ᐅᑭᒪᑲᐣ ᐅᓇᓇᑯᒪᐣ ᔑᒪᑲᓂᔕᐠ, ᐅᓄᑎᓂᑫᓴᐠ ᒥᓇ ᑲᑭᐊᐧᐃᐧᒋᑕᐊᐧᐨ ᑲᑭᓇᓇᑕᐊᐧᐸᒪᐊᐧᐨ ᑲᑭᐊᐧᓂᐦᐃᐨ

ᐅᐱᔑᑯᑲ ᐅᑭᒪᑲᐣ ᑭᓫᐃᐳᕑᐟ ᐳᓫ ᑭᐃᑭᑐ ᒪᐊᐧᐨ ᐅᑭ ᑭᒋᓀᐣᑕᐣ ᑲᑭᐃᔑᐊᐧᐸᑕᐠ ᑲᑭᐊᐱᒋ ᒥᔑᓄᐊᐧᐨ ᐊᐃᐧᔭᐠ ᐁᑭ ᑲᑫᐧ ᒥᑲᐊᐧᐊᐧᐨ 47 ᐁᑕᓱᔭᑭᐃᐧᓀᐸᐣ ᑲᑭᐊᐧᓂᐦᐊᑲᓂᐃᐧᐨ ᐃᒪ ᐃᐡᑯᓂᑲᓂᐠ ᐁᐅᒋ ᑎᐯᐣᑕᑯᓯᐸᐣ ᐊᓂᔑᓂᓂ, ᐁᑭᑲᐊᐧᒋᐨ ᐁᑲᐧ ᐃᐁᐧ ᑭᐃᔑᐁᐧᐸᐣ ᐅᑐᑕᐸᓇᐣ ᐁᑭᓀᐱᒋᐦᐅᓂᐨ ᓄᐱᒥᐠ ᐃᒪ ᑫᑌᒥᑲᓇᑫᐃᐧᓂᐠ.
ᓂᒥᓀᐧᑕᒥᐣ ᒥᓇ ᓂᓇᓇᑯᒪᒥᐣ ᑕᓯᐣ ᐊᐃᐧᔭᐠ ᑲᑭᐱᓴᓯᑐᓂᑯᔭᐠ ᒣᑲᐧᐨ ᑲᑭᓇᑭᐡᑲᒪᐠ ᐊᓂᒥᓭᐃᐧᐣ, ᐃᑭᑐ ᐳᓫ, ᐁᑲᐧ ᒥᓇ ᐃᑭᐁᐧᓂᐊᐧᐠ ᐅᐣᑌᕑᐃᔪ ᔑᒪᑲᓂᔕᐠ, ᑲᓀᑎᔭᐣ ᐅᓄᑎᓂᑫᓴᐠ ᒥᓇ ᐣᑕᓂᔑᓂᓂᒪᐠ ᑲᑭᐊᐧᐃᐧᒋᐦᐃᐁᐧᐊᐧᐨ ᑲᑭ ᓇᓇᑐᓂᑲᓂᐊᐧᐠ. ᑲᐧᔭᐠ ᑭᐊᐧᐃᐧᒋᐦᐃᑐᐊᐧᐠ ᑲᑭᐱᒥ ᓇᓇᑐᓂᑫᐊᐧᐨ, ᐁᑲᐧ ᔕᑯᐨ ᐊᐱᐣ ᓂᑭᐸᓂᓂᑫᒥᐣ. ᒪᐊᐧᐨ ᑭᑭᒋᒪᒋᐁᐧᐸᐣ ᐃᐁᐧ ᐊᐱ ᐁᑲᐧ ᐊᐧᐁᐧ ᑲᑭᐊᐧᓂᐦᐊᑲᓂᐃᐧᐨ ᑲᐃᐧᐣ ᒋᑭᐅᐣᒋ ᑭᔓᐊᐧᐱᓱᑯᐸᓀᐣ, ᒥᑕᐡ ᐊᐱᐣ ᑲᑭᐅᐣᒋ ᑲᐊᐧᒋᐨ.
ᐳᓫ ᑭᐃᑭᑐ ᐁᑭ ᑲᑫᐧᑌᐧᐨ ᐁᑲ ᒋᒪᓯᓇᐦᐃᑲᑌᓂᐠ ᐅᐃᐧᓱᐃᐧᐣ ᐊᐧᐁᐧ ᑲᑭᐊᐧᓂᐦᐊᑲᓄᐨ ᐁᐅᒋ ᐊᐧᐸᑕᐦᐃᑕᐧ ᐊᐧᑯᒪᑲᓇᐠ ᓴᑲᒪᐨ ᒋᐅᒋ ᐃᓀᐣᑕᒧᐊᐧᐨ ᑲᒥᐣᒋᓇᐁᐧᓯᐊᐧᐨ.
ᒣᑲᐧᐨ ᐊᐱ ᒪᑯᐱᓯᑦ 20 ᑲᐃᓇᑭᓱᐨ ᑲᑭᒪᐦᒋᓇᓇᑐᓂᑲᓂᐊᐧᐠ, ᐁᑲᐧ ᒥᐱᑯ ᑲᐃᔑᐱᒥ ᓇᓇᑐᓂᑲᓂᐊᐧᐠ ᐸᓂᒪ ᐱᑯ ᑲᑭᒥᑭᑲᑌᐠ ᒥᔭᐤ ᓄᐱᒥᐠ ᒣᑲᐧᐨ ᒪᑯᐱᓯᑦ 23 ᑲᐃᓇᑭᓱᐨ ᐯᔓᐨ ᓇᓯᐱᐠ ᒪᑭᐣᑕᔭᕑ ᐯ ᐅᐱᔑᑯᑲᐠ. ᐅᐱᒥᓭ ᑲᑭᐊᐧᐸᐣᑕᐠ ᒥᔭᐃᐧᓂ ᒣᑲᐧᐨ ᐁᐸᐸᒥᓭᐸᐣ ᔑᒪᑲᓂᔑᐃᐧ ᐱᒥᓭᐃᐧᓂ. ᑭᐳᓂᐱᒪᑎᓯ ᐁᑭᑲᐊᐧᒋᐨ ᒪᐊᐧᐨ ᐁᑭ ᑭᒋᑭᒥᐊᐧᐠ, ᑭᑭᒋᓄᑎᐣ ᒥᓇ ᑭᑭᒋᑕᑲᔭ ᐃᐁᐧ ᑲᑎᐱᑲᐠ. ᐃᓂᐁᐧᓂᐊᐧᐣ ᐁᑕ ᑲᑭᐡᑲᓇᑫᐧᓯᓂᐨ ᔑᐱᑲᐧᓇᐣ ᒥᓇ ᑲᐸᔭᑌᓇᑲᐧᐠ ᑭᑭᐡᑲᒋᑲᐣ ᐃᔑᐦᐅᑯᐸᐣ ᐊᐱ ᑲᒥᑲᐊᐧᑲᓄᐨ.
ᒣᑲᐧᐨ ᐊᐱ ᐁᐅᓇᑯᔑᓂᐠ ᒪᑯᐱᓯᑦ 18 ᑲᐃᓇᑭᓱᐨ ᑲᑭᐊᓂᐊᐧᓂᐱᓱᐊᐧᐨ, ᐊᐧᐁᐧ ᓇᐯ ᐁᑲᐧ ᐊᔑᐨ ᓂᐃᐧᐣ ᐅᐡᑲᑎᓴᐠ ᑭᐊᐧᓂᔑᓄᐠ ᐁᑲᐧ ᐊᐱᐣ ᓇᑫ ᑭᓀᐱᒋᐦᐅᐊᐧᐠ ᐃᒪ ᑫᑌᒥᑲᓇᑫᐃᐧᓂᐠ ᐁᑭᐅᐣᒋᐸᑫᐱᓱᐊᐧᐨ ᐃᐧᐸᐨ ᐁᐃᐧᑲᑫᐧᑕᑯᐱᓱᐊᐧᐨ ᑎᕑᐊᔾᑎᐣ ᐁᐅᐣᒋᐱᓱᐊᐧᐨ ᐅᐱᔑᑯᑲᐠ ᐁᔑᑲᑫᐧᑭᐁᐧᐱᓱᐊᐧᐨ.
ᐁᑲᐧ ᐊᐱᐣ ᓂᐃᐧᐣ ᐅᐡᑲᑎᓴᐠ ᑭᒪᒋᐦᐊᑐᐊᐧᐠ ᐃᒪ ᑲᑭᐅᐣᒋᓀᐱᒋᐦᐅᐊᐧᐨ 16 ᑭᓫᐊᒥᑐᕑᐢ ᑭᐃᓇᐦᐊᑐᐊᐧᐠ ᐁᐧᑎ ᑲᐃᓇᒧᓂᐠ ᐅᐱᔑᑯᑲᐠ ᑫᑲᐱ ᐊᐱᐣ ᑲᑭᑌᐱᓭᓂᐠ ᒋᐅᒋ ᒪᒋᑭᑐᐊᐧᐨ ᑲᐸᐸᒧᒋᑲᑌᐠ ᒪᒋᑭᑐᐃᐧᓂᐠ ᐁᑲᐧ ᓂᔓᑕᐸᐣ ᑭᐅᐣᒋ ᒪᒋᐱᓱᐊᐧᐠ ᐅᐱᔑᑯᑲᐠ ᐁᑭᓇᓯᑲᐊᐧᐊᐧᐨ.
ᐃᑭᐁᐧᓂᐊᐧᐠ ᓂᐃᐧᐣ ᐅᐡᑲᑎᓴᐠ ᑭᒥᑲᐊᐧᑲᓂᐃᐧᐊᐧᐠ, ᐁᑲᐧ ᐊᐱᐣ ᓇᑫ ᑲᑕᑯᐱᓱᐊᐧᐨ ᑲᑭᐃᔑ ᓀᐱᒋᐦᐅᐊᐧᐨ ᑲᐃᐧᐣ ᐊᐱᐣ ᒋᑭᐅᐣᒋ ᐊᐧᐸᒪᐊᐧᐨ ᓇᐯᐊᐧᐣ ᓄᐱᒥᐠ ᐊᐱᐣ ᐁᑭᐃᔑᒉᑲᑯᐡᑲᐨ.
ᐅᐣᑌᕑᐃᔪ ᔑᒪᑲᓂᔕᐠ ᐅᑭᐃᔑᓂᔕᐊᐧᐣ ᑫᑕᑕᐃᐧᐣ ᑲᐃᔑᐁᐧᐸᐠ ᑲᐊᓄᑲᑕᒧᐊᐧᐨ ᐁᐧᑎ ᑎᕑᐊᔾᑎᐣ, ᐸᐧᕑᐟ ᑊᕑᐊᐣᓯᐢ, ᑭᓇᐧᕑᐊ, ᓂᐱᑲᐣ,
ᐊᐧᓂᓇᐧᐊᑲᐠ ᒥᓇ ᑕᐣᑐᕑ ᐯ. ᐅᑭᐅᓇᑐᓇᐊᐧ ᑕᐡ ᑫᑕᓇᓄᑭᐊᐧᐨ ᒥᓇ ᓇᓇᑐᓂᑫᐃᐧ ᐊᓄᑭᐃᐧ ᐊᐸᒋᒋᑲᓇᐣ ᐅᑭᐱᑐᓇᐊᐧ ᑐᑲᐣ ᐅᑕᐸᓀᓴᐠ ᓄᐱᒥᐠ ᑲᑲᐡᑭᐦᐅᐨ ᒋᐃᐱᓱᐨ ᑲᐊᐧᑭᑕᐱᓇᓂᐊᐧᐠ, ᔑᒪᑲᓂᔑᐃᐧ ᒋᒪᐣ, ᐁᑲᐧ ᓂᔑᐣ ᔑᒪᑲᓂᔑᐃᐧ ᐊᓂᒧᔕᐠ ᑲᓇᓇᑐᒪᐣᒋᑫᐊᐧᐨ, ᐊᒥᑯᑭᒪᐃᐧ ᐱᒥᓭᐃᐧᐣ ᑲᑭᓂᑲᐧᓇᑯᓭᐠ, ᐁᑲᐧ ᒥᓇ ᐅᐣᑌᕑᐃᔪ ᔑᒪᑲᓂᔑᐃᐧ ᐱᒥᓭᐃᐧᐣ ᑲᑭᓂᑲᐧᓇᑯᓭᐠ. ᐁᑲᐧ ᒥᓇ ᑭᐃᔑᑲᑫᐧᑌᐧᐊᐧᐠ ᑲᓀᑎᔭᐣ ᓄᑎᓂᑫᐃᐧ ᐊᓄᑭᐃᐧᓂᐠ ᒥᓇ ᐅᐱᔑᑯᑲᐠ ᑲᓀᑎᔭᐣ ᐅᓄᑎᓂᑫᓴᐠ, ᑲᑭ ᑭᑭᓄᐦᐊᒪᐃᐧᐣᑕᐧᐸᐣ ᑲᐊᐧᓂᔑᐠ ᐊᐃᐧᔭ ᑲᓇᓇᑐᓇᐃᐧᐨ, ᑫᐃᐧᓇᐊᐧ
ᒋᐱᐊᐧᐃᐧᒋᑕᐧᐊᐧᐨ ᑲᑭᓇᓇᑐᓂᑲᓂᐊᐧᐠ. ᐃᒪ ᓇᐣᑕ 30 ᐅᐱᔑᑯᑲ ᐊᓂᔑᓂᓂᐊᐧᐠ ᑭᐃᐧᒋᑕᐧᐊᐧᐠ ᑲᑭᓇᓇᑐᓂᑲᓂᐊᐧᐠ.
ᐊᑯᓇᐠ 30 ᐅᐣᑌᕑᐃᔪ ᔑᒪᑲᓂᔕᐠ, 12 ᐅᓄᑎᓂᑫᓴᐠ, ᐁᑲᐧ ᒥᓇ 30 ᐃᐡᑯᓂᑲᓂᐠ ᑲᐅᐣᒋᐧᐊᐨ ᑲᑭᒧᒋᐊᐧᐃᐧᒋᐦᐃᐁᐧᐊᐧᐨ ᑲᑭᐊᐧᐃᐧᒋᑕᐧᐊᐧᐨ ᑲᑭᓇᓇᑐᓂᑲᓂᐊᐧᐠ. ᐊᑎᐟ ᑲᔦ ᑲᓇᐦᐃᐊᐧᐨ ᓇᓇᑐᓂᑫᐃᐧᓂᐠ ᐯᔓᐨ ᑌᑎᐸᐦᐃ ᐃᐡᑯᓂᑲᓇᐣ ᑭᐊᔕᐧᐱᐊᐧᐠ ᑭᐡᐱᐣ ᓇᑕᐁᐧᓂᒥᑕᐧ ᒋᐱᐃᐧᒋᑕᐧᐊᐧᐨ.
ᐅᓇᓇᑐᓂᑫᐠ ᑲᑭᓇᓇᑕᐊᐧᐸᒪᐊᐧᐨ ᑲᑭᐊᐧᓂᐦᐊᑲᓄᐨ ᐊᐊᐧᔑᒣ 20 ᑭᓫᐊᒥᑐᕑᐢ ᑭᐊᑯᐡᑲᐊᐧᐠ ᑲᐃᔑᓴᑲᑲᐧᓂᐠ ᓄᐱᒥᐠ ᒥᓇ ᓇᓀᐤ ᒪᑭᐣᑕᔭᕑ ᐯ, ᒥᑕᐡ ᐃᒪ ᐃᓀᑫ ᑫᑲᐱ ᑲᑭᐅᐣᒋᐊᐧᐸᐣᑕᐠ ᐅᐱᒥᓭ ᒣᑲᐧᐨ ᐁᐸᐸᒥᓭᐨ ᔑᒪᑲᓂᔑᐃᐧ ᐱᒥᓭᐃᐧᓂᐠ ᑲᑭᓂᑲᐧᓇᑯᓭᓂᐠ. ᐊᑎᐟ ᑲᔦ ᑲᓀᑎᔭᐣ ᐅᓄᑎᓂᑫᓴᐠ ᒥᑕᑲᒥᐠ ᐸᐸᒥᓇᓇᑐᓂᑫᐸᓂᐠ ᐃᒪ ᐯᔓᐨ ᓇᐣᑕ ᐱᑯ 200 ᒥᑐᕑᐢ ᑲᑭᐅᐣᒋ ᒥᑭᑲᑌᐠ ᒥᔭᐤ.
(ᔑᒪᑲᓂᐡ ᐱᑐᕑ ᒧᐣ ᐃᔑᐊᓄᑭ ᑲᓀᑎᔭᐣ ᐅᓄᑎᓂᑫᓴᐠ ᑲᐅᒋ ᒪᒪᐃᐧᐊᓄᑭᐊᐧᐨ ᐁᐧᑎ ᑲᓀᑎᔭᐣ ᓄᐱᓂᑫᐃᐧᑲᒥᑯᐠ ᐸᐧᕑᑎᐣ.)