ᐊᓂᔑᓇᐯ ᐊᐢᑭ ᐅᓂᑲᓂᑕᒪᑫᐠ ᒥᓇ ᒋᕑᐃᑎ #3 ᐅᑭᒪᑲᓇᐠ ᑭᐊᓂᒧᑕᒪᑐᐊᐧᐠ ᐅᐡᑭ ᑭᑭᓄᐦᐊᒪᑫᐃᐧ ᐅᓇᒋᑫᐃᐧᓂ

ᐊᓂᔑᓇᐯ ᐊᐢᑭ ᐅᓂᑲᓂᑕᒪᑫᐠ ᓄᑯᒥᑫ ᑲᑭᓇᑭᐡᑲᑐᐊᐧᐨ ᒋᕑᐃᑎ #3 ᐅᑭᒪᑲᓇᐠ ᐁᑭᐊᓂᒧᑕᒪᑐᐊᐧᐨ ᐃᐁᐧᓂ ᑲᓇᑕ ᑭᒋᐅᑭᒪᐣ ᑲᐃᐧᐃᔑᑲᑫᐧ ᐅᓇᑐᓂᐨ ᐊᓂᔑᓂᓂᐊᐧᐠ ᑲᐅᒋ ᑲᓇᐊᐧᐸᒋᑫᑕᒪᐃᐧᑕᐧ ᐅᑎᐡᑯᓄᐃᐧ ᐱᒧᑕᒪᑯᐃᐧᓂᐊᐧ.
“ᒪᐊᐧᐨ ᐃᑯ ᑕᑭᒋᐸᑲᓂᓭ ᐅᐁᐧ ᑲᐃᐧᔑᑲᑫᐧᐊᐣᑕᒋᑫᐨ ᑭᒋᐅᑭᒪ ᑲᑭᓇ ᐊᓂᔑᓂᓂᐃᐧ ᑕᔑᑫᐃᐧᓇᐣ ᑕᐃᔑᐸᑭᑌᐡᑭᑫᒪᑲᐣ ᐁᑲᐧ ᒥᓇ ᐃᒪ ᑭᑎᐡᑯᓄᐃᐧ ᐱᒧᒋᑫᐃᐧᓂᓇᓂᐠ - ᑲᐃᐧᐣ ᐁᑲᐧ ᑲᐃᐧᐃᔑᐅᓀᐣᑕᒪᐠ ᑲᑭᑐᑕᓯᒥᐣ,” ᑭᐃᑭᑐ ᑭᒋᐅᑭᒪᑲᓀᐢ ᑲᐧᔾᐢ ᑲᑭᑲᒥᐠ ᓂᔓᑯᐣ ᐁᓂᒪᐊᐧᒋᐦᐃᑐᐊᐧᐨ ᒋᕑᐃᑎ #3 ᐅᑭᒪᑲᓇᐠ ᐅᑕᑲᐧᑭᓂ ᒪᐊᐧᒋᐦᐃᑐᐃᐧᓂᐊᐧ ᒣᑲᐧᐨ ᐅᐱᒪᐊᒧᐃᐧᐱᓯᑦ 22-24 ᐁᐧᑎ ᐅᐱᔑᑯᑲᐠ. “ᓄᑯᑦ ᑲᑭᔑᑲᐠ, ᓂᓇᐃᐧᐟ ᑲᐅᐣᒋᐃᐧᑕᓄᑭᒥᑯᔦᐠ ᐊᓂᔑᓇᐯ ᐊᐢᑭ ᑎᐯᐣᒋᑫᐃᐧᓂᐠ, ᓂᓇᑭᐡᑲᑯᒥᐣ ᒪᐊᐧᐨ ᐁᑭᒋᓀᑕᑲᐧᐠ ᑫᑯᐣ ᒋᐊᓂᑲᑫᐧᐅᓀᐣᑕᒪᐠ. ᐁᑲᐧ ᐣᑎᔑᐊᐧᐸᑕᒥᐣ ᓂᔑᐣ ᑫᑯᓇᐣ ᐁᐊᔭᑭᐣ ᐊᓂᐣ ᑫᑭᐃᔑ ᐅᑕᐱᓂᑫᔭᑭᐸᐣ: ᐃᓂᐁᐧᓂᐊᐧᐣ ᑲᐃᐧᐊᐣᒋᒋᑲᑌᑭᐣ ᑭᓇᐃᐧᐟ ᒋᐅᓀᑕᒪᐠ ᓇᐣᑕ ᒋᑐᒋᑫᑕᒪᑯᔭᐠ.”
ᑲᑭᑲᒥᐠ ᑭᐃᑭᑐ ᒥᔑᐣ ᐃᓂᐁᐧᓂᐊᐧᐣ ᐊᓂᔑᓇᐯ ᐊᐢᑭ ᑲᐊᔭᑭᐣ ᐃᐡᑯᓄᑲᒥᑯᓴᐣ ᑲᐃᐧᐣ ᐅᑲᑭᑎᐱᓭᑐᓯᓇᐊᐧ ᐅᓇᑯᓂᑫᐃᐧᓇᐣ ᑲᐃᐧᐃᔑᐅᓇᒋᑫᐨ ᑭᒋᐅᑭᒪ, ᑭᐸᑭᑎᓂᑲᑌ ᐃᐁᐧ ᐅᓇᒋᑫᐃᐧᐣ ᐅᐱᒪᐊᒧᐃᐧᐱᓯᑦ 22 ᑲᐃᓇᑭᓱᐨ.
“ᓂᑌᐯᐧᑕᒥᐣ ᐊᓂᔑᓇᐯ ᐊᐢᑭ ᑲᑲᐯᔑᔭᐠ ᐁᑭᒥᓂᑯᐃᐧᓯᔭᐠ ᒋᑭᑭᓄᐦᐊᒪᐊᐧᔭᐠ ᑭᑕᐊᐧᔑᔑᒥᓇᓂᐠ ᒪᐣᑐ ᑲᑭᐃᔑ ᔓᐁᐧᓂᒥᑯᔭᐠ,” ᑲᑭᑲᒥᐠ ᐃᑭᑐ. “ᐁᑲᐧ ᒥᓇ ᐁᑲ ᐃᐧᑲ ᒋᐊᐧᓂᑫᐣᑕᒪᐠ ᐅᐁᐧ, ᒪᐡᑲᐃᐧᓯᐃᐧᐣ ᑭᑕᔭᒥᐣ ᑲᐊᓂᔑᓂᓂᐃᐧᔭᐠ. ᐱᑯ ᐊᐣᑎ ᐅᑭᒪᐃᐧᓂᐠ ᑲᑭ ᒪᓯᓇᐦᐅᑎᓱᐊᐧᐨ ᐅᑭᒪᐃᐧ ᐊᔓᑕᒪᑫᐃᐧᐣ, ᓇᑕᐁᐧᐣᑕᑲᐧᐣ ᐃᓇᑲᓀᓯᐃᐧᓂᐠ ᐅᑭᒪᐃᐧᐡᑯᑕᑎᐃᐧᓂᐠ ᒋᔑᐱᒧᓭᒪᑲᐠ, ᒥᓇ ᐅᑭᒪᐅᓀᐡᑯᑕᑎᐃᐧᓂᐠ ᒋᔑᐱᒧᓭᒪᑲᐠ, ᑲᑭᐃᔑᐱᒧᓭᒪᑲᑭᐸᐣ ᓂᐱᒧᓂᑎᓱᐃᐧᓂᓇᐣ ᒥᓇ ᓂᑭᑭᐦᐊᒪᑫᐃᐧ ᐱᒧᒋᑫᐃᐧᓂᓇᐣ ᑲᑭᐊᓂᒪᐧᔦ ᐊᐧᓇᐱᑕᒪᑯᔭᑭᐸᐣ.”
ᑲᑭᑲᒥᐠ ᑭᐃᑭᑐ ᐅᐁᐧ ᑲᐃᐧᑲᑫᐧᐃᔑ ᐅᓇᒋᑫᐨ ᒋᔑᓇᑲᐧᓂᐠ ᐃᐡᑯᓄᐃᐧᓂ ᐊᒥ ᐊᐱᐣ ᐃᒪ ᒥᔑᐣ ᑭᑭᓄᐦᐊᒪᑫᐃᐧ ᐃᐧᒋᑕᓱᐃᐧᓇᐣ ᒋᑭᐡᑭᓭᑭᐣ ᑐᑲᐣ ᒣᑲᐧᐨ ᑲᐱᒧᒋᑲᑌᐠ ᐅᑎᐡᑯᓄᐃᐧ ᐃᐧᒋᐦᐃᐁᐧᐃᐧ ᐱᒧᒋᑫᐃᐧᐣ ᑲᐅᒋ ᐱᒥᐃᐧᒋᐦᐃᑯᐊᐧᐨ ᐊᓂᔑᓂᓂᐃᐧ ᐅᑭᑭᓄᐦᐊᒪᑫᐠ ᑫᓄᒋᒥᓄᓭᓂᐠ ᐅᑭᑭᓄᐦᐊᒪᑫᐃᐧᓂᐊᐧ, ᐁᑲᐧ ᒥᓇ ᐃᐁᐧ ᐃᐡᑯᓄᐃᐧ ᐃᐧᑕᓄᑭᒥᑐᐃᐧ ᐱᒧᒋᑫᐃᐧᐣ, ᐃᓇᓄᑭᒪᑲᐣ ᐁᐅᒋ ᐊᐧᐃᐧᒋᐦᐃᑎᒪᑲᑭᐣ ᐃᐡᑯᓂᑲᓇᐣ, ᐱᑭᓯᑎᐯᐣᒋᑫᐃᐧ ᐊᐦᑭᐣ, ᑲᓇᑕ ᐅᑭᒪᐃᐧᐣ ᐊᓂᔑᓂᓂᐃᐧ
ᑲᓇᐊᐧᐸᒋᑫᐃᐧᓇᐣ ᒥᓇ ᑭᐁᐧᑎᓄᐠ ᒪᒋᑕᐃᐧᓇᐣ ᒥᓇ ᑯᑕᑭᔭᐣ ᐸᐸᒥᓯᐃᐧᓇᐣ ᑲᐱᒥᐊᓄᑲᑕᒧᐊᐧᐨ ᐊᐊᐧᔑᒣ ᑫᓂᔑᒥᓄᓭᓂᐠ ᐊᓂᔑᓂᓂᐃᐧ ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᐅᐱᒥ ᐃᐡᑯᓄᐦᐃᑯᐃᐧᓂᐊᐧ ᐃᐡᑯᓂᑲᓂᐠ ᒥᓇ ᐅᐣᑌᕑᐃᔪ ᐅᑭᒪᐃᐧᓂᐠ ᑲᐅᒋᐱᒧᒋᑲᑌᑭᐣ ᐃᐡᑯᓄᑲᒥᑯᐣ ᑲᑕᔑᐃᐡᑯᓄᐦᐃᑕᐧ ᐁᑲᐧ ᒥᓇ ᐅᐡᑭᒥᑲᓇᑫᑕᒪᑫᐃᐧᐣ ᑲᐱᒥ ᐃᐧᒋᑐᐊᐧᐨ ᐃᐡᑯᓄᐱᒧᒋᑫᐃᐧᓂ ᑲᐅᒋᐱᒥ ᐸᐸᑭᑎᓂᐨ ᔓᓂᔭ ᒥᓇ ᓇᓇᑲ ᑲᐊᐃᓇᓄᑲᑌᑭᐣ ᒋᒥᓄᓭᑭᐣ ᐊᓂᔑᓂᓂᐃᐧ ᐃᐡᑯᓄᐦᐃᐁᐧᐃᐧᑲᒥᑯᐣ.
“ᓂᑌᐯᐧᑕᒥᐣ ᑲᔦ ᒋᑭᒪᒪᐃᐧᐊᓄᑲᑕᒪᑭᐸᐣ. ᒋᑭᐊᐣᑕᒋᑫᔭᑭᐸᐣ ᑫᑯᓇᐣ ᑲᑭᐱᔑ ᐱᒧᑐᔭᐠ ᑭᑎᐡᑯᓄᑲᒥᑯᓇᐣ,” ᑲᑭᑲᒥᐠ ᐃᑭᑐ.
ᑲᓇᑕ ᐅᑭᒪᐃᐧᐣ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓇᐣ ᒥᓇ ᑭᐁᐧᑎᓄᐠ ᒪᒋᑕᐃᐧᓇᐣ ᐅᑭᒪ ᐯᕑᓇᐟ ᐸᓫᑲᐧᕑᐟ ᐅᑭᐃᐧᐣᑕᐣ ᐅᐁᐧᓂ ᐃᐡᑯᓄᐃᐧᐣ ᑲᐃᐧᐃᔑᐅᓇᒋᑲᑌᐠ ᓂᑲᐣ ᒋᑲᓇᐊᐧᐸᒥᐣᑕᐧ ᐅᑎᐡᑯᓂᐠ, ᒥᓇ ᒋᑫᒋᓇᐊᐧᑕᒪᐃᐧᐣᑕᐧ ᐊᓂᔑᓂᓂᐃᐧ ᐅᑎᐡᑯᓂᐠ ᑫᐃᐧᓇᐊᐧ, ᑐᑲᐣ ᐃᑯ ᑲᑭᓇ ᑲᓀᑎᔭᐣ ᑲᐃᓇᑭᓱᐊᐧᐨ, ᒋᑌᐱᓇᒧᐊᐧᐨ ᑲᒥᓇᐧᔑᓂᐠ ᑭᑭᓄᐦᐊᒪᑫᐃᐧᓂ.
“ᐅᑭᒪᐃᐧᐣ ᐅᒪᐡᑲᐃᐧᑌᐯᐧᑕᐣ ᑲᑭᓇ ᐊᓂᔑᓂᓂᐃᐧ ᐅᑎᐡᑯᓂᐠ ᒥᓯᐁᐧ ᐅᒪ ᑲᓇᑕ ᐊᐦᑭᐠ ᑲᑲᐯᔑᐊᐧᐨ ᐃᓀᐣᑕᑯᓯᐊᐧᐠ ᒋᑕᔑᐃᐡᑯᓄᐦᐃᑕᐧ ᑲᐱᒥᓂᔕᐦᐃᑲᑌᓂᐠ ᐱᑭᓯᑎᐯᐣᒋᑫᐃᐧ ᐊᐦᑭᐠ ᒥᓇ ᑯᑕᑭᔭᐣ ᑎᐯᐣᒋᑫᐃᐧ ᐊᐦᑭᐣ ᐅᒪ ᑲᓇᑕ ᑲᐃᓇᑌᑭᐣ ᐅᓇᒋᑫᐃᐧᓇᐣ, ᐯᑭᐡ ᒋᑭᒋᓀᒋᑲᑌᓂᐠ ᐅᑕᓂᔑᓂᓂᐊᐧᑎᓯᐃᐧᓂᐊᐧ, ᐅᑎᔑᑭᔐᐧᐃᐧᓂᐊᐧ, ᐅᑕᓂᔑᓂᓂᐃᐧ ᐊᔓᑕᒪᑯᐃᐧ ᒪᐡᑲᐃᐧᓯᐃᐧᓂᐊᐧ,” ᐸᓫᑲᐧᕑᐟ ᐃᑭᑐ. “ᐊᓂᔑᓂᓂᐃᐧ ᐅᐡᑲᑎᓴᐠ ᐃᐧᓇᐊᐧ ᒪᐊᐧᐨ ᑭᓂᐱ ᒥᔑᓄᐊᐧᐠ ᒥᓯᐁᐧ ᐅᒪ ᑲᓇᑕ ᑲᐊᐱᑕᑲᒥᑲᐠ ᐁᑲᐧ ᔕᑯᐨ ᓇᐊᐧᒋᓄᐊᐧᐠ ᑲᑭᔑᑐᐊᐧᐨ ᐅᑎᐡᑯᓄᐃᐧᓂᐊᐧ. ᐅᐁᐧ ᑲᑭᐅᓇᓯᓇᐦᐃᑲᑌᐠ ᐅᐡᑭ ᐅᓇᑯᓂᑫᐃᐧᐣ ᑕᐃᔑᑲᓇᐊᐧᐸᒋᑫᒪᑲᐣ ᒋᐅᒋ ᐃᐧᒋᐦᐃᐁᐧᒪᑲᐠ, ᑲᑲᑫᐧᑌᐱᓂᑲᑌᐠ ᒥᓄᐃᐧᑕᓄᑭᒥᑐᐃᐧᐣ, ᐊᓂᐡ ᐊᒥ ᑕᐱᐡᑯᐨ ᑫᓂᓇᐃᐧᐟ ᐁᔑᑲᓇᐊᐧᐸᑕᒪᐠ ᑲᐃᓀᑕᒧᐊᐧᐨ ᐊᓂᔑᓂᓂᐊᐧᐠ ᐯᔑᑲᐧᐣ ᒋᔑᒥᓄᓭᐊᐧᑫᐊᐧᐨ ᑫᑯᓇᐣ ᑐᑲᐣ ᐃᑭᐁᐧᓂᐊᐧᐠ ᑲᓀᑎᔭᐣ ᑲᐃᓇᑭᓱᐊᐧᐨ.”
ᐅᑭᒪᐅᓂ ᐊᓄᑭᓇᑲᐣ ᑫᕑᐅᓫᐃᐣ ᐯᓂᐟ, ᓫᐃᐳᕑᐊᓫ ᐅᑭᒪᐃᐧᓂᐠ ᑲᓇᑕ ᑲᐊᓄᑭᐨ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓂᐠ, ᐅᑭᑲᑫᐧᒋᒪᐣ ᐸᓫᑲᐧᕑᑐᐣ ᐊᐣᑕᐡᐃᐧᐣ ᐁᐅᐣᒋᐃᑭᑐᒪᑲᐠ ᐊᓂᔑᓂᓂᐃᐧ ᐅᑎᐡᑯᓂᐠ ᐃᐧᓇᐊᐧ ᓇᐱᐨ ᐸᐣᑭ ᔓᓂᔭᐣ ᒋᒥᓂᑕᐧ ᐊᐱᐨ ᐃᐧᐣ ᑯᑕᑭᔭᐠ ᑲᐃᓇᑲᓀᓯᐊᐧᐨ ᐃᒪ ᑲᐃᓇᓯᓇᐦᐃᑲᑌᐠ ᑲᐃᐧᐅᓇᒋᑲᑌᐠ ᐅᐡᑭᐅᓇᑯᓂᑫᐃᐧᓂᐠ ᒣᑲᐧᐨ ᑲᑭᐊᓂᒧᒋᑲᑌᑭᐸᐣ ᐅᐱᒪᐊᒧᐧᐃᐱᓯᑦ 24 ᑲᐃᓇᑭᓱᐨ ᐃᒪ ᑭᒋᐅᑭᒪᐃᐧᑲᒥᑯᐠ.
“ᑭᐣ ᑲᐊᔭᒥᔭᐣ, ᐅᑭᒪᐃᐧᐣ ᑲᐃᐧᐃᔑᐅᓇᑕᒪᑫᐨ ᐊᓂᔑᓂᓂᐊᐧᐠ ᐅᑎᐡᑯᓄᐃᐧ ᐱᒧᑕᒪᑯᐃᐧᓂᐊᐧ ᑭᐊᓇᐁᐧᐣᒋᑲᑌ ᒥᓯᐁᐧ ᐊᐧᑲᐦᐃ ᑲᐊᐱᑕᑲᒥᑲᐠ ᑲᓇᑕ ᐊᐦᑭᐠ,” ᑭᐃᑭᑐ ᐯᓂᐟ ᒣᑲᐧᐨ ᑲᑭᐅᑲᐧᐱᐦᐃᑎᐊᐧᐨ ᐅᑭᒪᐠ. “ᑲᐃᐧᓂᐣ ᑲᐧᐣᑕ ᑫᑯᓂ ᑲᐅᐣᒋ ᐊᐧᐊᐧᓀᐣᑕᒧᐊᐧᐨ ᐊᓂᔑᓂᓂᐊᐧᐠ. ᐅᑭᒪᐅᐣ ᑲᐃᐧᐃᔑᐅᓇᒋᑫᐨ ᑲᐃᐧᐣ ᐅᐱᓯᐢᑫᑕᓯᐣ ᒋᒪᒋᓴᐦᐃᐁᐧᒪᑲᓂᐠ ᐁᑲ ᒪᔭᑦ ᒋᔑᒥᓂᑕᐧ ᔓᓂᔭᐣ ᐊᓂᔑᓂᓂᐊᐧᐠ. ᐁᑲᐧ ᑕᑯᐨ ᐁᑲᑫᐧᑐᑕᐊᐧᐨ ᐊᓂᔑᓂᓂᐊᐧᐣ ᐅᐡᑭ ᐅᓇᑯᓂᑫᐃᐧᓇᐣ ᐁᓂᑲᑫᐧ ᐅᓇᑕᒪᐊᐧᐨ ᑫᐱᒥᓂᔕᐦᐊᒧᐊᐧᐨ ᐁᑲᐧ ᑲᐃᐧᐣ ᑲᓇᑫ ᑫᑯᓇᐣ ᐊᐣᑎ ᑫᓂᔑᐱᒥᐃᐧᒋᐦᐊᐨ ᒋᔑᐊᔓᑕᒪᐊᐧᐨ.
ᑫᑯᓀᐣ ᑭᔭᐱᐨ ᐁᐅᐣᒋᑐᑕᐠ ᑭᒋᐅᑭᒪ ᐁᑲ ᓇᐣᑕ ᐁᐃᐧᐃᔑᑲᑫᐧ ᒪᒥᓄᐱᑕᒪᑫᐨ ᑲᐱᒥ ᒪᒋᑲᓇᐊᐧᐸᒥᐣᑕᐧ ᐊᓂᔑᓂᓂᐃᐧ ᐅᑎᐡᑯᓂᐠ ᐁᑲ ᐃᑲᐧ ᑫᐃᔑᑌᐱᓭᐊᐧᐨ ᔓᓂᔭᐃᐧ ᐃᐧᒋᐦᐃᐁᐧᐃᐧᓂᐠ ᐃᓀᑫ?”
ᐯᓂᐟ ᑭᔭᐱᐨ ᐊᐊᐧᔑᒣ ᐊᓇᑭ ᑕᑲᐧᑭᐣ ᐅᑭᒪᐅᓂ ᐱᒧᒋᑫᐃᐧᓇᐣ, ᐊᐊᐧᔑᒣ ᐊᓇᑭᒪᓯᓇᐦᐃᑲᓂᐊᐧᐠ, ᒥᓇ ᐊᐊᐧᔑᒣ ᐊᓇᑭᐅᑲᑫᐧ ᒪᐡᑭᐃᐧᓯᐃᐧᓂᐨ ᑭᒋᐅᑭᒪ ᑲᐃᐧᐣ ᐃᒪ ᑕᑭᐅᐣᒋᒪᑲᓯᓄᐣ ᐊᐊᐧᔑᒣ ᐊᐱᑕ ᐊᓂᔑᓂᓂᐃᐧ ᐅᑎᐡᑯᓂᐠ ᐁᑲ ᑲᑭ ᑭᔑᑐᐊᐧᐨ ᐅᑎᐡᑯᓄᐃᐧᓂᐊᐧ.
“ᑲᐧᓱᕑᐱᑎᑊ ᐅᑭᒪᐠ ᐃᐧᓇᐊᐧ ᑕᑭᑲᑫᐧᔕᑯᑎᓂᑫᐸᓂᐠ ᒋᑭᐱᑎᓇᒧᐊᐨ ᐅᐁᐧᓂ ᐁᑲ ᑲᒥᓇᐧᔑᓂᐠ ᑫᓂᒪᒋᑐᒋᑫᒪᑲᓂᐠ ᐅᓇᒋᑫᐃᐧᓂ, ᐁᑲᐧ ᑕᐡ ᒋᑭᐅᓇᐱᐦᐃᐁᐧᐊᐧᐸᐣ ᐊᓂᔑᓂᓂᐃᐧ ᑕᓇᐱᐃᐧᓇᐣ ᒋᐊᐧᐁᐧᓇᑐᐊᐧᐨ ᑫᑭᐊᓄᑭᐊᐧᑫᐊᐧᐨ, ᒋᐅᓇᐸᑕᒧᐊᐧᐨ ᒥᓂᑯᐠ ᔓᓂᔭ ᑫᐃᔑᐱᒥ ᐸᐸᑭᑎᓂᐨ ᑫᐱᒥᐃᐧᒋᐦᐃᑯᐊᐧᐨ ᐊᓂᔑᓂᓂᐊᐧᐠ ᐃᐧᓇᐊᐧ ᒋᐱᒧᑕᒪᓱᐊᐧᐨ ᐅᑎᐡᑯᓄᐃᐧ ᐊᓄᑭᐃᐧᓂᐊᐧ,” ᐃᑭᑐ ᐯᓂᐟ.
ᐊᓂᔑᓂᓂᐃᐧ ᐅᑎᐡᑯᓂᐠ ᐁᒪᒪᐊᐧᓄᑲᓂᑕᐧ: ᑲᑭᐅᓇᓯᓇᐦᐃᑲᑌ ᑫᐃᓇᑌᐠ ᐅᐡᑭ ᐃᐡᑯᓄᐃᐧ ᐅᓇᑯᓂᑫᐃᐧᐣ ᑫᐊᐸᒋᑐᐊᐧᐨ ᐊᓂᔑᓂᓂᐊᐧᐠ ᒥᔑᐣ ᑭᐊᒋᑲᑌᐊᐧᐣ ᑫᑭᐅᐣᒋᐅᑕᐱᓇᒧᐊᐧᐨ, ᑐᑲᐣ ᐊᓂᔑᓂᓂᐊᐧᐠ ᒋᒪᒪᐊᐧᓄᑲᑕᒧᐊᐧᐨ ᒋᐅᓇᓴᐊᐧᐨ ᐊᓂᔑᓂᓂᐊᐧᐠ ᑫᐱᒥ ᐃᐡᑯᓄᐃᐧ ᓂᑲᓂᐡᑭᑫᑕᒪᑫᐊᐧᐨ ᓇᓇᑲ ᐃᐡᑯᓄᐃᐧ ᐃᐧᒋᐦᐃᐁᐧᐃᐧᓇᐣ ᑫᒥᓂᑕᐧ ᐅᑎᐡᑯᓂᐠ ᒥᓇ ᑫᐊᐸᑕᑭᐣ ᐃᐡᑯᓄᑲᒥᑯᐣ.
ᐁᑲᐧ ᒥᓇ ᐃᑭᑐᒪᑲᐣ ᐁᐃᐧᐃᓇᒋᑲᑌᐠ ᐃᑭᐁᐧᓂᐊᐧᐠ ᐊᓂᔑᓂᓂᐊᐧᐠ ᐅᑲᐅᓇᑐᓇᐊᐧ ᒋᓇᑯᒥᑐᐊᐧᐨ ᐅᐣᑌᕑᐃᔪ ᐅᑭᒪᐃᐧᓂᐠ ᐃᐡᑯᓄᐃᐧ ᐅᑕᐱᑕᒪᑫᐃᐧᓂᐠ ᑲᐸᐸᒥᓯᐊᐧᐨ ᒋᑕᔑᐃᐡᑯᓄᐦᐃᑕᐧ ᐊᓂᔑᓂᓂᐃᐧ ᐅᑎᐡᑯᓂᐠ ᐊᑲᐧᒋᐠ ᐃᐡᑯᓂᑲᓂᐠ ᓇᐣᑕ ᒥᓇ ᒋᐱᒧᑐᐊᐧᐨ ᐱᐣᒋᐃᐡᑯᓂᑲᓂᐠ ᐃᐡᑯᓄᑲᒥᑯᓂ ᒥᓇ ᒋᐅᓇᑐᐊᐧᐨ ᒋᑎᐱᓇᐁᐧ ᐱᒧᑐᐊᐧᐨ ᐃᐡᑯᓄᐃᐧᓂ, ᐁᑲᐧ ᐊᐱᐣ ᐅᐁᐧ ᑲᐃᐧᐊᐸᑕᐠ ᐊᓇᒋᑫᐃᐧᐣ ᑲᐃᐧᐣ ᐃᒪ ᐅᑲᐅᐣᒋ ᑲᓇᐊᐧᐸᒥᑯᓇᐊᐧᓯᐣ.
ᑲᑲᓇᑕ ᐅᑭᒪᐃᐧᐣ ᑭᐃᑭᑐ ᑭᐊᔭᑭᓀ ᑲᑲᑫᐧᒋᒥᐁᐧ ᐊᐊᐧᔑᒣ 600 ᐊᓂᔑᓂᓂᐃᐧ ᑕᔑᑫᐃᐧᓇᐣ ᒥᓯᐁᐧ ᑲᓇᑕ ᒥᓇ ᑯᑕᑭᔭᐠ ᑲᐅᒋᐸᐸᒥᓯᐊᐧᐨ ᐃᒪ ᐊᐃᓇᓀᐊᐧᐨ ᑲᑭᓇᓇᑭᐡᑲᑎᓇᓂᐊᐧᑭᐸᐣ, ᐊᐊᐧᔑᒣ 54 ᒪᒪᑕᐃᐧᐱᐊᐧᐱᑯᐠ ᑭᐅᐣᒋ ᒪᐊᐧᒋᐦᐃᑎᓇᓂᐊᐧᐣ ᑲᑭᑕᑎᐸᒋᒧᑕᑎᓇᓂᐊᐧᐠ ᒥᓇ ᐁᑭᐊᐧᐃᐧᐣᑕᒪᑲᓄᐊᐧᐠ ᒪᓯᓇᑌᓯᒋᑫᐃᐧᓂᐠ ᒥᓇ ᒪᒋᑭᑐᐃᐧᓂᐠ ᐁᑲᐧ ᒥᓇ ᐃᒪ ᐱᐊᐧᐱᑯᐠ ᑲᑭᐊᒋᑲᑌᐠ ᑲᑫᐧᒋᒥᐁᐧᐃᐧᓇᐣ 631 ᐅᑭᐸᑭᑎᓇᓇᐊᐧ ᐅᓇᑫᐧᐁᐧᔑᒥᐁᐧᐃᓂᐊᐧ.
ᐅᐣᑌᕑᐃᔪ ᑭᒋᐅᑭᒪᑲᐣ ᐢᑕᐣ ᐯᕑᑎ ᐁᑲᐧ ᒥᓇ ᐊᕑᐅᑲᐧ ᐊᓂᔑᓇᐯᐠ ᑭᒋᐅᑭᒪᑲᐣ ᑲᐧᕑᐟ ᐱᑐᕑᐢ, ᐃᐧᐣ ᑲᐅᐣᒋ ᐱᒧᑐᐨ ᐃᐡᑯᓄᐃᐧ ᑲᓇᐊᐧᐸᒋᑫᐃᐧᓂ ᐁᑲᐧ ᒥᓇ ᐅᑭᒪᑲᓇᐠ ᑲᒪᒪᐃᐧᓄᐊᐧᐨ ᑲᐃᔑᐃᐧᒋᑕᐧᐨ ᑲᐊᐱᑕᒧᐊᐧᐨ ᐃᐡᑯᓄᐃᐧ ᑲᓇᐊᐧᐸᒋᑫᐃᐧᓂ, ᐅᑭᐃᔑᓂᑲᑕᓇᐊᐧ ᐅᐁᐧᓂ ᑲᐃᐧᑲᑫᐧ ᐃᓇᒋᑫᓂᐨ ᑭᒋᐅᑭᒪᐣ ᐊᐣᒋᑯ ᐊᐱᐣ ᑕᐅᐣᒋ ᐊᔐᓭᐊᐧᐠ ᑫᓄᒋ ᐱᑯᐱᓂᑯᐊᐧᐨ ᐊᓂᔑᓂᓂᐊᐧᐠ.
“ᐊᔕ ᓂᑭᐸᑭᑎᓇᒥᓇᐸᐣ ᐊᓂᐣ ᑲᐃᔑᓇᑕᐁᐧᐣᑕᒪᐠ ᒋᔑᓇᑲᐧᐠ ᓂᐱᒥᑲᑫᐧᒋᒥᑯᐃᐧᓂᓇᐣ ᓇᐊᐧᐨ ᑫᑭᐅᐣᒋ ᓇᐦᐃᐡᑲᑯᐊᐧᐸᐣ ᐊᓂᔑᓂᓂᐊᐧᐠ ᐁᑲᐧ ᒥᓇ ᒋᓂᐅᓇᑕᒪᑯᔭᑭᐸᐣ ᒋᓇᐦᐃᓭᐠ ᐁᑲ ᐃᐧᑲ ᑲᑌᐱᓭᐨ ᔓᓂᔭ ᑫᐱᒥᐊᓄᑭᐊᐧᑫᔭᐠ ᐁᓂᒪᐧᔦ ᑭᔑᐅᓇᑐᐊᐧᐨ ᐅᑐᓇᒋᑲᓂᐊᐧ, ᐁᑲᐧ ᒥᓇ ᑲᐯᐦᐃ ᑲᐃᐧᐣ ᐃᑲᐧ ᒋᑭᐱᐅᐣᒋ ᐱᓯᐢᑭᑕᑯᔭᐠ ᒥᓇ ᐱᓯᐣᑕᑯᔭᐠ ᑭᑎᓯᓭᐃᐧᓂᓇᐣ,” ᑭᐃᑭᑐ ᐯᕑᑎ. “ᒥᐢᑕᐦᐃ ᐅᑭᒋᔑᐦᐃᑯᓇᐊᐧ ᐊᐣᒋᑯ ᐊᐱᐣ ᑲᑭᐸᑭᑎᓂᑲᑌᓂᐠ ᐃᐁᐧᓂ ᐅᓇᒋᑲᓂ, ᐁᑲᐧ ᔕᑯᐨ ᐅᐣᑌᕑᐃᔪ ᐊᓂᔑᓂᓂᐊᐧᐠ ᐊᐊᐧᔑᒣ ᐅᒪᐡᑲᐁᐧᐣᑕᓇᐊᐧ ᒋᑲᑫᐧᓇᑲᓇᒧᐊᐧᐨ ᐁᑲ ᒋᔕᐳᓂᑲᑌᓂᐠ ᐊᐱ ᒉᐣᐁᐧᕑᐃ ᐱᓯᑦ 2014 ᐊᐦᑭᐊᐧᓂᐠ ᐁᐃᐧᐅᐣᒋ ᑕᑭᐧᐊᐧᐨ ᑲᐊᓱᐡᑲᒧᐊᐧᐨ ᑲᓀᑎᔭᐣ ᑲᐃᓇᑭᓱᐊᐧᐨ ᑲᓂᓯᑕᐃᐧᓇᒧᐊᐧᐨ ᑎᐯᓂᒥᐁᐧᐃᐧᐣ ᒥᓇ ᑭᐸᑯᐡᑭᑫᐃᐧᐣ ᐅᒪ ᐊᐦᑭᐠ ᒋᑭᐳᓂᒋᑲᑌᑭᐸᐣ.”
ᑲᓇᑕ ᑭᒋᐅᑭᒪ ᑕᐱᐦᐅ ᒋᐱᓇᓇᑫᐧᐁᐧᔑᒋᑲᑌᓂᐠ ᐊᓂᐣ ᑫᐃᔑᓂᑲᑕᒧᐊᐧᑫᐧᐣ ᐅᐁᐧᓂ ᐅᑐᓇᒋᑲᐣ ᐊᓂᐅᐡᑭᓭᓂᐠ ᒉᐣᐁᐧᕑᐃ ᐱᓯᑦ 2014.
“ᐊᔕ ᐊᓂᔑᓂᓂᐊᐧᐠ ᐅᐱᑭ ᐸᔭᑌᐃᐧᐣᑕᓇᐊᐧᐸᐣ ᑲᐃᔑᐊᐧᐸᑕᒧᐊᐧᐨ ᑲᑕᓀᑕᒥᐦᐃᑯᐊᐧᐨ ᑭᒋᐅᑭᒪᐣ ᑲᐃᐧᐃᔑᐅᓇᒋᑫᓂᐨ ᐁᑲᐧ ᒥᓇ ᑲᐃᓀᑕᑯᓯᐸᐣ ᒋᑭᐃᐧᒋᑐᐸᐣ ᐅᑎᐡᑯᓄᐃᐧ ᐃᐧᒋᐦᐃᐁᐧᐃᐧᐣ ᐱᒧᒋᑫᐃᐧᓂ,” ᑭᐃᑭᑐ ᑲᓇᑕ ᑭᒋᐅᑭᒪᑲᐣ ᔕᐧᐣ ᐊᐟᓫᐃᐅ. “ᐊᔕ ᑲᔦ ᓂᑭᐱᑲᑲᓄᑕᒥᐣ ᑫᑯᓀᐣ ᐃᐁᐧ ᑲᑭᐱᓇᓇᑕᐁᐧᐣᑕᒪᐠ: ᒋᓂᑲᓂ ᑲᓇᐊᐧᐸᒋᑲᑌᓂᐠ ᐅᑌᐸᑯᑕᑯᓯᐃᐧᓂᐊᐧ ᒥᓇ ᑫᐃᐧᓇᐊᐧ ᑫᓄᒋ ᑲᐡᑭᐦᐅᐊᐧᐨ ᐊᓂᔑᓂᓂᐊᐧᐠ ᒋᐱᒧᑕᒪᓱᐊᐧᐨ ᐃᐡᑯᓄᐃᐧ ᐱᒧᒋᑫᐃᐧᓂ. ᐃᓀᑕᑯᓯᐊᐧᐠ ᑭᑕᐊᐧᔑᔑᒥᓇᓂᐠ ᒥᓇ ᐅᑎᐡᑯᓂᐠ ᒋᐊᔭᐊᐧᐨ ᒋᒥᓇᐧᔑᓂᐠ ᑫᑕᔑᐃᐡᑯᓄᐊᐧᐨ ᒥᓇ ᒋᒥᓇᐧᔑᓂᐠ ᐅᑎᐡᑯᓄᑲᒥᑯᐊᐧ ᐯᑭᐡ ᑲᔦ ᑲᐯᐦᐃ ᒋᐱᒥ ᑌᐱᒋᓭᓂᐨ ᔓᓂᔭᐣ ᒋᐱᒥᐊᓄᑲᑌᓂᐠ ᑲᓇᓄᑌᓭᓂᐠ ᑭᑭᓄᐦᐊᒪᑫᐃᐧ ᑫᑯᓇᐣ ᐊᔑᐨ ᐃᒪ ᒋᐅᒋ ᐃᐧᒋᑐᐊᐧᐨ ᑲᒪᐡᑲᐃᐧᐱᒧᓂᑎᓱᒪᑲᑭᐣ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓇᐣ ᒋᐅᒋ ᐅᓇᒋᑲᑌᑭᐣ ᐃᐡᑯᓄᐃᓇᐣ ᑫᐱᒥᑎᐸᐸᒋᑫᒪᑲᑭᐣ
ᑭᑕᓂᔑᓂᓂᐊᐧᑎᓯᐃᐧᓂᓇᓂᐠ ᒥᓇ ᑭᑎᔑᑭᔐᐧᐃᐧᓂᓇᓂᐠ. ᐅᐁᐧ ᐃᓇᓄᑭᐃᐧᐣ ᒪᐊᐧᐨ ᐅᑭᒋᓀᑕᒥᐦᐃᑯᓇᐊᐧ ᐊᓂᔑᓂᓂᐊᐧᐠ ᒥᓇ ᓂᑲᓀᑕᑲᐧᐣ ᐅᐁᐧ ᒋᒪᑕᓄᑲᑌᐠ. ᐁᑲᐧ ᑫᐃᐧᐣ ᑲᓇᑕ ᑭᒋᐅᑭᒪ ᓇᑕᐁᐧᐣᑕᑯᓯ ᑲᐧᔭᐠ ᒋᔑᐱᒥᐃᐧᑕᒪᑫᐨ ᐅᑕᓄᑭᐃᐧᐣ ᒥᓇ ᔐᒪᐠ ᒋᔭᓂᐃᐧᑕᓄᑭᒥᑯᔭᐠ ᑲᐊᓂᔑᓂᓂᐃᐧᔭᐠ. ᑲᐧᔭᐠ ᒋᑲᑫᐧᑐᑕᒪᐠ, ᓄᑯᑦ ᐃᑯ.”