ᓂᐢᑕᑦ ᑭᐅᒋᒪᒋᑕ ᐁᒪᓯᓂᒪᒋᐨ ᐱᓂᐡ ᒪᓯᓂᒋᑫᐃᐧᓇᐣ ᑲᐃᔑᑲᓇᐁᐧᒋᑲᑌᑭᐣ ᓄᑯᑦ ᑕᓇᓄᑭ

ᑭᕑᐃᐢ ᑯᕑᓇᑭ
ᐊᐧᐊᐧᑌ ᐊᒋᒧᐃᐧᓇᐣ
ᒋᐣ ᒪᕑᔑᓫ, ᑭᒋᓇᒣᑯᓯᐱᐠ ᐅᐣᒋᑎᐯᐣᑕᑯᓯ, ᓂᑕᒪᓯᓂᒪᒋ ᐁᑲᐧ ᒥᓇ ᒣᑲᐧᐨ ᐱᒥᐃᐡᑯᓄ ᐁᐃᐧᑌᐱᓇᐠ ᒋᑕᓇᓄᑭᐨ ᐃᒪ ᑕᐣᑐᕑ ᐯ ᒪᓯᓂᒋᑫᐃᐧᓇᐣ ᑲᐃᔑᑲᓇᐁᐧᐣᒋᑲᑌᑭᐣ.
ᒪᕑᔑᓫ ᑭᑕᔑᐅᐱᑭ ᑕᐣᑐᕑ ᐯ ᐁᑲᐧ ᐁᐧᑎ ᐟᕑᐁᐣᐟ ᔪᓂᐯᓫᓯᑎ ᐱᑐᕑᐳᕑᐅ ᐅᐣᑌᕑᐃᔪ ᑭᑕᔑᐃᐡᑯᓄ ᐅᑭᑌᐱᓇᐣ ᑲᑭ ᑲᐡᑭᑐᐨ ᐁᑭᐃᐡᐸᓂᐠ ᐅᑭᑫᐣᑕᓱᐃᐧᐣ ᐊᓂᔑᓂᓂᐃᐧ ᓇᓇᑕᐃᐧᑭᑫᒋᑫᐃᐧᐣ ᒥᓇ ᑲᔭᐡ ᐃᓯᓭᐃᐧᓇᐣ ᑲᑭᐃᐡᑯᓄᐨ.
ᐁᑲᐧ ᐊᐱ ᑲᑭ ᐃᐡᑲᐧ ᑭᔑᑐᐨ ᐅᐁᐧᓂ ᐅᑎᐡᑯᓄᐃᐧᐣ ᒪᕑᔑᓫ ᑭᐃᔑᑯᓯ ᐊᐧᓂᓇᐊᐧᑲᐠ ᐁᑲᐧ ᐊᐧᑲᐦᐃᑲᓇᐣ ᑲᐅᒋᓇᓇᑲᒋᒋᑲᑌᑭᐣ ᑭᑕᓇᓄᑭ ᑲᒪᔦᐧ ᒧᐡᑭᓀᐱᐦᐃᑫᐨ ᐁᐃᐧᐃᐡᑯᓄᐨ ᐊᓂᔑᓂᓂᐃᐧ ᐃᐡᑯᓄᐦᐃᑯᐃᐧᓂᐠ ᒥᓇ ᑲᑭᑭᓄᐦᐊᒪᑲᓄᐊᐧᐠ ᑫᑯᓇᐣ ᑲᑕᔑᑲᓇᐁᐧᒋᑲᑌᑭᐣ ᑲᐃᓇᓄᑭᓇᓄᐊᐧᐠ ᐁᐧᑎ ᑫᐟᑎᓄ ᑯᐯᐠ.
ᐊᒥᐦᐃᒪ ᑲᑭᐅᒋ ᑭᒋᓀᐣᑕᒪᐣ ᐁᒥᓴᐁᐧᐣᑕᒪᐣ ᒋᑭᑕᓇᓄᑭᔭᐸᐣ ᑫᑌ ᑫᑯᓇᐣ ᑲᑕᔑᑲᓇᐁᐧᐣᒋᑲᑌᑭᐣ ᓇᐣᑕ ᒪᓯᓂᒋᑫᐃᐧᓇᐣ, ᐃᑭᑐ ᒪᕑᔑᓫ. ᒪᐊᐧᐨ ᐊᑯ ᓂᒪᒥᓀᐧᐣᑕᐣ ᐁᑕᓇᑲᒥᑭᓯᔭᐣ ᑲᐃᔑᐊᔭᑭᐣ ᒪᓯᓂᒋᑫᐃᐧᓇᐣ ᒥᓇ ᐊᐃᐧᔭᐠ ᑲᑲᑫᐧᒪᓇᒋᑐᐊᐧᐨ ᒪᓯᓂᒋᑫᐃᐧᓇᐣ. ᐁᑲᐧ ᒥᓇ ᐁᑲᑫᐧᑭᑫᐣᑕᒪᐣ ᐸᐸᑲᐣ ᑲᐅᐣᑕᑲᓀᓯᐊᐧᐨ ᑲᐊᐃᐣᑐᑕᒧᐊᐧᐨ ᒥᓯᐁᐧᑲᒥᐠ. ᐊᒥᐦᐅᐁᐧ ᐁᔑᑌᐯᐧᑕᒪᐣ ᐃᒪ ᐁᐅᒋᒪᑲᐠ ᑲᐃᔑᐸᐸᑲᓂᓭᐠ ᐃᓇᑎᓯᐃᐧᐣ ᑲᐊᐃᔑᒪᒋᐊᐧᐨ ᐊᐃᐧᔭᐠ.
ᐁᑲᐧ ᐅᐁᐧᓂ ᑲᑭᐅᑕᐱᓇᐠ ᐃᐡᑯᓄᐦᐃᑯᐃᐧᓂᐠ ᐯᔑᑯᔭᑭ ᑭᐱᒥᓭᓂ ᐁᑲᐧ ᐊᐱ ᑲᐃᐡᑲᐧ ᑭᔑᑐᐨ ᑭᑭᐁᐧᐡᑲ ᑕᐣᑐᕑ ᐯ ᐃᐧᓂᑯ ᐁᑭᑐᑕᐠ ᐅᒪᓯᓂᒋᑫᐃᐧᐣ, ᐃᐁᐧᓂ ᑕᐡ ᑲᒥᓀᐧᑕᐠ ᐁᑐᑕᐠ ᒥᑭᓯᑲᐧᓱᓂᑫᐃᐧᐣ. ᐁᑲᐧ ᒣᑲᐧᐨ ᑕᐣᑐᕑ ᐯ ᑲᐊᔭᐸᐣ ᑭᔭᓂᑲᑫᐧ ᐊᑕᐊᐧᓂᑫᑕᒪᓱ ᒥᓇ ᑭᔭᓂᐊᐧᐊᐸᐣᑕᐦᐃᐁᐧ ᐅᑎᔑᒪᒋᐃᐧᓇᐣ ᑲᐃᐧᐊᑕᐊᐧᑫᐨ ᐃᒪ ᐅᑌᓇᐠ.
ᓂᒥᑭᓯᑲᐧᓱᐃᐧᐣ ᐁᑲᐧ ᒥᓇ ᑕᔑᑫᐃᐧᓂᐠ ᑲᑭᑕᓇᓄᑭᔭᐣ ᑲᑭᐅᒋᐃᐧᒋᐦᐃᑯᔭᐣ ᒋᑌᐱᓇᒪᐣ ᒋᐊᓂᐊᓄᑭᔭᐣ ᒪᓯᓂᐱᐦᐃᑫᐃᐧᓇᐣ ᑲᐃᔑᑲᓇᐁᐧᐣᒋᑲᑌᑭᐣ ᒋᑕᓇᓄᑭᔭᐣ. ᐃᑭᑐ ᒪᕑᔑᓫ.
ᒪᕑᔑᓫ ᑭᐱᑕᓇᓄᑭᐸᐣ ᐃᒪ ᑲᑕᔑᑭᑭᓄᐦᐊᒪᑲᓄᐊᐧᐠ ᑫᑯᓇᐣ ᑲᑐᒋᑫᐦᐃᑎᓇᓄᐊᐧᐠ ᐁᑲᐧ ᒥᓇ ᑲᐊᑲᔐᔑᐊᐧᐨ ᐅᑎᐡᑯᓂᐠ ᐅᑭᐱ ᑭᑭᓄᐦᐊᒪᐊᐧᐣ ᒥᑭᓯᑲᐧᓱᓂ. ᐅᑭᐱ ᐊᐧᐊᐧᐸᒪᐣ ᑲᔦ ᐱᑯ ᐊᐁᐧᓀᓇᐠ ᐃᒪ ᑲᐃᔑ ᑲᓇᐁᐧᐣᒋᑲᑌᑭᐣ ᒪᓯᓂᐱᐦᐃᑫᐃᐧᓇᐣ ᐁᑲᐧ ᒥᓇ ᓂᐢᑕᑦ ᑭᐃᔑᒋᑫ ᐁᑭᓇᓇᑕᐃᐧᑭᑫᑕᐠ ᒥᑭᓯᑲᐧᓱᓂᑫᐃᐧᓂ ᑭᐡᐱᐣ ᐊᔭᐊᐧᑫᐣ ᐃᒪ ᑕᐣᑐᕑ ᐯ ᒪᓯᓂᐱᐦᐃᑫᐃᐧᓇᐣ ᑲᐃᔑᑲᓇᐁᐧᐣᒋᑲᑌᑭᐣ.
ᒥᑕᐡ ᐃᒪ ᑲᑭᔭᓄᒋᐃᓯᓭᓂᐠ ᒋᐊᓄᑭᐦᐊᑲᓄᐨ ᒪᓯᓂᒋᑫᐃᐧᓇᐣ ᑲᑕᓇᓄᑲᑌᑭᐣ ᐃᐧᐣ ᒋᐅᒋ ᓂᑲᓂᐡᑲᒪᑫᐨ ᐃᐧᑕᓄᑭᒥᑐᐃᐧᓂᐠ.
ᐣᑭᓇᐦᐃᐡᑲᑯᐣ ᑕᐡ ᐅᐁᐧ ᑐᑲᐣ ᐃᓇᓄᑭᐃᐧᐣ ᐊᓂᐡ ᑫᓂᐣ ᐁᓂᑕᐃᐧᒪᒋᔭᐣ, ᐣᑕᔭᐣ ᐃᐡᑯᓄᐦᐃᑯᐃᐧᐣ ᒥᓇ ᐣᑭᐱ ᑭᑭᓄᐦᐊᒪᑫ ᒥᓇ ᐣᑭᐱᐊᑕᐊᐧᓂᑲᑫ ᐣᑐᔑᒋᑲᓇᐣ ᒥᓇ ᐁᑭᒧᐡᑭᓀᐱᐦᐃᑫᑕᒪᓱᔭᐣ ᑫᑭᐅᒋ ᑎᐸᐦᐅᑯᔭᐣ, ᐃᑭᑐ ᒪᕑᔑᓫ.
ᐅᐣᑌᕑᐃᔪ ᒪᓯᓂᐱᐦᐃᑫᐃᐧᓇᐣ ᑲᓂᑲᓂᐡᑲᒧᐊᐧᐨ ᒥᓇ ᑲᓇᑕ ᒪᓯᓂᐱᐦᐃᑫᐃᐧᓇᐣ ᑲᓂᑲᓂᐡᑲᒧᐊᐧᐨ ᑭᐃᔑᓇᑐᑕᒪᑫ ᔓᓂᔭᐣ ᐁᑲᐧ ᑕᐡ ᐊᐃᓇᓀᐊᐧ ᑭᐅᒋᒥᓇᑲᓄ ᔓᓂᔭᐣ ᒋᐅᒋ ᐊᓄᑲᑕᐠ ᐅᒪᓯᓂᒋᑫᐃᐧᐣ.
ᐸᐸᑲᐣ ᐃᐧᒋᐦᐃᐁᐧᐃᓇᐣ ᐅᑕᓂᐸᐸᑭᑎᓇᓇᐊᐧ ᐊᓂᓂᑯ ᐸᐸᑲᐣ ᑲᐊᓂᐊᐃᐣᑐᑕᒪᐣ ᐁᑲᐧ ᑕᐣ ᑭᓂᑯ ᑫᑯᐣ ᑲᓂᑕᐃᐧᒪᒋᔭᐣ ᒥᐦᐅᒪ ᑫᑭᐅᒋᐃᐧᒋᐦᐃᑯᔭᑭᐸᐣ ᒋᐅᒋ ᒪᒋᑕᒪᓱᔭᐣ ᐃᐧᒪᑕᓄᑭᔭᐣ ᒥᓇ ᑭᓂᑯ ᑲᐃᔑᒥᓀᐧᑕᐣ ᐁᑐᑕᒪᐣ, ᐃᑭᑐ.
ᒪᕑᔑᓫ ᐃᑭᑐ ᑭᐡᐱᐣ ᓂᑕᐃᐧᒪᒋᔭᐣ ᒥᓇ ᒥᓀᐧᑕᒪᐣ ᐁᒪᓯᓂᒪᒋᔭᐣ, ᑲᑭᒥᑲᐣ ᐊᓄᑭᐃᐧᐣ ᑲᐃᔑᒪᒥᓀᐧᐣᑕᒪᐣ ᐁᑐᑕᒪᐣ ᐊᓂᐡ ᑲᐃᐧᐣ ᐃᐧᑲ ᐃᐡᑲᐧᓭᓯᐣ ᑫᑯᐣ.
ᔕᑯᐨ ᑕᐡ ᐁᑲ ᒋᔕᑫᐧᓂᒧᔭᐣ ᒥᓇ ᐸᐸᑲᐣ ᑫᑯᓇᐣ ᒋᑲᑫᐧᒋᑐᔭᐣ ᐊᓂᐡ ᐊᐣᑎ ᐱᑯ ᐊᔭᐊᐧᐣ, ᐃᒪ ᒥᓇ ᒪᐊᐧᐨ ᐅᐡᑲᑎᓴᐠ ᑲᐃᔑᐊᔭᐊᐧᐨ ᑲᐅᑕᐱᓇᒧᐊᐧᐨ ᐱᒥᐃᐡᑯᓄᐦᐃᑯᐃᐧᓇᐣ, ᐃᑭᑐ.
ᒪᕑᔑᓫ ᐃᑭᑐ ᑭᐡᐱᐣ ᐅᐡᑲᑎᓴᐠ ᑲᓇᓇᑐᓇᒧᐊᐧᐨ ᐊᓄᑭᐃᐧᐣ ᐃᒪ ᒪᓯᓂᒋᑫᐃᐧᓂᐠ ᐱᓇᒪ ᑲᐧᔭᐠ ᒋᑲᑫᐧᐊᔭᐨ ᐃᐡᑯᓄᐦᐃᑯᐃᐧᐣ ᒥᓇ ᒋᐃᔑᑌᐯᐧᑕᐠ ᐃᐁᐧ ᑲᑐᑕᐠ ᒪᐊᐧᐨ ᐃᓂᐁᐧᓂᐊᐣ ᓂᔑᐣ ᑫᑯᓇᐣ ᒪᐊᐧᐨ ᐁᑭᒋᓀᑕᑲᐧᐣ. ᑲᐃᐧᐣ ᑕᑭᐅᒋᐃᓯᓭᐸᐣ ᒋᑭᑐᑕᒪᐸᐣ ᐅᐁᐧ ᑭᐡᐱᐣ ᐁᑲ ᑭᒋᐃᐡᑯᓄᐃᐧᓂᐠ ᑭᐃᔕᔭᐸᐣ, ᐃᑭᑐ.
ᑭᐡᐱᐣ ᓂᑕᒪᓯᓂᒋᓭᔭᐣ ᑲᑫᐧᑌᐯᑕᐣ ᐃᐁᐧ ᑲᑐᑕᒪᐣ ᑭᐡᐱᐣ ᐁᑲ ᑌᐯᐧᑕᒪᐣ ᑲᐃᐧᐣ ᑲᐃᐧᒋᐦᐃᑯᓯᐣ. ᒋᐃᔑᒪᐡᑲᐁᐧᐣᑕᒪᐣ ᒥᓇ ᑲᐯᐦᐃ ᐱᑯ ᒋᐃᔑᐱᒪᓄᑲᑕᒪᐣ ᒋᔭᓂ ᑲᑫᐧᐅᑎᑕᒪᐣ ᑲᑲᑫᐧᑌᐱᓇᒪᓱᔭᐣ.