ᐱᑕᒪᑲᓂᐊᐧᐣ ᐸᑯᓭᓂᒧᐃᐧᐣ ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ

ᓂᐦᓱᔕᑊ ᐅᒪᒥᓄᒥᐁᐧᐊᓄᑭᐠ ᒥᓇ ᑕᔑᑫᐃᐧᓂᐠ ᑲᑕᓇᓄᑭᑕᒪᑫᐊᐧᐨ ᐅᑭᑭᔑᑐᓇᐊᐧ ᐅᑎᐡᑯᓄᐦᐃᑯᐃᐧᓂᐊᐧ ᑲᑭᐅᑕᐱᓇᒧᐊᐧᐸᐣ ᐃᐡᑯᓄᐃᐧᐣ ᑲᑎᐯᓂᒥᐁᐧᒪᑲᐠ ᒪᐡᑭᑭᑫᐃᐧᐣ ᒥᓇ ᒥᓂᑫᐧᐃᐧᐣ ᑫᑭᐅᐣᒋ ᐃᐧᒋᐦᐃᑯᐊᐧᐨ ᑫᐃᔑᐱᒧᑐᐊᐧᐨ ᐅᑕᓄᑭᐃᐧᓂᐊᐧ ᐅᑕᔑᑫᐃᐧᓂᐊᐧᐠ ᐃᑭᐁᐧᓂᐊᐧᐠ ᐊᓂᔑᓂᓂᐊᐧᐠ ᑭᐁᐧᑎᓄᐠ ᐅᑭᒪᑲᓇᐠ ᑲᐅᐣᒋ ᑎᐯᐣᑕᑲᐧᑭᐣ ᐃᐡᑯᓂᑲᓇᐣ.
ᑲᑭ ᑭᔑᑐᐊᐧᐨ ᐅᑎᐡᑯᓄᐃᐧᓂᐊᐧ ᑭᐅᐣᒋᒥᓇᑲᓄᐊᐧᐠ ᒪᓯᓇᐦᐃᑲᓂ ᑲᓀᑎᔭᐣ ᑲᐧᐣᓱᓫ ᑲᐅᐣᒋᐸᑭᑎᓂᑲᑌᑭᐣ ᑲᑭᔑᒋᑲᑌᑭᐣ ᐃᐡᑯᓄᐦᐃᑯᐃᐧᓇᐣ ᒣᑲᐧᐨ ᑲᑭᒪᒪᐃᐧᐡᑲᐦᐃᑕᐧ ᐃᐧᓂᐯᐠ ᒍᓫᐊᔾ ᐱᓯᑦ 6 ᑲᐃᓇᑭᓱᐨ. ᐅᑯᐁᐧᓂᐊᐧᐠ ᐊᓂᔑᓂᓂᐊᐧᐠ ᑭᐅᐣᒋᐊᐧᐠ ᑭᐁᐧᐃᐧᐣ, ᐊᑎᑯᓴᑲᐦᐃᑲᓂᐠ, ᐊᐧᐸᓴᑎᑲᐣᐠ, ᒣᒣᑫᐧᔑᐃᐧᓴᑲᐦᐃᑲᓂᐠ, ᒥᐦᔑᓴᑲᐦᐃᑲᓂᐠ ᒥᓇ ᐊᐧᔕᐦᐅᐠ ᑲᑭᑭᔑᑐᐊᐧᐨ ᐊᐃᓇᓀᐅᐱᒥᑯᓇᑲ ᑲᑭᐱᒥ ᐃᐡᑯᓄᐦᐃᑕᐧ.
ᐁᑲᐧ ᐅᐁᐧ ᐃᐡᑯᓄᐃᐧᐣ ᑭᑕᔑ ᐃᐡᑯᓄᐦᐊᐊᐧᐠ ᐁᐧᑎ ᑭᐁᐧᐃᐧᐣ ᒥᓇ ᒥᐢᑯᓴᑲᐦᐃᑲᓂᐠ ᐁᑲᐧ ᒥᓇ ᐃᒪ ᒪᒪᐣᑕᐃᐧᐱᐊᐧᐱᑯᐠ ᒣᑲᐧᐨ ᑲᑭᐊᔭᐊᐧᐨ ᐅᑕᔑᑫᐃᐧᓂᐊᐧᐠ, ᐯᑭᐡ ᑲᔦ ᑲᒪᓯᓇᑌᓭᓂᐠ ᔐᒪᐠ ᑲᓇᑲᐧᐠ ᑭᐊᐸᒋᒋᑲᑌ. ᐁᑲᐧ ᒥᓇ ᐁᐧᑎ ᑭᐃᔕᐊᐧᐠ ᐃᐧᒋᐦᐃᐁᐧᐃᐧᑲᒥᑯᐠ ᑲᑕᑲᐧᐠ ᑎᕑᐊᔾᑎᐣ ᐅᑌᓇᐠ, ᐁᑭᑕᑭᐧᐊᐧᐨ ᒣᑲᐧᐨ ᑲᐱᒥᔭᓄᑲᓂᑕᐧ ᐃᒪ ᑲᐊᔭᐊᐧᐨ ᑲᐃᐧᒋᐦᐃᑕᐧ.
ᑭᐁᐧᑎᓄᐠ ᐅᑭᒪᑲᓇᐠ ᐊᑯᓯᐃᐧᐱᒧᒋᑫᐃᐧᐣ ᑲᓂᑲᓂᐡᑲᐠ ᓇᐧᐸᐟ ᑕᐧᒪᐢ ᑭᐃᑭᑐ ᐃᐡᑯᓄᐃᐧᐣ ᑲᑭᐅᐣᒋ ᒪᒋᒋᑲᑌᑭᐸᐣ ᐊᐱ ᑲᑭᐃᐡᑲᐧ ᐊᔭᑭᓀ ᐸᑭᑎᓇᒧᐊᐧᐸᐣ ᑲᑫᐧᒋᒥᐁᐧᐃᐧᓇᐣ, ᐁᑲᐧ ᐅᑭᐃᔑᒥᑲᓇᐊᐧ 70 ᐊᑯᓇᐠ 80 ᐳᕑᓭᐣᐟ ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ ᑲᐅᐣᒋᐊᐧᐨ ᐊᓂᔑᓂᓂᐊᐧᐠ ᐁᒥᓂᑫᐧᐊᐧᐱᓀᐊᐧᐨ ᓇᐣᑕ ᒪᐡᑭᑭᑫᐃᐧᐣ ᐁᑎᐯᓂᒥᑯᐊᐧᐨ.
“ᐁᑲᐧ ᑕᐡ ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ ᑲᐅᑭᒪᑲᓂᐃᐧᐊᐧᐨ ᐅᑭᑲᓄᓇᐊᐧᐣ ᒪᐡᑭᑭᐃᐧᐱᒧᒋᑫᐃᐧᐣ ᑲᓂᑲᓂᐡᑲᒧᐊᐧᐨ ᒋᑭᓇᓇᑐᓇᒧᐊᐧᐸᐣ ᐊᓂᐣ ᑫᑭᑐᒋᑲᑌᑭᐸᐣ ᒋᐊᒋᐃᐧᓭᐠ (ᒪᐡᑭᑭᑫᐃᐧᐣ) ᒥᓇ ᐱᑯ ᒥᓂᑫᐧᐊᐧᐱᓀᐃᐧᐣ, ᒥᑕᐡ ᐅᐁᐧ ᑲᓇᑫ ᐱᑯ ᐊᒋᓇ ᑲᐃᓯᓭᐠ ᑲᑭᐃᔑ ᐅᓀᐣᑕᒪᐠ ᒋᑯᒋᒋᑲᑌᐠ,” ᑭᐃᑭᑐ ᑕᐧᒪᐢ.
ᑕᐧᒪᐢ ᑭᐃᑭᑐ ᑲᐃᐧᐣ ᒋᐊᔭᒪᑲᐠ ᑭᑭᓄᐦᐊᒪᑫᐃᐧᐣ ᒥᓇ ᐊᓱᐡᑲᒪᑫᐃᐧᐣ ᐃᐡᑯᓂᑲᓇᐣ ᑲᐃᔑᐊᔭᑭᐣ ᐊᓂᐣ ᑫᓂᐃᔑᐃᒋᐦᐊᐊᐧᐸᐣ ᑲᒥᓂᑫᐧᐊᐧᐱᓀᓂᐨ ᓇᐣᑕ ᑲᑲᐧᒋᒪᐡᑭᑭᑫᐦᐃᑎᓱᓂᐨ, ᐁᑲᐧ ᑕᐡ ᒧᔕᐠ ᐃᓯᓭ ᐁᐃᔑᓂᔕᐦᐅᐣᑕᐧ ᐃᐡᑯᓂᑲᓂᐠ ᐊᐧᓴ ᐁᐱᐅᐣᑐᓭᐊᐧᐨ ᑭᒋᐊᓄᑭᓇᑲᓇᐠ ᑲᐱᑲᑫᐧᐃᐧᒋᐦᐃᑯᐊᐧᐨ.
ᐁᑲᐧ ᑭᐡᐱᐣ ᐊᐃᐧᔭ ᑲᐸᑯᓭᑕᐠ ᒋᐃᐧᒋᐦᐊᑲᓄᐨ, ᐁᐡᑲᑦ ᐯᔑᑯᔭᑭ ᐱᐦᐅ ᒋᐱᐣᑎᑫᐨ ᐃᐧᒋᐦᐃᐁᐧᐃᐧᑲᒥᑯᐠ. ᐁᑲᐧ ᐊᐱ ᑲᐅᒋᒋᓭᓂᐠ ᒋᐱᐣᑎᑫᐨ, ᐸᑲᐣ ᑕᔑᑫᐃᐧᓂᐠ ᐃᔑᐃᐧᓇᑲᓄ ᒋᔭᐣᑕᐃᐧ ᐃᐧᒋᐦᐊᑲᓄᐨ.
“ᐣᑭᐃᔑᒥᑲᒥᐣ ᑕᐡ, ᐁᑭᐃᑭᑐᐊᐧᐨ ᐁᓇᑕᐁᐧᐣᑕᒧᐊᐧᐨ ᐃᐧᒋᐦᐃᐁᐧᐃᐧᑲᒥᐠ ᓇᐊᐧᐨ ᐯᔓᐨ ᐅᑕᔑᑫᐃᐧᓂᐊᐧᐠ ᒋᑭᑕᑲᐧᑭᐸᐣ ᐊᐱᐨ ᐃᐧᐣ ᐊᐧᓴ ᐃᔑᐃᐧᓂᑕᐧᐸᐣ ᐊᐃᐧᔭᐠ,” ᑭᐃᑭᑐ ᐁᕑᐃᐠ ᔓᕑᐟ, ᐯᔑᐠ ᑲᑭᐊᓄᑲᑕᐠ ᐃᐡᑯᓄᐃᐧᓂ. ᑭᑭᑫᐣᑕᒥᐣ ᐁᑲ ᐁᐊᔭᐊᐧᐨ ᑫᑭᐅᐣᒋ ᐱᒥᐊᓴᐧᐸᒪᐊᐧᐸᐣ ᑲᑲᑫᐧᐱᒥ ᐃᐧᒋᐦᐃᑎᓱᓂᐨ ᐃᒪ ᐃᐡᑯᓂᑲᓂᐠ, ᐊᐱ ᑲᐱᑭᐁᐧᐡᑲᐊᐧᐨ, ᐊᒥ ᐱᑯ ᑫᑲᐟ ᑕᐧᓴ ᐁᑭᐁᐧᐸᐣᑭᔑᓄᐊᐧᐨ.”
ᑭᐡᐱᐣ ᑕᐡ ᐊᔭᐊᐧᔭᐠ ᑲᑭᐃᐡᑯᓄᐦᐃᑕᐧ ᐅᐃᐧᒋᐦᐃᐁᐧᐠ ᐃᒪ ᐸᐯᔑᐠ ᐃᐡᑯᓂᑲᓂᐠ, ᑕᐧᒪᐢ ᑭᐃᑭᑐ ᒥᐦᐅᐁᐧ ᑲᑲᑫᐧᑐᒋᑲᑌᐠ ᒋᐅᒋ ᐱᒥᐊᓱᐡᑲᐊᐧᐊᐧᐨ ᒥᓇ ᒋᐱᒥ ᑭᑭᓇᐊᐧᐸᑕᐦᐊᐊᐧᐨ ᑫᐃᔑ ᐃᐧᒋᐦᐃᑎᓱᓂᐨ ᐅᑕᓂᔑᓂᓂᒥᐊᐧ.
“ᐣᑎᓀᐣᑕᐣ ᑭᐡᐱᐣ ᑲᓇᑫ ᐯᔑᐠ ᐅᐣᒋᒪᑕᓄᑲᐊᐧᑭᑕᐧ ᐯᔑᐠ ᐃᐡᑯᓂᑲᓂᐠ, ᑭᑕᑭᒪᑕᓄᑭᐦᐊᒥᐣ ᓂᔑᐣ ᐊᓄᑭᓇᑲᓇᐠ ᑫᑭᐅᐣᒋ ᐃᐧᒋᐦᐊᐊᐧᐸᐣ ᑲᑲᐧᒋᐦᐃᑎᓱᐊᐧᐨ,” ᑭᐃᑭᑐ. “ᐊᔭᒪᑲᐣ ᐸᑯᓭᓂᒧᐃᐧᐣ.”
ᒥᐦᐅᒪ ᐁᐅᐣᒋ ᐅᐡᑭᒪᒋᒋᑲᑌᐠ ᐃᐡᑯᓄᐃᐧᐣ ᐱᓂᐡ ᒋᔭᓂ ᓇᐣᑭᐦᐅᒪᑲᐠ ᒋᐊᔭᑭᓀᐡᑲᒪᐠ ᑲᑕᓱᐊᔭᒪᑲᑭᐣ ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ ᐣᑯᑕᐧᓱᐱᒥᑯᓇᑲ ᒋᐃᔑᐊᔭᑲᐃᐧ ᐃᐡᑯᓄᐦᐃᑕᐧ ᑲᑭᐳᓂᑐᐊᐧᐨ ᐅᒥᓂᑫᐧᐃᐧᓂᐊᐧ ᓇᐣᑕ ᑲᑭᐳᓂᒪᐡᑭᑭᑫᐊᐧᐨ ᒋᐅᒋ ᒪᒪᐃᐧ ᐃᐧᒋᐦᐃᑐᐊᐧᐨ.
“ᐯᔑᐠ ᐃᐁᐧ ᑲᑭᒥᑲᒪᐣᐠ ᐁᓇᑕᐁᐧᓂᒪᑭᑕᐧ ᑫᒪᐡᑲᐃᐧᑲᐸᐃᐧᐊᐧᐨ ᑫᐊᓄᑭᑕᒪᑫᐊᐧᐨ ᒥᐦᐃᒪ ᑫᑭᐅᐣᒋ ᑲᐡᑭᒋᑲᑌᐠ ᐅᐁᐧ ᐃᐡᑯᓄᐃᐧᐣ,” ᑭᐃᑭᑐ ᑕᐧᒪᐢ.
ᑕᐧᒪᐢ ᒥᓇ ᔓᕑᐟ ᐅᑭᐅᔑᑐᓇᐊᐧ ᑭᑭᓇᐊᐧᒋᒋᑲᓇᐣ ᐁᑭᐅᑐᒋᑐᐊᐧᐨ ᒥᑎᑯᓴᐣ, ᐊᑎᑲ ᐃᐁᐧ ᐯᔑᐠ ᒥᑎᑯᐢ (ᐱᒋᓇᐠ ᑲᔭᓂᑲᑫᐧᐃᐧᒋᐦᐃᑎᓱᐨ ᑲᑲᑫᐧᐳᓂᑐᐨ ᐅᒥᓂᑫᐧᐃᐧᐣ ᓇᐣᑕ ᐅᒪᐡᑭᑭᑫᐃᐧᐣ) ᒪᐊᐧᐨ ᐁᐧᐣᑕᐣ ᐁᐳᑲᐧᑎᓂᑲᑌᐠ (ᑭᐁᐧᐸᐣᑭᔑᐣ) ᐁᑲᐧ ᑕᐡ ᐃᐧᐣ ᓂᔑᑕᓇ ᒥᑎᑯᓴᐣ ᑲᒪᒪᐃᐧᓂᑲᑌᑭᐣ ᓇᐊᐧᐨ ᐊᓂᒪᐣ ᒋᑭᐳᑲᐧᑎᓂᑲᑌᑭᐣ.
“ᐅᒪ ᑌᑎᐸᐦᐃ ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ ᑲᐊᔭᑭᐣ, ᐣᑕᔭᐊᐧᒥᐣ ᓂᐦᓱᔕᑊ ᐊᔕ ᑲᑭ ᑭᔑᑐᐊᐧᐨ ᐅᑎᐡᑯᓄᐃᐧᓂᐊᐧ, ᐁᑲᐧ ᑕᐡ ᐊᔕ ᐊᓂᒪᐡᑲᐃᐧᑲᐸᐃᐧᐊᐧᐠ ᐁᔭᓂᒥᔑᓄᐊᐧᐨ ᒥᓇ ᑕᑲᐧᐣ ᐊᓱᐡᑭᑫᐃᐧᐣ,” ᑭᐃᑭᑐ ᑕᐧᒪᐢ.
ᑭᐁᐧᑎᓄᐠ ᐅᑭᒪᑲᓇᐠ ᑲᓂᑲᓂᐡᑲᒧᐊᐧᐨ ᐅᑭᐸᑭᑎᓇᓇᐊᐧ ᐅᒪᓯᓇᐦᐃᑲᓂᐊᐧᐠ ᑲᓇᑕ ᒪᐡᑭᑭᐃᐧᑭᒪᐃᐧᓂᐠ ᐁᑭᑲᑫᐧᒋᒪᐊᐧᐨ ᒋᐸᑭᑎᓇᐨ ᔓᓂᔭᐣ ᐅᒪ ᒋᐅᒋ ᑎᐸᐦᐃᑲᑌᐠ ᐃᐡᑯᓄᐃᐧᐣ. ᐁᑲᐧ ᓇᐊᐧᐨ ᑕᑭᒥᓇᐧᔑᓄᐸᐣ, ᑭᐃᑭᑐ ᑕᐧᒪᐢ, ᒋᑭᐃᔑᒥᓯᐁᐧ ᐸᑭᑎᓇᐸᐣ ᔓᓂᔭᐣ ᒋᑭᐅᔑᒋᑲᑌᑲᐧᐸᐣ ᐃᐧᒋᐦᐃᐁᐧᐃᐧᑲᒥᑯᐣ ᐃᒪ ᐸᐯᔑᐠ ᐃᐡᑯᓂᑲᓂᐠ, ᔕᑯᐨ ᐃᐧᐣ ᐅᐁᐧ ᐅᑕᑭᐅᓀᐣᑕᓇᐊᐧ ᐁᐅᐣᒋᐸᑯᓭᓂᒧᐊᐧᐨ ᒋᑭᐅᒋ ᐃᐧᒋᐦᐃᐁᐧᒪᑲᑭᐸᐣ.
“ᑭᐡᐱᐣ ᐊᔭᔭᑭᐸᐣ ᒋᐊᔭᑭᓀᐃᔑᐃᐧᒋᑲᑌᐠ ᐃᐡᑯᓄᐃᐧᐣ ᐃᐡᑯᓂᑲᓂᐠ, ᔐᒪᐠ ᑕᑭᐃᐧᒋᐦᐃᐁᐧᒪᑲᓄᐸᐣ,” ᑭᐃᑭᑐ ᑕᐧᒪᐢ. “ᑭᐡᐱᐣ ᑲᔦ ᓇᑯᑐᔭᐠ ᐁᐅᐣᒋᑲᐡᑭᑐᔭᐠ ᐅᐁᐧ ᑲᑭᐃᔑᒪᒋᑐᔭᐠ, ᐣᐸᑯᓭᐣᑕᒥᐣ ᑕᓱᔭᑭ ᐅᐁᐧ ᒋᑐᒋᑲᑌᐠ.”
ᒥᑕᐡ ᐃᐧᓂᑯ ᐅᐁᐧ ᒣᑲᐧᐨ ᑕᐧᒪᐢ ᐁᔑᑭᒋᓀᐣᑕᐠ ᑲᑭᐃᔑᓇᐦᐃᓭᓂᐠ ᐃᐡᑯᓄᐃᐧᓂ, ᐃᑭᐁᐧᓂᐊᐧᐠ ᑲᑭᐅᑕᐱᓇᒧᐊᐧᐨ ᑲᑭᔭᓂᑭᔑᑐᐊᐧᐨ.
“ᓂᐦᓱᔕᑊ ᑲᑭ ᑭᔑᑐᐊᐧᐨ ᐅᒪ ᐃᐡᑯᓄᐃᐧᓂᐠ ᑌᐯᐧ ᐱᑯ ᐃᔑᓇᑲᐧᐣ ᐁᑭᒥᔑᓄᐊᐧᐨ,” ᑭᐃᑭᑐ. “ᑭᒥᓄᓭ ᐣᑎᓀᐣᑕᐣ ᑲᑭᒥᓄᑭᔑᒋᑲᑌᐠ ᓂᐢᑕᑦ ᐃᐡᑯᓄᐃᐧᐣ.”