ᐅᑕᓇᐠ ᑭᒋᐅᓂᑲᓂᑕᒪᑫ ᐅᐅᒪ ᐊᓂᔑᓇᐯ ᐊᐢᑭ ᑫᐃᐡᑲᐧ ᐱᒪᑎᓯ

Create: 12/01/2015 - 19:23

ᐁᐧᐡᑲᐨ ᐅᑕᓂᑭᑕᒪᑫ ᒥᓇ ᐅᓂᑲᓂᑕᒪᑫ ᑲᑭᐊᓄᑲᐊᐧᐨ ᐅᐅᒪ ᐊᐃᐧᔭᐣ ᐊᓂᔑᓇᐯ ᐊᐢᑭ ᐁᐃᐧᑭᐦᑭᓇᐊᐧᒋᐦᐊᑲᓄᐃᐧᐨ ᐊᐱᐣ ᑲᑭᐃᐡᑲᐧᐱᒪᑎᓯᐨ ᒥᓇ ᐱᑯ ᒪᐊᐧᐨ ᐁᑭᑭᒋᑭᑫᓂᒪᑲᓄᐃᐧᐨ ᒥᓇ ᐁᑭᑭᒋᐃᓀᓂᒪᑲᓄᐃᐧᐨ ᐅᐅᒪ ᐊᓂᔑᓇᐯ ᐊᐢᑭ᙮
ᐯᕑᐊᐣᐠ ᐯᕑᑎ ᐊᐦᐃᐠ ᐊᐧᒐᐢᑯᓂᒥᐠ ᑕᔑᑫᐃᐧᓂᐠ ᑲᑭᐅᒋᐨ ᑭᐃᐡᑲᐧᐱᒪᑎᓯ ᐃᐃᐁᐧ ᒣᑲᐧᐨ ᓴᑭᐸᑲᐃᐧᐱᓯᑦ ᓂᐦᓱᔕᑊ ᑲᐃᓇᑭᓯᓂᐨ ᐁᑲᐧ ᒥᓇ ᐱᑯ ᒥᔑᓂᔭᑭ ᑭᐱᒥᐊᑯᓯ᙮
“ᐅᐅᐁᐧ ᑲᑯᓯᑲᐧᐠ ᑭᑌᐦᐃᓇᐣ ᑭᒥᒋᓇᐁᐧᓯᒥᐣ ᐊᐱᐣ ᑲᓇᑲᓄᑭᔭᐠ ᑭᑐᑌᒥᓇᐣ ᒥᓇ ᑭᑐᓂᑲᓂᑕᒪᑫᒥᓇᐣ ᐁᑲᐧ ᑲᒪᒥᑎᓀᓂᒪᔭᑲᐧ ᒥᓇ ᑲᐊᒥᒋᑫᑕᒪᐊᐧᔭᑲᐧ ᐅᑕᔭᓇᐣ ᒥᓇ ᐅᑐᑌᒪᐣ ᐁᑲᐧ ᐱᑯ ᑲᔭ ᐊᐧᒐᐢᑯᓂᒥᐠ ᑕᔑᑫᐃᐧᐣ ᑫᐃᐧᓇᐊᐧ ᐁᐅᒋ ᒥᑲᐃᐧᐣᑕᐊᐧᔭᑲᐧ,” ᐃᑭᑐ ᓇᐣ ᑭᒋᐅᑭᒪᑲᐣ ᐊᕑᐱ ᔦᐢᓄ᙮ “ᐯᕑᐊᐣᐠ ᐅᐅᐁᐧ ᐅᐃᐧᒋᐦᐃᐁᐧᐃᐧᐣ ᒪᐊᐧᐨ ᒥᐡᑕᐦᐃ ᓇᑲᐧᓄᓂ᙮ ᒥᓇ ᐱᑯ ᒥᐡᑕᐦᐃ ᑕᑫᐧᓇᐁᐧᓂᒪᑲᓄᐃᐧ ᒥᓇ ᒥᔑᐣ ᐊᐃᐧᔭᐣ ᐅᑭᐃᐧᒋᔭᐣ ᒣᑲᐧᐨ ᑲᑭᐱᒪᑎᓯᐨ ᒥᓇ ᑲᑭᐱᒥᐊᓄᑭᐨ᙮”
ᐯᕑᑎ ᒪᐊᐧᐨ ᑲᐧᔭᐠ ᑭᓂᑲᓂᑕᒪᑫ ᐅᐅᒪ ᐊᓂᔑᓇᐯ ᐊᐢᑭ ᒥᓇ ᐁᑭᐃᐧᒋᑕᐧᐨ ᐃᐧᐣᑎᑯ ᒪᒋᒋᑫᐃᐧᐣ ᐁᑲᐧ ᒥᓇ ᐅᐡᑭ ᐱᒪᒋᐅᐃᐧᐣ ᑭᑭᓄᐊᒪᑫᐃᐧᑲᒥᐠ ᒥᓇ ᐊᓂᔑᓇᐯ ᐊᐢᑭ ᔓᓂᔭᐃᐧ ᐱᒧᒋᑫᐃᐧᐣ ᒥᓇ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧ ᐱᒧᒋᑫᐃᐧᐣ ᐁᑲᐧ ᑭᐃᐧᑐᓇᐠ ᐊᓂᔑᓇᐯ ᐃᐡᑯᓄᐃᐧ ᐱᒧᒋᑫᐃᐧᐣ ᐅᑭᐃᐧᒋᐦᐃᑐᓇᐣ᙮
ᓂᐦᓴᐧ ᑭᐱᐅᑭᒪᑲᓄᐃᐧ ᐃᐃᒪ ᐊᐧᒐᐢᑯᓂᒥᐠ ᒥᓇ ᑭᐦᑭᒋᐅᑭᒪᑲᓀᓱᐃᐧ ᐃᐃᒪ ᓇᐣ 1982 ᑲᐊᑭᐊᐧᐠ ᐁᑲᐧ ᒥᓇ ᑭᐦᑭᒋᐅᑭᒪᑲᓄᐃᐧ ᐃᐃᒪ ᓇᐣ 1983 ᑲᐊᑭᐊᐧᐠ᙮
ᐯᕑᑎ ᓂᐡᑕᑦ 1970s ᑲᑭᒪᑕᓄᑭᑕᒪᑫᐨ ᐊᐱ ᐅᑕ ᓇᑐᑕᒧᑲᒥᑯᐣ ᑲᑭᑲᑫᐧᒪᒋᒋᑲᑌᑭᐣ ᐃᐃᒪ ᑭᑕᔑᑫᐃᐧᓂᓇᐣ ᐁᑲᐧ ᒥᓇ ᐁᑲ ᒪᓯᓇᐦᐃᑲᓀᓴᐣ ᑲᑭᐅᒋᐃᐧᒥᑲᐧᓂᐊᐧᐠ᙮ ᔕᑯᐨ ᐊᐱᐣ ᐊᒥᐅᒪ ᐊᐧᐊᐧᑌ ᐱᒧᒋᑫᐃᐧᐣ ᑲᑭᐊᓄᒋᒪᒋᒋᑲᑌᐠ᙮
ᒪᐃᐠ ᒣᑕᑕᐊᐧᐱᐣ ᐊᐧᐊᐧᑌ ᑲᓂᑲᓇᐱᑕᐠ ᑫᐃᐧᐣ ᓇᐣᑕ ᑭᐃᑭᑐ ᐁᑲᐧ ᑭᐡᐱᐣ ᐁᑲ ᐯᕑᑎ ᑭᐅᒋᐃᐧᒋᐦᐃᑕᐧᑯᐸᓀᐣ ᑲᐧᓂᐣ ᐅᐅᒪ ᐊᐧᐊᐧᑌ ᑕᑭᐅᒋᐊᑯᐡᑲᒪᑲᓄᐸᐣ ᓄᑯᑦ ᑲᑭᔑᑲᐠ᙮
“ᐁᑲᐧ ᓂᓇᐊᐧᐨ ᐊᐧᐊᐧᑌ ᐅᑕᐱᑕᒪᑫᐠ ᓂᐃᐧᑕᒪᐊᐧᒥᐣ ᐅᑫᐧᓂᐊᐧᐠ ᑲᓇᑲᓇᑲᓄᐊᐧᐨ ᐁᒥᑲᐃᐧᐣᑕᐊᐧᔭᑲᐧ,”
ᒣᑕᑕᐊᐧᐱᐣ ᐃᑭᑐ᙮ “ᐁᑲᐧ ᑲᐯ ᑕᐱᒥ ᒥᑲᐃᐧᐣᑕᐊᐧᑯᓄᐃᐧ ᐃᐃᒪ ᑭᑌᐦᐃᓇᐣ ᒥᓇ ᑭᒪᒥᑎᓀᐣᒋᑲᓂᓇᐣ ᑲᑭᐱᐊᓄᑭᑕᒪᑫᐨ ᐅᐅᒪ ᐊᓂᔑᓇᐯ ᐊᐢᑭ᙮ ᒥᓇ ᑲᒥᑲᐃᐧᐣᑕᐊᐧᒥᓇᐠ ᐅᑕᔭᓇᐣ ᐁᑲᐧ ᒥᓇ ᐊᐧᒐᐢᑯᓂᒥᐠ ᑕᔑᑫᐃᐧᐣ᙮”
ᐯᕑᑎ ᑲᐧᓂᐣ ᒍᒋᓇᑲᑕᐠ ᐅᑕᓂᑭᐃᐧᐣ ᐊᒥᐁᐧ ᑲᐃᔑᐱᒥᐊᐱᑕᒪᑫᐨ ᐃᐃᒪ ᐊᓂᔑᓇᐯ ᐊᐢᑭ ᑭᒋᐦᐊᔭ ᐊᐱᑕᒪᑫᐃᐧᓂᐠ᙮
ᐊᓂᔑᓇᐯ ᐊᐢᑭ ᐅᒪᓯᓇᐦᐃᑲᓂᐊᐧ ᐅᑭᓇᓇᑯᒪᐊᐧᐣ ᒪᐊᐧᐨ ᑲᑭᒪᐡᑲᐃᐧ ᓂᑲᓂᑕᒪᑫᐨ ᐯᕑᑎ ᐁᑲᐧ ᐃᐃᒪ ᑲᑭᐅᑎᓇᐠ ᐅᑭᐦᑭᓄᐊᒪᑯᐃᐧᓂᐠ ᑲᑭᐱᑭᑫᐣᑕᐠ ᒥᔑᓂᔭᑭ ᐳᑕᓇᐠ᙮
“ᑭᒋᓀᓂᒥᐁᐧᐣ ᒥᓇ ᐸᔦᑕᐠ ᑐᑕᐣ ᒥᓇ ᒪᐡᑲᐃᐧᑲᐸᐃᐧᐣ ᐁᑲᐧ ᑲᐧᓂᐣ ᑯᑕᒋᐣ ᒥᓇ ᒋᓂᐸᐃᐧᑕᒪᐣ ᑫᑯᐣ ᑲᐊᓄᑲᑕᒪᐣ᙮”
ᔦᐢᓄ ᐅᑭᒥᓇᐸᓂᐣ ᐯᕑᑎ ᑫᑯᓂᓂ ᐃᐃᒪ ᐊᐧᒐᐢᑯᓂᒥᐠ ᐅᑕᓇᐠ ᑲᑭᐊᑭᐊᐧᐠ ᐁᑲᐧ ᑭᐃᑭᑐ ᑲᑭᑭᐦᑭᓄᐊᒪᑯᔭᐠ ᐯᕑᑎ ᑲᐱᐦᐱᒪᑎᓯᐨ ᑲᐱᒥᐡᑲᒪᑲᓂᓂ᙮
“ᐁᑲᐧ ᐯᕑᐊᐣᐠ ᐁᑲ ᐁᐊᓄᑭᐨ ᑲᐯ ᐱᑯ ᑭᐧᐃᒋᐦᐃᑕᐧ ᓂᑲᓂᑕᒪᑫᐃᐧᓂᓂᐠ,” ᔦᐢᓄ ᐃᑭᑐ᙮ “ᑲᐯ ᐱᑯ ᑭᐱᒥ ᑭᑭᓄᐊᒪᑫ ᓂᑲᓂᑕᒪᑫᐃᐧᓂᓂᐠ ᐁᑲᑕᐃᐧᐣ ᐃᐧᑲ ᐁᐊᑎᓭᐠ ᒥᓴᐊᐧᐨ ᐊᓇᑭᔑᑐᔭᐣ ᑭᑕᓄᑭᐃᐧᐣ᙮
“ᐅᐅᐁᐧ ᑲᓂᑲᓂᑕᒪᑫᔭᐠ ᑭᑲᓇᓇᑯᒪᒥᐣ ᒣᑲᐧᐨ ᑲᑭᓂᑲᓂᑕᒪᑫᐨ ᒥᓇ ᑲᑭᑭᐦᑭᓄᐡᑭᑫᐨ ᐁᑲᐧ ᑲᐊᒥᒋᑫᒥᐣ ᐅᐅᐁᐧ ᐅᑕᓂᑫᐃᐧᐣ ᒋᐱᒥᐡᑲᒪᑲᓂᓂᐠ ᐅᐅᒪ ᐊᓂᔑᓇᐯ ᐊᐢᑭ,” ᔦᐢᓄ ᐃᑭᑐ᙮
ᐅᐣᑌᕑᐃᔪ ᑭᒋᐅᑭᒪᑲᐣ ᐃᐡᑕᐣ ᐯᕑᑎ ᐃᑭᑐ ᐯᕑᐊᐣᐠ ᐯᕑᑎ ᐅᐱᒪᑎᓯᐃᐧᐣ ᒥᐡᑕᐦᐃ ᐅᑭᑕᐃᐧᐡᑲᒪᐊᐧᐣ ᐊᓂᔑᓇᐯ ᐊᐢᑭ ᐊᓂᔑᓂᓂᐊᐧᐣ ᒋᐱᒥᐣᔕᐊᒥᓂᐨ ᐅᑕᓂᑭᐃᐧᐣ ᐁᐧᑎ ᐊᓂ ᓂᑲᐣ᙮
“ᐯᕑᐊᐣᐠ ᒪᐊᐧᐨ ᑭᓂᑕᐊᐧᓄᑭ ᒥᓇ ᐱᑯ ᐅᑭᐊᓄᑭᑕᒥᐊᐧᐣ ᐊᓂᔑᓂᓂᐊᐧᐣ,” ᐃᐡᑕᐣ ᐯᕑᑎ ᐃᑭᑐ᙮ “ᐅᐅᐁᐧ ᑲᑭᐅᒋᐊᓄᑭᑕᒪᑫᐨ ᒥᐡᑯᐨ ᒋᐅᒋᒥᓄᓭᐠ ᐊᓂᔑᓂᓂᐃᐧ ᐱᒪᑎᓱᐃᐧᐣ ᐅᐅᒪ ᐊᓂᔑᓇᐯ ᐊᐢᑭ᙮”