ᐊᐧᐱᑭᑲ ᐅᑭᒪᑲᓀᐢ ᓇᐧᕑᒪᐣ ᐱᕑᐊᐅᐣ ᑫᑕᑕᐃᐧᐣ ᑭᐅᐣᒋᐃᐡᑲᐧᐱᒪᑎᓯ

ᐊᐧᐱᑭᑲᐠ ᑲᑭᐱᐅᑭᒪᑲᓂᐃᐧᐸᐣ ᓇᐧᕑᒪᐣ ᐱᕑᐊᐅᐣ ᑲᓄᑫᐣᑕᐊᐧᑲᓄᐃᐧ ᑲᐯᐦᐃ ᐁᑭᐱᐊᓄᑭᑕᒪᑫᐨ ᐊᓂᐣ ᑫᑭᐃᔑ ᑲᑫᐧ ᑭᐱᑎᓂᑲᑌᑭᐸᐣ ᓂᓯᑎᓱᐃᐧᐣ ᐊᓂᔑᓂᓂᐃᐧ ᑕᓇᐱᐃᐧᓇᐣ.
“ᒣᑲᐧᐨ ᑲᑭᐱ ᓂᑲᓂᑕᒪᑫᐨ, ᒥᐢᑕᐦᐃ ᑭᐱᒥ ᐊᐧᐃᐧᒋᐦᐃᐁᐧ ᐅᑎᐡᑯᓂᑲᓂᐠ ᐊᐧᐱᑭᑲᐠ ᒥᓂᑯᐠ ᑲᑭᐊᓄᑭᑕᒪᑫᐨ ᑲᑲᑫᐧ ᓇᑲᓂᑲᑌᐠ ᓂᓯᑎᓱᐃᐧᐣ ᐁᑲᐧ ᑕᐡ ᓂᑐᒋᓇᓇᑯᒪᒥᐣ ᑲᑭᐱᐃᓇᓄᑭᑕᒪᑫᐨ ᐁᐅᒋ ᑲᓄᑫᑕᐊᐧᑭᑕᐧ ᑲᑭᐱᐊᐧᓂᐦᐊᔭᑭᑕᐧ ᑲᑭᑭᔑᐱᓇᒧᐊᐧᐨ ᐅᐱᒪᑎᓯᐃᐧᓂᐊᐧ ᐁᑲᐧ ᒥᓇ ᒋᐱᒥᐊᓱᐡᑲᐊᐧᑭᑕᐧ ᒋᑭᔭᓄᒋ ᒥᓄᔭᐊᐧᐨ ᑲᑭᐊᐧᓂᐦᐊᐊᐧᐨ ᑲᓴᑭᐦᐊᐊᐧᐨ,” ᑭᐃᑭᑐ ᐊᓂᔑᓇᐯ ᐊᐢᑭ ᑭᒋᐅᑭᒪᑲᐣ ᐦᐊᕑᐱ ᔦᐢᓄ. “ᓇᐧᕑᒪᐣ ᒪᐊᐧᐨ ᒥᐢᑕᐦᐃ ᑭᐱᐊᓄᑭᑕᒪᑫ ᑭᒋᔭᓂ ᒪᐡᑲᐃᐧᓯᒪᑲᓂᐠ ᐅᑕᔑᑫᐃᐧᐣ ᒥᔑᓄᔭᑭ ᑲᑭᐱᓂᑲᓂᑕᒪᑫᐨ ᐁᑲᐧ ᒥᓇ ᒥᐦᐅᐁᐧ ᑫᐃᔑᒪᒥᑲᐃᐧᐣᑕᐊᐧᑲᓂᐃᐧᐨ ᐁᑭᓂᑕᐊᐧᐃᐧᒋᐦᐊᐨ ᐅᑕᓂᔑᓂᓂᒪᐣ.”
ᑲᓇᑕ ᑭᒋᐅᑭᒪᑲᐣ ᔕᐧᐣ ᐁᐃᐣᔓᐟ ᐊᐟᓫᐃᐅ ᐅᑭᐊᓂᒧᒪᐣ ᓇᐧᕑᒪᓄᐣ ᒋᑲᓄᑫᐣᑕᐊᐧᑲᓂᐃᐧᐨ ᐁᑭᒪᐡᑲᐃᐧᑲᐸᐃᐧᑕᐠ ᐅᓂᑲᓂᑕᒪᑫᐃᐧᐣ ᒥᓇ ᐁᑭᐱᒥ ᑲᓄᒋᑫᑕᒪᐊᐧᐨ ᐅᑕᓂᔑᓂᓂᒪᐣ ᒥᓇ ᐱᑯ ᑲᑭᓇ ᐊᓂᔑᓂᓂᐊᐧᐣ.
“ᒥᓂᑯᐠ ᑲᑭᐱᒪᑎᓯᐨ ᒥᐢᑕᐦᐃ ᑫᑯᓇᐣ ᑭᐱᒥᑲᐡᑭᐦᐅ ᑲᑭᐃᔑᐱᒥ ᐊᐧᐃᐧᒋᐦᐊᐨ ᐃᐧᒋᐱᒪᑎᓴᐣ, ᐃᒪ ᐅᑎ ᒪᐊᐧᐨ ᐁᑭᐱᒥᐊᔭᓱᓇᒪᑫᐨ ᑲᓇᑭᐡᑭᑲᑌᓂᐠ ᓂᓯᑎᓱᐃᐧᓂ,” ᑭᐃᑭᑐ ᐊᐟᓫᐃᐅ. “ᐃᐧᐣ ᑕᐡ ᑲᑭᑲᑭᒪᒋᑐᐸᐣ ᒣᑲᐧᐨ ᓄᑯᑦ ᑲᒥᓄᐡᑲᒪᑲᐠ ᑲᑭᐱᔕᐳᐡᑲᒧᐊᐧᐨ ᓂᓯᑎᓱᐃᐧᓂ ᑲᐱᒥ ᒪᐊᐧᒋᐦᐃᑎᐃᐧᓂᑫᐊᐧᐨ ᐊᐧᐱᑭᑲᐠ ᑕᓱᔭᑭ ᐊᔕ ᐊᐊᐧᔑᒣ ᓂᔑᑕᓇ ᑕᓱᐱᐳᐣ. ᐁᑲᐧ ᒥᓇ ᐅᑭᔭᓂᒪᒋᔭᓄᑲᑕᓇᐸᐣ ᑭᑭᓄᐦᐊᒪᑫᐃᐧ ᐱᒧᒋᑫᐃᐧᓂ ᒥᓇ ᐊᓄᑭᐃᐧ ᐱᒧᒋᑫᐃᐧᓂ, ᐊᓂᔑᓂᓂᐃᐧ ᔑᒪᑲᓂᔑᐃᐧ ᐊᓄᑭᑕᒪᑫᐃᐧᓂ, ᐊᐦᑭᐃᐧ ᑲᓇᐁᐧᐣᒋᑫᐃᐧᐣ, ᑎᐱᓇᐁᐧ ᐱᒧᓂᑎᓱᐃᐧᐣ ᐁᑲᐧ ᒥᓇ ᑯᑕᑭᔭᐣ ᒥᔑᐣ ᑫᑯᓇᐣ ᑫᑭᔭᓄᒋᒥᓄᓭᐊᐧᑫᐊᐧᐨ ᐊᓂᔑᓂᓂᐊᐧᐠ. ᑭᒪᐡᑲᐃᐧᑲᐸᐃᐧ ᑲᑭᓂᑲᓂᑕᒪᑫᐨ, ᐅᑲᑭᑕᐁᐧᐣᑕᒧᐃᐧᐣ, ᐅᐸᑭᑎᓂᑎᓱᐃᐧᐣ ᒥᓇ ᐅᒪᐡᑲᐃᐧᓯᐃᐧᐣ ᑲᐃᐧᐣ ᐃᐧᑲ ᑕᐊᐧᓂᑫᐣᒋᑲᑌᓂ. ᓂᒪᒥᑐᓀᓂᒪᒥᐣ ᒥᓇ ᓂᑕᔭᒥᒋᑫᑕᒪᐊᐧᒥᐣ ᑲᓇᑲᓇᐨ ᑲᓴᑭᐦᐊᐨ.”
ᐱᕑᐊᐅᐣ, 63 ᑭᑕᓱᔭᑭᐃᐧᓀ, ᓭᓯᑯᐨ ᑭᐅᐣᒋᐃᐡᑲᐧᐱᒪᑎᓯ ᐁᐧᑎ ᑕᐣᑐᕑ ᐯ ᑭᒋᐊᑯᓯᐃᐧᑲᒥᑯᐠ ᒉᐣᐁᐧᕑᐃ ᐱᓯᒧᐣ 9 ᑲᐃᓇᑭᓱᓂᐨ. ᒪᒪᐤ 21 ᑕᓱᔭᑭ ᑭᐱᐅᑭᒪᓂᐃᐧ ᐅᑎᐡᑯᓂᑲᓂᐠ ᐁᑲᐧ ᐅᑭᒪᑲᓀᓯᐃᐧᐸᐣ ᐊᐱ ᑲᐃᐡᑲᐧᐱᒪᑎᓯᐨ. ᑎᐱᓇᐁᐧ ᐱᒥᐃᐧᓂᑎᓱᐃᐧᐣ, ᐃᐧᒋᐦᐃᑎᓱᐃᐧᐣ ᒥᓇ ᒋᔭᓂ ᐅᓇᒋᑲᓂᐊᐧᐠ ᐁᐧᑎ ᐊᓂᓂᑲᐣ ᑫᓂᐱᒪᑎᓯᓇᓂᐊᐧᐠ ᒥᐦᐅᐁᐧᓂ ᓂᑲᐣ ᑲᑭᑲᓇᐊᐧᐸᑕᐠ ᒥᓇ ᑲᑭᐱᒥᓂᔕᐦᐊᐠ.
“ᒥᑐᓂ ᓂᑯᓯᑯᑌᐦᐁᒥᐣ ᒥᒋᓇᐁᐧᓯᐃᐧᓂᐠ ᑲᑭᐊᐧᓂᐦᐊᔭᐠ ᑲᓴᑭᐦᐊᔭᐠ ᑭᑐᑌᒥᓇᐣ ᒪᐊᐧᐨ ᑲᑭ ᑭᒋᓀᑕᐠ ᐁᐱᒥ ᐊᐧᐃᐧᒋᐦᐊᐨ ᐱᑯ ᐊᐁᐧᓀᓇᐣ ᒋᔭᓂᒥᓄᓭᓂᐨ ᑲᐃᐧᐣ ᐃᑯ ᐁᑕ ᐃᒪ ᐊᐧᐱᑭᑲᐠ ᑲᐅᒋᓂᐨ ᒥᓯᐁᐧ ᐱᑯ ᐊᓂᔑᓇᐯ ᐊᐢᑭ ᑲᐅᐣᒋᓂᐨ,” ᑭᐃᑭᑐ ᔦᐢᓄ. “ᓂᑭᑕᑭᑕᒪᐊᐧᒥᐣ ᒥᓇ ᓂᑐᒋᑭᑭᓇᐊᐧᑌᑕᑯᑐᒥᐣ ᐅᓂᑲᓂᑕᒪᑫᐃᐧᐣ ᐁᑲᐧ ᒥᓇ ᓂᑐᒋᒪᒥᑐᓀᓂᒪᒥᐣ ᒥᓇ ᐊᔭᒥᒋᑫᑕᒪᐊᐧᒥᐣ ᐅᐊᐧᑯᒪᑲᓇᐣ ᒥᓇ ᐱᑯ ᑲᑭᓇ ᐃᒪ ᐊᐧᐱᑭᑲᐠ ᑲᑲᐯᔑᐊᐧᐨ ᒣᑲᐧᐨ ᑲᔭᓂᒣᐣᑕᒧᐊᐧᐨ.”
ᐱᕑᐊᐅᐣ ᐅᑭᒪᐡᑲᐃᐧ ᑌᐯᐧᑕᐣ ᐁᑭᒋᓀᑕᑲᐧᓂᐠ ᑭᑭᓄᐦᐊᒪᑫᐃᐧᓂ ᒥᓇ ᐊᓄᑭᐃᐧ ᐱᒧᒋᑫᐃᐧᓂ - ᐁᑲᐧ ᒥᓇ ᐃᒪ ᑭᓀᐧᐡ ᑭᐱᐊᐱᑕᒪᑫ ᑭᐁᐧᑎᓄᐠ ᐊᓂᔑᓇᐯ ᑭᑭᓄᐦᐊᒪᑫᐃᐧ ᐱᒧᒋᑫᐃᐧᓂᐠ ᒥᓇᐊᐧ ᐃᒪ ᑫᐃᐧᐣ ᑭᐱᐃᐧᒋᐦᐃᐁᐧ ᐊᐃᓇᓀᐤ ᐃᐡᑯᓂᑲᓇᐣ ᑲᑭᐅᐣᒋ ᒪᒋᑐᐊᐧᐸᐣ ᐊᐧᓭᔭ ᐊᓄᑭᐃᐧ ᐱᒧᒋᑫᐃᐧᓂ.
ᐁᑲᐧ ᒥᓇ ᐊᐃᓇᓀᐃᐧᐊᐦᑭ ᑭᐱᓂᑲᓂᐡᑲᒪᑫ ᐊᐱᑕᒪᑫᐃᐧᓂᐠ ᔑᐸᐧᑲᒪ ᐅᑭᒪᑲᓇᐠ ᐱᒧᒋᑫᐃᐧᓂᐠ, ᑲᑭᐅᐣᒋ ᐊᐧᐃᐧᒋᑐᐨ ᒋᒥᓄᐡᑲᒪᑲᓂᐠ ᔓᓂᔭᐃᐧ ᐱᒧᒋᑫᐃᐧᓂᐠ ᐃᓀᑫ.
ᑭᑲᓄᒋᑫᑕᒪᑫ ᒋᐅᒋᑲᓇᐁᐧᐣᑕᑯᓯᐊᐧᐨ ᐅᑕᓂᔑᓂᓂᒪᐣ ᐁᑲᐧ ᒥᓇ ᐅᑕᑭᒥᐠ, ᐱᕑᐊᐅᐣ ᑕᐡ ᑭᒪᓯᓇᐦᐅᑎᓱᐸᐣ ᒋᐅᐡᑭᒪᒋᑕᒪᑲᓂᐠ ᐅᐣᑌᕑᐃᔪ ᐊᓂᔑᓂᓂᐃᐧ ᔑᒪᑲᓂᔑᐃᐧ ᐊᓄᑭᑕᒪᑫᐃᐧ ᓇᑯᒥᑐᐃᐧᐣ ᒣᑲᐧᐨ 2013 ᐁᑲᐧ ᒥᓇ ᑫᐃᐧᐣ ᐃᒪ ᑭᑕᑭᐧᐸᐣ ᓂᐃᐧᐣ ᐅᑭᒪᑲᓇᐠ ᑲᑭ ᓇᑲᐡᑲᒧᐊᐧᐸᐣ ᒋᓇᓇᑕᐊᐧᓯᓂᐊᐧᑌᓂᐠ ᒥᓇ ᒋᐸᐡᑲᐧᑕᐦᐃᑲᑌᓂᐠ ᐊᐧᓴ ᑭᐁᐧᑎᓄᐠ ᒣᑲᐧᐨ 2005 ᑲᔭᑭᐊᐧᓂᐠ.
ᑭᐊᔭᒥᒋᑲᓂᐊᐧᐣ ᒣᑲᐧᐨ ᒉᐣᐁᐧᕑᐃ ᐱᓯᑦ 12 ᐊᐧᓂᓇᐊᐧᑲᐠ ᐁᑲᐧ ᑭᓇᐦᐃᓂᑲᓂᐊᐧᐣ ᐊᐧᐱᑭᑲᐠ ᒉᐣᐁᐧᕑᐃ ᐱᓯᑦ 14 ᑲᐃᓇᑭᓱᐨ.
ᐱᕑᐊᐅᐣ ᐅᓇᑲᓇᐣ ᐅᐃᐧᒋᐊᐧᑲᓇᐣ ᑫᕑᐅ, ᐅᑕᐊᐧᔑᔑᒪᐣ, ᒪᔪᐢ ᐱᕑᐊᐅᐣ, ᐱᓂᓯᓇ ᐸᐠᐢᑐᕑ, ᐱᑐᕑ ᐱᕑᐊᐅᐣ, ᑊᕑᐁᑊᑎᐣ ᐸᐧᐠᐢ ᒥᓇ ᑕᔾᓫᐊᕑ ᓯᓇᐊᐧᑊ, ᒥᔑᓄᐊᐧᐣ ᐅᓯᓴᐣ ᒥᓇ ᐅᑕᓂᑯᐱᑕᑲᓇᐣ.