ᐅᐡᑲᑎᓴᐠ ᒪᓯᓂᐱᐦᐃᑫᐊᐧᐠ ᒋᐅᒋ ᐃᐧᒋᐦᐃᑎᓱᐊᐧᐨ

ᐊᓂᔑᓂᓂᐃᐧ ᐅᐡᑲᑎᓴᐠ ᐅᑭᐅᑕᐱᓇᓇᐊᐧ ᑲᑭᑕᐃᐧᓇᒪᐃᐧᐣᑕᐧ ᒋᒪᓯᓂᐱᐦᐃᑫᐊᐧᐨ ᑲᑭᐅᓇᒋᑲᑌᓂᐠ ᒋᑕᔑᑐᑕᒧᐊᐧᐨ ᐃᒪ ᓂᒋ ᒪᓯᓂᐱᐦᐃᑫᐃᐧᑲᒥᑯᐠ ᒪᓯᓂᐱᐃᐦᐃᑫᐃᐧ ᑭᑭᓄᐦᐊᒪᑫᐃᐧᐣ ᑲᑭᐸᑭᑎᓂᑲᑌᐠ ᒣᑲᐧᐨ ᑲᐡᑲᑎᓄᐃᐧᐱᓯᑦ 27 ᐁᐧᑎ ᓴᐱᕑᐃᔭᕑ ᐊᕑᐟ ᑲᓫᐅᕑᐃ (DefSup) ᑕᐣᑐᕑ ᐯ ᐅᑌᓇᐠ.
“ᒥᐦᐅᒪ ᐁᐅᐣᒋᓇᐣᑲᐠ ᓂᒪᒥᑐᓀᒋᑲᐣ ᑲᒪᓯᓂᐱᐦᐃᑫᔭᐣ,” ᑭᐃᑭᑐ ᓭᔦᕑᐊ ᓇᐁᐧᑭᓯᐠ, ᒥᐦᐊᐁᐧ ᑫᐃᐧᐣ ᐃᒪ ᑲᑭᐅᑕᐱᓇᐠ ᒪᒪᐤ 60 ᐊᓂᔑᓂᓂᐃᐧ ᐅᐡᑲᑎᓴᐠ ᓂᑕᑦ ᑲᑭᐅᑕᐱᓇᒧᐊᐧᐨ ᐅᐁᐧᓂ ᑭᑭᓄᐦᐊᒪᑫᐃᐧᓂ. “ᑭᑐᐣᒋᐃᐧᒋᐦᐃᑯᐣ ᐸᑲᐣ ᒋᐅᒋᐃᓀᑕᒪᐣ ᐁᑲᐧ ᐃᐁᐧ ᒋᐅᐣᑕᒥᑲᒪᐣ.” ᓇᐁᐧᑭᓯᐠ ᐃᑭᑐ ᐁᐅᐣᒋᐸᑲᑭᒪᒥᑐᓀᑕᐠ ᒣᑲᐧᐨ ᑲᐅᐣᑕᒥᑲᐠ ᐅᒪᓯᓂᐱᐦᐃᑫᐃᐧᐣ.
“ᑲᐃᐧᐣ ᐸᑲᐣ ᑫᑯᐣ ᑯᑕᐠ ᓂᒪᒥᑐᓀᑕᓯᐣ,” ᐃᑭᑐ ᓇᐁᐧᑭᓯᐠ. “ᒥᐱᑯ ᐃᐁᐧ ᐁᒪᒥᑐᓀᑕᒪᐣ ᒪᓯᓂᐱᐦᐃᑫᐃᐧᐣ ᒥᓇ ᑯᑕᑭᔭᐣ ᑲᑭᓇ ᑫᑯᓇᐣ ᑲᓇᓇᑭᐡᑲᒪᐣ, ᑲᐃᐧᐣ ᓂᐊᐧᓂᐡᑫᐧᐦᐃᑯᓯᐣ. ᐊᑎᑲ ᐊᑯ ᑲᑲᑫᐧ ᐊᓄᑲᑕᒪᐣ ᐣᑎᐡᑯᓄᐃᐧᐣ ᒥᓇ ᑲᑭᐁᐧᐃᐧᑐᔭᐣ ᐣᑎᐡᑯᓄᐃᐧ ᐊᓄᑭᐃᐧᐣ ᒪᐊᐧᐨ ᐊᑯ ᐣᑐᒋᐊᐧᓂᐡᑫᐧᐦᐃᑯᐣ ᑫᑯᓇᐣ ᑲᐃᐧᐢᑕᑕᑲᐧᑭᐣ. ᐁᑲᐧ ᐃᐧᐣ ᐅᒪ ᑲᐊᔭᔭᐣ ᑲᐃᐧᐣ ᐊᐃᐧᔭ ᓂᐊᐧᓂᐡᑫᐧᐦᐃᑯᓯᐣ. ᐊᓇᐃᐧᐣ ᒪᐊᐧᐨ ᐃᑯ ᒥᔑᓄᓇᓂᐊᐧᐣ ᒥᓇ ᓱᐣᑭᑕᑲᐧᐣ ᔕᑯᐨ ᒥᐱᑯ ᐁᔑᑲᐡᑭᑐᔭᐣ ᐁᒪᓯᓂᐱᐦᐃᑫᔭᐣ ᐁᑲ ᓇᐣᑕ ᐁᐃᓀᐣᑕᒪᐣ.”
ᐊᓇᐃᐧᐣ ᓇᐁᐧᑭᓯᐠ ᐅᑭᐊᔭᓇᐸᐣ ᒋᐊᓄᑲᑕᐠ ᐅᑎᐡᑯᓄᐃᐧ ᐊᓄᑭᐃᐧᐣ ᐃᐁᐧᓂ ᒣᑲᐧᐨ ᑲᐅᓇᑯᔑᓂᐠ, ᒥᑕᐡ ᑲᑭᐃᓀᑕᐠ ᒋᔑᔕᐨ ᒪᓯᓂᐱᐦᐃᑫᐃᐧ ᑭᑭᓄᐦᐊᒪᑫᐃᐧᓂᐠ ᒋᐊᐣᑕᐃᐧ ᒪᓯᓂᐱᐦᐃᑫᐨ.
“ᓇᐊᐧᐨ ᐃᑯ ᒪᒥᓀᐧᐣᑕᑲᐧᐣ ᐅᒪ ᑲᐱᔕᔭᐣ ᐁᑫᐧᓇᐠ ᑲᔦ ᐅᒪ ᐁᐊᔭᔭᐣ ᐊᐱᐨ ᐃᐧᐣ ᐁᐧᑎ ᑲᐃᔕᔭᐣ ᐊᓂᔑᓇᐯᐃᐧᑲᒥᑯᐠ,” ᐃᑭᑐ ᓇᐁᐧᑭᓯᐠ. “ᐁᑲᐧ ᒥᓇ ᒪᐊᐧᐨ ᑭᒥᔑᓄᐊᐧᐠ ᐊᐃᐧᔭᐠ ᑲᑭᐱᔕᐊᐧᐨ. ᑲᐃᐧᐣ ᐃᐧᑲ ᓂᐊᐧᐸᒪᓯᐠ ᒋᒥᔑᓄᐊᐧᐨ ᐊᐃᐧᔭᐠ ᒋᔕᐊᐧᐨ ᑲᐃᔑ ᑭᑭᓄᐦᐊᒪᑲᓂᐊᐧᐠ.”
ᓫᐅᓯ ᐊᐟᓫᐅᑲᐣ, 24 ᑕᓱᐊᐦᑭᐃᐧᓀ ᐁᓂᑕᒪᓯᓂᐱᐦᐃᑫᐨ ᐁᐧᑎ ᐊᐸᒪᑐᐠ ᐁᐅᐣᒋᐨ, ᑭᐃᐧᒋᐦᐃᐁᐧ ᐅᐁᐧᓂ ᒋᒪᒋᒋᑲᑌᓂᐠ ᒋᒥᓂᑕᐧ ᐊᓂᔑᓂᓂᐃᐧ ᐅᐡᑲᑎᓴᐠ 14-30 ᑲᑕᓱᐊᐦᑭᐃᐧᓀᐊᐧᐨ ᐁᑲ ᑲᑎᐸᐦᐃᑲᑌᐠ ᒪᓯᓂᐱᐦᐃᑫᐃᐧ ᑭᑭᓄᐦᐊᒪᑫᐃᐧᐣ ᒣᑲᐧᐨ ᐃᒪ ᐅᑌᓇᐠ ᑲᐱᒥᐃᐡᑯᓄᐊᐧᐨ.
“ᑫᓂᐣ ᓂᓂᑕᒪᓯᓂᐱᐦᐃᑫ, ᐁᑲᐧ ᓂᑎᓇᐸᒋᑐᐣ ᓂᒪᓯᐱᐦᐃᑫᐃᐧᐣ ᐁᐅᐣᒋᐃᐧᒋᐦᐃᑎᓱᐊᐧᑫᔭᐣ ᓂᐱᒪᑎᓯᐃᐧᓂᐠ - ᓂᑐᒋᓴᑲᑫᓂᑦ ᒥᓇ ᓂᑎᓇᐸᒋᑐᐣ ᐁᐅᐣᒋᐃᐧᒋᐦᐃᑯᔭᐣ ᐅᐁᐧ ᑲᑐᑕᒪᐣ,” ᑭᐃᑭᑐ ᐊᐟᓫᐅᑲᐣ. “ᐊᒥ ᑲᐃᓀᐣᑕᒪᐸᐣ, ᑲᓂᑲ ᑭᐊᔭᑭᐸᐣ ᒪᓯᓂᐱᐦᐃᑫᐃᐧ ᑭᑭᓄᐦᐊᒪᑫᐃᐧᐣ ᑲᐯᐦᐃ ᒣᑲᐧᐨ ᑲᐱᒥᐃᐡᑯᓄᐃᐧᓇᓂᐊᐧᐠ.”
ᐁᑲᐧ ᑕᐡ ᐅᐡᑲᑎᓴᐠ ᑭᔭᓂ ᐊᐧᐸᑕᐦᐊᑲᓄᐊᐧᐠ ᑲᑐᒋᑲᑌᐠ ᒪᓯᓂᐱᐦᐃᑫᐃᐧᐣ ᐱᑯ ᓇᓇᑲ ᑲᐊᐃᓇᓯᓇᐦᐃᑲᓂᐊᐧᐠ ᑲᔭᔑ ᒪᓯᓂᐱᐦᐃᑫᐃᐧᐣ ᒥᓇ ᐊᑲᐧᒋᐠ ᒪᓯᓂᐱᐦᐃᑫᐃᐧᐣ ᒣᑲᐧᐨ ᐊᐱ ᓂᐢᑕᑦ ᑲᓂᒪᒋ ᑭᑭᓄᐦᐊᒪᑲᓂᐊᐧᐠ ᐃᒪ ᒪᓯᓂᐱᐦᐃᑫᐃᐧᑲᒥᑯᐠ, ᐁᑲᐧ ᐃᒪ ᐃᔑᑕᑲᐧᐣ ᑭᐁᐧᑎᓄᐠ ᐃᓀᑫ ᑕᐣᑐᕑ ᐯ ᑭᑫᔭᐣᐠ ᐸᕑᐠ ᐊᐯᐣᔪ ᒥᓇ ᑲᐧᕑᐟ ᐢᑐᕑᐃᐟ.
ᑲᒥᓀᐧᑕᒧᐊᐧᐨ ᒋᒪᓯᓂᐱᐦᐊᒧᐊᐧᐨ ᑕᑭᑭᓄᐦᐊᒪᑫᐊᐧᐠ ᑌᕑᐃᐠ ᑲᓂ ᐁᑲᐧ ᒥᓇ ᒐᐧᕑᑎᐣ ᒥᑭᐢ ᒥᓇᐊᐧ ᒪᓯᓂᐱᐦᐃᑫᐃᐧ ᑭᑭᓄᐦᐊᑲᓂᐊᐧᐠ ᒪᑯᔐᑭᔑᑲᓂᐱᓯᑦ 18 ᐃᓇᑭᓱᐨ. ᐁᑲᐧ ᒥᓇ ᑯᑕᑭᔭᐣ ᐸᐸᑲᐣ ᑲᐃᓇᓯᓇᐦᐃᑲᓂᐊᐧᐠ, ᓂᑲᒧᐃᐧᐃᑭᑐᐃᐧᓇᐣ, ᒥᑭᓯᑲᐧᓱᐃᐧᐣ ᒥᓇ ᐅᔑᒋᐡᑭᐊᐧᑭᓂᑫᐃᐧᐣ ᑕᓂᑭᑭᓄᐦᐊᒪᑲᓂᐊᐧᐣ ᑭᔭᐱᐨ ᐁᐧᑎ ᓂᔭᓇᐧ ᑕᓂᑭᑭᓄᐦᐊᒪᑲᓂᐊᐧᐣ ᑭᔑᐅᓇᑌ ᒣᑲᐧᐨ ᒉᐣᐁᐧᕑᐃ ᐱᓯᑦ 22, ᑭᔐᐱᓯᑦ 19, ᒥᓇ ᒥᑭᓯᐃᐧᐱᓯᑦ 12 ᒥᓇ 13.
ᐊᐟᓫᐅᑲᐣ ᓂᐢᑕᑦ ᑭᔭᓂᐊᐧᐃᐧᒋᐦᐃᐁᐧᐸᐣ ᐃᒪ ᒪᓯᓂᐱᐦᐃᑫᐃᐧᑲᒥᑯᐠ ᐁᑭᐃᔑᐃᐧᑐᐸᐣ ᐅᒪᓯᓂᐱᐦᐃᑲᓇᐣ ᒋᐊᐧᐸᐣᑕᒧᐊᐧᐨ ᐃᒪ ᑲᐊᓄᑭᐊᐧᐨ.
“ᑫᑯᐣ ᑲᒪᓯᓂᐱᐦᐊᒪᐣ, ᓂᒧᔑᐦᐅᐃᐧᓂᐠ ᐅᐣᒋᒪᑲᐣ ᒥᐦᐃᒪ ᐁᐅᐣᒋᒥᓀᐧᐣᑕᒪᐣ ᐅᐁᐧ ᑲᑐᑕᒪᐣ,” ᑭᐃᑭᑐ ᐊᐟᓫᐅᑲᐣ. “ᑲᐃᐧᓂᐣ ᓂᑲᐣ ᓂᑐᓀᑕᓯᐣ ᑫᑯᓀᐣ ᑫᒪᓯᓂᐱᐦᐊᒪᐣ, ᒥᐱᑯ ᐁᓂᔑᒪᒋ ᒪᓯᓂᐱᐦᐃᑫᔭᐣ ᐁᑲᐧ ᒥᓇ ᒪᐊᐧᐨ ᐃᑯ ᒪᑲᑌᐃᐧᓇᑲᐧᐣ ᐊᓂᐡ ᓂᑎᓇᐸᒋᑐᐣ ᒪᓯᓂᐱᐦᐃᑫᐃᐧᐣ ᐁᐅᒋᑎᐸᒋᒥᑎᓱᔭᐣ. ᒥᔑᐣ ᐊᐃᐧᔭᐠ ᓂᑭᐱᐊᐧᓂᐦᐊᐠ ᓂᐱᒪᑎᓯᐃᐧᓂᐠ. ᒥᔑᐣ ᑫᑯᓇᐣ ᓂᑭᐱᓇᓇᑭᐡᑲᓇᐣ, ᐯᔑᑲᐧᐣ ᐃᑯ ᐊᓂᔑᓂᐯᑫᐧ ᑲᐱᐊᐃᓯᓭᐨ. ᓂᑭᐱᑯᑕᐨ ᑲᔦ ᒋᐊᐧᐸᑕᐦᐃᐁᐧᔭᐣ ᓂᒪᓯᓂᐱᐦᐃᑲᓇ, ᐁᑭᓭᑭᓯᔭᐣ ᐊᓂᐣ ᑫᐃᓀᓂᒥᔑᐊᐧᐨ ᐊᐃᐧᔭᐠ, ᔕᑯᐨ ᓂᑭᐊᓂᑲᐡᑭᑐᐣ ᑭᔭᑦ ᐃᑯ ᒋᔑᐃᐧᑐᔭᐣ ᒋᐊᐧᐸᑕᒧᐊᐧᐨ ᑲᑭᒪᓯᓂᐱᐦᐊᒪᐣ ᑫᑯᓇᐣ ᒥᑕᐡ ᐅᓄᐁᐧᓂᐊᐧᐣ ᐊᑎᐟ ᑲᐊᐧᐊᐧᐸᑕᐦᐃᐁᐧᐊᐧᐨ.”
ᓄᑯᑦ ᑕᐡ ᒥᐦᐅᒪ ᐁᔑᑕᑭᐧᐨ ᑲᐊᓂᒪᐊᐧᒋᒋᑲᑌᑭᐣ ᐱᑯ ᐊᐃᐧᔭᐠ ᐅᒪᓯᓂᐱᐦᐃᑲᓂᐊᐧ, ᐁᑭᐃᓇᐧᑕᒧᐊᐧᐨ ᒋᐅᒋ ᐃᐧᒋᐦᐃᑯᐊᐧᐨ ᒥᓇ ᐊᓱᐡᑲᒪᐃᐧᐣᑕᐧ ᑲᐅᐡᑲᑎᓯᐊᐧᐨ ᑲᐊᓂ ᒪᓯᓂᐱᐦᐃᑫᐊᐧᐨ ᐃᐧᓇᐊᐧ ᐱᑯ ᑲᐃᓀᐣᑕᒧᐊᐧᐨ ᑲᐃᓇᓯᓇᐦᐃᑫᐊᐧᐨ ᑫᑯᓇᐣ, ᐅᒪ ᒋᐱᔑ ᐸᐸᑭᑎᓇᒧᐊᐧᐨ, ᒋᐊᐧᐸᑕᐦᐃᐁᐧᐊᐧᐨ ᒥᓇ ᒥᓇ ᑲᐃᔑᑲᐡᑭᐦᐅᐊᐧᐨ ᒋᑭᑫᐣᒋᑲᑌᓂᐠ.
ᐅᒪ ᓂᒋ ᒪᓯᓂᐱᐦᐃᑫᐃᐧᑲᒥᑯᐠ ᒪᓯᓂᐱᐦᐃᑫᐃᐧ ᑭᑭᓄᐦᐊᒪᑫᐃᐧᓇᐣ ᐅᐱᒧᑐᓇᐊᐧ ᐃᒪ ᐅᑌᓇᐠ ᑲᑲᐯᔑᐊᐧᐨ ᑲᐊᓂᐅᐡᑭ ᒪᓯᓂᐱᐦᐃᑫᐊᐧᐨ ᒥᓇ ᐊᓂᔑᓂᓂᐃᐧ ᐅᒪᓯᓂᐱᐦᐃᑫᐠ ᐸᐸᑲᐣ ᑲᐊᐃᓇᓯᓇᐦᐃᑫᐊᐧᐨ ᒥᓇ ᐸᐸᑲᐣ ᑲᐊᐃᔑᐱᒥ ᑭᑭᓄᐦᐊᒪᐃᐧᐣᑕᐧ ᒥᓇ ᑲᐃᔑᑲᐡᑭᐦᐅᐊᐧᐨ.
ᐅᓄᐁᐧᓂᐊᐧᐣ ᐸᐯᔑᐠ ᒪᓯᓂᐱᐦᐃᑫᐃᐧ ᑭᑭᓄᐦᐊᒪᑫᐃᐧᓇᐣ ᑭᐃᔑᐅᓇᒋᑲᑌᐊᐧᐣ ᒋᐅᒋ ᐊᐧᐸᑕᐦᐃᐊᐧᓂᐊᐧᐠ ᑲᐃᔑᒋᑫᒪᑲᐠ ᑎᐯᐣᒋᑫᐃᐧ ᐊᓂᒥᓭᐃᐧᐣ ᒥᓇ ᒥᓄᐃᐧᒋᐃᐧᑎᐃᐧᐣ ᑫᐃᔑᑲᑭᑫᐣᑕᒧᐊᐧᐸᐣ ᐊᓂᔑᓂᓂᐃᐧ ᐅᐡᑲᑎᓴᐠ ᑫᓄᒋ ᐃᐧᒋᐦᐃᑯᐊᐧᐨ ᐅᐱᒪᑎᓯᐃᐧᓂᐊᐧᐠ ᒥᓇ ᑫᓄᒋ ᐱᒥᐃᐧᒋᐦᐃᑎᓱᐊᐧᐸᐣ ᐃᒪ ᐃᓀᑫ ᒥᓄᑲᓇᐊᐧᐸᒥᑐᐃᐧᓂᐠ.
“ᒣᑲᐧᐨ ᑲᐱᐅᐡᑲᑎᓯᔭᐣ, ᒥᔑᐣ ᑫᑯᓇᐣ ᓂᑭᐱᐊᓂᒥᐦᐃᑯᓇᐣ,” ᑭᐃᑭᑐ ᐊᐟᓫᐅᑲᐣ. “ᓂᑭᐅᐣᒋᐃᐧᒋᐦᐃᑯᐣ ᑕᐡ ᑲᑭᒪᓯᓂᐱᐦᐃᑫᔭᐣ ᒥᓇ ᐁᓇᓇᑲᐃᐧᐱᐦᐃᑫᔭᐣ ᒥᓇ ᐃᐁᐧ ᒪᐊᐧᐨ ᐅᔑᒋᐡᑭᐊᐧᑭᓂᑫᐃᐧᐣ ᐁᑭᑐᑕᒪᐣ.”
ᐁᑲᐧ ᒥᓇ ᐅᐡᑲᑎᓴᐠ ᐊᐧᓴ ᑲᐃᔑᑲᐯᔑᐊᐧᐨ ᓇᐣᑕ ᒥᓇ ᐁᑲ ᑲᑭᐃᓯᓭᐊᐧᐨ ᒋᑭᔕᐊᐧᐨ ᒪᓯᓂᐱᐦᐃᑫᐃᐧ ᑭᑭᓄᐦᐊᒪᑫᐃᐧᓂᐠ ᐅᑕᑭᐃᔑᓂᔕᐦᐊᓇᐊᐧ ᐅᒪᓯᓇᐱᐦᐃᑲᓂᐊᐧ ᒋᒪᓯᓇᑭᓴᒧᐊᐧᐨ ᐃᒪ ᒋᓇᓯᑐᐊᐧᐨ ᒪᒪᑕᐊᐧᐱᑯᐠ ᐅᒪ Instagram #neecheestudio ᓇᐣᑕ ᓂᒋ ᒪᓯᓂᐱᐦᐃᑫᐃᐧᑲᒥᑯᐠ ᑲᐅᒋᒪᒪᐃᐧ ᐊᐧᐸᒋᑲᑌᑭᐣ ᐅᑎᐸᒋᒧᐃᐧᓂᐊᐧ ᓇᐣᑕ ᐃᒣᓫ ᒪᓯᓇᐦᐊᒪᑐᐃᐧᓂ ᐁᓇᓯᓇᐦᐃᑲᑌᓂᐠ neecheestudio@gmail.com.
ᑭᐅᓇᒋᑲᓂᐊᐧᐣ ᒋᓇᑐᒥᐣᑕᐧ ᐅᐡᑲᑎᓴᐠ ᒋᐸᑭᑎᓇᒧᐊᐧᐨ ᐅᒪᓯᓂᐱᐦᐃᑫᐃᐧᓂᐊᐧ ᐃᒪ ᐱᐊᐧᐱᑯᐠ ᒋᐅᒋ ᐊᐧᐸᑕᐦᐃᐊᐧᓄᐊᐧᐠ, ᒥᓇ ᒋᐊᒋᑲᑌᑭᐣ ᐊᐃᐧᔭᐠ ᒋᐅᒋ ᐊᐧᐸᑕᒧᐊᐧᐨ ᐁᑲᐧ ᒥᓇ ᒪᓯᓇᐦᐃᑲᓂᐠ ᒋᔑᐊᒋᑲᑌᓂᑭᐣ.
ᓂᒋ ᒪᓯᓂᐱᐦᐃᑫᐃᐧᑲᒥᐠ ᑭᐅᐣᒋᐃᐧᒋᒋᑲᑌ ᒋᐅᔑᒋᑲᑌᐠ ᐁᑭᐸᑭᑎᓇᑲᓄᐨ ᔓᓂᔭ ᐃᒪ ᑲᒥᐢᑲᐧᐱᓱᐊᐧᐨ ᔑᒪᑲᓂᔕᐠ ᑲᐃᐧᒋᑐᐊᐧᐨ ᑲᑲᑫᐧᑭᐱᑎᓂᑲᑌᐠ ᑎᐯᐣᒋᑫᐃᐧ ᒪᒋᓭᐃᐧᐣ ᔓᓂᔭ ᐸᑭᑎᓂᑫᐃᐧᐣ ᐁᑲᐧ ᒥᓇ ᑭᐅᐣᒋ ᐃᐧᒋᒋᑲᑌ ᓇᓇᑲ ᐃᓇᑲᓀᓯᐃᐧᐣ ᐅᐡᑲᑎᓯᐃᐧ ᒪᒪᐃᐧᓄᐃᐧᐣ, ᑌᓇᐢ ᑊᕑᐊᐣᑭᓫᐃᐣ ᑲᕑᐊᒧᕑᑎ ᑭᒋᐃᐡᑯᓄᑲᒥᐠ, ᒪᑕᐊᐧ ᐅᑭᒪᑲᓇᐠ, ᐊᓂᔑᓇᐯ ᐊᐢᑭ ᐅᑭᒪᐃᐧᐣ ᒥᓇ ᐊᓂᔑᓇᐯ ᐅᐡᑲᑎᓴᐠ.