ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ ᑕᑭᐧᒪᑲᓄᐣ ᐃᒪ ᐊᐧᑌᓂᑲᓀᔭᑊ ᐃᐡᑯᑌ ᐊᓄᑭᐃᐧᓂᐠ

ᓂᔭᓇᐣ ᑭᐁᐧᑎᓄᐠ ᐅᑭᒪᑲᓇᐠ ᑕᔑᑫᐃᐧᓇᐣ ᐁᑲᐧ ᒥᓇ ᐊᓄᑭᐃᐧ ᐱᒥᐃᐧᒋᑫᐃᐧᐣ ᑲᓂᑲᓂᑕᑲᓇᐊᐸᑕᒧᐊᐧᐨ, ᑭᐊᔑᒋᐊᐧᐠ ᒋᐃᐧᑕᓄᑭᒥᐁᐧᐊᐧᐨ ᐊᐧᑌᓂᔭᓀᔭᑊ ᐃᐡᑯᑌ ᐊᓄᑭᐃᐧᓂᐠ ᑲᐃᐧᐊᓄᑲᑌᐠ ᒋᐃᓇᐱᑫᓂᑲᑌᐠ ᐅᐡᑭ ᐊᐧᑌᓂᑲᓂᔭᑊ ᐁᐧᑎ ᐊᓂᔑᓂᓂᐃᐧ ᑲᐯᔑᐃᐧᓇᐣ.
“ᓂᑕᔑᑫᐃᐧᓂᓇᐣ ᐁᐧᑎ ᑌᑎᐸᐦᐃ ᒪᐊᐧᐨ ᓇᑕᐁᐧᐣᑕᑲᐧᐣ ᑫᑲᑲᐯ ᐊᓄᑭᒪᑲᐠ ᐊᐧᑌᓂᑲᓂ ᐃᐡᑯᑌ ᑫᓂᓇᐃᐧᐟ ᒋᑭᐅᐣᒋ ᐱᒧᑕᒪᓱᔭᐠ ᐊᓄᑭᐃᐧᒪᒋᑕᒪᓱᐃᐧᓇᐣ ᑲᐊᓂᐊᔭᒪᑲᑭᐣ,” ᑭᐃᑭᑐ ᐱᑐᕑ ᑲᑦᐳ ᑭᐁᐧᑎᓄᐠ ᐅᑭᒪᑲᓇᐠ ᐱᒧᒋᑫᐃᐧᓂᐠ ᑲᐅᑭᒪᐃᐧᐨ. “ᓂᑕᔕᐧᐸᐣᑕᒥᐣ ᑕᐡ ᒋᑭᐅᐣᒋ ᒥᓄᓴᐦᐃᑯᔭᐠ ᐅᐅᒪ ᒪᐊᐧᐨ ᑲᑭᒋᓀᐣᑕᑲᐧᐠ ᑭᒋᐊᓄᑭᐃᐧ ᒪᒋᒋᑫᐃᐧᐣ - ᓄᑯᑦ ᒥᓇ ᐁᐧᑎ ᐊᓂᓂᑲᐣ.”
ᐊᑎᑯᓴᑲᐃᑲᓂᐠ, ᑭᐁᐧᐃᐧᐣ, ᒥᔑᐃᐧᓴᑲᐃᑲᐣ, ᒣᒣᑫᐧᔑᐃᐧᓴᑲᐃᑲᓂᐠ ᒥᓇ ᐅᐸᓴᑎᑲᐠ ᒥᐅᓄ ᐃᐡᑯᓂᑲᓇᐣ ᑲᑭᑕᑭᐧᒪᑲᑭᐣ ᐃᒪ ᐃᐧᑕᓄᑭᒥᑐᐃᐧᓂᐠ, ᐁᑲᐧ ᐊᔕ ᑯᑕᑭᔭᐣ 13 ᐃᐡᑯᓂᑲᓇᐣ ᐃᒪ ᐃᐧᒋᑕᒪᑲᓄᐣ ᐁᑲᐧ ᐊᔑᐨ ᑯᓫᐟᑲᐧᕑᑊ ᐊᓯᓂᑫᐃᐧ ᐱᒧᒋᑫᐃᐧᐣ, ᒣᑲᐧᐨ ᐊᐱ ᐅᐱᒪᐊᒧᐃᐧᐱᓯᑦ 8 ᑲᐃᓇᑭᓱᐨ ᑲᑭᒪᓯᓇᐅᑎᓱᐊᐧᐨ ᐁᐧᑎ ᑕᐣᑐᕑ ᐯ ᐅᑌᓇᐠ.
“ᓂᒥᓀᐧᑕᒥᐣ ᐅᓄᐁᐧᓂᐊᐧᐣ ᓂᔭᓇᐣ ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ ᑲᐊᔑᑎᓇᒪᐠ ᐅᒪ ᐃᐧᑕᓄᑭᒥᑐᐃᐧᓂᐠ, ᓄᑯᑦ ᑲᑭᔑᑲᐠ ᑲᐱᐃᐧᑕᓄᑭᒥᑯᔭᑭᑕᐧ,” ᑭᐃᑭᑐ ᒪᑲᓇᐟ ᑭᓂᑲᐧᓇᐡ, ᑲᓂᑲᓂ ᐊᐱᑕᒪᑫᐨ ᐃᒪ ᐊᐧᑌᓂᑲᓀᔭᑊ ᐃᐡᑯᑌ ᐊᓄᑭᐃᐧᓂᐠ. “ᓂᑎᐡᑯᓂᑲᓂᓇᐣ ᑲᑲᐯᔑᐊᐧᐨ ᐅᑭᐊᐧᐸᑕᓇᐊᐧ ᒋᒥᓄᓭᐦᐃᑯᐊᐧᐨ ᐊᐱ ᐳᓂᐊᐸᒋᑐᐊᐧᐨ ᐱᒥᑌᓂ ᑲᐅᒋᐊᐧᑌᓂᑲᑫᐊᐧᐨ ᒥᐡᑲᐧᐨ ᒋᐊᐸᒋᑐᐊᐧᐨ ᑫᑲᐯᐊᓄᑭᒪᑲᓂᐠ ᒥᓇ ᑫᑭᔭᓄᒋ ᒪᒋᑕᒪᓱᐊᐧᑫᐊᐧᐨ ᐅᒪᒋᑕᐃᐧᓂᐊᐧ ᒥᓯᐁᐧ ᑌᑎᐸᐦᐃ. ᓂᑕᔕᐧᐸᐣᑕᒥᐣ ᑕᐡ ᑲᑭᓇ ᑕᔑᑫᐃᐧᓇᐣ ᒋᐃᐧᑕᓄᑭᒥᑎᒪᑲᑭᐣ.”
ᐁᑲᐧ ᐅᐁᐧ ᐊᓄᑭᐃᐧ ᐱᒧᒋᑫᐃᐧᐣ, ᐅᑐᒋᐃᐧᑕᓄᑭᒪᐊᐧᐣ ᑯᑕᑭᔭᐣ ᐊᓄᑭᐃᐧ ᐱᒧᒋᑫᐃᐧᓂ ᐸᐅᕑᑌᓫ ᐁᑲᐧ ᒥᓇ ᑐᔐ ᐸᐣᐠ, ᑭᒪᓯᓇᐦᐅᑎᓱᐊᐧᐠ ᒋᐃᐧᑕᓄᑭᒥᑐᐊᐧᐨ ᒣᑲᐧᐨ ᐊᐱ ᐅᐱᒪᐊᒧᐃᐧᐱᓯᑦ 17 ᒋᐊᓂᒪᑕᓄᑲᑕᒧᐊᐧᐨ ᐱᒪᐱᑫᓂᑫᐃᐧᐣ ᒋᐅᓇᑐᐊᐧᐨ ᑫᐃᔑᒪᒋᐊᐧᐨ, ᑫᓂᔑᐱᒪᓄᑲᑌᐠ ᐁᑲᐧ ᒥᓇ ᑫᐅᐣᑎᓂᐨ ᔓᓂᔭ ᑫᐊᓄᑭᐊᐧᑲᓄᐊᐧᐠ ᑲᐃᐧᐊᓂ ᐅᔑᒋᑲᑌᐠ ᐊᐧᑌᓂᑲᓀᔭᑊ.
“ᐅᑯᐁᐧᓂᐊᐧᐠ ᐅᑕᓄᑭᐠ ᒥᓇ ᑯᑕᑭᔭᐟ ᑲᐅᐣᒋ ᐸᐸᒥᓯᐊᐧᐨ ᐃᐧᑕᓄᑭᒥᑐᐃᐧᓂᐠ ᐅᑐᒋᐃᐧᒋᓀᑕᒧᒪᐊᐧᐣ ᐊᐧᑌᓂᑲᓀᔭᑊ ᑲᐅᐣᒋᐸᐸᒥᓯᐊᐧᐨ ᑲᑭᐃᔑᐊᐧᐸᑕᒧᐊᐧᐸᐣ ᑲᐃᐧᔑ ᐊᓂᑲᐧᐱᑫᓂᑲᑌᑭᐣ ᑕᔑᑫᐃᐧᓇᐣ ᓄᐱᒪᑲᒥᐠ ᑲᐊᔭᑭᐣ,” ᑭᐃᑭᑐ ᑌᒥᔦᐣ ᑐᓫᐅᒥᔦ, ᒪᔭᑦ ᑲᐅᒋᓂᑲᓂᓯᐨ ᐊᓄᑭᐃᐧ
ᐱᒧᒋᑫᐃᐧᓂᐠ ᐅᒪ ᑲᓇᑕ ᐊᐦᑭᐠ. “ᓂᒋᑫᐣᑕᒥᐣ ᐅᐁᐧ ᐃᓇᓄᑭᐃᐧᐣ ᑲᐃᐧᑐᒋᑲᑌᐠ ᒋᐅᒋ ᐃᐧᒋᐦᐃᑯᐊᐧᐨ ᑲᑲᐯᔑᐊᐧᐨ ᐯᑭᐡ ᑲᔦ ᑫᓄᒋᑲᐡᑭᑐᐊᐧᐨ ᒋᒪᒋᑕᒪᓱᐊᐧᐨ ᐊᓄᑭᐃᐧᑫᑯᓇᐣ ᒋᑲᐧᔭᒋᔭᐊᐧᐨ ᐅᐡᑭ ᐱᐊᐧᐱᑯ ᐊᐸᒋᒋᑲᓇᐣ ᒥᓇ ᑯᑕᑭᔭᐣ ᐊᓄᑭᐃᐧᓂᐠ ᑲᐃᔑᐊᐸᑕᑭᐣ ᑫᑯᓇᐣ.”
ᐁᑲᐧ ᐅᐁᐧ ᑲᐃᐧᔭᓂ ᐊᓂᑲᐧᐱᑫᓂᑲᓂᐊᐧᐠ ᐱᓇᒪ ᐁᐧᑎ ᒪᐊᐧᐨ ᓂᑲᐣ ᐅᑲᓯᓴᑲᐦᐃᑲᓂᐠ ᑕᐅᐣᒋ ᐊᓂᑲᐧᐱᑫᒧᒋᑲᑌ, ᐱᓂᐡ ᐊᐱᐣ ᑕᐊᓄᒋ ᐊᔭᓂᑲᐧᓂᑫᐱᑲᑌᐊᐧᐣ 18 ᐃᐡᑯᓂᑲᓇᐣ, ᒣᑲᐧᐨ ᓄᑯᑦ ᐊᐦᑭᐃᐧᐱᒥᑌ ᑲᐅᒋᐱᒥᐱᑌᑭᐣ ᐱᒥᐸᓂᒋᑫᐃᐧᑲᒥᑯᐣ ᑲᐅᒋᐊᐧᑌᓂᑲᑫᐊᐧᐨ.
“ᓂᑭᐃᔑᐅᓇᐸᑕᒥᐣ ᒋᐯᔑᑲᐧᐠ ᐊᓄᑭᐃᐧᐣ, ᐁᑲᐧ ᔕᑯᐨ ᓂᔕᐧ ᒋᐅᒋ ᐱᒪᓄᑲᑌᐠ,” ᑭᐃᑭᑐ ᑭᓂᑲᐧᓇᐡ. “ᓂᐢᑕᑦ ᒪᑕᓄᑭᐃᐧᐣ ᑫᑐᒋᑲᑌᐠ ᒋᐊᓂᑲᐧᐱᑫᒧᒋᑲᑌᐠ ᐅᑲᓯᓴᑲᐦᐃᑲᓂᐠ - ᐊᔕ ᐃᐁᐧ ᒋᔑᑲᑫᐧ ᑌᐱᓂᑲᑌᐠ ᒋᒪᑕᓄᑭᒪᑲᐠ 2015 ᐊᐦᑭᐊᐧᐠ. ᐁᑲᐧ ᑕᐡ ᐃᐧᐣ ᑫᔭᓂ ᐊᓂᑲᐧᐱᑫᓂᑲᑌᑭᐣ ᐃᐡᑯᓂᑲᓇᐣ 2017 ᐊᐦᑭᐊᐧᐠ ᒋᔑᑲᑫᐧᑐᒋᑲᑌᐠ.”
ᑭᓂᑲᐧᓇᐡ ᑭᐃᑭᑐ ᐅᐁᐧᓂ ᒣᑲᐧᐨ ᑲᐱᒥᑐᑕᒧᐊᐧᐨ ᐅᑐᓇᒋᑫᐃᐧᓂᐊᐧ ᒪᔭᑦ ᐊᓂᔑᑎᐸᓂᓭ. “ᐊᐧᑌᓂᑲᓀᔭᑊ ᐱᒧᒋᑫᐃᐧᓂᐠ ᐅᑲᐅᐣᑎᓇᐊᐧᐣ ᑫᐃᐧᑕᓄᑭᒥᑯᐊᐧᐨ ᑲᐅᓇᐱᑫᓂᑫᐃᐧ ᐊᓄᑭᓂᐨ ᐃᐧᐣ ᒋᐊᓄᑲᑕᐠ ᐅᓇᐱᑫᐦᐃᑫᐃᐧᓇᐣ,” ᐃᑭᑐ ᑭᓂᑲᐧᓇᐡ.
ᐁᑲᐧ ᒥᓇ ᐅᐣᑌᕑᐃᔪ ᐃᐡᑯᑌ ᑲᓂᑲᓂᑲᓇᐊᐧᐸᑕᒧᐊᐧᐨ ᐅᑭᐃᔑᒥᑲᓇᐊᐧ ᒥᓂᑯᐠ ᐃᐁᐧ ᑲᐃᓇᑭᐣᑌᐠ ᐊᑭᐃᐧᐱᒥᑌ ᑲᐊᐸᑕᐠ ᐱᒥᐸᓂᒋᑫᐃᐧᑲᒥᑯᐠ ᐁᐧᑎ ᓄᐱᒪᑲᒥᐠ ᑲᐊᔭᑭᐣ ᐃᐡᑯᓂᑲᓇᐣ ᓂᐦᓴᐧ ᐱᓂᐡ ᒥᑕᓴᐧ ᐊᐊᐧᔑᒣ ᐁᐱᒋᒣᑎᓂᑫᐃᐧᓂᐊᐧᐠ ᐊᐱᐨ ᐃᐧᐣ ᒥᓂᑯᐠ ᑲᒣᑎᓂᑫᐦᐃᑯᐊᐧᐨ ᐸᐸᑲᐣ ᐅᒪ ᐅᐣᑌᕑᐃᔪ ᐊᐦᑭᐠ. ᐁᑲᐧ ᒥᓇ ᐊᑭᐃᐧᐱᒥᑌ ᑲᐅᒋᐱᒥᐱᑌᑭᐣ ᐱᒥᐸᒥᒋᑲᓇᐣ ᐊᐱᐨ ᐃᐧᐣ ᑲᐊᐸᑕᐠ ᐱᒪᐱᑫᓂᑲᐣ ᓇᐊᐧᐨ ᐃᒪ ᑲᔦ ᐁᐅᒋ ᒪᒋᑐᑕᑫᒪᑲᐠ ᐱᒪᑎᓯᐃᐧᓂᐠ, ᐁᓂᓂᒋᑐᑕᑫᒪᑲᐠ, ᒥᓇ ᐃᒪ ᒥᓯᐁᐧ ᐊᐦᑭᑲᐠ, ᒥᓇ ᑕᔑᑫᐃᐧᓂᐠ ᒥᓇ ᔓᓂᔭᑫᐃᐧ ᒪᒋᑕᒪᓱᐃᐧᓂᐠ ᐁᑲ ᐁᑭᐅᐣᒋᑲᐡᑭᒋᑲᑌᐠ.
“ᑭᐃᔑᐊᐧᐸᒋᑲᑌ ᑕᐡ ᒪᐊᐧᐨ ᐃᑯ ᒥᐢᑕᐦᐃ ᑕᒣᑎᓂᑫᐃᐧᓂᐊᐧᐣ ᐁᐧᑎ ᐊᓂᓂᑲᐣ ᑭᐡᐱᐣ ᐅᐁᐧ ᐃᔑᐱᒥᐊᐸᒋᒋᑫᔭᐠ,” ᑭᐃᑭᑐ ᑭᓂᑲᐧᓇᐡ. “ᒥᔑᐣ ᑲᔦ ᑭᑕᔑᑫᐃᐧᓂᓇᐣ ᐊᔕ ᐅᑕᓂᐊᓭᐧᐦᐊᓇᐊᐧ ᒥᓂᑯᐠ ᐁᑕ ᑫᐊᐸᒋᑐᐊᐧᐨ ᐅᑎᐡᑯᑌᒥᐊᐧ, ᑲᐃᐧᐣ ᑕᐡ ᑲᓇᑫ ᒋᑭᐊᓂᑲᐧᐱᑫᓇᒧᐊᐧᐨ ᐅᑐᐡᑭᐊᐧᑲᐦᐃᑲᓂᒥᐊᐧ ᒥᓇ ᒥᔑᓇᑐᐣ ᑫᑯᓇᐣ ᑲᐅᐣᒋᐊᔑᒋᓭᑭᐣ, ᑐᑲᐣ ᐱᐳᓂᒥᑲᓇᑫᐃᐧᐣ ᐁᑲ ᐊᔕ ᑲᑭᐊᐸᑕᐠ ᒥᓇ ᐱᑯ ᑲᐊᓂᐸᐸᑲᓂᐃᔑᐁᐧᐸᐠ, ᒥᐅᓄ ᑲᑭᐱᓂᑫᒪᑲᑭᐣ ᑭᑕᔑᑫᐃᐧᓂᓇᐣ ᑫᑭᐅᐣᒋ ᑲᒋᑎᓇᓱᒪᑲᑲᐧᐸᐣ ᐸᐸᑲᐣ ᐊᓄᑭᐃᐧ ᒪᒋᑕᒪᓱᐃᐧᓇᐣ ᒥᓇ ᔓᓂᔭᑫᐃᐧ ᒪᒋᑕᒪᓱᐃᐧᓇᐣ.”
ᑭᓂᑲᐧᓇᐡ ᑭᐃᑭᑐ ᐅᓄᐁᐧᓂᐊᐧᐣ ᑕᔑᑫᐃᐧᓇᐣ ᑲᑭᐅᐣᒋ ᐃᓀᑕᒧᐊᐧᐸᐣ ᒋᒪᒋᑐᐊᐧᐨ ᐊᐧᑌᓂᑲᓀᔭᑊ ᐊᓄᑭᐃᐧᓂ ᐃᐧᓇᐊᐧ ᐁᐃᐧᔭᓂ ᑎᐱᓇᐁᐧᐃᐧᓯᐊᐧᐨ ᒥᓇ ᐱᒧᑕᒪᓱᐊᐧᐨ ᐅᐁᐧᓂ ᐊᐧᑌᓂᑲᓀᔭᐱᐃᐧ ᐊᓄᑭᐃᐧᓂ.
“ᒥᐦᐅᒪ ᐯᑭᐡ ᑲᓄᒋᑲᑫᐧᐅᔑᑕᒪᓱᓇᓂᐊᐧᐠ ᑲᐡᑭᐦᐅᐃᐧᐣ ᒋᑕᑲᐧᐠ ᐃᒪ ᑭᐸᑭᑎᓯ ᑕᓇᐱᐃᐧᓂᓇᓂᐠ,” ᐃᑭᑐ ᑭᓂᑲᐧᓇᐡ. “ᑭᐡᐱᐣ ᑕᐡ ᐊᓂᐱᒋᓂᑲᐡᑐᔭᑭᐸᐣ ᑭᓇᐃᐧᐟ ᑲᑭᔑ ᐅᓀᐣᑕᒪᐠ ᒋᔑᐱᒧᑕᒪᓱᔭᐠ ᒥᓇ ᑫᔑᐱᒧᓇᑲᓄᐨ ᔓᓂᔭᐃᐧ ᑲᓇᐁᐧᐣᒋᑫᐃᐧᓂᐠ ᑭᓇᐃᐧᐟ ᑲᐊᓂᔑᓂᓂᐃᐧᔭᐠ, ᑭᓇᐃᐧᐟ ᐃᑯ ᑭᑕᐸᐸᒥᓯᒥᐣ ᐊᓂᐣ ᑫᑭᐊᓂᔑ ᐅᓇᒋᑫᔭᑭᐸᐣ ᑫᑯᐣ ᑲᐃᐧᑎᐱᓇᐁᐧᐃᐧᓯᔭᐠ. ᐊᓂᐣ ᑕᐡ ᑫᑭᑐᑕᒪᑭᐸᐣ ᐁᐧᑎ ᐊᓂᓂᑲᐣ ᑫᑯᐣ ᐃᐧᐅᓇᑕᒪᐧᐊᔭᑭᑕᐧ ᑫᔭᓂ ᐊᐸᒋᑐᐊᐧᐨ ᑫᓂᐊᓂᑫᐱᒪᑎᓯᐊᐧᐨ.”
ᑭᓂᑲᐧᓇᐡ ᑲᔦ ᐅᑭᐃᐧᐣᑕᐣ ᐊᐱ ᑫᑯᐣ ᑲᐃᐧᒪᑕᓄᑲᒋᑲᑌᐠ ᐁᐧᑎ ᑭᐁᐧᑎᓄᐠ, ᐅᐣᒋᑕᐱᑯ ᓇᑕᐁᐧᐣᑕᑲᐧᐣ ᐃᐧᑕᓄᑭᒥᑐᐃᐧᐣ ᒥᓇ ᐃᐧᒋᑲᐸᐃᐧᑐᑕᐃᐧᐣ ᒋᑕᑲᐧᑭᐸᐣ.
ᐁᑲᐧ ᐅᐁᐧ ᐊᐧᑌᓂᑲᓀᔭᑊ ᐃᐡᑯᑌ ᐊᓄᑭᐃᐧᐣ 230 ᑭᓫᐅᐳᓫᐟ ᐱᒪᐱᑫᓂᑫᐃᐧᐣ ᒪᒋᑕᐃᐧᐣ ᓂᐢᑕᑦ ᑭᐃᐧᐣᒋᑲᑌᐸᐣ ᒪᑯᔐᑭᔑᑲᑌᐱᓯᑦ 2011 ᒋᒪᑕᓄᑲᑌᐠ, ᒥᓇ ᐅᑭᒪᑲᓇᐠ ᐅᑭᐃᐧᐣᑕᓇᐊᐧᐸᐣ ᐅᑕᔑᑫᐃᐧᓂᐊᐧ ᐁᓇᑕᐁᐧᐣᑕᒧᐊᐧᐨ ᓇᐊᐧᐨ ᐸᑭ ᑫᑭᐅᐣᒋ ᒣᑎᓂᑫᐦᐃᑯᐊᐧᐸᐣ ᑲᐊᐸᒋᑐᐊᐧᐨ ᐃᐡᑯᑌᓂ, ᓇᐊᐧᐨ ᑲᔦ ᒋᒪᐡᑲᐃᐧᒪᑲᓂᐠ ᐃᐡᑯᑌᓂ ᐁᑲᐧ ᒥᓇ ᐃᒪ ᓂᐱᑲᐠ ᒋᐅᒋ ᐅᔑᐦᐅᒪᑲᓂᐠ ᐊᐧᑌᓂᑲᓂᔭᐱ ᐃᐡᑯᑌᓂ ᑫᐅᐣᒋᐊᐸᒋᑐᐊᐧᐨ.
“ᑫᓂᐣ ᐃᒪ ᐣᑕᔑᑫᐃᐧᓂᐠ ᑲᐃᐧᐣ ᐊᔕ ᒋᑭᑌᐱᑎᐸᐦᐊᒪᐠ ᑲᐊᐱᒋ ᐊᑲᐧᑭᐣᑌᐠ ᐱᒥᑌ ᑲᐊᐸᑕᐠ ᒋᐱᒥᐱᑌᐠ ᐱᒥᐸᓂᒋᑲᐣ ᑲᐅᐣᒋᐊᐧᑌᓂᑫᔭᐠ,” ᑭᐊᑭᑐ ᐊᐧᓇᒪᐣᓴᑲᐃᑲᐣ ᐅᑭᒪᑲᐣ ᕑᐊᐟ ᐁᐧᓇᐱᑕᑦ ᐃᐁᐧ ᐊᐱ. “ᐁᑲᐧ ᑕᐡ ᑭᑕᔑᑫᐃᐧᓂᓇᐣ ᐊᔕ ᐃᐧᐸᐨ ᒋᑭᒪᒪᐃᐧᑭᑲᑌᑭᐸᐣ ᒋᐱᐊᓂᑲᐧᐱᑫᓂᑲᑌᑭᐣ.”