ᐅᑎᐡᑯᓂ ᐊᐦᐃ ᐊᓂᔑᓇᐯᒧᐃᐧᐣ ᑭᑭᓄᐦᐊᒪᑫᐧᐃᐧᐣ ᐁᐅᑕᐱᓇᐠ ᐁᑲ ᑌᐯᐤ ᐁᐊᐧᐱᐨ ᐅᓴᑦ ᑲᔓᑲᐊᐧᐱᓀᐨ

ᐊᒥᐁᐧ ᐊᔕ ᓂᐃᐧᔭᑭ ᐊᐦᐃ ᐊᓂᔑᓇᐯᒧᐃᐧᐣ ᑭᑭᓄᐦᐊᒪᑫᐃᐧᐣ ᐁᐦᐊ ᐅᑎᐡᑯᓂ ᒪᑎᐣ ᒍᐢᑌ ᐁᐃᔑᓂᑲᓯᐨ ᐁᐃᐡᑯᓄᓂᑕᐠ ᒥᓇ ᐱᑯ ᒪᐊᐧᐨ ᐁᐃᐧᑭᑐᐨ ᐁᐃᐧᑭᔑᐡᑯᓄᐃᐧᐨ ᐊᓇᐃᐧᐣ ᐁᑲ ᑌᐯᐤ ᐁᐊᐧᐱᐨ ᐅᓴᑦ ᑲᔓᑲᐊᐧᐱᓀᐨ᙮
“ᒣᑲᐧᐨ ᑲᔭ ᒥᔑᓇᑎᐣ ᓂᑕᓄᑭᐃᐧᐣ ᐁᑲᒪᔑ ᐁᔭᓄᑲᑕᒪᓂᐣ ᔕᑯᐨ ᓂᐃᐧᑭᔑᑐᐣ ᐊᓂᔑᓇᐯᒧᐃᐧᐣ ᑭᑭᓄᐦᐊᒪᑫᐃᐧᐣ,” ᒍᐢᑌ ᐃᑭᑐ᙮ “ᒣᑲᐧᐨ ᐃᐧᓂᑯ ᓂᑕᓂᒥᐃᐧᑐ ᐁᑲ ᐅᑕ ᑌᐯᐤ ᑲᐊᐧᐱᔭᐣ ᐊᐦᐃ ᐅᑕ ᓂᔓᑲᐊᐧᐱᓀᐃᐧᐣ ᑲᑐᒋᑫᒪᑲᐠ᙮ ᓇᐸᓀᒐᑊ ᐊᔕ ᑲᐃᐧᐣ ᒋᐊᐧᐱᐊᐧᑫᔭᐣ ᐁᑲᐧ ᐸᑭ ᓇᐱᐨ ᑯᑕᐠ ᓂᒪᒋᔭᐱᐊᐧᑫ᙮”
ᐁᑲᐧ ᓂᔑᑕᓇ ᓂᓴᐧᓱᔕᐱᔭᑭ ᐅᑕᓇᐠ ᐊᐱᐣ ᑲᑭᐅᒋᒪᒋᔓᑲᐊᐧᐱᓀᐨ ᒍᐢᑌ ᐁᑲᐧ ᐊᐱᐣ ᐊᓂᔑᓇᐯᐃᐧ ᒪᐡᑭᑭᓂ ᐅᑭᐊᐸᒋᑐᐣ ᒥᓇ ᐱᑯ ᐁᑭᐃᐧᒋᐦᐃᑯᐨ᙮
“ᐊᐱ ᓂᓱᒥᑕᓇ ᐁᐃᓇᓀᐃᐧᔕᑊ ᑲᑕᓴᐧᑭᐃᐧᓀᔭᐣ ᐊᐱᐣ ᑲᑭᒪᒋᔓᑲᐊᐧᐱᓀᔭᐣ,” ᒍᐢᑌ ᐃᑭᑐ᙮ “ᒪᐊᐧᐨ ᐱᑯ ᑭᑭᒋᐊᓂᒪᐣ ᒥᓇ ᐱᑯ ᐁᑭᑭᒋᐡᐱᓭᐨ ᓂᔓᑲᑦ᙮”
ᒍᐢᑌ ᒥᔑᓇᐧᔦᐠ ᐊᐱᐣ ᐅᑭᐃᔑᐊᓄᑲᑕᐣ ᐅᐱᒪᑎᓯᐃᐧᐣ ᒥᓇ ᐱᑯ ᑭᐳᓂᒥᓂᑫᐧ ᒥᓇ ᑲᐧᔭᐠ ᑭᒪᒋᐃᓇᒋᑫ ᐁᑲᐧ ᒥᓇ ᑭᒪᒋᑲᑫᐧᒋ᙮
“ᐊᒥᐁᐧ ᐱᑯ ᑲᐃᔑᐳᓂᒥᓂᑫᐧᔭᐣ ᑲᐧᓂᐣ ᒥᓇ ᐃᐧᒋᐦᐃᐁᐧᐃᐧᑲᒥᑯᐠ ᒋᐅᒋᐱᑎᑫᔭᐣ,” ᒍᐢᑌ ᐃᑭᑐ᙮ “ᓂᓇᓭᒪᐢ ᒥᓇ ᓂᐃᐧᒋᐊᐧᑲᐣ ᐁᑲᐧ ᓂᓂᒐᓂᔕᐠ ᒥᐢᑕᐦᐃ ᓂᑭᐃᐧᒋᐦᐃᑯᐠ᙮”
ᒍᐢᑌ ᐃᑭᑐ ᐃᑫᐧᓂᐊᐧᐣ ᑲᑭᐱᒥᐃᐧᒋᐦᐃᑯᐨ ᒥᐢᑕᐦᐃ ᐅᑭᐃᐧᒋᐦᐃᑯᐣ ᐃᐃᒪ ᒥᓯᐁᐧ ᐅᐱᒪᑎᓱᐃᐧᓂᐠ ᒥᓇ ᐅᑭᐃᐧᑕᒪᑯᐣ ᐁᑲ ᒋᐸᐱᐢᑫᐣᑕᐠ ᐊᑎᐟ ᒥᒋᒪᐣ ᒥᓇ ᐊᓂᔑᓇᐯᐃᐧ ᒪᐡᑭᑭᓂ ᐅᑭᒥᓂᑯᐣ ᑲᑭᓇᑕᐃᐧᐃᐦᑯᐨ᙮
“ᒥᓇ ᓂᑭᐃᐧᑕᒪᐠ ᐁᑲᐧ ᔓᑲ ᒋᐊᒪᐧᐠ,” ᒍᐢᑌ ᐃᑭᑐ᙮ “ᒥᓇ ᑲᐧᓂᐣ ᒥᓂᑫᐧᐃᐧᐣ ᐅᑕᐱᓇᐣ ᐁᑲ ᑲᔭ ᒋᑯᒋᐱᑕᒪᐣ᙮”
ᒍᐢᑌ ᐃᑭᑐ ᐊᐱᐣ ᑲᑭᑐᑕᐠ ᐅᑫᐧᓂᐊᐧᐣ ᐊᒥᐁᐧ ᐊᐱᐣ ᐅᔓᑲᒪᐣ ᑲᐃᔑᒥᓄᓭᓂᐨ ᐊᐦᐃ ᐁᑭᑐᑕᐠ ᑲᑭᐃᔑᐃᐧᑕᒪᐊᐧᑲᓄᐃᐧᐨ ᐃᐃᐁᐧ ᒣᑲᐧᐨ ᓂᔓᐱᒥᑯᓇᑲ ᑲᑭᐱᒥ ᐃᐧᒋᐦᐊᑯᓄᐃᐧᐨ᙮
“ᐊᐱ ᑲᑭᐊᐧᐸᒪᐠ ᒪᐡᑭᑭᐃᐧᓂ ᑲᐅᒋᐱᒥᓇᓇᑲᒋᐦᐃᑯᔭᐠ, ᑭᐃᑭᑐ ᑲᐧᓂᐣ ᑎᑯ ᒋᔓᑲᐊᐧᐱᓀᔭᐣ,”
ᒍᐢᑌ ᐃᑭᑐ᙮ “ᒥᑕᓱᔭᑭ ᑫᒋᓇᐨ ᐅᐅᐁᐧ ᓂᑭᐱᒥᐃᐧᒋᐦᐃᑯᐣ᙮”
ᒥᑕᓱᔭᑭ ᑲᐃᐡᑲᐧᐃᓯᓭᐠ ᐊᒥᐁᐧ ᐊᐱᐣ ᒍᐢᑌ ᑲᐃᔑᐳᓂᓇᓇᑲᒋᔭᐨ ᐅᔓᑲᒪᐣ᙮
“ᐁᑲᐧ 1997 ᑲᐊᑭᐊᐧᐠ ᒥᓇ ᐱᑯ ᒪᐊᐧᐨ ᓂᑭᒋᐦᐃᐊᓂᒥᐦᐃᑯᐣ,” ᒍᐢᑌ ᐃᑭᑐ᙮
“ᑲᐧᓂᐣ ᑲᔭ ᒋᑭᐅᒋᑭᐱᑎᓇᒪᐣ᙮ ᑭᒥᔑᓇᑎᓄᐣ ᓂᑎᓯᓭᐃᐧᓇᐣ ᐃᐃᒪ ᓂᑕᐯᐣᒋᑫᐃᐧᓂᐠ ᐊᒥᐁᐧ ᑲᔭ ᑲᑭᐃᔑᐳᓂᑐᔭᓇᐣ ᑫᑯᓇᐣ ᒥᐡᑯᐨ ᐁᑭᑲᓇᐁᐧᓂᒪᑲᐧ ᓄᓯᓴᐠ᙮”
ᐁᑲᐧ ᐯᔑᑯᔭᑭ ᑲᐃᐡᑲᐧᐃᓯᓭᓂᐠ ᐊᒥᐁᐧ ᐊᐱᐣ ᑲᑭᐃᔑᒪᒋᐡᑯᓄᐃᐧᐨ ᐁᑲᐧ ᐊᐱ ᑲᐃᐡᑲᐧᐃᐡᑯᓄᐃᐧᐨ ᐊᐦᐃᐠ ᐊᐧᐊᐧᑌ ᐱᒧᒋᑫᐃᐧᑲᒥᑯᐠ ᑭᑕᓇᓄᑭ᙮
“ᐁᑲᐧ 2009 ᑲᐊᑭᐊᐧᐠ ᐊᒥᐁᐧ ᐊᐱᐣ ᔓᑲᐊᐧᐱᓀᐃᐧᒪᐡᑭᑭ ᑲᑭᒪᒋᐊᐸᒋᑐᔭᐣ,”
ᒍᐢᑌ ᐃᑭᑐ᙮ “ᐁᑲᐧ 2008 ᒥᓇ 2009 ᑲᐊᑭᐊᐧᐠ ᒪᐊᐧᐨ ᓂᔓᑲᑦ ᑭᐊᐃᐡᐱᓭ ᒥᓇ ᑭᓇᓇᓯᓭ᙮ ᔕᑯᐨ ᐊᒥᐁᐧ ᐱᑯ ᑲᑕᐃᐧᐃᔑᒪᒪᑕᓄᑭᔭᐣ᙮”
ᐊᒥᐃᐁᐧ ᐊᐱᐣ ᒍᐢᑌ ᑲᐅᒋᐊᐧᐱᐨ ᐁᒪᒋᓭᓂᑭᐣ ᐊᐊᐧᔑᒣ ᐱᑯ ᑲᐧᓂᐣ ᒋᐊᓂ ᐊᐧᐱᐊᐧᑫᐨ ᐅᐡᑭᔑᑯᐣ᙮ “ᐅᐅᐁᐧ ᑲᐅᒋᔑᓭᐠ ᓇᐣᑕ ᐃᓯᓭ ᐃᐃᒪ ᑭᒐᐱᐠ ᑕᐱᐡᑯᐨ ᐁᐸᐡᑭᓭᐠ ᐅᓴᑦ ᐅᑕ ᒥᐢᑕᐦᐃ ᑲᔓᑲᐃᐧᓇᓂᐊᐧᐠ ᑲᐅᒋᐃᓯᓭᐠ᙮” ᒍᐢᑌ ᐃᑭᑐ᙮ “ᑭᐡᐱᐣ ᑕᔑᓀ ᐁᐃᐡᐱᓭᐨ ᑭᔓᑲᑦ ᐊᒥᐁᐧ ᐊᐱᐣ ᐁᐸᐡᑭᒋᓭᐊᐧᐨ᙮ ᐊᒥᐁᐧ ᒪᔭᑦ ᐅᐅᐁᐧ ᑲᑭᐃᑎᔭᐣ᙮”
ᒍᐢᑌ ᐊᔕ ᒥᓇ ᐊᓇᑭ ᐊᐧᐁᐧᔑᒋᑲᑌᓂᐸᐣ ᐅᐡᑭᔑᐠ ᔕᑯᐨ ᐯᔑᑯᑯᐣ ᐁᑕ ᑭᐊᐧᐱᐊᐧᑫ ᐊᐱᐣ ᒥᓇ ᐁᑲ ᑲᑭᐅᒋᒪᒋᔭᐱᐊᐧᑫᐨ᙮
“ᐊᐊᐧᔑᒣ ᑲᐃᐧᐣ ᒋᐊᐧᐱᐊᐧᑫᔭᐣ,” ᒍᐢᑌ ᐃᑭᑐ᙮ “ᐁᑲᐧ ᐅᐅᐁᐧ ᑯᑕᐠ ᓂᐡᑭᔑᐠ ᑕᐱᐡᑯᐨ ᑫᑯᐣ ᐁᐊᔭᐠ ᓂᑎᔑᓇᐣ ᔕᑯᐨ ᐱᑯ ᑭᔭᐱᐨ ᓂᐊᐧᐱᐊᐧᑫ᙮ ᐊᒥᐁᐧ ᑲᐧᔭᐠ ᐁᑲ ᑲᐊᐧᓇᐦᐃᑯᔭᐣ ᑭᔭᐱᐨ ᐱᑯ ᓂᒪᒋᔭᐱᐊᐧᑫ᙮”
ᐁᑲᐧ ᒍᐢᑌ ᑭᐳᓂᐱᒥᐸᑐ 2001 ᑲᐊᑭᐊᐧᓂᓂᐠ ᐅᓴᑦ ᓂᔕᐧ ᑲᑭ ᑭᐱᒋᑌᐦᐁᓭᐸᐣ ᓯᑕᐊᐧᐨ ᐱᑯ ᐅᒋᐊᐧᐊᐧᑲᐃᐧ ᐃᓂᑯᐠ ᐅᔓᑲᒪᐣ ᑲᐃᔑᒥᓄᓭᓂᐨ᙮
“ᑲᐅᒋᐊᐧᐊᐧᑲᐃᐧᔭᐣ ᓂᔓᑲᑦ ᒥᐢᑕᐦᐃ ᐅᒋᒥᓄᓭ,” ᒍᐢᑌ ᐃᑭᑐ᙮
ᐁᐧᐡᑲᐨ ᑭᐱᐊᐊᐧᔑᔑᐃᐧᐨ ᒍᐢᑌ ᐃᑭᑐ ᐁᑲ ᐃᐧᑲ ᔓᑲᐊᐧᐱᓀᐃᐧᐣ ᐁᐅᒋᑭᑫᐣᑕᑲᐧᐠ ᐁᑲᐧ ᐊᔕ ᒥᔑᐣ ᐅᐊᐧᑯᒪᑲᓇᐣ ᔓᑲᐊᐧᐱᓀᓂᐊᐧᐣ᙮
“ᓂᑲᓄᑫ ᐯᔑᐠ ᓂᓂᑦ ᐁᔓᑲᐊᐧᐱᓀᐸᐣ ᐃᐧᐣ ᐁᑕ ᑭᔓᑲᐊᐧᐱᓀᐸᐣ ᐃᐃᐁᐧ ᒣᑲᐧᐨ,” ᒍᐢᑌ ᐃᑭᑐ᙮ “ᓂᑭᒪᒪᑲᑌᐣᑕᒥᓇᐸᐣ ᐊᐱᐣ ᑲᔓᑲᐊᐧᐱᓀᐸᐣ᙮”
ᒍᐢᑌ ᐃᑭᑐ ᐸᓂᒪ ᐅᓂᑭᐦᐃᑯᐣ ᑲᑭᒋᐦᐊᔭᐃᐧᓂᐨ ᑲᑭᔓᑲᐊᐧᐱᓀᓂᐨ᙮
“ᑫᑕᑕᐁᐧᐣ ᐱᑯ ᐅᐅᐁᐧ ᐊᑯᓱᐃᐧᐣ ᑲᑭᐅᒋᑕᑯᔑᓄᒪᑲᐠ ᐃᐃᒪ ᓂᑕᔑᑫᐃᐧᓂᓇᐠ,” ᒍᐢᑌ ᐃᑭᑐ᙮
ᐁᑲᐧ ᑭᐁᐧᑎᓄᐠ ᓀᑲᐱᐦᐊᓄᐠ ᐅᒪᐡᑭᑭᐃᐧ ᐅᓇᓇᑲᒋᒋᑫᐠ ᐃᑭᑐᐊᐧᐠ 2010 ᑲᐊᑭᐊᐧᐠ ᒪᐊᐧᐨ ᐅᐅᐁᐧ ᔓᑲᐊᐧᐱᓀᐃᐧᐣ ᐁᑭᐃᐡᐱᐡᑲᒪᑲᐠ ᐅᐅᒪ ᒥᓯᐁᐧ ᐅᐣᑌᕑᐃᔪ᙮
ᐁᑲᐧ ᒥᓇ ᐱᑯ ᒥᔑᐣ ᐊᐃᐧᔭᐠ ᐅᐅᒪ ᑭᐁᐧᑎᓄᐠ ᓀᑲᐱᐦᐊᓄᐠ ᑲᐃᔑᑲᐯᔑᐊᐧᐨ ᑭᐱᑎᑲᓇᐊᐧᐠ ᐊᑯᓯᐃᐧᑲᒥᑯᐠ ᐅᐅᐁᐧ ᔓᑲᐊᐧᐱᓀᐃᐧᐣ ᐅᒋ᙮
ᑲᓂᑕ ᔓᑲᐊᐧᐱᓀᐃᐧᐣ ᑲᐅᒋᓇᓇᑲᒋᑐᐊᐧᐨ ᐃᑭᑐᐊᐧᐠ ᒪᐊᐧᐨ ᐊᓂᔑᓇᐯᐠ ᐃᐧᓇᐊᐧ ᐁᐃᐡᐱᑲᒪᑲᓂᓂᐠ ᐅᔓᑲᐊᐧᐱᓀᐃᐧᓂᐊᐧ ᐊᐱᒋᐃᐧᐣ ᑯᑕᑭᔭᐠ ᐊᐃᐧᔭᐠ᙮ ᓇᐣᑕ 23% ᐊᐃᐧᔭᐠ ᑕᐦᐃᑊ 1 ᔓᑲᐊᐧᐱᓀᐃᐧᐣ ᐅᑕᔭᓇᐊᐧ ᐁᑲᐧ 14% ᐊᐃᐧᔭᐠ ᑕᐦᐃᑊ 2 ᔓᑲᐊᐧᐱᓀᐃᐧᐣ ᐅᑕᔭᓇᐊᐧ᙮
ᔓᑯᐨ ᑲᓇᑕ ᔓᑲᐊᐧᐱᓀᐃᐧᐣ ᑲᐅᒋᓇᓇᑲᒋᑐᐊᐧᐨ ᐃᑭᑐᐊᐧᐠ ᓇᐣᑕ ᒐᐸᔑᐡ 7.0 ᐁᐊᑲᐧᑯᓭᐨ ᔓᑲ ᒥᓇ ᐁᑲ ᐁᐅᓴᑦ ᐃᐡᐸᑯᓭᐠ ᑭᒥᐢᑯ ᐃᐧᐸᐨ ᑕᑭᐃᐧᒋᒋᑲᑌ ᐁᑲ ᒋᒪᒋᓭᑭᐣ ᑭᐡᑭᔑᑯᐣ᙮