ᐅᓇᔓᐁᐧᐃᐧ ᐅᑭᒪᔑᔑᐃᐧ ᐅᑕᐱᑕᒪᑫᐠ ᑲᐊᐧᐁᐧᓇᒋᑫᐊᐧᐨ ᑕᐣᑐᕑ ᐯ ᐅᑌᓇᐠ ᑭᓇᑭᐡᑲᑐᐊᐧᐠ

ᐅᑯᐁᐧᓂᐊᐧᐠ ᐅᐣᑌᕑᐃᔪ ᐅᓇᔓᐁᐧᐃᐧ ᐅᑭᒪᔑᔑᐃᐧ ᐅᑕᐱᑕᒪᑫᐠ ᑲᐊᐧᐁᐧᓇᒋᑫᐊᐧᐨ ᐅᑭᐱᓯᐣᑕᓇᐊᐧ ᐁᑲ ᑲᓇᐦᐃᓭᐊᐧᑫᑕᑲᐧᐠ ᑲᐃᔑᐱᒧᒋᑲᑌᐠ ᐅᐣᑌᕑᐃᔪ ᐅᓇᑯᓂᑫᐃᐧ ᐱᒧᒋᑫᐃᐧᓂᐠ ᑲᐃᓇᑌᐠ ᐁᑲᐧ ᒥᓇ ᑲᐅᓀᓂᒥᑕᐧ ᑫᐅᓇᔓᐁᐧᐃᐧᑭᒪᔑᔑᐃᐧᐊᐧᐨ ᒣᑲᐧᐨ ᐊᐱ ᓂᑕᑦ ᑲᑭᐅᓇᐱᐃᐧᓂᑫᐊᐧᐨ ᐅᐱᒪᐊᒧᐃᐧᐱᓯᑦ 10 ᑲᐃᓇᑭᓱᐨ ᑕᐣᑐᕑ ᐯ ᐅᑌᓇᐠ.
“ᒪᐊᐧᐨ ᐃᑯ ᑭᒪᒥᓀᐧᑕᑲᐧᐣ ᑲᑭᓄᑕᐊᐧᑭᑕᐧ ᑲᑭᐱᑎᐸᒋᒧᐊᐧᐨ ᐊᓂᐣ ᑫᒋᐊᐧᐠ ᑲᑭᐱᐃᔑ ᓇᓇᑭᐡᑲᒧᐊᐧᐨ ᐅᑎᓯᓭᐃᐧᓂᐊᐧ, ᑲᐃᐧᓂᐣ ᐃᑯ ᐁᑕ ᐃᒪ ᐃᓀᑫ ᐅᓇᑯᓂᑫᐃᐧ ᐱᒧᒋᑫᐃᐧᓂᐠ ᐃᒪ ᐱᑯ ᑲᔦ ᐅᑭᐅᐣᒋ ᒥᑯᐡᑲᑯᑲᓇᐊᐧ ᑲᐃᔑᑲᓇᐊᐧᐸᒋᑲᑌᐠ ᑲᐅᓂᓂᑕᐧ ᑫᐅᓇᔓᐁᐧᐃᐧᑭᒪᔑᔑᐃᐧᐊᐧᐨ ᑲᐱᓯᐣᑕᒧᐊᐧᐨ ᒣᑲᐧᐨ ᑲᑎᐸᑯᓂᑲᓂᐊᐧᓂᐠ,” ᑭᐃᑭᑐ ᑭᒋᐅᑭᒪᑲᓀᐢ ᐊᓫᐱᐣ ᐱᐟᓫᐊᕑ, ᐃᐧᐣ ᐃᒪ ᐅᐣᒋᐊᓂᑯᓂᑲᓂ ᐊᐱᑕᒪᑫ ᐊᐱᑕᒪᑫᐃᐧᓂᐠ.
“ᒥᓇᐧᔑᐣ ᑕᐡ ᑲᑭᐊᐧᐃᐧᐣᑕᒪᐃᐧᐣᑕᐧ ᑲᐊᐱᑕᒪᑫᐊᐧᐨ ᐅᐁᐧᓂ ᐃᓯᓭᐃᐧᓂ ᐁᑲᐧ ᑫᓂᓇᐃᐧᐟ ᒋᑭᐅᐣᒋ ᑲᑭᑫᐣᑕᒪᑭᐸᐣ ᑲᑭᐊᐧᐃᐧᐣᒋᑲᑌᑭᐣ ᑫᑭᔐᑊ.”
ᐁᑲᐧ ᐃᐁᐧ ᐃᑲᐳᒋ ᑎᐸᒋᒧᐃᐧᐣ ᑲᑭᐸᑭᑎᓂᑲᑌᑭᐸᐣ ᒥᐦᐅᐁᐧ ᓂᐢᑕᑦ ᑲᑭᒪᑕᓄᑲᑌᐠ ᐅᓇᔓᐁᐧᐃᐧ ᐅᑭᒪᔑᔑᐃᐧ ᐅᑕᐱᑕᒪᑫᐠ ᑲᐊᐧᐁᐧᓇᒋᑫᐊᐧᐨ ᒋᑕᑲᐧᐠ ᒪᒪᐤ 17 ᑫᑯᓇᐣ ᑲᑭᐃᐧᐣᒋᑲᑌᑲᐧᐸᐣ ᑲᓇᓄᑌᓭᑭᐣ ᒋᔭᓂᑲᑫᐧᐅᐣᒋᑕᒪᑫᐨ ᐅᐣᑌᕑᐃᔪ ᑭᒋᐅᑭᒪ. ᓂᑯᑕᐧᓱᐊᐧᐠ ᑕᐡ ᐁᐊᓂᔑᓂᓂᐃᐧᐊᐧᐨ ᐯᔑᑯᔕᑊ ᑲᐊᐱᑕᒪᑫᐊᐧᐨ, ᐊᔑᐨ ᐊᐧᐁᐧ ᐱᐟᓫᐊᕑ, ᐁᑲᐧ ᒥᓇ ᒋᕑᐃᑎ 3 ᑲᑭ ᑭᒋᐅᑭᒪᑲᓄᐸᐣ ᑕᔭᐣ ᑫᓫᐃ ᒥᓇ ᑭᔐᒋᐊᐧᓄᐠ ᑲᑭᐅᑭᒪᑲᓄᐸᐣ ᒐᐧᓂᑕᐣ ᓴᐧᓫᐅᒪᐣ.
“ᑲᑭᐃᑭᑐᐸᐣ ᑲᓇᑕ ᒪᐊᐧᐨ ᑲᐃᐡᐸᐠ ᐅᓇᑯᓂᑫᐃᐧᑲᒥᑯᐠ ᑲᑭᑎᐸᑯᓂᑫᐃᐧᒪᐃᐧᐸᐣ ᐃᑲᐳᒋ ᐃᒪ ᐅᑎᐸᒋᒧᐃᐧᓂᑫᐃᐧᓂᐠ, ᐁᑭᓇᓇᐱᐃᑭᑐᐨ, ᑲᐃᐧᐣ ᐃᐧᑲ ᑎᐱᑐᑕᑫᐃᐧᓂᐠ ᐃᔑᑲᓇᐊᐧᐸᒥᑯᐃᐧᓯᓯᐣ ᐊᓂᔑᓂᓂ ᐅᓇᑯᓂᑫᐃᐧᓂᐠ ᑲᐃᔑᐱᐣᑎᑫᓭᐨ,” ᑭᐃᑭᑐ ᐱᐟᓫᐊᕑ. “ᑲᐃᐧᐣ ᑲᔦ ᐅᑌᐯᐧᐊᐧᑫᐣᑕᓯᓇᐊᐧ ᑎᐸᑯᓂᑫᐃᐧᓂ, ᑲᐃᐧᐣ ᑲᔦ ᐃᒪ ᐅᐣᒋ ᓇᑕᒪᑯᐃᐧᓯᓯᐊᐧᐠ ᐃᓀᐣᑕᒧᐠ, ᒥᑕᐡ ᐅᐁᐧ ᑲᐊᓂᒥᓇᑲᐧᐠ ᑭᓇᐃᐧᐟ ᑲᐊᐱᑕᒪᑫᔭᐠ ᒋᐊᓄᑲᑕᒪᐠ ᑲᑭᓇ ᐊᐃᐧᔭᐠ ᐅᒪ ᐅᐣᑌᕑᐃᔪ, ᐊᔑᐨ ᑲᔦ ᑭᑕᓂᔑᓂᓂᒥᓇᓂᐠ, ᒋᐊᓂᓀᑕᒧᐊᐧᐨ ᑫᐃᐧᓇᐊᐧ ᐃᒪ ᒋᑭᐊᓂᔑᐸᐸᒥᓯᐊᐧᐸᐣ ᑎᐸᑯᓂᑫᐃᐧᓂᐠ.”
ᐱᐟᓫᐊᕑ ᑭᐃᑭᑐ ᐊᓂᔑᓂᓂᐊᐧᐠ ᑲᑭᐱᐃᐧᒋᑕᐧᐊᐧᐨ ᐃᒪ ᐅᐣᑌᕑᐃᔪ ᐅᓇᔓᐁᐧᐃᐧ ᑭᒪᔑᔑᐃᐧᓂᐠ ᑲᐯᐦᐃ ᐱᑯ ᐱᐅᑕᓇᐠ ᑲᐃᐧᐣ ᓇᐱᐨ ᐊᓂᔑᓂᓂ ᑭᐱᐅᐣᒋᑕᑭᐧᓯᐣ.”
“ᐁᑲᐧ ᒥᓇ ᑲᑭᐱᐃᔑ ᓇᓄᑕᒪᐠ, ᐊᑎᐟ ᐃᓂᐁᐧᓂᐊᐧᐣ ᐃᓇᑭᐣᒋᑫᐃᐧᓇᐣ ᒪᐊᐧᐨ ᐃᑯ ᐅᐣᒋ ᒪᒥᑯᐡᑲᑌᐣᑕᑲᐧᐣ,” ᐃᑭᑐ ᐱᐟᓫᐊᕑ. “ᑫᒋᐊᐧᐠ ᐃᑯ ᒥᓯᐁᐧ ᑕᔑᑫᐃᐧᓇᐣ ᑲᐊᐧᐅᐣᒋᐊᐧᐨ ᐁᑲ ᑲᓇᑫ ᐁᑭᐅᐣᒋᐅᑕᐱᓂᑕᐧ ᐃᒪ ᒋᔑᐃᐧᒋᑕᐧᐊᐧᐨ ᐅᓇᔓᐁᐧᐃᐧ ᑭᒪᔑᔑᐃᐧᓂᐠ ᒥᐦᐅᐁᐧ ᑲᓇᑕᐁᐧᐣᑕᑲᐧᐠ ᒋᒪᒥᓇᐧᒋᑲᑌᐠ.”
ᐱᐟᓫᐊᕑ ᑭᐃᑭᑐ ᓂᐢᑕᑦ ᑲᑭᒪᐊᐧᒋᐦᐃᑐᐊᐧᐨ ᑭᒥᓄᓭᓂᐠ ᐅᒪ ᑲᐃᐧᔭᓂᔑ ᐅᐡᑭᒪᑕᓄᑭᐊᐧᐨ.
“ᓂᑭᐅᐣᒋ ᒋᑭᐡᑲᑯᒥᐣ ᑲᑭᐱᔕᐊᐧᐨ ᑲᑲᑭᑫᓂᒪᑭᑕᐧ ᑫᑭᔐᑊ ᑲᑭᒪᐊᐧᒋᐦᐃᑎᔭᐠ,” ᐃᑭᑐ ᐱᐟᓫᐊᕑ. “ᒥᑕᐡ ᐅᐁᐧ ᐁᔑᐸᑯᓭᐣᑕᒪᐠ ᒋᐃᐧᐊᓂᔑ ᐊᐧᐸᑕᒪᐠ ᒥᓇᐊᐧ ᐊᓂᐱᒥ ᒪᐊᐧᒋᐦᐃᐁᐧᔭᐠ ᐸᐸᑲᐣ ᑕᔑᑫᐃᐧᓇᐣ ᐅᒪ ᐅᐣᑌᕑᐃᔪ, ᑫᐃᐧᓇᐊᐧ ᒋᐸᑭᑎᓇᒧᐊᐧᐨ ᐅᑎᐸᒋᒧᐃᐧᓂᐊᐧ.”
ᑯᑕᑭᔭᐣ ᑫᑯᓇᐣ ᑭᐊᐧᐃᐧᐣᒋᑲᑌᐊᐧᐣ ᐁᑲ ᑲᓇᐦᐃᓭᐊᐧᑫᐣᑕᑲᐧᐠ ᐅᐁᐧ ᐅᓇᔓᐁᐧᐃᐧ ᑭᒪᔑᔑᑫᐃᐧᐣ, ᐱᔾᓫᐊᕑ ᑭᐃᑭᑐ ᐃᐡᑯᓂᑲᓇᐣ ᑲᑲᐯᔑᐊᐧᐨ ᐅᑭᐃᐧᐣᑕᓇᐊᐧ ᐁᑲ ᐁᒥᓀᐧᐣᑕᒧᐊᐧᐨ ᐁᑲ ᑲᑕᑲᐧᐠ ᐅᑎᓀᐧᑕᒪᑯᐃᐧᓂᐊᐧ ᐁᑲᐧ ᒥᓇ ᐁᑲ ᑲᐸᑭᑎᓂᑲᑌᐠ ᑭᑭᓄᐦᐊᒪᑫᐃᐧᐣ ᐊᓂᔑᓂᓂᐃᐧ ᐃᐡᑯᓂᑲᓇᐣ ᑫᑭᐅᐣᒋ ᑲᑭᑫᐣᑕᒧᐊᐧᐸᐣ ᑲᐊᐃᔑᐱᒧᒋᑲᑌᐠ ᐅᓇᑯᓂᑫᐃᐧᐣ.
“ᒥᐦᐅᐁᐧ ᑲᔦ ᑲᓇᑕᐁᐧᐣᑕᑲᐧᐠ ᒋᔭᓄᑲᑌᐠ ᒋᑭᑭᓄᐦᐊᒪᑲᓄᐊᐧᐠ ᑭᑕᓇᐱᐃᐧᓂᓇᓂᐠ, ᐃᑭᑐ ᐱᐟᓫᐊᕑ.
ᐱᐟᓫᐊᕑ ᐅᑕᔕᐧᐸᐣᑕᐣ ᒥᓇᐊᐧ ᒋᔭᓂᒪᐊᐧᒋᐦᐃᑐᓂᑫᐊᐧᐨ ᐃᒪ ᑲᐃᔑᐃᐧᒋᑕᐧᐨ ᐅᐣᑌᕑᐃᔪ ᐅᓇᔓᐁᐧᐃᐧ ᐅᑭᒪᔑᔑᐃᐧ ᐅᑕᐱᑕᒪᑫᐠ ᐁᐧᑎ ᑭᐁᐧᑎᓄᐠ ᑕᔑᑫᐃᐧᓂᐠ.
“ᓂᐸᑯᓭᐣᑕᐣ ᑲᓇᑫ ᐯᔑᐠ ᓇᐣᑕ ᓂᔑᐣ ᒋᑭᑲᑫᐧ ᐃᔕᔭᑭᐸᐣ ᐁᐧᑎ ᐱᒥᓭᐃᐧᓂᐠ ᐁᑕ ᑲᐅᐣᒋᐃᔕᒪᑲᑭᐣ ᐃᐡᑯᓂᑲᓇᐣ ᓄᐱᒪᑲᒥᐠ ᑭᐁᐧᑎᓄᐠ,” ᐃᑭᑐ ᐱᐟᓫᐊᕑ.
ᐊᐧᐁᐧ ᑲᓇᑕ ᑭᒋ ᑎᐸᑯᓂᑫᐃᐧ ᐅᑭᒪᐃᐧᐣ ᑭᐅᓇᒋᑫ ᒋᐊᓂ ᐅᓇᑐᐨ ᑯᑕᑭᓂᐃᑲᐳᒋ ᐅᓇᑐᑕᒪᑫᐃᐧᐣ, ᒋᐅᓇᓯᐣᑕᐧ ᑫᐅᐣᒋ ᑭᑭᓄᐡᑲᒪᑫᐊᐧᐨ ᐃᐧᓇᐊᐧ ᒋᐅᒋᐊᔭᒥᐦᐊᐊᐧᐨ ᑭᒋᑎᐸᑯᓂᑫᐃᐧ ᐅᑭᒪᐣ ᑫᑯᓇᐣ ᑲᐃᔑᐊᓂᒥᓴᐦᐃᑯᐊᐧᐨ ᐊᓂᔑᓂᓂᐊᐧᐠ ᐃᒪ ᐃᓀᑫ ᐅᓇᑯᓂᑫᐃᐧᓂ, ᐅᐁᐧ ᑫᔭᓂᑕᑲᐧᑭᓂᐠ.
ᐁᑲᐧ ᒥᓇᐊᐧ ᑯᑕᑭᓂ ᐅᓇᑐᑕᒪᑫᐃᐧᐣ ᑲᑭᐸᑭᑎᓇᑭᐸᐣ ᑭᒋ ᑎᐸᑯᓂᑫᐃᐧ ᐅᑭᒪᐃᐧᐣ ᑲᑭᓇᑐᑕᒪᐊᐧᐨ, ᐊᐱ ᑲᑭᐃᐡᑲᐧ ᐊᐧᐃᐧᑕᒧᐊᐧᐸᐣ ᐅᑎᐸᒋᒧᐃᐧᓂᐊᐧ ᐅᓇᔓᐁᐧᐃᐧ ᐅᑭᒪᔑᔑᐃᐧ ᐅᑕᐱᑕᒪᑫᐠ ᑲᐊᐧᐁᐧᓇᒋᑫᐊᐧᐨ, ᒋᐅᐣᒋᑕᒪᑫᐨ ᒋᑕᑲᐧᐠ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᐣ ᒋᑭᑭᓄᐦᐊᒪᐃᐧᐣᑕᐧ ᑲᑭᓇ ᐅᑭᒪᐃᐧᓂ ᐊᓄᑭᓇᑲᓇᐠ ᑲᐅᐣᒋ ᐊᓄᑲᓇᐊᐧᐨ ᐊᓂᔑᓂᓂᐊᐧᐣ, ᐊᔑᐨ ᐃᑭᐁᐧᓂᐊᐧᐠ ᔑᒪᑲᓂᔑᐃᐧ ᐊᓄᑭᓇᑲᓇᐠ, ᑎᐸᑯᓂᑫᐃᐧ ᐊᓄᑭᓇᑲᓇᐠ, ᐅᑎᐸᑯᓂᑫᐠ, ᑭᐸᐦᐅᑐᐃᐧᑲᒥᑯᐠ ᐅᑲᓇᐁᐧᐣᒋᑫᐠ ᒥᓇ ᑯᑕᑭᔭᐣ ᐃᒪ ᑲᐅᐣᒋᑲᓇᐊᐧᐸᒋᑲᑌᑭᐣ ᐊᓄᑭᐃᐧᓇᐣ.