ᑲᓇᑕ ᐅᑭᒪᐃᐧᐣ $6 ᒥᓫᐃᔭᐣ ᐅᒥᓇᐣ ᒪᑕᐊᐧ ᐱᒧᒋᑫᐃᐧᑲᒥᐠ ᐊᐦᐃ ᐱᐊᐧᐱᑯᑫᐃᐧ ᑭᑭᓄᐦᐊᒪᑫᐃᐧᐣ ᐅᒋ

ᑲᓇᑕ ᐅᑭᒪᐃᐧᐣ ᑫᑲᐟ 6 ᒥᓫᐃᔭᐣ ᐅᐸᑭᑎᓇᐣ ᔓᓂᔭᓇᐣ ᐁᐦᐊᐣ ᐅᑕ ᐁᒥᓇᐨ ᐊᐃᐧᔭᐣ ᐃᐃᒪ ᒪᑕᐊᐧ ᑕᔑᑫᐃᐧᓂᐠ ᑲᐅᒋᑎᐯᐣᑕᑯᓯᓂᐨ ᒥᓇ ᐱᑯ ᑲᐧᔭᐠ ᒋᑭᑭᓄᐦᐊᒪᐊᐧᑲᓄᐊᐧᐨ ᓇᓇᑲ ᐊᓄᑭᐃᐧᓇᐣ ᑲᐃᐧᑕᑲᐧᑭᐣ ᐊᐦᐃᐠ ᑲᐃᐧᐃᔑᐱᐊᐧᐱᑯᑲᓂᐊᐧᐠ᙮
ᐁᑲᐧ ᑲᓇᑕ ᐅᑭᒪᐃᐧᐣ ᐊᓄᑭᐃᐧ ᐃᐧᒋᐦᐃᐁᐧᐃᐧᐣ ᒥᓇ ᐃᐧᑕᓄᑭᒥᑐᐃᐧᐣ ᔓᓂᔭᐣ ᐱᒧᒋᑫᐃᐧᓂᐠ ᐅᑭᐃᐧᑕᓇᐊᐧ ᐅᑕᓇᐠ ᑲᑭᐱᒥᑯᓇᑲᐠ $5.9 ᒥᓫᐃᔭᐣ ᔓᓂᔭᓇᐣ ᐁᑭᐃᔑᐸᑭᑎᓇᐊᐧᐨ ᐃᐃᒪ ᐱᐊᐧᐱᑯᑫᐃᐧᐣ ᐊᓂᔑᓇᐯᐃᐧ ᑭᑭᓄᐦᐊᒪᑫᐃᐧᐣ ᐱᒧᒋᑫᐃᐧᐣ (RoFATA) ᐊᐦᐃ ᐅᑕ ᒋᐸᑭᑎᓇᒧᐊᐧᐨ ᐱᐊᐧᐱᑯᑫᐃᐧ ᐊᓄᑭᐃᐧ ᑭᑭᓄᐦᐊᒪᑫᐃᐧᓇᐣ ᐁᑲᐧ ᑲᔭ ᐁᐦᐊᐣ ᒋᑭᑭᓄᐦᐊᒪᐊᐧᐊᐧᐨ ᐊᐃᐧᔭᐣ ᐃᐃᒪ ᒪᑕᐊᐧ ᑕᔑᑫᐃᐧᓇᐣ ᑲᐅᒋᑎᐯᐣᑕᑯᓯᓂᐨ᙮
ᓴᑲᓱ ᑭᑭᓄᐦᐊᒪᑫᐃᐧᓇᐣ ᑕᑕᑲᐧᓄᐣ ᒥᓇ ᓂᑯᑕᐧᓱ ᐊᓄᑭᐃᐧ ᐃᐡᑯᓄᐃᐧ ᑭᑭᓄᐦᐊᒪᑫᐃᐧᓇᐣ ᑕᑕᑲᐧᓄᐣ ᐁᐦᐊᐠ ᐅᑕ ᐊᐃᐧᔭᐠ ᐃᐃᒪ ᒪᑕᐊᐧ ᑕᔑᑫᐃᐧᓇᐣ ᑲᐅᒋᑎᐯᐣᑕᑯᓯᐊᐧᐨ ᒋᐅᑕᐱᓇᒧᐊᐧᐨ ᐁᑲᐧ ᐅᐱᒪᐊᒧᐃᐧᐱᓯᑦ, 2013 ᐊᐦᑭᐊᐧᐠ ᑕᐃᔑᒪᒋᓭ᙮ ᓇᓇᑲ ᐱᑯ ᑕᐃᔑ ᑭᑭᓄᐦᐊᒪᑲᓂᐊᐧᐣ ᐊᑎᐟ ᓂᔭᓄ ᐱᒥᑯᓇᑲ ᑕᐱᒥᓭᐃᐧᓄᐣ ᐁᑲᐧ ᐊᑎᐟ ᓂᔑᑕᓇ ᐱᒥᑯᓇᑲ ᑕᐱᒥᓭᐊᐧᓄᐣ᙮
ᑫᒋᓇᐨ 260 ᒪᒪᐤ ᐊᐃᐧᔭᐠ ᑕᐊᓄᑭᐃᐧ ᑭᑭᓄᐦᐊᒪᐊᐧᑲᓄᐊᐧᐠ ᐊᐦᐃᐠ ᐃᐃᒪ ᐅᑕᔑᑫᐃᐧᓂᐊᐧᐠ ᓇᐣᑕ ᑲᔭ ᐃᐃᒪ ᑲᐧᐣᐯᑐᕑᐁᔑᐣ ᑲᐧᓫᐊᐨ ᑭᒋ ᑭᑭᓄᐦᐊᒪᑫᐃᐧᑲᒥᑯᐠ ᐊᐦᐃᐠ ᐃᐧᑫᐧᑐᐣᐠ ᑲᐃᔑᑕᑲᐧᐠ᙮
ᐁᑲᐧ ᐱᐊᐧᐱᑯᑫᐃᐧᐣ ᐊᓂᔑᓇᐯᐃᐧ ᑭᑭᓄᐦᐊᒪᑫᐃᐧᐣ ᐱᒧᒋᑫᐃᐧᐣ (RoFATA) 196 ᐊᐃᐧᔭᐣ ᑲᑭ ᑭᑭᓄᐦᐊᒪᐊᐧᑲᓄᐃᐧᓂᐨ ᐅᑲᐊᓄᑭᐦᐊᐊᐧᐣ ᐁᐧᑎ ᐊᓂ ᓂᑲᐣ᙮
ᑭᕑᐁᐠ ᕑᐃᑭᐸᐧᕑᐟ, ᑭᒋᐅᑭᒪᐃᐧ ᐊᓄᑭᓇᑲᐣ ᒥᓇ ᐅᐅᐁᐧ ᐱᐊᐧᐱᑯᑫᐃᐧᐣ ᑲᐅᒋᐸᐸᒥᓯᐨ ᐅᑭᐸᑭᑎᓇᐣ ᐅᑎᐸᒋᒧᐃᐧᐣ ᐁᑭᐃᐧᑕᐠ ᑲᓇᑕ ᐅᑭᒪᐃᐧᐣ ᔓᓂᔭᓇᐣ ᑲᑭᐸᑭᑎᓇᐨ ᐁᑲᐧ ᐃᐃᒪ ᑲᐧᐣᐯᑐᕑᐁᔑᐣ ᑲᐧᓫᐊᐨ ᑭᒋ ᑭᑭᓄᐦᐊᒪᑫᐃᐧᑲᒥᑯᐠ ᑲᑭᑕᔑᐃᐧᑕᐠ ᐊᐦᐃᐠ ᐅᑕ ᐃᐧᑫᐧᑐᐣᐠ (Thunder Bay) ᑲᐃᔑᑕᑲᐧᐠ ᐃᐃᐁᐧ ᒣᑲᐧᐨ ᐅᐸᐅᐃᐧᐱᓯᑦ 8 ᑲᐃᓇᑭᓯᐨ᙮
“ᐁᑲᐧ ᑭᑐᑭᒪᐃᐧᓂᓇᐣ ᐊᐦᐃ ᒪᐊᐧᐨ ᐊᓄᑭᐃᐧᓇᐣ ᒋᐊᔭᑭᐣ ᐅᑲᓇᐊᐧᐸᑕᓇᐣ ᒥᓇ ᔓᓂᔭᑫᐃᐧ ᐃᐧᒋᐦᐃᐁᐧᐃᐧᓇᐣ ᒋᐊᔭᑭᐣ ᐅᑲᓇᐊᐧᐸᑕᓇᐣ ᐁᑲᐧ ᒥᓇ ᒋᒥᓄᓭᐠ ᑲᑭᓇ ᑫᑯᐣ ᐅᐅᒪ ᒥᓯᐁᐧ ᑲᓇᑕ ᐁᑲᐧ ᐅᐅᒪ ᑭᐁᐧᑎᓄᐠ ᐅᐣᑌᕑᐃᔪ,” ᕑᐃᑭᐸᐧᕑᐟ ᐃᑭᑐ᙮ “ᒪᐊᐧᐨ ᑭᒋᓀᐣᑕᑲᐧᐣ ᐁᐦᐊᐠ ᑲᐣᓀᑎᔭᐣ ᑲᐧᔭᐠ ᑭᑭᓄᐦᐊᒪᑫᐃᐧᐣ ᒋᐊᔭᐊᐧᐨ ᒥᓇ ᐱᑯ ᒋᐅᒋᒥᓄᓴᐦᐃᑯᐊᐧᐨ᙮ ᐁᑲᐧ ᒥᓇ ᓂᓇᓇᑲᑕᐁᐧᐣᑕᒥᐣ ᐁᐦᐊᐠ ᐊᓂᔑᓇᐯᐃᐧ ᑕᔑᑫᐃᐧᓇᐣ ᑫᐃᐧᓇᐊᐧ ᑲᐧᔭᐠ ᒋᑌᐱᓇᒧᐊᐧᐨ ᓇᓇᑲ ᐊᓄᑭᐃᐧᓇᐣ ᐅᓴᑦ ᐅᑕ ᐱᐊᐧᐱᑯᑫᐃᐧ ᐊᓄᑭᐃᐧᓇᐣ ᑲᐃᐧᐊᓂᑕᑲᐧᑭᐣ᙮”
ᕑᐃᑭᐸᐧᕑᐟ ᐃᑭᑐ ᐅᐅᐁᐧ ᑭᑭᓄᐦᐊᒪᑫᐃᐧᐣ, ᐅᑕᓄᑭᐠ ᒥᐢᑕᐦᐃ ᑫᑯᓂᓂ ᐅᑲᐅᒋᑭᑫᐣᑕᓇᐊᐧ ᒥᓇ ᐱᑯ ᓇᓇᑐᐠ ᒋᐃᓇᐸᒋᑐᐊᐧᐨ ᐁᑲᐧ ᒥᓇ ᐱᑯ ᒪᐊᐧᐨ ᒋᑕᔑᒥᔑᓄᐊᐧᐨ ᐊᓄᑭᓇᑲᓇᐠ ᐃᐃᒪ ᒪᑕᐊᐧ ᑕᔑᑫᐃᐧᓇᐣ ᑲᐅᒋᐊᐧᐨ ᐁᑲᐧ ᑲᔭ ᐃᐃᒪ ᐱᐊᐧᐱᑯᑫᐃᐧᓂᐠ ᒋᑕᓇᓄᑭᐦᐊᑲᓄᐊᐧᐨ᙮
ᐁᑲᐧ ᒥᓇ ᒪᐊᐧᐨ ᐁᒪᐡᑲᐃᐧ ᐃᐧᒋᐊᐧᑲᓄᐊᐧᐨ ᑕᔑᑫᐃᐧᓇᐣ ᒥᐢᑕᐦᐃ ᑕᐅᒋᐃᐧᒋᐦᐃᐁᐧᓭ ᑕᐱᐡᑯᐨ ᐃᐃᒪ ᐱᐊᐧᐱᑯᑫᐃᐧᐣ ᐊᓂᔑᓇᐯᐃᐧ ᑭᑭᓄᐦᐊᒪᑫᐃᐧᐣ ᐱᒧᒋᑫᐃᐧᐣ (RoFATA) ᑲᐃᐧᐅᒋᐱᒧᑌᐠ, ᕑᐃᑭᐸᐧᕑᐟ ᐃᑭᑐ᙮
“ᐁᑲᐧ ᓂᐸᑯᓭᐣᑕᒥᐣ ᑲᐧᔭᐠ ᐃᐧᑕᓄᑭᒥᑐᐃᐧᐣ ᒥᓇ ᐊᔭᒥᐦᐃᑐᐃᐧᐣ ᒋᑐᒋᑲᑌᐠ ᐃᐃᒪ ᓂᑕᔑᑫᐃᐧᓂᓇᓇᐣ ᒥᓇ ᐅᓂᑲᓂᑕᒪᑫᐠ ᐅᒋ᙮” ᕑᐃᑭᐸᐧᕑᐟ ᐃᑭᑐ᙮ “ᐁᑲᐧ ᐊᒥᐁᐧ ᐁᐃᔑᓇᑲᐧᐠ ᑫᒋᓇᐨ ᐊᓂᔑᓇᐯᐠ ᒥᓇ ᑕᔑᑫᐃᐧᓇᐣ ᑫᐃᐧᓇᐊᐧ ᒋᐃᐧᒋᑕᐧᐊᐧᐨ᙮”
ᕑᐃᑭᐸᐧᕑᐟ ᑭᐊᓂᑭᑐ ᑲᐊᓂᐡᑲᐧᐊᔭᒥᐨ ᑕᐱᐡᑯᐨ ᑲᓇᑕ ᐅᑭᒪᐃᐧᐣ ᐁᒪᐡᑲᐃᐧ ᐸᑭᑎᓇᐠ ᐅᑎᑭᑐᐃᐧᐣ ᐊᐦᐃ ᐱᑯ ᒥᐢᑕᐦᐃ ᐁᐃᐧᐱᒥᐃᐧᒋᐦᐃᐁᐧᐨ ᐅᐅᐁᐧ ᑲᐃᐧᐃᔑᐱᒧᒋᑫᔦᐠ᙮
ᐅᑭᒪᑲᐣ ᓯᓫᐃᔭ ᐃᒐᑦ, ᑭᓄᑲᒥᐣᐠ ᑕᔑᑫᐃᐧᓂᐠ ᐃᑭᑐ ᐅᐅᐁᐧ ᔓᓂᔭᐣ ᑲᐸᑭᑎᓇᑲᓄᐃᐧᐨ ᒪᐊᐧᐨ ᒥᔑᐣ ᑫᑯᓇᐣ ᑕᐅᒋᑕᑲᐧᓄᐣ ᐁᐦᐊᐠ ᐅᑕ ᒪᑕᐊᐧ ᑕᔑᑫᐃᐧᓇᐣ ᑫᐃᐧᒋᐦᐃᑯᐊᐧᐨ᙮
“ᐃᐃᒪ ᓂᑕᔑᑫᐃᐧᓂᐠ ᒥᔑᐣ ᐊᐃᐧᔭᐠ ᑲᐃᐧᐣ ᒋᐅᑕᓄᑭᐃᐧᓂᐊᐧᐨ ᒥᓇ ᑲᐃᐧᐣ ᒋᑭᑭᓄᐦᐊᒪᐊᐧᑲᓄᐊᐧᐨ ᐊᐦᐃ ᐅᑕ ᐊᓄᑭᐃᐧᐠ ᐅᒋ,” ᐃᒐᑦ ᐃᑭᑐ᙮ “ᐁᑲᐧ ᐅᐅᐁᐧ ᐅᐡᑭ ᒪᒋᑕᐃᐧᐣ, ᒥᔑᓇᐧᔦᐠ ᑕᐃᔑᐃᐧᒋᐦᐃᐁᐧᒪᑲᐣ᙮”
ᐃᒐᑦ ᒥᓇ ᐃᑭᑐ ᐊᐦᐃ ᐃᐡᑯᓄᐃᐧ ᑭᑭᓄᐦᐊᒪᑫᐃᐧᐣ ᑲᔭ ᐊᔭᐊᐧᐨ ᐊᓂᔑᓇᐯᐠ ᒥᐢᑕᐦᐃ ᐱᑯ ᑫᐃᐧᓇᐊᐧ ᑕᐃᐧᒋᑕᐧᐊᐧᐠ ᐃᐃᒪ ᐱᐊᐧᐱᑯᑫᐃᐧᓂᐠ ᑲᐧᓂᐣ ᑕᐱᐡᑯᐨ ᐱᐅᑕᓇᐠ ᑲᑭᐱᐃᓯᓭᐠ᙮
“ᐁᑲᐧ ᐅᐅᐁᐧ ᓄᑯᑦ ᑕᒪᔭᑭᓭ,” ᐃᑭᑐ ᐃᒐᑦ᙮ “ᑭᑕᓂᔑᓂᓂᒥᓇᓇᐠ ᐁᑲᐧ ᑫᐃᐧᓇᐊᐧ ᑫᐃᐧᒋᑕᐧᐊᐧᐨ ᐃᐃᒪ ᒪᒋᒋᑫᐃᐧᓂᐠ᙮ ᐊᐦᐃ ᑲᐃᐧᐅᒋᒪᔭᑭᓭᐠ ᒥᔑᐣ ᐊᐃᐧᔭᐠ ᐁᑲᐧ ᒋᐊᓄᑭᐃᐧ ᑭᑭᓄᐦᐊᒪᐊᐧᑲᓄᐊᐧᐨ᙮”
ᐁᑲᐧ $5.9 ᒥᓫᐃᔭᐣ ᔓᓂᔭᐣ ᑲᐸᑭᐸᑎᓇᑲᓄᐃᐧᐨ ᑲᐃᐡᑲᐧᐃᐧᒋᑲᑌᐠ ᐁᑲᐧ ᐱᐊᐧᐱᑯᑫᐃᐧᐣ ᐊᓂᔑᓇᐯᐃᐧ ᑭᑭᓄᐦᐊᒪᑫᐃᐧᐣ ᐱᒧᒋᑫᐃᐧᐣ (RoFATA) ᐅᑭᐸᑭᑎᓇᐣ ᑭᑭᓇᐊᐧᒋᐅᓀᓯᓂ ᑫᐃᔑᓇᑲᐧᐠ ᐅᐱᒧᒋᑫᐃᐧᑲᒥᑯᐊᐧ ᐁᑲᐧ ᐁᐦᐃ ᒐᐧᐣ ᐯᕑᐊᐢ ᐃᐃᒪ ᑲᐧᐣᑕᐣᐢ ᕑᐁᐠ ᑕᔑᑫᐃᐧᓂᐠ ᑲᑭᐅᓇᓯᓇᐦᐊᐠ᙮
ᐁᑲᐧ ᐅᐅᐁᐧ ᐱᐊᐧᐱᑯᑫᐃᐧᐣ ᐊᓂᔑᓇᐯᐃᐧ ᑭᑭᓄᐦᐊᒪᑫᐃᐧᐣ ᐱᒧᒋᑫᐃᐧᐣ (RoFATA) ᐅᒋᓴᑭᓯᐣ ᐃᐃᒪ ᒪᑕᐊᐧ ᑕᔑᑫᐃᐧᓇᐣ, ᑭᑫᐣᓄᒪᑲ ᑭᑫᐣᒋᑫᐃᐧᐣ ᐃᒧᒋᑫᐃᐧᐣ (KKETS), ᓇᐧᕑᐊᐣ ᐱᒧᒋᑫᐃᐧᐣ ᐁᑲᐧ ᑲᐧᐣᐯᑐᕑᐁᔑᐣ ᑲᐧᓫᐊᐨ ᑭᒋᑭᑭᓄᐦᐊᒪᑫᐃᐧᑲᒥᑯᐠ᙮