ᐱᐊᐧᐱᑯᑫᐃᐧᐣ ᓇᐱᐨ ᓂᓂᒋᓇᑲᐧᐣ ᐁᑲ ᐊᐱᐣ ᓇᐣᑕ ᒋᑕᑲᐧᐠ

ᐁᑲᐧ ᐯᔑᑯ ᑕᑯᑭᐃᐧᐣ ᐊᓇ ᓂᑲᓂᓭ ᔕᑯᐨ ᑭᔭᐱᐨ ᓂᔓᑕᑯᑭᐃᐧᐣ ᐅᒋᐊᔐᐡᑲᒪᑲᐣ ᐅᐅᐁᐧ ᐱᐊᐧᐱᑯᑫᐃᐧᐣ ᐁᐧᑎ ᐊᓂ ᓂᑲᐣ ᑲᐊᓂᒧᒋᑲᑌᐠ ᒋᐊᓂ ᑕᑲᐧᐠ᙮
ᐁᑲᐧ ᐅᑫᐧᓂᐊᐧᐠ ᑭᓫᐃᑊᐢ ᐅᐱᐊᐧᐱᑯᑫᐃᐧ ᐅᐱᒧᒋᑫᐠ ᐊᐦᐃ ᑲᑭᐸᑭᑎᓇᒧᐊᐧᐸᐣ ᐊᓄᑭᐃᐧ ᐯᐸᐣ ᒥᐡᑯᐨ ᒋᐸᑭᑎᓇᑲᓄᐊᐧᐨ ᓀᑲᐃᐧ ᒥᑲᓇᓂ ᒋᐅᔑᑐᐊᐧᐨ ᐊᐦᐃᐠ ᐅᑕ ᐱᐊᐧᐱᑯᑫᐃᐧᓂᐠ ᑲᐃᐧᐃᔑᑕᑲᐧᐠ ᒋᐃᓇᑕᒧᐠ ᐁᑲᐧ ᐊᐧᑌᐸᑲᐃᐧᐱᓯᑦ 10 ᑲᐃᓇᑭᓯᐨ ᐊᐱᐣ ᑲᑭᐃᐧᑕᒪᐊᐧᑲᓄᐊᐧᐨ ᐁᑲ ᒋᑭᒥᑲᓇᑫᐊᐧᐨ ᐁᐦᐊᐣ ᐅᑕ ᐅᐣᑌᕑᐃᔪ ᐅᐱᐊᐧᐱᑯᑫᐣ ᒥᓇ ᐊᐦᑭᐃᐧᑭᒪᐣ ᑲᑭᐱᑎᓇᒥᓂᐨ ᐃᐃᒪ 43 ᐸᑭᑭᓂᑲᓂᐠ ᐅᓇᑯᓂᑫᐃᐧᐣ ᑲᐃᔑᒪᓯᓇᐦᐃᑲᑌᐠ᙮
ᐁᑲᐧ ᐅᐅᐁᐧ ᑲᑭᐱᑎᓂᑲᑌᐠ ᒥᑲᓇᑫᐃᐧᐣ ᑲᐃᐧᐣ ᓇᐱᐨ ᓂᒧᓀᐧᐣᑕᓯᒥᐣ, ᐃᑭᑐ ᒉᓴᐣ ᐊᑭᓀᐢ ᒥᐦᐊᐁᐧ ᐊᐦᐃ ᐊᐦᑭᐃᐧ ᑫᑯᓇᐣ ᑲᐅᒋᓇᓇᑲᒋᑐᒋᐣ ᐁᐦᐊᐣ ᑲᐊᓄᑲᐊᐧᐨ ᑭᓫᐃᑊᐢ ᐅᐱᐊᐧᐱᑯᑫᐃᐧ ᐅᐱᒧᒋᑫᐣ᙮ “ᐁᑲᐧ ᓂᓇᐃᐧᐟ ᐁᐃᔑᓇᒪᐠ ᐊᐦᐃᐠ ᑭᐁᐧᑎᓄᐠ-ᔕᐊᐧᓄᐠ ᑲᐃᔑᑕᑲᐧᐠ ᒪᐊᐧᐨ
ᐁᑭᒋᓀᐣᑕᑲᐧᐠ ᐅᐅᐁᐧ ᐱᐊᐧᐱᑯᑫᐃᐧᐣ ᐅᒋ ᐁᑲᐧ ᒥᓇ ᐅᐅᐁᐧ ᒪᒋᒋᑫᐃᐧᐣ ᒪᐊᐧᐨ ᒋᑭ ᑭᒋᐃᐧᒋᐦᐃᐁᐧᒪᑲᑭᐸᐣ᙮ ᐊᒥᐁᐧ ᐊᐱᐣ ᐁᐃᔑᓇᑲᐧᐠ ᒥᐢᑕᐦᐃ ᐁᐅᒋᐊᐧᓇᓭᐠ ᐅᐅᐁᐧ ᒪᒋᒋᑫᐃᐧᐣ ᑲᐃᐧ ᐊᓂ ᑕᑲᐧᑭᐸᐣ ᐊᐦᐃ ᐁᑕ ᑕᑭᐃᔑᓭ ᑭᐡᐱᐣ ᐊᐧᐁᐧᓇᒋᑫᐃᐧᐣ ᐅᒋᑕᑲᐧᐠ᙮”
ᐁᑲᐧ ᒥᓇ ᐅᐅᐁᐧ ᐅᓇᑯᓂᑫᐃᐧᐣ ᑲᑭᐊᐸᑕᐠ ᑭᒥᑭᑫᒪᑲᐣ ᐁᐦᐊᐣ ᑲᔭ ᑯᑕᑭᔭᐣ ᐅᐱᐊᐧᐱᑯᑫᐣ ᑲᐃᔑᓂᑲᓯᓂᐨ ᐁᑲ ᐱᓇᒪ ᑫᐃᐧᓇᐊᐧ ᐁᐅᒋᑲᑫᐧᒋᒥᒪᑲᓄᓂᐨ ᐃᐃᒪ ᐅᐣᑌᕑᐃᔪ ᐱᐊᐧᐱᑯᑫᐃᐧ ᐅᓇᑯᓂᑫᐃᐧᓂᐠ ᑲᐃᓇᑌᐠ ᐁᑲᐧ ᒥᓇ ᑲᐧᓂᐣ ᑭᓫᐃᑊᐢ ᐅᐱᐊᐧᐱᑯᑫᐃᐧ ᐅᐱᒧᒋᑫᐠ ᒋᐅᒋᐊᐧᐸᑕᐦᐃᐁᐧᐊᐧᐨ ᐃᐃᐁᐧ 350 ᑭᓫᐊᒥᑐᕑᐢ ᑎᐸᐦᐊᑲᐣ ᒥᑲᓇ ᑲᐃᐧᐊᐱᑕᑕᒧᐠ ᑭᐡᐱᐣ ᐊᐃᐧᔭᐠ ᑌᐯᐧ ᓇᑕᐁᐧᐣᑕᒧᐊᐧᑫᐧᐣ ᐅᐅᐁᐧ ᒋᑕᑲᐧᐠ᙮ ᒥᓇ ᐱᑯ ᐅᐅᐁᐧ ᒥᑲᓇ ᐊᐦᐃᐠ ᑕᑭᐃᔑᐱᒪᑕᒧᓄᐸᐣ ᐊᐦᐃᐠ ᐊᔕ ᑲᑭᐃᔑᑭᑭᓇᐊᐧᒋᒋᑫᓂᐸᐣ ᐊᒥᐁᐧ ᐅᑫᐧᓂᐊᐧᐠ ᑫᐃᐧᓇᐊᐧ ᑲᐱᒥ
ᓇᓇᑕᐃᐧᐊᐧᓯᓂᐁᐧᐊᐧᐨ ᐁᑲᐧ 2009 ᑲᐊᐦᑭᐊᐧᐠ ᐊᔕ ᑲᔭ ᑭ ᑭᐦᑭᓇᐊᐧᒋᒋᑫᐸᓂᐠ ᐊᐦᐃ ᐅᑕ ᐃᐡᑯᑌᐃᐧᑕᐸᐣ ᒥᑲᓇ ᑫᐃᔑᐱᒪᑕᒧᐠ᙮
ᐁᑲᐧ ᐅᐅᐁᐧ ᐅᓇᒋᑫᐃᐧᐣ ᑲᑭᐸᑭᑎᓂᑲᑌᐠ ᐊᑭᓀᐢ ᐃᑭᑐ ᑭᕑᐃᑊᐢ ᐊᒥᐁᐧ ᐱᑯ ᑫᐃᔑᐱᒥ ᐊᓄᑲᑕᐠ ᑫᑯᓀᐣ ᒥᓇ ᐱᑯ ᑯᑕᑭᔭᐣ ᑫᑯᓇᐣ ᐱᓇᒪ
ᒋᑲᓇᐊᐧᐸᑕᑭᐣ ᐊᐱ ᐅᑕ ᑲᐧᔭᐠ ᐃᐡᑲᐧ ᐊᐧᐁᐧᓀᐣᑕᒪᑭᐣ ᑫᑯᓇᐣ᙮