ᐅᒪᐡᑭᑯᐠ ᐅᐸᑭᑎᓇᓇᐊᐧ ᐊᑭᐣᑕᒪᑫᐃᐧ ᒪᒥᔑᑫᒧᐃᐧᐣ ᐁᑲ ᑲᐱᒥᓂᔕᐦᐃᑲᑌᓂᐠ ᐅᑕᔓᑕᒪᑯᐃᐧᓂᐊᐧ

ᒣᑲᐧᐨ ᑲᑭᒪᐊᐧᒋᐦᐃᑎᓇᓂᐊᐧᑭᐸᐣ ᒋᕑᐃᑎ 9 ᐅᑭᒪᐃᐧᐣ ᐊᔓᑕᒪᑫᐃᐧᐣ ᑲᑭᐊᓂᒧᒋᑲᑌᐠ ᐁᐧᑎ ᑭᔐᒋᐊᐧᓄᐠ 1987 ᑲᐊᐦᑭᐊᐧᐠ, ᑲᑭᒋᐦᐊᐃᐧᐡᑲᒪᑫᐨ ᒉᒥᐢ ᐁᐧᐢᓫᐃ ᐊᑕᐊᐧᐱᐢᑲᐟ ᐁᐅᐣᒋᐨ ᑭᑭᐁᐧ ᑲᓄᑫ ᑲᑭᐃᑭᑐᓂᐸᐣ ᐯᔑᐠ ᓇᐯᐊᐧᐣ ᐃᒪ ᑫᐃᐧᐣ ᒣᑲᐧᐨ ᑲᑭᐊᐸᐣ ᒪᐊᐧᒋᐦᐃᑐᐃᐧᓂᐠ ᐊᐱ ᒋᕑᐃᑎ ᐅᑕᔓᑕᒪᑫᐠ ᑲᑭᐱ ᓇᓇᑭᐡᑲᐧᐊᐧᐊᑯᐸᓀᐣ ᐊᓂᔑᓂᓂᐊᐧᐣ 1095 ᑲᐊᐦᑭᐊᐧᓂᐠ.
"ᐁᐣᑕᓂ ᕑᐅᐱᐣ ᑭᐃᓇᒋᒧ ᑫᐃᐧᐣ ᐃᒪ ᑭᐊᐱᑯᐸᐣ ᒥᓇ ᑭᐊᐧᐸᐣᑫ ᐁᑭᒪᓯᓇᐦᐊᒧᐧᐊᐨ ᑭᒋᑫᑯᓇᐣ,” ᐁᐧᐢᓯᓫᐃ ᑭᐃᓇᒋᒪ ᐁᑭᐃᓇᑐᑕᐠ ᐃᐁᐧ ᐊᐱ. “ᑭᐊᔭᐸᐣ ᐊᐃᐧᔭ ᐃᐧᐣ ᑲᑭᔭᓂ ᐅᓇᓯᓇᐦᐃᑫᐸᐣ. ᒥᑕᐡ ᐅᓄᐁᐧᓂᐊᐧᐣ ᑲᐊᐧᓂᒋᑲᑌᑭᐣ. ᒥᓇᐊᐧ ᒪᐃᐧᐣ ᐯᔑᑲᐧ ᑲᑭᔑᑲᐠ ᑕᐃᓯᓭ ᒋᒥᑭᑲᑌᑭᐣ."
ᐊᐃᓇᓀᐃᐧᐊᐦᑭ ᑲᐊᓂᐃᓯᓭᐠ, ᐅᑯᐁᐧᓂᐊᐧᐠ ᓂᐦᓯᐣ ᒋᕑᐃᑎ ᐅᑕᔓᑕᒪᑫᐠ ᐅᒪᓯᓇᐦᐃᑲᓂᐊᐧ ᑭᔭᓂᒥᑭᑲᑌᓂᐊᐧᐣ, ᐁᑭᑌᐯᐧᓭᓂᐠ ᑭᒋᐦᐊᐠ ᑲᑭᐱᐃᑭᑐᐊᐧᐸᐣ: ᐅᑯᐁᐧᓂᐊᐧᐠ ᑕᐡ ᐅᑕᔓᑕᒪᑫᐠ ᑲᑭᒧᒋ ᐸᑭᑎᓇᒧᐊᐧᑯᐸᓀᐣ ᐅᑭᑎᑐᐃᐧᓂᐊᐧ ᑲᑭᐃᔑ ᐊᔓᑕᒪᑫᐊᐧᐸᐣ ᑲᐃᐧᐣ ᑲᓇᑫ ᒋᐱᒥᓂᔕᐦᐃᑲᑌᑭᐣ ᐃᒪ ᐊᔓᑕᒪᑫᐃᐧᓂᐠ.
ᐅᓄᐁᐧᓂᐊᐧᐣ ᑕᐡ ᒪᓯᓇᐦᐃᑲᓇᐣ ᑲᑭᒥᑭᑲᑌᑭᐣ ᐅᒪᐡᑭᑯᐠ ᐅᑲᐃᓇᐸᒋᑐᓇᐊᐧ ᐁᐃᐧᑎᐸᑯᓇᐊᐧᐨ ᐅᐣᑌᕑᐃᔪ ᒥᓇ ᑲᓇᑕ ᑭᒋᐅᑭᒪᐣ.
ᐅᒪᐡᑭᑯ ᐅᑭᒪᑲᓇᐠ ᑲᑭᐸᑭᑎᓇᒧᐊᐧᐨ ᐅᐣᑌᕑᐃᔪ ᑭᒋᐅᓇᑯᓂᑎᐃᐧᑲᒥᑯᐠ ᒣᑲᐧᐨ ᓴᑭᐸᑲᐃᐧᐱᓯᑦ 4 ᑲᐃᓇᑭᓱᐨ ᐅᑭᐃᓇᐊᐧᐣ ᐅᐣᑌᕑᐃᔪ ᒥᓇ ᑲᓇᑕ ᑭᒋᐅᑭᒪᐣ ᐁᑲ ᐃᐧᓇᐊᐧ ᒪᐡᑲᐃᐧᓯᐃᐧᐣ ᐁᐅᒋᒥᓂᑕᐧ ᓇᐣᑕ ᐃᒪ ᒋᕑᐃᑎ 9 ᐊᔓᑕᒪᑫᐃᐧᓂᐠ ᒋᑭᐅᐣᒋ ᓇᑲᐡᑲᒪᐊᐧᐊᐧᐨ ᓇᐣᑕ ᒥᓇ ᒋᑭᐅᐣᒋ ᓀᐱᒋᑭᐡᑭᓇᒪᐊᐧᐊᐧᐨ ᐅᒧᔕᑭᓂᑫᐃᐧ ᑎᐯᓂᒥᑎᓱᐃᐧᓂᐊᐧ ᐅᒪᐡᑭᑯᐠ ᐃᐁᐧᓂ ᑲᑕᐃᐧᓇᒪᐊᐧᐊᐧᐨ ᑭᒋᐊᓄᑭᐃᐧ ᐱᒧᒋᑫᐃᐧᑭᒪᐠ ᒋᔭᓂ ᑕᓇᓄᑭᐊᐧᐨ ᐅᒪᐡᑭᑯᐠ ᐅᑕᑭᒥᐊᐧᐠ.
ᒥᓇᐊᐧ ᑭᐊᓂᑭᑐᐊᐧᐠ ᐅᒪᒥᔑᑫᒧᐃᐧ ᒪᓯᓇᐦᐃᑲᓂᐊᐧ ᐃᐁᐧ ᑲᑭᒧᒋᐃᐧᐣᑕᒪᐃᐧᐣᑕᐧᐸᐣ ᐅᑕᔓᑕᒪᑯᐃᐧᓂᐊᐧ ᑭᑯᐱᐨ ᐁᐱᒥᓭᓂᐠ ᒥᓇ ᐁᑲ ᐃᐧᑲ ᒋᐃᐡᑲᐧᓭᓂᐠ ᒋᕑᐃᑎ ᐅᑕᔓᑕᒪᑫᐣ ᑲᑭᐃᔑᐊᔓᑕᒪᑯᐊᐧᐸᐣ ᐅᐊᐧᓂᐦᐃᑫᐃᐧᓂᐊᐧ, ᐅᓇᓇᑕᐁᐧᒋᑫᐃᐧᓂᐊᐧ ᒥᓇ ᐅᐸᑭᑕᐁᐧᐃᐧᓂᐊᐧ ᒪᐊᐧᐨ ᐁᑭᒋᓀᑕᑲᐧᓂᐠ ᐅᐧᐁᓂ ᒋᐃᓇᑕᒪᐃᐧᐣᑕᐧ ᐊᓂᔑᓂᓂᐊᐧᐠ ᑲᑭᐅᓀᐣᑕᒧᐊᐧᐨ ᒋᒪᓯᓇᐦᐅᑎᓱᐊᐧᐨ ᒋᕑᐃᑎ 9 ᐅᑕᔓᑕᒪᑫᐃᐧᓂ.
ᐊᐧᐁᐧ ᑕᐡ ᐅᐣᑌᕑᐃᔪ ᒋᕑᐃᑎ ᐅᑕᔓᑕᒪᑫ ᑕᓂᔭᐣ ᒪᐠᒪᕑᑎᐣ ᑲᑭᐃᔑᓂᑲᓱᐨ ᐅᒪᓯᓇᐦᐃᑲᓇᐣ ᑭᐃᑭᑐ ᐃᒪ ᑲᑭᒧᒋ ᐃᐧᐣᑕᒪᐃᐧᑕᐧᐸᐣ ᐅᑕᔓᑕᒪᑯᐃᐧᓂᐊᐧ ᐊᓂᔑᓂᓂᐊᐧᐠ ᒣᑲᐧᐨ 1905 ᑲᐊᐦᑭᐊᐧᐠ, ᐁᑲᐧ ᑲᑭᒪᓯᓇᐦᐅᑎᓱᐊᐧᐨ ᐊᓂᔑᓂᓂᐊᐧᐠ ᑭᐃᓇᔓᑕᒪᐊᐧᐊᐧᐠ ᒋᓇᓇᑕᐁᐧᐣᒋᑫᐊᐧᐨ ᒥᓇ ᒋᐸᑭᑕᐁᐧᐊᐧᐨ ᐁᑲ ᒋᑭᐸᑯᐡᑲᒪᐃᐧᐣᑕᐧ.
ᒥᑕᐡ ᑲᑭᐃᑭᑐᐨ ᐅᒪᐡᑭᑯ ᑭᒋᐅᑭᒪᑲᐣ ᐢᑕᐣ ᓫᐅᑎᐟ, ᐅᑯᐁᐧᓂᐊᐧᐠ ᐊᓂᔑᓂᓂᐊᐧᐠ ᑲᑭᒪᓯᓇᐦᐅᑎᓱᐊᐧᐨ ᑲᐃᐧᐣ ᒋᑭᐅᐣᒋ ᓇᑯᒧᐊᐧᐨ ᒋᐸᑭᑕᔓᐊᐧᑕᒧᐊᐧᐨ ᐅᑕᑭᒥᐊᐧ.
“ᒪᐊᐧᐨ ᐃᑯ ᓂᒐᒋᑫᐣᑕᒥᐦᐃᑯᒥᐣ ᐅᐁᐧ,” ᑭᐃᑭᑐ ᒣᑲᐧᐨ ᐃᒪ ᒉᒥᐢ ᐯ ᒋᕑᐃᑎ - ᒋᕑᐃᑎ 9 ᒪᐊᐧᒋᐦᐃᑐᐃᐧᐣ ᑲᑭᑕᔑᑐᒋᑲᑌᐠ ᒧᐢ ᐸᐠᑐᕑᐃ ᒣᑲᐧᐨ ᑭᔑᐸᑲᐃᐧᐱᓯᑦ 30. “ᐊᔕ ᐊᐱᐣ ᐁᓂᒧᑭᒪᑲᐠ ᒪᔭᑦ ᑲᑭᐃᓇᔓᐊᐧᓄᐊᐧᑭᐸᐣ, ᐁᑲᐧ ᒥᓇ ᐊᓂᐣ ᒪᔭᑦ ᐊᔓᑕᒪᑫᐃᐧᐣ ᑲᑭᐃᔑ ᓂᓯᑐᑕᒧᐊᐧᑯᐸᓀᐣ ᑭᑕᓂᑫ ᒥᔓᒥᓇᓂᐠ.”
ᒣᑲᐧᐨ ᐊᐱ ᑲᓇᑕ ᒥᓇ ᐅᐣᑌᕑᐃᔪ ᑭᒋᐅᑭᒪ ᑲᑭᐊᓂ ᐅᓇᓯᓇᐦᐊᒧᐊᐧᐸᐣ ᒋᕑᐃᑎ 9 ᒣᑲᐧᐨ 1903, ᑭᐃᔑᐅᓀᒋᑲᑌᑯᐸᐣ ᒋᑲᐧᑫᐅᓇᒋᑲᑌᐠ “ᒋᑭᐡᑭᓇᒪᐃᐧᐣᑕᐧ ᐊᓂᔑᓂᓂᐊᐧᐠ ᐅᑕᑭᒥᐊᐧ” ᐁᑲᐧ ᐊᐱᐣ ᒋᐃᔑ ᐊᐣᒋ ᐸᑭᑎᓇᒧᐊᐧᐨ ᑭᒋᐅᑭᒪ ᐃᐧᐣ ᒋᑎᐱᓇᐁᐧᐃᐧᓯᐨ ᐊᐦᑭᓂ, ᑭᐃᑭᑐ ᓫᐅᑎᐟ.
ᐁᑲᐧ ᒥᓇ ᐃᑭᑐᒪᑲᐣ ᐃᒪ ᒋᕑᐃᑎ ᒪᓯᓇᐦᐃᑲᓂᐠ ᑲᑭᓇ ᐊᓂᔑᓂᓂᐊᐧᐠ “ᒪᐡᑲᐃᐧᓯᐃᐧᐣ ᐅᑕᔭᓇᐊᐧ ᑲᑭᓯᐊᐃᑐᑕᒧᐊᐧᐨ ᒋᓇᓇᑕᐁᐧᐣᒋᑫᐊᐧᐨ, ᒋᐊᐧᓂᐦᐃᑫᐊᐧᐨ ᒥᓇ ᒋᐸᑭᑕᐁᐧᐊᐧᐨ ᒥᓯᐁᐧ ᐃᒪ ᑲᑭ ᐸᑭᑕᔓᐊᐧᑕᒧᐊᐧᐨ ᐅᑕᑭᐊᐧ…” ᐯᔑᑲᐧᐣ ᑕᐡ ᐃᒪ ᐸᑫᐱᐦᐃᑲᓂᐠ ᓇᐸᒋᑕᑲᐧᐣ, ᐃᑭᑐ ᓫᐅᑎᐟ.
ᐃᒪ ᐸᑫᐱᐦᐃᑲᓂᐠ ᑭᐊᓂᓇᓯᓇᐦᐃᑲᑌ: “ᑭᐡᐱᐣ ᐁᑕ ᐅᐣᒋᐱᒥ ᐊᔭᑲᐃᐧᐃᓯᓭᐠ ᐃᒪ ᐃᐧᐅᐣᒋᑲᑫᐧ ᑌᐱᓂᑲᑌᐠ ᒋᑕᐃᐧᓂᑲᓂᐊᐧᐠ, ᒋᐱᐊᐧᐱᑯᑲᓂᐊᐧᐠ, ᒪᓇᑎᑫᐃᐧᐣ, ᒥᐡᑯᑐᓇᒪᑫᐃᐧ ᐃᔑᒋᑫᐃᐧᐣ ᓇᐣᑕ ᒥᓇ ᑯᑕᑭᔭᐣ ᑫᑯᓇᐣ ᑲᐃᐧᑕᔑᐃᔑᒋᑲᓂᐊᐧᐠ.”
ᒥᑕᐡ ᐁᓂᑕᑲᐧᐠ ᐃᑭᐁᐧᓂᐊᐧᐠ ᑲᓇᑕ ᒥᓇ ᐅᐣᑌᕑᐃᔪ ᑭᒋᐅᑭᒪᐠ ᑲᑭᐃᔑᐅᓀᐣᑕᒧᐊᐧ, ᓫᐅᑎᐟ ᐃᑭᑐ, ᐅᐁᐧ ᐸᑫᐱᐦᐃᑲᐣ ᐃᓂᑕᑲᐧᐣ ᐃᐧᓇᐊᐧ ᐱᑯ ᒥᓯᐁᐧ ᒋᐅᓇᔓᐊᐧᑕᒧᐊᐧᐨ ᒋᐊᓂᐅᔑᒋᑲᑌᑭᐣ ᐊᓄᑭᐃᐧᓇᐣ ᐃᒪ ᐊᓂᔑᓂᓂᐊᐧᐠ ᐅᑕᑭᒥᐊᐧᐠ.
ᔕᑯᐨ ᑭᐃᑭᑐ ᓫᐅᑎᐟ, ᒥᓯᐁᐧ ᑲᐃᓇᑌᐠ ᒋᕑᐃᑎ ᐊᔓᑕᒪᑫᐃᐧᐣ - ᑲᐃᐧᓂᐣ ᐁᑕ ᐃᐁᐧ ᐸᑫᐱᐦᐃᑲᐣ _- ᑲᐃᐧᐣ ᒥᑐᓂ ᑲᐧᔭᐠ ᒋᑭᐅᐣᒋ ᓂᓯᑐᑕᒧᓂᑕᐧ ᐊᓂᔑᓂᓂᐊᐧᐠ ᐊᐱ ᑲᑭᒪᓯᓇᐦᐅᑎᓱᐊᐧᐨ.
ᐅᒪᒥᔑᑫᒧᓂᐊᐧ ᑲᑭᐸᑭᑎᓇᒧᐊᐧᐨ ᐅᑭᐊᐸᒋᑐᓇᐊᐧ ᐱᐢᑭᑕᓯᓇᐦᐃᑲᓂᐠ 35 ᑭᒋᐅᓇᔓᐁᐧᐃᐧᐣ (1982), ᐃᒪ “ᑲᑭᒧᒋᐃᑭᑐᓇᓂᐊᐧᐠ ᒋᕑᐃᑎ ᐊᔓᑕᒪᑫᐃᐧᓇᐣ ᐅᓇᑯᓂᑫᐃᐧᓂᐠ ᐅᐣᒋᑕᑯᐱᑌ ᐅᑭᒪᐃᐧᐣ ᐊᔓᑕᒪᑫᐃᐧᐣ ᑲᑭᐅᓇᑕᒪᑫᐨ.”
ᑭᐡᐱᐣ ᐅᒪᐡᑭᑯᐠ ᐸᑭᓇᑫᐊᐧᐨ ᑲᐃᔑᒪᐃᐧᓀᐡᑭᑫᐊᐧᐨ, ᑭᒋᐅᑭᒪᑲᐣ ᐢᑕᐣ ᓫᐅᑎᐟ ᑭᐃᑭᑐ ᑲᐃᐧᐣ ᐃᑯ ᐁᑕ ᐁᑲᐧ ᑕᐃᓇᑯᓇᓯᐣ ᐅᑭᒪᐃᐧᐣ ᒥᓇ ᑭᒋᐊᓄᑭᐃᐧ ᐱᒧᒋᑫᐃᐧᓇᐣ ᓂᑲᐣ ᒋᐃᔑᑲᐧᑫᒋᒥᐁᐧᐊᐧᐨ ᐊᓂᔑᓂᓂᑲᐠ, ᑲᔦ ᑕᐡ ᐃᑯ ᒋᐱᐦᐊᐊᐧᐨ ᒋᐸᑭᑎᓇᑯᐊᐧᐨ. ᒥᑕᐡ ᐃᒪ ᑲᔦ ᐊᓂᔑᓂᓂᐃᐧ ᑕᔑᑫᐃᐧᓇᐣ ᒋᑭᐊᓄᒋ ᑐᑕᒪᓱᒪᑲᑭᐣ ᑲᐊᓂ ᐱᒥ ᑲᐧᑫᒋᒥᑎᓇᓂᐊᐧᐠ ᐊᐱ ᐅᑕᓄᑭ ᑲᐱᑲᐧᑫᒋᒥᐁᐧᐨ ᐊᓂᐣ ᑲᐃᐧᐃᔑ ᐃᐧᑕᓄᑭᒪᐨ ᐊᓂᔑᓂᓂᐊᐧᐣ ᐅᑕᑭᒥᐠ.
“ᑲᐃᐧᓂᐣ ᐃᑯ ᐁᑕ ᐅᒪᐡᑭᑯᐠ ᑲᐊᓂᒧᒪᑲᐧ, ᑲᑭᓇ ᐱᑯ ᒋᕑᐃᑎ 9 ᑕᔑᑫᐃᐧᓇᐣ ᑲᐃᑕᒪᐣ,” ᑭᐃᑭᑐ.
ᐁᑲᐧ ᐊᐧᐁᐧ ᑲᓇᑐᑕᒪᐨ ᐅᓇᔓᐁᐧᐃᐧ ᐃᐧᒋᐦᐃᐁᐃᐧᐣ ᐱᑐᕑ ᐊᕑᒋᐸᐧᕑᐟ ᐃᔑᓂᑲᓱ ᐁᐅᒋᐨ ᑕᑲᐧ ᑕᑲᒪᐤ ᐃᐡᑯᓂᑲᓂᐠ. ᓂᔑᐣ ᐱᐊᐧᐱᑯᑲᓂ ᐊᓄᑭᐃᐧᓇᐣ ᐅᑭ ᑭᑭᓇᐊᐧᒋᑐᓇᐊᐧ ᑲᐃᐧᐃᔑ ᓇᓇᑕᐊᐧᓯᓂᐁᐧᐊᐧᐨ ᒪᔭᑦ ᐃᒪ ᐊᕑᒋᐸᐧᓫᐟ ᐅᐊᐧᓂᐦᐃᑫᐃᐧᓂᐠ, ᐅᑕᑕᒪᐣ ᑲᑭᐅᐣᒋᐊᓂᑫ ᓇᑲᑕᒪᑯᐸᐣ.
ᑕᑲᐧ ᑕᑲᒪᐤ, ᓂᐢᑕᑦ ᐃᔑᓂᑲᑌᐸᐣ ᓂᔪ ᐳᐢᐟ, ᑭᒪᓯᓇᐦᐅᑎᓱᐊᐧᐠ ᒋᕑᐃᑎ 9 ᒣᑲᐧᐨ 1905 ᐁᑲᐧ ᑕᐡ ᐊᐧᐁᐧ ᒪᐠᒪᕑᑎᐣ ᐅᑎᐸᒋᒧᐊᐧᓯᓇᐦᐃᑲᓇᐣ ᒥᐦᐃᒪ ᐁᔑᐊᓂᒧᒋᑫᐨ.
ᐅᓄᐁᐧᓂᐊᐧᐣ ᓂᔑᐣ ᐅᓄᑕᓯᓂᐁᐧᐠ - Northern Shield Resources, ᐁᑲᐧ ᒥᓇ Lake Shore Gold - ᒥᐅᑯ ᑫᐃᐧᓇᐊᐧ ᑫᓇᑕᒪᓱᐊᐧᐨ ᑎᐸᑯᓂᐁᐧᐃᐧᓂᐠ.
ᓫᐅᑎᐟ ᑭᐃᑭᑐ ᐊᐧᐁᐧ ᐊᕑᒋᐸᐧᓫᐟ ᐅᑎᓯᓭᐃᐧᐣ ᑲᑭᐅᐣᒋᐅᓀᒋᑲᑌᓂᐠ ᒋᑭᑭᓇᐊᐧᐸᑕᐦᐃᐊᐧᓄᐊᐧᐠ ᐁᐸᔭᑌᓇᑲᐧᓂᐠ ᑲᑐᑕᑫᐊᐧᐨ ᐅᓄᑕᓯᓂᐁᐧ ᑲᑦᐸᓂᐠ ᑲᐱᑕᓇᓄᑭᐊᐧᐨ ᐊᓂᔑᓂᓂᐊᐧᐠ ᐅᑕᑭᒥᐊᐧᐠ ᐃᒪ ᒋᕑᐃᑎ 9 ᑕᔑᑫᐃᐧᓂᐠ.
ᐊᑯᓇᐠ ᐊᐱᐣ ᐅᒪᐡᑭᑯᐠ ᑲᑭᐸᑭᑎᓇᒧᐊᐧᐸᐣ ᐅᑎᐸᑯᓂᐁᐧᐃᐧᓂᐊᐧ ᒣᑲᐧᐨ ᑭᔑᐸᑲᐃᐧᐱᓯᑦ 4, ᑭᒋᐅᑭᒪ ᑕᐃᐧᓇᒪᐊᐧᑲᓄ ᑯᑕᐧᓱᒥᑕᓇ ᑭᔑᑲ ᒋᐅᓀᐣᑕᐠ ᐊᓂᐣ ᑫᐃᔑᓇᑫᐧᐊᐧᔑᑕᒪᓱᐨ. ᐁᑲᐧ ᑕᐡ ᐊᐱᐣ ᐅᒪᐡᑭᑯᐠ ᐅᑲᐊᓂ ᐸᑭᑎᓇᓇᐊᐧ ᐅᒪᓯᓇᐦᐃᑲᓂᐊᐧᐠ ᒋᒪᒋᒋᑲᑌᓂᐠ ᐊᑭᑕᒪᑫᐃᐧ ᒪᒥᔑᑫᒧᐃᐧᐣ.
ᑲᐧᕑᐃ ᐊᐧᐣᓫᐁᐢ, ᑎᐸᑯᓂᑫᐃᐧ ᐊᔭᒥᑕᒪᑫ ᐃᒪ ᑲᐃᔑᐊᓄᑭᐨ ᑭᓫᐃᐱᐣᐢᑕᔾᐣᐢ ᐅᑕᔭᒥᑕᒪᑫᐠ, ᑭᐃᑭᑐ ᐊᐱ ᑭᒪᑕᓄᑲᑌᐠ ᐅᐁᐧ, ᓂᔭᓄᐊᐦᑭᐃᐧᐣ ᓇᐣᑕ ᐊᐊᐧᔑᒣ ᑕᐱᒥᑭᑲᑌ ᒥᓂᑯᐠ ᐊᐱᐣ ᑫᔭᓂᑭᔑ ᐅᓇᑯᓂᑲᓄᐊᐧᐠ.