ᐅᑭᒪᐃᐧᐣ ᐅᐸᑭᑎᓇᐣ ᔓᓂᔭᐣ ᑫᐊᓄᑭᐊᐧᑲᓄᐊᐧᐠ ᑫᐊᓄᒋᒪᑲᑭᐣ ᒪᒋᑕᐃᐧᓇᐣ ᐱᐊᐧᐱᑯᐃᐧᓂᐠ

ᐊᓂᔑᓇᐯ ᐊᐢᑭ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ ᓇᓇᑐᓂᑲᑌᐊᐧᐣ 105 ᐊᓄᑭᐦᐃᐁᐧᐃᐧᓇᐣ ᐃᒪ ᐃᓀᑫ ᓄᑯᒥᑫ ᐯᐟᓇᐧᕑ ᐅᑭᒪᐃᐧᐣ ᑲᑭᐸᑭᑎᓇᐨ ᔓᓂᔭᐣ $4.427,212 ᒥᓫᐃᔭᐣ ᒥᓂᑯᐠ ᓂᐦᓱᐊᐦᑭ ᐅᑲᐱᒥᐸᑭᑎᓇᐣ.
“ᑭᐃᔑᐅᓇᐸᒋᑲᑌ ᒥᓯᐁᐧ ᐅᒪ ᑲᓇᐊᐧᐸᒋᑫᐃᐧᓂᐠ ᐊᐣᑎ ᑫᑭᐅᐣᒋ ᐱᒥᑲᐡᑭᐦᐅᓇᓂᐊᐧᐠ, ᐊᓂᔑᓂᓂᐃᐧ ᑕᓇᐱᐃᐧᓇᐣ ᐃᑯ ᒋᑕᓇᐸᑎᓯᐨ ᑲᐸᑭᑎᓂᐨ ᔓᓂᔭᐣ,” ᑭᐃᑭᑐ ᑊᕑᐊᔭᐣ ᑌᐱ, ᐊᓄᑭᐃ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ ᑲᐅᑭᒪᐃᐧᐨ. “ᓂᐃᐧᐅᓇᑐᒥᐣ ᐊᐃᓇᓀᐤ ᒋᑲᐯᓭᑭᐣ ᐊᓄᑭᐃᐧᓇᐣ ᐅᒪ ᐱᒧᒋᑫᐃᐧᓂᐠ ᑫᑕᑲᓄᑲᑌᑭᐣ. ᐁᑲᐧ ᒥᓇ ᐣᑲᐅᓇᓴᒥᓇᐠ ᑫᑲᐧᔭᒋᑕᒪᑫᐃᐧ ᐊᐱᑕᒪᑫᐊᐧᐨ ᒋᐅᐣᑎᓂᑕᐧ ᐊᓂᔑᓂᓂᐃᐧ ᑕᓇᐱᐃᐧᓇᐣ, ᑫᐅᒋ ᐊᓱᐡᑲᒪᑫᐊᐧᐨ ᐊᓄᑭᐃᐧᓂᐠ ᒥᓇ ᒋᑭᑭᓄᐦᐊᒪᐃᐧᐣᑕᐧ ᐅᑕᓄᑭᐠ, ᒥᓇ ᑕᒪᒪᐃᐧ ᐊᐧᐃᐧᒋᐦᐃᑎᓇᓂᐊᐧᐠ ᑯᑕᑭᔭᐣ ᐸᐸᑲᐣ ᐊᓄᑭᐃᐧ ᐱᒧᒋᑫᐃᐧᓇᐣ, ᑕᒪᐊᐧᒋᐦᐃᑎᓇᓂᐊᐧᐣ ᐁᑲᐧ ᒥᓇ ᒋᐅᒋᑕᒪᑲᓄᐊᐧᐠ ᐊᐸᒋᒋᑲᓇᐣ ᐃᒪ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᓂᐠ.”
ᐁᑲᐧ ᒥᓇ ᐊᐃᓇᓀᐤ ᑫᐊᓄᑭᐦᐃᑕᐧ ᒋᑕᓇᓄᑭᐊᐧᐨ ᐊᓄᑭᐃᐧᑲᒥᑯᐠ, ᑕᓇᓇᑐᓂᑲᑌᐊᐧᐣ 12 ᐊᓄᑭᐃᐧᓇᐣ ᑫᑲᐯᓭᑭᐣ ᐁᐧᑎ ᐊᓂᔑᓂᓂᐃᐧ ᑕᓇᐱᐃᐧᓇᐣ, ᐊᔑᐨ 10 ᐊᓄᑭᐃᐧ ᐃᐧᐣᑕᒪᑫᐃᐧ ᐊᓄᑭᓇᑲᓇᐠ ᐁᑲᐧ ᓂᔑᐣ ᑕᔑᑫᐃᐧᓂᐠ ᐅᐊᐧᐁᐧᓇᒋᑫᐠ ᒋᐃᓇᓄᑭᐊᐧᐨ.
ᐅᑭᒪᐃᐧᐣ ᐯᐟᓇᐧᕑ ᑲᐸᑭᑎᓇᐨ ᔓᓂᔭᐣ ᐃᓇᐧᓱ ᒋᔑᐸᑭᑎᓂᐨ ᐊᓂᔑᓂᓂᐃᐧ ᑕᓇᐱᐃᐧᓇᐣ ᐁᑲᐧ ᐃᒪ ᐊᓂᔑᓇᐯ ᐊᐢᑭ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐱᒧᒋᑲᑌᐠ ᒋᐅᒋᑲᓇᐊᐧᐸᒋᑲᑌᐠ, ᐃᓂᐁᐧᓂᐊᐧᐣ ᐃᑯ ᒪᐊᐧᐨ ᓴᐣᑲᓱ ᒪᑕᐊᐧ ᐊᓂᔑᓂᓂᐃᐧ ᑕᓇᐱᐃᐧᓇᐣ, ᑫᑭᐅᐣᒋ ᐃᐧᒋᐦᐃᑯᐊᐧᐨ ᐊᓂᔑᓂᓂᐊᐧᐠ ᒋᐊᓂᐅᓇᑕᒪᓱᐊᐧᐨ ᐊᓄᑭᐃᐧ ᐱᒧᒋᑫᐃᐧᓂ ᒥᓇ ᑭᓀᐧᐡ ᑫᓄᒋᐱᒥᓭᓂᐠ ᐅᒪᒋᑕᒪᓱᐃᐧᓂᐊᐧ ᑫᐅᐣᒋᒥᓄᓭᐦᐃᑯᐊᐧᐨ ᐃᒪ ᐃᓀᑫ ᐱᐊᐧᐱᑯᑲᓂ ᐊᓄᑭᐃᐧᓂᐠ.
“ᓂᒋᑫᐣᑕᒥᐣ ᑲᑭᐸᑭᑎᓂᐨ ᔓᓂᔭ ᑫᐅᐣᒋ ᐃᐧᒋᒋᑲᑌᑭᐣ ᐊᐊᐧᔑᒣ ᒋᐊᓂ ᐃᐧᒋᐦᐃᑎᓱᒪᑲᑭᐣ ᐊᓄᑭᐃᐧ ᑲᐡᑭᐦᐅᐃᐧᓇᐣ, ᒋᔭᓂ ᓇᑭᐅᐣᑎᓇᒪᐃᐧᐣᑕᐧ ᐊᓄᑭᐃᐧ ᒪᒋᑕᐃᐧᓇᐣ ᐅᐡᑲᑎᓴᐠ, ᒥᓇ ᑫᒋᓇᐨ ᑭᓀᐧᐨ ᒋᐅᒋ ᒥᓄᐱᒧᓂᑎᓱᒪᑲᑭᐣ ᐅᐡᑭ ᐊᓄᑭᐃᐧ ᒪᒋᑕᐃᐧᓇᐣ ᑭᑕᔑᓂᓂᐃᐧ ᑕᓇᐱᐃᐧᓇᐣ ᑲᐅᒋ ᒪᒋᑐᐊᐧᐨ ᒋᐅᒋ ᐊᓱᐡᑲᒪᐧᐊᔭᑭᑕᐧ ᑲᓂᔑᓇᓄᑌᓭᐊᐧᐨ,” ᐃᑭᑐ ᐊᓫᕑᐃᐣ ᔭᐣᐠ ᐊᓂᔑᓇᐯ ᐊᐢᑭ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ ᐱᒧᒋᑫᐃᐧᐣ ᑲᓂᑲᓂ ᐊᐱᑕᒪᑫᐨ.
ᑯᕑᐁᐠ ᕑᐃᐠᐳᕑᐟ, ᐅᑭᒪᐅᓂ ᐊᓄᑭᓇᑲᐣ ᓇᓇᑲ ᑫᑯᓇᐣ ᑲᑲᓇᐊᐧᐸᑕᑭᐣ ᑐᑲᐣ ᓇᓇᑕᐃᐧᑭᑫᐣᒋᑫᐃᐧᐣ ᒥᓇ ᐅᐡᑭ ᐊᓄᑭᐃᐧ ᐊᐸᒋᒋᑲᓇᐣ, ᒥᓇ ᐯᐟᓇᐧᕑ, ᐁᑲᐧ ᒥᓇ ᑲᐅᑭᒪᐃᐧᐣᑕᐠ ᐅᑭᒪᐃᐧᓂᐠ ᐱᐊᐧᐱᑯᑲᓂ ᐊᓄᑭᐃᐧᓂ, ᑭᑎᐸᒋᒧ ᐁᐸᑭᑎᓂᐨ ᔓᓂᔭ ᒣᑲᐧᐨ ᐅᐸᐦᐅᐃᐧᐱᓯᑦ 14 ᑲᐃᓇᑭᓱᐨ ᐁᐧᑎ ᐃᑕᓫᐃᔭᐣ ᒪᐊᐧᒋᐦᐃᑐᐃᐧᑲᒥᑯᐠ ᑕᐣᑐᕑ ᐯ ᐅᑌᓇᐠ.
“ᐅᑭᒪᐃᐧᐣ ᑭᐃᑭᑐ ᒋᐅᐣᒋᑕᒪᐊᐧᐨ ᐅᒪᒋᑕᐠ ᒥᓇ ᐊᓄᑭᒪᒋᑕᐃᐧᓇᐣ ᑌᑎᐸᐦᐃ ᑲᓇᑕ ᐊᐦᑭᐠ ᒋᑌᐱᓇᒧᐊᐧᐨ ᑲᐧᔭᐠ ᐊᐸᒋᒋᑲᓇᐣ ᒥᓇ ᑲᐡᑭᐦᐁᐃᐧᓯᐃᐧᓇᐣ ᑫᓄᒋᑲᒋᑎᓇᒪᓱᐊᐧᑫᐊᐧᐨ ᒋᐅᑕᓄᑭᐃᐧᓂᐊᐧᐨ, ᒋᐊᓂᑕᑲᐧᐠ ᐱᒥᔓᓂᔭᑫᐃᐧᐣ ᒥᓇ ᑭᓀᐧᐡ ᒋᒥᓄᓭᐊᐧᑫᐊᐧᐨ ᑭᑕᔑᑫᐃᐧᓂᓇᐣ,” ᑭᐃᑭᑐ ᕑᐃᐠᐳᕑᐟ. “ᓄᑯᑦ ᑭᔑᑲ ᑲᑭᐃᐧᐣᒋᑲᑌᐠ ᐃᔑᐊᐧᐸᑕᐦᐃᐁᐧᒪᑲᐣ ᑫᓄᒋᐃᐧᒋᐦᐃᑯᐊᐧᐨ ᐊᓂᔑᓇᐯ ᐊᐢᑭ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ ᐱᒧᒋᑫᐃᐧᐣ ᒋᐅᒋᐱᒧᑕᒪᑫᐊᐧᐨ ᑲᑭᐃᓀᒋᑲᑌᑭᐣ ᒋᐃᐧᒋᒋᑲᑌᑭᐣ ᐊᓂᔑᓂᓂᐃᐧ ᒪᒋᑕᐃᐧᓇᐣ ᑲᐃᑯᑎᐯᐣᒋᑫᒪᑲᐠ, ᒋᐅᒋᑕᒪᐃᐧᐣᑕᐧ ᐊᐸᒋᒋᑲᓇᐣ ᑫᐅᐣᒋᐃᐧᒋᐦᐃᑎᓱᐊᐧᐨ ᒥᓇ ᑫᓄᒋ ᓇᐣᑭᐦᐃᑎᓱᒪᑲᑭᐣ ᐱᒧᑕᒪᓱᐃᐧᓇᐣ ᐃᒪ ᐃᓀᑫ ᐱᐊᐧᐱᑯᑲᓂ ᐊᓄᑭᐃᐧᓂᐠ, ᑫᒋᐊᐧᐠ ᐃᑯ ᑭᐁᐧᑎᓄᐠ ᐅᐣᑌᕑᐃᔪ.”
ᑭᐅᐣᒋᐸᑭᑎᓇ ᐃᒪ ᐯᐟᓇᐧᕑ ᑭᐁᐧᑎᓄᐠ ᐅᐣᑌᕑᐃᔪ ᒪᒋᑕᐃᐧ ᐊᓄᑭᐃᐧᐣ, ᐊᐧᐁᐧ ᔓᓂᔭ ᐅᑲᐃᐧᒋᐦᐃᑯᐣ ᐊᓂᔑᓇᐯ ᐊᐢᑭ ᐱᒧᒋᑫᐃᐧᐣ ᓇᓇᑲ ᐊᓄᑭᐃᐧ ᒪᒋᑕᐃᐧ ᐃᐧᒋᐦᐃᐁᐧᐃᐧᓇᐣ ᒋᐅᒋ ᐸᐸᑭᑎᓇᑭᐣ, ᑐᑲᐣ ᐸᐸᒥᑎᐸᒋᒧᐃᐧᐣ ᒥᓇ ᐊᓂᒧᒋᑫᐃᐧᓇᐣ, ᑲᐃᐧᑐᒋᑲᑌᐠ ᐅᓇᒋᑫᐃᐧᐣ ᒥᓇ ᐊᓄᑭᐃᐧ ᑲᓇᐊᐧᐸᒋᑫᐃᐧᐣ.
“ᑫᑲᐟ ᒥᓯᐁᐧ ᐅᐁᐧ ᑐᑕᒧᐃᐧᐣ ᑕᐅᐣᒋ ᑲᓇᐊᐧᐸᒋᑫᒪᑲᐣ ᐃᒪ ᑲᐃᐧᐊᓂᒪᑕᓄᑲᑌᐠ ᐱᐊᐧᐱᑯᑲᓂ ᐊᓄᑭᐃᐧᐣ, ᓇᓇᑲ ᐅᐣᒋ ᑫᑯᓇᐣ ᑲᐊᐧᐸᒋᑲᑌᑭᐣ,” ᐃᑭᑐ ᑌᐱ. “ᒪᐊᐧᐨ ᐱᑕᑲᒥᑲ ᐃᒪ ᑲᐃᐧᐃᔑᒪᑕᓄᑲᑌᐠ ᐱᐊᐧᐱᑯᑲᐣ, ᔕᑯᐨ ᐊᓂᔑᓇᐯ ᐊᐢᑭ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ ᐱᒧᒋᑫᐃᐧᐣ ᐅᐣᒋᐃᐧᒋᒋᑲᑌᐊᐧᐣ ᑲᑭᓇ ᑲᑲᐡᑭᑕᒪᓱᒪᑲᑭᐣ ᐊᓄᑭᐃᐧᓇᐣ ᒥᓯᐁᐧ ᐅᒪ ᐊᓂᔑᓇᐯ ᐊᐢᑭᐠ.”
ᑌᐱ ᑭᐃᑭᑐ ᐊᐃᐧᔭ ᐅᑐᐣᒋ ᑭᑭᓇᐊᐧᐸᒪᐊᐧᐣ ᑲᑲᐡᑭᑕᒪᓱᓂᐨ ᑐᑲᐣ “ᐁᓂ ᓇᓇᐱᓇᑫᐊᐧᐨ ᑲᐊᓂᐊᐃᔑᓇᑫᐊᐧᐨ, ᐃᑭᐁᐧᓂᐊᐧᐠ ᐅᑎ ᒪᐊᐧᐨ ᑲᐅᐡᑲᑎᓯᐊᐧᐨ.”
ᑌᐱ ᐅᐃᐧᒋᓀᑕᒧᒪᐣ ᑲᓇᓇᑐᓇᒥᓂᐨ ᕑᐃᐠᐳᕑᐟ ᒋᑭᐅᐣᑎᓂᑫᑕᒪᑫᒪᑲᐠ ᐅᒪ ᔓᓂᔭ ᑲᐸᑭᑎᓂᐨ.
“ᒪᔭᑦ ᐃᓯᓭᓂ ᑲᐃᑭᑐᐨ ᑲᓇᓇᑐᓇᐠ ᒋᑭᐅᐣᑎᓂᑫᒪᑲᐠ, ᐅᓇᓇᑐᓇᐣ ᐊᓂᐣ ᑫᓂᔑᓇᑲᐧᓂᐠ,” ᐃᑭᑐ ᑌᐱ. “ᐊᓂᔑᓇᐯ ᐊᐢᑭ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ ᐱᒧᒋᑫᐃᐧᐣ ᑭᐱᓂᓯᑕᐃᐧᓂᑲᑌ ᐁᔑᐱᒧᒋᑫᒪᑲᐠ ᑫᒋᓇᐨ ᐃᑯ ᒋᐅᐣᑎᓂᑫᑕᒪᓱᒪᑲᑭᐣ ᑲᐃᐧᒋᒋᑲᑌᑭᐣ ᐊᓄᐃᑭᐧᒪᒋᑕᐃᐧᓇᐣ, ᐊᓂᐡ ᑭᐡᐱᐣ ᐁᑲ ᐅᐁᐧ ᐃᔑᐊᐧᐸᐣᒋᑲᑌᐠ, ᑲᐃᐧᐣ ᓄᒪᑫ ᑕᑭᐱᒧᓭᒪᑲᐣ. ᒥᑐᓂ ᑕᐡ ᒋᐊᔭᑲᐧᒥᓯᓇᓂᐊᐧᐠ ᑫᑯᐣ ᑲᑐᑕᒪᐠ ᒥᓇ ᐊᓂᐣ ᑫᓂᑐᑕᒪᐠ. ᑭᐡᐱᐣ ᑭᑭᓄᐦᐊᒪᐊᐧᑭᑕᐧ ᐊᐃᐧᔭᐠ ᒥᓇ ᐊᐣᑎ ᑫᐅᐣᒋ ᑭᑫᐣᑕᒧᐊᐧᐸᐣ ᐊᓄᑭᐃᐧ ᐱᒧᒋᑫᐃᐧᓂ, ᐃᒪ ᑕᐡ ᑭᑕᐅᐣᒋ ᒪᒋᑕᒥᐣ ᒪᔭᑦ ᑭᒋᐊᓄᑭᐃᐧ ᒪᒋᑕᐃᐧᓇᐣ ᑲᐃᔑᑕᑲᐧᑭᐣ. ᐁᑲᐧ ᒥᓇ ᐁᑲ ᒋᒪᓇᐊᐧᓂᐡᑫᐧᐱᒥᑎᓱᔭᐠ ᐊᔕ ᑲᑭᐃᔑᐅᓇᐸᑕᒪᐠ ᑫᐃᔑᒪᒋᑕᔭᐠ.”