ᐸᑯᓭᓂᒧᐃᐧᓂᐠ ᑲᐊᓄᑭᑕᒪᑫᐊᐧᐨ ᐅᑭᑎᐸᒋᒧᑕᐊᐧᐊᐧᐣ ᒥᓯᐁᐧᑲᒥᐠ ᐃᓯᓭᐃᐧᓇᐣ ᑲᓇᓇᑲᒋᑐᐨ ᐅᐡᑲᑎᓯᐃᐧ ᐊᓂᒥᓭᐃᐧᓇᐣ

ᒣᑲᐧᐨ ᐅᐱᒪᐊᒧᐃᐧᐱᓯᑦ, ᔪᓇᔾᓂᐟ ᓀᔑᐣᐢ ᒥᓯᐁᐧᑲᒥᐠ ᑲᒪᒪᐃᐧᑲᓇᐊᐧᐸᑕᒧᐊᐧᐨ ᓇᓇᑐᐠ ᐃᓯᓭᐃᐧᓇᐣ ᑲᓇᓇᑲᒋᑐᐨ ᒉᒥᐢ ᐊᓇᔭ ᑭᐸᐸᒥᑭᐅᑫ ᑲᓇᑕ ᐁᑭ ᓇᓇᑕᐃᐧᑭᑫᐣᑕᐠ ᐊᓂᔑᓂᓂᐃᐧ ᐃᓯᓭᐃᐧᓇᐣ.
ᐁᑲᐧ ᒣᑲᐧᐨ ᑲᑭᐸᐸᒥᔭᐨ, ᐅᑭᓇᑭᐡᑲᐊᐧᐣ ᑲᓂᑲᓂᑕᒪᑫᐊᐧᐨ ᐃᒪ ᐊᓂᔑᓂᓂᓇᐠ, ᐃᓄᐃᐟ ᐁᑲᐧ ᒥᓇ ᐃᐧᓴᑯᑌᐃᐧᓂᓂᓇᐠ, ᐱᒧᒋᑫᐃᐧᓇᐣ ᒥᓇ ᐱᑯ ᑲᐸᐯᔑᑯᐊᐧᐨ ᐅᒪ ᑌᐱᐸᐦᐃ ᑲᓇᑕ ᐊᐦᑭᐠ. ᐁᑲᐧ ᒥᓇ ᑕᐣᑐᕑ ᐯ ᑲᑕᑲᐧᐠ ᐊᓄᑭᐃᐧᑲᒥᐠ (FOH) ᐊᒥ ᐅᑯᐁᐧᓂᐊᐧᐠ ᐯᔑᐠ ᑲᑭᓇᑭᐡᑲᑯᐨ ᐊᓇᔭ ᐁᐧᑎ ᐊᑐᐊᐧ ᒣᑲᐧᐨ ᐯᔑᑯᐱᒥᑯᓇᑲ ᑲᑭᐸᐸᒥᔭᐨ ᑲᓇᑕ ᐊᐦᑭᐠ.
ᐅᐁᐧ FOH ᐱᒧᒋᑫᐃᐧᐣ ᐊᒥᐁᐧ ᒪᐊᐧᐨ ᓂᐢᑕᑦ ᐁᑭᒪᐊᐧᑐᐡᑲᐦᐃᐁᐧᐊᐧᐨ ᓄᑯᑦ ᑲᑭᐊᐦᑭᐊᐧᓂᐠ ᐃᒪ ᑕᐣᑐᕑ ᐯ 150 ᐅᐡᑲᑎᓴᐠ ᑭᓇᑐᒪᐊᐧᐠ ᐁᐧᑎ 91 ᐊᓂᔑᓂᓂᐃᐧ ᑭᐁᐧᑎᓄᐠ ᐅᐣᑌᕑᐃᔪ ᑕᔑᑫᐃᐧᓇᐣ ᐁᑭᐱᐅᐣᑐᓭᐊᐧᐨ. ᒣᑲᐧᐨ ᐯᔑᑯᐱᒥᑯᓇᑲ ᑲᑭᒪᐊᐧᒋᐦᐃᑐᐊᐧᐨ, ᐅᐡᑲᑎᓴᐠ ᐅᑭᐊᓂᒧᑕᓇᐊᐧ ᐊᓂᔑᓂᓂᐊᐧᑎᓯᐃᐧᐣ ᒥᓇ ᓂᓯᑕᐁᐧᓂᒥᑎᓱᐃᐧᐣ, ᑭᑭᓄᐦᐊᒪᑫᐃᐧᐣ ᒥᓇ ᑲᐡᑭᐦᐅᐃᐧᐣ ᑫᐅᐣᒋᑲᒋᑎᓂᑲᑌᐠ, ᒣᑕᐁᐧᐃᐧᐣ ᒥᓇ ᐱᒧᒋᑫᐃᐧᐣ, ᑲᐃᔑᐱᒧᒋᑲᑌᐠ ᐃᐧᒋᐦᐃᐁᐧᐃᐧᐣ ᒥᓇ ᐊᑯᓯᐃᐧ ᐃᐧᒋᐦᐃᐁᐧᐃᐧᐣ. ᐁᑲᐧ ᐊᐱᐣ FOH ᐅᑭᐊᓂᔑ ᐸᑭᑎᓇᓇᐊᐧ ᑲᑭᐃᔑᒥᑭᑫᐊᐧᐨ ᑫᑯᓇᐣ ᑲᑭᒪᐊᐧᒋᐦᐃᐁᐧᐊᐧᐨ ᐁᐧᑎ ᑲᐅᓇᑐᐊᐧᐨ ᐅᓇᑯᓂᑫᐃᐧᓇᐣ ᐊᓂᔑᓂᓂᑲᐠ, ᑲᓇᑕ ᐅᑭᒪᐅᓂᐠ, ᐅᐣᑌᕑᐃᔪ ᐅᑭᒪᐅᓂᐠ ᒥᓇ ᐅᑌᓇᐃᐧᑭᒪᐃᐧᓂ ᐱᒧᒋᑫᐃᐧᓇᐣ. ᐁᑲᐧ ᒥᓇ ᐅᐱᒥᐅᔑᑐᓇᐊᐧ ᐅᑎᐸᒋᒧᐃᐧᓂᑫᐃᐧᓂᐊᐧ ᑕᓯᐣ ᑫᑯᓇᐣ ᑲᑭᐊᓂᒧᒋᑲᑌᓂᑭᐣ ᓯᑲᐧᓄᐠ ᑲᑭᒪᐊᐧᒋᐦᐃᑎᓇᓂᐊᐧᐠ.
FOH ᐅᐡᑲᑎᓴᐠ ᑲᓂᑲᓂᐡᑲᒪᑫᐊᐧᐨ ᐊᔭᒥᐃᐧᓂᐠ ᒍᓫᐁᐣ ᒍᕑᐅᑐ ᒥᓇ ᔪᑯ ᐊᐯᕑᐊ, ᐃᒪ ᐅᐣᑌᕑᐃᔪ ᑲᑲᓄᒋᑫᑕᒪᐊᐧᐊᐧᐨ ᐊᐊᐧᔑᔕᐣ ᒥᓇ ᐅᐡᑲᑎᓴᐣ, ᑫᐃᐧᓇᐊᐧ ᐃᒪ ᑭᐊᔭᐊᐧᐠ ᑲᑭᐃᔑ ᒪᐊᐧᒋᐦᐃᑎᓇᓂᐊᐧᐠ ᐁᑭᑎᐸᑐᑕᒧᐊᐧᐨ ᐅᒥᑭᑫᐃᐧᓂᐊᐧ ᒣᑲᐧᐨ ᐅᐱᒪᐊᒧᐃᐧᐱᓯᑦ 14.
“ᓂᑭᒪᒪᐃᐧᓇᒥᐣ ᑲᐸᐸᑭᑎᓇᒪᐣ ᓂᑎᐸᒋᒧᐃᐧᓂᓇᐣ ᐯᔑᑲᐧ ᒥᑕᓱᑎᐸᐦᐃᑲᓀᐢ ᒋᐱᒥᑲᑭᑐᔭᐠ,” ᐃᑭᑐ ᐊᐯᕑᐊ. “ᓂᑭᐊᐧᐃᐧᐣᑕᒥᐣ ᑲᐃᔑᓇᓇᑭᐡᑲᒧᐊᐧᐨ ᑫᑯᓇᐣ ᐅᐡᑲᑎᓴᐠ, ᐸᐸᑲᐣ ᑫᑯᓇᐣ ᑲᑭᐃᐧᐣᑕᒧᐊᐧᐨ ᐅᐡᑲᑎᓴᐠ ᑫᑭᑐᒋᑲᑌᑭᐸᐣ, ᐁᐧᑎ ᓂᑲᐣ ᑫᓂᔑᐅᓇᑫᒋᔭᐠ, ᐁᑲᐧ ᒥᓇ ᓂᑎᐸᒋᒧᐃᐧᓂᑫᐃᐧᓂᓇᐣ.”
ᒍᕑᐅᑐ ᐃᑭᑐ ᐅᑎᐸᒋᒧᐃᐧᓂᐊᐧ ᑕᐸᑭᑎᓂᑲᑌᓂ ᐊᐱ ᒉᐣᐁᐧᕑᐃ ᐱᓯᒧᐣ, ᐊᔑᐨ ᐊᓄᑭᐃᐧ ᐅᓇᒋᑲᐣ.
“ᓇᐱᐨ ᐸᑭ ᓂᑭᑎᐸᒋᒧᒥᐣ,” ᒍᕑᐅᑐ ᐃᑭᑐ ᑲᑭᓇᑭᐡᑲᐊᐧᐊᐧᐨ ᐊᓇᔭᐊᐧᐣ. “ᓇᐱᐨ ᑭᐊᓂᒪᐣ ᐯᔑᑯᐊᐦᑭ ᓂᑕᓄᑭᐃᐧᓂᓇᐣ ᒋᒥᓯᐁᐧ ᑎᐸᑐᑕᒪᐠ ᐃᒪ ᐯᔑᐠ ᓇᑭᐡᑲᑐᐃᐧᓂᐠ ᔕᑯᐨ ᑲᑭᓇ ᓂᑭᐸᑭᑎᓇᒥᐣ ᒪᔭᑦ ᑲᐃᐧᑎᐸᑐᑕᒪᑭᐸᐣ. ᒪᐊᐧᐨ ᓂᑭ ᑭᒋᐃᓂᑕᑯᒥᐣ ᑲᑭᐃᓇᒋᒧᑕᐊᐧᔭᐠ ᑕᓯᐣ ᑲᓇᑭᐡᑲᒧᐊᐧᐨ ᐅᐡᑲᑎᓴᐠ ᐊᓂᔑᓂᓂᐃᐧ ᑕᔑᑫᐃᐧᓇᐣ. ᓂᑭᐃᐧᐣᑕᒪᑯᒥᐣ ᑲᐧᔭᐠ ᐁᑐᑕᒪᐣᐠ ᐣᑕᓄᑭᐃᐧᓂᓇᐣ.”
ᒍᕑᐅᑐ ᐃᑭᑐ ᐊᓇᔭ ᐅᑭᐃᑯᐊᐧᐣ ᐁᒥᓇᐧᔑᓂᐠ ᑲᑐᑕᒧᐊᐧᐨ FOH ᐁᑲ ᑲᐊᐯᓂᒧᐣᑕᑫᐊᐧᐨ ᑲᑭᓇ ᑫᑯᐣ ᒋᑐᒋᑫᑕᒪᐃᐧᐣᑕᐧ.
“ᐅᓴᒥᑯ ᓂᑎᓇᓄᑭᒥᐣ ᐁᔭᓄᑲᑕᒪᐠ ᑫᐃᔑᒥᓄᓭᐠ ᐃᐧᑕᓄᑭᒥᑐᐃᐧᓂᐠ ᒋᐃᐧᒋᐦᐃᑯᐊᐧᐨ ᐊᓂᔑᓂᓂᐃᐧ ᐅᐡᑲᑎᓴᐠ ᒥᓇ ᓂᓇᓇᑐᓇᒥᐣ ᑫᐃᐧᒋᐦᐃᐁᒪᑲᑭᐣ ᑲᑭᐊᓂᒧᒋᑲᑌᑭᐣ FOH ᒪᐊᐧᒋᐦᐃᑐᐃᐧᓂᐠ,” ᑭᐃᑭᑐ.
ᐊᐯᕑᐊ ᑭᐃᑭᑐ ᐅᒪ FOH ᐱᒧᒋᑫᐃᐧᓂᐠ ᑭᐅᐣᒋ ᓇᓇᑭᐡᑲᐊᐧᐊᐧᐠ ᐸᐸᑲᐣ ᐱᒧᒋᑫᐃᐧᓇᐣ ᒥᓇ ᐱᑯ ᐸᐸᑲᐣ ᐊᐃᐧᔭᐠ ᑲᑲᐡᑭᐦᐅᐊᐧᐨ ᒋᐃᐧᒋᐦᐊᐊᐧᐨ ᐊᓂᔑᓂᓂᐊᐧᐣ.
“ᒪᐊᐧᐨ ᐃᑯ ᐅᒋᑫᐣᑕᓇᐊᐧ ᒋᐊᐧᐃᐧᒋᐦᐃᐁᐧᐊᐧᐨ, ᐃᑭᑐ. ᐯᔑᑲᐧᔦᐠ ᑕᐡ ᐃᔑᐊᓂᒥᓭ ᐸᓂᐢᑫᐧ ᐅᐡᑲᑎᓯᐃᐧ ᐃᐧᒋᐦᐃᐁᐧᐃᐧᐣ ᒋᑭᐊᓄᑲᑕᒧᐊᐧᐸᐣ, ᐊᐯᕑᐊ ᑭᐃᑭᑐ.
“ᒥᔑᐣ ᐊᐃᐧᔭᐠ ᐸᐸᑲᐣ ᑫᑯᓇᐣ ᑐᑕᐣᑕᒥ ᒪᒥᑐᓀᑕᓇᐊᐧ ᑐᑲᐣ ᒣᑎᓂᑫᐃᐧᓇᐣ ᒥᓇ ᑯᑕᑭᔭᐣ ᑫᑯᓇᐣ ᑲᐊᓂᐸᐱᒥᑲᑭᔑᑲᓂᐠ, ᔕᑯᐨ ᓂᐸᑯᓭᒪᒥᐣ ᐁᑲ ᒋᑭᐊᐧᓂᑫᐣᑕᐊᐧᐊᐧᐸᐣ ᑲᑭᐊᓂᒧᒪᔭᑭᑕᐧ.”
“ᓇᐱᐨ ᑲᔦ ᐊᓂᒪᐣ ᒋᑭᐅᐣᒋ ᓂᓯᑐᑕᒧᓂᑕᐧᐸᐣ ᐊᐃᐧᔭᐠ ᑕᓯᐣ ᑫᑯᓇᐣ ᑲᔭᓂ ᐅᓀᒋᑲᑌᑭᐣ, ᑲᑭᓇ ᑫᑯᓇᐣ ᒥᓯᐁᐧ ᐊᐧᑲᐦᐃ ᑲᐃᔑᐡᑲᒪᑲᑭᐣ, ᑫᒋᐊᐧᐠ ᐃᒪ ᐁᐅᐣᒋ ᐸᑭᑌᐡᑲᑯᐊᐧᐨ ᐊᐃᐧᔭᐠ ᒥᓇ ᐱᑯ ᑫᐃᐧᓇᐊᐧ ᐅᑐᒋᐸᑭᑌᐡᑲᑯᓇᐊᐧ ᐊᐊᐧᔑᔕᐠ ᒥᓇ ᐅᐡᑲᑎᓴᐠ,” ᐃᑭᑐ.
ᒍᕑᐅᑐ ᑭᐃᑭᑐ ᐊᓇᐃᐧᐣ ᐅᐁᐧ FOH ᐱᒧᒋᑫᐃᐧᐣ ᑭᐅᐣᒋᒪᒋᒋᑲᑌᐸᐣ ᑭᐁᐧᑎᓄᐠ ᐅᐣᑌᕑᐃᔪ ᒥᓇ ᐃᔑᐱᒧᒋᑫᒪᑲᐣ ᐁᐊᓄᑲᒋᑲᑌᑭᐣ ᑫᐅᒋ ᑲᑫᐧᐃᐧᒋᐦᐃᑕᐧ ᐅᐡᑲᑎᓴᐠ ᐃᒪ ᐊᐧᑲᐦᐃ ᑲᑲᐯᔑᐊᐧᐨ, ᒥᑕᐡ ᐃᒪ ᑫᐃᐧᐣ ᐁᔑᒪᐡᑲᐁᐧᐣᑕᐠ ᒋᔭᓂᒥᓄᐡᑲᒪᑲᓂᐠ ᐅᐁᐧᓂ ᒪᒪᐃᐧᓄᐃᐧᓂ.
“ᓴᑫᐣ ᒪᐃᐧᐣ ᐅᒪ FOH ᑕᐃᔑᐊᐧᐸᐣᑕᐦᐃᐁᐧᒪᑲᐣ ᒋᐅᒋ ᑭᑭᓇᐊᐧᐸᑕᐦᐃᑯᐊᐧᐨ ᑫᐃᓇᐊᐧ ᐃᐁᐧ ᒋᐃᔑᐱᒧᒋᑫᐊᐧᐨ ᑯᑕᑭᔭᐠ ᐸᐸᑲᐣ ᐊᓂᔑᓂᓂᐊᐧᐠ ᑲᓇᑕ ᐊᐦᑭᐠ ᑲᑲᐯᔑᐊᐧᐨ,” ᒍᕑᐅᑐ ᐃᑭᑐ.
ᐊᐯᕑᐊ ᑭᐃᑭᑐ ᓇᐱᐨ ᑭᒋᓀᑕᑲᐧᐣ ᒋᑭᑫᒋᑲᑌᐠ ᐅᐁᐧᓂ ᒪᔭᑦ ᑲᐃᔑᐱᒧᒋᑫᐨ FOH ᐊᓄᑭᐃᐧᓂᐠ ᐁᐃᐧᐅᐣᒋ ᓇᓇᑕᐃᐧᑭᑫᓂᒥᑕᐧ ᒥᓇ ᐁᐃᐧᑕᓄᑕᐃᐧᐣᑕᐧ ᐊᓂᔑᓂᓂᐃᐧ ᐅᐡᑲᑎᓴᐠ ᑲᐊᐃᓯᓭᐊᐧᐨ ᐁᐧᑎ ᑭᐁᐧᑎᓄᐠ ᐅᐣᑌᕑᐃᔪ ᑲᑲᐯᔑᐊᐧᐨ.”
“ᒥᔑᐣ ᐅᐡᑲᑎᓴᐠ ᐸᐯᔑᑲᐧᐣ ᐃᓯᓭᐃᐧᓇᐣ ᐅᓇᑭᐡᑲᓇᐊᐧ, ᐊᓇᐃᐧᐣ ᐁᐧᑎ ᐱᑯ ᐅᓴᑦ ᓂᑎᔑᐊᓄᑭᑕᒪᑫᒥᐣ ᑭᐁᐧᑎᓄᐠ ᐅᐣᑌᕑᐃᔪ, ᔕᑯᐨ ᑲᐅᐣᒋᓭᑭᐣ ᒥᓇ ᑲᐃᔑᓇᓇᑭᐡᑲᒧᐊᐧᐨ ᐯᔑᑲᐧᐣ ᐃᑯ ᑫᑲᐟ ᐃᓯᓭᐊᐧᐠ ᑯᑕᑭᔭᐠ ᐸᐸᑲᐣ ᐅᐡᑲᑎᓴᐠ ᒥᓯᐁᐧ ᑌᑎᐸᑲᒥᐠ,” ᐊᐯᕑᐊ ᑭᐃᑭᑐ.
ᒥᓇᐊᐧ ᑭᐊᓂᑭᑐ ᐃᒪ FOH ᐊᓄᑭᐃᐧᓂᐠ ᐅᐱᒥᐅᓇᑐᓇᐊᐧ ᑫᐃᔑᓇᑲᐧᐠ ᐊᓄᑭᐃᐣ ᒥᓇ ᑎᐸᒋᒧᐃᐧᐣ.
“ᐁᐧᑎ ᐯᔓᐨ ᐊᓂᓂᑲᐣ ᓂᑲᐅᓇᑐᒥᐣ ᒋᐃᐧᑕᓄᑭᒥᑯᔭᑭᑕᐧ ᐸᐸᑲᐣ ᐱᒧᒋᑫᐃᐧᓇᐣ ᒥᓇ ᑕᔑᑫᐃᐧᓇᐣ, ᐸᐸᒥᓯᐃᐧᓇᐣ ᒥᓇ ᐅᓂᑲᓂᑕᒪᑫᐃᐧ ᐱᒧᒋᑫᐃᐧᓇᐣ ᐊᔑᐨ,” ᐊᐯᕑᐊ ᑭᐃᑭᑐ. “ᓂᐃᐧᑲᑫᐧᑐᑕᒥᐣ ᒋᔭᓂᐊᐧᑲᐃᐧᒪᑲᐠ ᒋᔭᓄᒋ ᑭᑫᐣᑕᒧᐊᐧᐨ ᐊᐃᐧᔭᐠ ᑎᐸᒋᒧᐃᐧᐣ ᐁᑕᑲᐧᐠ, ᐁᑲᐧ ᒥᓇ FOH ᐱᒧᒋᑫᐃᐧᐣ ᐁᑕᑲᐧᐠ, ᒋᑭᑫᐣᑕᒧᐊᐧᐨ ᐁᐊᔭᐊᐧᐨ ᐊᓂᔑᓂᓂᐃᐧ ᐅᐡᑲᑎᓴᐠ ᒋᒥᓄᓭᓂᐠ ᐅᑕᔑᑫᐃᐧᓂᐊᐧᐠ.”
ᐱᑯ ᐊᐁᐧᓀᐣ ᑲᓇᓇᑐᓇᐠ ᒋᑭᐃᐧᒋᑕᐧᐸᐣ ᐅᒪ FOH ᐱᒧᒋᑫᐃᐧᓂᐠ ᓇᐣᑕ ᐃᐧᐊᓱᐡᑲᒪᑫᐨ ᑲᐃᔑᐱᒧᒋᑫᒪᑲᓂᐠ, ᐊᐯᕑᐊ ᑭᐃᑭᑐ ᐃᒪ ᑎᐸᒋᒧᐃᐧᓂᐠ ᒪᐊᐧᐨ ᐃᔑᒥᓄᓭ ᒋᐅᒋ ᑲᒋᑎᓇᑲᓄᐊᐧᐨ.
“ᓂᐸᑭᑎᓇᒥᐣ ᐸᐸᑲᐣ ᐊᓄᑭᐃᐧᓇᐣ ᑲᐊᓂᑕᐃᐧᓭᓭᑭᐣ ᐅᐡᑲᑎᓴᐠ ᒋᐊᓂᓇᓄᑭᐊᐧᐨ, ᐁᑲᐧ ᒥᓇ ᐅᐡᑭᑎᐸᒋᒧᐃᐧᓇᐣ. ᑭᐡᐱᐣ ᓇᑕᐁᐧᐣᑕᒪᐣ ᐊᓱᐡᑲᒪᑯᐃᐧᐣ ᒥᐦᐃᒪ ᑕᓴᐧ ᐁᔑᐸᑭᑎᓇᒪᐠ ᒋᐊᐧᐸᒋᑲᑌᑭᐣ,” ᐊᐯᕑᐊ ᐃᑭᑐ.
FOH ᐱᒧᒋᑫᐃᐧᐣ ᑲᒥᑲᓇᐊᐧ ᐱᐊᐧᐱᑯ ᒪᓯᓇᐦᐊᒪᑐᐃᐧᓂᐠ ᐅᒪ (@FOHTbay) ᐁᑲᐧ ᒥᓇ ᑲᐅᒋᐊᐧᐸᒋᑲᑌᑭᐣ ᐅᑎᐸᒋᒥᑎᓱᐃᐧᓂᐊᐧ ᐊᐃᐧᔭᐠ ᐅᒪ (Facebook.com/FOHTBAY).