ᐊᐧᔕᐦᐅᐠ ᐅᑭᐅᓇᑐᓇᐊᐧ ᒋᑎᐱᓇᒪᑫᐊᐧᐨ ᐊᓇᐱ ᑫᐱᓇᓇᑕᐁᐧᐣᒋᑲᓂᐊᐧᓂᐠ ᐅᑕᑭᒥᐊᐧᐠ

Create: 12/01/2015 - 19:24

ᐅᑕᓇᐠ ᐅᐁᐧ ᑲᑭ ᓯᑲᐧᓂ ᓇᓇᑕᐁᐧᐣᒋᑲᓂᐊᐧᐠ, ᐊᐧᔕᐦᐅ ᑕᔑᑫᐃᐧᓂᐠ ᑭᐅᓇᑕᒪᑫᐊᐧᐠ ᐊᓇᐱ ᑫᐃᔕᐊᐧᐨ ᐅᓇᓇᑕᐁᐧᐣᒋᑫᐠ ᐸᐸᑲᐣ ᑕᔑᑫᐃᐧᓇᐣ ᑲᐱᐅᐣᑐᓭᐊᐧᐨ ᑲᐃᐧᑕᔑ ᓇᓇᑕᐁᐧᐣᒋᑫᐊᐧᐨ ᐊᐧᔕᐦᐅᐠ ᐊᐱ ᐃᒪ ᑕᔑᑫᐃᐧᓂᐠ ᑲᐅᒋᑎᐯᐣᑕᑯᓯᐊᐧᐨ ᐁᑭᑎᐸᒋᒧᐊᐧᐨ ᐁᑲ ᑲᐃᔑᓇᐦᐊᐸᐣᑕᒧᐊᐧᐨ ᐸᑲᐣ ᐊᐃᐧᔭᐠ ᑲᐸᐱᔕᓂᐨ ᑐᑲᐣ ᐁᐧᓴ ᐁᒥᔑᓄᐊᐧᐨ ᑲᑕᔑᐊᔕᐧᐦᐃᑫᐊᐧᐨ ᒥᓇ ᐁᑲ ᐁᑭᒋᓀᐣᑕᒧᐊᐧᐨ ᐊᐦᑭᓂ ᒥᓇ ᐁᑲ ᐁᑎᐸᐸᒪᐊᐧᐨ ᑯᑕᑭᔭᐣ ᑲᐱᓇᓇᑕᐁᐧᐣᒋᑫᐊᐧᐨ.
ᐊᐣᑭᐢ ᒪᔪᐢ, ᐊᐧᔕᐦᐅ ᐅᓇᔓᐁᐧᐃᐧᓂᓂ, ᑭᐃᑭᑐ ᒣᑲᐧᐨ ᑲᑭᒪᒪᐃᐧ ᒪᐊᐧᒋᐦᐃᑐᐊᐧᐸᐣ ᐅᑕᔑᑫᐃᐧᓂᐠ ᓄᑯᒥᑫ ᑲᔭᐊᓂᐱᐳᓂᐠ, ᐊᑎᐟ ᐃᒪ ᑲᑭᐱᔕᐊᐧᐸᐣ ᒪᐊᐧᒋᐦᐃᑐᐃᐧᓂᐠ ᐅᑭᑲᓄᑕᓇᐊᐧ ᑫᑯᓇᐣ ᐁᑲ ᑲᐃᔑᓇᐦᐁᐣᑕᒥᐦᐃᑯᐊᐧᐨ ᐸᐸᑲᐣ ᑲᐱᐅᐣᑐᓭᐊᐧᐨ ᑲᐱᓇᓇᑕᐁᐧᒋᑫᐊᐧᐨ ᐅᑕᑭᒥᐊᐧᐠ.
“ᐁᐡᑲᑦ ᑭᐱᐃᓯᓭ ᐁᑭᑭᐡᐳᓀᐱᐊᐧᐨ ᑭᐡᐱᐣ ᐁᑲ ᑲᐃᐧᒋᐃᐧᑯᐊᐧᐨ ᐅᑭᑭᓄᐦᐃᑫᐣ, ᐁᑲᐧ ᒥᓇ ᐃᓇᒋᒧᓇᓂᐊᐧᐣ ᐁᐅᔕᐦᐃᑫᐊᐧᐨ ᐃᒪ (ᐊᐧᔕᐦᐅᐃᐧᓂᓂᐊᐧᐠ ᑲᑕᔑᐊᔕᐦᐃᑫᓂᐨ),” ᒪᔪᐢ ᐃᑭᑐ, ᐁᑲᐧ ᒥᓇ ᑭᐃᑭᑐ ᐸᑲᐣ ᑲᐱᐅᐣᑐᓭᐊᐧᐨ ᐅᓇᓇᑕᐁᐧᐣᒋᑫᐠ ᐁᑭᐸᐱᐊᐧᐨ ᑯᑕᑭᔭᐣ ᐅᑕᔕᐧᐦᐃᑲᓂᐠ.
ᒪᐊᐧᐨ ᒥᓇ ᑭᓂᐱ ᑕᒋᐡᑯᑕᑎᓇᓂᐊᐧᐣ ᐯᔓᐨ ᓇᓀᐤ ᐦᐊᐟᓴᐣ ᐯ, ᒣᑲᐧᐨ ᐅᑎ ᒪᐊᐧᐨ ᐊᐱ ᐃᒪ ᐊᐧᔕᐦᐅ ᓯᐱᐠ ᑲᐊᓂᐸᑲᐧᐦᐊᐠ ᐅᓇᓇᑕᐁᐧᐣᒋᑫᐠ ᑲᐊᒋᔑᓄᐊᐧᐨ ᒋᑭᐊᔓᐡᑲᐊᐧᐨ.
ᒥᑕᐡ ᐅᐁᐧ ᑲᑭ ᑭᒋᐊᓂᒧᒋᑲᑌᐠ ᑲᑭᒪᐊᐧᒋᐦᐃᑐᐊᐧᐸᐣ ᐃᑭᐁᐧᓂᐊᐧᐠ ᐊᑲᐧᒋᐠ ᑲᐱᐅᐣᑐᓭᐊᐧᐨ ᐅᓇᓇᑕᐁᐧᒋᑫᐠ ᐁᐊᐧᓂᐡᑫᐧᐱᑐᐊᐧᐨ ᐊᐧᔕᐦᐅᐃᐧ ᐱᑲᐧᑕᑭᓂ.
“ᐃᐁᐧᓂ ᐯᔑᐠ ᑫᑯᓂ ᑲᑭ ᑭᒋᐊᓂᒧᑕᒧᐊᐧᐨ, ᒣᑲᐧᐨ ᐊᐱ ᑫᑲᐟ ᑲᐊᓂᐳᓇᑭᓱᐨ ᒪᑯᐱᓯᑦ (ᐅᑕᓇᐠ ᒥᓄᑲᒥᐠ), ᐃᑭᐁᐧᓂᐊᐧᐠ ᐊᑲᐧᒋᐠ ᑲᑭᐱᐅᐣᑐᓭᐊᐧᐨ ᐅᓇᓇᑕᐁᐧᐣᒋᑫᐠ ᐁᑭᐸᐸᐢᑭᓴᐧᐊᐧᐨ ᓂᐦᑲᐣ ᐊᔕ ᑲᑭᐊᓂᐅᐊᐧᐃᐧᓂᐨ,” ᐃᑭᑐ ᒪᔪᐢ.
ᐁᑲᐧ ᒥᓇ ᑭᐃᓇᒋᒪᑲᓄᐊᐧᐠ ᑲᑭᐱᓇᓇᑕᐁᐧᐣᒋᑫᐊᐧᐨ ᐁᑭᐊᐧᓂᐡᑫᐧᐱᑐᐊᐨ ᓂᐦᑲᐠ ᑲᑭᐃᔑ ᐊᐧᓯᓱᓂᑫᐊᐧᐨ ᒥᓇ ᐊᐧᐊᐧᐣ ᑲᐃᔑᐊᑌᑭᐣ, ᐊᓇᐃᐧᐣ ᒪᔪᐢ ᑭᐃᑭᑐ ᐁᑲ ᐃᐧᑲ ᐁᑭᐅᐣᒋᐊᐧᐸᒪᐨ ᐊᐃᐧᔭᐣ ᐅᐁᐧ ᒋᑐᑕᒥᓂᐨ.
ᐊᐧᔕᐦᐅᐠ ᑲᐅᐣᒋᐊᐧᐨ ᑲᓇᓇᑕᐁᐧᐣᒋᑫᐊᐧᐨ ᐅᐱᒥᓂᔕᐦᐊᓇᐊᐧ ᐁᐅᐣᒋ ᐊᔭᐧᑲᒥᓇᒧᐊᐧᐨ ᐁᑲ ᒋᒐᑭᐦᐊᐊᐧᐨ ᓂᐦᑲᐠ ᑫᒋᓇᐨ ᒥᓇᐊᐧ ᒋᐱᑭᐁᐧ ᑕᑕᑯᓭᐊᐧᐨ ᒥᓇ ᐃᒪ ᒋᐱᑕᔑ ᑭᐁᐧ ᓂᑕᐃᐧᑭᐦᐃᑎᐊᐧᐨ ᑕᓱᔭᑭ.
“ᐊᑎᑲ ᐅᒪ ᑲᐱᑕᔐᐊᐧᐨ ᒥᓇᐊᐧ ᐱᑭᐁᐧᐡᑲᐊᐧᐠ,” ᐃᑭᑐ ᒪᔪᐢ. “ᓄᑯᑦ ᐅᐁᐧ ᑲᑭᓯᑲᐧᐠ ᐣᑭᓂᓴᐠ ᓂᐦᑲᐠ ᐱᐊᐧᐱᑯᓂ ᑲᑭᑭᐣᑕᑯᑲᑌᐱᓱᐊᐧᐨ ᐅᒪ ᑌᑎᐸᐦᐃ ᑲᑭᐅᐣᒋᐦᐊᑲᐧ.”
ᑭᐅᑲᐧᐱᐦᐃᑎᐊᐧᐠ ᑕᐡ ᐁᑭᐅᓀᐣᑕᒧᐊᐧᐨ ᐊᓂᐣ ᑫᑭᑐᑕᒧᐊᐧᐸᐣ ᒪᐡᑯᐨ ᐁᑲ ᒋᑭᐸᑭᑎᓂᑕᐧᐸᐣ ᒋᐱᔕᐊᐧᐨ ᐸᐸᑲᐣ ᑲᐱᐅᐣᑐᓭᐊᐧᐨ ᐅᓇᓇᑕᐁᐧᐣᒋᑫᐠ ᒋᐱᓄᒋ ᓂᐦᑫᐊᐧᐨ ᐃᒪ ᐅᑕᑭᒥᐊᐧᐠ.
ᐊᐱ ᑕᐡ ᑲᑭᐃᐡᑲᐧ ᐊᓂᒧᑕᒪᑐᐊᐧᐨ, ᐊᒥ ᑲᑭᐃᔑ ᒪᒪᐃᐧ ᐅᓀᐣᑕᒧᐊᐧᐨ ᒥᐁᑕ ᐸᓂᒪ ᑭᐸᑭᑎᓂᑕᐧ ᐅᓇᓇᑕᐁᐧᐣᒋᑫᐠ ᒋᐃᔕᐊᐧᐨ ᒪᑯᐱᓯᑦ ᐃᐡᑲᐧ 3 ᐃᓇᑭᓱᓂᐨ.
ᒪᔪᐢ ᑭᐃᑭᑐ ᐅᐁᐧᓂ ᑲᑭᐃᓇᒋᑫᐊᐧᐨ ᐃᒪ ᑕᔑᑫᐃᐧᓂᐠ ᑲᑲᐯᔑᐊᐧᐨ ᐱᓇᒪ ᐃᐧᓇᐊᐧ ᓂᐢᑕᑦ ᒋᔭᓂ ᓇᓂᓴᐊᐧᐨ ᑲᐱᑕᑕᑯᓭᐊᐧᐨ ᒣᑲᐧᐨ ᐊᐱ ᓂᐦᑭᐱᓯᑦ 20 ᑲᐃᓇᑭᓱᓂᐨ. ᐁᑲᐧ ᐃᐧᐣ ᐃᑭᐁᐧᓂᐊᐧᐠ ᓂᐦᑫᓴᐠ ᒥᓇ ᐁᐧᐦᐁᐧᐠ ᐸᓂᒪ ᑲᐊᓂᐳᓇᑭᓱᓂᐨ ᓂᐦᑭᐱᓯᒧᐣ ᓇᐣᑕ ᑲᔭᓂᐅᐡᑲᑭᓱᓂᐨ ᒪᑯᐱᓯᒧᐣ ᐊᓂᔑᑕᑕᑯᓭᐊᐧᐠ.
ᐁᑲᐧ ᒥᓇ ᑕᓇᑕᐁᐧᐣᑕᑯᓯᐊᐧᐠ ᐊᑲᐧᒋᐠ ᑲᐱᐅᐣᑐᓭᐊᐧᐨ ᐅᓇᓇᑕᐁᐧᐣᒋᑫᐠ ᒋᐃᐧᒋᐃᐧᑯᐊᐧᐨ ᐅᑭᑭᓄᐦᐃᑫᐣ, ᑭᐃᑭᑐ ᒪᔪᐢ ᒋᐅᒋ ᑲᓇᐁᐧᐣᒋᑫᐨ ᐁᑲ ᒥᓇᐊᐧ ᐊᐊᐧᔑᒣ ᐅᓄᐁᐧᓂᐊᐧᐣ ᑫᑯᓇᐣ ᒋᐃᓯᓭᑭᐣ ᐁᑲᐧ ᒥᓇ ᐁᑲ ᓇᐣᑕ ᒋᐃᔑᒪᒋᓭᐊᐧᐨ.
ᐅᑭᐅᔑᑐᓇᐊᐧ ᑕᐡ ᐅᒪᓯᓇᐦᐃᑲᓂᐊᐧ ᐊᓇᐱ ᐃᐁᐧ ᑫᐃᔑᐸᑭᑎᓂᑲᑌᐠ ᓇᓇᑕᐁᐧᐣᒋᑫᐃᐧᐣ ᐁᑲᐧ ᐅᑭᐃᔑᓂᔕᐦᐊᓇᐊᐧ ᐯᔓᐨ ᑕᔑᑫᐃᐧᓇᐣ ᑲᐊᔭᑭᐣ.
ᒪᔪᐢ ᑭᐃᑭᑐ ᐅᑯᐁᐧᓂᐊᐧᐠ ᐅᓇᓇᑕᐁᐧᐣᒋᑫᐠ ᑲᑭᐱᓂᑕ ᐅᑐᓭᐊᐧᐨ ᐃᐡᑯᓂᑲᓇᐣ ᑲᓴᐸᓇᑲᐠ, ᑭᒋᓇᒣᑯᓯᑊ ᐃᓂᓂᐊᐧᐠ, ᐊᐧᐃᐧᔦᑲᒪᐠ, ᐊᒋᑯᓴᑲᐃᑲᓂᐠ ᐁᑲᐧ ᒥᓇ ᐊᐧᓇᒪᐣᓴᑲᐃᑲᓂᐠ.
ᐁᑲᐧ ᒥᓇ ᐁᑲ ᒋᐅᒋ ᒥᑯᐡᑲᒋᒋᑲᑌᑭᐣ ᑲᐃᔑᐊᐧᓂᓱᓂᑫᐊᐧᐨ ᒥᓇ ᐊᐧᐊᐧᐣ, ᒪᔪᐢ ᑭᐃᑭᑐ ᐅᑭᐅᓇᑐᓇᐊᐧ ᑫᐱᒥᓂᔕᐦᐃᑲᑌᓂᐠ ᐁᑲ ᒋᐸᐸᐢᑭᓴᐧᐊᐧᐠ ᓂᐦᑲᐠ ᑲᓇᓂᔓᓭᐊᐧᐨ ᒋᐅᒋ ᒪᓇᒋᐦᐃᐣᑕᐧ ᒋᐊᓂ ᐊᐧᓯᓱᓂᑫᐊᐧᐨ ᒥᓇ ᒋᐊᓂᐊᔭᐊᐧᐨ ᐅᓂᐦᑫᓯᒥᐊᐧ.
“ᐁᑯᑲᓄᑫᔭᐣ, ᒥᐦᐅᐁᐧ ᓂᐣ ᑲᐱᔑᑭᑭᓄᐦᐊᒪᑯᔭᐣ ᒋᑐᑕᒪᐣ, ᒥᑕᐡ ᐃᑯ ᐁᓀᐣᑕᒪᐣ ᑫᐃᐧᓇᐊᐧ ᑲᑭᓇ ᐊᐃᐧᔭᐠ ᐯᔑᑲᐧᐣ ᐁᑐᑕᒧᐊᐧᑫᐧᐣ,” ᐃᑭᑐ ᒪᔪᐢ.
ᒣᑲᐧᐨ ᑲᐊᓂᓯᑲᐧᓂᐠ ᑲᓄᒋᐦᐊᐊᐧᐨ ᓂᐦᑲᐣ ᒪᐊᐧᐨ ᐅᑭᒋᓀᐣᑕᓇᐊᐧ ᐃᒪ ᐊᐧᔕᐦᐅᐠ ᑲᑲᐯᔑᐊᐧᐨ. ᒥᐦᐃᒪ ᑲᔦ ᐁᐅᐣᒋ ᐃᐧᒋᐦᐃᑎᓱᐊᐧᐨ ᑲᒪᐊᐧᒋᐦᐊᐊᐧᐨ ᓂᐦᑲᐣ ᐁᐧᓴ ᑲᐃᐡᐸᑭᐣᑌᐠ ᒥᒋᑦ ᐅᑕᑕᐁᐧᐃᐧᑲᒥᑯᐊᐧ.
ᒥᐱᑯ ᐅᐁᐧ ᑲᔭᐡ ᑲᑭᐱ ᐅᐣᒋᐊᓂᑫᑐᑕᒧᐊᐧᐨ ᑭᔭᐱᐨ ᑲᐱᒥᓂᔕᐦᐊᒧᐊᐧᐨ ᐅᒪᐡᑭᑯᐠ ᑲᑲᐯᔑᐊᐧᐨ ᐊᐧᔕᐦᐅᐠ.
“ᑲᐱᐅᐱᑭᔭᐣ, ᒥᐁᑕ ᐅᐁᐧ ᐁᑲᓄᑫᔭᐣ ᐁᐃᓇᐣᒋᑫᔭᐣ - ᑫᑯᓇᐣ ᑲᑭᐅᐣᑎᓇᒪᐠ ᐱᑲᐧᑕᑲᒥᑲᐠ,” ᐃᑭᑐ ᒪᔪᐢ. “ᒥᐦᐅᐁᐧ ᓂᓇᐃᐧᐟ ᐁᔑᓇᑲᐧᐠ ᓂᐱᒪᑎᓯᐃᐧᓂᓇᐣ ᑲᐱᒥᓂᔕᐦᐊᒪᐠ.”