ᓂᐃᐧᐣ ᐊᐃᐧᔭᐠ ᑭᐊᐱᒋᔑᓄᐠ ᐯᔑᐠ ᐱᒪᑎᓯ

ᒣᒣᑫᐧᔑᐃᐧᓴᑲᐦᐃᑲᓂᐠ ᐁᐅᒋᐨ ᑕᕑᓯ ᑭᓯᐠ ᐅᒪᒥᑐᓀᑕᓇᐸᐣ ᐁᐃᐧ ᐁᐧᐸᐦᐊᑯᓀᐨ ᐊᑲᐧᒋᐠ ᑲᐅᐣᒋᓴᑭᒋᐱᓱᐨ ᒣᑲᐧᐨ ᒉᐣᐁᐧᕑᐃ ᐱᓯᑦ 9 ᐁᑭᔐᐸᔭᓂᐠ.
ᒪᐊᐧᐨ ᐃᑯ ᑭ ᑭᒋᐱᐊᐧᐣ ᐃᒪ ᐃᐡᑯᓂᑲᓂᐠ ᑲᑎᐱᑲᐠ, ᐁᑲᐧ ᑭᔭᐱᐨ ᑭᓯᑭᐸᐧᐣ ᑲᔭᓂᑭᔐᐸᔭᐠ.
ᐁᑲᐧ ᐊᐱᐣ ᑲᔭᓂᐃᐡᑲᐧ ᒥᑕᓱᑎᐸᐦᐃᑲᓀᔭᐠ ᑲᑭᔐᐸᔭᓂᐠ, ᑭᓯᐠ ᐅᐃᐧᒋᐊᐧᑲᓇᐣ ᓱᓴᐣ, ᐊᔕ ᑭᒪᑕᓄᑭᑯᐸᐣ ᐊᑕᐁᐧᐃᐧᑲᒥᑯᐠ, ᑫᑕᑕᐃᐧᐣ ᑭᐱᐅᐣᒋ ᐱᐣᑎᑫᐸᑐ.
ᐱᒥᓭᐃᐧᐣ ᑭᐸᐣᑭᓯᐣ ᐯᔓᐨ ᐊᑲᐧᒋᐠ ᑕᔑᑫᐃᐧᓂᐠ.
ᐃᐁᐧ ᐱᒥᓭᐃᐧᐣ 231, Piper PA 31 Navajo, ᑭᐱᐅᐣᒪᒐᒪᑲᐣ ᐃᐧᓂᐯᐠ 7:51 ᑲᑭᔐᐸᔭᐠ ᐁᑲᐧ ᓂᔭᓇᐣ ᐊᐃᐧᔭᐠ ᐁᐳᓯᐊᐧᐨ ᐱᒥᓭᐃᐧᓂᐠ, ᓂᐃᐧᐣ ᑲᒧᒋᐳᓯᐊᐧᐨ ᐁᑲᐧ ᐅᐱᒥᓭ.
ᐱᒥᓭᐃᐧᑭᒪᐠ ᐃᑭᑐᐊᐧᐠ ᐃᐁᐧ ᑭᐢᑐᐣ ᐱᒥᓭᐃᐧᐣ ᑭᒪᒐᒪᑲᐣ ᒥᓇ ᑲᐃᐧᐣ ᓇᐣᑕ ᒋᑭᐅᒋᐃᔑᒪᒋᓭᐠ ᒥᓇ ᑲᐃᐧᐣ ᐃᐧᑲ ᒪᒋᑭᑐᐃᐧ ᓇᑐᑕᒧᐃᐧᓂᐠ ᒋᑭᐱᐅᒋᑭᑐᐨ ᐊᐱ ᐃᐧᓂᐯᐠ ᑲᐃᐡᑲᐧ ᒪᒋᑯᒋᐠ ᐊᐧᐁᐧ ᐅᐱᒥᓭ.
ᐁᑲᐧ 10:05 ᑲᑭᔐᐸᔭᓂᐠ, ᐊᒥ ᐊᐱᐣ ᑲᑭᐸᐣᑭᓯᐠ ᐃᐁᐧ ᐱᒥᓭᐃᐧᐣ ᓇᐣᑕ ᐯᔑᑯᑎᐸᐦᐊᑲᐣ ᐊᐧᐸᓄᐠ ᐃᓀᑫ ᓂᑲᑌ ᒣᒣᑫᐧᔑᐃᐧᓴᑲᐦᐃᑲᓂᐠ ᒣᑲᐧᐨ ᐁᔭᓂᑲᑫᐧ ᐳᓂᐨ.
ᒣᑲᐧᐨ ᑕᐡ ᓱᓴᐣ ᐁᐃᔑᑭᑐᐨ ᐊᓂᔑᓇᐯ ᐊᐢᑭ ᔑᒪᑲᓂᔑᐃᐧᑲᒥᑯᐠ ᒥᓇ ᒪᐡᑭᑭᐃᐧᑲᒥᑯᐠ, ᑭᓯᐠ ᑭᐊᐧᐁᐧᐱᓱᐸᑐ ᒥᓇ ᓂᔑᐣ ᐃᐢᑭᑐᐣ ᐅᑭᒪᒋᓂᐁᐧᐱᓇᐣ. ᐁᑲᐧ ᐊᐱᐣ ᐃᐡᑯᓂᑲᓂᐠ ᔑᒪᑲᓂᐡ ᑲᐱᑕᑯᐸᓂᐦᐅᐨ, ᓱᓴᐣ ᑫᐃᐧᐣ ᑭᐊᐧᑭᑕᑯᐸᓂᐦᐅ ᐅᐃᐧᒋᐊᐧᑲᓇᐣ ᐅᑎᐢᑭᑐᒥᑲᐠ ᐁᑲᐧ ᑫᐃᐧᐣ ᔑᒪᑲᓂᐡ ᐯᔑᐠ ᐃᐣᑭᑐᑲᐠ, ᒥᐊᐱᐣ ᑲᐃᔑᐃᐱᓱᐊᐧᐨ ᑲᑭᐃᔑᐸᐣᑭᓯᐠ ᐱᒥᓭᐃᐧᐣ. ᐃᒪ ᑕᐡ ᐱᐳᓂᒥᑲᓇᐠ ᑭᔭᓂᐃᐱᓱᐊᐧᐠ, ᐅᑭᔭᓂᐊᐧᐸᒪᐊᐧᐣ ᑯᑕᑭᔭᐠ ᐊᐃᐧᔭᐠ ᐁᐃᐱᓱᐊᐧᐨ ᑲᑭᒪᑌᐃᔑᐸᐣᑭᓯᓂᐠ ᐱᒥᓭᐃᐧᓂ.
ᑭᓯᐠ ᑭᐃᓇᒋᒧ ᐊᑲᐊᐧᐨ ᐃᑯ ᐅᑭᑌᐸᐸᐣᑕᐣ ᐊᑲᒥᐠ ᐁᑭᐊᐱᒋ ᑭᒋᐱᐊᐧᓂ, ᔕᑯᐨ ᐅᑭᐊᐧᐸᐣᑕᐣ ᐁᒪᑲᑌᐊᐧᐸᑌᓂᐠ ᑲᑭᐃᔑᐸᐣᑭᓯᐠ ᐊᐱ ᑲᔭᓂᐅᑎᑕᒧᐊᐧᐨ.
“ᐊᐱ ᑲᔭᓂᑕᑯᐱᓱᔭᐠ, ᐣᑭᐊᐧᐸᒪᒥᐣ ᑌᐱᐟ ᑲᑦᐳ, ᐊᔕ ᐃᒪ ᐁᑭᐅᐣᒋᑕᑯᐸᓂᐦᐅᐨ.” ᑭᓯᐠ ᐃᓇᒋᒧ.
ᑭᐱᐢᑲᓀ ᐃᒪ ᐱᒥᓭᐃᐧᓂᐠ ᐁᑲᐧ ᒣᑲᐧᐨ ᐃᑯ ᑲᑦᐳ ᐅᑭᓴᑭᒋᐃᐧᑯᐱᓇᐣ ᐊᐃᐧᔭᐣ. ᑭᓯᐠ ᑭᑯᐸᐸᓂᐦᐅ ᐅᑎᐢᑭᑐᒥᐠ ᐁᑲ ᑲᓇᑫ ᒪᔑ ᐁᑭᐱᒋᓭᓂᐨ ᐁᐊᑕᐃᐧ ᐃᐧᒋᐦᐊᐨ ᑲᑦᐳᐊᐧᐣ.
“ᐊᔕ ᐃᐧᓂᑯ ᐅᑭ ᓴᑭᒋᐃᐧᑯᐱᓇᐣ ᐃᒪ ᐱᐣᒋᐱᒥᓭᐃᐧᓂᐠ, ᒣᑲᐧᐨ ᐃᒪ ᐊᔭᐸᐣ ᐱᐣᒋᐱᒥᓭᐃᐧᐣ ᒥᓇ ᐱᒥᐸᓂᒋᑲᓂᐠ,” ᑭᓯᐠ ᐃᑭᑐ. “ᒥᐁᐧᑎ ᑲᐃᐸᑐᔭᐣ ᐁᑭᐊᐣᑕᐃᐧ ᐃᐧᒋᐦᐊᐠ ᐁᑭᓂᑲᑌᑕᐸᓇᔭᐠ ᐱᒥᓭᐃᐧᓂᐠ.”
ᒥᑕᐡ ᐃᓂᐁᐧᓂᐊᐧᐣ ᑲᑭᐃᐧᑯᐱᓇᐊᐧᐨ ᐱᒥᓭᐃᐧᓂᓂᐊᐧᐣ ᐯᕑᐃᐳᐣ ᐊᐦᓴᐸᑎ, 41 ᑭᑕᓱᔭᑭᐃᐧᓀ, ᐁᐧᑎ ᓫᐊᐠᐸᐧᕑᐠ, ᒪᓂᑐᐸ ᑭᐅᒋ. ᓇᑫ ᑕᐡ ᐃᑯ ᐃᒪ ᑲᑭ ᑭᑫᓂᒪᑲᓄᐨ ᐁᑲ ᐁᐱᒪᑎᓯᐨ.
ᑲᑦᐳ ᑭᐃᑭᑐ ᐊᐃᐧᔭᐣ ᐃᒪ ᐁᐊᔭᓂᐨ ᑭᔭᐱᐨ ᐁᐱᒪᑎᓯ. ᑭᓯᐠ ᐅᑭᐊᐧᐸᒪᐣ ᑊᕑᐊᔭᐣ ᔑᐟ, 36 ᑕᓱᔭᑭᐃᐧᓀ, ᐃᐧᓂᐯᐠ ᐁᐅᒋᐨ, ᐁᐊᔭᐱᐨ ᒧᑕᑯᓇᐠ 10 ᓇᐣᑕ 15 ᑕᓱᒥᓯᐟ ᒥᑲᑌᐦᐃ ᑲᑭᐃᔑᐸᐣᑭᓯᐠ ᐱᒥᓭᐃᐧᐣ.
ᔑᐟ ᐅᐃᐧᒋᐊᐧᑲᓇᐣ ᐸᓂᒪ ᓇᑫ ᐅᑭᐃᓇᒋᒧᑕᐊᐧᐣ ᐅᑎᐸᒋᒧᐣ ᔑᐟ ᐅᑕᓇᐠ ᐃᓀᑫ ᐱᒥᓭᐃᐧᓂᐠ ᐃᔑᐊᐱᑯᐸᐣ ᐊᐱᐣ ᑲᐸᐣᑭᓯᓂᐠ. ᑭ ᑭᐡᑭᔑᑯᓀᐁᐧᐱᓯᐣ ᐊᐱᐣ ᑲᐸᐣᑭᓯᐠ, ᒥᑕᐡ ᐃᒪ ᔑᐟ ᑲᑭᐅᐣᒋ ᑲᐡᑭᑐᐨ ᒋᐅᒋᑭᑕᐣᑕᐁᐧᐨ. ᐁᒪᐧᔦ ᑯᑕᑭᔭᐠ ᐊᐃᐧᔭᐠ ᐱᑕᑯᐸᓂᐦᐅᐊᐧᐨ, ᐊᓇᑭ ᑲᑫᐧᐊᑕᐁᐧᔭᐸᐊᐧᒋᑲᑫ ᓂᐱᐃᐧᒧᑌᔭᐱᑯᓂ ᒥᓇ ᑯᓇᐣ ᐁᐊᔭᒋᐦᐊᐨ. ᐅᑕᓇᑭᔕᔕᑯᐊᐧᓇᐣ ᑲᔦ ᑭᔭᐱᐨ ᐱᐣᒋᐱᒥᓭᐃᐧᐣ ᑲᑭᑕᓀᓂᒪᐨ ᐁᑲᐧ ᑲᐃᐧᐣ ᐊᐃᐧᔭᐣ ᒋᐅᒋ ᓇᑫᐧᑕᑯᐨ.
ᐃᒪ ᐅᒋ ᐸᑭᑭᓂᑲᓂᐠ 1
ᐅᑭᐊᐧᐸᒪᐣ ᒧᑕᑯᓇᐠ ᔑᐟ ᐁᔭᐱᓂᐨ, ᓱᓴᐣ ᐅᑭᐊᔭᒥᐦᐊᐣ ᒥᑕᐡ ᑲᐃᔑᐊᐧᐸᒪᐨ ᐁᐸᑲᑫᓂᒧᓂᐨ ᒥᓇ ᓴᑲᒪᐨ ᐃᑯ ᐁᐃᔑᔭᐨ. ᓇᐸᓀ ᐅᐃᐧᐣᑲᐧᓂᐠ ᑭᒥᐣᑭᐃᐧ ᒥᓇ ᑭᒪᑭᓭ ᑲᐱᒧᓭᐨ. ᒪᐡᑭᑭᐃᐧᓂᓂᐊᐧᐠ ᓇᑫ ᐅᑭᐃᐧᐣᑕᒪᐊᐧᐊᐧᐣ ᔑᐟ ᐅᐃᐧᒋᐊᐧᑲᓇᐣ ᐁᑭᐱᑯᑲᓀᒐᐱᔑᐠ ᒥᓇ ᐅᐳᐣᑲᓂᐠ ᐁᑭᐸᓴᓀᓯᓂᐠ.
ᐊᐱ ᑕᐡ ᑲᑫᒋᓇᐁᐧᐣᑕᒧᐊᐧᐨ ᐅᐱᒥᓭᐣ ᐁᑲ ᐁᐱᒪᑎᓯᓂᐨ, ᑲᑦᐳ ᐅᑭᐃᐧᐣᑕᒪᐊᐧᐣ ᑭᓯᑯᐣ ᑭᔭᐱᐨ ᐊᐃᐧᔭᐠ ᐱᐣᒋᐱᒥᓭᐃᐧᐣ ᐁᐊᔭᐊᐧᐨ.
“ᔕᑯᐨ ᑲᐃᐧᐣ ᐊᐃᐧᔭ ᒋᐅᒋᐊᐧᑲᐃᐧᐨ,” ᐃᑭᑐ ᑭᓯᐠ.
ᐅᑕᓇᑭᑲᑫᐧ ᐊᑕᐁᐧᐦᐊᓇᐊᐧ ᓂᐦᓱᒥᓯᐟ ᐁᐊᐱᑕᑯᓀᓂᐠ ᑯᓇᐣ ᐁᔭᐸᒋᐦᐊᐊᐧᐨ, ᒧᒋᓂᐨ ᐁᑲᐧ ᐊᐱᐣ ᑕᑭᓯᒋᑲᓀᓯᓂ ᑲᑭᒥᑲᒧᐊᐧᐨ ᐁᐱᐃᐧᓯᓂᐠ. ᑭᓯᐠ ᐃᑭᑐ ᐁᑭᐁᐧᒪᒥᑲᐃᐧᐨ ᑕᐱᐡᑯᐨ ᐃᑯ ᐁᐱᑭᓴᐊᐧᐱᔑᐠ, ᔕᑯᐨ ᑫᑕᑕᐃᐧᐣ ᑯᑕᑭᔭᐠ ᐊᐃᐧᔭᐠ ᑭᐅᐣᒋ ᑕᑕᑯᐱᓇᐦᐅᐊᐧᐠ ᐁᑭᐃᐧᒋᐦᐃᑯᐨ ᐁᔭᑕᐁᐧᐦᐃᑫᐨ.
ᐁᑲᐧ ᐊᐧᐁᐧ ᔑᐟ ᐃᐧᐸᐨ ᒋᔭᓂᑲᑫᐧ ᐃᐧᒋᐦᐃᐨ ᒪᐡᑭᑭᐃᐧᑲᒥᑯᐠ. ᑭᓯᐠ ᒥᓇ ᑯᑕᑭᔭᐠ ᐅᑭᐳᓯᐦᐊᐊᐧᐣ ᑭᓯᐠ ᐅᑎᐢᑭᑐᒥᐠ ᐁᑲᐧ ᐊᐱᐣ ᐃᐧᐣ ᒥᓇ ᔑᒪᑲᓂᐡ ᐅᑭᐃᔑᑕᐸᓇᐊᐧᐣ ᒪᐡᑭᑭᐃᐧᑲᒥᑯᐠ. ᐱᓇᒪ ᑭᐱᐦᐅᐊᐧᐠ, ᐃᑭᐧᐁᓂᐊᐧᐠ ᒪᐡᑭᑭᐃᐧᓂᓂᐊᐧᐠ ᒥᓇ ᒪᐡᑭᑭᐃᐧ ᐊᓄᑭᓇᑲᓇᐠ ᑫᐃᐧᓇᐊᐧ ᑭᐅᐣᑕᒣᑎᐊᐧᐠ ᑲᑭᐃᔑᐸᐣᑭᓯᐠ ᐱᒥᓭᐃᐧᐣ.
ᐊᐱ ᒪᐡᑭᑭᐃᐧᓂᓂ ᑲᐱᑕᑯᔑᐠ ᒥᓇ ᔑᐟ ᑲᑭᐃᐡᑲᐧ ᒪᒣᒋᑲᐦᐃᐨ, ᑭᓯᐠ ᑭᑭᐁᐧᐱᓱ ᐁᑭᓇᒋᐃᐢᐯᑐᐁᐧᐨ ᒥᓇ ᐅᑕᐸᓇᑲᐧᐣ, ᒋᐱᑭᐁᐧᑕᐸᑌᓂᐠ ᐅᐱᒥᓭ ᐅᐃᐧᔭᐤ ᐃᒪ ᑕᔑᑫᐃᐧᓂᐠ, ᒥᐊᐱᐣ ᑲᐃᔑᒪᒋᐱᓱᐨ ᑲᑭᐃᔑᐸᐣᑭᓯᓂᐠ ᐱᒥᓭᐃᐧᓂ, ᐊᓂᔑᓂᓂᐊᐧᐠ ᑭᐊᔭᐊᐧᐠ ᐃᒪ ᐁᑲᑫᐧᐊᑕᐁᐧᐦᐃᑫᐊᐧᐨ. ᑭᓯᐠ ᐃᑭᑐ ᓇᐣᑕ ᐱᑯ ᒥᑕᓱ ᐊᐃᐧᔭᐠ ᐃᒪ ᑭᐊᔭᐊᐧᐠ ᐁᑲᐧ ᔐᒪᐠ ᐅᑭᒪᒪᓂᐱᓇᐊᐧᐣ ᐃᐢᐯᑕᐣ ᐁᑭᐊᐃᔑᐁᐧᐱᓇᐊᐧᐨ ᑯᓇᐣ ᐁᔭᑕᐁᐧᐦᐊᒧᐊᐧᐨ ᐱᒥᓭᐃᐧᓂ, ᐃᒪ ᑕᐡ ᐊᓇᒥᐠ ᑭᐅᐣᑕᑯᓀᓂ.
ᑲᐃᐧᐣ ᑕᐡ ᑲᓇᑫ ᓇᐣᑕ ᒋᐅᒋ ᐃᓇᐸᑕᓂᐠ ᐊᓇᑭᑲᑫᐧ ᐊᑕᐁᐧᐦᐃᑫᐊᐧᐨ.
“ᒥᐢᑕᐦᐃ ᑯᐣ ᐊᓇᐃᔑᐁᐧᐱᓇᔭᐠ,” ᑭᓯᐠ ᐃᑭᑐ. “ᓇᐊᐧᐨ ᐃᑯ ᑲᔦ ᐣᑕᓇᑭ ᒋᐸᐧᑯᓇᑭᔑᒪᒥᐣ, ᔕᑯᐨ ᑲᐃᐧᐣ ᒋᑭᐅᐣᒋ ᐊᑕᐁᐧᐠ, ᒥᐱᑯ ᑲᐃᔑᓂᐣᑭᓱᐨ ᑯᐣ. ᒥᑕᐡ ᐃᑯ ᑲᐃᔑᐱᒥ ᐱᐢᑲᓀᐠ.”
ᒥᐣᒋᓇᐁᐧᓯᐃᐧᐣ ᐅᓇᑭᐡᑲᓇᐊᐧ
ᐊᐱ ᑭᓯᐠ ᐅᑕᐁᐧᒪᐣ, ᐁᓫᐁᐣ, ᐁᑭᔐᐸᐊᐧᓂᐡᑲᓂᐨ ᐃᐁᐧ ᑲᑭᔐᐸᔭᓂᐠ, ᔐᒪᐠ ᐅᑭᐊᐧᐸᐣᑕᐣ ᐁᑭᒋᐱᐊᐧᓂᐠ. ᒪᐊᐧᐨ ᐃᑯ ᐅᑭᐅᒋ ᒪᒥᑐᓀᐣᑕᒥᐦᐃᑯᐣ, ᑭᐅᓇᑌᓂᐸᐣ ᐅᑎᐡᑯᓂᐠ ᒋᒪᒐᐊᐧᐨ ᐃᐁᐧ ᑲᑭᔑᑲᓂᐠ.
“ᐊᒥ ᑲᐃᓀᐣᑕᒪᐣ, ᑲᐃᐧᐣ ᐊᐃᐧᔭ ᑕᑭᒪᒐᓯᐣ ᐱᒥᓭᐃᐧᓂᐠ ᐅᐁᐧ ᑲᐃᔑᐁᐧᐸᐠ,” ᑭᐃᑭᑐ. ᐃᐧᐣ ᐃᒪ ᑕᔑᑫᐃᐧᓂᐠ ᐃᐡᑯᓄᑭᒪᐃᐧ, ᐁᑲᐧ ᑕᐡ ᐅᑭᑲᓄᓇᐣ ᑭᑭᓄᐦᐊᒪᑫᐃᐧ ᐊᓄᑭᓇᑲᓇᐣ ᒣᑲᐧᐨ ᐁᐱᐦᐅᓂᐨ ᐁᑲ ᒋᐸᑭᑎᓇᐨ ᑭᑭᓄᐦᐊᒪᐊᐧᑲᓇᐠ ᒋᐳᓯᐊᐧᐨ ᐱᒥᓭᐃᐧᓂᐠ.
ᒥᑕᐡ ᑲᑭᐊᐣᑕᐃᐧᔑ ᒪᑕᓄᑭᐨ ᐁᑲᐧ ᐃᒪ ᐅᑕᓄᑭᐃᐧᓂᑲᒥᑯᐠ ᐊᔭᐸᐣ ᐊᐱ ᐯᔓᐠ ᐅᑭᑭᓄᐦᐊᒪᑫ, ᔕᓇᐟ ᕑᐁ, ᐁᑭᐱᑲᓄᓇᐨ ᐁᐱᐃᐧᐣᑕᒪᐊᐧᐨ ᐁᑭᐸᐣᑭᓯᐠ ᐱᒥᓭᐃᐧᐣ.
“ᕑᐁ ᐅᑕᓂᓴᐣ ᑭᐱᐳᓯᓂᑯᐸᐣ ᐃᒪ ᐱᒥᓭᐃᐧᓂᐠ,” ᐃᑭᑐ ᐃᓫᐁᐣ. “ᐣᑭᓇᑐᒪ ᒋᐱᔕᐨ ᑲᑕᓇᓄᑭᔭᐣ ᒥᓇ ᐁᑲᑫᐧ ᒪᒪᐡᑲᐁᐧᐣᑕᒪᐣ ᐯᑭᐡ ᐁᒪᒥᐣᒋᒥᓇᐠ ᒥᓇ ᐁᐊᔭᒥᒋᑫᑕᒪᐊᐧᐠ.”
ᕑᐁ ᐅᑕᓂᓴᐣ ᑭᐃᔑᓂᑲᓱᐊᐧᐣ ᒪᕑᑕ ᑲᑦᐳ, 38 ᑭᑕᓱᔭᑭᐃᐧᓀ ᐁᐧᑎ ᐃᐧᓂᐯᐠ ᑭᐃᔑᑲᐯᔑ. ᐊᒋᓇ ᐱᔕᑯᐸᐣ ᐁᐱᐃᐧᑕᓄᑭᒪᐨ ᐅᒪᒪᒪᐣ ᐁᑲᐧ ᒥᓇ ᐅᑕᔑᑫᐃᐧᓂᐠ ᑭᐱᑕᓇᓄᑭᑕᒪᑫ ᐊᐊᐧᔑᒣ ᓂᔑᑕᐃᐧᓂᔭᑭ.
ᐊᐱ ᑲᐃᐡᑲᐧ ᑲᑭᒋᐦᐊᐨ ᔕᓇᑐᐣ ᐁᑲᐧ ᐊᐱᐣ ᐅᑭᔭᓂ ᑭᐁᐧᐃᐧᓇᐣ, ᒥᐊᐱᐣ ᐃᓫᐁᐣ ᑲᐃᔑᐃᔕᐨ ᑲᑭᐃᔑᐸᐣᑭᓯᓂᐠ ᐱᒥᓭᐃᐧᓂ.
ᐊᐱ ᐁᐧᑎ ᑲᔭᓂᑕᑯᔑᐠ, ᑭᐳᓂᒋᑫᐊᐧᐠ ᒋᐊᑕᐁᐧᐦᐃᑫᐊᐧᐨ. ᑲᐃᐧᐣ ᑕᐡ ᒋᑭᐅᒋ ᑲᐡᑭᑐᐊᐧᐨ ᒋᐃᐧᑯᐱᓇᐊᐧᐨ ᑭᔭᐱᐨ ᓂᐦᓯᐣ ᒥᔭᐊᐧᐣ ᐱᐣᒋᐱᒥᓭᐃᐧᓂᐠ.
ᓂᐃᐧᐣ ᑭᔭᐱᒋᔑᓄᐠ ᑲᑭᐸᐣᑭᓯᐠ ᐱᒥᓭᐃᐧᐣ
ᐅᑭᒪᐠ ᐅᑭᐸᑭᑎᓇᓇᐊᐧ ᑲᐃᔑᓂᑲᓱᐊᐧᐨ ᑲᑭᐊᐱᒋᔑᓄᐊᐧᐨ ᒣᑲᐧᐨ ᒉᐣᐁᐧᕑᐃ ᐱᓯᑦ 12. ᐅᑯᐁᐧᓂᐊᐧᐠ ᑕᑯ ᐊᐦᐸᓴᐸᑎ ᒥᓇ ᑲᑦᐳ, ᑲᐧᓫᐁᐟ ᐊᔾᓯᐣᑯᕑ, 39 ᑭᑕᓱᔭᑭᐃᐧᓀ ᐁᐧᑎ ᓴᑭᐣᐠ ᐃᐡᑯᓂᑲᓂᐠ ᒪᓂᑐᐸ ᑭᐅᒋ, ᐁᑲᐧ ᒥᓇ ᐯᐣ ᐸᐣ ᐦᐅᐠ, 62 ᑭᑕᓱᔭᑭᐃᐧᓀ ᑲᕑᒥᐣ, ᒪᓂᑐᐸ ᑭᐅᒋ, ᒥᐅᑯ ᑲᑭᐊᐱᒋᔑᓄᐊᐧᐨ. ᔑᐟ ᐊᓂᐱᒥ ᒥᓄᔭᐊᐧ ᐃᒪ ᐃᐧᓂᐯᐠ ᐊᑯᓯᐃᐧᑲᒥᑯᐠ.
ᐊᔑᐠ, ᐊᔾᓯᐣᑯᕑ ᒥᓇ ᐸᐣ ᐦᐅᐠ ᑭᐊᓄᑭᐊᐧᐠ ᐊᓂᔑᓂᓂᐃᐧ ᐱᒧᒋᑫᐃᐧᓂᐠ (ASI), ᐃᐧᓂᐯᐠ ᐃᔑᑕᑲᐧᐣ ᐃᐁᐧ ᐱᒧᒋᑫᐃᐧᐣ ᔓᓂᔭᐃᐧ ᐊᓄᑭᑕᒪᑫᐃᐧᐣ ᑲᐅᒋ ᐱᒧᒋᑫᑕᒪᐃᐧᑕᐧ ᐊᓂᔑᓂᓂᐊᐧᐠ. ᐃᑭᐁᐧᓂᐊᐧᐠ ᓂᔑᐣ ᑭᐅᓇᒋᑫᐊᐧᑯᐸᐣ ᐯᔑᑯᑯᐣ ᐁᑕ ᐃᒪ ᒋᐊᔭᐊᐧᐨ ᐁᑲᐧ ᐊᐱᐣ ᒋᑭᐁᐧᐊᐧᐨ ᐅᓇᑯᔑᓂᐠ ᐁᑲᐧ ᑯᑕᑭᔭᐠ ᐊᑎᑯᓴᑲᐃᑲᓂᐠ ᒋᔭᓂᔕᐊᐧᐨ.
ᒣᒣᑫᐧᔑᐃᐧᓴᑲᐦᐃᑲᓂ ᐅᑭᒪᑲᐣ ᕑᐃᑕ ᑕᐧᑦᓴᐣ ᐃᑭᑐ ᒪᐊᐧᐨ ᐃᑯ ᑭᒋᑯᐡᑫᐧᐣᑕᒧᐃᐧᐣ ᐅᓇᑭᐡᑲᓇᐊᐧ ᑲᑭ ᐊᐱᒋᔑᓄᐊᐧᐨ.
“ᑲᐃᐧᓂᐣ ᒋᐅᒋ ᐱᐃᐧᑌᐃᐧᐊᐧᐨ. ᒥᔑᓄᔭᑭ ᓂᑭᐱᐃᐧᑕᓄᑭᒥᑯᒥᐣ,” ᑕᐧᑦᓴᐣ ᐃᑭᑐ. “ᑫᑲᐟ ᐃᑯ ᓂᐊᐧᑯᒪᑲᓂᓇᐣ ᓂᑭᐃᓀᓂᒪᒥᐣ.”
ᐃᓫᐁᐣ ᑭᓯᐠ ᐃᑭᑐ ᐅᐱᒥ ᓄᒋᐦᐃᑯᐣ ᑲᑭᐊᐧᓂᐦᐊᐨ ᐊᔾᓯᐣᑯᕑ, ᒪᐊᐧᐨ ᐁᑭᔭᓂ ᒥᓄᐃᐧᒋᐃᐧᑎᐊᐧᐸᐣ.
ᑭᓯᐠ ᑫᐃᐧᐣ ᑭᔭᐱᐨ ᐅᐊᐧᐃᐧᐣᑕᒪᐊᐧᐣ ᐅᐃᐧᒋᐊᐧᑲᓇᐣ ᐊᓂᐣ ᑲᑭᐊᐃᓇᐱᔑᐠ ᐃᐁᐧ ᑲᑭᔑᑲᓂᐠ. ᑫᐃᐧᐣ ᑲᐸᐱᒪᑎᓯᐨ, ᑲᐃᐧᐣ ᐃᐧᑲ ᐅᑐᐣᒋᐃᓀᑕᓯᐣ ᐅᐁᐧ ᒋᐃᔑᓇᑭᐡᑲᐠ.
“ᑲᐃᐧᐣ ᓂᑭᐅᒋ ᐃᓀᑕᓯᐣ ᒋᑲᐡᑭᑐᔭᐣ ᐅᐁᐧ ᑲᑭᑐᑕᒪᐣ ᐃᐁᐧ ᑲᑭᔑᑲᐠ,” ᑭᐃᑭᑐ. “ᑲᐃᐧᐣ ᑲᔦ ᒋᑭᑫᐣᑕᒪᐣ ᐊᓂᐣ ᑲᐃᔑ ᒪᒥᑐᓀᑕᒪᐣ ᐃᐁᐧ ᐊᐱ, ᓂᑭᑐᑕᐣ ᐃᑯ.”
ᐊᓂᔑᓂᓂᐃᐧ ᓂᑲᓂᑕᒪᑫᐠ ᐅᑭᐱᐸᑭᑎᓇᓇᐊᐧ ᐅᐊᐧᒋᔦᒥᐁᐧᐃᐧᓂᐊᐧ ᐃᒪ ᑕᔑᑫᐃᐧᓂᐠ ᒥᓇ ᐊᐧᑯᒪᑲᓇᐠ ᑲᑭᐊᐱᒋᔑᓂᐨ.
ᐊᓂᔑᓇᐯ ᐊᐢᑭ ᑭᒋᐅᑭᒪᑲᐣ ᐢᑕᐣ ᐯᕑᑎ ᑭᐃᑭᑐ: “ᓂᒪᒥᑐᓀᓂᒪᒥᐣ ᒥᓇ ᓂᑕᔭᒥᒋᑫᑕᒪᐊᐧᒥᐣ ᐅᐱᒥᓭ, ᑲᑭᐳᓯᐊᐧᐨ ᒥᓇ ᑲᑭᓇ ᒣᒣᑫᐧᔑᐃᐧᓴᑲᐦᐃᑲᓂᐠ ᑲᐅᒋᐊᐧᐨ ᑲᓇᑭᐡᑲᒧᐊᐧᐨ ᑯᐡᑫᐧᐣᑕᒧᐃᐧᐣ ᒥᓇ ᑭᒋᐊᓂᒣᐣᑕᒧᐃᐧᐣ.”
ᐁᑲᐧ ᒥᓇ ᑲᓇᑕ ᑭᒋᐅᑭᒪᑲᐣ ᔕᐧᐣ ᐁᐃᔓᐟ ᐊᐟᓫᐃᐅ ᑫᐃᐧᐣ ᐅᑭᐱᒋᓂᔕᐦᐊᐣ ᐅᒪᓯᓇᐦᐃᑲᐣ.
“ᓂᒪᒥᑐᓀᓂᒪᒥᐣ ᒥᓇ ᓂᑕᔭᒥᒋᑫᑕᒪᐊᐧᒥᐣ ᐅᓂᑲᓂᑕᒪᑫᐠ ᒥᓇ ᑲᑎᐯᐣᑕᑯᓯᐊᐧᐨ ᒣᒣᑫᐧᔑᐃᐧᓴᑲᐦᐃᑲᓂᐠ, ᐁᑲᐧ ᒥᓇ ᓂᒋ ᐊᓂᔑᓂᓂᒪᐠ ᒥᓯᐁᐧ ᒋᕑᐃᑎ 9 ᒥᓇ ᒋᕑᐃᑎ 5 ᑲᑐᑭᓂᑯᐊᐧᐨ ᐅᐁᐧᓂ ᐊᓂᒣᐣᑕᒧᐃᐧᓂ,” ᐃᑭᑐ ᐊᐟᓫᐃᐅ.
ᐱᒥᓇᓇᑲᒋᒋᑲᑌ ᑫᑯᓀᐣ ᑲᑭᐅᐣᒋᐸᐣᑭᓯᐠ
ᐱᒥᓭᐃᐧᑭᒪᐠ ᑭᔭᐱᐨ ᐅᓇᓇᑕᐃᐧᑭᑫᑕᓇᐊᐧ ᑫᑯᓀᐣ ᒪᔭᑦ ᑲᑭᐅᐣᒋᐸᑭᓯᐠ ᐃᐁᐧ ᐱᒥᓭᐃᐧᐣ. ᐃᑭᐁᐧᓂᐊᐧᐠ ᐊᓂᔑᓇᐯ ᐊᐢᑭ ᔑᒪᑲᓂᔕᐠ ᒥᓇ ᐅᐣᑌᕑᐃᔪ ᐅᑭᒪᐅᐣ ᔑᒪᑲᓂᔕᐠ ᑭᑲᓇᐁᐧᐣᒋᑫᐊᐧᐠ ᑲᑭᐃᔑᐸᐣᑭᓯᐠ ᐸᓂᒪ ᐅᓇᓇᑕᐃᐧ ᑭᑫᐣᒋᑫᐠ ᑲᑕᑯᔑᓄᐊᐧᐨ (TSB) ᒥᓇᐊᐧ ᑲᔭᓂᐊᐧᐸᓂᐠ.
ᐊᐧᐁᐧ ᑲᓂᑲᓂᐡᑲᐠ ᓇᓇᑲᒋᒋᑫᐃᐧᐣ ᐱᑐᕑ ᐦᐃᓫᑎᑊᕑᐊᐣᐟ ᐃᑭᑐ ᒪᐊᐧᐨ ᐃᑯ ᑕᔭᓂᒪᐣ ᒪᔭᑦ ᒋᑭ ᑭᑫᒋᑲᑌᐠ ᑫᑯᓀᐣ ᑲᑭᐅᒋᐸᐣᑭᓯᐠ, ᐊᓂᐡ ᐁᑲ ᐁᐅᒋᐊᔭᐠ ᐃᐁᐧ ᐱᐣᑎᑫᐁᐧᓯᒋᑲᐣ ᒥᓇ ᐃᒪ ᑕᔑᑫᐃᐧᓂᐠ ᑲᐃᐧᐣ ᐊᔭᓯᐣ ᒥᑎᑯᑲᐣ ᑲᐅᒋ ᑭᑭᓄᔑᓄᒪᑲᑭᐣ ᐱᒥᓭᐃᐧᓇᐣ. ᐁᑲᐧ ᐊᐱ ᐱᒥᓭᐃᐧᐣ ᐃᐧᓂᐯᐠ ᑲᐅᒋᒪᒐᒪᑲᐠ, ᑲᐃᐧᐣ ᐃᐧᑲ ᐯᔑᑲᐧ ᒋᑭᐅᒋᐃᔑᑭᑐᐨ ᐱᒥᓭᐃᐧᑲᒥᑯᐠ.
ᑭᐢᑐᐣ ᐱᒥᓭᐃᐧᐣ ᐃᑭᑐ ᐊᐧᐁᐧ ᑲᑭᐊᐱᒋᔑᐠ ᐱᒥᓭᐃᐧᓂᓂ ᐊᐦᓴᐸᑎ ᒥᓂᑯᐠ ᐊᔕ 2,400 ᑎᐸᐦᐃᑲᐣ ᑭᐅᐣᒋᐱᒥᓭ, ᒪᒪᐤ ᑕᐡ 150 ᑎᐸᐦᐃᑲᐣ ᑭᐱᒥᓭᐊᐧᑫ ᐃᐁᐧᓂ ᐱᒥᓭᐃᐧᓂ ᑲᑭᐃᔑᐸᐣᑭᔑᐠ.
ᐁᑲᐧ ᒣᑲᐧᐨ ᑲᓀᑎᔭᐣ ᑲᐅᒋ ᐊᓄᑲᑌᐠ ᐱᒥᓭᐃᐧ ᐱᒧᒋᑫᐃᐧᐣ ᐊᓄᑲᑌ ᐁᒪᒥᓇᐧᒋᑲᑌᑭᐣ ᑫᐃᔑᓇᑲᐧᐠ ᐱᒥᓂᔕᐦᐃᑫᐃᐧᐣ ᐃᓂᐁᐧᓂᐊᐧᐣ ᑐᑲᐣ ᐱᒥᓭᐃᐧᓇᐣ ᓂᑯᑕᐧᓱ ᓇᐣᑕ ᐊᐊᐧᔑᒣ ᑲᐳᓯᐊᐧᐨ ᒋᐊᑯᑲᒋᑲᑌᑭᐣ ᑫᐅᒋ ᑭᑫᐣᑕᑲᐧᐠ ᑭᐡᐱᐣ ᓇᐣᑕ ᐅᐣᒋᒪᒋᓭᐠ ᒥᓇ ᒋᒥᓇᐧᔑᒋᑲᑌᐠ ᒋᐸᔭᑌᔭᓄᑭᒪᑲᑭᐣ ᑫᐅᒋ ᑭᑭᓄᔑᒥᑯᐊᐧᐨ ᐅᐱᒥᓭᐠ ᐁᑲ ᐁᐧᓴ ᒋᒥᔕᑭᐦᐊᒧᐊᐧᐨ.
ᐁᑲᐧ ᒥᓇ ᑭᐃᑭᑐᐊᐧᐠ ᐅᐡᑭ ᐅᓇᑯᓂᑲᓇᐣ ᒋᔭᓂ ᐸᑭᑎᓂᑲᑌᑭᐣ ᐁᐧᓴ ᒣᑲᐧᐨ 1977 ᐊᑯᓇᐠ 2009, ᑲᑭᐱᒥᔭᐸᑕᑭᐣ, 35 ᐱᒥᓭᐃᐧᓇᐣ ᑭᒋᑕᑭᑯᑌᐊᐧᐣ ᒣᑲᐧᐨ ᐁᐱᒥᓭᐊᐧᐨ ᐅᐱᒥᓭᐠ, ᐁᑲᐧ 100 ᑭᐅᐣᒋ ᐊᐱᒋᔑᓄᐠ ᐊᐃᐧᔭᐠ ᒥᓇ 46 ᑭᐅᐣᒋ ᐃᐧᓴᑭᔑᓄᐠ.
ᒣᒣᑫᐧᔑᐃᐧᓴᑲᐦᐃᑲᓂᐠ ᑲᑭᐸᐣᑭᓯᐠ ᐱᒥᓭᐃᐧᐣ ᒥᐦᐅᐁᐧ ᒪᐊᐧᐨ ᒥᔑᐣ ᑲᑭᐅᒋ ᐊᐱᒋᔑᓄᐊᐧᐨ ᐊᐃᐧᔭᐠ ᐁᐧᑎ ᑭᐁᐧᑎᓄᐠ ᓀᑲᐱᐦᐊᓄᐠ ᐅᐣᑌᕑᐃᔪ ᐊᑯᓇᐠ 2003 ᑲᔭᑭᐊᐧᐠ, ᐊᐱ ᐊᐧᓭᔭ ᐱᒥᓭᐃᐧᐣ ᐅᐱᒥᓭ ᒥᓇ ᓂᐦᓴᐧᓯ ᐊᐃᐧᔭᐠ ᐁᐧᑎ ᓂᐱᓇᒥᐠ ᑲᐅᒋᐊᐧᐨ, ᐊᔑᐨ ᐅᓇᔓᐁᐧᐃᐧᓂᓂ, ᑲᑭᐊᐱᒋᔑᓄᐊᐧᐸᐣ ᐃᒪ ᓭᐢᓇ ᑫᕑᐊᐸᐣ C208 ᑲᑭᐸᐣᑭᓯᑭᐸᐣ ᒥᑕᓱᑎᐸᐦᐊᑲᐣ ᑭᐁᐧᑎᓄᐠ ᐊᐧᐸᓄᐠ ᐃᓀᑫ ᓂᑲᑌ ᑕᔑᑫᐃᐧᓂᐠ.