ᑭᒋᓇᒣᑯᓯᑊ ᐃᓂᓂᐤ ᐅᐡᑲᑎᓴᐠ ᐅᑭᒥᓀᐧᑕᓇᐊᐧ ᐊᑲᒪᑭᐠ ᑲᑭᐸᐸᒥᔭᐊᐧᐨ

ᑭᒋᓇᒣᑯᓯᑊ ᐃᓂᓂᐤ ᐅᑭᒪᑲᓀᐢ ᑌᕑᐅ ᓯᓇᐊᐧᑊ ᐅᑭᒥᓀᐧᑕᐣ ᑲᑭ ᐸᐸᒥ ᑭᐅᑫᐨ ᒥᓇ ᐁᑭ ᐸᐸᒥ ᑎᐸᒋᒧᑕᑫᐨ ᑲᐅᒋᐨ ᐅᑕᔑᑫᐃᐧᓂᐠ ᒣᑲᐧᐨ ᐊᐱ ᑲᑭᒪᒪᐃᐧ ᐅᑯᐡᑲᐦᐃᑎᓇᓄᐊᐧᐠ ᐁᐧᑎ ᓫᐃᐸᐧᐣ ᐸᐧᕑᒋᑯ ᐊᑲᒪᑭᐠ.
“ᑭᒥᓀᐧᑕᑲᐧᐣ ᑲᑭᓇᓇᑭᐡᑲᐊᐧᔭᑭᑕᐧ ᐊᐃᐧᔭᐠ, ᐁᑭᑕᑎᐸᒋᒧᑕᑎᔭᐠ ᓂᑎᓯᓭᐃᐧᓂᓇᐣ ᒥᓇ ᓂᑕᓂᒥᓭᐃᐧᓂᓇᐣ ᑲᐃᔑᔭᓂᒪᐠ ᐱᒪᑎᓯᐃᐧᐣ ᐃᒪ ᐊᐦᑭᑲᐠ,” ᐃᑭᑐ ᓯᓇᐊᐧᑊ. “ᑌᑎᐸᑲᒥᐠ ᐊᐃᐧᔭᐠ ᑲᐱᒪᑎᓯᐊᐧᐨ ᑲᐃᐧᐣ ᒋᑭᑫᑕᒧᐊᐧᐨ ᐊᓂᐣ ᐁᔑᐊᓂᒥᓭᔭᐠ.”
ᓯᓇᐊᐧᑊ ᑫᐃᐧᐣ ᑭᑕᑭᐧ ᑲᑭᒪᒪᐃᐧ ᐅᑯᐡᑲᐦᐃᑎᓇᓂᐊᐧᐠ ᑲᑭᐃᐧᒋᐊᐧᐨ ᑯᑕᑭᔭᐠ ᑭᒋᓇᒣᑯᓯᐱ ᐅᐡᑲᑎᓴᐠ ᑎᑐᕑ ᓯᓇᐊᐧᑊ ᐁᑲᐧ ᒥᓇ ᓫᐃᓫᐃ ᒪᐠᑫ ᒥᓇ ᐊᐁᐧ ᑲᐸᐸᒥ ᒪᓯᓇᑌᓯᑐᐨ ᒪᐊᐧᐨ ᑲᐃᔑᑭᑎᒪᑭᓭᑭᐣ ᐊᐦᑭᐣ ᐊᐣᐟᕑᐃ ᑲᓴᐸᐧᐣ ᐃᒪ ᐁᑭᐅᐣᒋ ᐊᓂᑯ ᐊᓄᑲᑕᐠ ᑭᒋᓇᒣᑯᓯᐱᐠ ᑲᑭᐅᐣᒋ ᓇᑐᒥᑕᐧᐸᐣ ᒋᑭᐅᑫᐊᐧᐨ ᐱᐃᐧᑌᐠ ᐁᑲᐧ ᑕᐡ 43 ᑲᓀᑎᔭᐣᐢ ᑭᐃᔕᐊᐧᐠ ᒣᑲᐧᐨ ᐊᐱ ᓴᑭᐸᑲᐃᐧᐱᓯᑦ 17 ᐊᑯᓇᐠ 21 ᑲᐃᓇᑭᓱᐨ.
ᑲᓴᐸᐧᐣ ᐃᑭᑐ ᒪᐊᐧᐨ ᐁᑭ ᑭᒋᓀᑕᐠ ᑲᐃᔑᐊᐧᐸᐨ ᐅᐡᑲᑎᓴᐠ ᐁᓂᐱᒥ ᑲᐡᑭᐦᐅᐊᐧᐨ ᐊᑯᓇᐠ ᑲᑭᔭᓂ ᐊᐧᐃᐧᒋᐊᐧᐸᐣ ᒣᑲᐧᐨ ᑲᑭᐱᒥ ᒪᒪᓯᓇᑌᓯᑐᐨ ᑲᐃᔑ ᑲᑭᑎᒪᑭᓭᓂᐠ ᑲᓇᑕ ᐊᐦᑭᐠ, ᐁᑲᐧ ᒥᓇ ᑲᑭᐃᔑ ᓂᓯᑕᐃᐧᓇᐊᐧᐨ ᐁᓇᑲᐧᓂᐠ ᐅᑌᐸᓂᑫᒧᐃᐧᓂᐊᐧ ᒣᑲᐧᐨ ᐊᑲᒪᑭᐠ ᑲᑭᐸᐸᒥᔭᐊᐧᐨ.
“ᓂᑭᒪᒪᑲᑌᓂᒪᐠ ᐁᑭ ᒥᓀᐧᑕᒪᐣ ᑲᑭᐃᔑᐊᐧᐸᒪᑲᐧ ᐅᐡᑲᑎᓴᐠ ᑐᑲᐣ ᓫᐃᓫᐃ ᒥᓇ ᑎᑐᕑ ᑲᑭ ᐊᔭᒥᐦᐊᐊᐧᐨ ᒥᓯᐁᐧᑲᒥᐠ ᑲᐅᐣᒋᐊᐧᐨ
ᐅᑭᒋᐅᓂᑲᓂᑕᒪᑫᐠ ᐁᑲᐧ ᒥᓇ ᐁᑲ ᐁᑭᐅᐣᒋ ᒪᔭᑫᓂᒪᐊᐧᐨ ᑲᐱᐃᐧᑌᐃᐧᓂᐨ,” ᑲᓴᐸᐧᐣ ᐃᑭᑐ. “ᐁᑭᑲᓇᐊᐧᐸᒪᑲᐧ ᐁᐊᐧᐃᐧᐣᑕᒪᑫᐊᐧᐨ ᒥᓯᐁᐧᑲᒥᐠ ᑲᐅᐣᑕᑲᓀᓯᓂᐨ ᐊᓂᐣ ᐁᓯᓭᓂᐠ ᐅᑕᔑᑫᐃᐧᓂᐊᐧ ᒥᐦᐅᐁᐧ ᑲᑭᐱᔑ ᐸᑯᓭᐣᑕᒪᐸᐣ ᒋᐃᔑᐊᐧᐸᑕᒪᐣ.”
ᓯᓇᐊᐧᑊ ᐅᑭᔭᓂᐸᑭᓇᐣ ᐅᑎᐸᒋᒧᐃᐧᐣ ᐃᒪ ᑲᑭᐃᔑ ᒪᒪᐃᐧᐡᑲᐊᐧᐨ ᐅᑎᔑᑭᔐᐧᐃᓂᐠ ᐁᑭᐃᔑ ᐊᔭᒥᒋᑫᐨ, ᑎᑐᕑ ᑭᓂᑲᒧ ᐊᓂᔑᓂᓂᐃᐧ ᓂᑲᒧᓂ ᐁᑲᐧ ᐅᑭᑎᐸᒋᒧᑕᐊᐧᐣ ᐃᒪ ᑲᑭᐊᔭᐊᐧᐨ ᐃᐧᒋᐅᐡᑲᑎᓴᐣ ᑫᑯᓇᐣ ᑲᑕᓀᑕᒥᐦᐃᑯᐨ ᐁᑲᐧ ᒥᓇ ᑫᐃᐧᐣ ᒪᐠᑫ ᐅᑭᔭᓂᒧᑕᓇᐣ ᐅᑕᓂᒥᓭᐃᐧᓇᐣ ᑲᑭᔭᓂᔕᐳᐡᑲᑭᐣ ᐱᓂᐡ ᑲᑭᐊᓂ ᑭᔑᑐᐨ ᐅᑎᐡᑯᓄᐃᐧᐣ ᓄᑯᑦ ᑲᐊᐦᑭᐊᐧᓂᐠ.
“ᑲᐃᐧᓂᐣ ᐁᐧᑎ ᑲᑭᐅᐣᒋ ᐃᔕᔭᐣᐠ ᐁᓇᓇᑕᐃᐧ ᔓᓂᔭᐁᐧᔭᐠ ᓇᐣᑕ ᒥᓇ ᐁᓇᓇᑐᓇᒪᐠ ᐃᐧᒋᐦᐃᑯᐃᐧᐣ,” ᓯᓇᐊᐧᑊ ᐃᑭᑐ. “ᐃᐁᐧ ᑕᐡ ᐃᑯ ᐅᓴᑦ ᑲᑭᐅᐣᒋ ᐃᔕᔭᐣᐠ, ᐁᑭᐊᐣᑕᐃᐧ ᐸᐸᐊᐧᐦᐃᑫᔭᐠ ᑭᑎᐡᑲᐧᑌᒥᐊᐧᐠ, ᐁᐃᐧᐃᑭᑐᔭᐠ, ᐊᐧᒋᔦ, ᑭᒋᓇᒣᑯᓯᐱᐠ ᐣᑐᒋᒥᐣ, ᓂᓇᓇᑐᓇᐊᐧᒥᐣ ᑫᐅᑐᑌᒥᒪᔭᑭᑕᐧ ᐊᐃᐧᔭᐠ ᒥᓇ ᑫᑭᐊᓄᒋ ᐃᐧᑕᓄᑭᒪᔭᑭᑕᐧᐸᐣ ᒋᐃᐧᒋᐦᐃᑎᓇᓄᐊᐧᐠ ᑫᓂᔑᒥᓄᐡᑲᒪᑲᓂᐠ ᑲᑭᓇ ᐊᐃᐧᔭᐠ ᐅᓂᑲᓂᒥᐊᐧ.”
ᓯᓇᐊᐧᑊ ᐃᑭᑐ ᑌᐯᐧ ᑭᐃᓯᓭᓂ ᐁᑭᐅᑐᑌᒥᑐᐊᐧᐨ ᒥᓇ ᐁᑭᔭᓂ ᐸᑲᑫᓂᒥᑐᐊᐧᐨ ᒥᓯᐁᐧᑲᒥᐠ ᑲᑭᐅᐣᑐᓭᐊᐧᐨ ᐃᒪ ᓇᐣᑕ 25,000 ᑭᑕᓄᓯᐊᐧᐠ ᑲᑭᒪᒪᐃᐧᐡᑲᐊᐧᐨ, ᒣᑲᐧᐨ ᐊᐱ ᓴᑭᐸᑲᐃᐧᐱᓯᑦ 23 ᐊᑯᓇᐠ 26.
“ᑭᒥᓄᓭ ᒥᓂᑯᐠ ᑲᑭᐊᓂᒧᒋᑲᓂᐊᐧᐠ, ᐃᐁᐧ ᐱᑯ ᒪᐊᐧᐨ ᑲᑭᑐᒋᑲᑌᐠ ᐁᑭ ᑲᑫᐧ ᓂᓯᑐᑕᒧᓂᐁᐧᔭᐠ ᓂᑎᓯᓭᐃᐧᓂᓇᐣ, ᑲᐃᐧᐣ ᐃᑯ ᐁᑕ ᓂᑎᓯᓭᐃᐧᓂᓇᐣ ᐃᐁᐧ ᐱᑯ ᑲᔦ ᓂᒪᐡᑲᐃᐧᓯᐃᐧᓂᓇᐣ,” ᐃᑭᑐ ᓯᓇᐊᐧᑊ. “ᐁᑲᐧ ᒥᓇ ᑲᑭᐅᐣᒋ ᐃᔕᔭᐠ ᐁᑭᓇᓇᑐᓇᐊᐧᔭᐠ ᐊᐃᐧᔭᐠ ᒋᐅᑐᑌᒥᑯᔭᐠ ᒥᓇ ᒋᐃᐧᑕᓄᑭᒥᑯᔭᐠ ᒥᓯᐁᐧᑲᒥᐠ ᑲᐅᒋᐊᐧᐨ.”
ᑎᑐᕑ ᑭᐃᑭᑐ ᑭᒥᓄᓭᓂ ᐅᒪᒐᐃᐧᓂᐊᐧ ᒥᔑᐣ ᐸᐸᑲᐣ ᐊᐃᐧᔭᐣ ᐁᑭᓇᑭᐡᑲᐊᐧᐨ ᑲᑭᒋᓀᐣᑕᒥᐦᐃᑯᐊᐧᐨ ᐊᓂᔑᓂᓂᐊᐧᐠ ᑲᐃᔑᓇᓇᑭᐡᑲᒧᐊᐧᐨ ᐅᑕᓂᒥᓭᐃᐧᓂᐊᐧ.
“ᒥᔑᐣ ᓂᑭᓇᑭᐡᑲᐊᐧᐠ ᐊᐃᐧᔭᐠ ᑲᐊᑲᐊᐧᑕᒧᐊᐧᐨ ᒋᐃᐧᒋᑕᐧᐊᐨ ᒥᓇ ᒋᐊᔭᒪᑲᐠ ᐅᑐᑌᒥᑐᐃᐧᐣ ᒋᔭᓄᒋ ᑫᐧᑭᓂᑲᑌᐠ ᐁᑲ ᑲᒥᓄᓭᐠ,” ᐃᑭᑐ ᑎᑐᕑ. “ᓂᑭᐅᐣᒋ ᒥᓀᐧᑕᐣ ᑕᐡ ᐅᐁᐧ ᐊᔕ ᐁᓂ ᓂᓯᑕᐃᐧᓂᑲᑌᐠ ᒥᓯᐁᐧ ᑲᐊᐱᑕᑲᒥᑲᐠ.”
ᑭᒋᓇᒣᑯᓯᑊ ᐃᓂᓂᐊᐧᐠ ᑲᐅᒋᐊᐧᐨ ᑲᔦ ᐅᑭᑐᑕᓇᐊᐧ ᐁᑭᐊᐣᑕᐃᐧ ᑲᐧᐡᑫᐧᐱᓀᐊᐧᐨ ᐃᒪ ᐊᐟᓫᐊᐣᑎᐟ ᑭᒋᑲᒥᐠ.
“ᐣᑕᓇᑭ ᐸᑯᓭᑕᓇᐸᐣ ᒋᐊᐣᑕᐃᐧ ᑲᐧᐡᑫᐧᐱᓀᔭᐣ ᑲᑲᐧᐡᑫᐧᐱᓂᑕᐧ ᒪᕑᓫᐃᐣ ᒥᓇ ᑐᓇ ᑲᐃᓂᑕᐧ ᑭᒋᑲᒥᐃᐧ ᑭᓄᔐᐠ ᑲᐃᐧᐣ ᑕᐡ ᐸᓂᒪ ᐊᐱ ᐅᐸᐦᐅᐃᐧᐱᓯᑦ ᐃᔑᑲᐧᐡᑫᐧᐱᓇᐊᐧᐠ,” ᐃᑭᑐ ᓯᓇᐊᐧᑊ. “ᓂᑭᒥᑲᐊᐧᒥᐣ ᐊᐃᐧᔭ ᐁᑭᐸᐸᒥᐱᓂᑯᔭᐠ ᒋᒪᓂᐠ ᐁᑭᐊᐣᑕᐃᐧ ᑲᐧᐡᑫᐧᐱᓀᔭᐠ ᑯᑕᑭᔭᐠ ᐸᐸᑲᐣ ᑭᓄᔐᐠ. ᔕᑯᐨ ᓂᓇᐃᐧᐟ ᑲᐃᓂᑭᓂᐨ ᓇᒣᑯᐢ ᒥᑎᑐ ᐣᑎᓀᑕᐣ.”
ᑎᑐᕑ ᐃᑭᑐ ᒪᐊᐧᐨ ᐅᑭᒥᓀᐧᑕᐣ ᑲᑭᐸᐸᒪᐦᐅᑯᐨ ᑭᒋᑲᒥᐠ.
“ᓂᐣ ᐁᑲᐧ ᑎᑐᕑ ᒋᒪᓂᐠ ᓂᑭᐅᒋ ᐸᑯᐱᑲᐧᐡᑯᓂᒥᐣ ᐁᑫᐧᓇᐠ ᐁᑭᑯᒋᐱᑕᒪᐠ ᑭᒋᑲᒥᐊᐧᐳ ᑲᔑᐃᐧᑕᓇᑲᒥᐠ,” ᐃᑭᑐ ᓯᓇᐊᐧᑊ. “ᑲᐃᐧᐣ ᑲᔦ ᒋᐊᐧᑕᑲᒥ ᑯᐣᓴᐱᓇᓂᐊᐧᐠ, ᔕᑯᐨ ᒪᐊᐧᐨ ᐃᑯ ᑲᐊᑲᔐᔑᔭᐣ ᑭᑎᓀᐣᑕᐣ.”
ᑲᓴᐸᐧᐣ ᐃᑭᑐ ᑲᑭᐸᐸᒪᑕᑫᐧᐊᐧᐨ ᑭᒋᑲᒥᐠ ᒥᐦᐅᐁᐧᓂ ᐯᔑᑲᐧᔦᐠ ᒪᐊᐧᐨ ᑲᑭ ᑭᒋᓀᐣᑕᐠ ᐅᒪᒐᐃᐧᐣ.
“ᑲᐃᐧᐣ ᐃᐧᑲ ᓂᑲᐊᐧᓂᑫᓯᐣ, ᐁᒪᓯᓇᑌᔑᒪᑲᐧ ᓫᐃᓫᐃ, ᑎᑐᕑ ᒥᓇ ᑌᕑᐅ ᐊᐱᐣ ᐁᑫᐧᓇᐠ ᐁᐸᑯᐱᑲᐧᐡᑯᓂᐊᐧᐨ ᒥᓇ ᐁᐊᐧᐸᒪᑲᐧ ᒪᐊᐧᐨ ᐁᑭᒋᒥᓀᐧᐣᑕᒧᐊᐧᐨ, ᐁᑭᑫᐣᑕᒪᐣ ᑲᔦ ᒪᐊᐧᐨ ᑲᐧᔭᐠ ᐁᑭᐊᐃᓯᓭᐊᐧᐨ ᒣᑲᐧᐨ ᑲᑭᐸᐸᒥᔭᐊᐧᐨ ᐸᐧᕑᒋᑯ ᐊᐦᑭᐠ,” ᐃᑭᑐ ᑲᓴᐸᐧᐣ.
ᓯᓇᐊᐧᑊ ᑭᐃᑭᑐ ᐊᒥᐦᐅᐁᐧᓂ ᐁᑫᐧᓇᐠ ᐊᑲᒪᑭᐠ ᐁᑭᐃᔕᐊᐧᐨ ᑲᑭᐃᐧᒋᐊᐧᐨ ᐅᐡᑲᑎᓴᐣ.
“ᐅᑭᒪᒪᑲᑌᑕᓇᐊᐧ ᑲᑭᒪᒐᐊᐧᐨ,” ᓯᓇᐊᐧᑊ ᐅᑭᐃᓇᒋᒪᐣ ᐅᐡᑲᑎᓴᐣ. “ᐅᑭᐅᐣᒋ ᓂᓯᑕᐃᐧᓇᓇᐊᐧ ᐊᓂᐣ ᐁᔑᓇᑲᐧᐠ ᐱᒪᑎᓯᐃᐧᐣ ᒥᓇ ᐱᑯ ᒥᓯᐁᐧᑲᒥᐠ ᑲᐃᓯᓭᑭᐣ ᑫᑯᓇᐣ, ᑭᐸᑲᓀᑕᑲᐧᐣ; ᐸᐸᑲᐣ ᑫᑯᓇᐣ ᐃᔑᒋᑫᓇᓂᐊᐧᐣ ᐁᐧᑎ.”
ᓯᓇᐊᐧᑊ ᑭᐃᔑᑎᐸᐦᐊᑫ ᐅᐁᐧᓂ ᒪᒐᐃᐧᓂ ᒪᐊᐧᐨ ᐃᑯ ᓂᑲᐣ ᑲᐃᓇᑭᒋᑲᑌᐠ.
“ᓂᑕᔕᔑᑭᐡᑲᐊᐧᐠ ᐊᐁᐧᓀᐣ ᐃᑯ ᑲᐅᐡᑲᑎᓯᐨ ᒋᑭᑕᑭᐧᐸᐣ ᐅᒪ ᒪᒐᐃᐧᓂᐠ,” ᐃᑭᑐ ᓯᓇᐊᐧᑊ. “ᒣᑲᐧᐨ ᐁᑲᐡᑫᐧᐱᓀᔭᐣ ᐣᑭᒪᒥᑐᓀᓂᒪᐠ ᐅᐡᑲᑎᓴᐠ ᑭᔭᐱᐨ ᐊᐊᐧᔑᒣ ᒋᑭᑲᑫᐧ ᐅᓇᑐᐊᐧᐸᐣ ᑫᓄᒋᑌᐱᓇᒪᓱᐊᐧᐨ ᐅᐱᒪᑎᓯᐃᐧᓂᐊᐧᐠ, ᑲᐃᐧᐣ ᐃᑯ ᐁᑕ ᐃᐧᓇᐊᐧ ᐃᒪ ᐱᑯ ᑲᔦ ᐅᑕᔑᑫᐃᐧᓂᐊᐧᐠ.
ᐯᔑᐠ ᑕᐡ ᑫᑯᓂ ᑫᑭᑲᑫᐧ ᑐᑕᒧᐊᐧᐸᐣ ᒣᑲᐧᐨ ᑲᔭᓂᐱᒪᑎᓯᐊᐧᐨ ᒋᑭᐸᐸᒥᔭᐊᐧᐸᐣ ᒋᐊᐧᐸᑕᒧᐊᐧᐨ ᐸᐸᑲᐣ ᐱᐃᐧᑌᐃᐧ ᐊᐦᑭᐠ. ᑲᐃᐧᒋᐦᐃᑯᐣ ᒋᐅᒋ ᓂᓯᑕᐃᓇᒪᐣ ᑫᑯᓇᐣ ᒥᓇ ᑫᐊᓂᔑ ᑲᓇᐊᐧᐸᑕᒪᐣ ᐱᒪᑎᓯᐃᐧᐣ.”
ᑎᑐᕑ ᑭᐃᑭᑐ ᐃᒪ ᐸᐧᕑᒋᑯ ᐊᐦᑭᐠ ᑲᑲᐯᔑᐊᐧᐨ ᐊᐃᐧᔭᐠ ᒪᐊᐧᐨ ᐅᑐᑌᒥᐊᐧᐠ.
“ᐸᑲᓀᑕᑲᐧᐣ ᑲᐃᔑᐁᐧᐸᐠ, ᐸᑲᓂᓇᑯᓯᐊᐧᐠ ᔑᑯᐱᐠ, ᑲᑭᓇ ᐱᑯ ᑫᑯᐣ ᐸᑲᓂᓇᑲᐧᐣ, ᓂᑭᐸᑲᓇᐱᔑᐣ ᐁᐧᑎ ᑲᑭᐃᔕᔭᐣ,” ᐃᑭᑐ ᑎᑐᕑ. “ᑲᑲᐯᔑᐊᐧᐨ ᐃᒪ ᐊᐃᐧᔭᐠ ᒪᐊᐧᐨ ᐅᑐᑌᒥᐊᐧᐠ. ᑲᐃᐧᐣ ᑭᒪᔭᑫᓂᒥᑯᓯᐠ ᒥᓇ ᑭᐊᐧᐃᐧᒋᐦᐃᑯᐠ ᑭᐡᐱᐣ ᓇᐣᑕ ᑲᐊᐧᓂᔑᓇᐣ.”