ᑭᓫᐃᑊᐢ ᑭᒋᐊᓯᓂᑫᐃᐧᑭᒪᐠ ᐊᒋᓇ ᐅᑭᐱᑎᓇᓇᐊᐧ ᑲᐃᐧᐃᔑ ᒪᑕᓄᑭᐊᐧᐸᐣ

Create: 12/01/2015 - 19:23

ᑭᓫᐃᑊᐢ ᑭᒋᐊᓯᓂᑫᐃᐧᑭᒪᐠ ᐅᑭᐊᐧᐸᑕᓇᐊᐧ ᐁᑲ ᐊᐱᐣ ᒋᑭᐃᔑᓇᑲᐧᓂᐠ ᑲᑭᐅᓇᐸᑕᒧᐊᐧᐸᐣ ᒋᐊᓂᔑ ᒪᑕᓄᑲᑕᒧᐊᐧᐨ ᐱᐊᐧᐱᑯᑲᓂ ᐊᓄᑭᐃᐧᐣ ᑭᑎᐸᒋᒧᐊᐧᐠ ᒣᑲᐧᐨ ᓴᑭᐸᑲᐃᐧᐱᓯᑦ 12 ᐊᒋᓇ ᒋᑭᐱᑎᓇᒧᐊᐧᐨ ᐅᑕᑭᐃᐧ ᓇᓇᑲᒋᒋᑫᐃᐧᓂᐊᐧ ᒥᓂᑯᐠ $3.3 ᐱᓫᐃᔭᐣ ᑕᓴᐧᐱᐠ ᑫᑭ ᒣᓂᑎᑫᐃᐧᓂᐊᐧᑭᐸᐣ ᐅᐁᐧ ᐊᓄᑭᐃᐧᐣ.
ᐱᓫ ᐳᕑ, ᑭᓫᐃᑊᐢ ᑲᐊᓂᑫᐡᑲᒪᑫᐨ ᐊᓯᓂᑫᐃᐧᑭᒪᐃᐧ ᐱᒧᒋᑫᐃᐧᓂᐠ, ᑭᐃᓇᒋᒧ ᐅᒪ ᐊᐧᐊᐧᑌ ᐯᑭᐡ ᐃᐁᐧ ᐁᑲ ᑲᑭᑫᒋᓇᐁᐧᐣᑕᑲᐧᐠ ᑲᓇᑕ ᐅᑭᒪᐃᐧᓂᐠ ᑲᐅᐣᒋ ᑲᓇᐊᐧᐸᒋᑲᑌᐠ ᐊᐦᑭᐃᐧ ᓇᓇᑲᒋᒋᑫᐃᐧ ᐊᓄᑭᐧᐃᐣ ᐁᑲᐧ ᒥᓇ ᒪᑕᐊᐧ ᐊᓂᔑᓂᓂᐊᐧᐠ ᑲᐱᒥᑲᓄᑕᒧᐊᐧᐨ ᐁᓇᑕᐁᐧᐣᑕᒧᐊᐧᐨ ᒋᑭᐊᔭᒪᑲᑭᐸᐣ ᒋᐅᒋ ᒪᒪᐃᐧ ᐊᓄᑲᑌᐠ ᑭᐁᐧᓇᓇᒋᒋᑫᐃᐧᐣ, ᒥᑕᐡ ᐅᒪ ᑲᑭᐅᐣᒋᒪᑲᐠ ᐱᓇᒪ ᑲᑭᐳᓂᒋᑲᑌᐠ ᐊᓄᑭᐃᐧᐣ.
“ᑭᓫᐃᑊᐢ ᐅᓇᑕᐁᐧᑕᐣ ᒋᐃᐧᑕᓄᑭᒥᑯᐨ ᐊᓂᔑᓂᓂᐊᐧᐣ ᐊᓂᐣ ᑫᑭᐃᔑᓇᐦᐃᓇᑲᐧᑭᐸᐣ ᐃᐧᒋᐃᓀᑕᒧᒥᑐᐃᐧᐣ ᑫᒋᓇᐨ ᒋᑭᐊᓂᓯᓭᑭᐸᐣ ᐅᐁᐧ ᓇᓇᑲᒋᒋᑫᐃᐧᐣ ᑲᑭᓇ ᐊᐃᐧᔭᐠ ᑫᑭᐅᐣᒋ ᓇᐦᐁᐣᑕᒧᐊᐧᐸᐣ, ᒥᓇ ᐃᒪ ᑫᑭᐅᐣᒋ ᑲᐡᑭᑐᔭᑭᐸᐣ ᒋᓇᓇᑲᒋᒋᑲᑌᐠ ᐊᓄᑭᐃᐧᐣ,” ᐃᑭᑐ ᐳᕑ. “ᑲᐃᐧᐣ ᑕᐡ ᒪᔑ ᒋᑭᐃᐧᒋᐃᓀᑕᒧᒪᑎᔭᐠ ᐅᒪ ᐃᓀᑫ, ᐁᑲᐧ ᒥᓇ ᐃᐁᐧ ᐯᔑᐠ ᑫᐊᓂᒧᒋᑲᑌᐠ ᐅᓇᑯᓂᑫᐃᐧ ᑭᐁᐧ ᑲᓇᐧᐊᐸᒋᑫᐃᐧᐣ.”
ᐳᕑ ᒥᓇ ᐅᑭᐊᐧᐃᐧᑕᐣ ᐁᑲ ᑲᑫᒋᓇᐁᐧᑕᑯᑐᐨ ᑲᓇᑕ ᐅᑭᒪᐃᐧ ᐅᑕᑭᐃᐧ ᓇᓇᑲᒋᒋᑫᐃᐧ ᐸᐸᒥᓯᐃᐧᐣ ᒥᐦᐅᐁᐧᓂ ᐯᔑᑲᐧᔦᐠ ᑭᓫᐃᑊᐢ ᑲᑭᐅᐣᒋᐃᓀᑕᐠ ᐊᒋᓇ ᒋᐳᓂᑐᐨ ᑲᐃᐧᐃᔑᒪᑕᓄᑭᐸᐣ.
ᐁᑲᐧ ᒥᓇ ᐊᐧᐁᐧ ᐅᐣᑌᕑᐃᔪ ᐅᑭᒪᐃᐧᐣ ᑲᐃᐧᐣ ᒪᔑ ᒋᑭᐅᐣᒋ ᐸᑭᑕᔓᐊᐧᑕᐠ ᐃᐁᐧᓂ ᑭᓫᐃᑊᐢ ᐅᑕᓄᑭᐃᐧ ᐅᓇᒋᑫᐃᐧᓂᐣ ᑫᐃᔑᐱᒥᓂᔕᐦᐊᐠ ᐊᐱ ᒪᑕᓄᑲᑕᐠ ᐊᐦᑭᐃᐧ ᓇᓇᑲᒋᒋᑫᐃᐧᓂ, ᐁᑲᐧ ᒥᓇ ᒥᔑᓇᑐᐣ ᐅᓇᑯᒥᑯᐃᐧᓇᐣ ᐅᐣᑌᕑᐃᔪ ᐅᑭᒪᐅᐣ ᐁᑲ ᒪᔑ ᑲᑭᐅᐣᒋᔕᐳᓂᑲᑌᑭᐣ.
ᑭᓫᐃᑊᐢ ᑲᔦ ᑲᐃᐧᐣ ᒪᔑ ᒋᑭᐅᐣᒋ ᐸᑭᑕᔓᐊᐧᑕᒪᐊᐧᑲᓄᐨ ᑲᐯᐦᐃ ᑲᐊᐸᑕᐠ ᐅᑕᐸᓂᒥᑲᓇ ᒋᐃᓇᒧᒋᑫᐨ ᑲᐃᐧᐃᔑ ᐱᐊᐧᐱᑯᑲᓂᑫᐨ, ᒥᐦᐅᐁᐧ ᒥᓇ ᑯᑕᐠ ᑫᑯᐣ ᑲᑭᐅᐣᒋ ᑭᐱᒋᒪᑲᐠ ᑲᐃᐧᒪᒋᒋᑲᑌᑭᐸᐣ ᐊᓄᑭᐃᐧᐣ. ᒥᓇᐊᐧ ᑯᑕᐠ ᑫᑯᐣ ᑲᑭᐱᓂᑯᐊᐧᐨ ᑭᓫᐃᑊᐢ ᒥᓇ ᑯᑕᑭᔭᐠ ᐸᑲᐣ ᐊᓯᓂᑫᐃᐧᑭᒪᑲᐠ ᒣᑲᐧᐨ ᐱᒥ ᐊᔑᑌᐡᑯᑕᑎᐊᐧᐠ ᐃᐁᐧᓂ ᐅᐣᒋ ᐊᐦᑭᓂ ᐁᑲᐧ ᑕᐡ ᐱᐦᐊᐧᐠ ᒋᐅᒋ ᐅᓀᐣᒋᑲᑌᓂᐠ ᐅᐣᑌᕑᐃᔪ ᐱᐊᐧᐱᑯᑲᓂ ᒪᔭᑦ ᑲᐅᑭᒪᐃᐧᐡᑲᒥᓂᐨ.
“ᒥᐱᑯ ᐁᓯᓭᐠ ᐁᑲ ᐊᐊᐧᔑᒣ ᒋᑭ ᐊᓄᑲᑌᐠ ᑫᑯᐣ ᐁᑲ ᒥᓴᐊᐧᐨ ᓇᐣᑕ ᒋᑭᐅᐣᒋ ᑌᐱᓇᒪᐣ ᐊᐦᑭ ᑲᐃᐧᑕᓇᓄᑭᔭᐣ, ᐁᑲᐧ ᒥᓇ ᑲᔦ ᐁᑲ ᒪᔑ ᐁᑭᐅᐣᒋ ᔕᐳᓂᑲᑌᐠ ᐊᓄᑭᐃᐧ ᐅᓇᒋᑫᐃᐧᐣ,” ᐃᑭᑐ ᐳᓫ.
ᒣᑲᐧᐨ ᑲᐡᑲᑎᓄᐱᓯᑦ 2011 ᑲᐊᐦᐊᑭᐊᐧᐠ, ᒪᑕᐊᐧ ᐊᓂᔑᓂᓂᐊᐧᐠ ᐅᑭᒪᐃᐧᓀᐡᑲᐊᐧᐊᐧᐣ ᑲᓇᑕ ᐅᑭᒪᐃᓇᐣ, ᐁᓇᑕᐁᐧᐣᑕᒧᐊᐧᐨ ᑲᑭᓇ ᒋᐸᐸᒥᓯᑲᑕᒧᐊᐧᐨ ᑭᐁᐧᓇᓇᑲᒋᒋᑫᐃᐧᐣ ᑲᐃᐧᐅᔑᒋᑲᑌᐠ ᐅᐡᑭ ᐱᐊᐧᐱᑯᑲᓂ ᐊᓄᑭᐃᐧᐣ ᐁᑲ ᒥᐡᑲᐧᐨ ᒋᑭᐊᐸᑕᑭᐸᐣ ᒣᑲᐧᐨ ᑲᐃᓇᑌᐠ ᑭᐁᐧᓇᓇᑲᒋᒋᑫᐃᐧᐣ.
ᒣᑲᐧᐨ ᒥᑭᓯᐃᐧᐱᓯᑦ 2013 ᑲᑭ ᑭᔑᐅᓇᔓᐊᐧᓂᐊᐧᑭᐸᐣ, ᐊᐧᐁᐧ ᐅᓇᑯᓂᑫᐃᐧᑭᒪ ᑭᐃᑭᑐᐸᐣ ᐅᑯᐁᐧᓂᐊᐧᐠ ᑲᓇᑕ ᐅᑭᒪᐃᐧᐣ ᒥᓇ ᑭᓫᐃᑊᐢ ᐊᓯᓂᑫᐃᐧᑭᒪ ᑭᐃᔑᓇᑯᒋᑫᐊᐧᐠ “ᑲᐧᐣᑕᐧ ᐁᑭᐅᐣᒋ ᐸᐧᑕᐃᐧᑐᑕᒧᐊᐧᐨ” ᐅᒪ ᐅᐸᐸᒥᓯᐃᐧᓂᐊᐧᐠ ᒥᓇ ᒋᐅᒋ ᐊᓂᒥᓇᑲᐧᓂᐠ ᐁᑲ ᒋᑭᐱᐣᑎᑫᓭᓂᐠ ᐅᓇᑯᓂᑫᐃᐧᑲᒥᑯᐠ.
ᑭᐃᓀᒋᑲᑌ ᑲᓇᑕ ᐅᓇᑯᓂᑫᐃᐧᑭᒪ ᐊᔕ ᒋᑎᐸᒋᒧᑕᐊᐧᑲᓄᐨ ᐊᐱ ᐊᐧᑌᐸᑲᐃᐧᐱᓯᒧᐣ ᐅᐁᐧᓂ ᑭᐁᐧ ᓇᓇᑲᒋᒋᑫᐃᐧᓂ. ᑭᐡᐱᐣ ᑕᐡ ᒪᑕᐊᐧ ᐸᑭᓇᑫᐊᐧᐨ, ᐃᐁᐧ ᒣᑲᐧᐨ ᐊᐦᑭᐃᐧ ᓇᓇᑲᒋᒋᑫᐃᐧᐣ ᑲᐃᔑᐱᒥᓂᔕᐦᐃᑲᑌᐠ ᑭᑕᐧᑦ ᑕᓇᐱᒪᒋᒋᑲᑌ ᒋᒪᒪᐃᐧ ᑲᓇᐧᐊᐸᒋᑲᑌᐠ.
ᐳᕑ ᐃᑭᑐ ᐅᑭᐱᔑᓄᑕᐊᐧᐣ ᒥᔑᐣ ᐅᑭᒪᑲᓇᐣ ᐊᓂᔑᓂᓂᐃᐧ ᑕᔑᑫᐃᐧᓇᐣ ᐁᑲ ᐃᐧᐣ ᐁᐊᔑᑌᐡᑲᐊᐧᐊᐧᐣ ᑭᓫᐃᑊᐢ ᐊᓯᓂᑫᐃᐧᑭᒪᐣ ᑲᐃᔑᐱᒧᑐᓂᐨ ᐊᐦᑭᐃᐧ ᓇᓇᑲᒋᒋᑫᐃᐧᓂ, ᔕᑯᐨ ᐃᒪ ᐃᓀᑫ ᑲᐃᐧᐣ ᐅᑎᔑ ᓇᐦᐊᐸᑕᓇᐊᐧ ᑲᓇᑕ ᐅᑭᒪᐃᐧᐣ ᑲᑐᑕᒥᓂᐨ.
ᑭᐃᑭᑐ ᑫᐃᐧᐣ ᑲᐃᔑᓂᓯᑕᐃᐧᓇᐠ ᐅᐁᐧᓂ, ᑲᐃᐧᒪᐃᐧᓀᐡᑭᑲᑌᐠ ᐊᐣᒋᑯ ᐊᐊᐧᔑᒣ ᑕᐅᐣᒋ ᒪᒋᐱᒋᑫᒪᑲᐣ ᐅᐁᐧ ᐊᔕ ᒥᓂᑯᐠ ᑫᑯᐣ ᑲᐃᓯᓴᐦᐃᐁᐧᒪᑲᐠ ᒥᓇ ᑲᐃᐧᐣ ᐊᐃᐧᔭ ᐅᑲᐅᐣᒋ ᐃᐧᒋᐦᐃᑯᓯᐣ ᐁᐧᑎ ᐊᓂᓂᑲᐣ.
“ᐣᑎᔑᐸᑯᓭᑕᐣ ᒪᒪᐤ ᒋᑭᓇᑯᒥᑎᔭᑭᐸᐣ ᐊᐣᑎ ᑫᑭᐅᐣᒋ ᒪᒋᑕᔭᑭᐸᐣ ᐅᒪ ᐊᓄᑭᐃᐧᓂᐠ,” ᐃᑭᑐ ᐳᕑ. “ᒥᓇ ᐣᑕᐃᔑᐃᐧᑕᒪᐊᐧᐠ ᐃᐡᑯᓂᑲᓇᐣ ᑫᐅᒋᓴᒥᐡᑲᑯᐊᐧᐨ ᐁᑲ ᐊᐊᐧᓯᑌ ᐁᐧᑎ ᒋᑭᐃᔑᐊᓂᒧᑕᒧᐊᐧᐸᐣ ᐅᐁᐧᓂ ᐊᐦᑭᐃᐧ ᓇᓇᑲᒋᒋᑫᐃᐧᓂ, ᓇᐊᐧᐨ ᐃᑯ ᒋᑭᐊᓂᒧᑕᒧᐊᐧᐸᐣ ᐊᐣᑎ ᑕᐱᐡᑯᐨ
ᑫᑭᐅᒋ ᒥᓄᓭᑭᐸᐣ ᐃᐧᑕᓄᑭᒥᑐᐃᐧᐣ ᐅᐁᐧ ᑲᐃᐧᐊᓄᑲᑌᐠ.
“ᐣᑭᑫᑕᒥᐣ ᐁᑲ ᑲᐧᔭᐠ ᒋᑭᐃᔑᓇᑯᑐᔭᐠ ᐣᑕᓄᑭᐃᐧᓂᓇᐣ ᐸᓂᒪ ᐁᑕ ᐊᓂᔑᓂᓂᐊᐧᐠ ᐃᐧᑕᓄᑭᒥᑯᔭᑭᑕᐧ, ᑫᐃᐧᓇᐊᐧ ᑲᐃᔑᓇᑕᐁᐧᑕᒧᐊᐧᐨ ᑫᓂᔑᓇᑲᐧᓂᐠ,” ᐃᑭᑐ ᐳᕑ. “ᑲᑭᓇ ᑕᐡ ᑫᑯᓇᐣ ᓂᐃᐧᑲᓇᐊᐧᐸᑕᓇᐣ, ᐊᓂᐣ ᑫᑭᐃᔑᓇᑲᐧᑭᐸᐣ ᐊᓄᑭᐃᐧᐣ ᑕᐱᐡᑯᐨ ᒋᐅᒋ ᐃᐧᒋᐦᐃᑯᔭᐠ. ᑭᐡᐱᐣ ᑕᐡ ᐊᐱᐣ ᐁᑲ ᐃᓀᑕᒧᐊᐧᐨ ᐊᓂᔑᓂᓂᐊᐧᐠ, ᒥᐦᐃᒪ ᐁᑲᐧ ᑫᑲᓄᑕᒪᐠ ᐁᑲ ᐃᐁᐧ ᐁᔑᓇᑕᐁᐧᑕᒪᐠ ᒋᐃᓯᓭᐠ.”
ᐊᓂᔑᓂᓂᐊᐧᐠ ᑭᐱᑭᑐᐊᐧᐠ ᒥᐁᑕ ᑫᑭᐃᓯᓭᑭᐸᐣ ᒪᒪᐤ ᑭᐁᐧᑲᓇᐊᐧᐸᒋᑫᐃᐧᐣ ᐊᐦᑭᐃᐧ ᓇᓇᑲᒋᒋᑫᐃᐧᑭᒪᐠ ᒋᐃᔕᐊᐧᐨ ᑕᔑᑫᐃᐧᓇᐣ ᒋᐊᑕᐃᐧᓄᑕᒧᐊᐧᐨ ᐊᓂᔑᓂᓂᐊᐧᐠ ᑎᐱᓇᐁᐧ ᐅᑎᐸᒋᒧᐃᐧᓂᐊᐧ, ᑎᐸᐣ ᒋᑕᐃᐧᓂᑲᑌᐠ ᑫᐱᒪᓄᑲᑌᐠ ᑭᐁᐧᑲᓇᐊᐧᐸᒋᑫᐃᐧᐣ ᒥᓇ ᒋᓇᓇᑲᒋᒋᑲᑌᑭᐣ ᑫᑐᒋᑫᒪᑲᑭᐣ ᐱᐊᐧᐱᑯᑲᓇᐣ ᑲᐊᓂᐅᔑᒋᑲᑌᑭᐣ.
“ᒣᑲᐧᐨ ᓄᑯᑦ ᐯᐸᓄᐠ ᐁᑕ ᐅᐣᒋᐱᒥᓂᔕᐦᐃᑲᑌ ᐊᐦᑭᐃᐧ ᓇᓇᑲᒋᒋᑫᐃᐧᐣ, ᓂᑲᑌᐦᐃ ᑭᑕᔑᑫᐃᐧᓂᓇᐠ ᐁᐅᒋᐊᐸᑕᐠ, ᑲᐃᐧᐣ ᑲᔦ ᐊᓂᔑᓂᓂᐊᐧᐠ ᒋᐊᔑᑎᓂᑕᐧ, ᒥᓇ ᑲᐃᐧᐣ ᒋᓂᓯᑕᐃᐧᓇᑲᐧᐠ,” ᐃᑭᑐ ᐁᕑᐅᓫᐊᐣᐟ ᓴᐣᓂ ᑲᐣᔭᐣ ᒣᑲᐧᐨ ᒥᑭᓯᐃᐧᐱᓯᑦ 2013. “ᑫᐃᔑᐁᐧᐣᑕᐠ ᑕᐡ ᒋᑭᐃᓇᑌᑭᐸᐣ, ᐊᓂᔑᓂᓂᐊᐧᐠ ᑫᐃᐧᓇᐊᐧ ᒋᑭᐅᒋ ᐊᓂᒧᑕᒪᐃᐧᐣᑕᐧᐸᐣ ᒥᓇ ᒋᑭᐊᐸᒋᐦᐃᐣᑕᐧᐸᐣ ᐸᑲᐣ ᑲᑎᐱᓇᐁᐧ ᐱᒧᒋᑫᐊᐧᐨ.”
ᐳᕑ ᑭᐃᑭᑐ ᑭᓫᐃᑊᐢ ᐅᑲᐱᒥᐃᐧᑕᓄᑭᒪᐣ ᐊᓂᔑᓂᓂᐊᐧᐣ ᒋᐱᒥᑲᑫᐧᒋᒪᐨ ᐊᓂᐣ ᑫᑭᐃᔑ ᒪᒪᐃᐧ ᓇᑯᒥᑎᐊᐧᐸᐣ ᒋᔑᓇᑲᐧᓂᐠ
ᐅᐃᐧᑕᓄᑭᒥᑐᐃᐧᓂᐊᐧ, ᐊᓇᐃᐧᐣ ᐱᓇᒪ ᐁᑭ ᐳᓂᒋᑲᑌᐠ ᐅᐁᐧ ᐊᓄᑭᐃᐧᐣ.
ᑭᐃᑭᑐ ᒥᔑᓇᑐᐣ ᑯᑕᑭᔭᐣ ᑫᑯᓇᐣ ᑫᓂᐊᓂᒧᒋᑲᑌᑭᐣ, ᐊᔑᐨ ᐊᓄᑭᐃᐧᓇᐣ, ᐊᓄᑭᐃᐧ ᑭᑭᓄᐦᐊᒪᑫᐃᐧᓇᐣ ᒥᓇ ᑫᐊᓂ ᐅᔑᒋᑲᑌᑭᐣ ᑫᑯᓇᐣ, ᔕᑯᐨ ᐅᑌᐸᑫᑕᐣ ᐅᓄᐁᐧᓂᐊᐧᐣ ᒋᐊᓂ ᓂᑭᓇᑲᐧᑭᐣ ᐊᐱ ᑭᐊᓂ ᐃᐧᒋᓀᑕᒧᒥᑎᑐᐊᐧᐨ ᑫᐃᔑᒪᒋᒋᑲᑌᐠ ᐅᐁᐧ ᐊᓄᑭᐃᐧᐣ.
“ᑲᐃᐧᐣ ᐣᑲᐸᑭᒋᒥᓯᐣ ᐅᐁᐧ ᑲᐃᐧᑲᑫᐧᑐᑕᒪᐠ,” ᐃᑭᑐ ᐳᕑ. “ᑭᓫᐃᑊᐢ ᐊᔕ ᐅᑭᐅᓀᑕᓇᐸᐣ ᐅᐁᐧᑎᓀᑫ ᑭᓇᐧᑲᐡ ᒋᐱᑕᓇᓄᑭᐨ.”
ᒪᑕᐊᐧ ᐊᓂᔑᓂᓂᐊᐧᐠ ᐅᑭᐸᑭᑎᓇᓇᐊᐧ ᐅᑎᐸᒋᒧᐃᐧᓂᐊᐧ ᒣᑲᐧᐨ ᓴᑭᐸᑲᐃᐧᐱᓯᑦ 12 ᑲᐃᓇᑭᓱᓂᐨ ᐅᑭᒪᑲᓇᐠ ᒋᒪᐊᐧᒋᐦᐃᑎᐊᐧᐨ ᐅᐁᐧ ᑫᐱᒥᑯᓇᑲᓂᐠ ᒋᐊᓂᒧᑕᒪᑎᐊᐧᐨ ᑭᓫᐃᑊᐢ ᑲᑭᐃᑭᑐᓂᐨ ᐁᒪᐧᔦ ᐅᓀᑕᒧᐊᐧᐨ ᑫᐃᔑᓇᑫᐧᐁᐧᔑᑐᐊᐧᐨ.