ᐊᐧᐃᐧᔦᑲᒪ ᐊᓂᔑᓂᓂᐊᐧᐠ ᐃᐧᓇᐊᐧ ᐱᑯ ᐅᑭᑲᑫᐧ ᐊᑕᐁᐧᐦᐊᓇᐊᐧ ᑲᑭᓴᑭᑌᓂᐠ

ᐃᐧᓇᐊᐧ ᐱᑯ ᐊᐧᐃᐧᔦᑲᒪ ᐊᓂᔑᓂᓂᐊᐧᐠ ᑭᑲᑫᐧ ᐊᑕᐁᐧᐦᐊᒪᓱᐊᐧᐠ ᑲᑭᓴᑭᑌᓂᐠ ᐯᔓᐨ ᐃᐧᐣᑎᑯ ᓴᑲᐦᐃᑲᓂᐠ ᐁᑲᐧ ᐊᐱᐣ ᒥᔑᐣ ᑲᑭᔭᓂᒐᑭᑌᓂᑭᐣ ᐅᐊᐧᑲᐦᐃᑲᓂᐊᐧ ᒥᓇ ᐅᑕᐸᒋᒋᑲᓂᐊᐧ ᐃᒪ ᑲᑭᐃᔑᓴᑭᑌᓂᐠ.
ᐁᑲᐧ ᑲᔭᓂᐊᐱᑕᐊᐧᑭᓱᐨ ᐅᐸᐡᑯᐃᐧᐱᓯᑦ ᒥᐊᐱ ᑲᑭᔭᓂ ᒪᒋᓴᑭᑌᑭᐸᐣ, ᐊᐊᐧᔑᒣ 6,000 ᐦᐁᐠᑐᕑᐢ ᒥᓂᑯᐠ ᑭᔭᓂᐊᐱᑕᑭᑌ ᐃᒪ ᑲᑭᐅᐣᒋᒪᒋᓴᑭᑌᐠ ᒥᑕᐡ ᑫᑲᐱ ᐊᐱᐣ ᑲᑭᐃᔑᓂᔕᐊᐧᐊᐧᐨ ᐅᑕᓂᔑᓂᓂᒥᐊᐧ ᒋᐊᐣᑕᐃᐧ ᑲᑫᐧ ᐊᑕᐁᐧᐦᐃᑫᐊᐧᐨ.
ᐸᐧᓫ ᒐᐧᐣᐊᑊ, ᐯᔑᐠ ᐅᓇᔓᐁᐧᐃᐧᓂᓂ ᐃᒪ ᐊᐧᐃᐧᔦᑲᒪᐠ, ᐃᑭᑐ ᐁᔭᓇᑭ ᑲᑲᓄᓇᐨ ᐊᒥᑯᑭᒪᐣ ᐁᔭᓂᐱᒥᑭᒋᓴᑭᑌᓂᐠ, ᐁᑲᐧ ᑲᐃᐧᐣ ᒋᑭᐅᐣᒋ ᐸᐸᒥᑕᐊᐧᑲᓂᐃᐧᐨ, ᒥᑕᐡ ᐃᑯ ᑕᐊᐧᐨ ᑲᐃᓯᓭᓂᐠ ᐃᐧᓇᐊᐧ ᐱᑯ ᒋᑲᑫᐧ ᐊᑕᐁᐧᐦᐃᑫᐊᐧᐨ.
“ᐅᓇᑯ ᐣᑭᒪᐊᐧᐣᑐᓇᒥᐣ ᐣᑕᓂᔑᓂᓂᒥᓇᓂᐠ ᒋᐃᔕᐊᐧᐨ ᑲᐃᔑᓴᑭᑌᓂᐠ ᒋᐊᐣᑕᐃᐧ ᐊᑕᐁᐧᐦᐃᑫᐊᐧᐨ,” ᑭᐃᑭᑐ ᒐᐧᐣᐊᑊ ᒣᐧᑲᐨ ᐃᐁᐧ ᐅᐸᐅᐃᐧᐱᓯᑦ ᑲᐅᐡᑲᑭᓱᓂᐨ.
ᐅᓇᔓᐁᐧᐃᐧᓂᓂᐊᐧᐠ ᑭᐅᐣᒋᐃᔕᐊᐧᐠ ᐱᒥᓭᐃᐧᓂᐠ ᐁᑭᐊᐣᑕᐃᐧ ᓇᓇᑲᒋᑐᐊᐧᐨ ᑲᐃᔑᓴᑭᑌᓂᐠ, ᑲᐃᔑᐊᐱᐊᐧᐨ ᐅᑕᐸᓇᐠ, ᑲᐃᔑᐸᑕᑭᑌᑭᐣ ᐊᐧᓂᐦᐃᑫᐃᐧ ᐊᐧᑲᐦᐃᑲᓇᐣ ᒥᓇ ᑭᓄᔐᑫᐃᐧᑲᒥᑯᓂ ᐃᒪ ᐯᔓᐨ ᑲᑭᐸᑕᑭᑌᐠ ᑲᑭᔭᓂᔑᐯᔓᓇᑲᐧᐠ ᑲᓴᑭᑌᐠ.
“ᓂᐣᑭᐃᑯᒥᐣ ᐊᒥᑯᑭᒪ ᑯᑕᑭᔭᐣ ᓂᑲᑌᐦᐃ ᑲᐃᔑᓴᓴᑭᑌᑭᐣ ᓇᐊᐧᐨ ᐁᐸᐸᔐᐣᑕᑲᐧᑭᐣ ᒋᑲᑫᐧ ᐊᑕᐁᐧᐦᐃᑲᑌᑭᐣ,” ᑭᐃᑭᑐ ᒐᐧᐣᐊᑊ. “ᐁᑲᐧ ᔕᑯᐨ ᐅᑕᓇᐠ ᑲᐱᒥᑯᓇᑲᐠ ᐅᑭᐊᑐᓇᐊᐧ ᓯᓱᐸᒋᑲᓇᐣ ᐃᒪ ᑭᓄᔐᑫᐃᐧᑲᒥᑯᐠ.”
ᒐᐧᐣᐊᑊ ᐃᑭᑐ ᐊᐧᐃᐧᔦᑲᒪᐃᐧᓂᓂᐊᐧᐠ ᑲᑭᐊᐣᑕᐃᐧ ᐊᑕᐁᐧᐦᐃᑫᐊᐧᐨ ᐃᓂᐁᐧᓂᐊᐧᐣ ᓯᓱᐸᒋᑲᓇᐣ ᑲᑭᐊᐧᐸᐣᑕᒧᐊᐧᐨ ᑲᑭᐊᒋᑲᑌᓂᑭᐣ ᑲᐃᐧᐣ ᒋᑭᐅᐣᒋ ᓇᐣᑕ ᐃᓇᐸᑕᑭᐣ ᒥᐱᑯ ᐊᐱᐣ ᑲᐃᔑᒐᑭᑌᐠ ᐃᐁᐧ ᑭᓄᔐᑫᐃᐧᑲᒥᐠ.
ᒉᐠ ᐃᐧᓫᐃᔭᑦᐢ, ᑯᑕᐠ ᐊᐧᐃᐧᔦᑲᒪ ᐅᓇᔓᐁᐧᐃᐧᓂᓂ, ᑭᐃᑭᑐ ᒥᑐᓂ ᐱᑯ ᐅᑭᔑᐊᐧᐦᐃᑯᐣ ᐊᒥᑯᑭᒪᐣ ᐁᑲ ᑲᐧᔭᐠ ᑲᑭᐅᐣᒋ ᐊᓄᑲᑕᒥᓂᐨ ᑲᑭᓴᑭᑌᓂᐠ.
“ᐃᓂᐁᐧᓂᐊᐧᐣ ᑲᔦ ᑲᑭᐊᑐᐊᐧᐨ ᓯᓱᐸᒋᑲᓇᐣ ᑲᐃᐧᐣ ᑭᑭᓇᐊᐧᐨ ᒋᑭᐅᐣᒋᐊᓄᑭᒪᑲᑭᐣ,” ᐃᑭᑐ ᐃᐧᓫᐃᔭᑦᐢ.
ᑭᐃᑭᑐ ᒥᓇ ᐃᒪ ᑲᑭᑕᔑᓴᑭᑌᐠ ᒪᐊᐧᐨ ᐃᑯ ᐁᑭ ᑭᒋᐊᐦᑯᑭᔑᑌᐠ.
ᕑᐊᔭᐣ ᐸᐧᓯᐟ, ᑲᐅᑭᒪᐃᐧᐨ ᐊᑕᐁᐧᐦᐃᑫᐃᐧ ᐊᓄᑭᐃᐧᓂᐠ ᐃᒪ ᐊᐧᓂᓇᐊᐧᑲᐠ, ᑭᐃᑭᑐ ᑲᑭᓴᑭᑌᐠ ᐁᐧᑎ ᐃᐧᐣᑎᓴ ᓴᑲᐦᐃᑲᓂᐠ (ᐊᐧᓂᓇᐊᐧᑲᐠ ᑲᑭᐃᔑᓴᑭᑌᐠ #74) ᑭᐃᔑ ᑭᑭᓇᐊᐧᒋᒋᑲᑌ ᒋᐅᒋ ᒧᒋᓇᓇᑲᒋᒋᑲᑌᐠ ᐊᒥ ᑲᐃᓇᒋᑫᐨ ᐊᒥᑯᑭᒪ.
“ᐣᑭᓇᓇᑕᐃᐧᑭᑫᑕᒥᓇᐸᐣ ᑫᑯᓇᐣ ᑲᑭᑕᐸᑕᑭᐣ ᐃᒪ ᑲᑕᓇᑌᑭᐣ. ᐣᑭ ᑭᑫᐣᑕᒥᐣ ᐃᒪ ᐃᐧᐣᑎᑯ ᐁᑭᑕᑲᐧᐠ ᑭᓄᔐᑫᐃᐧᑲᒥᐠ ᑌᐯᐧ ᐁᑭᒋᓇᐸᑕᐠ,” ᑭᐃᑭᑐ ᐧᐸᓯᐟ.
ᐸᐧᓯᐟ ᑭᐃᑭᑐ ᐁᔭᓇᑭ ᑲᑫᐧᑐᑕᒧᐊᐧᐨ ᒋᐊᐣᑕᐃᐧ ᐊᑐᐊᐧᐨ ᓯᓱᐸᒋᑲᓇᐣ ᐁᑲ ᒋᒐᑭᑌᑭᐣ ᑲᑭᑕᐸᑕᑭᐣ ᐊᐸᒋᒋᑲᓇᐣ ᐃᒪ ᑲᐊᑕᑫᐣ.
“ᒥᐦᐅᐁᐧ ᑲᑭᐃᔑᒋᑫᔭᐣᐠ ᐃᒪ ᑭᓄᔐᑫᐃᐧᑲᒥᑯᐠ ᒥᓇ ᑯᑕᑭᔭᐣ ᑲᑭ ᑭᑭᓇᐊᐧᒋᒋᑲᑌᑭᐣ ᑲᑭᑕᐸᑕᑭᐣ ᐊᐸᒋᒋᑲᓇᐣ ᐁᑭᐃᓇᐱᑫᓯᑐᔭᐣᐠ ᓯᓱᐸᒋᑲᓇᐣ, ᐁᑲᐧ ᑕᐡ ᐊᐱ ᒥᓇᐊᐧ ᓂᐦᓴᐧ ᑲᑭᐊᐣᑕᐃᐧ ᓇᓇᑲᒋᒋᑲᓂᐊᐧᑭᐸᐣ ᐊᒥ ᑲᑭᐃᔑᐊᐧᐸᐣᑕᒪᐣᐠ ᐃᐁᐧ ᑲᓴᑭᑌᐠ 370 ᐦᐁᐠᑐᕑᐢ ᐁᑭᐃᓂᑯᑲᐧᐠ,” ᐃᑭᑐ ᐸᐧᓯᐟ.
ᑭᐃᓇᒋᒧ ᐸᐧᓯᐟ, ᐃᐁᐧ ᑲᑭᑐᒋᑫᒪᑲᐠ ᑭᐅᐣᒋ ᑫᐧᑭᓄᐁᐧᓭ ᑲᑎᐱᑲᐠ ᒥᑕᐡ ᐊᐱᐣ ᑲᑭᐅᐣᒋ ᒐᑭᑌᑭᐣ ᐊᑎᐟ ᐊᐧᐃᐧᔦᑲᒪ ᐊᓂᔑᓂᓂᐊᐧᐠ ᐅᑕᐸᒋᒋᑲᓂᐊᐧ.
“ᒣᑲᐧᐨ ᓄᑯᑦ ᑲᓴᑭᑌᐠ ᐊᐊᐧᔑᒣ 12,000 ᐦᐁᐠᑐᕑᐢ ᐃᓂᑯᑲᐧ,” ᑭᐃᑭᑐ ᐸᐧᓯᐟ ᐅᐸᐅᐃᐧᐱᓯᑦ 2 ᑲᐃᓇᑭᓱᓂᐨ.