ᑲᓇᑕ ᐅᑭᒪᑲᓇᐠ ᐅᑭᐊᓄᑲᑕᓇᐊᐧ ᐊᓂᔑᓂᓂᐊᐧᐠ ᑲᑭᓇᓇᑕᐃᐧᑭᑫᓂᑕᒥᐧ ᐱᒋᐳᐃᐧᐣ ᑭᑭᐡᑲᑯᐊᐧᑫᐣ

ᓄᑯᒥᑫ ᑲᓇᑕ ᐅᑭᒪᑲᓇᐠ ᓇᓇᑕᐃᐧᑭᑫᒋᑫᐃᐧᐣ ᑭᒥᑭᑫᒪᑲᐣ ᐁᑲ ᐃᐧᓂᑯ ᑫᒋᐊᐧᐠ ᔐᒪᐠ ᐊᓂᔑᓂᓂᐊᐧᐠ ᒋᔭᓂ ᒪᒋᑐᑕᑯᐊᐧᐨ ᐱᒋᐳᐃᐧᓇᐣ ᑲᑭᐃᔑ ᓇᓇᑲᒋᒋᑲᓂᐊᐧᑭᐸᐣ, ᔕᑯᐨ ᐃᑭᐁᐧᓂᐊᐧᐠ ᑭᒋᓇᒣᑯᓯᐠ ᐊᓂᔑᓂᓂᐊᐧᐠ ᐁᐧᑎ ᐅᐡᑲᐨ 1980 ᑲᐱᒥᓭᓂᑭᐸᐣ ᑲᑭ ᓇᓇᑲᒋᐦᐃᑕᐧᐸᐣ ᑭᒥᑲᒪᐊᐧᐸᓂᐠ ᒥᐢᑕᐦᐃ ᐁᑭᑭᐡᑲᑯᐊᐧᐨ ᐱᒋᐳᐃᐧᓂ.
“ᐅᑭᐅᓀᑕᓇᐊᐧᐸᐣ ᐯᔑᐠ ᑭᐁᐧᑎᓄᐠ ᑕᔑᑫᐃᐧᓂᐠ ᒋᐃᔑ ᓇᓇᑲᒋᒋᑫᐊᐧᐨ ᐃᒪ ᐃᓀᑫ ᐯᔓᐨ ᑭᒋᓴᑲᐦᐃᑲᓂᐠ, ᓂᓇᐃᐧᐟ ᑕᐡ ᐣᑕᔑᑫᐃᐧᓂᓇᐣ ᑲᑭᐅᑕᐱᓂᑲᑌᑭᐸᐣ, ᒥᑕᐡ ᑲᑭᐃᔑ ᑭᑫᒋᑲᑌᐠ ᐃᓴᐣ ᓇᐱᐨ ᒥᐢᑕᐦᐃ PCBs ᐱᒋᐳᐃᐧᐣ ᐁᑭᑭᐡᑲᑯᔭᐠ ᓂᔭᐃᐧᓇᐠ,” ᑭᐃᑭᑐ ᑭᒋᓇᒣᑯᓯᐱ ᐅᑭᒪᑲᐣ ᑕᐧᓂ ᒪᐧᕑᐃᐢ ᑲᑭᐊᓂᒧᑕᐠ ᒣᑲᐧᐨ ᐊᐱ 1980 ᑲᑭ ᓇᓇᑲᒋᐦᐃᑕᐧᐸᐣ ᐅᐣᑌᕑᐃᔪ ᐃᐡᑯᓂᑲᓂᐠ ᑲᑲᐯᔑᐊᐧᐨ ᐊᓂᔑᓂᓂᐊᐧᐠ ᒋᑭᑭᐡᑲᑯᐊᐧᑫᐧᐣ ᐱᒋᐳᐃᐧᓂ ᐅᒥᐢᑭᐧᒥᐊᐧᐠ. “ᑲᐃᐧᐣ ᐃᐧᑲ ᒋᑭᐅᒋ ᑌᐱᓇᔭᐠ ᔓᓂᔭ ᑫᑭᐊᓄᑭᐊᐧᑫᔭᑭᐸᐣ ᒋᑭᐅᒋ ᓇᓇᑲᒋᒋᑲᑌᑭᐸᐣ ᐊᓇᒥᐱᐠ ᑲᐊᔭᒪᑲᑭᐣ, ᓂᐱ, ᒥᓇ ᐱᑯ ᐊᐣᑎ ᒪᐡᑯᐨ ᑲᑭᐃᔑ ᑲᑯᓇᐯᐧᐱᓂᑲᑌᐊᐧᑯᐸᓀᐣ ᐱᒋᐳᐃᐧᓇᐣ ᐁᐧᐡᑲᐨ.”
ᒪᐧᕑᐃᐢ ᑭᐃᑭᑐ ᐃᐁᐧ PCBs ᐱᒋᐳᐃᐧᐣ ᑭᐊᓂᔕᒪᑲᓄᑐᐠ ᒥᒋᒥᑲᐠ ᐊᓂᔑᓂᓂᐊᐧᐠ ᐁᐧᐡᑲᐨ ᑲᑭᐱᐅᐣᑕᒋᐦᐅᐊᐧᑫᐊᐧᐨ.
“ᐊᒥ ᐱᑯ ᑫᐃᑭᑐᔭᐣ ᑲᑭᓇ ᒪᐃᐧᐣ ᐃᑯ ᑭ ᑭᑭᐡᑲᑯᒥᓇᑐᐠ ᐃᐁᐧ,” ᐃᑭᑐ ᒪᐧᕑᐃᐢ ᐃᒪ ᐅᑕᔑᑫᐃᐧᓂᐠ. “ᐁᐧᑎ ᐱᐅᑕᓇᐠ ᑲᐱᐊᔭᑭᐊᐧᐠ ᓇᐱᐨ ᒥᔑᐣ ᐊᐃᐧᔭᐠ ᐣᑭᐱ ᐊᐧᐊᐧᓂᐦᐊᒥᓇᐠ ᑲᐊᒧᐁᐧᒪᑲᓂᐠ ᐊᑯᓯᐃᐧᓂ ᐁᐅᐣᑕᐱᓀᐊᐧᐨ, ᒥᒪᐃᐧᐣ ᐃᑯ ᐃᐁᐧ ᑲᑐᒋᑫᒪᑲᐠ. ᑫᓂᐣ ᐃᐧᓂᑯ ᑲᐃᔑᐯᔑᑯᔭᐣ, ᐣᑌᐯᐧᑕᐣ ᒥᐦᐃᒪ ᐁᐅᐣᒋᒪᑲᐠ.”
ᓫᐅᐠ ᓯᓇᐊᐧᑊ, ᑭᒋᓇᒣᑯᓯᐱ ᐊᓄᑭᐃᐧ ᐅᐊᐧᑕᐦᐃᓂᑫ, ᐃᑭᑐ ᐅᑭᐱᓄᑕᐊᐧᐣ ᑭᒋᔭᐦᐊᐠ ᐃᒪ ᑲᑲᐯᔑᐊᐧᐨ ᐁᑭᐊᓂᒧᑕᒧᐊᐧᐨ ᐁᑭᐊᐧᐸᑕᒧᐊᐧᐨ ᐁᑲᐧᓇᐯᐧᐱᓂᑲᑌᓂᐠ ᑫᑯᓂ “ᐁᐊᐧᐱᓇᑲᐧᐠ” ᐁᐧᑎ ᒥᓂᑎᑯᐠ ᒣᑲᐧᐨ ᐊᐱ 1940 ᑲᐱᒪᑭᐣᑌᐠ ᑎᐸᑭᐣᒋᑫᐊᐧᑭᐃᐧᐣ.
“ᑭᒋᔭᐦᐊᐠ ᐣᑭᐃᐧᑕᒪᑯᒥᐣ ᒣᑲᐧᐨ ᐊᐱ 1945 ᑲᐊᐦᑭᐊᐧᐠ, ᒪᐊᐧᐨ ᑭᐊᐧᐱᐢᑲᑲᒥᓄᐸᐣ ᓂᐱ, ᑭᔭᑦ ᑲᔦ ᐁᐧᑎ ᒥᓂᑎᑯᐠ,” ᐃᑭᑐ ᓯᓇᐊᐧᑊ.
“ᐊᒥᐊᑯ ᐁᐧᑎ ᐁᔑᐸᑭᑕᐁᐧᐊᐧᐸᐣ ᒥᓇ ᐅᑭᐊᐧᐸᑕᓇᐊᐧ ᐊᓇᒥᑎᒥᐠ ᐁᑭᐊᐱᒋ ᐊᐧᐱᐢᑲᑲᒥᐠ.”
ᓯᓇᐊᐧᑊ ᐃᑭᑐ ᑭᒋᔭᐦᐊᐠ ᒥᐦᐃᒪ ᑲᑭᓂᑕ ᑕᔑᐸᑭᑕᐁᐧᐊᐧᐸᐣ ᒪᐊᐧᐨ ᐁᑭ ᑭᓄᔐᑲᐠ ᐱᓂᐡ ᐊᐱᐣ 1945 ᑲᐊᐦᑭᐊᐧᓂᐠ, ᐃᔑᑭᔑᑲ ᓇᓇᑕᐃᐧᑭᑫᒋᑫᐃᐧᑲᒥᐠ ᑭᐅᔑᒋᑲᑌᐸᐣ ᐃᒪ ᒥᓂᑎᑯᐠ ᒣᑲᐧᐨ 1945-1947, ᒥᐊᐱᐣ ᐁᑲ ᑲᑭᐊᓂ ᑭᓄᔐᑲᓂᐠ.
“ᐅᑭᐊᓂᔑ ᑭᑫᑕᓇᐊᐧ ᐊᐱ ᑲᐸᑭᑕᐁᐧᐊᐧᐨ ᐁᑲ ᐊᐱᐣ ᐁᐅᑕᐁᐧᓂᐨ ᑭᓄᔐᐣ ᐁᑲᐧ ᒥᓇ ᐁᓂ ᒪᔭᑭᓇᑲᐧᓂᐠ ᓂᐱᓂ - ᐁᑭᔭᓂ ᐸᐡᑭᓀᔭᑲᒥᓂᐠ,” ᐃᑭᑐ ᓯᓇᐊᐧᑊ.
ᓯᓇᐊᐧᑊ ᐃᑭᑐ ᐊᓂᔑᓂᓂᐊᐧᐠ ᑕᔑᑫᐃᐧᓂᐠ ᑲᑲᐯᔑᐊᐧᐨ ᓇᓯᐱᐠ ᐃᑯ ᑭᐅᐣᑕᐦᐃᐱᐸᓂᐠ ᑲᑭᒥᓂᑲᐧᑕᒧᐊᐧᐨ ᓂᐱᓂ ᐁᐧᑎ ᐱᐅᑕᓇᐠ.
ᐁᑲᐧ ᐅᐁᐧ ᑲᓇᑕ ᐅᑭᒪᑲᓇᐠ ᓇᓇᑕᐃᐧᑭᑫᒋᑫᐃᐧᐣ, ᐊᓂᔑᓂᓂᐊᐧᐠ ᑲᑭᒪᑕᓄᑲᑕᒧᐊᐧᐨ ᐱᒋᐳᐃᐧᐣ ᓇᓇᑕᐃᐧᑭᑫᒋᑫᐃᐧᐣ - ᒥᓯᐁᐧᑲᒥᐠ ᒥᑭᑫᐃᐧᐣ, ᐊᔕ ᑭᑭᔕᓄᑲᑌ ᒣᑲᐧᐨ ᓴᑭᐸᑲᐃᐧᐱᓯᑦ 26 ᑲᐃᓇᑭᓱᐨ ᐁᑲᐧ ᑲᓇᑕ ᐅᑭᒪᑲᓇᐠ ᒪᒪᑕᐃᐧᐱᐊᐧᐱᑯᐠ ᑭᐊᒋᑲᑌ ᒋᐅᒋ ᐊᐧᐸᒋᑲᑌᐠ.
“ᐊᒥᐦᐅᐁᐧ ᐁᑫᐧᓇᐠ ᐁᔑᓇᑲᐧᐠ ᒥᓯᐁᐧᑲᒥᐠ ᐅᒪ ᑲᓇᑕ ᐅᐁᐧ ᑐᑲᐣ ᓇᓇᑕᐃᐧᑭᑫᒋᑫᐃᐧᐣ ᑲᑭᐊᓄᑲᑌᐠ ᐊᓂᔑᓂᓂᐊᐧᐠ ᑲᑭᓇᓇᑲᒋᐦᐃᑕᐧ ᑫᒋᐊᐧᐠ ᐃᑯ ᐃᒪ ᐃᐡᑯᓂᑲᓂᐠ ᑲᐃᔑᑲᑲᐯᔑᐊᐧᐨ,” ᑭᐃᑭᑐ ᑲᓇᑕ ᑭᒋᐅᑭᒪᑲᐣ ᔕᐧᐣ ᐁᔓᐟ ᐊᐟᓫᐃᐅ. “ᐅᐁᐧ ᑎᐸᒋᒧᐃᐧᐣ ᑕᑭᒋᓇᐸᑕᐣ ᒋᐅᒋ ᐊᐧᐃᐧᐣᒋᑲᑌᐠ ᐁᑲ ᑲᐃᔑ ᓇᓂᓯᑕᐁᐧᒋᑲᑌᐠ ᑲᐱᐦᒋᑐᑕᑯᐊᐧᐨ ᒥᓇ ᑲᐊᔭᒪᑲᓂᐠ ᐱᒋᐳᐃᐧᓇᐣ ᑲᐃᔑ ᑲᑲᐯᔑᐊᐧᐨ ᐊᓂᔑᓂᓂᐊᐧᐠ.“
“ᑭᔭᐱᐨ ᒥᐢᑕᐦᐃ ᓇᑕᐁᐧᑕᑲᐧᐣ ᒋᑭᔭᓂ ᑲᑫᐧ ᓂᓯᑕᐁᐧᒋᑲᑌᑭᐸᐣ ᐊᓂᐣ ᐁᔑ ᓇᓂᓴᓂᐦᐃᐁᐧᒪᑲᑭᐣ ᐊᐧᑲᐦᐃᑲᓂᐠ ᑲᓯᓂᑫᐃᐧᐊᐸᒋᒋᑲᓇᐣ ᒥᓇ ᐊᓄᑭᐃᐧᑲᒥᑯᐠ ᑲᐊᐸᑕᑭᐣ ᐱᒋᐳᐃᐧᓇᐣ ᐁᑲᐧ ᒥᓇ, ᐅᐁᐧ ᑲᑭ ᑭᔑᒋᑲᑌᐠ ᐅᐡᑭᑎᐸᒋᒧᐃᐧᐣ, ᑕᑭᐸᓇᐸᑕᐣ ᑲᑭ ᒪᒪᓯᓇᐦᐃᑲᑌᑭᐣ ᑫᑯᓇᐣ ᒋᐊᓂ ᑲᑭᑫᑕᑲᐧᐠ ᐁᐧᑎ ᐊᓂᓂᑲᐣ ᒥᓇᐊᐧ ᐊᓂ ᓇᓇᑕᐃᐧᑭᑫᒋᑲᓂᐊᐧᐠ ᑭᐡᐱᐣ ᐊᓂ ᒪᔭᑭᐡᑲᒪᑲᓄᑫᐧᐣ ᒥᓯᐁᐧ ᐊᐦᑭᑲᐠ ᒋᔭᓂ ᓇᐣᑭᐦᐅᒪᑲᓄᑫᐧᐣ ᓇᐣᑕ ᒋᔭᓂ ᑕᐸᔑᐡᑲᒪᑲᓄᑫᐧᐣ ᐃᐁᐧ ᑲᐊᓂᒧᒋᑲᑌᐠ ᐱᒋᐳᐃᐧᐣ ᑲᐱᒥᓇᓇᑲᒋᒋᑲᑌᐠ.
“ᐁᑲᐧ ᒥᓇ ᐅᐁᐧ ᓇᓇᑕᐃᐧᑭᑫᒋᑫᐃᐧᐣ ᑕᓂᔑ ᐃᐧᒋᑕᐧᒪᑲᐣ ᑲᔭᓂ ᐅᐡᑭᓭᑭᐣ ᑫᑯᓇᐣ ᑫᔭᓂᐊᐸᑕᑭᐣ ᑫᐅᒋ ᓂᓯᑕᐁᐧᒋᑲᑌᐠ ᑫᑯᐣ ᑲᓇᓇᑕᐃᐧᑭᑫᒋᑲᑌᐠ ᑲᐱᒪᓄᑲᑌᐠ ᒥᓯᐁᐧ ᑲᐊᐱᑕᑲᒥᑲᐠ,” ᐃᑭᑐ ᐊᐟᓫᐃᐅ.
ᐅᐁᐧ ᓇᓇᑕᐃᐧ ᑭᑫᒋᑫᐃᐧᐣ ᑲᑭᐃᓇᓄᑲᑌᐠ ᑭᓇᓇᑕᐃᐧ ᑭᑫᒋᑲᑌᐊᐧᐣ 97 ᐸᐸᑲᐣ ᑲᑕᓱᐃᔑᓇᑲᐧᑭᐣ ᑲᐊᐧᑫᐃᐧ ᐱᒋᐳᐃᐧᒋᑫᒪᑲᑭᐣ ᐃᐁᐧ ᑕᐡ ᑲᑭᐅᒋ ᐅᓀᒋᑲᑌᑭᐣ ᐁᐊᓇᒣᒋᑲᑌᑭᐣ ᐁᒪᒋᑐᑕᑯᐊᐧᐨ ᐊᐃᐧᔭᐠ, ᒥᓇ ᒥᓂᑯᐠ ᑲᑕᓀᑕᒥᐦᐃᐁᐧᒪᑲᐠ ᒥᓇ ᒋᑭᑭᓇᐊᐧᒋᑲᑲᓄᐊᐧᐠ ᑯᑕᑭᔭᐣ ᑲᑭᓇᓇᑲᒋᒋᑲᑌᑭᐣ.
“ᐁᑲᐧ ᑭᐃᔑᒥᑭᑫᒪᑲᐣ ᐊᓂᔑᓂᓂᐊᐧᐠ, ᐊᔑᐨ ᑲᔦ ᑯᑕᑭᔭᐠ ᑲᓇᑕ ᑲᑲᐯᔑᐊᐧᐨ, ᐸᐣᑭ ᓇᑲᐧᓂ ᐁᑭᑭᐡᑲᑯᐊᐧᐨ ᐱᒋᐳᐃᐧᓂ ᐃᐧᔭᐃᐧᐊᐧᐠ,” ᐃᑭᑐ ᑎᔦᑯ ᑲᕑᓯᔭ, ᑲᓇᑕ ᐅᑭᒪᑲᓇᐠ ᒪᐡᑭᑭᐃᐧ ᐊᓄᑭᓇᑲᐣ. “ᐁᑲᐧ ᔕᑯᐨ, ᐅᒪ ᑲᓇᑕ ᐅᑭᒪᑲᓇᐠ ᐱᒧᒋᑫᐃᐧᓂᐠ ᐅᐃᐧᐣᑕᓇᐊᐧ ᐃᓂᐁᐧᓂᐊᐧᐣ ᑫᑲᐟ ᑲᑭᓇ ᑲᑕᓭᐧᑭᓇᑲᐧᑭᐣ ᑲᐱᒋᐳᐃᐧᓂᐊᐧᑭᐣ ᐊᐸᒋᒋᑲᓇᐣ ᐁᑲ ᒋᐸᑭᑎᓂᑲᑌᐠ ᒋᐊᓭᐧᓭᐠ ᑲᐃᐦᑯᐸᑎᓂᑲᑌᐠ ᒋᐊᐱᒋᒪᐡᑲᐊᐧᐠ ᑫᑭᐅᐣᒋ ᒪᒋᑐᑕᑯᐨ ᐊᐃᐧᔭ. ᐁᑲᐧ ᑲᑭᐊᓂ ᑭᔑᒋᑲᑌᐠ ᓇᓇᑕᐃᐧᑭᑫᒋᑫᐃᐧᐣ ᒥᓂᑯᐠ ᐃᐁᐧ ᑲᑕᑲᐧᐠ ᐱᒋᐳᐃᐧᐣ ᐃᒪ ᐊᓂᔑᓂᓂᐊᐧᐠ ᑲᐃᔑᐸᐱᑯ ᑲᐯᔑᐊᐧᐨ ᑲᐃᐧᐣ ᒣᑲᐧᐨ ᑭᐅᐣᒋᐃᔑ ᐊᐧᐸᒋᑲᑌᓯᐣ ᓀᐅᐨ ᒋᐅᒋ ᑭᒋᒪᒋᑐᑕᑯᐊᐧᐨ.”
ᒣᑲᐧᐨ ᐊᐱ 2011 ᑲᐊᐦᑭᐊᐧᐠ ᑲᑭᒪᐊᐧᑐᓯᓇᐦᐃᑲᑌᑲᐧᐸᐣ ᐅᒪ ᓇᓇᑕᐃᐧᑭᑫᒋᑫᐃᐧᓂᐠ ᐁᑲᐧ ᒥᓇ ᑭᐊᔑᑕᓯᓇᐦᐃᑲᑌᐊᐧᐣ ᐁᑭᐅᒋ ᑲᑭᑭᓇᐊᐧᒋ ᑎᐸᒋᒥᑕᐧ ᒥᓯᐁᐧᑲᒥᐠ ᐅᒪ ᑲᓇᑕ 502 ᐊᓂᔑᓂᓂᐊᐧᐠ ᑲᑭᒋᐦᐊᐃᐧᐊᐨ 20 ᒥᓇ ᐊᐊᐧᔑᒣ ᑲᑕᓱᐊᐦᑭᐃᐧᓀᐊᐧᐨ ᐊᔑᐨ ᒥᓇ ᓂᐃᐧᐣ ᓄᐱᒪᑲᒥᐠ ᑲᐊᔭᒪᑲᑭᐣ ᑕᔑᑫᐃᐧᓇᐣ.