲᓂᔭᑊ᙮ “ᑲᐎᐣ ᐃᐃᐌ ᒋᐊᓄᑭᒪᑲᐠ ᐊᐸᐣ ᑭᑭᓄᒪᑫᐎᐣ᙮ ᓄᑯᒼ ᑲᐃᓇᐱᔭᐣ ᐃᐡᐱᒥᐠ ᒥᓇ ᐁᐃᑭᑐᔭᐣ ᐗᐸᐠ ᒋᒥᓄᑭᔑᑲᐠ ᒥᔭᐸᐣ ᑲᓂᐗᐸᐠ ᐁᑭᒧᐗᐠ᙮”
“ᑲᑭᓇ ᑫᑯᐣ ᑲᐗᐸᑕᒪᐠ ᐊᐣᒋᓇᑯᓄᐣ,” ᒪᑫ ᐃᑭᑐ᙮ “ᑲᓂᐱᐠ ᒪᐗᐨ ᐁᓂ ᐊᐱᒋ ᑭᔑᑌᐠ᙮ ᑲᐎᐣ ᐎᑲ ᐃᐃᐌ ᐅᒋᔑᐌᐸᓯᓄᐣ᙮ ᒥᓇ ᑲᓂᑕᑾᑭᐠ, ᐎᐸᐨ ᐊᐸᐣ ᐊᓂᑕᑲᔭ᙮ ᑲᐎᐣ ᐎᑲ ᑐᒋᐗᐸᑕᓯᐣ ᐃᐃᐌ ᒋᓯᓭᐠ, ᒣᑾᐨ ᑲᑭᐱ ᐅᐡᑭᓂᑭᐎᔭᐣ᙮”
ᒪᓯᓇᑌᓯᒋᑲᓂᔭᑊ ᐊᓂᐊᓂᒧᒋᑫᒪᑲᐣ ᑲᓂᔑ ᓴᓇᑭᓭᐗᐨ ᐅᐅᐌ ᑲᓂᑭᔡᔭᐠ ᒥᓇ ᐁᓂᓇᓇᑲᒋᒋᑲᑌᐠ ᑭᒋᓇᒣᑯᓯᐱᐠ ᐃᓂᓂᐗᐠ ᑲᑐᑕᒧᐗᐨ ᒋᒪᓇᒋᑐᐗᐨ ᓯᐱᓂ ᐁᑲ ᒋᒪᒋᑕᓂᐗᐠ ᐃᐃᒪ᙮
“ᓂᐱ ᑭᒋᓀᑕᑯᐣ᙮” ᐃᑭᑐ ᓭᕒᐊ ᒉᐣ ᒪᑫ ᓂᔡ ᑲᓂᒪᓯᓇᑌᓭᐠ ᒪᓯᓇᑌᓯᒋᑲᓂᔭᑊ᙮ “ᑭᑭᒥᓂᑯᒥᐣ ᓂᐱ ᒋᐅᑕᑎᓯᔭᐠ ᒥᓇ ᒋᑭᐅᒋ ᐱᒪᑎᓯᔭᐠ᙮ ᓂᒪᒪ ᒥᔑᓋ ᑭᐎᑕᒪᐠ ᒪᐗᐨ ᐁᑭᒋᓀᑕᑯᐠ ᓂᐱ ᑲᐃᒋᑲᑌᐠ ᒥᓇ ᐁᑲ ᐎᑲ ᒋᐸᑭᑎᓇᒪᐣ ᓂᐱᑲᐠ ᑫᐅᒋ ᓂᔑᐗᓇᑕᐠ᙮”
ᒪᓯᓇᑌᓯᒋᑲᓂᔭᑊ ᐎᑕᒪᑫᒪᑲᐣ ᒥᓇ ᓇᓇᑲᒋᒋᑫᒪᑲᐣ ᑲᑭᑭᐸᐦᐅᐨ ᐅᑭᒪᐠ ᑯᑖᓯ, ᑲᑭᐃᓯᓭᑭᐸᐣ ᐅᑭᒪᑲᐣ ᑖᓂ ᒫᕒᐃᐢ ᒥᓇ ᓂᔭᐣ ᐅᓂᑲᓂᑕᒪᑫᐠ ᑲᑭᑭᐸᐦᐅᐨ ᑲᑭᓇᑲᐡᑲᒧᐗᐸᐣ ᓄᑕᓯᓂᑫᐠ ᑲᓇᓇᑲᒋᒋᑫᐗᐠ ᐊᐦᑭᑲᐠ ᐃᐃᒪ ᑲᐅᒋᑎᐯᑕᑯᐠ ᑭᒋᓇᒣᑯᓯᐱᐠ ᐃᓂᓂᐗᐠ ᐊᐦᑭᐣ᙮ ᒥᓇ ᑎᐸᒋᒧᒪᑲᐣ ᑲᑭᔑᒥᑲᒧᐗᐨ ᐊᓂᔑᓂᓂᐗᐠ ᑲᑲᑴᒪᓇᒋᑐᐗᐨ ᓯᐱᓂ ᐁᑲ ᒋᓄᑕᓯᓂᑫᓇᓂᐗᐠ ᒥᓇ ᐊᐦᑭᐤ ᒪᒋᑕᐎᓇᐣ ᐁᑲ ᒋᑐᒋᑲᑌᑭᐣ ᐃᐃᒪ, ᒥᓇ ᐁᑕᑯᓂᑲᑌᐠ ᑎᐸᒋᒧᐎᐣ ᐁᑲᑴᐎᑕᓄᑭᒪᑲᓀᐨ ᑲᓇᑕ ᐅᑭᒪᐎᐣ ᐃᐃᐌ ᐊᐦᑭᐤ ᐅᓇᒋᑫᐎᐣ ᒥᓇ ᐁᐃᔕᒪᑲᐠ ᐃᐃᒪ ᑲᓇᑕ ᑭᒋᓇᑯᓂᑫᐎᑲᒥᑯᐠ ᒋᑭᐅᒋᒥᐣᒐᒥᓇᒧᐗᐨ ᒋᐱᒥᐎᑐᐗᐨ ᐅᑕᐦᑭᒥᐗ᙮
ᔕᑯᐨ ᑲᐃᔑᑎᐸᒋᒧᒪᑲᐠ ᒪᓯᓇᑌᓯᒋᑲᓂᔭᑊ ᑲᐸᑭᑕᓇᒧᒪᑲᐠ ᐊᐦᑭᐣ ᑲᐃᔑᓂᑲᑌᐠ ᐃᐃᐌ ᑲᓂᑭᔡᔭᐠ ᐁᓯᓭᐦᐃᑯᐗᐨ ᐊᓂᔑᓂᓂᐗᐠ ᐃᐃᒪ ᑭᒋᓇᒣᑯᓯᑊ ᐃᓂᓂᐗᐠ, ᒥᓇ ᐊᓂᔑᓂᓂᐗᐠ ᑲᐃᔑ ᑲᑴᒪᓇᒋᑐᐗᐨ ᓯᐱᓂ ᒋᑭᑕᑯᓂᑲᑌᐠ ᑲᐃᔑᐊᓄᑭᒋᑲᑌᐠ ᑲᓂᑭᔡᔭᐠ ᒥᓯᑌᑲᒥᐠ᙮
“ᑲᑴ ᐎᒋᐦᐊᒥᐣ ᔭᐎᔭᐠ ᒋᓂᓯᑐᑕᒧᐗᐨ ᑭᒋᓇᒣᑯᓯᑊ ᐃᓂᓂᐗᐠ ᐁᑭᒋᓀᑕᒧᐗᐨ ᒋᑭᐊᓂᒧᒋᑲᑌᐠ ᑲᓂᑭᔡᔭᐠ, ᑲᐎᐣ ᐃᑴᑕ ᑭᒋᓇᒣᑯᓯᑊ ᐃᓂᓂᐗᐠ ᒥᓯᐌ ᐱᑯ ᔭᐎᔭ ᒋᑭᐊᓂᒧᑕᑭᐸᐣ,” ᑲᐟᐱᐟ ᐃᑭᑐ᙮
ᑲᐟᐱᐟ ᐃᑭᑐ ᓄᑯᒥᑫ ᑲᑭᒪᐗᒋᐦᐃᑎᐗᐨ ᑭᒋᓇᒣᑯᓯᑊ ᐃᓂᓂᐗᐠ ᒥᓇ ᐊᓂᔑᓂᓂᐗᐠ ᐊᑭᐅᒋᐗᐨ ᑭᒋᑭᐌᑎᓄᐠ ᐊᓬᐊᐢᑲ ᒥᓇ ᐊᑲᒪᑭᐠ ᐱᐣᓬᐊᐣᐟ ᑭᐅᒋ ᑭᑫᒋᑲᑌ ᒋᐎᑕᒪᑎᓇᓂᐗᐠ ᑎᐸᒋᒧᐎᓇᐣ ᒥᓇ ᑭᑫᑕᒪᐎᓇᐣ ᑲᐃᔑᑭᑫᒋᑲᑌᐠ ᑲᓂᑭᔡᔭᐠ ᒥᓯᐌ ᒋᑭᑎᐸᒋᒧᓇᓂᐗᐠ᙮
ᐅᑭᐎᑕᐣ ᑲᓂᑭᔡᔭᐠ ᐃᐃᒪ ᑫᐎᓇᐗ ᐁᐊᓂᒥᓭᐗᐨ ᑲᐅᑕᑎᓯᐗᐨ ᐊᐦᑭᑲᐠ, ᐁᐅᒋ ᒥᑯᐡᑲᑌᑕᒧᐗᐨ ᐃᐃᒪ ᐊᓂᔑᓂᓂᐗᐠ ᑭᒋᓇᒣᑯᓯᐱᐠ ᐃᓂᓂᐗᐠ᙮ ᐃᐃᐌ ᑎᓄᑲᐣ, ᐃᐃᒪ ᐱᐣᓬᐊᐣᐟ ᐊᑲᒪᑭᐠ, ᓵᒥ ᐊᓂᔑᓂᓂᐗᐠ ᐅᑕᓂᑭᑫᑕᓋ ᒥᓇ ᐁᓂᓯᑕᐎᓇᒧᐗᐨ ᑲᓂᑭᔡᑲᒥᐠ ᓂᐱ ᐃᓂᐌᓂᐗᐣ ᑭᓄᔐ ᐗᐦᑯᓇᐣ ᐁᐅᔕᐗᐡᑾᑭᐣ, ᐁᑲ ᐁᒥᐡᑾᑭᐣ, ᒥᓇ ᐁᑲ ᒋᑭᐱᒪᑎᓯᐗᐨ ᑲᑕᑲᑲᒥᐠ ᑭᓄᔐᐠ ᑎᓄᑲᐣ ᓇᒣᑯᐢ᙮
“ᐃᐃᒪ ᐱᐗᐱᑯᐠ, ᐊᓂᔑᓂᓂᐗᐠ ᑕᑭᐎᑕᒪᑎᐗᐠ ᐎᑕᒪᑫᐎᓇᐣ,” ᑲᐟᐱᐟ ᐃᑭᑐ᙮ “ᒥᓯᑌᑲᒥᐠ ᑕᑭᐃᓯᓭ ᑎᐸᒋᒧᐎᓇᐣ᙮ ᑭᒋᓀᑕᑯᐣ ᒋᐎᑕᒪᑎᓇᓂᐗᐠ ᑲᓂᔑᒥᑭᑲᑌᐠ ᐃᓯᓭᐎᓇᐣ ᒥᓇ ᒋᑭᓇᑭᐡᑲᐗᑲᓀᐗᐨ ᑯᑕᑭᔭᐠ ᐃᓂᓂᐗᐠ ᒥᓯᑌᑲᒥᐠ, ᑭᒋᓀᑕᑯᐣ ᓄᑯᒼ ᐅᐅᐌ ᑲᓂᓯᓭᐠ, ᑲᑭᑫᑕᒧᐗᐨ ᒋᑭᐎᒋᐦᐃᑎᐗᐨ ᒥᓇ ᒋᑭᐊᓂᒥᔕᐠ ᐎᑕᒪᑫᐎᐣ ᒥᓇ ᐎᒋᐦᐃᐌᐎᓇᐣ᙮”
ᐃᐃᐌ ᒪᓯᓇᑌᓯᒋᑲᓂᔭᑊ ᑲᑭᒥᑲᐣ ᓇᓇᑕᐗᐸᑕᒪᐣ ᑲᐸᑭᑕᓇᒧᒪᑲᐠ ᐊᐦᑭᐣ ᐃᐃᒪ ᐱᐗᐱᑯᐠ᙮