ᑕᓀᑕᒥᐃᐁᐧᒪᑲᐣ ᑲᓇᑕ ᐅᑭᒪᐃᐧᐣ $106 ᒥᓫᐃᔭᐣ ᑲᒣᑎᓇᐨ ᔓᓂᔭᐣ ᐃᒪ ᑎᐸᑯᓂᑫᐃᐧᓂᐠ

ᑲᓇᑕ ᐅᑭᒪᐃᐧᐣ ᑲᐱᒧᑕᒪᑫᐨ ᐊᓂᔑᓂᓂᐃᐧ ᑲᓇᐊᐧᐸᒋᑫᐃᐧᓇᐣ ᒥᓇ ᑭᐁᐧᑎᓄ ᒪᒋᑕᐃᐧᓇᐣ (AANDC) $106 ᒥᓫᐃᔭᐣ ᑕᓴᐧᐱᐠ ᑲᑭᐱᒣᑎᓇᐨ ᐃᒪ ᐃᓀᑫ ᐅᓇᔓᐁᐧᐃᐧ ᒪᐃᐧᓀᐡᑯᑕᑎᐃᐧᓂᐠ ᑭᐊᓂᒧᒋᑌᓂ ᐊᑐᐊᐧ ᐁᑲᐧ ᒥᓇ ᑫᐃᐧᓇᐊᐧ ᐃᑭᐁᐧᓂᐊᐧᐠ ᐅᐣᑌᕑᐃᔪ ᐅᑭᒪᑲᓇᐠ.
ᑭᐃᐧᐣᒋᑲᑌ ᐅᑕᓇᐠ ᑲᐡᑲᑎᓄᐱᓯᑦ ᐊᐁᐧ ᐅᑭᒪᐃᐧᐣ ᐁᑭᒣᑎᓇᐨ $106 ᒥᓫᐃᔭᐣ ᑎᐸᑯᓂᑫᐃᐧ ᒣᑎᓂᑫᐃᐧᓂᐠ ᒣᑲᐧᐨ 2012-2013 ᑲᑭᐱᒥᐊᐦᑭᐊᐧᓂᐠ, ᒥᓯᐁᐧ ᐱᑯ ᐃᒪ ᑲᓇᑕ ᐅᑭᒪᐃᐧ ᑲᓇᐊᐸᒋᑫᐃ ᐊᓄᑭᐃᐧᓂᐠ.
ᐁᑲᐧ ᒥᓇ ᑲᓇᑕ ᑲᑎᐸᐦᐃᑫᐦᐃᐁᐧᐨ ᑕᐠᐢ ᑲᐅᒋᐱᒧᒋᑲᑌᐠ ᑫᐃᐧᓇᐊᐧ ᓂᔕᐧ ᑭᐊᓂ ᐊᓂᑫᓭᒪᑲᐣ ᐅᒪᓯᓇᐦᐅᑯᐃᐧᓂᐊᐧᐠ, ᐁᑭᒣᑎᓂᑫᐨ $66 ᒥᓫᐃᔭᐣ ᑕᓴᐧᐱᐠ ᐃᒪ ᑎᐸᑯᓂᑫᐃᐧ ᒣᑎᓂᑫᐃᐧᓂᐠ ᒣᑲᐧᐨ ᐃᐁᐧ ᐊᐱ.
“ᑲᓇᑕ ᑲᑎᐸᐦᐃᑫᐦᐃᐁᐧᐨ ᑕᐠᐢ ᐱᒧᒋᑫᐃᐧᓂᐠ ᒣᑎᓂᑫ $66 ᒥᓫᐃᔭᐣ ᐯᔑᑯᔭᑭ ᐁᑲᐧ ᑭᓇᐃᐧᐟ ᑲᐅᐣᒋ ᐱᒥᑲᓇᐊᐧᐸᒋᑫᑕᒪᑯᔭᐠ, ᔓᓂᔭᐃᐧᑭᒪ ᓇᐣᑕ ᒥᓇ AANDC, ᐅᒣᑎᓇᐣ $106 ᒥᓫᐃᔭᐣ ᐯᔑᑯᔭᑭ ᐁᐅᐣᒋ ᑲᑫᐧᒥᑲᓂᑯᔭᐠ ᑭᒪᐡᑲᐃᐧᓯᐃᐧᓂᓇᐣ,” ᑭᐃᑭᑐ ᐅᐣᑌᕑᐃᔪ ᑭᒋᐅᑭᒪᑲᐣ ᐢᑕᐣ ᐯᕑᑎ. “ᐊᒥᐦᐃᒪ ᐅᑭᒪᐃᐧ ᐱᒧᒋᑫᐃᐧᓂᐠ ᑫᑭᐅᐣᒋ ᐱᒥᐊᓴᐧᐸᒥᑯᔭᑭᐸᐣ ᒥᓇ ᐊᓱᐡᑲᒪᑯᔭᑭᐸᐣ ᑫᒋᓇᐨ ᒋᑭᐅᒋ ᐱᒥᐊᓄᑲᑌᑭᐸᐣ ᐸᑫᐱᐦᐃᑲᓂᐠ 35 (ᑭᒋᐅᓇᔓᐁᐧᐃᐧᓂᐠ, 1982), ᐁᑲᐧ ᑕᐡ ᔕᑯᐨ ᒪᐊᐧᐨ ᑭᒋᒥᐢᑕᐦᐃ ᐁᒣᑎᓇᐊᐧᐨ ᔓᓂᔭᐣ ᐁᑲᑫᐧᒪᒥᑲᑕᒧᐊᐧᐨ ᑭᑌᐸᑫᐣᑕᑯᓯᐃᐧᓂᓇᐣ.”
ᐯᕑᑎ ᐅᑎᔑᐊᐧᐸᑕᐣ ᐅᐁᐧᓂ ᐃᓯᓭᐃᐧᓂ ᐁᐅᐣᒋ ᑲᓇᐊᐧᐸᒋᑫᒪᑲᓂᐠ ᑲᐱᒥᐊᓂᒧᒋᑲᑌᐠ ᐊᐣᑎ ᒪᔭᑦ ᑫᑭᐅᐣᒋ ᑎᐱᓇᐁᐧᐃᐧᓯᒪᑲᐠ ᐊᐦᑭ ᒥᓇ ᐊᐦᑭᑲᐠ ᐅᐣᑎᓂᑫᐃᐧᓇᐣ ᒥᓯᐁᐧ ᑲᓇᑕ ᐊᐦᑭᐠ.
“ᒥᑕᐡ ᐁᔑᑭᑫᐣᑕᒧᐊᐧᐨ ᑭᐡᐱᐣ ᐃᐁᐧ ᐸᑫᐱᐦᐃᑲᐣ 35 ᒪᔭᑦ ᐱᒥᓂᔕᐦᐃᑲᑌᑭᐸᐣ ᒥᓇ ᐅᐣᒋᒪᑕᓄᑲᑌᐠ, ᐊᒥ ᑫᑭᔑᐸᔭᑌᓇᑲᐧᑭᐸᐣ ᐊᐦᑭ ᒥᓇ ᐊᐦᑭᑲᐠ ᐅᐣᑎᓂᑫᐃᐧᓇᐣ ᑌᐯᐧ ᑭᓇᐃᐧᐟ ᐁᑎᐱᓇᐁᐧᐃᐧᓯᔭᐠ ᐁᑲᐧ ᒥᓇ ᐃᐁᐧ ᑲᓇᑕ ᑭᒋᐅᓇᔓᐁᐧᐃᐧᐣ ᑲᐊᓂᒧᒋᑲᑌᐠ, ᑲᐃᐧᓂᐣ ᐃᐧᐣ ᑲᓇᑕ ᐅᑕᔭᓯᐣ ᒪᓂᑐᐃᐧ ᒥᓂᑯᐃᐧ ᑎᐱᓇᐁᐧᐃᐧᓯᐃᐧᓇᐣ,” ᐃᑭᑐ ᐯᕑᑎ. “ᒥᑕᐡ ᐁᑐᑕᑯᔭᐠ ᐁᒥᑲᓂᑯᔭᐠ ᐁᐅᐣᒋᑲᑫᐧ ᔕᑯᑎᓂᑯᔭᐠ ᐃᐧᓇᐊᐧ ᐁᐃᐧᐅᑕᐱᓇᒧᐊᐧᐨ ᒥᓇ ᑭᑎᐱᓇᐁᐧᐃᐧᓯᐃᐧᓂᓇᐣ ᐁᐃᐧᐅᐣᒋ ᑲᑫᐧᑭᐸᑯᐡᑲᒪᑯᔭᐠ ᐁᐃᔑᐃᐧᓂᑯᔭᐠ ᐅᓇᑯᓂᑫᐃᐧᓂᐠ.”
ᐯᕑᑎ ᐃᑭᑐ ᐃᓂᐁᐧᓂᐊᐧᐣ ᑲᓇᑕ ᐅᑭᒪᐃᐧᐣ ᑲᐃᐧᐣ ᒋᓂᓯᑕᐁᐧᑕᑲᐧᓂᐠ ᑫᑯᓀᐣ ᐅᐁᐧᓂ ᑲᐅᐣᒋ ᑲᑫᐧᐃᔑᒋᑫᐨ ᐃᐁᐧ ᑲᐊᐱᒋ ᑯᐸᓯᓇᑯᓯᐊᐧᐨ ᐊᓂᔑᓂᓂᐊᐧᐠ ᒥᔑᐣ ᐊᓂᔑᓂᓂᐃᐧ ᑕᔑᑫᐃᐧᓇᐣ.
“ᒥᑐᓂ ᐊᓂᐊᐣᑯᐡᑲᒪᑲᐣ ᑲᐃᔑᑲᑫᐧᒪᒋᒋᑫᑕᒪᓱᔭᐣᐠ, ᓂᑎᐡᑯᓄᑲᒥᑯᓇᐣ ᐊᓂᑲᐧᐃᓭᐊᐧᐣ, ᓂᐃᐧᑲᐧᐦᐅᐸᓂᓇᐣ ᒪᒋᓭᐊᐧᐣ ᒥᓇ ᐱᑯ ᑲᑭᓇ ᑫᑯᓇᐣ,” ᐯᕑᑎ ᐃᑭᑐ. “ᐁᑲᐧ ᒪᐊᐧᐨ ᑭᒋᒥᐢᑕᐦᐃ ᐁᒣᑎᓂᑫᐊᐧᐨ ᐁᒪᒥᑲᓂᑯᔭᐠ.”
ᐅᑭᒪᐃᐧᓂ ᐊᓄᑭᓇᑲᐣ ᑫᕑᐅᓫᐃᐣ ᐯᓂᐟ ᑲᑭᐃᐧᐣᑕᑭᐸᐣ ᒣᑲᐧᐨ ᒉᐣᐁᐧᕑᐃ ᐱᓯᒧᐣ ᐃᐁᐧᓂ ᐅᓇᔓᐁᐧᐃᐧ ᒪᐃᐧᓀᐡᑯᑕᑎᐃᐧ ᒣᑎᓂᑫᐃᐧᓂ, ᐃᓂᐁᐧᓂᐊᐧᐣ AANDC ᐅᒪᐃᐧᓀᐡᑯᑕᑎᐃᐧᐣ ᑫᑲᐟ ᓂᔕᐧ ᒥᓂᑯᐠ ᐁᐃᐡᐸᓂᐠ ᐊᐱᐨ ᐃᐧᐣ ᑯᑕᑭᔭᐣ ᑲᔭᓂᐊᓂᑫ ᐃᐡᐸᓂᐠ ᐅᒣᑎᓂᐃᐧᓂᐊᐧ ᑲᓇᑕ ᑲᑎᐸᐦᐃᑫᐦᐃᐁᐧᐨ ᑕᐠᐢ ᐱᒧᒋᑫᐃᐧᓂᐠ.
“ᐃᐁᐧ ᑕᐡ ᒪᐊᐧᐨ ᐁᑲ ᑲᐃᔑᒥᓄᓇᑲᐧᐠ ᑕᐱᐡᑯᐨ ᐁᔑᐊᐧᐸᑕᐦᐃᑯᐊᐧᐨ ᐊᐃᐧᔭᐠ ᓇᐊᐧᐨ ᐃᐧᐣ ᐁᑲ ᒋᐃᐧᒋᐦᐃᑕᐧ ᑲᐃᔑᓇᓄᑌᓭᐊᐧᐨ ᒥᓇ ᑲᐃᔑᐱᐦᐃᑲᑌᐠ ᐅᓇᑯᓂᑫᐃᐧᓂᐠ, ᐁᐧᑎ ᒋᔑᓇᑭᐡᑲᐃᐧᑕᐧ ᐅᓇᑯᓂᑫᐃᐧᑲᒥᑯᐠ ᑕᑯᐨ ᐃᒪ ᒋᔑᒣᑎᓂᑫᐊᐧᐨ,” ᑭᐃᑭᑐ ᐯᓂᐟ. “ᐁᑲᐧ ᐊᐱᐣ ᑲᔕᑯᑕᑯᓂᑕᐧ ᐅᓇᑯᓂᑫᐃᐧᓂᐠ, ᑐᑲᐣ ᐊᐁᐧ ᑲᐊᓂᒧᒪᑲᓄᐨ ᐯᔑᐠ ᐅᐡᑲᑎᐢ ᒥᑐᓂ ᑲᒪᑭᐱᒪᑎᓯᐨ, ᐅᑭᒪᐃᐧᐣ ᑭᑲᑫᐧᑌᐧ ᑭᑕᐧᑦ ᒥᓇᐊᐧ ᒋᑲᓇᐊᐧᐸᒋᑲᑌᓂᐠ ᑲᑭᐃᔑ ᑭᔕᑯᓂᑲᓂᐊᐧᓂᐠ.”
ᐯᓂᐟ ᐅᓄᐁᐧᓂᐊᐧᐣ ᑲᑭᐊᓂᒧᒪᐨ ᒉᕑᐊᒥ ᒥᐊᐧᓯᑫ, ᐊᓂᔑᓂᓂᐃᐧ ᐅᐡᑲᑎᓴᐣ ᐁᐧᑎ ᐁᑲᐯᔑᓂᐨ ᐱᐠᑐ ᓫᐊᐣᑎᐣᐠ, ᒥᐠᒪ ᐊᓂᔑᓂᓂᐃᐧ ᑕᔑᑫᐃᐧᓂᐠ ᓄᐸ ᐢᑯᔕ ᐊᐧᐸᓄᐠ ᐃᓀᑫ.
ᐊᐧᐁᐧ ᒥᐊᐧᓯᑫ ᐃᓇᐱᓀ ᐅᐃᐧᐣᑎᐱᐠ ᒥᓇ ᐅᐃᐧᔭᓯᐱᒪᑎᓯᐃᐧᓂᐠ ᐁᓂᐳᐃᐧᐡᑲᐨ, ᐅᒪᒥᑐᓀᒋᑲᓂᐠ ᑕᓇᐱᓀ, ᐊᐧᐃᐧᑲᓂᔭᐱᐠ ᑭᐊᐧᓂᑭ ᒥᓇ ᐃᐧᐣᑎᐱᐠ ᓂᐱᐃᐧᑕᒪᑲᓂ. ᐅᒪᒪᒪᐣ ᑲᑭᐱᒥ ᑲᓇᐁᐧᓂᒥᑯᐸᐣ, ᑭᓂᐳᐃᐧᓭᐊᐧᐣ 2000 ᑲᔭᑭᐊᐧᓂᐠ.
ᐯᓂᐟ ᑭᐃᑭᑐ ᐃᒪ ᑲᓇᑕ ᑎᐸᑯᓂᑫᐃᐧᑲᒥᑯᐠ ᐊᔕ ᑭᐅᐣᒋ ᑲᓄᓇᑲᓄᐸᐣ ᑲᓇᑕ ᐅᑭᒪᐃᐧᐣ ᐃᐧᐣ ᐁᑲᓇᐊᐧᐸᒥᑯᐨ ᒋᐸᒥᐦᐊᐨ ᒥᐊᐧᓯᑫ, ᐃᒪ ᓇᐣᑕ $3,800 ᐯᔑᑯᐱᓯᑦ ᒋᐱᒥ ᐸᒥᐦᐊᐨ, ᐁᑲᐧ ᔕᑯᐨ ᐅᑭᒪᐃᐧᐣ ᑲᐃᐧᐣ ᐃᐁᐧ ᐅᐃᐧᑐᑕᓯᐣ ᑭᑲᑫᐧᑌᐧ ᑕᐡ ᒋᑭᐊᐣᑎᓂᑲᑌᓂᑭᐸᐣ ᑲᑭᔑ ᑭᔕᑯᓂᑲᓂᐊᐧᓂᐠ.
ᐯᓂᐟ ᑭᐃᑭᑐ ᐊᐧᐁᐧ AANDC ᐊᔕ ᐊᐊᐧᔑᒣ $200,000 ᑭᒣᑎᓂᑫ ᑎᐸᑯᓂᑫᐃᐧᓂᐠ ᑲᑭᐃᔑᐃᐧᑐᐨ ᐁᑲ ᑲᐃᐧᐸᒥᐦᐊᐨ ᒥᐊᐧᓯᑫᐣ ᒥᓇ ᐅᒪᒪᒪᐣ.
“ᐊᐧᐁᐧ ᐊᐊᐧᔑᐡ ᒥᓇ ᐅᒪᒪᒪᐣ, ᐁᑲ ᑫᐃᐧᐣ ᑲᑭᐸᒥᐦᐃᑎᓱᐨ, ᑲᐯᔑᐊᐧᐠ ᐃᐡᑯᓂᑲᓂᐠ,” ᐯᓂᐟ ᐃᑭᑐ. “ᔐᒪᐠ ᐃᑯ ᑕᑭᐃᓯᓭᓂᐸᐣ ᒋᑭᑎᐸᐦᐃᑲᑌᓂᑭᐸᐣ ᐅᐸᒥᐦᐃᑯᐃᐧᓂᐊᐧ. ᐁᑲᐧ ᑲᐃᐧᐣ ᐃᐁᐧ ᐅᑭᒪᐃᐧᐣ ᐅᐃᐧᑐᑕᓯᐣ, ᐃᒪ ᑎᐸᑯᓂᑫᐃᐧᓂᐠ ᑭᑲᑫᐧᑌᐧ ᒋᐅᒋ ᑎᐸᐦᐃᑲᑌᓂᐠ.”
AANDC ᑲᐃᐧᐣ ᒪᔭᑦ ᒋᑭᐅᐣᒋ ᓇᑫᐧᑕᐠ ᐅᐁᐧᓂ ᑲᑭᐃᔑᐊᓂᒧᒥᑯᐨ ᐯᓂᐟᐅᐣ. ᐁᑲᐧ ᒥᐡᑲᐨ, AANDC ᐊᓄᑭᓇᑲᐣ ᐅᑭᐊᓂᒧᑕᐣ ᐅᑕᓇᐠ ᐅᑭᒪᐃᐧᐣ ᑲᑭᐱᔑᒪᒣᑎᓂᑫᐸᐣ ᑎᐸᑯᓂᑫᐃᐧ ᒣᑎᓂᑫᐃᐧᓂ, ᐁᑭᐃᑭᑐᐨ: “ᐃᒪ ᐃᓀᑫ ᐸᑫᐱᐦᐃᑲᓂᐠ 35 ᑎᐯᐣᑕᑯᓯᐃᐧᓇᐣ, ᓂᑕᓂᑲᓇᐊᐧᐸᑕᒥᐣ ᐅᐡᑭᑫᑯᓇᐣ ᐁᑲᐧ ᑕᐡ ᒥᐢᑕᐦᐃ ᓂᑐᒋᐊᐯᓂᒧᒥᐣ ᒋᐅᒋ ᓇᑕᒪᑯᔭᐠ ᑎᐸᑯᓂᑫᐃᐧ ᐱᒧᒋᑫᐃᐧᓂᐠ ᑲᐃᔑᑲᓇᐊᐧᐸᒋᑫᒪᑲᐠ ᐅᑭᒪᐃᐧ ᓂᑲᓂᑕᒪᑫᐃᐧᐣ. ᑲᓇᑕ ᑭᒋᑎᐸᑯᓂᑫᐃᐧᑲᒥᑯᐠ ᑲᐅᐣᒋ ᑭᔕᑯᓂᑲᓂᐊᐧᐠ ᐸᐸᑲᐣ ᑫᑯᓇᐣ ᒥᐦᐃᒪ ᐁᐅᐣᒋᓭᑭᐣ ᒋᐸᔭᑌᓇᑯᒋᑲᑌᑭᐣ ᒥᓇ ᒋᓇᓇᑲᒋᒋᑲᑌᑭᐣ ᑫᐃᔑᓇᑲᐧᓂᑭᐣ ᐅᓄᐁᐧᓂᐊᐧᐣ ᐊᓂᔑᓂᓂᐃᐧ ᑌᐸᑫᐣᑕᑯᓯᐃᐧᓇᐣ.”
ᑲᑭᐸᑭᑎᓇᐠ ᐅᒪᓯᓇᐦᐃᑲᐣ ᑲᐃᐧᐣ ᑲᑭᓇ AANDC ᐅᑎᐸᑯᓂᑫᐃᐧ ᒣᑎᓂᑫᐃᐧᓇᐣ ᒋᐅᒋᐃᐧᐣᑕᑭᐣ ᐅᓇᑕᒪᓱᐃᐧ ᒪᐃᐧᓀᐡᑯᑕᑎᐃᐧᓂᐠ, ᔕᑯᐨ ᑭᒪᓯᓇᐦᐃᑲᑌᓂ $73.3 ᒥᓫᐃᔭᐣ ᑕᓴᐧᐱᐠ ᐁᑭᒣᑎᓂᑫᐨ ᑎᐸᑯᓂᑫᐃᐧ ᐊᔭᒥᑕᒪᑫᐃᐧ ᒣᑎᓂᑫᐃᐧᓂᐠ ᐁᑲᐧ ᒥᓇ $30.1 ᑭᒣᑎᓂᑫᐊᐧᐠ ᑲᑭᐊᓄᑭᐦᐊᐊᐧᐨ ᐅᑕᔭᒥᑕᒪᑫᐠ.