DFC ᑭᑭᓄᒪᑎᐎᑲᒥᐠ ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᑭᐎᒋᑲᑌ

ᑌᓇᐢ ᐸᕒᐊᐣᓬᐃᐣ ᑲᓇᒧᕒᑎ ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᑭᐅᓇᒋᑲᑌ ᒋᑕᐎᓂᑲᑌᐠ ᐊᓂᒪᒋᑭᑭᓄᒪᐗᑲᓀᐗᐨ 2015-16 ᒋᑲᐯᔑᐗᐨ 150 ᑭᑭᓄᒪᐗᑲᓇᐠ ᒥᓇ ᐊᑯᓇᐠ 50 ᐅᓂᑭᐦᐃᑯᒪᐠ᙮
“ᑭᒋᓀᑕᑯᐣ ᑭᑭᓄᒪᐗᑲᓇᐠ ᒋᐸᔭᑌᔦᑕᑯᐠ ᑲᐃᔑᑲᐯᔑᐗᐨ, ᒋᒥᓄ ᑲᐯᔑᐗᐨ ᒣᑾᐨ ᐁᑭᒪᒐᐗᐨ ᐅᑲᐯᔑᐎᓂᐗ ᐃᐡᑯᓂᑲᓂᐠ,” ᐃᑭᑐ ᓈᕒᒪ ᑭᒋᐠ, ᑲᓂᑲᓂᐡᑲᐠ ᑭᐌᑎᐣ ᓂᔑᓇᐯ ᑭᑭᓄᒪᑫᐎᐣ ᐱᒥᐎᒋᑫᐎᐣ᙮ “NNEC ᑲᐃᔑ ᑲᓇᐗᐸᑕᐠ ᒋᐅᓇᒋᑫᐗᐨ ᑲᐯᔑᐎᓇᐣ ᑫᐃᔑᒥᓉᑕᒧᐗᐨ ᑭᑭᓄᒪᐗᑲᓇᐠ, ᒥᓇ ᑲᐎᐣ ᑎᓀᑕᓯᐣ ᒣᑾᐨ ᐁᑭᑐᒋᑲᑌᐠ᙮ ᐅᐅᐌᑕᐡ
ᑲᐯᔑᐎᑲᒥᐠ ᑲᐎ ᐅᔑᒋᑲᑌᐠ, ᑲᑭᓇ ᔭᐎᔭ ᐸᐸᒥᓯ ᒋᐅᒼᐱᑭᐦᐊᐨ ᐊᐗᔑᔕᐣ ᒥᓇ ᑲᑭᓇ ᔭᐎᔭ ᐎᑕᓄᑭᒥᑎᐗᐨ ᑕᑭᐅᒋ ᒥᓄᓭᐗᐠ ᑭᑭᓄᒪᐗᑲᓇᐠ᙮”
ᒣᑾᐨ ᓄᑯᒼ 100 DFC ᑭᑭᓄᒪᐗᑲᓇᐠ ᑲᐯᔑᐦᐊᐗᐠ ᐅᐅᒪ ᐅᑌᓇᐠ ᑕᐣᑐᕒ ᐯ, ᐃᐃᐌᑕᐡ DFC ᑭᑭᓄᒪᐗᐠᓇᐠ ᑲᐯᔑᐎᑲᒥᐠ ᑕᑭ ᐃᓯᓭ ᑭᑭᓄᒪᐗᑲᓇᐠ ᒋᔑᑲᐯᔑᐗᐨ ᐃᐃᒪ ᑲᐣᐯᑐᕒᐁᔑᐣ ᑳᓬᐃᐨ ᒥᓇ ᐁᐯᔑᓇᑯᐠ ᒋᒧᑕᓭᐗᐨ ᐃᔕᐗᐨ DFC ᑭᑭᓄᒪᑎᐎᑲᒥᑯᐠ᙮
“ᑭᑭᓄᒪᐗᑲᓇᐠ ᑲᐱᒥᑭᑭᓄᒪᐗᑲᓀᐗᐨ ᐅᐅᒪ DFC ᑭᑭᓄᒪᑎᐎᑲᒥᑯᐠ, ᐅᑲᑭ ᐅᒋᑭᑫᑕᓇᐗ ᐁᓀᑕᑯᐠ ᐊᐗᔑᒣ ᐎᑭᑭᓄᒪᑯᓯᐗᐨ,” ᑭᒋᐠ ᐃᑭᑐ᙮ “ᐃᐃᒪ ᑲᐎᔑᐊᒋᑲᑌᐠ ᑭᒋ ᑭᑭᓄᒪᑎᐎᑲᒥᑯᐠ, ᐸᑯᓭᑕᒥᐣ ᐊᐗᔑᒣ ᒋᐊᓂ ᑭᑭᓄᒪᑯᓯᐗᐨ (ᑭᑭᓄᒪᑯᐎᐣ)᙮ ᒥᓉᑕᑯᐣ ᑲᑭᓇ ᔭᐎᔭ ᑲᐎᑕᓄᑭᒥᑎᐗᐨ ᒋᐎᒋᐦᐊᑲᓀᐗᐨ ᑭᑭᓄᒪᐗᑲᓇᐠ᙮”
ᐗᓭᔭ ᐱᒥᐎᒋᑫᐎᐣ ᐅᑭᐎᑕᓇᐗ ᐅᓇᒋᑫᐎᐣ ᒋᐅᔑᒋᑲᑌᐠ $15 million ᑕᓵᐱᐠ, ᒋᐅᑭᑎᑲᒥᑯᐗᐠ, 55,000 ᑲᑲᑭ ᑕᓱᒥᓯᐟ DFC ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᑲᐃᓯᓭᐠ ᒫᕒᐨ 27 ᒥᓇ ᐁᑭᐱᔕᐗᐨ NNEC, ᑲᐣᐯᑐᕒᐁᔑᐣ ᑳᓬᐃᐨ ᒥᓇ ᐅᑌᓇᐠ ᑕᐣᑐᕒ ᐯ᙮
ᑲᐣᐯᑐᕒᐁᔑᐣ ᑳᓬᐃᐨ ᐅᐸᑭᑎᓇᓇᐗ ᐊᐦᑭᓂ ᑫᐃᔑᐊᑌᐠ DFC ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᒥᓇ ᐯᔑᑾᐱᐠ ᐯᔑᑯᐊᐦᑭ ᒋᓇᑭᒋᑲᑌᐠ ᒥᓂᑯᐠ 20 ᑕᓱᐊᐦᑭ᙮
“ᑭᑫᑕᒥᐣ ᐊᓂᔑᓇᐯᐠ ᒥᓇ ᑭᑭᓄᒪᐗᑲᓇᐠ ᒋᐅᒋ ᒥᓄᓭᐗᐨ ᑲᐯᔑᐎᐣ ᑲᐊᐣᑾᒥᓯᐗᐨ, ᒋᐊᐃᑕᑌᐠ ᒥᓇ ᒋᐗᑲᒋᑲᑌᑭᐣ ᑫᐅᒋ ᒥᓉᑕᒧᐗᐨ ᑭᑭᓄᒪᐗᑲᓇᐠ ᒥᓯᐌ ᑲᐱᐅᑕᓭᐗᐨ, ᑎᓄᑲᐣ ᑭᐌᑎᓄᐠ,” ᐃᑭᑐ ᑌᓇᐢ ᐙᓬᐊᐢ, ᑲᓂᑲᓇᐱᑕᐠ ᑲᐣᐯᑐᕒᐁᔑᐣ ᑳᓬᐃᐨ ᐅᑕᐱᑕᒪᑫᐎᐣ᙮
“ᑲᐱᒋᐯᔑᓇᑯᐠ ᐃᐃᒪ ᐊᐦᑭ ᑲᐃᔑᐊᒋᑲᑌᐠ ᐁᐱᒋ ᐯᔑᓇᑯᐠ ᑭᑭᓄᒪᑎᐎᑲᒥᐠ ᒋᒧᑕᓭᓇᓂᐗᐠ ᒥᓇ ᑲᐃᔑ ᐱᒥᐱᓱᓇᓂᐗᐠ, ᑲᐎᔑᐊᒋᑲᑌᐠ ᒥᓋᔑᐣ᙮”
NNEC ᑲᓂᑲᓇᐱᑕᐠ ᑯᕒᐃᐢ ᑲᑭᑲᒥᐠ ᐅᓇᑕᐗᐸᑕᐣ ᑭᑭᓄᒪᐗᑲᓇᐠ ᒋᑌᐱᓇᒪᓱᐗᐨ ᑲᐃᐡᐸᑭᐣ ᑭᑭᓄᒪᑎᐎᓇᐣ ᐊᐱ ᑲᐯᔑᐎᐣ ᐊᓂᑭᔑᒋᑲᑌᐠ᙮
“ᐅᐅᐌ ᑲᐎᒋᒋᑲᑌᐠ ᒪᒋᑕᐎᐣ ᑲᑌᐱᓇᒧᐗᐨ, ᒥᐌ ᐁᓀᑕᒪᐣ ᐁᑲ ᒋᐸᑭᑎᓇᒧᐗᐨ ᐅᑭᑭᓄᒪᑯᐎᓂᐗ,” ᑲᑭᑲᒥᐠ ᐃᑭᑐ᙮ “ᒥᐌ ᒥᓇ ᐁᓀᑕᒪᐣ ᒋᐅᒋᒥᓉᑕᑯᐠ, ᐅᓂᑭᐦᐃᑯᒪᐠ ᒋᐎᒋᐦᐊᐗᐨ ᐅᓂᒐᓂᓯᐗ ᑲᑭᑭᓄᒪᐎᒥᐨ᙮ ᑭᒋᒥᓉᑕᑯᐣ: ᒥᐌ ᐁᐅᐡᑭᑭᔑᑲᐠ ᒥᓇ ᐅᐅᐌ ᑲᓂ ᐅᐡᑭᒪᒋᑕᓂᐗᐠ᙮”
ᑲᑭᑲᒥᐠ ᐃᑭᑐ ᐃᐃᐌ DFC ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᒪᒪᑲᑌᑕᑯᐣ ᒪᔭᒼ ᐁᓂᔕᓂᐗᐠ ᒋᐎᒋᐦᐊᑲᓀᐗᐨ ᐊᓂᔑᓇᐯ ᐅᐡᑲᑎᓴᐠ᙮
“ᐁᒥᓇᑲᓀᐗᐨ ᑭᓂᒐᓂᓯᓇᐣ ᒋᐊᐣᑾᒥᓯᒪᑲᐠ ᑫᐃᔑᑲᐯᔑᐗᐨ ᒋᑌᐱᓇᒪᓱᐗᐨ ᑭᑭᓄᒪᑎᐎᐣ ᒥᓇ ᒋᐊᓂᐱᒥᐎᒋᑫᐗᐨ ᐅᐅᐌᑎᓀᑫ ᓂᑲᐣ, ᑲᐃᓯᓭᐠ ᑲᑭᓇ ᔭᐎᔭ ᐅᐅᒪ ᑲᓇᑕ ᑲᑭᑭᓄᒪᑯᓯᐗᐨ, ᑕᑭᐎᒋᐦᐃᑎᓱᐗᐠ ᒥᓇ ᐅᑲᑭ ᐎᒋᐦᐊᐗᐣ ᑫᓂᐱᒪᑎᓯᓂᐨ ᓂᐊᐠᐣ ᐅᐅᐌᑎ ᑭᐌᑎᓄᐠ ᐃᐡᑯᓂᑲᓇᐣ ᑲᑲᐯᔑᓂᐨ ᒥᓇ ᐊᑯᒋᐠ ᐃᐡᑯᓂᑲᓂᐠ ᑲᑲᐯᔑᐗᐨ ᐊᓂᔑᓇᐯᐠ,” ᑲᑭᑲᒥᐠ ᐃᑭᑐ᙮ “ᐁᑕᑯᓂᑲᑌᑭᐣ ᐎᒋᐦᐃᐌᐎᓇᐣ, ᑎᓄᑲᐣ ᐎᑕᒪᑫᐎᓇᐣ, ᐅᐅᐌ ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᑕᒥᓉᑕᑯᐣ ᒋᑕᔑᑲᐯᔑᐗᐨ ᑲᑭᒪᒐᐗᐨ ᒥᓇ ᑲᑭᓇᑲᓇᐗᐨ ᐅᑎᐯᓂᑲᑲᓂᐗ ᒥᓇ ᒋᐎᒋᐦᐊᑲᓀᐗᐨ ᑭᑭᓄᒪᐗᑲᓇᐠ ᑲᓇᑕᐌᑕᒧᐗᐨ ᐎᒋᐦᐃᐌᐎᓇᐣ ᑲᑲᑭᑌᐱᓂᑲᑌᑭᐣ ᐅᐅᐌᑎᓀᑫ ᑭᐌᑎᓄᐠ ᐃᐡᑯᓂᑲᓂᐠ᙮”
ᐗᓭᔭ ᐱᒥᐎᒋᑫᐎᐣ ᑲᓂᑲᓂᐡᑲᐠ ᒥᓇ ᑲᓂᑲᓂᑲᓇᐗᐸᑕᐠ ᑖᒼ ᑲᒥᓇᐗᑕᒥᐣ ᐃᑭᑐ ᑲᑭ ᐃᓀᒋᑲᑌᐠ ᐃᐃᐌ DFC ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᐁᑭᐅᓀᒋᑲᑌᐠ ᐁᑭᒥᑯᐡᑲᑌᑕᑯᐠ ᑲᑭ ᐃᑭᑐᐗᐨ ᓂᔑᓇᐯ ᐊᐢᑭ ᐃᐡᑯᓂᑲᓇᐣ ᑲᑭᐗᓂᐦᐊᑲᓀᐗᐨ ᓂᔀᓯ ᑭᑭᓄᒪᐗᑲᓇᐠ ᐁᑭᑲᑴᑌᐱᓇᒪᓱᐗᐨ ᑭᑭᓄᒪᑯᐎᐣ ᐅᐅᒪ ᑕᐣᑐᕒ ᐯ ᐅᐅᐌ ᒥᑕᓱ ᐊᐦᑭ ᒥᓂᑯᐠ ᐅᑕᓇᐠ᙮
“ᐅᑭ ᐃᓀᑕᓇᐗ ᐁᑲ ᑫᑯᐣ ᐁᑐᒋᑲᑌᐠ, ᐊᐊᐌ ᑲᓇᑕ ᐅᑭᒪᐎᐣ, ᐅᐣᑌᕒᐃᔪ ᐅᑭᒪᐎᐣ ᒥᓇ ᑲᔦ ᐃᐡᑯᓂᑲᐣ ᐅᑭᒪᐎᓇᐣ,” ᑲᒥᓇᐗᑕᒥᐣ ᑭᐃᑭᑐ ᒣᑾᐨ ᑲᓂᑭᔑᐱᓭᐠ 2012᙮
ᑲᑭ ᐃᐡᑾ ᔭᔭᒥᐦᐊᒋᐣ ᐅᓂᑭᐦᐃᑯᒪᐣ ᑲᒥᑯᐡᑲᑌᑕᒥᓂᐨ ᒥᓇ ᐗᓭᔭ ᐱᒥᐎᒋᑫᐎᐣ ᐅᑕᐱᑕᒪᑫᐣ, ᑲᒥᓇᐗᑕᒥᐣ ᐅᑭᒪᒋᓇᓇᑲᒋᑐᐣ ᒥᓇ ᐅᑭᐊᓂᒥᑲᐣ 70 ᐃᑭᑐᐎᓇᐣ ᑲᑭᐸᑭᑎᓇᒧᐗᐨ DFC ᑭᑭᓄᒪᐗᑲᓇᐠ᙮
“ᑭᓇᓇᑲᒋᑐᒥᐣ ᐃᑭᑐᐎᓇᐣ ᑲᑭᐸᑭᑎᓇᒧᐗᐨ ᒥᓇ ᑭᑯᐡᑯᑭᑫᑕᒥᐣ ᓇᑯᒥᑎᐎᐣ ᐁᑭᐊᑌᑭᐣ ᐃᐃᒪ 70 ᐃᑭᑐᐎᓇᐣ ᑲᑭᐸᑭᑎᓇᒧᐗᐨ ᑭᑭᓄᒪᐗᑲᓇᐠ,” ᑲᒥᓇᐗᑕᒥᐣ ᐃᑭᑐ, ᐁᑭᐎᑕᐠ ᐃᐃᐌ DFC ᑭᑭᓄᒪᐗᑲᓇᐠ ᑲᐯᔑᐎᑲᒥᐠ ᐯᔑᐠ ᑲᑭᐸᑭᑎᓇᒧᐗᐨ ᐃᑭᑐᐎᓇᐣ ᑭᑭᓄᒪᐗᑲᓇᐠ ᑲᑭᓂᑲᓇᑐᐗᐨ᙮