ᐅᑭᒪᑲᓇᐠ ᐸᑯᓭᐣᑕᒧᐠ ᑲᐃᐧᒪᒪᐃᐧ ᓇᓇᑕᐃᐧᑭᑫᒋᑲᓄᐊᐧᐠ ᒋᑭᓇᑫᐧᐁᐧᔑᒋᑲᑌᑭᐣ ᑫᑯᓇᐣ

ᐊᐧᐸᓴᑎᑲᐣᐠ ᑲᐃᐧᐣ ᐅᑕᔭᓯᓇᐊᐧ ᐦᐊᔾ ᐢᑯᓫ.
ᐁᑲᐧ ᒥᐡᑲᐧᐨ ᐅᑐᑕᓇᐊᐧ, ᐅᑎᐡᑯᓂᐠ ᐃᒪ ᑕᔑ ᐃᐡᑯᓄᐦᐊᑲᓄᐊᐧᐠ ᑭᐁᐧᑎᓄᐠ ᐃᐣᑐᕑᓀᐟ ᐦᐊᔾ ᐢᑯᓫ, ᐁᑲᐧ ᑭᐃᑭᑐ ᐅᑭᒪᑲᐣ ᑌᓂᐢ ᑭᐣᐠ ᐊᒥᐦᐃᒪ ᐊᓂᔕ ᐁᐅᐣᒋᐃᓯᓭᓂᐠ ᐅᐡᑲᑎᓴᐠ ᒋᑭᔑᑐᐊᐧᐨ ᐦᐊᔾ ᐢᑯᓫ ᒪᒪᐣᑕᐃᐧᐱᐊᐧᐱᑯᐠ.
“ᒣᑲᐧᐨ ᑲᔭᓂᒪᐦᒋᓭᐠ ᐃᐡᑯᓄᐃᐧᐣ ᐊᐧᑌᐸᑲᐃᐧᐱᓯᑦ ᒪᐊᐧᐨ ᐊᑯ ᒥᔑᓄᐊᐧᐠ ᑲᐅᑕᐱᓇᒧᐊᐧᐨ,” ᑭᐃᑭᑐ ᑭᐣᐠ. “ᐁᑲᐧ ᐊᐱᐣ ᐊᑯ ᓇᑫ ᐊᐱᑕ ᐅᓄᑌᐳᓂᑐᓇᐊᐧ.”
ᑭᐣᐠ, ᐅᑭᐱ ᓂᑲᓂᐱᒧᑐᓇᐸᐣ ᐃᐡᑯᓄᐱᒧᒋᑫᐃᐧᓂ ᐃᒪ ᐅᑎᐡᑯᓂᑲᓂᐠ, ᐁᑲᐧ ᑭᐃᑭᑐ ᒥᔑᐣ ᐅᑐᐡᑲᑎᓯᒪᐣ ᐅᓇᑕᐁᐧᐣᑕᓇᐊᐧ ᐅᑌᓇᐠ ᒋᑕᔑᑭᑭᓄᐦᐊᒪᐃᐧᑕᐧ ᐦᐊᔾ ᐢᑯᓫ.
ᕑᐁᒋ ᐳᐡ ᑲᐃᓇᑲᓄᐸᐣ ᒥᐦᐊᐁᐧ ᐯᔑᐠ ᐅᐡᑲᑎᐢ. ᑕᐣᑐᕑ ᐯ ᑭᐃᔕᐸᐣ ᐁᓇᑕᐃᐧ ᐃᐡᑯᓄᐃᐧᐨ ᐃᒪ ᑌᓂᐢ ᑲᕑᐊᒧᕑᑎ ᐦᐊᔾ ᐢᑯᓫ ᑲᔭᓂᑕᑲᐧᑭᓂᐠ 2007.
ᐁᑲᐧ ᐊᐱᐣ ᓇᑫ ᑲᐡᑲᑎᓄᐱᓯᑦ 2007, ᔑᒪᑲᓂᔕᐠ ᐅᑭᐊᑲᐧᓯᐱᑐᓇᐊᐧ ᐳᐡ ᐅᒥᔭᐤ ᐃᒪ ᒥᐠᑭᐣᑕᔪᕑ ᓯᐱᐠ ᒣᑫᐧᐅᑌᓇᐠ. ᓄᑯᑦ ᑲᑭᔑᑲᐠ ᑲᐃᐧᐣ ᒪᔑ ᒋᑭᑫᐣᑕᑲᐧᐠ ᐊᓂᐣ ᒪᔭᑦ ᑲᐃᐣᑎᑫᐧᐣ. ᐊᒥ ᐁᓀᐣᑕᐠ ᑭᐣᐠ ᒥᓇ ᐱᑯ ᑯᑕᑭᔭᐠ ᐅᑭᒪᑲᓇᐠ, ᑲᐃᐧᐣ ᐃᐧᑲ ᒋᑭᐅᒋ ᑭᔕᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ.
ᒥᔑᓄᔭᑭ ᑭᐸᐸᐧᑕᐃᐧᓭ ᒋᒪᑕᓄᑲᑌᓂᐠ ᐳᐡ ᑲᑭᐊᐧᓂᑐᐨ ᐅᐱᒪᑎᓯᐃᐧᐣ ᐁᑲᐧ ᑕᐡ ᑭᔭᓂᐊᔑᑎᓂᑲᑌ ᑯᑕᑭᔭᐠ ᐣᑯᑕᐧᓱ ᐊᓂᔑᓂᓂᐃᐧ ᐅᐡᑲᑎᓴᐠ ᑲᑭᐊᐧᓂᐦᐃᑕᐧ ᒋᓇᓇᑲᒋᑲᑌᓂᐠ ᒣᑲᐧᐨ ᑲᑭᐃᐡᑯᓄᐊᐧᐸᐣ ᐃᒪ ᑕᐣᑐᕑ ᐯ ᑫᑲᐟ ᐃᑯ ᐯᔑᑲᐧᐣ ᑲᑭᐃᓯᓭᐸᐣ ᐳᐡ.
ᐅᑯᐁᐧᓂᐊᐧᐠ ᑲᔦ ᑲᑭᐳᓂᐱᒪᑎᓯᐊᐧᐨ ᑲᔭᓫ ᒪᕑᓱ, 17 ᐁᑲᐧ ᒥᓇ ᕑᐊᐱᐣ ᐦᐊᕑᐳᕑ 19 ᑭᐁᐧᐃᐧᐣ ᑲᑭᐅᐣᒋᐊᐧᐨ ᑫᐃᐧᓇᐊᐧ ᐃᒪ ᑕᐊᔑᑎᓂᑲᑌᓂ ᒋᓇᓇᑕᐃᐧᑭᑫᐣᒋᑲᑌᓂᐠ ᐊᓂᐣ ᑲᐃᓇᐱᓀᐊᐧᑫᐧᐣ.
ᑭᐁᐧᐃᐧᐣ ᐅᑭᒪᑲᐣ ᑌᐱᐟ ᑕᐧᑦᓴᐣ ᑭᐃᑭᑐ ᒥᔑᐣ ᐅᐡᑲᑎᓴᐠ ᐁᒥᓴᐁᐧᐣᑕᒧᐊᐧᐨ ᐁᐃᐧᑲᐯᔑᐊᐧᐨ ᐅᑌᓇᐠ.
“ᓂᐸᑯᓭᐣᑕᓇᐸᐣ ᐣᑕᐊᐧᔑᔑᒥᓇᓂᐠ ᒋᑭᐃᐡᑯᓄᐦᐃᑕᐧᐸᐣ ᐅᒪ, ᔕᑯᐨ ᐅᐃᐧᑯᐱᓂᑯᓇᐊᐧ ᑭᒋᐅᑌᓇ ᐱᒪᐱᒪᑎᓯᐃᐧᓂ,” ᑭᐃᑭᑐ. “ᐊᒥ ᑲᐃᓇᑲᐧᐸᐣ ᐊᑎᐟ ᐊᐃᐧᔭᐠ: ᑲᐃᐧᓂᐣ ᐃᐡᑯᓄᐃᐧᐣ ᑲᐃᐧᑯᐱᓂᑯᐊᐧᐨ, ᐃᐁᐧᓂᔕᐱᑯ ᐅᑌᓈᓂ ᑲᐃᐧᑯᐱᓂᑯᐊᐧᐨ.”
ᐁᑲᐧ ᒥᓇ ᐊᑎᐟ ᑎᐯᐣᒋᑫᐃᐧᓇᐣ ᐁᑕᓀᐣᑕᒥᐦᐃᑯᐊᐧᐨ ᑲᐃᔑᑲᐯᔑᐊᐧᐨ, ᐅᐡᑲᑎᓴᐠ ᐊᐅᑕᓂᒥᐦᐃᑯᓇᐊᐧ ᒋᑭᓇᓇᒪᔦᐣᑕᒧᐊᐧᐨ ᐅᑌᓇᐠ ᑭᑲᐯᔑᐊᐧᐨ, ᑕᐧᑦᓴᐣ ᑭᐃᑭᑐ.
“ᐊᐱ ᑭᑕᐊᐧᔑᔑᒥᓇᓂᐠ ᑲᒪᒐᐊᐧᐨ, ᑭᒋᐸᑲᐣ ᑫᑯᓇᐣ ᐅᓇᑭᐡᑲᓇᐊᐧ,” ᑭᐃᑭᑐ ᑕᐧᑦᓴᐣ. “ᐃᓯᓭᓂᐸᐣ ᑕᐡ ᒋᑭᔭᓂ ᑲᑫᐧ ᓇᓇᒪᔦᐣᑕᒧᐊᐧᐸᐣ ᒋᑭᑲᐡᑭᑐᐊᐧᐸᐣ ᑭᑲᐯᔑᐊᐧᐨ ᐅᑌᓇᐠ. ᐁᑲᐧ ᐊᐱᐣ ᒥᓇ ᑲᐃᐧᐣ ᓇᐱᐨ ᐅᐃᐧᑭᒋᓀᑕᓯᓇᐊᐧ ᐅᑕᓂᔑᓂᓂᐃᐧᓂᐊᐧᐠ ᐊᐱ ᑲᐱᑭᐁᐧᐊᐧᐨ. ᐅᑐᐣᒋᐊᐧᓂᑫᐣᑕᓇᐊᐧ ᒣᑲᐧᐨ ᐁᐧᑎ ᑲᒪᑌᐊᔭᐊᐧᐨ.”
ᐅᑭᒪᑲᓇᐠ ᐅᐸᑯᓭᐣᑕᓇᐊᐧ ᓂᔭᓇᐣ ᐊᐃᐧᔭᐠ ᑲᐃᐧᐅᓇᐱᐦᐃᑕᐧ ᐃᒪ ᐅᓇᔓᐁᐧᐃᐧᑭᒪᔑᔕᐠ ᒪᒪᐃᐧ ᓇᓇᑕᐃᐧᑭᑫᐣᒋᑫᐃᐧᓂᐠ ᒋᑭᐸᑭᑎᓇᒧᐊᐧᐨ ᑲᑫᐧᑌᐧᐃᐧᓇᐣ ᑫᑭᐅᐣᒋ ᐃᐧᒋᐦᐃᐁᐧᓭᑭᐣ ᐅᐁᐧ ᑲᑭᒋᑕᓀᐣᑕᒥᐦᐃᐁᐧᒪᑲᐠ.
ᑭᐣᐠ ᑭᐃᑭᑐ ᐁᓇᑕᐁᐧᐣᑕᐠ ᐊᐧᐊᔑᒣ ᐅᑭᒪᐃᐧᓂᐠ ᒋᐅᒋ ᐸᑭᑎᓂᐨ ᔓᓂᔭ ᑫᑭᐅᐣᒋ ᐃᐧᒋᐦᐃᑕᐧ ᐅᐡᑲᑎᓴᐠ ᑲᑲᐯᔑᐊᐧᐨ ᐅᑌᓇᐠ.
“ᑐᑲᐣ ᐊᓂᐣ ᑫᑭᐃᔑ ᐅᐣᑕᒥᐦᐃᑕᐧᐸᐣ ᐁᑲ ᑫᑯᐣ ᑲᐊᔭᒪᑲᓂᐠ ᑫᑐᑕᒧᐊᐧᐨ, ᐁᑲ ᑲᔦ ᒥᐡᑲᐧᐨ ᒋᐅᒋ ᒥᓂᑫᐧᐊᐧᐸᐣ ᒥᓇ ᑯᑕᑭᔭᐣ ᑫᑯᓇᐣ ᑫᒪᒋᑐᑕᑯᐊᐧᐨ,” ᑭᐃᑭᑐ.
ᐁᑲᐧ ᐃᐧᐣ ᑕᐧᑦᓴᐣ ᑭᐃᑭᑐ, ᐅᓇᑕᐁᐧᐣᑕᐣ ᔓᓂᔭᐣ ᒋᑭᐃᔑ ᐸᑭᑎᓂᑎᐸᐣ ᐃᐡᑯᓂᑲᓂᐠ ᐁᑲ ᒥᐡᑲᐧᐨ ᒋᓇᑲᑕᒧᐊᐧᐨ ᐅᑕᔑᑫᐃᐧᓂᐊᐧ ᐅᐡᑲᑎᓴᐠ.
“ᑲᓂᑲ ᑕᐡ ᐅᑭᒪᐃᐧᐣ ᑭᔭᐱᐨ ᐊᐊᐧᔑᒣ ᐸᑭᑎᓇᑭᐸᐣ ᐊᐸᒋᒋᑲᓇᐣ, ᑫᑭᓇᐃᐧᐟ ᐃᑯ ᒋᑭᐱᒧᑐᔭᑭᐸᐣ ᑭᑎᐡᑯᓄᐃᐧ ᐱᒧᒋᑫᐃᐧᓂᓇᐣ, ᑲᓇᑫ ᐅᑎ ᐊᑯᓇᐠ ᒥᑕᓱ ᑲᐃᑯᓭᐠ ᐃᐡᑯᓄᐃᐧᐣ ᒋᑭᐊᔭᔭᑭᐸᐣ,” ᑭᐃᑭᑐ ᑕᐧᑦᓴᐣ. ᐅᓄᐁᐧᓂᐊᐧᐣ ᑕᐡ ᑫᐸᑭᑎᓂᑲᑌᑭᐣ ᓇᑐᑕᒪᑫᐃᐧ ᑲᑫᐧᑌᐧᐃᐧᓇᐣ ᑲᐃᐧᐣ ᐃᐧᐣ ᑎᐸᑯᓂᑫᐃᐧᓂᐠ ᑕᐃᔑᒥᐣᒋᒪᑌᓯᐣ, ᔕᑯᐨ ᑕᐧᑦᓴᐣ ᐃᔑᐸᑯᓭᐣᑕᑦ “ᐅᑭᒪᐃᐧᐣ ᒋᐅᑕᐱᓇᑭᐣ ᐱᑯ ᐊᓂᐣ ᑫᐃᔑ ᑲᑫᐧᒋᒪᑲᓄᐨ ᐃᒪ ᑫᐅᐣᒋ ᒧᑭᓭᑭᐣ ᓇᓇᑕᐃᐧᑭᑫᐣᒋᑫᐃᐧᓂᐠ.”
ᐊᓂᔑᓇᐯ ᐊᐢᑭ ᐅᑭᒪᑲᓀᐢ ᑌᕑᐃ ᐊᐧᐳᐢ ᑫᐃᐧᐣ ᑭᐃᑭᑐ ᐁᓇᑕᐁᐧᐣᑕᑲᐧᐠ ᐊᐧᐊᔑᒣ ᒋᑭᑕᑲᐧᑭᐸᐣ ᐅᑕᓱᐡᑲᒪᑯᐃᐧᓂᐊᐧ ᐅᑎᐡᑯᓂᐠ ᑲᑲᐯᔑᐊᐧᐨ ᐅᑌᓇᐠ ᒥᓇ ᐱᑯ ᐊᓂᔑᓂᓂᐊᐧᐠ ᑲᐃᐡᑯᓄᐊᐧᐨ.
“ᓂᓯᑕᐃᐧᓇᑲᐧᐣ ᐁᑲ ᐁᑌᐱᓭᐃᐧᓇᑲᐧᐠ, ᐁᑲᐧ ᑕᐡ ᑭᐡᐱᐣ ᓇᐣᑭᐸᑭᑎᓂᑲᑌᑲᐧᐸᐣ ᐅᐃᐧᒋᐦᐃᑯᐃᐧᓂᐊᐧ ᑲᐃᐧᓂᐣ ᐃᑯ ᐁᑕ ᐃᒪ ᐅᑎᐡᑯᓄᐦᐃᑯᐃᐧᓂᐊᐧᐠ ᐃᒪ ᐱᑯ ᑲᔦ ᑲᐃᔑᑲᑫᐧ ᑲᐡᑭᑕᒪᓱᐊᐧᐨ ᑫᑯᓇᐣ ᒣᑲᐧᐨ ᐅᑌᓇᐠ ᐁᑲᐯᔑᐊᐧᐨ,” ᑭᐃᑭᑐ.
ᐊᐧᐳᐢ ᑭᐃᑭᑐ ᓇᑕᐁᐧᐣᑕᑲᐧᐣ ᑲᔦ ᒋᔭᓄᑲᑌᐠ ᐊᓂᐣ ᑫᐃᔑ ᐊᔭᐣᑲᐧᒥᓂᑕᐧ ᐅᐡᑲᑎᓴᐠ ᒣᑲᐧᐨ ᐅᑌᓇᐠ ᑲᑲᐯᔑᐊᐧᐨ, ᐁᑲᐧ ᒥᓇ ᐯᑭᐡ ᑲᐃᔑᑭᑫᐣᑕᑲᐧᐠ ᐃᓯᓭᐃᐧᓇᐣ ᑲᓇᑭᐡᑲᒧᐊᐧᐨ ᐊᓂᔑᓂᓂᐃᐧ ᐅᑎᐡᑯᓂᐠ ᑐᑲᐣ ᓂᐡᑫᓂᒥᑯᐃᐧᐣ.
ᐁᑲᐧ ᒥᓇ ᐃᐁᐧᓂ ᒪᐊᐧᐨ ᐅᑭᒪᑲᓇᐠ ᑲᐃᐧ ᑭᑫᐣᑕᒧᐊᐧᐨ ᐊᓂᐣ ᒪᔭᑦ ᑲᐃᐣᑎᐊᐧᐨ ᐅᑯᐁᐧᓂᐊᐧᐠ ᐅᐡᑲᑎᓴᐠ ᑲᑭᐊᐧᓂᑐᐊᐧᐨ ᐅᐱᒪᑎᓯᐃᐧᓂᐊᐧ.
“ᐊᒥ ᑫᓂᐣ ᐁᔑᐸᑯᓭᐣᑕᒪᐣ ᑕᓯᐣ ᑲᑭᐸᑭᑌᐡᑲᑯᐊᐧᐨ (ᐅᐁᐧᓂ ᒪᒪᐃᐧ ᓇᓇᑕᐃᐧᑭᑫᐣᒋᑫᐃᐧᓂ) ᒋᐃᐧᐣᐅᑎᓇᒧᐊᐧᐨ ᓇᐣᑫᑕᒧᐃᐧᐣ ᐊᓂᐣ ᒪᔭᑦ ᑲᐃᑭᓄᑫᐧᐣ,” ᑭᐃᑭᑐ ᑭᐣᐠ.
ᐊᓇᐃᐧᐣ ᐊᐧᐁᐧ ᐅᑕᓄᑭᑕᒪᑫ ᐃᒪ ᒥᔭᐊᐧᐣ ᑲᐅᐣᒋ ᓇᓇᑕᐃᐧᑭᑫᐣᒋᑲᑌᑭᐣ ᐁᑭᐃᔑᓂᑲᑕᐠ ᐁᑫᐧᓇᐠ ᐃᑯ ᐅᐁᐧ ᒋᑐᒋᑲᑌᐠ ᐁᐧᓴ ᐁᑭᒥᔑᓄᐊᐧᐨ ᑲᑭᐅᐣᑕᐱᓀᐊᐧᐨ ᐅᒪ ᐃᓀᑫ, ᐊᐧᐳᐢ ᑕᐡ ᑭᐃᑭᑐ ᑭᒋᓀᐣᑕᑲᐧᐣ ᒋᑲᑫᐧ ᐅᐣᑎᓂᑲᑌᑭᐣ ᓇᑫᐧᐁᐧᔑᒥᐁᐧᐃᐧᓇᐣ ᑲᑭᓇᑕᐁᐧᐣᑕᑲᐧᑭᐣ.
“ᓇᐱᐨ ᑕᒥᔑᓄᓭᐊᐧᐣ ᑫᑯᓇᐣ ᑫᑲᓇᐊᐧᐸᒋᑲᑌᑭᐣ ᐁᑲᐧ ᒥᓇ ᐁᐡᑲᑦ ᓇᐱᐨ ᑕᐊᓂᒪᐣ, ᔕᑯᐨ ᑕᐡ ᐃᑯ ᐃᓯᓭ ᒋᑲᑫᐧᐊᓄᑲᒋᑲᑌᐠ ᒥᓇ ᑌᐯᐧᐃᐧᐣ ᒋᑲᑫᐧ ᑭᑫᐣᑕᑯᒋᑲᑌᐠ,” ᑭᐃᑭᑐ. “ᐊᒥᐦᐅᐁᐧ ᑫᓂᐣ ᒪᐊᐧᐨ ᑲᑕᓀᐣᑕᒥᐦᐃᑯᔭᐣ ᒥᓇ ᐁᔑᐸᑯᓭᐣᑕᒪᐣ ᐁᑲ ᐃᐧᑲ ᒥᓇᐊᐧ ᑯᑕᐠ ᐅᐡᑲᑎᐢ ᐅᒪ ᐃᓀᑫ ᒋᐃᔑᐊᐧᓂᐦᐊᑭᑕᐧ ᐅᑯᐁᐧᓂᐊᐧᐠ ᐅᑕᓇᐠ ᑲᑭᐱᔑᐊᐧᐊᐧᓂᐦᐊᔭᑭᑕᐧ.”