ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐣ ᑭᐊᓂᒧᒋᑲᑌ ᑲᑭᒪᐊᐧᒋᐦᐃᑐᐊᐧᐨ ᐊᓂᔑᓇᐯ ᐊᐢᑭ ᓂᑲᓂᑕᒪᑫᐠ

ᐊᐸᒪᑐᐠ ᐅᑭᒪᑲᐣ ᐊᓂᓯᐸᐟ ᐊᐟᓫᐅᑲᐣ ᐅᑭᑲᓄᑕᓇᐣ ᑯᑕᑭᔭᐣ ᐃᐡᑯᓂᑲᓇᐣ ᐊᔕ ᒋᑭᑲᑫᐧ ᒪᐡᑲᐃᐧᑲᐸᐃᐧᐦᐃᑎᓱᒪᑲᑲᐧᐸᐣ ᐃᐁᐧᓂ ᐅᒋ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᓇᐣ ᒣᑲᐧᐨ ᑲᐡᑲᑎᓄᐱᓯᑦ 19-21 ᐊᓂᔑᓇᐯ ᐊᐢᑭ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧ ᐊᓂᒧᒋᑫᐃᐧᐣ ᑲᑭᒪᐊᐧᒋᐦᐃᑐᐊᐧᐨ.
“ᑲᐃᐧᐣ ᐊᔕ ᑲᑭᐱᐦᐅᓯᒥᐣ,” ᐃᑭᑐ ᐊᐟᓫᐅᑲᐣ. “ᐅᓇᑯ ᑭᑭᓄᑕᐊᐧᐊᐧ ᑲᑭᐊᔭᒥᐨ ᑊᕑᐊᐣᐠ ᔭᑲᐳᒋ ᑲᑭᐸᑭᑎᓇᐠ ᓂᐢᑕᑦ ᐅᑎᐸᒋᒧᐃᐧᐣ (ᐊᓂᔑᓂᓂᐊᐧᐣ ᑲᑲᓇᐊᐧᐸᒋᑫᑕᒪᐊᐧᐠ ᐅᐣᑌᕑᐃᔪ ᐅᓇᔓᐁᐧᐃᐧᑭᒪᔑᔑᐃᐧᓂᐠ) ᒥᑐᓂ ᐁᐱᑯᓇᑲᐧᐠ ᑎᐸᑯᓂᑫᐃᐧ ᐱᒧᒋᑫᐃᐧᐣ. ᐊᓂᐣ ᑕᐡ ᒥᓂᑯᐠ ᑫᐸᐱᐦᐅᔭᐠ ᑫᑯᐣ ᒋᐊᓂᑲᑫᐧᑐᑕᒪᐠ, ᑭᓇᐃᐧᐟ ᒋᐊᓂᐊᓄᑲᑕᒪᐠ, ᒋᔭᓂ ᒪᐡᑲᐃᐧᑲᐸᐃᐧᒪᑲᑭᐣ ᑭᑎᐡᑯᓂᑲᓂᓇᐣ.”
ᐊᐟᓫᐅᑲᐣ ᐃᑭᑐ ᐃᒪ ᐅᑎᐡᑯᓂᑲᓂᐊᐧᐠ ᐃᐧᓇᐊᐧ ᐅᑭᐊᓄᑲᑕᓇᐊᐧᐸᐣ ᐊᓂᐣ ᑫᐃᔑ ᑲᑫᐧᐃᐧᒋᐦᐃᑎᓱᐊᐧᐨ ᐊᐱ ᑲᑭᐃᐡᑲᐧ ᑎᐸᒋᒧᐊᐧᐸᐣ ᐁᑭᒋᒪᒋᓭᐦᐃᑯᐊᐧᐨ ᒪᐡᑭᑭᑫᐃᐧᓂ ᒣᑲᐧᐨ 2010 ᑲᐊᐦᑭᐊᐧᓂᐠ.
“ᓂᓇᐃᐧᐟ ᐃᑯ ᐃᒪ ᐃᐡᑯᓂᑲᓂᐠ ᑲᑲᐯᔑᔭᐠ ᓂᑭᓇᓇᑐᓇᒥᐣ ᐊᓂᐣ ᑫᓂᔑ ᐊᓄᑲᑕᒪᐠ ᓂᑎᓯᓭᐃᐧᓂᓇᐣ,” ᐃᑭᑐ ᐊᐟᓫᐅᑲᐣ, ᐁᑭᐃᐧᐣᑕᐠ ᑲᑭᐃᔑᐅᓀᐣᑕᒧᐊᐧᐸᐣ ᐊᓂᔑᓂᓂᐊᐧᐠ ᒋᐅᓇᑐᐊᐧᐨ ᐊᓂᐣ ᑫᐃᔑᐱᒧᑐᐊᐧᐨ ᐃᐧᒋᐦᐃᐁᐧᐃᐧᓂ ᑫᒋᐊᐧᐠ ᐃᒪ ᐅᑕᓇᐱᐃᐧᓂᐊᐧᐠ ᒋᑕᔑᐱᒥ ᐊᐧᐃᐧᒋᐦᐃᐣᑕᐧ ᑲᑲᐧᒋᒪᐡᑭᑭᑫᐊᐧᐱᓀᐊᐧᐨ ᒥᓇ ᑲᐃᔑᒥᑯᐡᑲᒋᓭᐦᐃᑯᐊᐧᐨ ᐊᐧᑯᒪᑲᓇᐠ. “ᑫᑯᓀᐣ ᑕᐡ ᐅᒪ ᑲᑭᐅᐣᒋᒥᑲᒪᐣᐠ - ᒥᐦᐅᒪ ᑲᑭᐅᐣᑎᓇᒪᐣᐠ ᒋᔭᓂᒪᐡᑲᐃᐧᓯᒪᑲᐠ ᓂᑕᔑᑫᐃᐧᓂᓇᐣ. ᓂᓇᐃᐧᐟ ᐃᑯ ᓂᐣᑭᒪᑕᓄᑲᑕᒥᐣ ᐊᐣᑎ ᑫᑭᐊᓄᒋ ᒪᐡᑲᐃᐧᑲᐸᐃᐧᔭᐠ.”
ᐊᐟᓫᐅᑲᐣ ᑲᔦ ᐅᑭᑲᑫᐧᒋᒪᐣ ᐸᐸᑲᐣ ᑕᓇᐱᐃᐧᓇᐣ ᑲᐅᐣᒋᐊᐧᐨ ᑲᑭᐅᓇᑕᒪᓱᐊᐧᐸᐣ ᐅᑎᐸᑯᓂᑫᐃᐧ ᐱᒧᒋᑫᐃᐧᓂᐊᐧ ᒋᑭᐃᐧᐣᑕᒧᐊᐧᐸᐣ ᒋᐅᒋ ᑭᑫᐣᑕᒧᐊᐧᐨ ᑯᑕᑭᔭᐣ ᐃᐡᑯᓂᑲᓇᐣ ᑲᐊᔭᐊᐧᐨ.
“ᒪᑎ ᐃᐧᐣᑕᒪᐃᐧᔑᓇᑦ ᐊᓂᐡ ᐸᔦᐡ ᑫᓂᓇᐃᐧᐟ ᓂᑕᓂᑲᑫᐧ ᒪᑕᓄᑲᑕᒥᐣ ᐅᐁᐧ,” ᑭᐃᑭᑐ ᐊᐟᓫᐅᑲᐣ. “ᓂᐣᑭᑫᑕᐣ ᑲᔦ ᓇᓇᑲᐤ ᑫᑯᓇᐣ ᒋᐅᒋᒧᑭᓭᑭᐣ ᐁᑲ ᑫᐅᐣᒋᒪᒥᓄᓭᐠ ᐊᐱ ᐊᓂᐅᓇᐸᐣᑕᒪᐠ ᑫᐃᔑᐅᓇᒋᑫᔭᐠ.”
ᐁᑲᐧ ᐅᐁᐧ ᒪᐊᐧᒋᐦᐃᑐᐃᐧᐣ ᑲᑭᑐᒋᑲᑌᐠ ᑭᐅᐣᒋ ᑲᓇᐊᐧᐸᒋᑲᑌ ᐊᓂᔑᓇᐯ ᐊᐢᑭ ᑎᐸᑯᓂᑫᐃᐧ ᐃᐧᒋᐦᐃᐁᐧᐃᐧ ᐱᒧᒋᑫᐃᐧᓂᐠ ᐊᐱ ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᑲᑭᐃᑭᑐᐊᐧᐸᐣ ᒋᐃᐧᒋᒋᑲᑌᑭᐣ ᐃᐡᑯᓂᑲᓇᐣ ᒋᐃᐧᒋᐃᐧᑎᒪᑲᑭᐣ ᐊᐱ ᐊᓂᒪᑕᓄᑲᑌᐠ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐣ ᑫᓂᔑᐃᐧᒋᐦᐃᑯᐊᐧᐨ ᐊᓂᔑᓂᓂᐊᐧᐠ ᒥᓯᐁᐧ ᐊᓂᔑᓇᐯ ᐊᐢᑭ ᑎᐯᐣᒋᑫᐃᐧᓂᐠ.
ᐁᑲᐧ ᐊᐧᐁᐧ ᑭᒋᐅᑭᒪᑲᓀᐢ ᑲᐧᔾᐢ ᑲᑭᑲᒥᐠ ᑭᐃᑭᑐ ᒋᑭᐅᓇᑌᑭᐸᐣ ᐊᓂᔑᓂᓂ ᐅᑕᓇᐠ ᑲᑭᐱᔑᐱᒧᑐᐨ ᐅᑎᐸᑯᓂᑫᐃᐧ ᐱᒧᒋᑫᐃᐧᐣ ᑫᐊᐸᒋᑐᐊᐧᐨ ᐊᓂᔑᓂᓂᐊᐧᐠ.
“ᑭᓇᐃᐧᐟ ᑲᐊᓂᔑᓂᓂᐃᐧᔭᐠ ᑫᑭᓇᐃᐧᐟ ᐸᐸᑲᐣ ᑭᑎᔑᓂᓯᑐᑕᒥᐣ ᑭᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᓂᓇᐣ ᐁᑲᐧ ᒥᓇ ᐁᐧᒥᑎᑯᔑᐃᐧ ᑎᐸᑯᓂᑫᐃᐧᐣ ᑲᐃᔑᑲᓇᐊᐧᐸᒋᑌᐠ,” ᑭᐃᑭᑐ ᑲᑭᑲᒥᐠ. “ᐁᐧᒥᑎᑯᔑᐃᐧ ᑎᐸᑯᓂᑫᐃᐧᐣ ᐃᐧᐣ ᐃᓇᑌ ᐁᑲᑫᐧᑭᐱᑎᓂᑲᑌᐠ ᒪᒪᓂᐃᐧᐣ ᑲᐃᓀᒋᑌᐠ ᒋᐅᒋ ᒪᒋᑐᑕᑯᐊᐧᐨ ᐊᐃᐧᔭᐠ, ᑲᐃᔑᐯᔑᑯᐨ ᐊᐃᐧᔭ ᓇᐣᑕ ᐱᑯ ᒥᓇ ᐊᐁᐧ ᐅᒪᒪᓂ ᐁᑲᐧ ᑕᐡ ᐅᓇᑭᐣᑕᒪᐊᐧᑲᓄ ᑫᑐᑕᐊᐧᑲᓄᐨ ᓇᐣᑕ ᒥᓇ ᐊᑲᐧᑕᒪᐊᐧᑲᓄ ᐁᐊᑭᐣᑕᒪᐊᐧᑲᓄᐨ ᐅᒪᒪᓂᐃᐧᐃᔑᒋᑫᐃᐧᓇᐣ.”
ᑲᑭᑲᒥᐠ ᐃᑭᑐ ᐃᐁᐧ ᑲᐃᓇᑌᐠ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐣ ᐃᔑᐱᒧᒋᑫᒪᑲᐣ ᒋᑎᐸᑯᓇᑲᓄᐨ ᐅᒪᒪᓂ ᐁᑲ ᓇᐣᑕ ᒋᐅᒋ ᐱᒋᑐᑕᐃᐧᑕᐧ ᐊᐃᐧᔭᐠ.
“ᐁᑲᐧ ᐃᐧᐣ ᑭᓇᐃᐧᐟ ᑲᐊᓂᔑᓂᓂᐃᐧᔭᐠ, ᑭᑎᔑᑲᓇᐊᐧᐸᑕᒥᐣ ᑭᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᓂᓇᐣ ᒋᑭᐁᐧᒪᒥᓄᓯᑐᔭᐠ ᑭᑲᐯᔑᐃᐧᓂᓇᐣ ᒥᓇ ᒋᑲᑫᐧᐃᐧᒋᐦᐊᑲᓄᐨ ᑲᑭᒪᒥᔑᒪᑲᓄᐨ ᒋᒪᒥᓇᐧᑐᐨ ᑲᑭᐃᔑᒪᒪᓂᑲᑕᐊᐧᐨ ᐊᐃᐧᔭᐣ ᓇᐣᑕ ᑎᐯᐣᒋᑫᐃᐧᓇᐣ,” ᑲᑭᑲᒥᐠ ᑭᐃᑭᑐ. “ᒥᑕᐡ ᐅᐁᐧ ᑲᑭᒋᐸᑲᓂᓭᐠ, ᑭᒋᐸᑲᓂᓭ ᐃᒪ ᐁᐅᐣᒋ ᐊᓂᒥᐦᐃᑯᐊᐧᐨ ᐊᓂᔑᓂᓂᐊᐧᐠ ᐁᑲ ᐁᑭᒥᓄᑐᑕᑯᐊᐧᐨ ᑲᐃᔑᑲᓇᐊᐧᐸᒥᑕᐧ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐠ ᐊᐱ ᑲᒪᒥᔑᐦᐅᐊᐧᐨ ᐁᑲ ᐃᐧᐣ ᐁᑭᑲᑌᓂᐠ ᐊᓂᔑᓂᓂ ᑲᐃᔑᑲᓇᐊᐧᐸᑕᐠ ᑎᐸᑯᓂᑫᐃᐧ ᐱᒧᒋᑫᐃᐧᓂ ᑫᑭᐅᐣᒋ ᐃᐧᒋᐦᐃᑯᐊᐧᐸᐣ ᐃᒪ ᐅᑕᔑᑫᐃᐧᓂᐊᐧᐠ ᑫᐅᐣᒋ ᒥᓄᑲᐸᐃᐧᒪᑲᓂᐠ ᒥᓇ ᒋᒥᓄᐡᑲᒪᑲᓂᐠ.”
ᑲᑭᑲᒥᐠ ᑭᐃᑭᑐ ᐊᓂᔑᓂᓂᐊᐧᐠ ᐃᑯ ᐃᐧᓇᐊᐧ ᐅᑕᑭᔭᓂ ᑲᑫᐧᑭᐁᐧ ᐊᐧᐁᐧᓇᑐᓇᐊᐧᐸᐣ ᑎᐸᑯᓂᑫᐃᐧ ᐱᒧᒋᑫᐃᐧᓂ ᑫᑭᐱᒥᐊᐸᒋᑐᐊᐧᐸᐣ.
“ᒥᑕᐡ ᐃᑯ ᑫᐃᔑᐱᒥ ᓇᓇᒋᑭᒪᐁᐧᔭᐠ ᒋᑲᓄᒋᑫᑕᒪᓱᔭᐠ, ᒋᐱᒥᐊᐧᐃᐧᒋᑐᔭᐠ ᐊᓂᐣ ᐊᐊᐧᔑᒣ ᑫᓂᔑᒥᓄᐡᑲᒪᑲᐠ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐣ ᐁᑲᐧ ᒥᓇ ᑫᓂᔑᒪᒋᓂᐡᑲᑐᔭᐠ ᑲᐃᔑᓇᑕᐁᐧᐣᑕᒪᐠ ᒋᑭᔑᓇᑲᐧᑭᐸᐣ ᑫᐃᔑᐃᐧᒋᐦᐃᑯᔭᐠ ᑎᐸᑯᓂᑫᐃᐧ ᐱᒧᒋᑫᐃᐧᐣ ᑲᐊᓂᔑᓂᓂᐃᐧᔭᐠ,” ᑭᐃᑭᑐ ᑲᑭᑲᒥᐠ.
ᑲᑭᑲᒥᐠ ᑭᑲᑫᐧᑌ ᑫᑯᓀᐣ ᐁᑲ ᐁᐅᐣᒋᐅᔑᒋᑲᑌᐠ ᑭᐸᐦᐅᑐᐃᐧᑲᒥᐠ ᑫᐃᔑᑲᓇᐁᐧᐣᑕᑯᓯᐊᐧᐨ ᐊᓂᔑᓂᓂᐊᐧᐠ ᐅᒪ ᐅᐣᑌᕑᐃᔪ, ᐁᑲᐧ ᐃᐧᐣ ᐁᐧᑎ ᐁᐟᒪᐣᑎᐣ ᐁᑕᑲᐧᐠ ᓴᑦ ᑕᓂᔪ ᓇᑕᐃᐧᐦᐃᐁᐧᐃᐧᑲᒥᐠ ᒥᓇ ᑯᑕᑭᔭᐣ ᐃᐧᒋᐦᐃᐁᐧᐃᐧᑲᒥᑯᐣ ᐊᔭᐊᐧᐣ ᓭᐢᑲᒋᐊᐧᐣ ᒥᓇ ᑯᐯᐠ.
“ᐁᑲᐧ ᐅᐁᐧ ᓴᑦ ᑕᓂᔪ ᓇᑕᐃᐧᐦᐃᐁᐧᐃᐧᑲᒥᐠ ᑭᐸᐦᐅᑐᐃᐧᑲᒥᑯᐊᐧᐣ ᔕᑯᐨ ᑕᐡ ᐃᔑᐱᒧᒋᑫᒪᑲᐣ ᐁᐅᐣᒋᐱᒥ ᐃᐧᒋᐦᐃᐣᑕᐧ ᐃᒪ ᑲᐱᐣᑎᑲᓂᑕᐧ, ᑲᐧᓂᐣ ᑎᐸᑯᓂᑫᐃᐧᓂᐠ ᐃᔑᑲᓇᐊᐧᐸᒥᓯᐊᐧᐠ, ᐊᓄᑭᒪᑲᐣ ᑲᔦ ᐅᐁᐧ ᑲᐃᔑᐱᒧᒋᑫᐊᐧᐨ,” ᐃᑭᑐ ᑲᑭᑲᒥᐠ. “ᒥᓇᑲᓄᐊᐧᐠ ᐊᐣᑎ ᑫᓄᒋᐃᐧᒋᐦᐃᑎᓱᐊᐧᐨ ᑲᐱ ᐱᐣᑎᑲᓂᑕᐧ ᐁᑲᐧ ᒥᓇ ᑲᐃᐧᐣ ᓂᑎᔑᓂᑲᓇᓯᒥᐣ ᑭᐸᐦᐊᐧᑲᓇᐠ ᓇᐣᑕ ᐅᒪᒪᓂᐠ, ᑲᐯᔑᐦᐊᑲᓇᐠ ᐅᑎᓇᐊᐧᐣ. ᐁᑲᐧ ᑕᐡ ᐃᒪ ᐃᓀᑫ ᐅᑕᒐᑯᐱᒪᑎᓯᐃᐧᓂᐊᐧᐠ, ᐅᑕᓂᔑᓂᓂᐊᐧᑎᓯᐃᐧᓂᐊᐧ ᒥᓇ ᐅᑕᓄᑭᐃᐧᓂᐊᐧᐠ ᐊᓄᒋᐱᒥᐊᓄᑲᓇᑲᓄᐊᐧᐠ.”
ᑭᒋᐅᑭᒪᑲᓀᐢ ᐊᓫᐱᐣ ᐱᐟᓫᐊᕑ ᑭᐃᑭᑐ ᐊᔕ ᐳᓂᓭ ᑲᑭᐱᒧᒋᐊᓂᒧᒋᑲᑌᐠ ᑎᐸᑯᓂᑫᐃᐧ ᐊᓂᒧᒋᑫᐃᐧᐣ.
“ᐊᔕ ᐅᒋᒋᓭ ᒋᒪᑕᓄᑲᑕᒪᐠ,” ᑭᐃᑭᑐ ᐱᐟᓫᐊᕑ. “ᒥᐢᑕᐦᐃ ᐅᑕᓀᐣᑕᓇᐊᐧ ᐊᓂᔑᓂᓂᐊᐧᐠ ᐁᐃᐧᐊᐧᐸᐣᑕᒧᐊᐧᐨ ᒋᐃᐧᔭᓂᐸᑲᓂᓭᓂᐠ ᑎᐸᑯᓂᑫᐃᐧ ᑲᓇᐊᐧᒋᑫᐃᐧᓂ ᒋᐅᓇᑕᒪᐃᐧᐣᑕᐧ ᓇᐣᑕ ᒥᓇ ᐊᓂᐣ ᑫᓂᔑᐱᒧᒋᑫᒪᑕᐃᐧᐣᑕᐧ, ᐁᐧᑎ ᐅᑎ ᒪᐊᐧᐨ ᑭᐁᐧᑎᓄᐠ ᑲᑲᐯᔑᐊᐧᐨ.”
ᐱᐟᓫᐊᕑ ᑭᐃᑭᑐ ᐅᓄᐁᐧᓂᐊᐧᐣ ᐃᓯᓭᐃᐧᓇᐣ ᑲᑭᐊᐧᐃᐧᐣᒋᑲᑌᑭᐣ ᒣᑲᐧᐨ ᑲᑭᒪᒪᐃᐧ ᒪᐊᐧᒋᐦᐃᑐᐊᐧᐨ ᐅᑭᒪᑲᓇᐠ ᓇᐱᐨ ᐃᑯ ᐸᐸᔐᐣᑕᑲᐧᓄᐣ ᒥᓇ ᑭᒋᓀᐣᑕᑲᐧᓄᐣ.”
“ᒋᓇᓇᑐᓇᒪᐠ ᐃᑕᐡ ᐊᐣᑎ ᑫᑭᔭᓄᒋᒪᒋᓂᐡᑲᑐᔭᑭᐸᐣ ᐅᓄᐁᐧᓂᐊᐧᐣ ᐁᑲ ᑲᓇᐦᐃᐡᑲᑯᔦᐠ ᑲᑭᐃᐧᐣᑕᒣᐠ,” ᐃᑭᑐ ᐱᐟᓫᐊᕑ.
ᐱᐟᓫᐊᕑ ᑲᔦ ᐅᑭᐊᓂᒧᑕᐣ ᐃᐁᐧᓂ ᑲᓇᑕ ᒪᐊᐧᐨ ᑲᐃᐡᐸᐠ ᐅᓇᔓᐁᐧᐃᐧᑲᒥᑯᐠ ᓄᑯᒥᑫ ᑲᑭᐅᐣᒋ ᐸᑭᑎᓂᑲᑌᑭᐸᐣ ᓇᑐᑕᒪᑫᐃᐧᐣ ᒥᓇᐊᐧ ᒋᑲᓇᐊᐧᐸᒋᑲᑌᐠ ᐁᑲ ᓇᐱᐨ ᑲᐃᐧᑕᑯᓂᑕᐧ ᐊᓂᔑᓂᓂᐊᐧᐠ ᐃᒪ ᑲᑎᐸᑯᓂᑲᓂᐊᐧᐠ ᑲᐱᓯᐣᑕᒧᐊᐧᐨ ᐅᓇᔓᐁᐧᐃᐧᑭᒪᔑᔕᐠ ᑲᐃᓇᑭᒥᑕᐧ ᑲᑭᑎᐸᑯᓂᑎᐸᐣ ᑯᑯᐱᓀᐢ, ᐁᑲᐧ ᑕᐡ ᐊᓂᔑᓇᐯ ᐊᐢᑭ ᑲᑭᐃᐧᐣᑕᑭᐸᐣ ᐁᑲ ᐁᓇᐦᐃᓇᑲᐧᓂᐠ ᐊᓂᔑᓂᓂ ᑲᐃᔑᑲᓇᐊᐧᐸᒪᑲᓄᐨ ᐅᐣᑌᕑᐃᔪ ᐅᓇᔓᐁᐧᐃᐧᑭᒪᔑᔑᐃᐧ ᑎᐸᒋᒧᐃᐧᓂᐠ.
ᐁᐦᐊ, ᑲᒪᐃᐧᓀᐡᑲᐊᐧᒥᐣ ᐅᐣᑌᕑᐃᔪ ᐅᑭᒪᐃᐧᐣ ᒋᔑᐃᐧᑐᔭᐠ ᑭᒋᐅᓇᔓᐁᐧᐃᐧᑲᒥᑯᐠ, ᐁᑲᐧ ᒥᓇ ᐃᓂᐁᐧᓂᐊᐧᐣ ᑲᑭᐊᐧᐃᐧᐣᑕᒣᐠ ᐃᓯᓭᐃᐧᓇᐣ ᒪᐊᐧᐨ ᐃᑯ ᐁᐸᐸᔐᐣᑕᑲᐧᑭᐣ ᒋᑭᐸᑭᑎᓇᒪᑭᐣ,” ᐃᑭᑐ ᐱᐟᓫᐊᕑ. “ᐃᓯᓭ ᑕᐡ ᓄᑯᑦ ᐃᑯ ᒋᒪᑕᓄᑲᑕᒪᐠ.”
ᓀᑲᐃᐧᓴᑲᐃᑲᐣ ᐅᑭᒪᑲᐣ ᐸᕑᐟ ᒥᑭᐢ ᐅᑭᐃᐧᐣᑕᐣ ᐁᐸᑯᓭᐣᑕᐠ ᒋᑭᐃᓇᑌᑭᐸᐣ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐣ ᑕᐱᑕ ᒋᔑᑲᓇᐊᐧᐸᒥᐣᑕᐧ ᐊᓂᔑᓂᓂᐊᐧᐠ.
“ᐊᔕ ᐃᓯᓭᓂᐸᐣ ᐅᐣᑌᕑᐃᔪ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᓂ ᑲᓂᑲᓂᓯᐊᐧᐨ ᒥᑐᓂ ᑲᐧᔭᐠ ᒋᑭᓇᓇᑲᒋᑐᐊᐧᐸᐣ ᐊᓂᐣ ᑲᐃᓯᓴᐦᐃᑯᔭᐠ ᐊᔕ ᑲᔦ ᑭᑕᓂᔑᓂᓂᒥᓇᓂᐠ ᑭᑭᐸᐦᐅᑐᐃᐧᑲᒥᑯᓇᐣ ᐁᑭᐡᐳᓀᐡᑲᒧᐊᐧᐨ,” ᑭᐃᑭᑐ ᒥᑭᐢ. “ᐊᐦᑭᐃᐧ ᐅᓇᑯᓂᑫᐃᐧᓇᐣ ᑲᐃᐧᐣ ᓇᐣᑕ ᑭᑎᔑᐃᐧᒋᐦᐃᑯᓯᒥᐣ. ᐊᔕ ᑕᐡ ᐃᓯᓭᐸᐣ ᐸᑲᐣ ᒋᓇᐱᔭᐠ ᑫᑭᒥᓄᓴᐦᐃᑯᐊᐧᐸᐣ ᑭᑕᓂᔑᓂᓂᒥᓇᓂᐠ.”
ᒥᑭᐢ ᐃᑭᑐ ᑲᐃᐧᐣ ᐃᐧᐣ ᒋᐃᐧᒋᑲᐸᐃᐧᑕᐠ ᑭᐸᐦᐅᑐᐃᐧᑲᒥᑯᐣ.
“ᓂᑭᑫᐣᑕᐣ ᐊᑎᐟ ᐊᐃᐧᔭᐠ ᐁᓯᓭᓂᐠ ᒋᑭᐸᐦᐅᐣᑕᐧ ᔕᑯᐨ ᑕᑲᐧᐣ ᐸᑲᐣ ᑫᑯᓇᐣ ᐊᔭᐊᐧᐣ ᐊᐱᐨ ᐃᐧᐣ ᒋᑭ ᑭᐸᐦᐅᐣᑕᐧᐸᐣ,” ᑭᐃᑭᑐ ᒥᑭᐢ.
ᐅᐁᐧ ᐊᓂᔑᓇᐯ ᐊᐢᑭ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐣ ᒪᐊᐧᒋᐦᐃᑐᐃᐧᐣ ᑲᑭᑐᒋᑲᑌᐠ ᑭᔭᓂᒧᒋᑲᑌᐊᐧᐣ ᐊᐧᓂᑐᑕᑫᐃᐧ ᒪᒥᓇᐧᒋᑫᐃᐧᐣ, ᑲᐅᓴᒥᓄᐊᐧᐨ ᐊᓂᔑᓂᓂᐊᐧᐠ ᑲᑭᐸᐦᐅᐣᑕᐧ, ᐊᓂᔑᓂᓂᑲᐠ ᒋᐅᒋ ᐊᓄᑲᑌᐠ ᒪᒥᓄᓂᑫᐃᐧᐣ ᑲᑭᐊᐧᓂᑐᑕᑫᐊᐧᐨ, ᐊᐊᐧᔑᔑᐃᐧ ᑲᓇᐁᐧᐣᒋᑫᐃᐧᐣ, ᑲᐊᐧᓂᐊᐸᒋᒋᑲᑌᐠ ᒪᐡᑭᑭᑫᐃᐧᐣ, ᑲᑭᐊᐧᓂᑐᑕᐃᐧᐣᑕᐧ ᐅᐃᐧᒋᐦᐃᑯᐃᐧᓂᐊᐧ, ᓴᑭᒋᑎᐸᐦᐅᑯᐃᐧᐣ ᑲᐃᔑᐱᒧᒋᑲᑌᐠ, ᑲᐃᓇᓄᑭᒪᑲᐠ ᐃᐡᑯᓄᐱᒧᒋᑫᐃᐧᓇᐣ, ᐃᐡᑯᓂᑲᓂᐠ ᐅᓇᑯᓂᑫᐃᐧᓇᐣ ᐁᑲᐧ ᒥᓇ ᑲᐃᐸᓂᐦᐃᐁᐧᒪᑲᐠ ᐅᓇᑯᓂᑫᐃᐧᐣ Bill C-10.