ᑲᓇᑕ ᐅᑭᒪᐃᐧᐣ ᐅᑭᐱᒥ ᓇᓇᑲᒋᐦᐊᐣ ᒣᑲᐧᐨ ᐁᐱᒥᑲᐊᐧᐢᑲᑌᐊᐧᐨ ᐊᓂᔑᓂᓂᐊᐧᐠ

ᑲᓇᑕ ᑭᒋᐅᑭᒪ ᐅᐣᒋᑕ ᐅᑭᑲᐊᐧᐢᑲᑌᐦᐊᐣ ᐊᓂᔑᓂᓂᐊᐧᐣ - ᐃᑭᐁᐧᓂᐊᐧᐠ ᐅᑎ ᒪᐊᐧᐨ ᐊᐊᐧᔑᔕᐠ - ᒣᑲᐧᐨ ᐁᐧᑎ 1940 ᐱᓂᐡ 1950 ᑲᐱᒥᓭᐠ ᑎᐸᐦᐊᑭᐃᐧᐣ ᐁᑭ ᓇᓇᑲᒋᑐᐨ ᐸᐊᐧᓂᐃᐧᐣ, ᒥᐦᐅᐁᐧ ᑲᐃᓇᒋᒧᒪᑲᐠ ᑲᑭᒥᑭᑲᑌᐠ ᐅᐡᑭ ᓇᓇᑕᐃᐧ ᑭᑫᐣᒋᑫᐃᐧᐣ.
ᐃᔭᐣ ᒧᐢᐱ, ᒪᐡᑭᑭᐃᐧᓂᓂᐃᐧ ᐅᓇᓇᑕᐃᐧᑭᑫᐣᒋᑫ ᑲᑕᓇᓄᑭᐨ ᑯᐁᓫᐢ ᔪᓂᐯᕑᓯᑎ, ᓄᑯᒥᑫ ᐅᑭᐸᑭᑎᓇᐣ ᑎᐸᒋᒧᐃᐧᓂ ᐁᐃᐧᐣᒋᑲᑌᐠ ᐊᓂᐣ ᐊᓂᔑᓂᓂᐊᐧᐠ ᑲᓇᑕ ᑭᒋᐅᑭᒪᐣ ᑲᑭᑐᑕᑯᐊᐧᐨ ᐃᒪ ᐸᐸᑲᐣ ᑕᔑᑫᐃᐧᓂᐠ ᒥᓇ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᑕᔑ ᑲᓇᐁᐧᐣᑕᑯᓯᐊᐧᐨ ᐃᐡᑯᓄᑲᒥᑯᐣ ᐁᑭᑲᐊᐧᐢᑲᑌᐦᐃᐣᑕᐧ ᐯᑭᐡ ᐁᑲ ᐁᑭᐅᐣᒋ ᑭᑫᐣᑕᒧᓂᑕᐧ ᐅᐁᐧ ᐁᑭᑐᑕᐃᐧᐣᑕᐧ ᓇᐣᑕ ᒥᓇ ᐁᑭᐅᐣᒋ ᑲᑫᐧᒋᒥᑕᐧ.
ᐁᑲᐧ ᐅᐁᐧᓂ ᑲᑭᑐᑕᐃᐧᐣᑕᐧ ᐅᑲᐊᐧᐢᑲᑌᐦᐃᑯᐃᐧᓂᐊᐧ ᐊᓂᔑᓂᓂᐊᐧᐠ ᑭᑕᔑᑐᒋᑲᑌ ᐃᒪ ᓂᑯᑕᐧᓱ ᐊᓂᔑᓂᓂᐃᐧ ᐃᐡᑯᓄᑲᒥᑯᐣ ᑌᑎᐸᐦᐃ ᑲᓇᑕ ᐊᐦᑭᐠ, ᐊᔑᐨ ᐃᒪ ᓭᐣᐟ ᒣᕑᐃᐢ ᒥᓇ ᓯᓯᓫᐃᔭ ᒉᑊᕑᐃ ᐃᐡᑯᓄᑲᒥᑯᐣ ᑲᑭᐊᔭᒪᑲᑭᐣ ᑭᓇᐧᕑᐊ.
ᑲᓇᑕ ᑭᒋᐅᑭᒪᑲᐣ ᔕᐧᐣ ᐊᐟᓫᐃᐅ ᑭᐃᑭᑐ ᐅᐁᐧᓂ ᐊᐱ ᑲᐸᑭᑎᓂᑲᑌᓂᐠ ᑎᐸᒋᒧᐃᐧᓂ ᐅᑭᑯᐡᑫᐧᑕᒥᐦᐃᑯᓇᐊᐧ ᐊᓂᔑᓂᓂᐊᐧᐠ ᐅᒪ ᒥᓯᐁᐧ ᑲᓇᑕ ᐊᐦᑭᐠ.
“ᑲᑭᒥᑭᑲᑌᐠ ᐅᐁᐧ ᑎᐸᒋᒧᐃᐧᐣ, ᐊᐊᐧᔑᒣ ᒥᑕᓱᒥᑕᓇ ᐊᓂᔑᓂᓂᐃᐧ ᐊᐊᐧᔑᔕᐠ ᑭᑐᑕᐊᐧᑲᓄᐊᐧᐠ ᐁᑲ ᐁᑭᐅᐣᒋ ᐊᔕᒥᐣᑕᐧ ᒥᓇ ᐊᓂᑕ ᑭᑲᐊᐧᐢᑲᑌᐦᐊᑲᓄᐊᐧᐠ, ᐊᓇᑭᐃᐧᐣᒋᑲᑌᐸᐣ ᐅᐁᐧ ᐁᐧᑎ ᐊᐱ 2000 ᐁᑲ ᑲᐃᐧᐣ ᒥᓯᐁᐧᑲᒥᐠ ᒋᑭᐅᐣᒋ ᓄᒋᑲᑌᐠ ᑲᑭᐸᑭᑎᓂᑲᑌᑭᐸᐣ ᑎᐸᒋᒧᐃᐧᐣ,” ᑭᐃᑭᑐ ᐊᐟᓫᐃᐅ.
ᐊᐟᓫᐃᐅ ᐃᑭᑐ ᑫᐃᐧᐣ ᑎᐱᓇᐁᐧ ᐅᑐᐣᒋᑐᑭᐡᑲᑯᐣ ᐅᐁᐧ ᑲᐃᓇᒋᒧᓇᓂᐧᐊᓂᐠ ᑕᐱᓇᑲ ᑫᐃᐧᐣ ᐅᑕᔑᑫᐃᐧᓂᐠ ᐁᑭᑕᔑ ᐃᔑᐁᐧᐸᓂᐠ ᐅᐁᐧᓂ ᑲᑭᑐᑕᐃᐧᐣᑕᐧᐸᐣ ᐊᓂᔑᓂᓂᐊᐧᐠ.
“ᓂᑭᒋᐦᐊᒪᐠ ᒥᓇ ᓂᐊᐧᑯᒪᑲᓇᐠ ᑭᑲᑲᐧᑕᑭᐦᐊᑲᓄᐊᐧᐠ ᐅᐁᐧᓂ ᑲᑭᐊᐃᐣᑐᑕᐃᐧᑕᐧ ᐁᑲᐧ ᒥᓇ ᑭᑕᐊᐧᔑᔑᒥᓇᓂᐠ ᐁᑭᑐᑕᐃᐧᐣᑕᐧ ᑕᐱᐡᑯᐨ ᐊᐧᐱᑯᔑᔕᐠ ᑲᐃᓇᐸᒋᐦᐃᑕᐧ ᑫᑯᓇᐣ ᑲᐅᒋ ᓇᓇᑕᐃᐧᑭᑫᒋᑲᑌᑭᐣ,” ᑭᐃᑭᑐ.
ᒣᑲᐧᐨ 1942 ᑲᔭᑭᐊᐧᐠ, ᐊᒥ ᐊᐱ ᑲᑭᐊᐧᐸᒪᐊᐧᑯᐸᓀᐣ ᐅᓇᓇᑕᐃᐧᑭᑫᐣᒋᑫᐠ ᐊᓂᔑᓂᓂᐊᐧᐠ ᐁᑲᐊᐧᐢᑲᑌᐊᐧᐨ ᒥᓇ ᐁᐸᑭᐁᐧᐊᐧᐨ. ᑲᐃᐧᐣ ᑕᐡ ᒋᑭᐅᐣᒋ ᑲᑫᐧᓇᑕᒪᐊᐧᐊᐧᐨ ᓇᑐᑕᒪᑫᐃᐧᓂᐠ ᒋᑭᓇᐣᑭᐸᑭᑎᓂᑎᐸᐣ ᔓᓂᔭᐣ ᒥᓇ ᐊᐊᐧᔑᒣ ᒋᑭᒥᓂᑕᐧ ᐃᐧᒋᐦᐃᐁᐧᐃᐧᓂ, ᒥᐡᑲᐧᐨ ᐅᑭᑐᑕᓇᐊᐧ ᐅᑯᐁᐧᓂᐊᐧᐠ ᐅᓇᓇᑕᐃᐧᑭᑫᐣᒋᑫᐠ ᒋᒧᒋ ᑲᓇᐊᐧᐸᒥᐣᑕᐧ ᐊᓂᐣ ᑫᓂᔑᔭᐊᐧᐨ ᑕᐱᐡᑯᐨ ᑫᑯᐣ ᑲᐱᒥ ᓇᓇᑕᐃᐧᑭᑫᒋᑲᑌᐠ ᑫᓂᔑᔭᐊᐧᐨ ᐁᑭᑐᑕᐃᐧᐣᑕᐧ ᐃᒪ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᑕᔑ ᑲᓇᐁᐧᐣᑕᑯᓯᐊᐧᐨ ᐃᐡᑯᓄᑲᒥᑯᐣ ᒥᓇ ᐊᓂᔑᓂᓂᐃᐧ ᑕᔑᑫᐃᐧᓇᐣ, ᑭᐃᓇᒋᒧ ᒧᐢᐱ.
ᑭᐊᓂ ᓂᓯᓇᒪᐊᐧᐊᐧᐠ ᒍᒍᔕᐳᓂ ᑲᑭᒥᓇᐦᐃᐣᑕᐧᐸᐣ ᐃᒪ ᐃᐡᑯᓄᑲᒥᑯᐠ ᑲᑭᐃᔑᑲᓇᐁᐧᐣᑕᑯᓯᐊᐧᐨ ᐊᐊᐧᔑᔕᐠ, ᐁᑲᐧ ᒥᓇ ᐃᒪ ᑕᔑᑫᐃᐧᓂᐠ ᑲᐃᐧᐣ ᒋᑭᐅᐣᒋ ᒥᓂᑕᐧ ᒥᒋᒥᐠ ᑲᑕᑲᐧᑭᐣ ᑫᐅᐣᒋ ᒪᐡᑲᐃᐧᑭᒪᑲᓂᐠ ᐃᐧᔭᐃᐧᐊᐧᐠ.
ᑲᐃᐧᐣ ᑲᔦ ᒋᑭᐅᐣᒋ ᐃᐧᒋᐦᐃᐣᑕᐧ ᐃᐧᐱᑎ ᒪᐡᑭᑭᐃᐧ ᐃᐧᒋᐦᐃᐁᐧᐃᐧᓂᐠ, ᑕᐱᓇᑲ ᑲᐱᑲᐧᐱᑌᓇᓂᐊᐧᐠ ᒥᓇ ᐃᐧᔭᓴᐱᑕᓂᐠ ᑲᐃᔑᐊᑯᓯᓇᓂᐊᐧᐠ ᒪᐊᐧᐨ ᐃᒪ ᐅᐣᒋ ᑭᒋᐃᐧᒋᐦᐃᐁᐧᒪᑲᐣ ᒋᔑᓇᓇᑲᒋᒋᑲᓂᐊᐧᐠ ᐁᑲ ᑲᐧᔭᐠ ᑲᐃᓇᐣᒋᑲᓂᐊᐧᐠ ᐁᑲᐧ ᒥᓇ ᑭᐡᐱᐣ ᐅᐣᒋ ᐱᒥ ᐃᐧᒋᐦᐃᑕᐧᐸᐣ ᐃᐧᐱᑎᒪᐡᑭᑭᐃᐧ ᐃᐧᒋᐦᐃᐁᐧᐃᓂᐠ ᑕᐅᐣᒋ ᐊᐧᓇᐱᒋᑫᒪᑲᓂᐸᐣ ᐅᐁᐧᓂ ᑲᐃᔑ ᓇᓇᑕᐧᐃᑭᑫᒋᑫᐊᐧᐨ.
ᒥᑕᐡ ᐅᐁᐧ ᑲᑭᒥᑭᑲᑌᐠ ᑎᐸᒋᒧᐃᐧᐣ ᑭᐃᑭᑐᐊᐧᐠ ᐊᓂᔑᓂᓂᐃᐧ ᓂᑲᓂᑕᒪᑫᐠ ᒥᓇ ᐱᑯ ᐃᐡᑯᓂᑲᓂᐠ ᑲᑲᐯᔑᐊᐧᐠ ᐁᑲᓄᓇᐊᐧᐨ ᑲᓇᑕ ᑭᒋᐅᑭᒪᐣ ᒋᐃᐧᐣᑕᒪᑫᐨ ᐅᐁᐧᓂ ᑌᐯᐧ ᐁᑭᐃᔑᐁᐧᐸᓂᐠ ᒥᓇ ᒋᐃᐧᐣᑕᐠ ᐁᒥᒋᓇᐁᐧᓯᑲᑕᐠ ᑲᑭᑐᑕᐃᐧᐣᑕᐧ ᐊᓂᔑᓂᓂᐊᐧᐠ.
ᑲᐱᒥ ᑲᓄᒋᑫᑕᒪᑫᐨ ᐃᒪ ᑲᓇᑕ ᐅᑭᒪᐃᐧ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓂᐠ ᐅᑭᒪᐃᐧ ᐊᓄᑭᓇᑲᐣ ᐱᕑᓇᕑᐟ ᐸᓫᑲᐧᕑᐟ ᑭᐃᑭᑐ ᑲᓇᑕ ᑭᒋᐅᑭᒪ ᒪᐊᐧᐨ ᐅᑭᑯᐡᑯᑕᐣ ᑲᑭᓄᐣᑕᐣᐠ ᑎᐸᒋᒧᐃᐧᓂ.
“ᑭᐡᐱᐣ ᑌᐯᐊᐧᓄᑫᐧᐣ ᐅᐁᐧ ᑲᐃᓇᒋᒧᓇᓂᐊᐧᐠ, ᒥᑐᓂ ᑲᑲᐧᓂᓴᑫᐣᑕᑲᐧᐣ ᒥᓇ ᑲᐃᐧᐣ ᑕᑭᐃᓯᓭᐸᐣ ᐅᐁᐧ ᒋᑭᑐᑕᐃᐧᐣᑕᐧᐸᐣ,” ᐅᑭᐃᔑᓇᑫᐧᑕᐣ ᐅᑭᒪᐅᓂ ᐊᓄᑭᓇᑲᐣ ᐅᑕᓇᐠ ᑲᐱᒥᑯᓇᑲᓂᐠ ᒪᒪᑕᐃᐧᐱᐊᐧᐱᑯᐠ ᑲᑭᐅᐣᒋ ᒪᓯᓇᐦᐃᑫᐨ.
“ᐊᐱ ᑲᓇᑕ ᑭᒋᐅᑭᒪ (ᐢᑎᐱᐣ ᐦᐊᕑᐳᕑ ᑲᑭᐃᐧᐣᑕᒪᑫᐸᐣ ᐅᒥᐣᒋᓇᐁᐧᓯᐃᐧᐣ ᑕᓯᐣ ᑲᑭᐱᑲᓇᐁᐧᐣᑕᑯᓯᐊᐧᐸᐣ ᐊᓂᔑᓂᓂᐊᐧᐠ ᒣᑲᐧᐨ ᑲᐱᐊᐊᐧᔑᔑᐃᐧᐊᐧᐨ ᐊᓂᔑᓂᓂᐃᐧ ᐃᐡᑯᓄᑲᒥᑯᐠ ᒣᑲᐧᐨ 2008 ᐁᑭᐅᐣᒋ ᑲᓄᒋᑫᑕᒪᐊᐧᐨ ᑲᑭᓇ ᑲᓇᑕ ᑲᑲᐯᔑᐊᐧᐨ, ᐅᑭᓂᓯᑕᐃᐧᓇᓇᐸᐣ ᐃᐁᐧ ᐊᐱ ᒣᑲᐧᐨ ᒪᐊᐧᐨ ᐁᑭ ᑭᒋᐱᑯᓂᑫᒪᑲᐠ ᒥᓇ ᐁᑲ ᐃᐁᐧ ᒋᑭᑐᑕᐃᐧᐣᑕᐧᐸᐣ ᐅᒪ ᑲᓇᑕ ᐊᐦᑭᐠ.”
ᐁᑲᐧ ᒥᓇ ᑭᐊᓂᑭᑐ ᑲᓇᑕ ᑭᒋᐅᑭᒪ “ᑭᔭᐱᐨ ᐅᐱᒥᓂᔕᐦᐊᐣ ᐁᐧᐃᔭᓂ ᒪᒥᓇᐧᑕᒪᑫᐨ ᑲᑭᐱᔑ ᒪᒋᑐᒋᑫᒪᑲᓂᐠ ᐁᐧᐡᑲᐨ ᐃᐡᑯᓄᐃᐧ ᐱᒧᒋᑫᐃᐧᓂ.”
ᐁᑲᐧ ᐅᐁᐧ ᑲᑭᐃᐡᑲᐧ ᒥᑭᑲᑌᐠ ᑎᐸᒋᒧᐃᐧᐣ, ᑭᐅᓇᒋᑌ ᒥᓯᐁᐧᑲᒥᐠ ᒪᒪᐃᐧ ᐊᔭᒥᒋᑫᐃᐧᐣ ᒋᑐᒋᑲᑌᐠ ᒣᑲᐧᐨ ᑭᔑᐸᑲᐃᐧᐱᓯᑦ 25 ᐃᓇᑭᓱᐨ ᐊᐣᑎ ᐱᑯᑕᓱ ᑭᒋᐅᑌᓇᐠ ᒥᓇ ᑕᔑᑫᐃᐧᓇᐣ ᑲᐊᔭᑭᐣ ᑲᓇᑕ.
ᑭᑲᓄᓇᑲᓄ ᑲᓇᑕ ᑭᒋᐅᑭᒪ ᑲᑭᓇ ᒪᓯᓇᐦᐃᑲᓇᐣ ᑲᑲᓇᐁᐧᐣᑕᑲᐧᑭᐣ ᐁᐧᐡᑲᐨ ᐃᐡᑯᓄᑲᒥᑯᐠ ᑲᐅᐣᒋᑲᒪᑲᑭᐣ ᐅᒪ ᑲᓇᑕ ᒋᐸᑭᑎᓇᑭᐣ ᒋᐊᐧᐸᒋᑲᑌᑭᐣ ᐁᑲᐧ ᒥᓇ “ᒋᑭᑌᐣᑕᑯᑐᐨ ᐅᒥᐣᒋᓇᐁᐧᓯᐃᐧᐣ,” ᐁᐅᒋ ᑲᓄᑕᐠ ᑲᓇᑕ ᑭᒋᐅᑭᒪᐣ ᐢᑎᐱᐣ ᐦᐊᕑᐳᕑᐊᐧᐣ ᑲᑭᐸᑭᑎᓇᒥᓂᐸᐣ ᐅᒥᒋᓇᐁᐧᓯᐃᐧᐣ ᑲᓇᑕ ᑲᑭᐃᔑᐱᒧᑐᐨ ᐅᑎᐡᑯᓄᐃᐧ ᑲᓇᐊᐧᐸᒋᑫᐃᐧᐣ.
ᐊᐧᐁᐧ ᒧᐢᐱ ᐅᑭᒥᑲᐣ ᐅᓄᐁᐧᓂᐊᐧᐣ ᑎᐸᒋᒧᐃᐧᓇᐣ ᒣᑲᐧᐨ ᐊᐱ ᐁᓇᓇᑐᓇᑭᐸᐣ ᑲᑭᐱᐅᓇᒋᑲᑌᑭᐸᐣ ᒪᐡᑭᑭᐃᐧ ᐅᓇᑯᓂᑫᐃᐧᐣ ᐊᐱ ᑲᑭᐃᐡᑲᐧ ᑭᒋᓄᑎᓂᑲᓄᐊᐧᐠ.
ᐅᐁᐧ ᑕᐡ ᑎᐸᒋᒧᐃᐧᐣ, ᐃᔑᓂᑲᑌ “ᐊᓂᔑᓂᓂᐃᐧ ᐅᑕᑲᓀᓯᐃᐧ ᓇᓇᑲᒋᒋᑫᐃᐧᐣ: ᑲᐅᐣᒋᑭᔑᔕᐃᐧᓯᐊᐧᐨ ᐁᓇᓇᑲᒋᒋᑲᑌᓂᐠ ᒥᓇ ᐊᓂᔑᓇᐯ ᓇᓇᑕᐃᐧᑭᑫᐣᒋᑫᐃᐧᐣ ᐃᒪ ᐊᓂᔑᓂᓂᐃᐧ ᑕᔑᑫᐃᐧᓇᐣ ᒥᓇ ᐃᐡᑯᓄᑲᒥᑯᐣ, 1942-1952,” ᒪᓯᓇᐦᐃᑲᑌ ᒪᒪᑕᐃᐧ ᐱᐊᐧᐱᑯᐠ ᐅᒪ: http://muse.jhu.edu/journals/histoire_sociale_social_history/v046/46.91....