ᑕᐣᑐᕑ ᐯ ᑲᑕᔑ ᐃᐡᑯᓄᐊᐧᐨ ᐅᒪᒥᑯᐣᑕᐊᐧᐊᐧᐣ ᑲᑭᐊᐧᓂᐦᐃᐣᑕᐧ ᐊᓂᔑᓇᐯ ᐊᐢᑭ ᐅᐡᑲᑎᓴᐠ

ᓇᓯᐱᐠ ᒪᑭᐣᑕᔭᕑ ᓯᐱᐠ ᑭᓂᐱᑌᑲᐸᐃᐧᐊᐧᐠ, ᐅᑎᐡᑯᓄ ᐊᓄᑭᐠ ᒥᓇ ᐅᑎᐡᑯᓂᐠ ᑲᐅᐣᒋᑎᐯᐣᑕᑯᓯᐊᐧᐨ ᑌᓂᐢ ᑲᕑᐊᒧᕑᑎ ᐦᐊᔾ ᐢᑯᓫ (DFC) ᐁᑭᐊᔭᒥᒋᑫᐊᐧᐨ ᒥᓇ ᑭᐸᑭᑎᓂᑲᑫᐊᐧᐠ ᓇᓭᒪᐣ ᐁᑭᒪᒥᑲᐁᐧᓂᒪᐊᐧᐨ ᓂᐦᓴᐧᓱ ᐅᐡᑲᑎᓴᐠ ᑲᑭᑕᔑ ᐃᐡᑲᐧᐱᒪᑎᓯᐊᐧᐸᐣ ᑕᐣᑐᕑ ᐯ ᐅᑌᓇᐠ.
ᐊᐱ ᐁᔭᓂᑭᔑᑐᐊᐧᐨ ᓂᐢᑕᑦ ᑲᐱᒥᑯᓇᑲᓂᐠ ᒥᓇᐊᐧ ᐁᐅᐡᑭ ᒪᒋᐃᐡᑯᓄᐊᐧᐨ, ᑭᐱᒧᓭᐃᐧᓂᑫᐊᐧᐠ ᒥᐦᐅᐁᐧ ᐊᔕ ᓂᐦᓱᓂᐱᐣ ᐁᐃᔑᒋᑫᐊᐧᐨ ᑕᓱᓂᐱᐣ ᑲᐱᒧᓭᐃᐧᓂᑫᐊᐧᐨ ᐁᐅᐣᒋᒥᑯᐣᑕᐊᐧᐊᐧᐨ ᑲᑭᐱᐊᐧᓂᐦᐊᐊᐧᐨ ᑲᔭᓂᐳᓇᑭᓱᓂᐨ ᐊᑲᐢᐟ ᐱᓯᒧᐣ. ᐊᐱ ᑲᑭᐃᐡᑲᐧ ᒪᐊᐧᐣᑐᐡᑲᐊᐧᐨ ᐦᐊᔾ ᐢᑯᓫ ᒣᑕᐁᐧᐃᐧᑲᒥᑯᐠ, ᒥᐦᐃᒪ ᑲᑭᐅᐣᒋᒪᒋᐦᐊᑐᐊᐧᐨ ᐅᑎᐡᑯᓂᐠ ᒥᓇ ᐅᑕᓄᑭᐠ ᐁᑭᐃᓇᐦᐊᑐᐊᐧᐨ ᒪᑭᐣᑕᔭᕑ ᓯᐱᐠ ᐃᒪ ᐊᑎᐟ ᑲᑭᐅᐣᒋ ᒥᑲᐃᐧᐣᑕᐧᐸᐣ ᐅᐡᑲᑎᓴᐠ ᑲᑭᐊᐧᓂᐦᐃᑕᐧᐸᐣ.
ᐊᐱ ᑲᑭᐃᐡᑲᐧ ᐊᔭᒥᒋᑲᓄᐊᐧᐠ, ᒪᑌᐦᐃᑫᐃᐧ ᓂᑲᒧᐣ ᒥᓇ ᑯᑕᐠ ᓂᑲᒧᐣ ᑭᓂᑲᒧᒋᑲᑌ “Amazing Grace,” ᑭᓂᑌᑲᐸᐃᐧᐊᐧᐠ ᐅᑎᐡᑯᓂᐠ ᐁᑭᐸᑭᑎᓇᐊᐧᐨ ᓇᓭᒪᐣ ᒥᓇ ᐊᐧᐱᑲᐧᓂᐣ ᐅᑭᐃᔑᐁᐧᐱᓇᓇᐊᐧ ᓯᐱᐠ ᐁᑲᓄᑫᐣᑕᐊᐧᐊᐧᐨ ᑲᑭᐃᐡᑲᐧᐱᒪᑎᓯᐊᐧᐨ.
ᐊᐧᐁᐧ ᐃᐡᑯᓄᑭᒪ ᒐᐧᓂᑕᐣ ᑲᑭᑲᒥᐠ ᑭᐃᑭᑐ ᑲᐃᐧᐣ ᐃᑯ ᐁᑕ ᐁᐅᐣᒋ ᑲᓄᑫᐣᑕᐃᐧᐣᑕᐧ ᐅᑎᐡᑯᓂᐠ ᑲᑭᐱᐊᐧᓂᐦᐃᐣᑕᐧ, ᐁᐃᐧᐅᐣᒋ ᑲᓄᑫᒥᐣᑕᐧ ᑲᔦ ᑲᐱᐅᐡᑭᐃᐡᑯᓄᐊᐧᐨ ᒥᓇ ᐱᑯ ᑲᐱᑭᐁᐧᐡᑲᐊᐧᐨ ᒋᑲᑫᐧ ᐊᔭᐣᑲᐧᒥᓯᐊᐧᐨ.
“ᐁᐃᐧᐅᐣᒋ ᑲᓄᑫᒪᔭᑭᑕᐧ ᐅᑎᐡᑯᓂᐠ ᑲᑭᐱᔑ ᐊᓂᒥᓭᔭᐠ ᒥᓇ ᒋᐅᒋ ᑲᑫᐧ ᑲᓇᐁᐧᓂᒥᑎᔭᐠ,” ᑭᐃᑭᑐ. “ᑲᐃᐧᐣ ᑲᑭᐊᐧᓂᑫᐣᑕᐊᐧᒥᓇᐠ ᐅᑯᐁᐧᓂᐊᐧᐠ ᑲᑭᐱ ᐃᐡᑲᐧᐱᒪᑎᓯᐊᐧᐨ ᐊᓂᐡ ᑭᑭᐱ ᐃᐧᒋᐱᒪᑎᓯᒥᓇᓂᐠ ᐁᑲᐧ ᑕᐡ ᒋᐅᒋ ᑲᑫᐧ ᑭᑫᓂᓯᑕᐁᐧᐣᑕᒪᐠ ᑫᑯᓀᐣ ᑲᑭᐱᐅᐣᒋ ᐊᐧᓂᐦᐊᐣᑭᑕᐧ.”
ᒥᑕᐡ ᐅᐁᐧ ᒥᓇᐊᐧ ᑲᑭᓇᐱᐃᐧᐣᑕᒪᑲᓄᐊᐧᐠ ᐃᐧᐣᑕᒪᑫᐃᐧᐣ ᑲᑭᐃᔑ ᐅᑯᒪᐊᐧᒋᐦᐃᑎᐊᐧᐨ, ᐁᑲᐧ ᒥᓇ ᐊᔑᐨ ᐅᐡᑭ ᑎᐸᒋᒧᐃᐧᓇᐣ ᑭᐸᑭᑎᓂᑲᑌᐊᐧᐣ ᐊᓂᐣ ᑲᑭᐃᔑ ᐅᓇᒋᑲᓄᐊᐧᐠ ᐊᐊᐧᔑᒣ ᑫᐃᔑ ᐊᔭᑲᒥᓂᑲᓄᐊᐧᐠ ᒋᐸᔭᑕᑭᓭᓂᐠ ᐅᑎᐡᑯᓄᐃᐧᓂᐊᐧ.
ᑭᐁᐧᑎᓄᐠ ᐊᓂᔑᓇᐯ ᑭᑭᓄᐦᐊᒪᑫᐃᐧᐣ ᑲᐱᒧᑐᐊᐧᐨ (NNEC) ᑲᐅᑭᒪᐃᐧᐨ ᓇᐧᕑᒪ ᑭᒋᐠ ᑫᐃᐧᐣ ᐅᑭᐊᔭᒥᐦᐊᐣ ᐅᑎᐡᑯᓂᐣ ᐁᑭᒥᑲᐊᐧᓱᒪᐨ ᒋᑲᓇᐊᐧᐸᒥᑯᐊᐧᐨ ᑲᑭᓇ ᑫᑯᓇᐣ ᑲᐃᔑᒋᑫᐊᐧᐨ, ᑭᔭᑦ ᑲᒥᓇᐧᔑᐠ ᒥᓇ ᐁᑲ ᑲᒥᓇᐧᔑᐠ ᑫᑯᐣ.
“ᑭᑭᓄᐦᐊᒪᓱᐣ, ᑲᑫᐧᑌᐧᐣ ᑫᑯᓇᐣ, ᐊᔭᑲᐧᒥᓯᐣ, ᐁᑲᐧ ᒥᓇ ᒣᑲᐧᐨ ᑲᐱᒥᐃᐡᑯᓄᐃᐧᔭᐣ ᐅᒪ ᑕᐣᑐᕑ ᐯ ᐅᑌᓇᐠ, ᑲᐧᔭᐠ ᒪᒣᑕᐁᐧᐣ,” ᑭᐃᑭᑐ.
ᐅᐣᑌᕑᐃᔪ ᑭᒋᐅᑭᒪᑲᐣ ᐢᑕᐣ ᐯᕑᑎ ᑫᐃᐧᐣ ᐃᒪ ᑭᐱᑎᐸᒋᒧ ᐊᓂᐣ ᑲᑭᐃᔑᓇᑭᐡᑲᐠ ᒣᑲᐧᐨ 16 ᑲᑕᓱᔭᑭᐃᐧᓀᐨ ᒪᐊᐧᐨ ᓂᐢᑕᑦ ᐁᐱᑲᐯᔑᐨ ᒥᓇ ᒪᐊᐧᐨ ᐁᑭ ᑭᒋᐊᓂᒣᐣᑕᐠ, ᑐᑲᐣ ᐁᑫᐧᓇᐠ ᐁᐊᐧᐸᒪᐨ ᒥᔑᐣ ᐅᑕᐸᓇᐠ, ᑲᐃᔑᑲᑭᓇᐧᐸᓀ ᓂᐱᑌᑭᑌᑭᐣ ᐊᐧᑲᐦᐃᑲᓇᐣ ᒥᓇ ᐱᑯ ᐁᐧᒥᑎᑯᔑᐊᐧᐠ. ᐊᓇᐃᐧᐣ ᐅᑭᐃᔑ ᐃᐧᐣᑕᒪᐊᐧᐣ ᑲᔦ ᒋᐅᒋ ᐃᓯᓭᑐᐨ ᑫᒋᓇᐨ ᐅᑭᒪᐅᐣ ᒋᐱᒥᓂᔕᐦᐊᒥᓂᐨ ᐅᑎᑭᑐᐃᐧᓇᐣ ᒥᓇ ᐅᑕᔓᑕᒪᑫᐃᐧᓇᐣ, ᔕᑯᐨ ᐃᑯ ᑫᐃᐧᓇᐊᐧ ᐃᓯᓭᓂᐸᐣ ᐅᑎᐡᑯᓂᐠ ᓇᐣᑕ ᒋᑭ ᑲᑫᐧᑐᑕᒧᐊᐧᐸᐣ.
“ᑭᓇᐃᐧᐟ ᑲᐊᓂᔑᓂᓂᐃᐧᔭᐠ ᑭᑕᑲᑫᐧᐱᒧᓂᑎᓱᒥᐣ,” ᑭᐃᑭᑐ. ᐊᒥ ᑲᔦ ᑲᑭᔭᓂᑭᑐᐨ ᑲᐃᐧᓂᐣ ᑫᐃᐧᐣ ᑲᐯᐦᐃ ᒋᑭᐅᐣᒋ ᒪᒥᓄᒋᑫᐨ ᒣᑲᐧᐨ ᑲᐱᐊᐧᐅᐡᑲᑎᓯᐨ, “ᔕᑯᐨ ᐣᑭᓂᑕᐊᐧᓄᑭ, ᐁᑲᐧ ᒥᓇ ᐣᑭᑲᑫᐧ ᑲᐡᑭᑐᐣ ᒋᔭᓂᑲᑫᐧ ᑲᒋᑎᓇᒪᓱᔭᐣ ᑲᐡᑭᐦᐅᐃᐧᐣ.”
ᐁᑲᐧ ᐊᐱᐣ ᑲᑭᔭᓂ ᑭᔑᒋᑲᑌᐠ ᒪᐊᐧᑐᐡᑲᐃᐧᐣ ᐃᒪ ᐦᐊᔾ ᐢᑯᓫ ᒣᑕᐁᐧᐃᐧᑲᒥᑯᐠ ᐃᑭᐁᐧᓂᐊᐧᐠ ᐅᑎᐡᑯᓄᐃᐧ ᐊᓄᑭᐠ ᐅᑭᐊᔭᑭᓀ ᐃᐧᐣᑕᓇᐊᐧ ᑲᐃᔑᓂᑲᓱᐊᐧᐨ ᑲᑭᐳᓂᐱᒪᑎᓯᐊᐧᐨ ᐅᑎᐡᑯᓂᐠ ᐁᑲᐧ ᐊᐱᐣ ᐯᔑᑯᑎᐸᐦᐃᑲᓀᐢ ᑭᑯᐢᑲᐊᐧᒋᑲᐸᐃᐧᓇᓂᐊᐧᐣ.
ᑫᑲᐟ 50 ᑕᓯᓄᐊᐧᐠ ᑲᐱᐅᐡᑭ ᐱᐣᑎᑫᐊᐧᐨ ᐅᑎᐡᑯᓂᐠ ᓄᑯᑦ ᐅᐁᐧ ᑲᔭᑭᐊᐧᐠ, ᒥᐦᐅᐁᐧ ᐁᑫᐧᓇᐠ ᐁᒥᔑᓄᐊᐧᐨ ᐊᐱᐨ ᐱᐅᑕᓇᐠ. ᒥᑕᐡ ᐁᔑᓂᓯᑕᐃᐧᓇᐣᐠ ᑲᑭᑲᒥᐠ ᐅᓂᑭᐦᐃᑯᒪᐠ ᒥᓇ ᐅᑎᐡᑯᓂᐠ ᐁᑌᐸᑫᐣᑕᒧᐊᐧᐨ ᐅᐁᐧᓂ ᐃᐡᑯᓄᑲᒥᑯᓂ.
“ᒥᐁᑕ ᐃᒪ ᑫᑭᐅᐣᒋ ᐊᐣᒋᓭᑐᔭᐣ ᑫᑯᓇᐣ ᒥᓇ ᐃᓀᐣᑕᒧᐃᐧᓇᐣ ᑲᐃᔑᐃᐡᑯᓄᐦᐊᑕᐧ ᐅᑎᐡᑯᓂᐠ,” ᑭᐃᑭᑐ. “ᐊᑎᑲ ᐊᐱ ᑲᑭᐁᐧᐊᐧᐨ, ᐅᐃᐧᐣᑕᒪᐊᐧᐊᐧᐣ ᐅᐊᐧᑯᒪᑲᓂᐊᐧ ᒥᓇ ᑲᒥᓄᐃᐧᒋᐊᐧᐊᐧᐨ (ᐊᓂᐣ ᑲᐃᔑᐊᐧᐸᐣᑕᒧᐊᐧᐨ).”
ᐃᐡᑯᓄᑲᒥᑯᐠ ᑲᐊᓄᑭᐊᐧᐨ ᐅᑭᐱᔭᓄᑲᑕᓇᐊᐧ ᐊᓂᐣ ᐊᐊᐧᔑᒣ ᑫᑭᐅᐣᒋ ᒥᓀᐧᐣᑕᒧᐊᐧᐸᐣ ᐅᑎᐡᑯᓂᐠ ᑲᐱᑕᔑ ᐃᐡᑯᓄᐊᐧᐨ. ᒥᑕᐡ ᑲᑭᑐᑕᒧᐊᐧᐸᐣ ᐁᑭᔭᓂ ᐊᔭᑭᓀ ᑲᑫᐧᒋᒪᐊᐧᐨ ᐅᑎᐡᑯᓂᐣ ᐊᓂᐣ ᑫᑭᑐᒋᑲᑌᑭᐸᐣ ᒋᒥᓇᐧᔑᒋᑲᑌᓂᐠ ᐅᑎᐡᑯᓄᐦᐃᑯᐃᐧᓂᐊᐧ, ᐃᑭᑐ ᑲᑭᑲᒥᐠ. ᐅᑕᓇᐠ ᑲᑭᔭᑭᐊᐧᓂᐠ, ᐅᑭᓇᑕᐁᐧᐣᑕᓇᐊᐧᐸ ᐅᑎᐡᑯᓂᐠ ᐁᐃᐧᑐᑕᒧᐊᐧᐨ ᒪᓯᓂᑯᒋᑫᐃᐧᓂ, ᒥᑕᐡ ᑲᑭᑐᑕᒧᐊᐧᐨ ᐁᑭᐸᑭᑎᓂᑲᑌᐠ ᐃᐡᑯᓄᐃᐧᐣ, ᒋᓂᑕᐅᔑᐦᐊᐊᐧᐨ ᒍᐁᐧᐱᒋᑲᓇᐣ. ᒥᓇᐊᐧ ᑕᐡ ᐊᐱᑕ ᑲᔭᓂ ᐊᓂᑫᐅᐡᑭᓭᓂᐠ ᐅᑎᐡᑯᓄᐃᐧᓂᐊᐧ, ᒥᐦᐃᒪ ᐅᑎᐡᑯᓂᐠ ᑲᑭᔭᓂᔑᐸᒋᐦᐊᐊᐧᐨ ᑲᑭᐅᔑᐦᐊᐊᐧᐸᐣ ᒍᐁᐧᐱᒋᑲᓇᐣ ᐃᒪ ᑭᑐᑫᒋᑫᐃᐧ ᐃᐡᑯᓄᐃᐧᓂᐠ.
ᑯᑕᐠ ᒥᓇ ᑫᑯᐣ ᑕᑭᒋᐸᑲᓂᓭ ᓄᑯᑦ ᑲᔭᑭᐊᐧᐠ ᐊᐊᐧᔑᒣ ᑕᑲᑫᐧᒥᓇᐧᔑᒋᑲᑌᐠ ᑭᒋᐦᐊᐠ ᐅᑭᑭᓄᐦᐊᒪᑫᐃᐧᓂᐊᐧ, ᐃᒪ ᐅᑎ ᒪᐊᐧᐨ ᐃᔑᑭᔐᐧᐃᓂᐠ. ᐁᑲᐧ ᑕᐡ ᑭᒋᐦᐊᐠ ᐅᑲᑐᑕᓇᐊᐧ ᒋᑭᑭᓄᐦᐊᒪᐊᐧᐊᐧᐨ ᐅᑎᐡᑯᓂᐣ ᐊᔑᐨ ᑲᔦ ᐅᑕᓄᑭᐠ ᐃᔑᑭᔐᐧᐃᓂ ᒣᑲᐧᐨ ᑲᐱᒥ ᐃᐡᑯᓄᐃᐧᐊᐦᑭᐊᐧᓂᐠ.
“ᐣᑌᐯᐧᑕᐣ ᑭᐡᐱᐣ ᐅᑎᔑᑭᔐᐧᐃᐧᓂᐊᐧ ᐊᓂᓂᑯ ᑲᐅᐣᑕᑲᓀᓯᐊᐧᐨ ᑲᑭᑭᐊᐸᒋᑐᐊᐧᐨ ᐃᒪ ᐅᑎᐡᑯᓄ ᐱᒧᒋᑫᐃᐧᓂᐊᐧ ᒥᐦᐃᒪ ᐁᐅᐣᒋ ᐱᒧᓭᒪᑲᓂᐠ,” ᑭᐃᑭᑐ ᑲᑭᑲᒥᐠ.