ᓂᓯᑕᐃᐧᓇᑲᐧᐣ ᐊᓂᐣ ᐁᔑᐸᑭᑌᐡᑲᑯᐨ ᐊᓂᔑᓂᓂ ᐁᐧᐡᑲᐨ ᐃᐡᑯᓄᐃᐧᐣ ᑲᑭᐱᑕᑲᐧᐠ ᐃᒪ ᑭᓇᐧᕑᐊ ᑭᐸᐦᐅᑐᑲᒥᑯᐠ

ᑲᑭᐸᐦᐅᐣᑕᐧ ᐃᒪ ᑭᓇᐧᕑᐊ ᑭᐸᐦᐅᑐᑲᒥᑯᐠ ᑭᑎᐸᒋᒧᐊᐧᐠ ᑲᑭᐱᐃᓯᓭᐊᐧᐨ ᒣᑲᐧᐨ ᑲᑭ ᑲᓇᐁᐧᐣᑕᑯᓯᐊᐧᐸᐣ ᐃᐡᑯᓄᑲᒥᑯᐠ ᐊᐱ ᐅᑯᐁᐧᓂᐊᐧᐠ ᑲᐸᐸᒥ ᓇᓇᑕᐃᐧᑭᑫᑕᒧᐊᐧᐨ ᐁᐧᐡᑲᐨ ᐃᐡᑯᓄᐃᐧ ᐃᓯᓭᐃᐧᓇᐣ ᐅᒪ ᑲᓇᑕ (TRC) ᐁᑭ ᑭᐅᑌᐊᐧᐨ ᑭᐸᐦᐅᑐᑲᒥᑯᐠ ᒣᑲᐧᐨ ᐅᐸᐅᐃᐧᐱᓯᑦ 8 ᒥᓇ 9 ᑲᐃᓇᑭᓱᐨ.
ᐊᐧᐁᐧ ᑕᐡ ᒪᔭᑦ ᑲᓂᑲᓂᐡᑲᐠ ᓇᓇᑕᐃᐧᑭᑫᐣᒋᑫᐃᐧᓂᐠ ᐅᓇᑯᓂᑫᐃᐧᑭᒪ ᒪᕑᐃ ᓯᐣᐠᓫᐁᕑ ᑭᐃᑭᑐ ᑲᓇᑕ ᐊᐦᑭᐠ ᑲᐊᔭᒪᑲᑭᐣ ᑭᐸᐦᐅᑐᑲᒥᑯᐣ ᐃᐧᓇᐊᐧ ᒪᐊᐧᐨ ᑭᒋᒥᔑᐣ ᐊᓂᔑᓂᓂᐊᐧᐠ ᑭᐸᐊᐧᐊᐧᐠ.
ᐁᑲᐧ ᒣᑲᐧᐨ ᒥᑭᓯᐃᐧᐱᓯᑦ 2011, 85% ᓇᐯᐊᐧᐠ ᑲᑭᐸᐦᐅᐣᑕᐧ ᐃᒪ ᑭᓇᐧᕑᐊ ᑭᐸᐦᐅᑐᑲᒥᑯᐠ ᑲᑭᓇ ᑭᐊᓂᔑᓂᓂᐃᐧᐊᐧᐠ ᐁᑲᐧ ᒥᓇ ᑲᑭᓇ ᐃᑫᐧᐊᐧᐠ ᑲᑭ ᑭᐸᐦᐅᐣᑕᐧ ᑭᐊᓂᔑᓂᓂᑫᐧᐃᐧᐊᐧᐠ. ᒥᑕᐡ ᑲᑭᐃᓇᑭᐣᒋᑫᐊᐧᐠ ᐅᓇᓇᑕᐃᐧᑭᑫᐣᒋᑫᐠ ᐅᑭᐃᔑᐊᐧᐸᐣᑕᓇᐊᐧ 93% ᒥᓂᑯᐠ ᐊᓂᔑᓂᓂᐊᐧᐠ ᐁᑭᐸᐦᐅᐣᑕᐧ ᐃᒪ ᒥᓯᐁᐧ ᑭᐸᐦᐅᑐᑲᒥᑯᐠ. ᐃᒪ ᑲᐊᔭᒪᑲᐠ ᑭᐸᐦᐅᑐᑲᒥᐠ ᑌᑎᐸᐦᐃ ᑭᓇᐧᕑᐊ ᑲᐃᐦᑯᑎᐯᐣᒋᑫᒪᑲᐠ ᐅᐣᒋᐱᒧᒋᑫᒪᑲᐣ, ᐃᒪ ᓇᐣᑕ 30 ᐊᓂᔑᓂᓂᐃᐧ ᑕᔑᑫᐃᐧᓇᐣ ᒥᐦᐃᒪ ᐁᔑᐃᐧᓂᑕᐧ ᒋᐃᔑᑭᐸᐦᐅᐣᑕᐧ.
“ᑲᐃᐧᐣ ᐃᑐᐠ ᒪᐡᑯᐨ ᑯᑕᑭᔭᐠ ᑐᑲᓂᐃᐧᓯᑐᑫᐧᓇᐠ ᐊᐃᐧᔭᐠ ᐅᒪ ᑭᑕᑭᒥᓇᓂᐠ ᐁᐱᒋ ᓂᓯᑕᐃᐧᓇᑲᐧᐠ ᐊᓂᐣ ᐁᐧᐡᑲᐨ ᐃᐡᑯᓄᑲᒥᑯᐣ ᐁᓂᔑᐱᒥ ᐊᔭᓂᑫ ᓂᔑᐊᐧᓇᒋᐦᐃᑯᐊᐧᐨ,” ᑭᐃᑭᑐ ᓯᐣᐠᓫᐁᕑ ᑲᑭᐸᑭᑎᓂᑲᑌᐠ ᑎᐸᒋᒧᐃᐧᐣ.
ᒥᐦᐃᒪ ᓂᐢᑕᑦ ᑲᑭᐃᔕᐊᐧᐨ ᑭᓇᐧᕑᐊ ᑭᐸᐦᐅᑐᑲᒥᑯᐠ ᐅᑯᐁᐧᓂᐊᐧᐠ ᑲᐸᐸᒥ ᓇᓇᑕᐃᐧᑭᑫᐣᒋᑫᐊᐧᐨ. ᕑᐊᔾ ᒪᐧᕑᐊᐣ, ᒪᔭᑦ ᑲᓂᑲᓂᐡᑲᐠ ᑲᐃᔑᒪᐊᐧᑐᓂᑲᑌᑭᐣ ᑎᐸᒋᒧᐃᐧᓇᐣ ᒪᒪᐃᐧᐡᑲᐃᐧᓂᐠ, ᑭᐃᑭᑐ ᐊᔕ ᐁᐧᑎ ᐅᑕᓇᐠ ᐅᑭᐅᐣᒋ ᒪᒥᑐᓀᑕᓇᐊᐧᐸᐣ ᒋᐊᐃᔕᐊᐧᐨ ᑭᐸᐦᐅᑐᑲᒥᑯᐣ ᒋᐃᔑ ᓇᓇᑕᐃᐧᑎᐸᒋᒧᐃᐧᓀᐊᐧᐨ.
“ᐣᑭᑲᑫᐧᒋᒥᑯᒥᓇᐸᐣ ᐅᑭᒪᐃᐧᓂᐠ ᑲᐅᐣᒋᑲᓇᐊᐧᐸᑕᐠ ᐊᔭᑲᐧᒥᓯᐃᐧᓇᐣ ᒥᓇ ᑲᐅᒋ ᐱᒥᓇᓇᑲᒋᐦᐃᑕᐧ ᑲᑭᒪᒪᓂᐊᐧᐨ (ᒋᑭᐃᔕᔭᑭᐸᐣ ᑭᓇᐧᕑᐊ ᑭᐸᐦᐅᑐᑲᒥᑯᐠ)” ᑭᐃᑭᑐ ᒪᐧᕑᐊᐣ.
ᐊᓇᐃᐧᐣ ᒪᐧᕑᐊᐣ ᐅᑎᔑᐊᐧᐸᐣᑕᐣ ᒥᔑᐣ ᐃᑭᐁᐧᓂᐊᐧᐠ ᑭᐸᐊᐧᑲᓇᐠ ᐁᐅᐡᑲᑎᓯᐊᐧᐨ ᐁᑲ ᐃᐧᓂᑯ ᐁᑭᐅᐣᒋ ᐃᔕᐊᐧᐨ ᐃᐡᑯᓄᑲᒥᑯᐠ ᑲᐃᔑᑲᓇᐁᐧᐣᑕᑯᓯᐊᐧᐨ, ᑭᐃᑭᑐ ᑕᐡ ᔕᑯᐨ ᐅᑭᐱᓇᑭᐡᑲᓇᐊᐧᑐᐠ ᐃᒪ ᐃᓀᑫ ᐁᑭᐅᐣᒋ ᑲᑲᐧᑕᑭᑫᓭᐊᐧᐨ ᐅᓂᑭᐦᐃᑯᒪᑲᐠ ᐁᑲ ᑲᐧᔭᐠ ᐁᑭᑲᓇᐁᐧᓂᒥᑯᐊᐧᐨ, ᑲᑭᐊᐧᓂᑐᐊᐧᐨ ᐅᑕᓂᔑᓂᓂᐊᐧᑎᓯᐃᐧᓂᐊᐧ, ᐊᑲᐧᑎᓯᐃᐧᐣ ᐁᑲᐧ ᒥᓇ ᒪᐡᑭᑭᑫᐃᐧᐣ ᒥᓇ ᒥᓂᑫᐧᐊᐧᐱᓀᐃᐧᐣ.
“ᑫᐃᐧᓇᐊᐧ ᐃᒪ ᐅᑐᐣᒋᐸᑭᑌᐡᑲᑯᓇᐊᐧ ᐁᐧᐡᑲᐨ ᑲᐱᐅᐣᒋ ᐊᓂᑫᐊᓂᒥᐦᐃᐁᐧᒪᑲᐠ ᐃᐡᑯᓄᐃᐧᐣ ᐁᑲᐧ ᑕᐡ ᐊᒥ ᑲᑭᐅᐣᒋ ᐃᓀᐣᑕᒪᐣᐠ ᒋᐊᔑᑎᓂᑕᐧ ᒋᑎᐸᒋᒧᐊᐧᐨ,” ᑭᐃᑭᑐ.
ᒥᑕᐡ ᑲᑐᑕᒧᐊᐧᐨ ᑲᐸᐸᒥ ᓇᓇᑕᐃᐧᑭᑫᐣᒋᑫᐊᐧᐨ ᐸᐯᔑᐠ ᑭᐸᐊᐧᑲᓇᐣ ᐁᑭᐅᓇᐱᐦᐊᐊᐧᐨ ᒋᑎᐸᒋᒧᓂᐨ. ᑭᒥᓇᑲᓂᐃᐧᐊᐧᐠ ᑭᐸᐊᐧᑲᓇᐠ ᒋᐅᓀᐣᑕᒧᐊᐧᐨ ᐃᒪ ᐱᐣᑌᐁᐧᓯᒋᑲᓂᐠ ᓇᐣᑕ ᒪᓯᓇᑌᓯᒋᑲᓂᐠ ᒋᔑᑎᐸᒋᒧᐊᐧᐨ, ᐁᑲᐧ ᐊᐱᐣ ᒋᒥᓂᑕᐧ ᐯᔑᐠ ᐃᐁᐧᓂ ᐃᐡᑲᐧ ᐱᑌᐁᐧᔑᒥᑕᐧ. ᐅᑕᑯᓯᐊᐧᓄᑭᑕᒪᑫᐠ ᑫᐃᐧᓇᐊᐧ ᐃᒪ ᑭᐊᔭᐊᐧᐠ ᒋᐅᒋ ᐊᓱᐡᑲᒪᐊᐧᐊᐧᐨ ᐃᒪ ᐃᓀᑫ ᒧᔑᐦᐅᐃᐧᓂᐠ. ᒪᐧᕑᐊᐣ ᑭᐃᓇᑭᐣᒋᑫ ᐃᒪ ᐱᑯ ᓇᐣᑕ 20 ᑎᐸᒋᒧᐃᐧᓇᐣ ᐁᑭᒪᐊᐧᐣᑐᓇᒧᐊᐧᐨ ᒣᑲᐧᐨ ᓂᔓᑯᐣ ᑲᑭ ᑭᐅᑌᐊᐧᐨ.
ᐁᑲᐧ ᑲᔦ ᑭᐃᓇᒋᑫᐊᐧᐠ ᑯᑕᑭᔭᐣ ᑭᐸᐦᐅᑐᑲᒥᑯᐣ ᒋᔭᓂᐊᐃᔕᐊᐧᐨ ᐁᐧᑎ ᐊᓂᓂᑲᐣ. ᒪᐧᕑᐊᐣ ᑭᐃᑭᑐ ᒣᑲᐧᐨ ᐊᐱ ᐊᐧᑌᐸᑲᐃᐧᐱᓯᒧᐣ ᐁᐧᑎ ᑕᐃᔕᐊᐧᐠ ᔦᓫᐅᓇᔾᑊ ᐸᑕᑭᐁᐧᑎᓄᐠ ᐃᓀᑫ, ᒥᓇᐊᐧ ᑕᐡ ᑌᑎᐸᐦᐃ ᐅᒪ ᑲᓇᑕ ᑕᔭᓂᔕᐊᐧᐠ.