ᒪᑕᐊᐧ ᐅᑭᒪᑲᓇᐠ ᐅᑭᐳᓂᑐᓇᐊᐧ ᑲᐃᐧᑎᐸᑯᓇᐊᐧᐸᐣ ᐱᐅᐧᐱᑯᑫᐃᐧᑭᒪᐣ ᒥᐡᑲᐧᐨ ᒋᑕᔑᐣᒋᑫᐊᐧᐨ

ᒪᑕᐊᐧ ᑕᓇᐱᐃᐧᓇᐣ ᐅᑭᐳᓂᑐᓇᐊᐧ ᑲᐃᐧᑎᐸᓂᑫᐊᐧᐸᐣ ᐁᑲᐧ ᒥᐡᑲᐧᐨ ᐅᑲᑐᑕᓇᐊᐧ ᒋᐱᒥ ᑕᔑᐣᑕᒪᑐᐊᐧᐨ ᐊᓂᐣ ᑫᑭᐃᔑ ᐃᐧᑕᓄᑭᒥᑐᐊᐧᐸᐣ ᐱᐊᐧᐱᑯᑲᓂ ᐊᓄᑭᐃᐧ ᐃᔑᒋᑫᐃᐧᓇᐣ.
ᒪᑕᐊᐧ ᑕᓇᐱᐃᐧᓇᐣ ᐅᑭᐸᑭᑎᓇᓇᐊᐧ ᐅᑎᐸᒋᒧᐃᐧᓂᐊᐧ ᓄᑯᑦ ᑲᐱᒥᑯᓇᑲᓂᐠ ᐱᒥᑕᔑᐣᑕᒪᑐᐃᐧᓂᐠ ᐅᑲᐃᔑᑯᒋᑐᓇᐊᐧ ᒋᐅᒋ ᐊᐧᐃᐧᒋᐦᐃᑯᐊᐧᐨ ᑲᑭᐅᑕᐱᓇᑲᓄᐸᐣ ᒋᐅᒋ ᓂᑲᓂᐡᑲᒪᑫᐨ ᐃᒪ ᐃᓀᑫ ᑕᔑᑫᐣᒋᑫᐃᐧᓂᐠ ᑲᐊᓂᐱᒥ ᐅᓇᐸᒋᑲᑌᑭᐣ ᑫᓂᔑᒋᐅᑕᐱᓂᑲᑌᐠ ᐃᐧᑕᓄᑭᒥᑐᐃᐧᐣ ᒋᑭᐁᐧ ᑲᓇᐊᐧᐸᒋᑲᑌᐠ ᑭᓫᐃᑊᐢ ᑯᕑᐅᑦ ᐊᓯᐣ ᐊᐦᑭᐃᐧ ᓇᓇᑲᒋᒋᑫᐃᐧᐣ ᐃᒪ ᑲᑭᐃᔑ ᐅᓇᐸᒋᑲᑌᐠ ᒋᑕᔑ ᐱᐊᐧᐱᑯᑲᑌᐠ ᐊᐦᑭᐠ.
ᑲᐃᐧᐣ ᐃᐧᑲ ᓂᑭᐅᐣᒋᓀᑕᓯᒥᓇᐸᐣ ᑭᒋᑎᐸᑯᓂᑫᐃᐧᑭᒪ ᐃᐧᐣ ᒋᔭᓂᐅᓀᐣᑕᒪᑯᔭᐣᐠ ᐊᓂᐣ ᑫᓂᔑᓇᑲᐧᐠ ᓂᓂᑲᓂᒥᓇᐣ,
ᐃᑭᑐ ᐅᑭᒪᑲᐣ ᓴᐣᓂ ᑲᐣᔭᐣ ᐁᕑᐅᓫᐊᐣᐟ ᐃᐡᑯᓂᑲᓂᐠ.
ᒥᔑᓇᐧ ᓂᑭᐱᐃᐧᐣᑕᒥᐣ, ᓂᓇᐃᐧᐟ ᐃᑯ ᓂᐃᐧ ᓇᓇᑐᓇᒪᓱᒥᐣ ᐊᓂᐣ ᑫᐃᔑᓇᐦᐃᓭᐊᐧᑫᐣᑕᒪᐠ ᒋᐃᐧᒋᐦᐃᑯᔭᐠ, ᒋᒪᒪᐃᐧ ᐅᓀᐣᒋᑲᑌᑭᐣ ᑫᑯᓇᐣ ᒋᑕᔑᐣᑕᒪᑎᓇᓂᐊᐧᐠ. ᐊᑎᑲ ᓂᑕᑦ ᐊᐱ ᑲᑭᐃᓀᐣᑕᒪᑭᐸᐣ ᑎᐸᑯᓂᑫᐃᐧᐣ ᒋᐊᐸᒋᑐᔭᐣᐠ ᑲᐃᐧᐣ ᒋᑭᐅᐣᒋᑕᑲᐧᑭᐸᐣ ᑕᔑᐣᑕᒪᑫᐃᐧᓇᐣ ᒥᑕᐡ ᑲᐃᔑᓇᑲᐧᐠ ᑕᐱᐡᑯᐨ ᐃᑯ ᐁᑭᒧᒋ ᑲᑫᐧᔕᑯᒋᐡᑲᑯᔭᐣᐠ. ᐊᔕ ᑕᐡ ᐊᔭᒪᑲᐣ ᐱᒥᓂᔕᐦᐃᑫᐃᐧᐣ ᑫᓂᔑᐱᒥ ᓇᓇᑭᐡᑲᐊᐧᑲᓄᐨ ᐅᐣᑌᕑᐃᔪ ᑭᒋᐅᑭᒪ ᐁᑲᐧ ᐃᐁᐧ ᑕᑲᓇᐊᐧᐸᒋᑲᑌ ᐊᐦᑭᐃᐧ ᓇᓇᑲᒋᒋᑫᐃᐧᐣ ᐁᑲ ᒪᔭᑦ ᑲᑲᐧᔭᑫᐧᐣᑕᑲᐧᐠ ᑲᐃᐧᑐᒋᑲᑌᐠ ᐁᑲᐧ ᒥᓇ ᑯᑕᑭᔭᐣ ᑫᑯᓇᐣ ᐁᑲ ᑲᓇᐦᐃᓭᐊᐧᑫᐣᑕᑲᐧᑭᐣ ᐃᓯᓭᐃᐧᓇᐣ.
ᐊᑯᑭ ᑕᓇᐱᐃᐧᓂᐠ ᐅᑭᒪᑲᐣ ᐃᓫᐊᔾ ᒧᓂᔭᐢ ᓄᑯᒥᑫ ᑭᑎᐸᒋᒧ ᑫᐃᐧᓇᐊᐧ ᒋᐳᓂᑐᐊᐧᐨ ᑲᐃᐧᑎᐸᑯᓂᑫᐊᐧᐸᐣ ᐁᑭᐃᑭᑐᐨ ᐁᐃᐧᒋᑲᐸᐃᐧᑕᒧᐊᐧᐨ ᒋᑭᑐᒋᑲᑌᑭᐸᐣ ᒥᑐᓂ ᐱᑯ ᑲᐧᔭᐠ ᒋᐃᓇᓄᑲᑌᐠ ᒥᓯᐁᐧ ᐱᑲᐧᑕᑭᐠ ᒋᓇᓇᑲᒋᒋᑲᑌᐠ ᑫᑭᐅᐣᒋ ᑲᓇᐁᐧᐣᒋᑲᑌᓂᐠ ᐊᓂᔑᓂᓂᐊᐧᐠ ᐅᑕᑭᒥᐊᐧ ᒥᓇ ᐱᑯ ᑌᑎᐸᐦᐃ ᐱᑲᐧᑕᑲᒥᐠ ᑲᐊᐃᔑᓇᑲᐧᐠ ᐁᑲ ᒋᓂᔑᐊᐧᓇᒋᒋᑲᑌᐠ.
ᐣᑕᓂᔑᓂᓂᒪᐠ ᐅᒪ ᑲᑕᓇᐱᔭᐠ ᐅᑭᒋᓀᑕᓇᐊᐧ ᒋᓂᑲᓂᐡᑲᒧᐊᐧᐨ ᐅᐁᐧᓂ ᐊᐦᑭᐃᐧ ᓇᓇᑲᒋᒋᑫᐃᐧᓂ ᑫᒋᓇᐨ ᐱᐊᐧᐱᑯᑫᐃᐧᑭᒪᐠ ᒋᑭᐅᐣᒋ ᐱᒥᓂᔕᐦᐊᒧᐊᐧᐨ ᐅᑎᓇᓄᑭᐃᐧᓂᐊᐧ ᑫᑭᐊᓄᒋᓇᑯᑕᒪᑫᐊᐧᐨ ᐁᐧᑎ ᐊᓂᐊᓂᑫ ᐱᒪᑎᓯᐊᐧᐨ ᐅᒪ ᐊᑯᑭᐠ ᒋᔭᓂᑭᒋᓀᑕᒧᐊᐧᐨ, ᑭᐃᑭᑐ ᐅᑭᒪᑲᐣ ᐃᓫᐊᔾ ᒧᓂᔭᐢ.
ᐅᐁᐧ ᑲᑭᓂᐱᐠ ᑭᔭᓂ ᒪᒋᒋᑲᑌ ᑲᑭᔭᓂ ᓇᓇᑭᐡᑲᐊᐧᑲᓄᐨ ᐅᐣᑌᕑᐃᔪ ᑭᒋᐅᑭᒪ ᐁᑲᐧ ᐊᐧᐁᐧ ᐸᐧᑊ ᕑᐁ ᑲᐱᒥ ᓂᑲᓂᐡᑲᒪᑫᐨ ᐃᒪ ᒪᑕᐊᐧ ᐃᐡᑯᓂᑲᓇᐣ ᐁᑲᐧ ᐊᐧᐁᐧ ᑊᕑᐊᐣᐠ ᐃᑲᐳᒋ ᑲᑲᓄᑕᒪᐊᐧᐨ ᐅᐣᑌᕑᐃᔪ ᑭᒋᐅᑭᒪᐣ.
ᑭᓫᐃᑊᐢ ᑭᒋᐊᓯᓂᑫᐃᐧᑭᒪ ᑫᐃᐧᐣ ᑎᐸᐣ ᐅᑭᐸᑭᑎᓇᐣ ᐅᑎᐸᒋᒧᐃᐧᐣ ᐁᑭᐃᐧᐣᑕᐣᐠ ᐁᓇᑕᐁᐧᐣᑕᐠ ᑭᔭᐱᐨ ᐁᐃᐧᐱᒥ ᐃᐧᑕᓄᑭᒪᐨ ᐊᓂᔑᓂᓂᐊᐧᐣ ᒥᓇ ᒋᑭᒥᓄᓭᑭᐸᐣ ᐱᒥᑕᔑᐣᑕᒪᑐᐃᐧᐣ ᐅᓄᐁᐧᓂᐊᐧᐣ ᐃᐡᑯᓂᑲᓇᐣ ᑲᐸᐸᒥᓯᒪᑲᑭᐣ ᐃᒪ ᐊᓂᒧᒋᑫᐃᐧᓂᐠ.