ᐱᓯᒧ ᐃᐡᑯᑌ ᑭᐊᑯᑲᒋᑲᑌᐊᐧᐣ ᒋᐊᐧᑌᓂᑲᑌᐠ ᐊᑎᑯᓴᑲᐃᑲᓂᐠ ᐃᐡᑯᓄᑲᒥᑯᐠ

ᓄᑯᒥᑫ ᐊᑎᑯᓴᑲᐃᑲᓂᐠ ᑭᑭᔑᒋᑲᑌ ᒪᐊᐧᐨ ᐁᒥᔕᐠ ᐱᓯᒧ ᐃᐡᑯᑌ ᐁᑭᐅᔑᒋᑲᑌᐠ ᒥᓂᑯᐠ ᐅᒪ ᐊᐧᓂᓇᐊᐧᑲᐠ ᑲᐃᑯᑲᓇᐊᐧᐸᒋᑫᒪᑲᐠ ᐁᑭᐅᓇᑯᑲᒋᑲᑌᐠ ᐱᓯᒧᐠ ᑲᐅᒋ ᐊᓄᑭᒪᑲᐠ ᐃᐡᑯᑌ ᒋᐅᒋᐊᐧᑌᓂᑫᒪᑲᐠ ᐅᑎᐡᑯᓄᑲᒥᑯᐊᐧ.
“ᒧᔕᐠ ᓂᓇᓇᑐᓇᒥᐣ ᑫᐅᐣᒋᐁᐧᒋᓭᐠ ᐃᐡᑯᑌ ᑫᐊᐸᒋᒋᑲᑌᐠ,” ᐃᑭᑐ ᐊᑎᑯᓴᑲᐃᑲᓂ ᐅᑭᒪᑲᐣ ᕑᐊᔭᓫ ᒥᑭᐢ. “ᓂᑭᓇᓇᑕᐃᐧᑭᑫᒋᑫᒥᓇᐸᐣ ᓂᑕᓇᐱᐃᐧᓂᓇᓂᐠ ᐁᑲᐧ ᓂᑭᐅᓀᑕᒥᐣ ᒋᑯᒋᒋᑲᑌᐠ ᐱᓯᒧ ᐃᐡᑯᑌ ᑭᐡᐱᐣ ᐃᒪ ᒋᑭᐅᐣᒋ ᐊᒋᐃᐧᓭᑫᐧᐣ ᑲᐃᓇᑭᐣᑌᐠ ᐊᓂᒥᑭᐃᐧ ᐃᐡᑯᑌ ᑲᐊᐸᒋᑐᔭᐠ.”
ᐊᑎᑯᓴᑲᐃᑲᓂᐠ 1,100 ᑲᑲᐯᔑᐊᐧᐨ ᐃᐡᑯᓂᑲᓂᐠ ᐅᑐᐣᒋ ᒪᒪᐃᐧ ᐊᐸᒋᑐᓇᐊᐧ 149 ᑭᓫᐅᐊᐧᐟ ᓂᐱᑲᐣᐠ ᑲᐅᐣᒋᐊᓄᑭᒪᑲᓂᐠ ᐅᑎᐡᑯᑌᒥᐊᐧ, ᒣᑲᐧᐨ ᐊᐱ 1998 ᑲᔭᑭᐊᐧᓂᐠ ᑲᑭᐅᔑᒋᑲᑌᑭᐸᐣ ᐃᒪ ᐊᐧᔕᐦᐅᐃᐧᓯᐱᐠ ᐁᑲᐧ ᐊᔑᐨ ᐱᒥᐸᓂᒋᑫᐃᐧᑲᒥᐠ ᑲᐅᒋᐊᓄᑭᒪᑲᐠ ᐃᐡᑯᑌ.
ᒥᑭᐢ ᐃᑭᑐ ᐅᐁᐧ ᐱᓯᒧ ᐃᐡᑯᑌ ᑕᐅᐣᒋᐃᐧᒋᐦᐃᐁᐧᓭ ᐃᒪ ᐃᐡᑯᓂᑲᓂᐠ ᑲᑭᐅᐣᒋᒐᑲᐱᑫᓯᒋᑲᑌᑭᐸᐣ ᐃᐡᑯᓄᑲᒥᐠ ᒥᐡᑲᐧᐨ ᑯᑕᑭᔭᐣ ᐊᐧᑲᐦᐃᑲᓇᐣ ᒋᐅᒋ ᒐᑲᐱᑫᐦᐃᑲᑌᑭᐣ ᑫᓂᔑᑲᐯᔑᐊᐧᐨ ᐊᐃᐧᔭᐠ.
“ᓂᐸᑯᓭᐣᑕᐣ ᒋᐱᒥᐊᐸᒋᑐᔭᐠ ᐅᐁᐧ ᐁᑲ ᒥᐢᑕᐦᐃ ᑫᐃᔑ ᒣᑎᓂᑫᐦᐃᐁᐧᒪᑲᐠ ᐃᐡᑯᑌ ᑲᐱᒥᐊᐸᒋᒋᑲᑌᐠ,” ᐃᑭᑐ ᒥᑭᐢ. “ᑫᐃᐧᓇᐊᐧ ᒪᐃᐧᐣ ᑯᑕᑭᔭᐣ ᐃᐡᑯᓂᑲᓇᐣ ᐅᑲᓂ ᑯᒋᑐᓇᐊᐧ ᐅᐧᐁᓂ ᑭᐡᐱᐣ ᐃᔑᒥᓄᓭᐠ ᑲᑲᑫᐧᒋᒋᑲᑌᐠ ᐅᐁᐧ ᐱᓯᒧ ᐃᐡᑯᑌ.”
ᒥᑭᐢ ᐃᑭᑐ ᐅᐁᐧ ᐱᓯᒧ ᐃᐡᑯᑌ ᐊᐸᑎᓯᐊᐧᐠ ᐊᓂᒥᑭᓴᐠ ᒋᔑᐊᑌᐠ ᐃᐡᑯᑌ ᒣᑲᐧᐨ ᐁᑲ ᐱᓯᑦ ᑲᓇᑯᓯᐨ.
“ᓂᐸᑯᓭᐣᑕᒥᐣ ᑲᔦ ᒋᐅᒋ ᒪᓇᒋᑐᔭᐠ ᐱᒥᑌ ᒣᑲᐧᐨ ᐁᑲ ᑲᐃᐡᑯᓄᓇᓂᐊᐧᐠ,” ᐃᑭᑐ ᒥᑭᐢ. “ᐊᑎᑲ ᒣᑲᐧᐨ ᐁᑲ ᑲᐱᒥᐊᐸᑕᐠ ᐊᐧᑲᐦᐃᑲᐣ, ᑕᑭᑲᐡᑭᒋᑲᑌ ᑲᑭᓇ ᑫᑯᐣ ᒋᑭᐱᑎᓂᑲᑌᐠ ᒥᑕᐡ ᐃᐧᓂᑯ ᐁᔑᐱᒪᓄᑭᒪᑲᐠ.”
ᒥᑭᐢ ᐃᑭᑐ ᒥᔑᓄᔭᑭ ᐅᑭᐱᒥ ᐃᐧᒋᐦᐃᑯᓇᐊᐧ ᐁᑲ ᐁᐧᓴ ᒥᐢᑕᐦᐃ ᒋᐅᒋ ᒣᑎᓂᑫᐦᐃᑯᐊᐧᐨ ᑲᑭᐅᔑᒋᑲᑌᓂᑭᐸᐣ ᓯᐱᑲᐠ ᒋᐅᒋ ᐊᓄᑭᒪᑲᓂᐠ ᐃᐡᑯᑌᓂ ᒥᓇ ᐱᒥᐸᓂᒋᑫᐃᐧᑲᒥᑯᓂ.
“ᑭᑕᒪᒥᑐᓀᑕᒥᐣ ᐊᐣᑎ ᐃᓀᑫ ᑫᑭᐅᐣᒋ ᒪᓇᒋᒋᑫᔭᑭᐸᐣ ᔓᓂᔭᓂᐠ ᒥᓇ ᐃᐡᑯᑌ ᒥᓇ ᐱᒥᑌ,” ᐃᑭᑐ ᒥᑭᐢ. “ᐊᑎᑲ ᑲᐱᒋᐃᐧᒋᑲᑌᐠ ᐱᒥᑌ ᒪᐊᐧᐨ ᐅᑭᒋᒣᑎᓂᑫᐦᐃᑯᓇᐊᐧ ᐊᐣᑎ ᐱᑯ ᐊᓂᔑᓂᓂᐃᐧ ᑕᔑᑫᐃᐧᓂᐠ.”
ᒐᐧᑎ ᑲᑭᐱᑕᑦ, ᑲᐅᑭᒪᐃᐧᐡᑲᐠ ᑭᒋᐊᓄᑭᐃᐧ ᒪᒋᑕᐃᐧ ᐱᒧᒋᑫᐃᐧᓂᐠ, ᐅᑭᒥᓀᐧᑕᐣ ᐅᐁᐧᓂ ᑲᑭᒪᒋᒋᑲᑌᓂᐠ ᐅᐡᑭᑫᑯᓂ. ᐅᐁᐧ ᐊᓄᑭᐃᐧ ᐱᒧᒋᑫᐃᐧᐣ ᐅᐣᒋ ᐊᓄᑲᑌ ᐃᐡᑯᑌᐃᐧ ᐊᓄᑭᐃᐧᐣ ᑲᑭᒪᑕᓄᑲᑕᒧᐊᐧᐸᐣ ᑭᐁᐧᑎᓄᐠ ᐅᑭᒪᑲᓇᐠ.
“ᐊᔕ ᐊᐊᐧᔑᒣ ᓂᔑᑕᓇᐃᐧᐊᐦᑭ ᓂᑐᒋᐱᒥᐃᐧᑕᓄᑭᒪᐠ ᐅᑭᒪᑲᓇᐠ ᒋᑭᔭᓂ ᑌᐱᓇᒧᐊᐧᐨ ᑲᑭᐱᔑ ᐸᑯᓭᐣᑕᒧᐊᐧᐨ,” ᐃᑭᑐ ᐃᒪ ᑲᑭᐱᐅᑭᒪᐃᐧᐸᐣ ᑭᐁᐧᑎᓄᐠ ᐅᑭᒪᑲᓇᐠ. “ᓂᐢᑕᑦ ᓂᑭᐊᓄᑲᑕᒥᓇᐸᐣ ᒋᑕᑲᐧᐠ ᑫᓀᐟ ᐊᓄᑭᐃᐧᐣ, ᐁᑲᐧ ᐊᐱᐣ ᑭᐁᐧᑎᓄᐠ ᐅᑭᒪᑲᓇᐠ ᒪᐡᑭᑭ, ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓄᐃᐧᐣ ᒥᓇ ᑫ ᒪᒋᑭᑐᐃᐧᓇᐣ. ᒥᓇᐊᐧ ᑕᐡ ᐊᐱᐣ ᐅᑭᒪᑲᓇᐠ ᓂᑭᒥᓂᑯᐠ ᑯᑕᑭᓂ ᒋᐊᓄᑲᑕᒧᐊᐧᐠ - ᒋᑭᐁᐧᐃᓇᐱᔭᐣ ᒣᑲᐧᐨ ᑲᑭᐱᐊᓄᑲᑌᑲᐧᐸᐣ ᑫᓀᐟ ᐊᓄᑭᐃᐧᓇᐣ ᐁᑲᐧ ᐃᒪ ᒋᐅᒋ ᓇᓇᑐᓇᒪᐣ ᐊᓂᐣ ᑫᑭᐃᔑ ᒪᒥᓄᓂᑲᑌᑭᐸᐣ ᑲᑭᒋᐊᓂᒥᓭᐦᐃᑯᐊᐧᐨ ᐅᑎᐡᑯᑌᒥᐊᐧ ᒥᔑᐣ ᓄᐱᒪᑲᒥᐠ ᑲᐊᔭᒪᑲᑭᐣ ᐃᐡᑯᓂᑲᓇᐣ.”
ᑲᑭᐱᑕᑦ ᐃᑭᑐ ᐅᐁᐧ ᐱᓯᑦ ᐃᐡᑯᑌ ᑭᐅᐣᒋ ᐅᓇᒋᑲᑌ ᓂᐦᓱᐊᐦᑭ ᒋᐱᒥᐊᓄᑲᑕᒧᐊᐧᐨ ᐅᒪ ᑭᒋᐊᓄᑭᐃᐧ ᒪᒋᑕᐃᐧᓂᐠ ᒥᓇ ᑲᐅᐣᒋᐃᐧᑕᓄᑭᒥᑯᐊᐧᐨ ᑲᓀᑎᔭᐣ ᓱᓫᐊᕑ.
“ᐊᑎᐟ ᐊᓂᔑᓂᓂᐃᐧ ᑕᔑᑫᐃᐧᓇᐣ ᑲᐅᐣᒋ ᐊᓄᑲᑕᒪᐠ ᐅᐣᒋᒣᑎᓂᑫᐊᐧᐨ 1 ᒥᓫᐃᔭᐣ ᒥᓇ 2 ᒥᓫᐃᔭᐣ ᑕᓴᐧᐱᐠ ᐯᔑᑯᐊᐦᑭ ᑲᐃᔑᑕᐱᑕᒪᐃᐧᐣᑕᐧ ᐱᒥᑌᓂ ᐅᑕᔑᑫᐃᐧᓂᐊᐧᐠ,” ᐃᑭᑐ ᑲᑭᐱᑕᑦ. “ᑲᐃᐧᐣ ᑕᐡ ᐅᒥᓄᓴᐦᐃᑯᓯᓇᐊᐧ ᐅᐁᐧᓂ. ᑲᐃᐧᐣ ᑲᔦ ᒋᑌᐱᓭᐊᐧᐨ ᐅᑎᐡᑯᑌᒥᐊᐧ ᑲᑭᓇ ᐃᒪ ᐊᐧᑲᐦᐃᑲᓇᐣ ᑲᐊᔭᑭᐣ ᒋᐅᒋ ᓇᐸᐱᑫᓂᑲᑌᑭᐣ, ᒥᓇ ᐊᓄᑭᐃᐧᑲᒥᑯᐣ ᓇᐣᑕ ᒥᓇ ᒋᐅᒋ ᐃᐧᒋᐦᐃᐁᐧᒪᑲᐠ ᐊᓄᑭᐃᐧ ᒪᒋᒋᑫᐃᐧ ᐃᔑᒋᑫᐃᐧᓇᐣ.”
ᑲᑭᐱᑕᑦ ᐃᑭᑐ ᐃᒪ ᐊᑎᑯᓴᑲᐃᑲᓂ ᐃᐡᑯᓄᑲᒥᐠ ᑕᐅᐣᒋ ᐃᐧᒋᐦᐃᐁᐧᓭ ᐁᑲ ᓇᐱᐨ ᒋᐅᒋ ᐊᐸᒋᑐᐊᐧᐨ ᐱᒥᐸᓂᒋᑲᓂᐠ ᑲᐅᒋᐊᓄᑭᒪᑲᐠ ᐃᐡᑯᑌ.
“ᒥᑕᐡ ᐃᒪ ᑲᐃᐧᒪᒪᐃᐧ ᐊᓄᑲᑕᒪᐠ ᑲᓀᑎᔭᐣ ᓱᓫᐊᕑ, ᐊᓄᑭᐃᐧ ᒪᒋᒋᑫᐃᐧᓂᐠ ᐅᑭᒪᑕᓄᑲᑕᓇᐊᐧ ᒋᐊᓄᒋ ᐊᒋᐃᐧ ᐊᐸᒋᑐᐊᐧᐨ ᐱᒥᐸᓂᒋᑲᓂᐠ ᑲᐅᒋᐊᓄᑭᒪᑲᐠ ᐃᐡᑯᑌ ᐁᑲᐧ ᒥᐡᑲᐧᐨ ᒋᐊᐸᑕᐠ ᐱᓯᒧ ᐃᐡᑯᑌ,” ᐃᑭᑐ ᑲᑭᐱᑕᑦ. “ᓄᑯᑦ ᑲᑭᔑᑲᐠ, ᓂᐃᐧᑕᓄᑭᒪᒥᐣ ᑲᐃᐧᑕᓄᑭᒪᑭᑕᐧ, ᓂᑐᒋ ᐅᔑᑐᒥᐣ ᑫᐃᔑᓇᑲᐧᐠ ᐱᓯᒧ ᐃᐡᑯᑌ ᐁᑲ ᓇᐱᐨ ᒋᐊᐸᑕᐠ ᐊᐦᑭᑲᐠ ᑲᐅᐣᒋ ᐊᐸᑕᐠ ᐃᐡᑯᑌ ᐁᐧᑎ ᐊᐧᓴ ᑭᐁᐧᑎᓄᐠ.”