ᔦᐢᓄ ᓂᑲᓂᐡᑲᒪᑫ ᐊᓂᔑᓇᐯ ᐊᐢᑭ

ᐦᐊᕑᐱ ᔦᐢᓄ ᑭᐅᑕᐱᓇᑲᓄ ᒋᐅᐡᑭ ᑭᒋᐅᑭᒪᑲᓂᐃᐧᐨ ᐊᓂᔑᓇᐯ ᐊᐢᑭ ᑎᐯᐣᒋᑫᐃᐧᓂᐠ (NAN).
ᔦᐢᓄ ᑭᐸᑭᓇᑫ ᐯᔑᐠ ᐊᔑᑌᐱᐦᐃᑲᓂ ᐁᑭᐊᓭᐧᐁᐧᐱᐡᑲᐊᐧᐨ ᑯᑕᑭᔭᐣ ᑲᑭᐱᒥᐸᑐᓂᐨ ᑌᕑᐃ ᐊᐧᐳᐢ ᐊᐱ ᒪᒋᐨ ᓂᐦᓴᐧ ᑲᐱᐣᒋᐁᐧᐱᓂᑲᓂᐊᐧᐠ. ᔦᐢᓄ ᐅᑭᑌᐱᓇᐣ 22 ᐊᔑᑌᐱᐦᐅᑯᐃᐧᓇᐣ ᐁᑲᐧ ᐊᐧᐳᐢ 21 ᐅᑭᐊᔭᓇᐣ.
ᐊᐱ ᑲᑭᐃᐡᑲᐧ ᐸᑭᓇᑫᐨ ᑲᑭᐊᔭᒥᐨ, ᔦᐢᓄ ᐅᑭᐃᐧᐣᑕᐣ ᒪᐊᐧᐨ ᐁᑭᒋᓀᐣᑲᐧᓂᐠ ᐅᑭᒪᑲᓇᐠ ᑭᒋᐃᐧᒋᑲᐸᐃᐧᑐᑎᐊᐧᐸᐣ ᒥᓇ ᐱᑯ ᐃᐡᑯᓂᑲᓇᐣ.
“ᓇᑕᐁᐧᐣᑕᑲᐧᐣ ᒋᐃᐧᒋᑲᐸᐃᐧᑕᑎᔭᐠ,” ᑭᐃᑭᑐ ᔦᐢᓄ. “ᑲᐃᐧᐣ ᑯᑕᐠ ᑫᑯᐣ ᐊᔭᓯᐣ ᑫᑭᑐᒋᑲᑌᑭᐸᐣ. ᐁᑲᐧ ᑕᐡ ᑲᑭᓇ ᑭᓇᐊᐧ ᑭᓇᑕᐁᐧᐣᑕᑯᓯᓇᐊᐧ ᒋᐃᐧᒋᑲᐸᐃᐧᑕᑎᔦᐠ, ᑫᑭᔭᓄᒋ ᐃᐧᒋᐦᐊᑭᑕᐧ ᑭᑕᐊᐧᔑᔑᒥᓇᓂᐠ ᒋᑭᔭᓂ ᐊᔕᐊᐧᐸᐣᑕᒧᐊᐧᐨ ᐅᐱᒪᑎᓯᐃᐧᓂᐊᐧ ᐁᐧᑎ ᓂᑲᐣ.”
ᑲᑭᐅᐡᑭ ᐅᓇᐱᐦᐃᐣᑕᐧ ᑫᓂᑲᓂᑕᒪᑫᐊᐧᐨ ᐊᓂᔑᓇᐯ ᐊᐢᑭ ᑭᔭᓂᑭᔑᒋᑲᑌ ᐅᐸᐅᐃᐧᐱᓯᑦ 15 ᑲᐃᓇᑭᓱᐨ ᑲᑭᔭᓂ ᐱᐣᒋᐁᐧᐱᓂᑫᑲᑕᐃᐧᑕᐧ ᑫᐅᐡᑭ ᑭᒋᐅᑭᒪᑲᓀᓯᐃᐧᐊᐧᐨ.
ᑭᒋᐅᑭᒪᑲᓀᐢ ᓫᐁᐢ ᓫᐅᑎᐟ ᐱᑕᐯᑯᐠ ᑲᐅᒋᐨ ᑭᑭᐁᐧᐅᑕᐱᓇᑲᓄ ᒪᒪᐤ 24 ᐅᑭᐊᔭᐣ ᐱᐣᒋᐁᐧᐱᓂᑫᐃᐧᓇᐣ. ᐅᑕᓇᐠ ᑲᑭ ᑭᒋᐅᑭᒪᑲᓀᓯᐃᐧᐊᐧᐸᐣ ᐊᓫᐱᐣ ᐱᐟᓫᐊᕑ ᐊᐧᒐᐡᑯᓂᒥᐠ ᑲᐅᒋᐨ ᐁᑲᐧ ᒥᓇ ᑲᐧᔾᐢ ᑲᑭᑲᒥᐠ ᑭᐁᐧᐃᐧᐣ ᑲᐅᒋᐨ ᑭᓂᑲᓂᓭᐊᐧᐠ 39 ᒥᓇ 34 ᐅᑭᐊᔭᓇᐊᐧ.
ᓄᑯᑦ ᑲᑭᒋᐅᑭᒪᑲᓂᐃᐧᐨ ᔦᐢᓄ ᐅᒥᐡᑲᐧᒋᐡᑲᐊᐧᐣ ᑲᑭ ᑭᒋᐅᑭᒪᑲᓂᐃᐧᐸᐣ ᐢᑕᐣ ᐯᕑᑎ, ᑲᑭᐳᓇᓄᑭᐸᐣ ᒣᑲᐧᐨ ᓴᑭᐸᑲᐃᐧᐱᓯᑦ ᐊᐱ ᑲᑭᐃᐡᑲᐧ ᐅᓇᑭᒪᑲᓄᐸᐣ ᐅᐣᑌᕑᐃᔪ ᐅᑭᒪᑲᐣ ᒋᐃᓇᑭᓱᐨ.
ᐁᑲᐧ ᑲᒪᔦ ᐅᓇᑭᒪᑲᓄᐸᐣ ᒋᑭᒋᐅᒪᑲᓂᐃᐧᐨ, ᔦᐢᓄ ᑭᐃᔑᐸᐸᒥᓯᐸᐣ ᐅᐣᑌᕑᐃᔪ ᐅᑭᒪᐅᓂ ᐁᑭᓂᑲᓂᐱᒧᐨ ᐊᓂᔑᓂᓂ ᒥᓇ ᑕᔑᑫᐃᐧ ᑲᓇᐊᐧᐸᐣᒋᑫᐃᐧᓇᐣ ᐃᒪ ᐱᐊᐧᐱᑯᑫᐃᐧ ᐱᒧᒋᑫᐃᐧᓂᐠ.
ᐁᐧᑎ ᐅᑕᓇᐠ ᐅᑭᐱᓂᑲᓂ ᐱᒧᑐᓇᐸᐣ ᐊᓂᔑᓇᐯ ᐊᐢᑭ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ, ᓂᔭᓇᐧ ᑭᐱᐅᑭᒪᑲᓂᐃᐧᐸᐣ ᐊᐸᒪᑐᐣᐠ ᒥᓇ ᑭᐱᐊᐧᐃᐧᒋᑕᐧᐸᐣ ᐠᕑᐊᐣᐟ ᑲᐧᐣᓱ ᒋᕑᐃᑎ 9, ᐁᑲᐧ ᐊᐱᐣ ᑲᑭᐊᐣᒋᓂᑲᑌᐠ ᓄᑯᑦ ᑲᐃᔑᓂᑲᑌᐠ ᐊᓂᔑᓇᐯ ᐊᐢᑭ ᐱᒧᒋᑫᐃᐧᐣ, ᒣᑲᐧᐨ ᐁᐧᑎ 1970 ᑫᑲᐟ ᑲᔭᓂᑭᔑᐱᓭᐠ ᐱᓂᐡ ᑲᔭᓂᐅᐡᑭᓭᐠ 1980 ᐱᒥ ᐊᑭᐣᒋᐊᐦᑭᐃᐧᐣ.
ᒣᑲᐧᐨ ᐃᒪ ᑭᔐᒋᐊᐧᓄᐠ ᑲᑭᑕᔑᒪᐊᐧᒋᐦᐃᑎᐊᐧᐨ ᔦᐢᓄ ᐅᑭᑲᓄᓇᐣ ᐅᑭᒪᑲᓇᐠ ᐃᒪ ᑲᑭᐅᑲᐧᐱᐊᐧᐨ ᐅᐁᐧ ᐊᓂᔑᓇᐯ ᐊᐢᑭ ᑲᐃᔑᓂᑲᑌᐠ ᓄᑯᒥᑫ ᐱᑯ ᐃᓀᐣᑕᑲᐧᐣ ᑲᑭᐅᐡᑭᒪᒋᒋᑲᑌᑭᐸᐣ.
“ᐊᒥ ᓂᐣ ᐁᓀᐣᑕᒪᐣ ᐁᑭᒋᓀᐣᑕᑲᐧᐠ ᑲᑭᓇ ᐅᒪ ᑲᐱᔕᔭᐠ ᒋᑭᐃᐧᐣᑕᒪᑎᔭᑭᐸᐣ ᐅᐡᑭᑫᑯᓇᐣ ᒥᓇ ᐅᐡᑭ ᐸᑯᓭᓂᒧᐃᐧᓇᐣ ᑲᑲᑫᐧ ᑲᒋᑎᓇᒪᐠ,” ᑭᐃᑭᑐ ᔦᐢᓄ. “ᓇᑕᐁᐧᐣᑕᑯᓯᐊᐧᐠ ᑭᔭᐱᐨ ᒥᔑᐣ ᑭᑕᓂᔑᓂᓂᒥᓇᓂᐠ ᒋᑭᒥᓯᑲᑕᒧᐊᐧᐸᐣ ᐅᒪ ᐃᓀᑫ ᐃᓇᓄᑭᐃᐧᓂᐠ.”
ᐁᑲᐧ ᒥᓇ ᐅᑭᑲᓄᑕᐣ ᒪᐊᐧᐨ ᐁᓇᑕᐁᐧᐣᑕᑲᐧᐠ ᒋᑲᑫᐧ ᐃᐡᑯᓄᐦᐃᑕᐧ ᐅᐡᑲᑎᓴᐠ ᒥᓇ ᑫᐃᓇᐧᐊ ᒋᐊᔑᑎᓂᑕᐧ ᑲᐱᒥᔭᓄᑲᑌᐠ ᐅᑭᒪᐅᓂ ᐸᐸᒥᓯᐃᐧᓂᐠ.
ᑲᒪᐧᔦ ᑭᒋᐅᑭᒪᑲᓂᑲᓂᐊᐧᑭᐸᐣ ᔦᐢᓄ ᑭᐃᑭᑐᐸᐣ ᐃᒪ ᐊᐧᐊᐧᑌ ᐊᒋᒧᐃᐧᓂᐠ ᑭᐡᐱᐣ ᐸᑭᓇᑫᐨ ᑭᒋᐅᑭᒪᑲᓂᐃᐧᓂᐠ ᐊᒥ ᑫᑐᑕᐣᐠ ᒋᑲᑫᐧ ᐅᓂᑲᐸᐃᐧᐦᐊᐨ ᐊᓂᔑᓇᐯ ᐊᐢᑭ ᐅᐡᑲᑎᓴᐣ ᒋᑭᒋᐅᑭᒪᑲᓂᔑᔑᐃᐧᓂᐨ.
“ᒋᑲᑫᐊᐧᐸᑕᐦᐊᔭᐠ ᐊᐣᑎ ᑫᔭᓂᔑ ᐊᐯᓂᒧᐊᐧᐨ ᐁᐧᑎ ᐊᓂᓂᑲᐣ, ᒥᓄᑫᑯᓇᐣ ᒋᒥᔭᓇᑭᑕᐧ ᑫᑭᔭᓄᒋ ᒋᑭᐡᑲᑯᐊᐧᐨ ᑭᑐᐡᑲᑎᓯᒥᓇᓂᐠ ᒋᐱᒪᑎᓯᐊᐧᐨ,” ᑭᐃᑭᑐ ᔦᐢᓄ.
ᒪᐃᐠ ᒥᑕᑕᐊᐧᐱᐣ ᑭᓴᑭᒋᐁᐧᐱᐡᑲᐊᐧᑲᓄ ᓂᔕᐧ ᑲᐃᐡᑲᐧ ᐱᐣᒋᐁᐧᐱᓂᑲᓂᐊᐧᐠ, 12 ᐅᑭᐊᔭᓇᐣ ᐱᐣᒋᐁᐧᐱᓂᑲᓇᐣ, ᐁᑲᐧ ᐃᐧᐣ ᔦᐢᓄ ᐅᑭᐊᔭᓇᐣ 16 ᒥᓇ ᐊᐧᐳᐢ 15.
ᑊᕑᐊᔭᐣ ᑌᐱ, ᓫᐊᕑᐃᐣᐢ ᒪᕑᑎᐣ, ᑕᐠ ᓭᑦᐳ ᒥᓇ ᑌᐱᐟ ᓂᑲᐣ ᑭᓴᑭᒋᐁᐧᐱᐡᑲᐊᐧᑲᓄᐊᐧᐠ ᓂᐢᑕᑦ ᑲᐃᐡᑲᐧ ᐱᐣᒋᐁᐧᐱᓂᑲᓂᓄᐊᐧᐠ.
ᐁᑲᐧ ᐃᐧᐣ ᐃᒪ ᑭᒋᐅᑭᒪᑲᓀᐢ ᐱᐣᒋᐁᐧᐱᓂᑫᐃᐧᓂᐠ, ᑐᕑᐃᓴ ᐦᐊᓫ ᐊᑕᐊᐧᐱᐢᑲᐟ ᑲᐅᐣᒋᐨ ᒥᓇ ᐱᔦᕑ ᒪᐧᕑᓱ ᐊᐧᐃᐧᔦᑲᒪᐠ ᑲᐅᐣᒋᐨ ᑭᓴᑭᒋᐁᐧᐱᐡᑲᐊᐧᐊᐧᐠ ᓂᐢᑕᑦ ᑲᐃᐡᑲᐧ ᐱᐣᒋᐁᐧᐱᓂᑲᓄᐊᐧᐠ.
ᓫᐅᑎᐟ ᑭᑭᐁᐧᐅᑕᐱᓇᑲᓄ ᐃᒪ ᑲᑭᐱ ᐱᒧᑐᐨ ᐊᐧᑲᐦᐃᑫᐃᐧᐣ ᒥᓇ ᑯᑕᑭᔭᐣ ᑭᒋᐊᓄᑭᐃᐧ ᑫᑯᓇᐣ ᐁᑲᐧ ᒥᓇ ᐊᓄᑭᐃᐧ ᒪᒋᑕᒪᓱᐃᐧᓇᐣ ᑲᐅᒋᐃᐧᒋᒋᑲᑌᑭᐣ.
ᐱᐟᓫᐊᕑ ᓂᔕᐧ ᑭᐱᒥᐊᓂᑫ ᑭᒋᐅᑭᒪᑲᓀᓯᐃᐧᐸᐣ ᒣᑲᐧᐨ 2003 ᐊᑯᓇᐠ 2009 ᐁᒪᐧᔦ ᑯᑭᐸᑐᐸᐣ ᑭᒋᐅᑭᒪᑲᓂᑫᐃᐧᓂᐠ ᒣᑲᐧᐨ 2009, ᐁᑲᐧ ᑫᑲᐟ ᑭᐸᑭᓇᑫᐸᐣ ᐢᑕᐣ ᐯᕑᑎᐊᐧᐣ ᑲᑭᐸᑭᓇᑫᓂᐸᐣ.
ᐁᑲᐧ ᐃᐧᐣ ᑲᑭᑲᒥᐠ ᓂᐦᓴᐧ ᑭᐱᒥᐊᔭᓂᑫ ᑭᒋᐅᑭᒪᑲᓀᓯᐃᐧ ᒣᑲᐧᐨ 1997 ᐊᑯᓇᐠ 2006 ᐁᒪᐧᔦ ᓇᑲᑕᐠ ᐊᓂᔑᓇᐯ ᐊᐢᑭ ᓂᑲᓂᑕᒪᑫᐃᐧ ᐊᓄᑭᐃᐧᓂ ᓂᔕᐧ ᑲᑭᐱᒥ ᐅᑭᒪᑲᓂᑲᓂᐊᐧᓂᐠ.