ᑭᐡᑭᓇᒪᐊᐧᐊᐧᐠ ᔓᓂᔭ ᐅᐣᑌᕑᐃᔪ ᐅᑭᒪᑲᓇᐠ ᒥᓇ ᐅᑭᒪᑲᓇᐠ ᑲᐱᑭᓯ ᒪᒪᐊᐧᓄᑭᐊᐧᐨ

ᒥᔑᐣ ᐅᐣᑌᕑᐃᔪ ᐅᑭᒪᑲᓇᐠ ᑲᐱᑭᓯ ᒪᒪᐊᐧᓄᑭ ᐱᒧᒋᑫᐊᐧᐨ ᒥᓇ ᑯᑕᑭᔭᐠ ᑲᐅᒋᒥᓯᐁᐧ ᑲᓇᐊᐧᐸᒋᑫᑕᒪᑫᐊᐧᐨ ᐅᑭᒪᑲᓇᐠ ᑕᑭᐡᑭᓇᒪᐊᐧᑲᓄᐊᐧᐠ ᔓᓂᔭᐣ ᑲᐱᒥ ᐸᑭᑎᓇᒪᐃᐧᑕᐧ ᐊᑯᓇᐠ 64 ᐳᕑᓭᐣᐟ ᑲᐃᔑᐱᒥ ᒪᒪᐃᐧ ᒥᓂᑕᐧ ᑕᓱᔭᑭ.
ᐅᐣᑌᕑᐃᔪ ᑭᒋᐅᑭᒪᑲᐣ ᐢᑕᐣ ᐯᕑᑎ ᐅᑎᔑᐊᐧᐸᑕᐣ ᓄᑯᒥᑫ ᑲᓇᑕ ᒥᓇ ᐅᐣᑌᕑᐃᔪ ᑭᒋᐅᑭᒪᐠ ᑲᑭ ᑭᐡᑭᓇᐊᐧᐨ ᔓᓂᔭᐣ ᐊᓂᔑᓂᓂᐃᐧ ᐱᒧᒋᑫᐃᐧᓇᐣ ᑲᐃᔑᐸᑭᑎᓇᑲᓄᐸᐣ ᐁᑲ ᐊᐱᐣ ᐃᒪ ᒋᑭᐅᐣᒋ ᑲᐧᔭᐠ ᑲᑲᓄᑕᒧᐊᐧᐨ ᐅᑎᓯᓭᐃᓂᐊᐧ ᐊᓂᔑᓂᓂᐊᐧᐠ.
“ᒥᑐᓂ ᐱᑯ ᓂᓯᑕᐃᐧᓇᑲᐧᓂ ᑫᑯᓀᐣ ᑲᑭᐅᒋ ᑭᐡᑭᓇᒪᑯᔭᐠ ᔓᓂᔭᐣ ᐁᐃᐧᐅᒋ ᑭᐸᑯᐡᑲᒪᑯᔭᐠ ᐁᑲ ᐃᒪ ᒋᑭᐅᒋ ᔕᑯᒋᐡᑭᑫᔭᐠ ᑫᑭᓇᐃᐧᐟ ᑲᐃᓀᑕᑯᓯᔭᐠ ᒋᔑᐱᒥᔭᓄᑕᒪᐠ ᑲᑲᑫᐧ ᑲᓇᐁᐧᑕᒪᓱᔭᐠ ᑭᑕᑭᒥᓇᐣ ᒥᓇ ᑭᓇᐃᐧᐟ ᑲᑲᑫᐧ ᐅᓇᔓᐊᐧᑕᒪᐠ ᑫᑭᔑ ᐱᒥᓂᔕᐦᐃᑲᑌᑭᐸᐣ ᑲᐃᐧᐱᑲᑫᐧ ᒪᑕᓄᑭᐊᐧᐨ ᑭᑕᑭᒥᓇᓂᐠ ᑲᐃᐧᐱᒪᓂᔓᓂᔭᐊᐧᑕᒧᐊᐧᐨ ᐱᒥᑌ, ᐃᐡᑯᑌ ᒥᓇ ᐱᐊᐧᐱᑯᑫᐃᐧ ᐱᒧᒋᑫᐃᐧᓇᐣ ᑲᑎᐯᑕᒧᐊᐧᐨ,” ᐃᑭᑐ ᐯᕑᑎ.
ᐁᑲᐧ ᒥᓇ ᐁᐧᑎ ᐅᐣᑌᕑᐃᔪ ᐅᑭᒪᑲᓇᐠ (COO) ᐊᔕ ᐅᑭᐸᑭᑎᓇᐊᐧᐣ 10 ᐅᑕᓄᑭᓇᑲᓂᒥᐊᐧᐣ 80 ᐳᕑᓭᐣᐟ ᑲᑭ ᐃᐡᑲᐧ ᑭᐡᑭᓇᒪᐃᐧᑕᐧ ᔓᓂᔭᐣ ᐃᒪ ᑲᓇᑕ ᒥᓇ ᐅᐣᑌᕑᐃᔪ ᐅᑭᒪᐃᐧᓂᐠ ᑲᑭᐅᐱᒋᐱᒥ ᒪᒥᓂᑕᐧᐸᐣ ᒋᐱᒥᔭᓄᑭᐊᐧᑫᐊᐧᐨ. ᑲᑭᐸᑭᑎᓂᑕᐧ ᐊᓄᑭᓇᑲᓇᐠ ᐅᑲᐅᒋ ᐸᑭᑌᐡᑲᑯᓇᐊᐧ ᐊᓂᔑᓂᓂᐊᐧᐠ ᑲᐃᔑᑲᑲᐯᔑᐊᐧᐨ ᐅᑎᐡᑯᓂᑲᓂᐊᐧᐠ ᑲᐅᒋᐱᒥᔭᐯᓂᒧᐣᑕᒧᐊᐧᐨ COO ᑲᑭᒋᓀᑕᑲᐧᑭᐣ ᒥᓯᐁᐧ ᑫᑯᓇᐣ ᑲᐅᒋᐱᒥ ᐅᓀᒋᑲᑌᑭᐣ ᓂᑲᓂᑕᒪᑫᐃᐧᓂᐠ ᑫᐅᒋ ᒥᓄᓭᐊᐧᐸᐣ ᐃᒪ ᐊᓄᑭᑕᒪᑫᐃᐧᓂᐠ, ᐅᐡᑲᑎᓯᐃᐧ ᐃᐧᒋᐦᐃᐁᐧᐃᐧᓇᐣ ᒥᓇ ᐊᓄᑭᐃᐧ ᐅᐣᒋᑕᒪᑫᐃᐧᓇᐣ.
ᐯᕑᑎ ᑲᔦ ᐅᑭᐃᐧᐣᑕᐣ ᐊᐣᑎ ᑫᐃᔑᐊᓂᒥᓭᓂᐠ ᒥᐢᑕᐦᐃ ᑲᑭᐡᑭᓂᐨ ᔓᓂᔭ ᒣᑲᐧᐨ ᑲᐱᒥᔭᓄᑲᑌᑭᐸᐣ ᐊᓂᔑᓂᓂᐊᐧᐠ ᐅᑕᑭᒥᐊᐧ ᑲᑭᒪᑲᒥᑕᐧᐸᐣ ᑲᐱᒥᓇᓇᑲᒋᒋᑲᑌᐠ ᒋᑭᑭᐁᐧᒥᓂᑕᐧ.
“ᒥᑐᓂ ᓂᐊᐧᐊᐧᓀᑕᐣ ᑫᑯᓀᐣ ᐦᐊᕑᐳᕑ ᑭᒋᐅᑭᒪ ᑲᑭᐅᐣᒋᐃᓀᑕᐠ ᐁᑲ ᒪᔑ ᑲᑭᒪᒥᓇᐧᒋᑲᑌᑭᐣ ᐊᐦᑭᐃᐧ ᒪᑲᒥᑯᐃᐧᓇᐣ (ᒥᐦᐃᒪ ᑫᐅᒋᒪᑲᐠ ᑲᑭᐡᑭᓇᑲᓄᐨ ᔓᓂᔭ ᑲᐃᐧᔑᐊᐸᑎᓯᐸᐣ ᐊᐦᑭᐃᐧ ᓴᑲᑲᒋᑫᐃᐧᓇᐣ ᒋᐊᓄᑲᑌᑭᐣ) ᐊᓂᐣ ᑕᐡ ᑫᑭᐃᔑᐃᐧᒋᐦᐃᑯᐊᐧᐸᐣ ᐸᐸᑲᐣ ᐊᐃᐧᔭᐠ ᐃᐧᐱᐃᐧᑕᓄᑭᒪᐊᐧᐨ ᐊᓂᔑᓂᓂᐊᐧᐠ ᐅᑕᑭᒥᐊᐧᐠ ᓇᐣᑕ ᐯᔓᐨ ᐊᓂᔑᓂᓂᐊᐧᐠ ᐅᑕᑭᒥᐊᐧᐠ ᐅᒪ ᐅᐣᑌᕑᐃᔪ ᐊᐦᑭᐠ,” ᐃᑭᑐ ᐯᕑᑎ. “ᑌᐯᐧᓴ ᑕᑭᐅᐣᒋ ᒪᒋᐱᒋᑫᒪᑲᐣ.”
ᐁᑲᐧ ᒥᓇ ᐃᑭᐁᐧᓂᐊᐧᐠ ᐅᑭᒪᑲᓇᐠ ᑲᐅᒋ ᐸᐱᑭᓯ ᐱᒧᒋᑫᐊᐧᐨ ᒥᓯᐁᐧ ᐅᐣᑌᕑᐃᔪ ᒥᓇ ᑲᓇᑕ ᐊᐦᑭᐠ ᑫᐃᐧᓇᐊᐧ ᑭᑭᐡᑭᓇᒪᐊᐧᑲᓄᐊᐧᐠ ᔓᓂᔭᐣ ᑲᐅᒋᐱᒥᔭᓄᑭᐊᐧᑫᐊᐧᐨ, ᐊᔑᐨ ᑭᐁᐧᑎᓄᐠ ᐅᑭᒪᑲᓇᐠ ᒥᓂᑯᐠ 64 ᐳᕑᓭᐣᐟ, ᐁᑲᐧ ᒥᓇ ᐃᑭᐁᐧᓂᐊᐧᐠ ᑊᐃᐧᑎᑯᓯᐣᐠ ᓀᔭᔑᐣᐠ ᐱᒧᒋᑫᐃᐧᐣ ᑭᑭᐡᑭᓇᒪᐊᐧᐊᐧᐠ 61 ᐳᕑᓭᐣᐟ, ᔑᐸᐧᑲᒪ ᐅᑭᒪᑲᓇᐠ ᑭᑭᐡᑭᓇᒪᐊᐧᐊᐧᐠ 54 ᐳᕑᓭᐣᐟ, ᒪᐡᑭᑯᐊᐧᐠ ᐅᑭᒪᑲᓇᐠ 53 ᐳᕑᓭᐣᐟ ᑭᑭᐡᑭᓇᒪᐊᐧᐊᐧᐠ, ᑲᑎᐱᓇᐁᐧ ᐱᒧᓂᑎᓱᐊᐧᐨ ᐅᑭᒪᑲᓇᐠ 51 ᐳᕑᓭᐣᐟ, ᐃᐧᐣᑎᑯ ᐅᑭᒪᑲᓇᐠ 45 ᐳᕑᓭᐣᐟ ᐁᑲᐧ ᒥᓇ ᒪᑕᐊᐧ ᐅᑭᒪᑲᓇᐠ 41 ᐳᕑᓭᐣᐟ.
“ᒣᑲᐧᐨ ᓂᐱᒥᔭᓄᑕᒥᐣ ᐊᐣᑎ ᑫᐃᔑᒪᒥᓇᐧᒋᑫᔭᐠ ᒥᓇ ᓂᐃᐧᑲᑫᐧ ᑐᑕᒥᐣ ᒋᔑᐱᒥᔭᓄᑭᔭᐠ ᒥᓂᑯᐠ ᑲᑭᐃᔑᒥᓂᑯᔭᐠ ᒋᐱᒥᔭᓄᑭᐊᐧᑫᔭᐠ ᔓᓂᔭ,” ᐃᑭᑐ ᒪᑲᓇᐟ ᑭᓂᑲᐧᓇᐡ, ᔑᐸᐧᑲᒪ ᐱᒧᒋᑫᐃᐧᐣ ᑲᐅᑭᒪᐃᐧᐨ. “ᓂᐦᓱᐊᑫᐧᑕᐊᐧᑌᓂ ᑲᐃᔑᐱᒧᒋᑫᐊᐧᐨ. ᐁᑲᐧ ᓂᓇᐃᐧᐟ ᐃᒪ ᓂᔑᐣ ᑲᐃᔑᐊᑫᐧᑕᐃᐧᓭᐠ ᓂᑎᔑᔭᒥᐣ ($350,00 ᒥᓂᑯᐠ ᐸᑭᑎᓇ ᔓᓂᔭ), ᐁᑲᐧ ᒥᑐᓂ ᐱᑯ ᑕᓴᓯᐣᒋᓭ ᑫᔭᓂᐸᐱᒥᓭᐠ ᓂᑲᐣ. ᓂᑭᐸᑭᑎᓇᒥᐣ ᑲᔦ ᐊᑎᐟ ᐊᓄᑭᓇᑲᓇᐠ ᒥᓇ ᓂᑭ ᑭᐡᑭᓇᒥᐣ ᐊᑎᐟ ᐊᓄᑭᑕᒪᑫᐃᐧᓇᐣ.”
ᑭᓂᑲᐧᓇᐡ ᐃᑭᑐ ᔑᐸᐧᑲᒪ ᐃᐡᑯᓂᑲᓇᐣ ᐊᔕ ᒥᑐᓂ ᓇᓄᑌᓭᐊᐧᐠ ᔓᓂᔭᐣ ᑲᓇᑕᐁᐧᑕᑲᐧᑭᐣ ᐅᐡᑭ ᐃᐧᒋᐦᐃᐁᐧᐃᐧᓇᐣ ᑲᑲᑫᐧ ᐅᐣᒋᑕᒪᑫᐊᐧᐨ.
“ᒥᑐᓂ ᑕᐡ ᑲᑭᓇ ᑲᐅᐣᒋ ᑭᒋᐊᓂᒥᐦᐃᑯᒥᐣ ᐅᐁᐧ ᑲᐃᔑᓇᑭᐡᑲᒪᐠ,” ᐃᑭᑐ ᑭᓂᑲᐧᓇᐡ. “ᒥᑲᓇᐱᑯ ᐁᑕ ᐁᔑᓇᑲᐧᐠ ᒋᑭᐅᐣᒋ
ᐊᐧᐃᐧᒋᐦᐃᑎᔭᑭᐸᐣ ᒋᐅᒋ ᑲᐡᑭᑐᔭᐠ ᐁᑲ ᒋᐳᓂᓭᐠ ᑲᐱᒥᔭᓄᑭᔭᐠ.”
ᑭᓂᑲᐧᓇᐡ ᐃᑭᑐ ᑲᐃᐧᐣ ᑭᑭᓇᐊᐧᑲᐨ ᓇᐣᑕ ᐃᑭᑐᓯᐊᐧᐠ ᐅᑭᒪᑲᓇᐠ ᐊᓂᐣ ᐁᓀᑕᒧᐊᐧᑫᐧᐣ ᐅᐁᐧᓂ ᑲᑭ ᑭᐡᑭᓇᑲᓄᐨ ᔓᓂᔭ.
“ᐁᑲ ᒪᐃᐧᐣ ᐃᑯ ᒪᔑ ᐁᒥᑫᐧᐣᒋᑲᑌᐠ ᓂᑎᓀᑕᐣ ᐁᑲ ᒪᔑ ᓇᐣᑕ ᑲᐅᒋᐃᑭᑐᐊᐧᐨ,” ᐃᑭᑐ ᑭᓂᑲᐧᓇᐡ. “ᐸᓂᒪ ᓇᐣᑕ ᐯᔑᑯᔭᑭ ᑭᔭᓂᓯᓭᐠ ᑕᓂᒥᑫᐧᐣᒋᑲᑌ ᐃᒪ ᑕᔑᑫᐃᐧᓇᐣ ᑲᑭ ᑭᐡᑭᓂᑲᑌᑭᐣ ᐅᓄᐁᐧᓂᐊᐧᐣ ᐊᓄᑭᐃᐧᓇᐣ.”
ᑭᓂᑲᐧᓇᐡ ᐃᑭᑐ ᔑᐸᐧᑲᒪ ᐃᐡᑯᓂᑲᓇᐣ ᐅᑲᓇᓇᑐᓇᓇᐊᐧ ᐊᐣᑎ ᑫᑭᐅᐣᒋ ᐃᐧᒋᐦᐃᑎᓱᒪᑲᑭᐣ ᑲᑭᐅᐣᒋ ᑭᐡᑭᓇᑲᓄᐨ ᔓᓂᔭ ᑲᐱᒥᐃᐧᒋᒋᑲᑌᑲᐧᐸᐣ.
“ᑭᑭᐱᑲᐡᑭᑐᒥᐣ ᑭᒋᒥᔑᓇᐧ ᒥᑕᓱᒥᑕᓇ ᑕᓱᔭᑭ ᑭᓇᐃᐧᐟ ᐃᑯ ᐁᑭᐱ ᐱᒪᒋᐦᐃᑎᓱᔭᐠ,” ᐃᑭᑐ ᑭᓂᑲᐧᓇᐡ. “ᑭᓇᐃᐧᐟ ᑲᐊᓂᔑᓂᓂᐃᐧᔭᐠ,
ᑲᑲᐡᑭᑐᒥᐣ ᒋᑭᐱᒪᒋᐦᐃᑎᓱᔭᐠ.”
ᑲᓇᑕ ᑭᒋᐅᑭᒪ ᑲᑭᐃᔑᐅᓇᒋᑫᐨ ᐅᑐᐡᑭ ᔓᓂᔭᐃᐧ ᐸᐸᑫᐧᓇᒪᑫᐃᐧᐣ ᐅᑭᐃᓇᑐᐣ ᑲᐯᔓᑯᐊᑫᐧᑕᐃᐧᓯᓂᐠ ᐅᑭᒪᑲᓇᐠ ᑲᐱᑭᓯᐱᒧᒋᑫᐊᐧᐨ, ᑲᐱᒧᑐᐊᐧᐨ ᐃᐡᑯᓂᑲᓇᐣ ᐁᑲ 2,000 ᑲᑕᓯᐊᐧᐨ ᑲᑲᐯᔑᐊᐧᐨ ᐊᓂᔑᓂᓂᐊᐧᐠ ᐃᒪ ᒪᒪᐤ ᓂᔑᐣ ᐊᑯᓇᐠ ᓂᔭᓇᐣ ᐃᐡᑯᓂᑲᓇᐣ ᑲᐱᒥᑲᓇᐧᐊᐸᑕᒧᐊᐧᐨ ᐁᑲᐧ ᒥᓇ ᐁᑲ ᐊᐊᐧᔑᒣ ᓂᐦᓯᐣ ᑲᐱᒥᓭᓂᑭᐣ ᔓᓂᔭᐃᐧᑭᒪᑲᐠ ᐃᐧᒋᐦᐃᐁᐧᐃᐧᓇᐣ, ᑕᒥᓇᐊᐧᐠ $200,000 ᑕᓱᐯᔑᑯᔭᑭ.
ᐁᑲᐧ ᐃᐧᐣ ᑲᓂᔓᐊᑫᐧᑕᐃᐧᓯᓂᐠ ᐅᑭᒪᑲᓇᐠ ᑲᐱᑭᓯᐱᒧᒋᑫᐊᐧᐨ, ᑲᐱᒧᑐᐊᐧᐨ ᐃᐡᑯᓂᑲᓇᐣ ᐃᒪ ᓇᐣᑕ 2,000 ᒥᓇ 5,500 ᑲᑕᓯᐊᐧᐨ ᑲᑲᐯᔑᐊᐧᐨ ᐊᓂᔑᓂᓂᐊᐧᐠ ᓇᐣᑕ ᒪᒪᐤ ᓂᑯᑕᐧᓱ ᐊᑯᓇᐠ ᐊᐃᓇᓀᐤ ᐃᐡᑯᓂᑲᓇᐣ ᑲᐱᒥᑲᓇᐧᐊᐸᑕᒧᐊᐧᐨ ᐁᑲᐧ ᒥᓇ ᓂᐦᓯᐣ ᐊᑯᓇᐠ ᐊᐃᓇᓀᐤ ᑲᐱᒥᓭᓂᑭᐣ ᔓᓂᔭᐃᐧᑭᒪᑲᐠ ᐃᐧᒋᐦᐃᐁᐧᐃᐧᓇᐣ, ᑕᒥᓇᐊᐧᐠ $200,000 ᑕᓱᐯᔑᑯᔭᑭ ᐁᑲᐧ ᐊᔑᐨ ᑭᔭᐱᐨ $150,000.
ᐁᑲᐧ ᐃᐧᐣ ᑲᓂᐦᓱᐊᑫᐧᑕᐃᐧᓯᓂᐠ ᐅᑭᒪᑲᓇᐠ ᑲᐱᑭᓯᐱᒧᒋᑫᐊᐧᐨ, ᑲᐱᒧᑐᐊᐧᐨ ᐃᐡᑯᓂᑲᓇᐣ ᐃᒪ ᐊᐊᐧᔑᒣ 5,500 ᑲᑕᓯᐊᐧᐨ ᑲᑲᐯᔑᐊᐧᐨ ᐊᓂᔑᓂᓂᐊᐧᐠ ᓇᐣᑕ ᓴᐣᑲᓱ ᒥᓇ ᐊᐊᐧᔑᒣ ᐃᐡᑯᓂᑲᓇᐣ ᑲᐱᒥᑲᓇᐧᐊᐸᑕᒧᐊᐧᐨ ᐁᑲᐧ ᒥᓇ ᑯᑕᐧᓱ ᒥᓇ ᐊᐊᐧᔑᒣ ᑲᐱᒥᓭᓂᑭᐣ ᔓᓂᔭᐃᐧᑭᒪᑲᐠ ᐃᐧᒋᐦᐃᐁᐧᐃᐧᓇᐣ, ᑕᒥᓇᐊᐧᐠ $200,000 ᑕᓱᐯᔑᑯᔭᑭ ᐁᑲᐧ ᐊᔑᐨ ᑭᔭᐱᐨ $300,000.