ᐸᐧᐟ ᐃᐧᓫᐃᔭᑦ ᐅᐱᒥ ᓇᑲᐡᑲᓇᐊᐧ ᑲᐃᐧᐅᔑᒋᑲᑌᐠ ᓄᑎᐣ ᐃᐡᑯᑌᑫᐃᐧᐣ

ᐸᐧᐟ ᐃᐧᓫᐃᔭᑦ ᐃᐡᑯᓂᑲᓂᐠ ᓄᑯᒥᑫ ᑭᔕᑯᒋᒋᑫᐸᓂᐠ ᐊᐱ ᐅᐣᑌᕑᐃᔪ ᑎᐸᑯᓂᑫᐃᐧᓂᐠ ᑲᑭᐅᐣᒋ ᐅᓀᑕᑲᐧᑭᐸᐣ ᐁᑲ ᐃᒪ ᒋᑭᐅᐣᒋᐅᓀᑕᑲᐧᐠ ᒋᓇᑲᓇᐡᑲᐊᐧᑲᓄᐨ ᐦᐊᕑᐊᔾᓯᐣ ᐃᐧᐣᐟ ᑲᑭᑲᑫᐧᑌᐸᐣ ᒋᐅᓇᑭᑐᒋᐣ ᓄᑎᓄᐠ ᐃᐡᑯᑌᑫᐃᐧᐣ ᐯᔓᐨ ᐃᐡᑯᓂᑲᓂᐠ.
ᐅᑕᓇᐠ ᐱᓯᑦ, ᐦᐊᕑᐊᔾᓯᐣ ᐃᐧᐣ ᑭᐃᔑᒧᐡᑭᓀᐱᐦᐃᑫᐸᐣ ᒋᑭᐁᐧ ᐧᐊᐸᒋᑲᑌᓂᐠ ᐁᐧᑎ ᐅᐣᑌᕑᐃᔪ ᑎᐸᑯᓂᑫᐃᐧᑲᒥᑯᐠ ᐁᐸᑯᓭᐣᑕᐠ ᔐᒪᐠ ᒋᐸᑭᑎᓇᑲᓄᐨ ᒋᒪᒋᑐᐨ ᐅᑎᐡᑯᑌᑫᐊᐧᓄᑭᐃᐧᐣ. ᐁᑲᐧ ᑕᐡ ᒋᐅᓇᑭᑐᒋᐣ 16 ᑭᓂᑲᐧᓇᓯᒋᑲᓇᐣ ᐃᒪ ᐸᐧᐟ ᐃᐧᓫᐃᔭᑦ ᐃᐡᑯᓂᑲᓂ ᐊᐦᑭᐠ ᔕᐊᐧᓄᐠ ᓀᑲᐱᐦᐊᓄᐠ ᐃᓀᑫ ᐊᐧᒋᐠ.
“ᓂᑭᐃᔑ ᑲᓇᐊᐧᐸᑕᒥᓇᐸᐣ ᐁᐃᐧᓇᑲᐡᑲᐊᐧᑭᑕᐧ ᐊᐦᑭᐃᐧᑭᒪᐠ ᑲᓇᓇᑲᒋᑐᐊᐧᐨ ᐊᐦᑭᓂ ᐁᑲᐧ ᒥᓇ ᐅᑭᒪᐃᐧᐣ ᐁᑲ ᐃᐧᓇᐊᐧ ᒋᔕᐳᓇᒧᐊᐧᐨ ᑲᓂᔑᐅᐡᑭᒪᑕᓄᑲᑌᐠ ᐊᓄᑭᐃᐧᐣ,” ᑭᐃᑭᑐ ᐸᐧᐟ ᐃᐧᓫᐃᔭᑦ ᐅᑭᒪᑲᐣ ᐧᒐᕑᒐᐣ ᒪᐧᕑᓱ. “ᓂᑭᑌᐱᓇᒥᐣ ᑕᐡ ᐅᐁᐧ ᑲᑭᐃᔑ ᓇᑕᐁᐧᐣᑕᒪᑭᐸᐣ, ᐁᑭᐃᑭᑐᐸᐣ ᑎᐸᑯᓂᑫᐃᐧᑭᒪ ᐁᑲ ᒋᑭᐅᓀᒋᑲᑌᐠ ᓇᐣᑕ ᒥᓇ ᒋᑭᔕᐳᓂᑲᑌᓂᐠ ᒋᒥᓂᑕᐧ ᐃᐡᑯᑌᑫᐃᐧᑭᒪᐠ ᒋᑭᔭᓂ ᒪᒋᑐᐊᐧᐨ ᑲᐃᐧᔑᑲᑫᐧ ᒪᒋᒋᑫᐊᐧᐨ.”
ᐱᐠ ᑕᐣᑐᕑ ᐃᐧᐣᐟᐸᕑᐠ ᐱᒧᒋᑫᐃᐧᐣ, ᐦᐊᕑᐊᔾᓯᐣ ᐃᐧᐣᐟ ᐱᒧᒋᑫᐃᐧᐣ ᐁᑲᐧ ᒥᓇ ᐱᐠ ᑕᐣᑐᕑ ᐃᐧᐣᐟᐸᐧᕑᐠ ᐅᑕᓄᑭᐠ ᐅᒧᐡᑭᓀᐱᐦᐃᑫᐠ, ᑭᐃᔑᑲᑫᐧᑌᐊᐧᐠ ᐅᓇᑯᓂᑫᐃᐧᑲᒥᑯᐠ ᒋᒥᓂᑕᐧ ᐅᓇᔓᐁᐧᐃᐧᓂᐠ ᑲᐣᒋᓂᔕᐦᐅᐁᐧᐃᐧ ᒪᓯᓇᐦᐃᑲᓂ ᐊᐁᐧ ᑭᒋᐊᐦᑭᐃᐧᑭᒪ ᑲᓂᑲᓂᐡᑲᑭᐣ ᓇᓇᑕᐃᐧᑭᑫᒋᑫᐃᐧᓇᐣ ᒥᓇ ᔕᐳᓂᑫᐃᐧᓇᐣ ᒋᑭᔕᐳᓇᐠ ᐊᓄᑭᐃᐧᓂ ᑲᐃᔑ ᑭᑭᓇᐊᐧᒋᐱᐦᐃᑲᑌᐠ ᐊᐦᑭᐃᐧ ᑲᓇᐁᐧᒋᑫᐃᐧ ᐅᓇᑯᓂᑫᐃᐧᓂᐠ, R.S.O. 1990, c.E.19 ᒋᑭᒪᑕᓄᑭᐸᐣ ᐱᐠ ᑕᐣᑐᕑ ᐱᒧᒋᑫᐃᐧᐣ ᑲᐃᐧᒪᒋᑐᐨ ᐃᐡᑯᑌᑫᐃᐧᓂᐠ ᐃᒪ ᑕᐣᑐᕑ ᐯ.
ᐁᑲᐧ ᐅᐁᐧ ᐅᓇᔓᐁᐧᐃᐧ ᑲᐣᒋᓂᔕᐦᐅᐁᐧᐃᐧ ᒪᓯᓇᐦᐃᑲᐣ ᐊᐸᑕᐣ ᑲᑫᐧᓇᐃᐧᐃᓯᓭᐠ. ᑲᐃᐧᐣ ᑲᐧᐣᑕ ᐊᐸᒋᒋᑲᑌᓯᐣ ᑭᐡᐱᐣ ᐁᑕ ᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᐣ ᐃᔑᑲᐸᐃᐧᒪᑲᐠ ᒥᓇ ᒋᑲᓄᒋᑫᑕᒪᐊᐧᑲᓄᐨ ᑲᑭᓇᑐᑕᒪᑫᐨ.
ᒣᑲᐧᐨ ᒪᑯᐱᓯᑦ 16 ᑲᑭᐃᔑ ᑭᔑᐅᓇᒋᑫᐊᐧᐸᐣ ᐅᑎᐸᑯᓂᑫᐠ ᑲᑎᕑᐃᐣ ᓯᐃᐧᐣᑎᐣ, ᐁᑐᐊᐧᐟ ᑌᐣ ᐁᑲᐧ ᒥᓇ ᑕᒪᐢ ᓫᑐᕑᐊᕑ ᐁᑭᐃᑭᑐᐊᐧᐨ ᐅᑯᐁᐧᓂᐊᐧᐠ ᑲᑭᑲᑫᐧᑌᐊᐧᐨ ᑲᐃᐧᐣ ᒋᑭᐅᐣᒋᓇᑯᑐᐊᐧᐨ ᑭᐡᐱᐣ ᑌᐯᐧ ᑲᑭᐊᓀᐧᑕᑯᐊᐧᑫᐧᐣ ᑲᑭᑲᑫᐧᒋᒪᐊᐧᐸᐣ, ᐁᑲᐧ ᑕᐡ ᑲᐃᐧᐣ ᒋᑭᐅᐣᒋ ᐃᓯᓭᓂᐠ ᒋᒥᓂᑕᐧ ᒪᓯᓇᐦᐃᑲᓂ.
ᑲᑭ ᑭᔑᐅᓇᒋᑫᐊᐧᐨ ᑭᐊᒋᑲᑌ ᐃᒪ ᒪᒪᑕᐊᐧᐱᑯᐠ ᒋᐊᐧᐸᒋᑲᑌᐠ ᐅᒪ ᐃᓇᑲᐧᐦᐊᐣ: http://canlii.ca/t/g6xvd.
ᐁᑲᐧ ᒥᓇ ᐅᑎᐸᑯᓂᑫᐠ ᐅᑭᐃᔑ ᐅᓀᑕᓇᐊᐧ ᐁᑲ ᐃᒪ ᐁᐅᐣᒋᑎᐯᐣᒋᑫᒪᑲᓂᐠ ᐅᑎᐸᑯᓂᑫᐃᐧ ᑲᓇᐊᐧᐸᒋᑫᐃᐧᓂᐊᐧ ᒋᑭᐅᓀᑕᒧᐊᐧᐸᐣ ᑲᑭᐱᔑᑲᑫᐧᑌᐊᐧᐨ ᐅᑯᐁᐧᓂᐊᐧᐠ ᐅᐱᒧᒋᑫᐠ. ᐁᑲᐧ ᒥᓇ ᑲᑭᑲᑫᐧᑌᐊᐧᐨ ᐃᑭᑐᐊᐧᐠ ᐁᑭᐊᐸᒋᑐᐊᐧᐨ ᑲᒪᓯᓇᐦᐃᑲᑌᑭᐣ ᑲᑫᐧ ᔕᑯᓯᒥᐁᐧᐃᐧᓇᐣ ᒪᔭᑦ ᐁᔭᓇᑭᐱᒥᓂᔕᐦᐊᒧᐊᐧᐨ ᑲᐃᔑᓇᑕᐁᐧᑕᑲᐧᓂᐠ ᐁᑭᑐᑕᒧᐊᐧᐨ ᑲᐃᔑᐱᐦᐃᑲᑌᐠ ᐸᑫᐱᐦᐃᑲᓂᐠ 17 ᐃᐡᑯᑌᑫᐃᐧ ᐊᓄᑭᐃᐧ ᐅᓇᑯᓂᑫᐃᐧᓇᐣ ᑲᐃᔑᒪᓯᓇᐦᐃᑲᑌᑭᐣ, O.Reg. 359/09.
“ᐁᑲᐧ ᐅᐁᐧ ᑲᐊᓂᒧᒋᑲᑌᐠ ᑎᐸᑯᓂᑫᐃᐧᓂᐠ ᒋᐅᒋ ᑭᔑᐅᓀᒋᑲᑌᐠ, ᐁᐧᓴ ᐃᐧᐸᐨ ᑲᑭᐅᓀᑕᒧᐊᐧᐨ ᑭᐡᐱᐣ ᑲᑎᐱᑐᒋᑲᑌᑫᐧᐣ ᐅᐁᐧ ᐅᓇᔓᐁᐧᐃᐧ ᐊᓄᑭᐃᐧᐣ,” ᑭᐃᑭᑐᒪᑲᐣ ᐅᓀᑕᒧᐃᐧᐣ. “ᒥᑕᐡ ᐅᒪ ᑲᑭᐅᐣᒋᓭᐠ ᐅᓀᑕᒧᐃᐧᐣ, ᓇᑐᑕᒪᑫᐃᐧᐣ ᒥᓇᐊᐧ ᒋᑭᐁᐧ ᓇᓇᑲᒋᒋᑲᑌᓂᐠ ᑭᐁᐧᐸᑯᓂᑲᑌ.”
ᐊᓇᐃᐧᐣ ᐸᐧᐟ ᐃᐧᓫᐃᔭᑦ ᐅᑕᔭᒥᑕᒪᑫᐠ ᑭᑲᑫᐧᑌᐧᐸᐣ $100,000 ᒋᐊᐣᑭᑕᒪᐊᐧᑲᓄᐨ ᑲᑭᒧᐡᑭᓀᐱᐦᐃᑫᐨ ᒥᓇ ᐅᑭᒪᐃᐧᐣ, ᐅᑎᐸᑯᓂᑫᐠ ᑭᐃᑭᑐᐊᐧᐠ ᒋᒥᓇᑲᓄᐨ ᐸᐧᐟ ᐃᐧᓫᐃᔭᑦ $7,500 ᒋᑎᐸᐦᐃᑫᐦᐃᑕᐧ ᑲᑭᒧᐡᑭᓀᐱᐦᐃᑫᐊᐧᐨ. ᐅᑭᒪᐃᐧᐣ ᑲᐃᐧᐣ ᐃᐧᐣ ᒋᐅᒋᓇᑐᑕᒪᑫᐨ ᑎᐸᐦᐃᑫᐃᐧᐣ ᐁᑲᐧ ᑕᐡ ᑲᐃᐧᐣ ᒋᑭᐅᒋᒥᓂᐨ.
“ᑭᐅᓇᒋᑲᑌ ᒥᓇᐊᐧ ᒋᐊᓂᒧᒋᑲᑌᑭᐣ ᑫᑯᓇᐣ ᐸᑫᐧᔑᑲᓂᑭᔑᑲᐠ (ᓴᑭᐸᑲᐃᐧᐱᓯᑦ 6),” ᐃᑭᑐ ᒪᐧᕑᓱ. “ᒥᑕᐡ ᐅᒪ ᐁᑲᐧ ᑫᓇᓇᑫᐧᐁᐧᔑᑐᔭᑭᐣ ᑫᑯᓇᐣ ᑲᑕᓀᑕᒥᐦᐃᑯᔭᑭᐣ ᓂᑕᑭᒥᓇᐣ ᐅᒋ ᒥᓇ ᐊᑎᐟ ᐱᑲᐧᑕᑭᐠ ᑲᐊᐃᔑᓇᑲᐧᐠ ᐅᒪ ᐊᐧᑲᐦᐃ, ᐊᔑᐨ ᒥᓇ ᑲᑕᔑ ᓇᓇᑕᐁᐧᒋᑲᓂᐊᐧᐠ ᒥᓇ ᑲᑕᔑᐸᑭᑕᐊᐧᓄᐊᐧᐠ ᒥᓇ ᑯᑕᑭᔭᐣ ᑫᑯᓇᐣ ᓂᑕᓂᔑᓂᓂᐃᐧ ᐱᒪᑎᓯᐃᐧᓇᐣ ᑲᑕᓀᑕᒥᐦᐃᑯᔭᐠ ᐊᔕ ᐁᐧᑎ ᑲᑭᐱᐃᐧᐣᑕᒪᑭᐸᐣ.”
ᒪᐧᕑᓱ ᑲᔦ ᐃᑭᑐ ᐊᓂᔑᓂᓂᐊᐧᐠ ᐃᐡᑯᓂᑲᓂᐠ ᑲᑲᐯᔑᐊᐧᐨ ᐅᑭᐱᑐᑕᓇᐊᐧ ᐁᐅᓯᑲᐧᐊᐧᐊᐧᐨ ᔑᑯᐱᐣ ᐃᒪ ᒪᔭᑦ ᑲᐃᐧᐃᔑ ᐸᑕᑭᒋᑲᑌᑭᐣ ᑭᓂᑲᐧᓇᓯᒋᑲᓇᐣ.
“ᓄᑯᑦ ᑲᔭᑭᐊᐧᓂᐠ ᒥᐢᑕᐦᐃ ᐅᑭᐅᐣᑎᓇᓇᐊᐧ ᑲᑭᐅᓯᑲᐧᐦᐃᑫᐊᐧᐨ,” ᒪᐧᕑᓱ ᐃᑭᑐ. “ᐁᑲᐧ ᒥᓇ ᓂᑭᑫᐣᑕᐣ ᐁᑭᐱᔭᓂᒧᒋᑲᑌᐠ ᒋᓇᑭᓂᑲᑌᐠ ᒥᓇ ᒋᐱᒥᑐᒋᑲᑌᐠ ᑲᐅᓯᑲᐅᑕᐧ ᔑᑯᐱᐠ, ᐊᔕ ᐁᐧᐡᑲᐨ ᑲᐱᐅᐣᒋ ᐊᔭᓂᑫ ᐱᒪᑎᓯᐊᐧᐨ ᐅᑐᒋᑐᑕᓇᐊᐧ. ᓄᑯᑦ ᒥᓇ ᓂᑕᓂᑯᐱᑕᑲᓇᐠ ᑫᐃᐧᓇᐊᐧ ᐅᑭᐱᐊᐸᒋᐦᐊᐊᐧᐣ ᔑᑯᐱᐣ ᐁᑭᐅᓯᑲᐦᐃᑫᐊᐧᐨ, ᐁᑲᐧ ᑕᐡ ᐁᐧᐡᑲᐨ ᓂᑐᒋᐊᔭᒥᐣ ᐃᐁᐧ ᐊᐦᑭ. ᑌᐯᐧ ᐱᑯ ᓂᑭᐱᐊᐸᒋᑐᒥᐣ ᒥᔑᓄᐊᐦᑭ.”
ᒪᐧᕑᓱ ᐃᑭᑐ ᐃᒪ ᐅᑕᔑᑫᐃᐧᓂᐠ ᑲᑲᐯᔑᐊᐧᐨ ᑭᓇᑲᑕᑯᓯᐊᐧᐠ ᑲᐃᐧᐱᐊᓄᑭᐊᐧᐨ ᐃᐡᑯᑌᑫᐃᐧᐊᓄᑭᐠ ᑲᑭᐃᔑ ᐅᓇᐸᑕᒧᐊᐧᐸᐣ ᓂᑕᑦ ᐁᑲᐧ ᐊᐱᐣ ᐁᐧᑎ ᓇᐊᐧᐨ ᓀᑲᐱᐦᐊᓄᐠ ᐃᓀᑫ ᑲᐃᐧᔑᑲᑫᐧ ᒪᒋᒋᑫᐊᐧᐨ.
“ᐊᐱ ᐸᑲᐣ ᑲᐃᐧᐃᔑᒪᒋᒋᑫᐊᐧᐸᐣ ᐯᔓᐨ ᓴᑲᐃᑲᓂᐠ, ᐊᒥ ᑲᑭᐃᑭᑐᐊᐧᐨ ᐊᓂᔑᓂᓂᐊᐧᐠ ᐁᑲ ᐁᓇᑕᐁᐧᑕᒧᐊᐧᐨ ᒋᐊᓄᑭᐊᐧᐨ ᐃᑭᐁᐧᓂᐊᐧᐠ ᐃᐡᑯᑌᑫᐠ.” ᒪᐧᕑᓱ ᐃᑭᑐ. “ᒥᓯᐁᐧ ᐃᒪ ᐃᐡᑯᓂᑲᓂᐠ ᑲᐃᐧᐣ ᐅᑎᓀᑕᓯᓇᐊᐧ ᐃᒪ ᐃᐡᑯᑌᑫᐊᐧᓄᑭᐠ ᑲᐃᐧᐃᔑ ᐸᑕᑭᑐᐊᐧᐨ ᑭᓂᑲᐧᓇᓯᒋᑲᓇᐣ.
ᑲᐃᐧᓂᐣ ᓂᑎᑭᑐᓯᒥᐣ ᐁᓇᑲᐡᑲᒪᐠ ᓄᑎᓄᐠ ᑲᐅᒋᐅᔑᒋᑲᑌᐠ ᐃᐡᑯᑌ, ᐃᐁᐧ ᐱᑯ ᐁᑲ ᑲᓇᐦᐁᐣᑕᒪᐠ ᑲᐃᐧᐃᔑ ᐸᐸᑕᑭᑐᐊᐧᐨ ᑭᓂᑲᐧᓇᓯᒋᑲᓇᐣ ᐁᑲ ᒋᐅᒋ ᒥᓄᑐᑕᑯᐊᐧᐸᐣ ᐊᓂᔑᓂᓂᐊᐧᐠ ᒥᓇ ᐃᒪ ᐊᐧᑲᐦᐃ.”
ᒪᐧᕑᓱ ᒥᓇᐊᐧ ᑭᔭᓂᑭᑐ ᑲᐃᐧᐣ ᓂᑲᐣ ᒋᑭᐱᐅᐣᒋ ᑲᑫᐧᒋᒪᑲᓄᐊᐧᐨ ᐃᒪ ᐅᑎᐡᑯᓂᑲᓂᐧᐊᐠ ᐅᐁᐧᓂ ᑲᐃᐧᐃᔑ ᑲᑫᐧᒪᑕᓄᑭᐊᐧᐨ ᐅᑕᓄᑭᐠ.
“ᑲᐃᐧᓂᐣ ᐃᓯᓭᓯᓄᐣ ᒋᔭᓂᔑᐱᐣᑎᑫᔭᐣ ᑕᔑᑫᐃᐧᓂᐠ ᐁᑲᐧ ᒋᐊᐣᑕᐃᐧ ᐃᑭᑐᔭᐣ ᒥᔕᐦᐅᐁᐧ ᑫᐱᑐᑕᒪᐣᐠ,” ᐃᑭᑐ ᒪᐧᕑᓱ. “ᑲᐃᐧᓂᐣ ᐅᐁᐧ ᓂᑲᐣ ᑲᑫᐧᒋᒥᐁᐧᐃᐧᐣ ᑲᐃᒋᑲᑌᐠ; ᐃᐧᓇᐊᐧ ᐱᑯ ᑲᐃᓀᑕᒧᐊᐧᐨ ᐅᐱᑲᑫᐧᑐᑕᓇᐊᐧ ᐁᑲᐧ ᐁᐱᐃᓂᑯᔭᐣᐠ ᒥᔕᐦᐅᐁᐧ ᑫᐱᑐᑕᑯᔦᐠ ᓇᐣᑕ ᑫᐱᑐᒋᑫᑕᒪᑯᔦᐠ, ᑲᐃᐧᓂᐣ ᒋᐱᐊᔑᑎᓂᑯᔭᐠ.”
ᐦᐊᕑᐊᔾᓯᐣ ᐃᐧᐣᐟ ᐱᒧᒋᑫᐃᐧᐣ ᑲᐅᑭᒪᐃᐧᐨ ᑭᐃᑭᑐ ᐃᐁᐧᓂ ᑲᑭᐅᐣᒋᑐᑕᒧᐊᐧᐨ ᑎᐸᑯᓂᑫᐃᐧᓂᐠ ᑲᑭᐅᐣᒋ ᐃᔑᐃᐧᑐᐊᐧᐨ ᐁᐃᐧᐅᐣᒋ ᑲᑫᐧᑌᐱᓇᒧᐊᐧᐨ ᒋᒥᓂᑕᐧ ᑲᑭᐃᔑᐅᓇᒋᑫᐊᐧᐨ ᒋᔕᐳᓭᓂᐠ.
“ᐅᑎᐸᑯᓂᑫ ᐅᑭᐸᔭᑌᐃᐧᐣᑕᐣ ᐁᑲ ᐃᐧᐣ ᒋᑭᐅᐣᒋ ᐊᐧᓇᐱᑐᐨ ᑭᒋᐊᑭᐃᐧᑭᒪᐣ ᑲᐃᔑᐸᐸᒥᓯᑲᑕᒥᓂᐨ ᒋᐅᒋ ᐱᒧᑐᓂᐨ ᐅᐁᐧᓂ ᑲᓇᐊᐧᐸᒋᑫᐃᐧᓂ,” ᑭᐃᑭᑐ ᑲᑎᓫᐃᐣ ᒪᑫᐣᓯ, ᑲᓂᑲᓂᐡᑲᐠ ᐊᓄᑭᐃᐧ ᐱᒧᒋᑫᐃᐧᓂᐠ ᐃᒪ ᐦᐊᕑᐊᔾᓯᐣ. “ᐊᒥᐦᐅᐁᐧ ᐯᔑᑲᐧᔦᐠ ᑲᐃᔑᒥᔑᓄᓭᐠ ᑲᐱᒥ ᑲᑫᐧᑌᓇᓂᐊᐧᐠ ᒋᔕᐳᓂᑲᑌᓂᐠ ᐅᑕᓄᑭᐃᐧᓂᐊᐧ ᐃᐡᑯᑌᑫᐃᐧ ᐊᓄᑭᐠ.”