ᐊᓴᐸᐱᔕᑯᓯᐊᐧᑲᐣᐠ ᑕᔑᑫᐃᐧᓂᐠ ᐅᑎᐡᑯᓂᐠ ᑲᐅᒋᐊᐧᐨ ᐅᑭᑭᔑᑐᓇᐊᐧ ᑲᑭᐱᒪᑲᐧᔑᐁᐧᐊᐧᐨ

ᐅᑎᐡᑯᓂᐠ ᐊᓴᐸᐱᔕᑯᓯᐊᐧᑲᐣᐠ ᑕᔑᑫᐃᐧᓂᐠ ᑲᐅᒋᐊᐧᐨ ᐊᒥᐁᐧ ᐊᔕ ᐁᑭᑭᔑᑐᐊᐧᐨ ᑲᑭᒪᒋᑲᐧᔑᐁᐧᐊᐧᐸᐣ ᐁᑲᐧ ᒪᒪᐤ 127 ᑭᓫᐊᒥᑐᕑᐢ ᑭᐃᓇᑲᐧᔑᐁᐧᐊᐧᐠ ᐃᐃᐁᐧ ᒣᑲᐧᐨ ᐊᐧᑌᐸᑲᐃᐧᐱᓯᑦ ᐁᑲᐧ ᔕᑯᐨ ᐯᔑᐠ ᐅᑎᐡᑯᓂ ᑭᐦᐃᓇᒋᒧ ᐁᑲ ᐁᑭᓂᐸᐨ ᑲᑎᐱᑲᓂᐠ ᐅᓴᑦ ᐅᑐᑌᒪᐣ “ᐅᓴᐢᑲᐧᒋᒥᓂᐣ ᐁᑭᓄᓇᑕᑯᓯᓂᐨ᙮”
ᐁᑲᐧ ᐯᔑᑯᐱᒥᑯᓇᑲ ᒪᒪᐤ ᑭᐃᔓᓇᑌ ᒋᐱᒪᑲᐧᔑᐁᐧᐊᐧᐨ ᔕᑯᐨ ᓂᑯᑕᐧᓱᑭᔑᑲ ᒪᒪᐤ ᑭᐱᒪᑲᐧᔑᐁᐧᐊᐧᐠ ᐊᐦᐃᐠ ᐊᓴᐸᐱᔕᑯᓯᐊᐧᑲᐣᐠ ᑕᔑᑫᐃᐧᓂᐠ ᑲᑭᐅᒋᒪᒐᐊᐧᐨ ᐁᑲᐧ ᐊᐧᐸᓯᒧᐣᐠ ᑕᔑᑫᐃᐧᓂᐠ ᑲᑭᐃᔕᐊᐧᐨ ᐁᑲᐧ ᑲᑭᐅᓇᑐᐊᐧᐨ ᒥᓇ ᑲᑭᑲᓇᐁᐧᐣᒋᑫᐊᐧᐨ ᐁᐦᐊᐠ ᐅᑎᐡᑯᓄᐦᐃᐁᐧᐠ ᒪᔾᓫᐅ ᕑᐃᒉᕑᐢᐟ ᐁᑲᐧ ᐃᐧᐣ ᐊᑲᐧᒋᐃᐧ ᑭᐦᑭᓄᐊᒪᑫᐃᐧᐣ ᐅᑐᒋᑲᓇᐊᐧᐸᑕᐣ ᐁᑲᐧ ᑯᑕᐠ ᑎᐱ ᕑᐊᑊ ᐁᑲᐧ ᐃᐧᐣ ᐅᑎᐡᑯᓂᐣ ᐅᑐᒋᐊᐧᐃᐧᑕᓄᑭᒪᐣ ᐁᑲᐧ ᑲᔭ ᐃᐡᑯᓄᐦᐃᐁᐧ᙮
ᐁᑲᐧ ᐅᐅᐁᐧ ᑲᑭᐅᒋᑐᒋᑲᑌᐠ ᐊᑲᐧᒋᐃᐧ ᑭᐦᑭᓄᐊᒪᑫᐃᐧᐣ ᑭᔭᐸᑕᐣ ᐁᑲᐧ ᒥᓇ ᐃᐃᒪ ᑕᔑᑫᐃᐧᓂᐠ ᑭᐅᒋᐅᓇᒋᑲᑌ ᐁᑲᐧ ᔕᑯᐨ ᐅᐣᑌᕑᐃᔪ ᐱᒧᒋᑫᐃᐧ ᑭᐦᑭᓄᐊᒪᑫᐃᐧᐣ ᑭᔭᐸᑕᐣ ᐊᐦᐃᐣ ᐅᑕ ᐸᑯᓭᐣᑕᒪᐃᐧᓇᐣ ᐁᑭ ᑭᐦᑭᓄᔑᓂᐊᐧᑲᓂᐊᐧᐠ ᐁᑲᐧ ᒥᓇ ᑲᑭᐅᒋᔕᐳᓂᑲᑌᐠ ᑕᐱᐡᑯᐨ ᑲᐃᓇᑌᐠ ᑲᐧᔭᐠ ᑲᐸᒥᒋᑲᑌᐠ ᐱᒪᑎᓱᐃᐧᓇᐣ ᒋᑭᐦᑭᓄᐊᒪᐊᐧᑲᓄᐊᐧᐨ ᐃᑫᐧᓂᐊᐧᐠ ᒥᑕᓱ ᑲᔭᐱᒋᑭᑫᐣᑕᒥᐊᐧᐨ᙮
“ᐁᑲᐧ ᐅᑫᐧᓂᐊᐧᐠ ᑲᑭᐦᑭᓄᐊᒪᐊᐧᑲᓄᐊᐧᐨ ᑭᒥᓇᑲᓄᐊᐧᐠ ᒋᐅᒋᑭᑫᐣᑕᒧᐊᐧᐨ ᑲᐃᔑᐸᐯᔑᑯᐊᐧᐨ ᓇᐱᐨ ᐁᐡᑲᑦ ᑫᑯᓇᐣ ᐁᐊᔭᓂᒪᑭᐣ ᑲᑲᑫᐧᑐᑕᒪᓯᔭᐠ ᑭᐸᒥᐦᐃᑎᓱᐃᐧᓂᓇᐣ ᐅᒋ᙮” ᐃᑭᑐ ᕑᐃᒉᕑᐢᐟ᙮ “ᐁᑲᐧ ᐊᒥ ᐅᐅᐁᐧ ᐊᑲᐧᒋᐃᐧ ᑭᐦᑭᓄᐊᒪᑫᐃᐧᐣ ᑲᐅᒋ ᐸᑭᑎᓂᑲᑌᐠ ᒥᓇ ᐱᑯ ᑲᐅᒋ ᐊᐧᐸᑕᐦᐃᐊᐧᓂᐊᐧᐠ ᑲᔭᐱᒋᒥᓇᐧᔑᐠ ᑭᑕᑭᒥᓇᐣ ᐁᑲᐧ ᑲᔭ ᑲᑭᐱᐃᔑᓭᐠ ᑲᔭᐡ ᐊᓂᔑᓇᐯᐃᐧ ᐱᒪᑎᓱᐃᐧᐣ᙮”
  ᐁᑲᐧ ᐅᑫᐧᓂᐊᐧᐣ ᑭᐦᑭᓄᐊᒪᑫᐃᐧᓇᐣ ᐊᐦᐃᐣ ᑲᔭ ᑲᓇᐊᐧᐸᒋᑲᑌᐊᐧᓄᐣ ᑲᔭᓂᑕᑐᒋᑲᑌᐠ ᑲᓂ ᐊᐱᐨ ᑲᑫᐧᑲᔭᐠ, ᐃᑭᑐ ᕑᐃᒉᕑᐢᐟ᙮ ᐊᑎᑲ ᐅᑕ ᑐᑲᐣ ᑲᐱᒪᑲᐧᔑᐊᐧᓂᐊᐧᐠ ᑲᐊᓂᒪᒋ ᐃᐡᑯᓄᓇᓂᐊᐧᐠ ᒥᓇ ᐊᓂ ᐃᐡᑲᐧ ᐃᐡᑯᓄᓇᓂᐊᐧᐠ, ᑲᐊᐧᓂᐦᐃᑲᓂᐊᐧᐠ ᑲᐱᐳᐠ, ᑲᐸᑭᑕᐊᐧᓂᐊᐧᐠ ᑲᐱᐳᐠ ᐁᑲᐧ ᑲᑕᑲᐧᑭᐠ ᒥᓇ ᑲᓯᑲᐧᐠ, ᐊᓄᒥᐣ ᑲᐸᐊᐧᑲᓄᐃᐧᐨ ᑲᑕᑲᐧᑭᐠ, ᑲᑲᑎᑯᓂᓇᓂᐊᐧᐠ ᑲᐱᐳᐠ ᐁᑲᐧ ᑲᓂᐱᐠ, ᑲᐊᔭᑲᐧᒥᓯᓇᓂᐊᐧᐠ ᑲᐯᐱᐳᐣ, ᐁᑲᐧ ᑲᑭᒋᐱᒪᑲᐧᔑᐊᐧᓂᐊᐧᐠ ᑲᑕᑲᐧᑭᐠ ᒥᓇ ᑲᓯᑲᐧᐠ᙮
“ᐁᑲᐧ ᐊᐦᐃᐠ ᐊᓴᐸᐱᔕᑯᓯᐊᐧᑲᐣᐠ ᑕᔑᑫᐃᐧᓂᐠ ᑲᑭᐅᒋᒪᒋᑲᐧᔑᐊᐧᓂᐊᐧᐠ ᐊᐦᐃᐠ ᐊᐧᐸᓯᒧᐣᐠ ᑲᑭᐃᓇᑲᐧᔑᐊᐧᓂᐊᐧᐠ ᐅᐡᑲᑎᓴᐠ ᑭᐅᒋᔑᓭᓂ ᒋᐅᒋᑭᑫᓂᒥᑎᐊᐧᐨ᙮” ᐃᑭᑐ᙮
ᐁᑲᐧ ᒪᐊᐧᐨ ᐅᑎᐡᑯᓂᐠ ᐅᑭᒥᓀᐧᐣᑕᓇᐊᐧ ᑲᑭᐱᒥ ᐳᑕᐁᐧᐊᐧᐨ ᐊᒥ ᐅᐅᐁᐧ ᑲᔭᐡ ᑐᑲᐣ ᑲᑭᐱᑐᒋᑲᑌᐠ ᒣᑲᐧᐨ ᑲᑭᐱᒪᑲᐧᔑᐊᐧᓂᐊᐧᐠ᙮
“ᒪᐊᐧᐨ ᓂᑭᒥᓀᐧᐣᑕᐣ ᐁᐧᐡᑲᐨ ᓂᑲᒧᐃᐧᓇᐣ ᑲᑭᓂᑲᒥᑐᔭᓂᐣ ᐃᐃᒪ ᑌᑎᐸᐦᐃ ᐳᑕᐊᐧᓂᐠ,” ᐃᑭᑐ ᐅᑎᐡᑯᓂ ᒋᒥ ᐳᐦᐅᐱᐢᑌᕑ᙮ “ᒪᐊᐧᐨ ᓂᑭ ᑭᒋᓀᐣᑕᐣ ᐅᐅᐁᐧ ᑫᓂᐣ ᑲᑭᒪᒐᔭᐣ ᒥᓇ ᐱᑯ ᐁᑭᐊᐧᐸᑕᒪᐣ ᐁᐧᐡᑲᐨ ᓂᐊᐧᑯᒪᑲᓂᓇᓇᐠ ᑲᑭᐱᑕᔑᑫᐊᐧᐨ᙮ ᒥᓇ ᐱᑯ ᐱᑲᐧᒋ ᒥᒋᑦ ᓂᑭᓇᓇᒪᔦᐣᑕᐣ ᐁᑲᐧ ᐊᐱᐣ ᑲᑕᑯᔑᓂᔭᐣ ᑲᐃᔑᑲᐯᔑᔭᐣ ᓀᐅᐨ ᓂᑭᓴᓴᐱᑲᐧᑕᐣ ᐸᐣᑫᐠᐢ ᐁᑲᐧ ᓴᐧᓴᒋᐢ᙮”