ᓇᐯᐗᐠ ᑭᐗᓂᔑᓂᐠ ᒣᑾᐨ ᑲᑭᒪᔑᑭᔑᑲᐠ ᑭᒥᑲᐗᑲᓀᐗᐠ ᐁᑭᓇᓇᑕᐗᐸᒪᑲᓀᐗᐨ

ᓂᔑᐣ ᐱᐗᓇᐠ ᓇᐯᐗᐠ ᑲᑭᐗᓂᔑᓄᐗᐨ ᑲᑭᑯᐡᑯᒪᔑᑭᔑᑲᐠ ᑭᒥᑲᐗᑲᓀᐗᐠ ᐁᐱᒪᑎᓯᐗᐨ ᐁᑭᑭᒋ ᓇᓇᑕᐗᐸᒪᑲᓀᐗᐨ ᑲᑭᑕᑶᐗᐨ ᑲᓇᑕ ᕒᐁᐣᒍᕒᐢ, ᓂᔑᐣ ᓄᑎᓂᑫᐎ ᐱᒥᓭᐎᓇᐣ, ᐗᓭᔭ ᐱᒥᓭᐎᐣ, ᒥᓇ ᐊᓂᔑᓂᓂᐗᐠ ᑲᓇᓇᑕᐗᐸᒋᑫᐗᐨ ᒥᓇ ᐊᓂᔑᓂᓂᐗᐠ ᑲᐎᒋᑐᐗᐨ᙮
“ᒥᐁ ᐁᓀᑕᒪᐣ ᐁᑭᒥᓄᓭᐠ ᑲᑭᐃᓯᓭᐠ ᐅᐅᐌ,” ᐃᑭᑐ ᒉᒥ ᐢᑐᕒᓬᐠ, ᐅᐣᑌᕒᐃᔪ ᓇᓇᑕᐗᐸᒋᑫᐎᐣ ᑲᑭᑲᓇᐗᐸᑕᐠ ᑲᐊᓄᑭᑕᐗᐨ ᐅᐣᑌᕒᐃᔪ ᔑᒪᑲᓂᔕᐣ᙮ “ᐅᑭᐱᑭᐌᐎᓇᐗᐣ ᓂᔑᐣ ᔭᐎᔭᐣ ᐃᐃᒪ ᐃᐡᑯᓂᑲᓂᐠ ᑫᒋᓇᐨ ᒋᑭᑲᐗᒋᐗᐸᐣ ᑭᐡᐱᐣ ᐁᑲ ᑭᒪᒋᒋᑲᑌᐠ ᓇᓇᑕᐗᐸᒋᑫᐎᐣ ᒋᒥᑲᐗᑲᓀᐗᐨ᙮”
ᑲᑭᐗᓂᐊᑲᓀᐗᐨ ᓇᐯᐗᐠ, ᒪᐃᐠ ᑯᐢᑕᒋᐣ ᒥᓇ ᐳᕒᒍᓬ ᐌᐢᓬᐃ, ᓇᑲᒋᐗᐠ ᑲᓇᑕᐌᒋᑫᐗᐨ, ᑭᓇᓇᑯᒧᐗᐠ ᑲᑲᑭᐳᓂᒋᑲᑌᓂᐠ ᒋᓇᓇᑕᐗᐸᒪᑲᓀᐗᐨ ᒥᓇ ᑲᓂᓇ ᔭᐎᔭᐣ ᑲᑭᐎᒋᑐᓂᐨ᙮
ᑲᑭᒪᒐᐗᐨ ᐱᐗᓇᐠ ᑭᒪᒋᐱᓱᐗᐠ ᐢᑭᑐᐣ ᐁᐎᐊᑌᐸᑭᑕᐌᐗᐨ ᐃᐃᒪ ᐗᓂᐦᐃᑫᐗᑲᐦᐃᑲᓂᐠ ᓂᑭᒥᓇᐣ ᓯᐱᐠ, ᑯᒋᐱᑯ 45 ᑕᓱᑎᐸᐦᐊᐸᐣ ᑭᐌᑎᓄᐠ ᐱᐗᓇᐠ᙮
“ᐌᐸᒋᑯ ᑲᑭ ᐃᐡᑾᒪᒐᐗᐨ ᑭᑭᒋ ᒪᔑᑭᔑᑲᐣ ᒥᓇ ᐎᐸᐨ ᓂᔓᒥᓯᐟ ᑯᐣ ᑭᐸᑭᔑᐣ ᐃᐃᐌ 24 ᑕᓱᑎᐸᐦᐃᑲᐣ ᒥᓂᑯᐠ,” ᐃᑭᑐ ᒑᐣ ᒪᐠᓂᓬ, ᑲᐱᒥᐎᒋᑫᐨ ᐅᓂᑲᓂᑕᒪᑫ 3 ᑲᓇᑕ ᕒᐁᐣᒍᕒᐢ ᑲᓇᓇᑕᐗᐸᒋᑫᐗᐨ᙮
ᑲᑭᒪᔑᑭᔑᑲᐠ ᑭᒪᒋᓭ ᓇᐯᐗᐠ ᑲᑭᒪᒐᐗᐨ ᑎᓭᒼᐳᕒ 3᙮ ᑭᒥᑲᐗᐗᐠ ᒣᑾᐨ ᑎᓭᒼᐳᕒ 7᙮
ᐎᐸᐨ ᑭᐗᓂᐦᐃᑎᐗᐠ ᒣᑾᐨ ᑲᐱᒥᐱᓱᐗᐨ ᒥᓇ ᑭᐗᓂᐡᑴᐁᑕᒧᐗᐠ ᒥᓇ ᑭᐊᓂᑕᑲᔭ ᐊᑯᓇᐠ -15C᙮
ᐊᐱ ᑲᐎᒋᑲᑌᐠ ᐁᐗᓂᐦᐊᑲᓀᐗᐨ ᓇᐯᐗᐠ ᓂᔓᑭᔑᐠ ᒥᓂᑯᐠ ᑲᐃᓯᓭᐠ ᓂᔑᐣ ᕒᐁᐣᒍᕒᐢ ᑭᐅᒋᒪᒐᐗᐠ ᐱᐗᓇᐠ ᐁᑭᓇᓇᑕᐗᐸᒪᐗᐨ ᔕᑯᐨ ᑭᐱᑭᐌᐗᐠ ᐅᓴᒼ ᐁᒪᒋᑭᔑᑲᐠ ᒥᓇ ᐅᓴᒼ ᐁᐃᐡᐸᑯᓇᑲᐠ᙮ ᐗᓭᔭ ᐱᒥᓭᐎᐣ, ᒥᓇ ᓂᔑᐣ ᕒᐁᐣᒍᕒᐢ ᐁᐳᓯᐗᐨ, ᐁᑭᓇᑐᒋᑲᑌᐠ ᒋᓇᓇᑕᐗᐸᒪᑲᓀᐗᐨ ᑲᑭᐃᓀᒋᑲᑌᐠ ᑲᑭᐃᔕᐗᐨ ᔕᑯᐨ ᑲᐎᐣ ᒋᐅᒋᒥᑲᐗᐗᐨ ᒋᐱᒥᑲᐌᓂᐨ᙮
ᐅᓴᒼ ᑭᒪᒋᑭᔑᑲᐣ ᒋᑭᑕᑯᓭᒪᑲᐠ ᑲᑎᐱᐡᑯᒋᐳᓂᒪᑲᐠ ᒋᐊᐸᒋᒋᑲᑌᐠ ᔕᑯᐨ ᓄᑎᓂᑫᐎ ᐱᒥᓭᐎᐣ ᑭᐱᑕᑯᓭᒪᑲᐣ ᑎᕒᐁᐣᑕᐣ ᐁᑭᐱᐅᒋᓭᒪᑲᐠ ᑭᒪᒋᐎᒋᑐᐗᐠ ᒋᓇᓇᑕᐗᐸᒋᑫᐗᐨ᙮ ᑲᐱᒥᓭᐗᐨ ᐅᑭᐗᐸᑕᓇᐗ ᐁᐗᓴᑯᓀᓂᐠ ᐗᓂᐦᐃᑫᐗᑲᐦᐃᑲᓂᐠ ᒥᓇ ᑭᐃᔑᓂᔕᐦᐊᐗᐠ ᓂᔑᐣ ᕒᐁᐣᒍᕒᐢ ᒥᓇ ᓂᔙᐣ ᐊᓂᔑᓂᓂᐗᐠ ᒋᐃᓇᐱᐗᐨ᙮ ᐅᑭᒥᑲᐗᐗᐣ ᑯᐢᑕᒋᐣ ᐃᐃᒪ ᐁᔭᔭᓂᐨ᙮
ᑭᐳᑕᐌᑯᐸᐣ ᐃᐡᑯᑌᑲᓂᐠ ᔕᑯᐨ ᑭᐊᑯᒋᓂᒋᐗᒋ ᒥᓇ ᐅᓯᑕᐠ᙮ ᑲᑭᐃᓇᐱᐗᐨ ᐅᑭᒥᑲᐗᐗᐣ ᐊᔕ ᑫᑲᐟ ᐁᑲᐗᒋᓂᐨ ᒥᓇ ᐁᑲ ᐁᑭᓇᑴᑕᐠ ᑲᑲᑴᒋᒪᑲᓀᐨ ᑫᑯᓂᓂ᙮ ᐅᑐᑕᐸᓇᐣ ᑭᐃᐡᑲᐱᑭᓱᐗᐣ ᒥᓇ ᑭᐱᒧᓭ ᐊᐗᔑᒣ ᓂᓱᑭᔑᐠ ᐁᑲ ᐁᐎᓯᓂᐨ ᒥᓇ ᐁᒥᓂᑴᐨ ᐊᐗᔑᒣ 12 ᑕᓱᑎᐸᐦᐊᐸᐣ ᐁᑭᐃᔕᐨ ᐃᐃᒪ ᐗᓂᐦᐃᑫᐗᑲᐦᐃᑲᓂᐠ, ᓇᑕᐌᒋᑫᐗᑲᐦᐃᑲᐣ ᐃᓋᑌᑯᐸᐣ᙮ ᑭᑭᐌᐎᓇᑲᓀ ᐱᐗᓇᐠ ᒥᓇ ᑭᐸᑭᑎᓇᑲᓀ ᒋᑭᐌᐨ ᑲᑭᐃᐡᑾᓇᑕᒋᐦᐊᑲᓀᐨ ᐊᑯᓯᐎᑲᒥᑯᐠ᙮
“ᒣᑾᐨ ᓂᓂᐸᓇᐸᐣ ᒥᓇ ᑭᐊᒪᒋᒥᑯᐣ ᑲᐱᑕᐌᐱᓱᐗᐨ ᐅᑕᐸᓇᐠ,” ᐃᑭᑐ ᑯᐢᑕᒋᐣ᙮ “ᑭᐳᑕᐌᐗᐠ ᒥᓇ ᑭᑎᐗᐳᑫᐗᐠ ᑲᔦ ᐁᑭᐊᔕᒥᔑᐗᐨ ᒥᒋᒥᓂ᙮ ᒪᐗᐨ ᑭᒥᓉᑕᐣ᙮ ᑲᐎᐣ ᑐᒋᓀᑕᓯᐣ ᒋᐱᒪᑎᓯᔭᐣ ᑭᔭᐸᐨ ᐯᔑᑯᑎᐱᐠ᙮”
ᓄᑎᓂᑫᐎ ᐱᒥᓭᐎᐣ ᑭᓄᑌᑭᐌᒪᑲᐣ ᑎᕒᐁᐣᑕᐣ ᐁᑭᓄᑌ ᐃᐡᑲᐱᑭᑌᐠ᙮ ᔕᑯᐨ ᑯᑕᐠ ᑭᐱᑕᑯᓭᒪᑲᐣ ᐌᑎ ᐎᓂᐯᐠ ᐁᑭᐅᒋᐱᔕᒪᑲᐠ, ᐁᑭᑎᐸᒋᒧᐗᐨ ᐁᑭᐗᐸᑕᒧᐗᐨ ᑫᑯᓂᓂ ᐁᑭᔑᑌᓂᐠ ᐃᐃᒪ ᓯᐱᐠ᙮ ᑯᑕᑭᔭᐠ ᑲᓇᓇᑕᐗᐸᒋᑫᐗᐨ ᑭᒪᒐᐗᐠ, ᐅᑭᓄᐱᓂᔕᐦᐊᓇᐗ ᐱᒥᑲᐗᓇᐣ ᑲᑭᒥᑭᑲᑌᑭᐣ, ᐁᑭᐸᐸᑭᒋᐌᐱᓂᑲᑌᑭᐣ ᑲᐸᐡᑭᓀᑭᐣ ᑭᑭᓇᐗᒋᒋᑲᓇᐣ ᒥᓇ ᑭᒥᑲᐗᑲᓀ ᐌᓯᓬᐃ ᐁᑲᑴᑭᓱᓯᐨ ᐁᑭᐳᑕᐌᑯᐸᓀᐣ᙮ ᑭᒥᓇᑲᓀ ᑭᑭᐡᑭᑲᓇᐣ, ᒥᒋᒥᓂ ᒥᓇ ᓂᐱᓂ ᒥᓇ ᑭᑭᐌᐎᓇᑲᓀ ᐱᐗᓇᐠ ᒥᓇ ᑭᐸᑭᑎᓇᑲᓀ ᑲᑭᐃᐡᑾᓇᑲᒋᐦᐊᑲᓀᐨ ᐊᑯᓯᐎᑲᒥᑯᐠ᙮
ᐌᓯᓬᐃ ᑭᐃᑭᑐ ᐁᑭᓂᐸᐨ ᐊᓇᒥᐠ ᐅᑐᑕᐸᓇᑯᐠ ᑲᑭᐃᐡᑾ ᐃᐡᑾᐱᑭᓱᐨ ᐅᑐᑕᐸᓇᐣ᙮ ᑭᐱᒧᓭ ᓂᓱᑭᔑᐠ ᒥᓂᑯᐠ ᐁᑲ ᒋᑲᐗᒋᐨ ᒥᓇ ᐁᓇᓇᑕᐗᐸᑕᐠ ᒋᓂᓯᑕᐎᓇᐠ ᐊᑭᓂ ᒋᑭᐅᒋᑭᑫᑕᑭᐸᐣ ᐊᐣᑎ ᑫᑭᐃᔑᒪᒐᐸᐣ ᒋᑭᑭᐌᐨ᙮ ᑭᐅᔑᑕᒪᓱ ᑫᐃᔑᓂᐸᐨ ᔕᑯᐨ ᑭᐊᓂᒐᑭᓭ ᒥᒋᒥᓂ᙮ ᑲᐗᐸᒪᐨ ᑲᐱᓇᓇᑕᐗᐸᒥᑯᐨ ᒥᐌ ᑲᑭᐃᑭᑐᐨ, “ᐊᓬᐁᓬᐅᔭ᙮”
ᑲᑭᓇᓇᑕᐗᐸᒋᑫᓇᓂᐗᐠ ᑭᐅᒋᑲᓇᐗᐸᒋᑲᑌ ᑲᑭᐅᓇᑐᐗᐨ ᕒᐁᐣᒍᕒᐢ ᐃᐃᒪ ᐱᐗᓇᐠ ᒥᓇ ᑭᐗᐎᒋᑐᐗᐠ ᐊᓂᔑᓂᓂᐗᐠ ᑲᓇᓇᑕᐗᐸᒋᑫᐗᐨ ᒥᓇ ᑲᐗᐎᒋᑐᐗᐨ᙮ ᕒᐁᐣᒍᕒᐢ ᐗᔕᐦᐅᐠ ᑭᐊᔓᑲᐸᐎᐗᐠ ᑭᐡᐱn ᓇᑕᐌᓂᒪᑲᓀᐗᐨ ᒋᑭᐱᐎᒋᑐᐗᐸᐣ᙮
“ᕒᐁᐣᒍᕒᐢ ᑭᑭᒋᐊᓄᑭᐗᐠ, ᒥᓇ ᐊᓂᔑᓂᓂᐗᐠ ᑲᑭᐗᐎᒋᑐᐗᐨ᙮” ᒪᐠᓂᓬ ᐃᑭᑐ᙮ “ᒪᐗᐨ ᑭᐃᑭᑐᐗᐠ ᒥᓇ ᓂᔑᐣ ᐱᒪᑎᓯᐎᓇᐣ ᑭᐱᒪᒋᒋᑲᑌᐗᐣ᙮”