ᑲᓇᑕ ᑭᒋᐅᑭᒪᑲᐣ ᐅᑭ ᑭᑕᑭᒪᐣ ᒪᐣᑌᓫᐊᐊᐧᐣ ᐊᐱ ᑲᔭᓂ ᓇᐦᐃᓂᒪᑲᓄᓂᐨ

ᑲᓇᑕ ᑭᒋᐅᑭᒪᑲᐣ ᔕᐧᐣ ᐁᐃᐣᔓᐟ ᐊᐟᓫᐃᐅ ᐅᑕᓂᔑᓂᓂᐃᐧ ᑐᑕᒧᐃᐧᐣ ᑭᐃᔑᒋᑫ ᒥᓇ ᑭᒥᑭᐁᐧ ᒥᑭᓯᐃᐧᒥᑲᐧᓇᐣ ᒣᑲᐧᐨ ᓀᓫᓴᐣ ᒪᐣᑌᓫᐊ ᐅᒪᒥᑯᐣᑕᑯᐃᐧ ᒪᒪᐃᐧ ᐊᔭᒥᒋᑫᐃᐧᐣ ᑲᑭᑐᒋᑲᑌᐠ ᐁᐧᑎ ᓴᐅᐠ ᐊᑊᕑᐃᑲ ᒪᑲᑌᐃᐧᔭᓯᐃᐧᐊᐦᑭᐠ.
“ᑲᓂᒪᐧᔦ ᐊᐱᑕᑭᔑᑲᐠ ᓄᑯᑦ ᑲᑭᔑᑲᐠ ᐅᒪ ᒍᐦᐊᐣᐢᐳᕑᐠ, ᓂᑭᒋᓀᑕᐣ ᑲᐃᓯᓭᐠ ᒋᑭᐱᔕᔭᐣ ᑲᓇᐦᐃᓇᑲᓂᐃᐧᐨ ᒪᑎᐸ (ᓀᓫᓴᐣ ᒪᐣᑌᓫᐊ),” ᑭᐃᑭᑐ ᐊᐟᓫᐃᐅ ᒣᑲᐧᐨ ᒪᑯᔐᑭᔑᑲᓂᐱᓯᑦ 11 ᐅᑎᐸᒋᒧᐃᐧᐣ ᑲᑭᐃᔑᓂᔕᐦᐊᒪᐊᐧᐨ ᑫᑌ ᑲᓇᑕ ᑭᒋᐅᑭᒪᑲᓇᐣ ᐱᓫ ᐸᐧᐣᑌᐢ ᒣᑲᐧᐨ ᐅᑭᒪᑲᓇᐠ ᑲᑭᑕᔑᒪᐊᐧᒋᐦᐃᑐᐊᐧᐸᐣ. “ᓂᑭᐸᑭᑎᓇᐣ ᓂᑕᓂᔑᓂᓂᐃᐧ ᐊᔭᒥᐦᐊᐃᐧᐣ ᐁᑭᐅᒋ ᐊᔭᒥᒋᑫᑕᒪᐊᐧᑲᐧ ᑲᑭᓇ ᓂᑕᓂᔑᓂᓂᒪᐠ ᒥᓯᐁᐧ ᑌᑎᐸᐦᐃ ᑲᑲᐯᔑᐊᐧᐨ ᑲᓇᑕ ᐊᐦᑭᐠ. ᓂᑭᐊᐧᑲᓇᐱᐦᐃᑎᒥᐣ ᑲᓇᑕ ᐊᐦᑭᐠ ᐅᓂᑲᓂᐡᑲᒪᑫᐠ ᐁᑭᐊᔑᑕᐱᐊᐧᐨ ᒥᓇ ᓂᑭᒥᓇ ᓴᐅᐠ ᐊᑊᕑᐃᑲ ᒪᑲᑌᐃᐧᔭᓯᐃᐧᐊᐦᑭᐃᐧ ᑭᒋᐅᓇᔓᐁᐧᐃᑭᒪ ᒥᑭᓯᐃᐧᒥᑲᐧᓇᐣ, ᐁᑲᐧ ᒥᓇ ᑭᑌᑕᒧᐃᐧᓂᐠ ᐃᓀᑫ ᓂᑭᐃᓇᑫᑲᐸᐃᐧᑕᐊᐧ, ᐁᑭᐊᓂᑫᒥᓇᐠ ᒥᑐᓂ ᑲᐧᔭᐠ ᒋᑲᓇᐁᐧᓂᒪᐨ ᒋᑕᑯᐃᐧᓇᐨ ᐁᐧᑎ ᒪᑎᐸ ᐅᑕᑭᒥᐠ ᒋᐊᔑᒋᓂᐣᑲᐦᐊᑲᓄᐨ ᐃᓂᐁᐧᓂᐊᐧᐣ ᒥᑲᓇᐣ.”
ᐁᑲᐧ ᒥᓇ ᐊᐟᓫᐃᐅ ᑯᑕᑭᔭᐣ ᒥᑲᓇᐧᐣ ᐅᑭᒥᓇᐣ ᑭᒋᐅᓇᔓᐁᐧᐃᑭᒪᐣ ᐁᐅᐣᒋ ᑭᑭᓇᐊᐧᒋ ᐊᐧᐸᑕᐦᐊᐨ ᒥᓄᐃᐧᒋᐃᐧᑎᐃᐧᓂᐠ ᒥᓇ ᐁᐅᒋ ᒪᒥᑯᐦᐊᒪᐊᐧᐨ ᑫᐃᐧᓇᐊᐧ ᐊᓂᑫᓂᓂᐊᐧᐠ ᐁᐱᐃᐧᒋᑕᐧᐊᐧᐨ ᐅᒪ ᒪᒥᑯᐣᑲᑫᐃᐧ ᒪᐊᐧᒋᐦᐃᑐᐃᐧᓂᐠ.
“ᐊᐱ ᑲᐃᐡᑲᐧ ᑭᔑᒋᑲᓂᐊᐧᐠ ᓂᐣᑭᒪᒥᑯᐦᐊᒪᐊᐧᐠ ᐁᑭᑲᓄᓇᑲᐧ ᑲᑭᓇ ᑲᑭᓇᑐᒥᐧᑕ ᑲᑭᓂᑲᓀᑕᑯᓯᐊᐧᐨ, ᐊᔑᐨ ᑲᔦ ᑲᓇᑕ ᑭᒋᐅᑭᒪ ᐢᑎᐱᐣ ᐦᐊᕑᐳᕑ, ᒋᑭᐁᐧᐃᐧᑐᔭᐠ ᒪᑎᐸ ᑲᑭᐱᔑ ᐱᒪᓄᑲᑕᐠ ᒥᓄᐃᐧᒋᐃᐧᑎᐃᐧᓂ, ᐃᐁᐧ ᑕᐡ ᐁᔑᓇᑕᐁᐧᐣᑕᑲᐧᐠ ᒋᑭᒋᓀᓂᒥᑎᓇᓂᐊᐧᐠ ᑲᑭᓇ ᑲᐃᐧᒋᐸᐸᒥᓯᒥᑎᓇᓂᐊᐧᐠ, ᐊᔑᐨ ᑲᔦ ᒋᑭᒋᓀᒋᑲᑌᓂᐠ ᐊᓂᔑᓂᓂᐊᐧᐠ ᐅᒪᐡᑲᐃᐧᓯᐃᐧᓂᐊᐧ ᒥᓇ ᒋᓂᓯᑕᐃᐧᓇᐃᐧᑕᐧ ᑲᐅᐣᑕᑲᓀᓯᐊᐧᐨ,” ᑭᐃᑭᑐ ᐊᐟᓫᐃᐅ. “ᔕᑯᐨ ᐃᐧᐣ ᒪᑎᐸ ᑲᑭᐱᔑᐊᐧᐸᑕᐦᐃᐁᐧᐨ ᒣᑲᐧᐨ ᑲᑭᐱ ᐱᒪᑎᓯᐨ ᒥᓇ ᐃᒪ ᐅᑕᓄᑭᐃᐧᓂᐠ, ᒥᐦᐃᒪ ᑫᑭᐅᐣᒋ ᑲᐡᑭᒋᑲᑌᑭᐸᐣ ᒥᓄᑲᓇᐊᐧᐸᒥᑐᐃᐧᐣ ᒋᐅᒋ ᑫᐧᑭᓂᑫᒪᑲᐠ.”
ᒣᑲᐧᐨ ᐊᐱ ᑲᑭᐊᐣᑕᐃᐧ ᐊᔭᐨ ᒪᐣᑌᓫᐊ ᐅᒪᒥᑯᐣᑕᑯᐃᐧ ᒪᒪᐃᐧ ᐊᔭᒥᒋᑫᐃᐧᓂᐠ ᒪᑯᔐᑭᔑᑲᓂᐱᓯᑦ 9-10, ᐊᐟᓫᐃᐅ ᑲᔦ ᐅᑭᐱᒋᓂᔕᐦᐊᐣ ᑲᑭᒪᓯᓇᑌᓯᑐᐨ ᐅᑎᐸᒋᒧᐃᐧᐣ ᑲᑭᐃᔑᓂᔕᐦᐊᒪᐊᐧᐨ ᐅᑭᒪᑲᓇᐠ ᐅᒪᐊᐧᒋᐦᐃᑐᐃᐧᓂᐠ. ᑲᑭᐊᐧᐸᑕᓇᐊᐧ ᐅᐁᐧ ᒪᓯᓇᑌᓯᒋᑲᐣ ᒋᐃᓇᑲᐧᐦᐊᒪᐣ ᐱᐊᐧᐱᑯᐠ http://www.youtube.com/watch?v=V5ThyvYtkLs.
ᐅᐣᑌᕑᐃᔪ ᑭᒋᐅᑭᒪᑲᐣ ᐢᑕᐣ ᐯᕑᑎ ᑭᐃᑭᑐ ᐊᐧᐁᐧ ᒪᐣᑌᓫᐊ ᒪᐊᐧᐨ ᐃᑯ ᐅᑭ ᑭᒋᓀᓂᒥᑯᐣ ᒥᔑᐣ ᐊᓂᔑᓂᓂᐊᐧᐠ ᑌᑎᐸᑲᒥᐠ ᒥᓂᑯᐠ ᐃᐁᐧ ᑲᑭᐱᔑ ᑲᐡᑭᐦᐅᐨ ᑲᑭᐊᐸᐦᐊᐠ ᒪᑲᑌᐃᐧᔭᓯᐊᐦᑭᓂ ᐸᑲᓂᐦᐃᑯᐃᐧᓂᐠ.
“ᑲᑭᐊᐸᐦᐅᐣᑕᐧ ᒪᔭᑦ ᑎᐱᓇᐁᐧ ᐃᒪ ᒪᑲᑌᐃᐧᔭᓯᐃᐧᐊᐦᑭᐠ ᑲᐅᐣᒋᐊᐧᐨ ᐸᑲᓂᐦᐃᑯᐃᐧᓂᐠ ᒥᐦᐅᐁᐧᓂ ᑫᐃᐧᓇᐊᐧ ᑲᓇᑕ ᐊᓂᔑᓂᓂᐊᐧᐠ ᒪᐊᐧᐨ ᑲᑭᒋᒥᓴᐁᐧᐣᑕᒧᐊᐧᐨ ᒋᑭᑌᐱᓇᒧᐊᐧᐸᐣ,” ᑭᐃᑭᑐ ᐯᕑᑎ, ᐁᑭᐅᐣᒋ ᑲᓄᑫᒧᐁᐧᐨ ᑭᐡᐱᐣ ᐁᑲ ᒪᐣᑌᓫᐊ ᐅᐁᐧ ᑭᑐᑕᑭᐸᐣ, ᒥᔑᐣ ᒪᑲᑌᐃᐧᔭᓴᐠ ᑲᐃᐧᐣ ᐅᑕᑭᐅᐣᒋ ᑌᐱᓇᓇᐊᐧᓯᐸᐣ ᐸᔭᑕᑭᓭᐃᐧᓂ ᒥᓇ ᒥᓄᑲᓇᐊᐧᐸᒥᑐᐃᐧᓂ ᓄᑯᑦ ᑲᑭᔑᑲᓂᐠ.
ᐊᓇᐃᐧᐣ ᒪᐣᑌᓫᐊ ᐯᔑᑲᐧ ᐅᑭᐃᔑᓂᑲᓂᑯᐸᓂᐣ ᒥᔑᐣ ᒥᓯᐁᐧᑲᒥᐠ ᐅᓂᑲᓂᑕᒪᑫᐠ ᑐᑲᐣ ᒪᐊᐧᐨ ᐊᐃᐧᔭ ᑲᑲᑫᐧᑕᒋᐦᐃᐁᐧᐨ, ᐯᕑᑎ ᐃᑭᑐ ᓄᑯᑦ ᑕᐡ ᐃᔑᑭᑭᓇᐊᐧᑕᐸᑕᐦᐃᐁᐧ ᑲᐸᑯᓭᐣᒋᑲᑌᐠ ᑫᑯᐣ ᑲᑭᐱᓂᐁᐧᒪᑲᐠ ᒋᑭᑲᐡᑭᒋᑲᑌᐠ ᒋᐸᑭᓇᒋᑲᑌᐠ.
“ᑭᓇᐃᐧᐟ ᑕᐡ ᑲᐊᓂᔑᓂᓂᐃᐧᔭᐠ, ᑭᓂᓯᑕᐁᐧᐣᑕᒥᐣ ᑲᑭᐱᔑᓇᓇᑭᐡᑲᐠ ᓀᓫᓴᐣ ᒪᐣᑌᓫᐊ ᑫᑭᓇᐃᐧᐟ ᑲᐱᒥ ᑲᑲᐧᑕᑭᑐᔭᐠ ᐁᑲ ᑲᑎᐱᑲᓇᐊᐧᐸᒥᑯᔭᐠ ᐅᒪ ᑲᓇᑕ ᐊᐦᑭᐠ,” ᐃᑭᑐ ᐯᕑᑎ. “ᐃᐧᐣ ᐅᑭᓇᑯᑐᐣ ᑲᑭᐱᔑ ᐊᐧᐸᐣᑕᐠ, ᑲᑭᐱᔑ ᐸᑭᑎᓂᑎᓱᐨ ᒥᓇ ᓴᑲᒪᐨ ᐃᓀᑫ ᑲᑭᐃᔑᐱᒪᓄᑲᑕᐠ ᒋᑭᔕᑯᑎᓂᑲᑌᐠ ᑭᐸᐧᒧᑲᓂᐁᐧᐃᐧᐣ. ᑭᐡᐱᐣ ᑕᐡ ᑲᓇᑕ ᐅᓂᑲᓂᑕᒪᑫᐠ ᑲᑫᐧᓇᐱᓇᐊᐧᐊᐧᐸᐣ ᑲᑭᐱᑐᑕᐠ ᒪᐣᑌᓫᐊ ᑲᑭᒪᐃᐧᓀᐦᐊᐠ ᒪᒉᐣᒋᑫᐃᐧᓂ, ᓇᐊᐧᐨ ᑭᑕᑭᐅᐣᒋ ᒥᓄᓭᒥᓇᐸᐣ ᑲᓇᑕ ᐊᐦᑭᐠ ᑲᑕᔑᐱᒪᑎᓯᔭᐠ.”
ᐯᕑᑎ ᐃᑭᑐ ᒪᐣᑌᓫᐊ ᐸᑯᓭᓂᒧᐃᐧᓂᐠ, ᓱᑭᑌᐦᐁᐃᐧᓂᐠ ᒥᓇ ᐃᐧᒋᑲᐸᐃᐧᑕᑐᐃᐧᓂᐠ ᐅᑭᐃᔑᓂᐸᐃᐧᑕᓇᐣ ᒥᓇ ᑭᐱᐊᓂᑫᐅᐣᒋ ᐁᐧᑎ ᑲᔭᐡ ᑲᑭᐱᓇᓂᑲᓂᑕᒪᑫᐊᐧᐨ.
“ᐁᑲᐧ ᐃᐁᐧ ᑲᑭᐃᔑᐱᒧᑐᐨ ᐅᐱᒪᑎᓯᐃᐧᐣ, ᑭᓂᓯᑕᐃᐧᓇᑲᐧᓂ ᐊᓂᐣ ᑲᑭᐱᔑ ᐱᒥᑭᑭᓄᐦᐊᒪᐊᐧᑲᓄᐨ ᒥᓇ ᐱᒥᑭᑭᓄᐡᑲᑯᐨ ᐅᑭᒋᐦᐊᒪᐣ ᐁᐧᑎ ᑲᑭᐱᐅᐣᒋᐨ ᐅᑕᑭᒥᐠ,” ᐃᑭᑐ ᐯᕑᑎ. “ᑲᔦ ᑕᐡ ᓂᑐᒋ ᐊᔭᒥᒋᑫᑕᒪᐊᐧᒥᐣ ᒥᓇ ᓂᒥᒋᐁᐧᓯᑕᒪᐊᐧᒥᐣ ᑲᑭᓇᑲᓂᑕᐧ ᐊᐧᑯᒪᑲᓇᐠ, ᐃᑭᐁᐧᓂᐊᐧᐠ ᑕᓯᐣ ᐊᐃᐧᔭᐠ ᑲᑭᐱᒥ ᐊᓱᐡᑲᒪᐊᐧᐊᐧᐨ ᒥᓇ ᑭᑭᓄᐡᑲᒪᐊᐧᐊᐧᐨ 95 ᑕᓱᔭᑭ ᑲᑭᐱᒪᑎᓯᐨ.”
ᐁᑲᐧ ᑫᐃᐧᓇᐊᐧ ᐅᒪᐡᑭᑯ ᐅᑭᒪᑲᓇᐠ ᐅᑭᐃᔑᓂᔕᐦᐊᓇᐊᐧ ᐅᐊᐧᒋᔦᒥᐁᐧᐃᐧᓂᐊᐧ ᐁᐧᑎ ᒪᑲᑌᐃᐧᔭᓯᐊᐦᑭᐠ, ᐁᑭᐃᐧᐣᑕᒧᐊᐧᐨ ᐁᑭᐅᐣᒋ
ᐃᐧᒋᑲᐸᐃᐧᑕᒪᐊᐧᐊᐧᐨ ᒪᑲᑌᐃᐧᔭᓴᐣ ᒣᑲᐧᐨ ᑲᑭᒪᑌᐊᓂᓭᐦᐃᑯᐊᐧᐸᐣ ᐅᒪᒐᑭᒥᑯᐃᐧᓂᐊᐧ ᐅᒪ ᑲᓇᑕ ᒥᓇ ᑌᑎᐸᑲᒥᐠ ᐊᔑᐨ ᒪᒪᐃᐧᑲᓇᐊᐧᐸᒋᑫᐃᐧᓂᐠ.
“ᒥᐦᐅᒪ ᑲᑭᐅᐣᑎᓇᒪᐠ ᒪᐡᑲᐃᐧᓯᐃᐧᐣ ᒥᓇ ᓂᑭᐅᐣᒋ ᒋᑭᐡᑲᑯᒥᐣ ᒪᐣᑌᓫᐊ ᒥᓇ ᐅᐃᐧᑕᓄᑭᒪᑲᓇᐣ ᐁᑲ ᑲᑭᐅᐣᒋ ᔕᑫᐧᓂᒧᐊᐧᐨ, ᐅᑕᐃᑲᒣᓂᒧᐃᐧᓂᐊᐧ, ᐅᑕᐸᓭᓂᒧᐃᐧᓂᐊᐧ, ᐅᔕᔑᐯᐣᑕᒧᐃᐧᓂᐊᐧ, ᒥᓇ ᑲᑭᐃᔑ ᑭᒋᐸᑭᑎᓂᑎᓱᑲᑕᒧᐊᐧᐨ ᒋᑭᐊᓂᑕᑲᐧᓂᐠ ᒥᓄᑲᓇᐊᐧᐸᒥᑐᐃᐧᓂ,” ᑭᐃᑭᑐ ᑭᒋᐅᑭᒪᑲᐣ ᒪᑎᔪ ᑯᐣᑲᑦ. “ᑭᔭᐱᐨ ᑕᑲᐧᐣ ᐁᓇᐃᐧᓇᑲᐧᓂᐠ ᑲᑲᑫᐧᑌᐱᓇᒧᐊᐧᐨ ᒋᑕᑲᐧᐠ ᑎᐱᓇᐁᐧ ᐅᓀᓂᒧᐃᐧᐣ ᐁᐧᑎ ᒪᑲᑌᐃᐧᔭᓯᐊᐦᑭᐠ ᒥᓇ ᐱᑯ ᐁᐧᑎ ᐊᐢᑕᕑᐃᓫᐃᔭ, ᑭᒋᒧᑯᒪᐣᐊᐦᑭᐠ, ᑲᓇᑕ ᒥᓇ ᓂᔪ ᓯᓫᐊᐣᐟ ᐁᑲᐧ ᒥᓇ ᑯᑕᑭᔭᐣ ᐸᐸᑲᐣ.”