ᑭᔭᐱᐨ ᐱᒥᓇᓇᑐᓂᑲᓂᐊᐧᐣ ᐯᔓᐨ ᑫᑌ ᐃᐡᑯᓄᑲᒥᐠ ᑲᑭᐃᔑᑕᑲᐧᐠ ᑲᑭᓀᐱᒋᐊᐧᓂᐦᐃᐣᑕᐧ ᐅᑎᐡᑯᓂᐠ

ᑲᑭᒥᑭᑲᑌᓂᑭᐣ ᐅᐦᑲᓇᐣ ᓂᔑᐣ ᐃᐧᒋᓂᑕᐃᐧᑭᒪᑲᓇᐠ ᐯᔓᐨ ᐯᓫᐃᑲᐣ ᐦᐊᔾ ᐢᑯᓫ ᒥᐦᐃᒪ ᑲᑭᐅᐣᒋᒧᑭᓭᐠ ᑭᔭᐱᐨ ᐊᐊᐧᔑᒣ ᒋᓇᓇᑐᓂᑲᓂᐊᐧᐠ ᑌᑎᐸᐦᐃ ᐃᐡᑯᓄᑲᒥᑯᐠ.
ᐁᑲᐧ ᐃᒪ ᑲᑭᐅᐣᒋᒥᑭᑲᑌᑭᐣ ᐅᑯᐁᐧᓂᐊᐧᐠ ᓇᐯᓴᐠ ᐅᑲᓂᐊᐧᐠ, ᒥᔑᐣ ᑲᔦ ᐊᐃᐧᔭᔑᔑᐅᑲᓇᐣ ᑭᒥᑭᑲᑌᐊᐧᐣ ᐃᒪ ᐯᔓᐨ ᐯᓫᐃᑲᐣ ᐦᐊᔾ ᐢᑯᓫ.
ᐃᒪ ᑕᐡ ᑲᑭᐊᔭᒪᑲᐠ ᐊᐧᓇᐦᐃᑲᐣ ᐊᑲᒥᐠ ᐃᓀᑫ ᑲᐃᔑᐸᑕᑭᑌᐠ ᐃᐡᑯᓄᑲᒥᐠ ᑭᒥᑭᑲᑌᐊᐧᐣ ᐊᓂᔑᓂᓂᐃᐧᐅᑲᓇᐣ, ᐊᒥ ᑲᑭᐃᑭᑐᐨ ᑭᒋᒪᐡᑭᑭᐃᐧᓂ ᑲᐟᕑᐃᐣ ᐠᕑᐅᐢᐱᔦ ᐁᐧᑎ ᑐᕑᐊᐣᑐ ᑲᑕᓇᓄᑭᐨ ᒥᔭᐊᐧᐣ ᑲᓇᓇᑲᒋᑐᐨ.
ᐊᐧᐁᐧ ᑕᐡ ᐊᓂᔑᓂᓇᐯᒪᐡᑭᑭᐃᐧᓂ ᐊᓫᐊᐣ ᐅᑦᐸᐡ ᐃᐧᐣ ᑲᑭᐃᑭᑐᐨ ᐅᓄᐁᐧᓂᐊᐧᐣ ᐅᑲᓇᐣ ᑲᑭᒥᑭᑲᑌᑭᐣ ᐃᓴᐣ ᐅᑯᐁᐧᓂᐊᐧᐠ ᒐᕑᓫᐃᐢ ᒥᓇ ᑕᐧᒪᐢ ᐅᑦᐸᐡ ᑲᑭᓀᐱᒋᐊᐧᓂᐦᐃᑕᐧᐸᐣ.
ᐅᑯᐁᐧᓂᐊᐧᐠ ᓂᔑᐣ ᓇᐯᓴᐠ ᑭᑭᒥᐊᐧᑯᐸᐣ ᐃᒪ ᐃᐡᑯᓄᑲᒥᑯᐠ ᒣᑲᐧᐨ 1950 ᑲᑭᐱᓭᐠ.
ᐅᑦᐸᐡ ᑎᐯᐣᒋᑫᐃᐧᐣ ᐅᑭᑭᐁᐧᐃᐧᑐᓇᐊᐧ ᓇᐯᓴᐠ ᐅᑐᑲᓂᒥᐊᐧᐠ ᐱᔓᓴᑲᐦᐃᑲᓂᐠ ᐁᑭᓇᑕᐃᐧ ᓂᐣᑲᐧᐦᐊᒧᐊᐧᐨ.
ᑲᑭᒥᑭᑲᑌᑭᐣ ᐅᑲᓇᐣ ᒥᐱᑯ ᑭᔭᐱᐨ ᒥᔑᐣ ᑎᐯᐣᒋᑫᐃᐧᓇᐣ ᐁᐃᐧᑭᑫᐣᑕᒧᐊᐧᐨ ᐊᓂᐣ ᑲᑭᐃᔑᐁᐧᐱᓯᓂᑫᐧᐣ ᐅᐊᐧᑯᒪᑲᓄᐊᐧ.
ᐁᑲᐧ ᐃᒪ ᐯᓫᐃᑲᐣ ᐦᐊᔾ ᐢᑯᓫ ᒥᓇᐊᐧ ᑕᔭᓂᒪᒋᐃᐡᑯᓄᐊᐧᐠ ᐅᑎᐡᑯᓂᐠ ᐅᐸᐦᐅᐃᐧᐱᓯᑦ 28 ᐃᓇᑭᓱᓂᐨ, ᒥᑕᐡ ᐅᐱᑭᔑᑯᑲ ᐅᑭᒪᑲᐣ ᐠᓫᐃᐳᕑᐟ ᐳᓫ ᑲᑭᐃᑭᑐᐨ ᓇᑕᐁᐧᐣᑕᑲᐧᐣ ᒋᑭᓇᓇᑐᓂᑲᓂᐊᐧᑭᐸᐣ ᐃᒪ ᐊᐧᑲᐦᐃ ᐁᒪᐧᔦ ᐊᓂᒫᒌᐃᐡᓄᐊᐧᐨ ᐁᑲᐧ ᒥᓇ ᒋᑭᐅᓇᓯᐣᑕᐧᐸᐣ ᑫᑭᐊᐱᑕᒪᑫᐊᐧᐸᐣ ᒋᐅᒋ ᐊᓄᑭᑕᒧᐊᐧᐨ ᑭᔭᐱᐨ ᐅᐁᐧ ᑲᐱᒥᓄᒋᐦᐃᐁᐧᒪᑲᐠ ᐁᐧᐡᑲᐨ ᑲᑭᐱᑲᓇᐁᐧᐣᑕᑯᓯᐊᐧᐸᐣ ᐊᐊᐧᔑᔕᐠ ᐃᒪ ᐃᐡᑯᓄᑲᒥᑯᐠ.
ᑭᐅᓇᒋᑫᐊᐧᐠ ᑕᐡ ᐅᐸᐦᐅᐃᐧᐱᓯᒧᐣ ᒥᓇᐊᐧ ᒋᓇᓇᑐᓂᑫᐊᐧᐨ ᐁᑲᐧ ᒥᓇᐊᐧ ᐁᐧᑎ ᐊᓂᓰᑲᐧᓂᐠ.
“ᑲᐃᐧᐣ ᑕᐃᔑᐳᓂᒋᑲᑌᓯᐣ, ᐊᐊᐧᔑᒣ ᐱᑯ ᑕᔭᓄᑲᑌ ᐊᐱᐨ ᐃᐧᐣ ᐅᑕᓇᐠ ᑲᑭᐱᐃᓯᓭᑭᐸᐣ,” ᑭᐃᑭᑐ ᐳᓫ.
ᐳᓫ ᑭᐃᑭᑐ ᓇᑕᐁᐧᐣᑕᑲᐧᐣ ᐊᐊᐧᔑᒣ ᑭᔭᐱᐨ ᒋᓇᓇᑐᓂᑲᓄᐊᐧᐠ ᐃᒪ ᑌᑎᐸᐦᐃ ᐯᓫᐃᑲᐣ ᐸᐧᓫᐢ, ᒋᔭᐸᒋᒋᑲᑌᑭᐣ ᒪᒪᐣᑕᐊᐧᐱᑯᐠ ᑲᐅᐣᒋᐸᔭᑌ ᐃᐧᐣᒋᑫᒪᑲᑭᐣ ᑫᑯᓇᐣ ᑲᓇᓇᑐᓂᑲᑌᑭᐣ.
“ᒥᑕᐡ ᐃᐧᓂᑯ ᐁᔭᓂᑐᑕᒪᐣᐠ ᑲᑕᓀᐣᑕᑲᐧᑭᐣ ᐃᒪ ᐁᐊᔭᑭᐣ ᐅᑲᓇᐣ, ᐯᑭᐡ ᑲᔦ ᐣᑕᐸᒋᑐᒥᐣ ᐅᐡᑭᐊᐸᒋᒋᑲᓇᐣ,” ᑭᐃᑭᑐ ᐳᓫ.
ᕑᐊᓱ ᐁᐧᐢᓫᐃ ᑫᐃᐧᐣ ᐃᒪ ᑭᑕᑭᐧ ᐱᔓᓴᑲᐦᐃᑲᓂᐠ ᑲᑭᐱᐅᐣᒋᐊᐧᐨ ᐅᓇᓇᑐᓂᑫᐠ ᒣᑲᐧᐨ ᓴᑭᐸᑲᐃᐧᐱᓯᑦ ᑲᑭᓇᓇᑐᓇᒧᐊᐧᐨ ᐅᑦᐸᐡ ᓇᐯᓴᐠ ᐅᑲᓇᐣ.
ᐁᑲᐧ ᑲᔦ ᑲᑭᐃᐧᒋᑕᐧᐊᐧᐨ ᐅᐱᔑᑯᑲᐣᐠ ᑲᓀᑎᔭᐣ ᐱᑲᐧᑕᑭᐣᐠ ᑲᐸᐸᒥ ᑭᑭᓄᐦᐊᒪᐃᐧᐣᑕᐧ, ᑫᐃᐧᓇᐊᐧ ᐅᑭᒥᑲᓇᐊᐧ ᐊᐣᑎ ᑫᑭᐃᔑ ᓇᓇᑐᓂᑲᓂᐊᐧᑭᐸᐣ.
“ᐅᑦᐸᐡ ᑎᐯᐣᒋᑫᐃᐧᐣ ᑭᐃᑭᑐᐊᐧᐠ ᒋᑎᐸᑯᓇᐊᐧᐨ ᐊᔭᒥᐦᐊᐃᐧ ᐱᒧᒋᑫᐃᐧᓂ ᒥᓇ ᐱᑯ ᑲᓇᑕ ᑭᒋᐅᑭᒪᐣ,” ᑭᐃᑭᑐ ᐁᐧᐢᓫᐃ. “ᔕᑯᐨ ᑯᑕᑭᔭᐠ ᐊᔭᐊᐧᐠ ᐅᑎᐡᑯᓂᐠ ᐁᑲ ᒪᔑ ᑲᑭᒥᑲᐃᐧᐣᑕᐧ.”
ᐁᐧᐢᓫᐃ ᑭᐅᐦᑯᒥᓯ ᐅᓄᐁᐧᓂᐊᐧᐣ ᓂᔑᐣ ᐅᑦᐸᐡ ᓇᐯᓴᐠ, ᐁᑲᐧ ᑫᐃᐧᐣ ᑭᐱᐃᐡᑯᓄᐦᐊᑲᓄ ᐃᒪ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᑕᔑᑲᐁᐧᐣᑕᑯᓯᐊᐧᐨ ᐃᐡᑯᓄᑲᒥᑯᐠ.
“ᓂᔑᐣ ᑎᐯᐣᒋᑫᐃᐧᓇᐣ ᑭᓂᔑᐊᐧᓇᒋᒋᑲᑌᐊᐧᐣ ᐃᔑᓇᑲᐧᐣ, ᐁᑲᐧ ᑕᐡ ᑲᐃᐧᐣ ᐊᐃᐧᔭ ᑫᑯᐣ ᐅᑲᑫᐧᑐᑕᓯᐣ,” ᑭᐃᑭᑐ ᐁᐧᐢᓫᐃ. “ᐃᐁᐧ ᑕᐡ ᒪᐊᐧᐨ ᑲᑯᐸᑌᐣᑕᑲᐧᐠ ᓂᐦᓱᔕᐠ ᐊᐊᐧᔑᔕᐠ ᑲᑭᐊᐧᓂᐦᐃᑕᐧᐸᐣ ᑲᐃᐧᐣ ᒪᔑ ᑭᑫᐣᑕᑲᐧᐣ ᐊᐣᑎ ᑲᐃᓯᓭᐊᐧᑫᐧᐣ ᑲᑭᐃᐡᑯᓄᐊᐧᐸᐣ ᐯᓫᐃᑲᐣ.”
ᐁᐧᐢᓫᐃ ᑭᐃᑭᑐ ᐅᒥᑯᐡᑲᒋᐦᐃᑯᐣ ᑕᐱᐡᑯᐨ ᐃᑯ ᐃᓀᐣᑕᑲᐧᐣ ᐁᑲ ᐊᐃᐧᔭ ᐁᔭᓇᒣᑕᑯᓯᐨ ᑲᑭᐃᑭᐠ ᐃᐡᑯᓄᑲᒥᑯᐠ, ᑲᓀᐱᒋᐊᐧᓂᐦᐃᑕᐧ ᐊᐊᐧᔑᔕᐠ.
“ᒥᓂᑯᐠ ᐃᑯ ᑫᒥᓄᔭᔭᐣ, ᑲᐃᐧᐣ ᐃᐧᑲ ᐣᑲᐅᐣᒋᐳᓂᒋᑫᓯᐣ ᑲᐃᐧᐱᒥ ᓇᓇᑐᓂᑲᓄᐊᐧᐠ,” ᑭᐃᑭᑐ ᐁᐧᐢᓫᐃ.
ᑭᐃᑭᑐ ᒥᓇᐊᐧ ᐁᐃᓀᐣᑕᐠ ᐁᐧᒥᑎᑯᔑᐃᐧᑕᔑᑫᐃᐧᓂᐠ ᑲᑲᐯᔑᐊᐧᐨ ᑲᐃᐧᐣ ᒋᓂᓯᑕᐁᐧᐣᑕᒧᐊᐧᐨ ᐊᓂᐣ ᑲᑭᔭᐱᒋᐊᓂᒥᓴᐦᐃᐁᐧᒪᑲᐠ ᐅᐁᐧ ᐃᐡᑯᓄᑲᒥᐠ, ᓇᐣᑕ ᒥᓇ ᑲᐃᐧᐣ ᐃᑯ ᒋᐃᐧᑭᑫᐣᑕᒧᐊᐧᐨ.
“ᒪᐊᐧᐨ ᐃᑯ ᐅᑭᒪᒋᓭᐦᐃᑯᓇᐊᐧ ᐅᑎᐡᑯᓄᐠ, ᑭᔭᐱᐨ ᐃᑯ ᐅᐁᐧ ᓄᑯᑦ ᑲᑭᔑᑲᐠ,” ᑭᐃᑭᑐ ᐁᐧᐢᓫᐃ.
ᐁᒉ ᒐᐠ, ᑲᓂᑲᓂᐡᑲᐠ ᐅᐱᔑᑯᑲᐣᐠ ᐱᑲᐧᑕᑭᐣᐠ ᑲᑭᑭᓄᐦᐊᒪᐃᐧᐣᑕᐧ ᑫᐃᐧᐣ ᐃᒪ ᑭᑕᑭᐧ ᓂᐢᑕᑦ ᐊᐱᐣ ᑲᒪᒋᑕᐧᐊᐨ ᐱᔓᓴᑲᐦᐃᑲᓂᐠ ᐅᓇᓇᑐᓂᑫᐠ.
“ᐣᑭᐱᔕᒥᓇᐸᐣ ᐅᒪ, ᑭᓄᐱᒥᐁᐧᐣᑕᑲᐧᓄᐸᐣ ᐃᐁᐧ ᐊᐱ ᐁᑭᒥᔑᓄᐊᐧᐸᐣ ᐊᐃᐧᔭᐠ ᒣᑲᐧᐨ ᑲᑭᐅᔑᑐᐊᐧᐸᐣ ᐃᐡᑯᑌᐃᐧᑕᐸᓂ ᒥᑲᓇᓂ ᒋᐃᓇᒧᒋᑲᑌᐠ ᐯᓫᐃᑲᐣ,” ᑭᐃᑭᑐ ᒐᐠ ᐃᒪ ᑫᑌ ᐱᐊᐧᐱᑯᑲᓂ ᐃᐡᑯᑌᐃᐧᑕᐸᓂ ᒥᑲᓇᐠ.
“ᒥᓯᐁᐧ ᐅᒪ ᐣᑭᓇᓇᑐᓂᑫᐣ ᐁᑲᐧ ᐱᓂᐡ ᐅᑲᓇᐣ ᐣᑭᔭᓂᒥᑲᒥᐣ,” ᐃᑭᑐ ᒐᐠ.
ᑭᐃᑭᑐ ᐱᔓᓴᑲᐦᐃᑲᓂᐠ ᐅᓇᓇᑐᓂᑫᐠ ᐅᑭᒥᑲᓇᐊᐧ ᑲᑭᒧᓇᐦᐃᑫᐊᐧᐨ ᑫᑌ ᐊᓯᓂᑲᓇᐠ, ᐊᑭᑲᐧᐠ ᒥᓇ ᐸᓇᑭᑲᐧᐠ, ᐁᑭᐃᔑᐊᐧᐸᐣᑕᒧᐊᐧᐨ ᑌᐯᐧ ᐃᒪ ᐁᑭᑕᔑᐃᐧᑐᐊᐧᑯᐸᐣ ᐊᐃᐧᔭᐠ.
ᑭᑭᒪᐡᑭᑭᐃᐧᓂ ᒪᐃᑯ ᐃᐧᓫᓴᐣ, ᑲᓇᓇᑲᒋᑐᐨ ᒥᔭᐊᐧᐣ ᐃᒪ ᑕᐣᑐᕑ ᐯ ᐅᑭᑲᑫᐧᒋᒥᑯᐣ ᐊᓂᔑᓇᐯ ᐊᐢᑭ ᑲᓂᑲᓂᑕᒪᑫᐊᐧᐨ ᒋᑭᐱᓇᓇᑲᒋᑐᐸᐣ ᐃᒪ ᑲᑭᑕᔑᓇᓇᑐᓂᑲᓄᐊᐧᐠ.
“ᒥᐱᑯ ᐸᔦᐡ ᐁᑭᐃᔕᔭᐣ ᑲᑭᐱᔑᓇᑐᒥᑯᔭᐣ,” ᑭᐃᑭᑐ ᐃᐧᓫᓴᐣ. “ᐁᑲᐧ ᐁᐧᑎ ᑲᑕᓇᓄᑲᑌᐠ ᒥᔭᐊᐧᐣ ᑲᐅᒋᓇᓇᑲᒋᒋᑲᑌᑭᐣ ᑕᐅᓀᐣᑕᑲᐧᐣ ᑭᐡᐱᐣ ᐃᒪ ᒋᑭᐅᐣᒋᑭᐃᐧᒋᑕᐊᐧᑫᐧᐣ ᑭᔭᐱᐨ ᓇᐣᑕ ᐁᑲ ᒥᓇᐊᐧ ᒥᑭᑲᑌᑭᐣ ᐅᑲᓇᐣ.”
ᐁᑲᐧ ᑕᐡ ᒥᔑᓇᐧᔦᐠ ᑭᔭᐱᐨ ᐱᒥᑐᒋᑫᒪᑲᐣ ᐃᐁᐧ ᑫᑌᐃᐡᑯᓄᐃᐧᐣ ᐃᒪ ᒣᑲᐧᐨ ᓄᑯᑦ ᐃᐡᑯᓄᑲᒥᐠ ᑲᐃᔑᐊᔭᒪᑲᐠ - ᓇᐧᕑᒪ ᑭᒋᐠ, ᑲᐅᑭᒪᐃᐧᐨ ᑭᐁᐧᑎᓄᐠ ᐊᓂᔑᓇᐯᐠ ᑭᑭᓄᐦᐊᒪᑫᐃᐧᐣ ᑲᐅᓇᔓᐊᐧᑕᒧᐊᐧᐨ (NNEC) ᑭᐃᑭᑐ “ᐊᔕ ᒥᔑᓄᔭᑭ ᐁᐱᐅᐣᒋᐊᒪᓂᓱᐊᐧᐨ ᐃᒪ ᐃᐡᑯᓄᑲᒥᑯᐠ ᑲᐃᔑᐸᑕᑭᑌᐠ.”
ᑭᒋᐠ ᒥᓇᐊᐧ ᑭᔭᓂᑭᑐ ᐊᑎᐟ ᐊᓄᑭᓇᑲᓇᐠ ᑭᑲᑫᐧᑌᐧᐊᐧᐠ ᒋᐊᐣᑕᓄᑭᐦᐃᑕᐧ ᒣᑲᐧᐨ ᐃᒪ ᐁᔭᓄᑭᐊᐧᐸᐣ ᐯᓫᐃᑲᐣ, ᐊᔑᐨ ᑲᔦ ᐅᑯᓯᓴᐣ, ᐯᔑᑯᔭᑭ ᐁᑕ ᐃᒪ ᑭᐊᓄᑭᐊᐧᐣ - ᐁᐧᓴ ᐁᑭᓂᑕᐊᒪᓂᓱᓂᐨ.
“ᐯᔑᐠ ᐣᑕᔭᐊᐧᒥᐣ ᐣᑕᓄᑭᓇᑲᓂᒥᓇᐣ ᐃᒪ ᓇᐣᑕ 27 ᑕᓱᔭᑭ ᐊᔕ ᐁᑭᐱᐅᐣᒋᐊᓄᑭᐨ, ᐃᒪ ᑭᐅᐣᒋᒪᒋᑕᐸᐣ ᐅᑎᐡᑯᓂᐠ ᑲᐃᔑᑲᐯᔑᐦᐃᐣᑕᐧ ᐁᑭᑕᓇᓄᑭᐸᐣ, ᒥᑕᐡ ᑲᑭᐅᐣᒋ ᓇᑕᐁᐧᐣᑕᐠ ᐸᑲᐣ ᒋᐃᔑᐊᓄᑭᐦᐊᑲᓄᐨ,” ᑭᐃᑭᑐ ᑭᒋᐠ. “ᐊᒥ ᑲᑭᔭᓂᓀᐣᑕᐠ ᐁᔭᓂᑭᐊᐧᐡᑫᐨ.”
ᐊᓇᐃᐧᐣ ᐅᐁᐧ ᑲᑭᐃᔑᐅᓇᒋᑲᓄᐊᐧᐠ ᒋᓇᓇᑐᓂᑲᓄᐊᐧᐠ, ᑲᐊᒪᓂᓱᓇᓂᐊᐧᐠ ᑲᐃᑭᑐᓇᓂᐊᐧᐠ ᒥᓇ ᑲᐱᒥᓄᒋᐦᐃᐁᐧᒪᑲᐠ ᐁᐧᐡᑲᐨ ᐃᐡᑯᓄᐃᐧᐣ ᑲᑭᐱᑐᑕᐃᐧᐣᑕᐧ ᐅᑎᐡᑯᓂᐠ, ᐊᒥ ᑲᑭᐃᑭᑐᐨ ᑭᒋᐠ ᒥᐱᑯ ᑫᐃᔑᐱᒥᑐᒋᑲᑌᐠ ᐃᐡᑯᓄᐃᐧᐣ ᑕᐱᐡᑯᐨ ᐃᑯ ᐁᑲ ᓇᐣᑕ ᐁᐃᔑᐸᑲᓂᓭᐠ.