ᐎᐸᐨ ᐅᓀᒋᑫᐎᐣ ᓇᑕᐌᑕᑯᐣ ᑲᐃᔑ ᐅᓇᐸᒪᑲᓀᐗᐨ ᑲᐱᓯᑕᒧᐗᐨ ᑎᐸᑯᓂᑫᐎᐣ ᐃᑭᑐᐎᓇᐣ

ᒥᐡᑭᑯᑲᒥᐠ ᐅᑭᒪᑲᐣ ᑳᓂ ᐠᕒᐁ ᒪᑫ ᑭᐃᑭᑐ ᒋᑲᓇᐗᐸᒋᑲᑌᐠ ᐎᒋᐎᑎᐎᐣ ᑲᑭᐎᒋᑲᑌᐠ ᐊᓂᔑᓂᓂᐤ ᐊᐱᑕᒪᑫᐎᐣ ᐃᐃᒪ ᐅᐣᑌᕒᐃᔪ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᑎᐸᒋᒧᐎᐣ ᑲᑭᐸᑭᑎᓂᑲᑌᐠ ᐯᐱᐌᕒᐃ 26 ᐃᐃᒪ ᑕᐣᑐᕒ ᐯ᙮ “ᑭᔑᐎᒋᑫᒪᑲᐣ ᐃᐃᐌ ᓂᑕᒼ
ᑲᑭᔑᑲᓇᐗᐸᒋᑲᑌᐠ ᑎᕒᐃᑎ ᐃᐃᐌ ᑫᑯᐣ ᑲᓂᑲᓇᐗᐸᒋᑲᑌᐠ ᒋᐅᒋ ᒫᒋᓭᑭᐸᐣ ᐎᒋᐎᑎᐎᓂᐠ,” ᐠᕒᐁ ᒪᑫ ᐃᑭᑐ᙮ “ᐅᑭᐗᐸᑕᓇᐗ ᑭᒋᐦᐊᒥᓇᐣ ᑲᑭᐅᔑᐱᐦᐅᑎᓱᐗᐨ ᐃᓂᐌᓂᐗᐣ ᑎᕒᐃᑎᐣ -- ᐃᐃᐌ ᐅᑭᒪᐎᐣ ᒥᓇ ᐅᑭᒪᐎᐣ ᐎᒋᐎᑎᐎᐣ᙮ ᑭᑭᔭᔭᒥᐣ ᐃᔑᒋᑫᐎᓇᐣ ᐁᑲᒥᔑ ᑲᐱᑕᑯᔑᓄᐗᐨ ᐌᒥᒋᑯᔑᐗᐠ ᒥᓇ ᒋᑭᓂᓯᑕᐎᓂᑲᑌᑭᐣ ᐃᓂᐌᓂᐗᐣ᙮ ᐃᐃᐌ ᑕᐡ ᐯᔑᐠ ᑎᐸᑯᓂᑫᐎᐣ᙮” ᐠᕒᐁ ᒪᑫ ᐃᑭᑐ ᐃᐃᐌ ᓂᑕᒼ ᑎᐸᒋᒧᐎᐣ ᐃᑭᑐᐎᐣ, ᒋᑭᐅᓇᐱᐗᐨ ᑫᐊᐱᑕᒧᐗᐨ ᑫᐃᔑ ᒪᑕᓄᑭᒋᑲᑌᑭᐸᐣ ᐅᓀᒋᑫᐎᐣ, ᐁᑭ ᐅᒋᒥᓉᑕᐠ᙮
“ᑭᐗᐸᑕᐣ ᐁᑭᐱᓯᑕᑯᔭᐠ,” ᐠᕒᐁ ᒪᑫ ᐃᑭᑐ ᐃᓂᐌᓂᐗᐣ ᑲᑭᐱᐊᐱᑕᐠ ᑭᒋᓇᑯᓂᑫᐎᐣ ᐅᑎᐸᑯᓂᑫ ᐸᕒᐊᐣᐠ ᐊᔭᑯᐳᒋ, ᐁᑭᐸᑭᑎᓇᐠ ᐅᑎᐸᒋᒧᐎᐣ ᐯᐱᐌᕒᐃ 26 ᐃᐃᒪ ᑕᐣᑐᕒ ᐯ᙮ “ᑲᐎᐣ ᒋᐅᒋ ᐱᓯᑕᐠ ᐅᑕᐗᑲᐠ: ᑭᐅᒋ ᐱᓯᒋᑫ ᐅᑌᐦᐃᐠ ᑲᑭᔑᐎᑕᒧᐗᐨ ᐃᓯᓭᐎᓇᐣ ᐊᓂᔑᓂᓂᐗᐠ᙮”
ᐊᔭᑲᐳᒋ ᑭᐃᑭᑐ ᐃᐃᐌ ᑎᐸᑯᓂᑫᐎᐣ ᐱᒥᐎᒋᑫᐎᐣ ᒥᓇ ᑲᐱᓯᑕᒧᐗᐨ ᑎᐸᑯᓂᑫᐎᐣ ᑲᐅᓇᐸᒪᑲᓀᐗᐨ ᐁᒪᒋᑲᐸᐎᒪᑲᐠ ᐅᐣᑌᕒᐃᔪ ᐊᓂᔑᓂᓂᐗᐠ ᐅᐣᒋ, ᐃᑭᐌᓂᐗᐠ ᐃᑕᐡ ᒪᐗᐨ ᐊᓂᔑᓂᓂᐗᐠ ᑲᑲᐯᔑᐗᐨ ᑭᐌᑎᓄᐠ᙮
“ᐁᑭ ᐅᑕᓴᒪᐱᑕᑎᔭᐠ ᐁᑭᐗᐸᒪᑾ ᐅᓂᑲᓂᑕᒪᑫᐠ ᒥᓇ ᐊᓂᔑᓂᓂᐗᐠ ᐃᐃᒪ 32 ᐃᐡᑯᓂᑲᓇᐣ ᒥᓯᓭ ᐅᐣᑌᕒᐃᔪ, ᑭᐅᓇᒋᑲᓂᐗᐣ 17 ᐃᑭᑐᐎᓇᐣ ᒋᑭᐅᒋ ᑲᐡᑭᒋᑲᑌᐠ ᒋᑲᓇᐗᐸᒋᑲᑌᑭᐣ ᐊᓂᔑᓂᓂᐤ ᐃᔑᒋᑫᐎᓇᐣ, ᐃᓇᑯᓂᑫᐎᓇᐣ ᒥᓇ ᐃᓀᒋᑲᓇᐣ ᒋᑭᑲᓇᐗᐸᒋᑲᑌᑭᐣ ᐃᐃᒪ ᑲᓇᑕ ᑎᐸᑯᓂᑫᐎᓂᐠ ᑲᐱᒥᐎᒋᑲᑌᐠ,” ᐊᔭᑲᐳᒋ ᐃᑭᑐ᙮ “ᑐᒋᑲᑌᑭᐣ ᐅᓄᐌᓂᐗᐣ ᐃᑭᑐᐎᓇᐣ ᐊᐗᔑᒣ ᑕᑭᒥᓄᓭ ᐅᐣᑌᕒᐃᔪ ᑲᐱᓯᒋᑫᐗᐨ ᑎᐸᑯᓂᑫᐎᓇᐣ ᒥᓇ ᑲᐱᒥᐎᒋᑲᑌᐠ ᑎᐸᑯᓂᑫᐎᐣ, ᑎᔑᑌᐺᑕᐣ, ᒋᑭᒥᓄᓭᐠ ᑫᐅᒋ ᑌᐱᓇᒧᐗᐨ ᒥᓇ ᒋᐗᐎᒋᑐᐗᐨ ᐊᓂᔑᓂᓂᐗᐠ ᐃᐃᐌᓂ ᐅᐣᑌᕒᐃᔪ ᑎᐸᑯᓂᑫᐎᐣ ᐱᒥᐎᒋᑫᐎᐣ᙮”
ᑎᐸᒋᒧᐎᐣ ᐃᑭᑐᐎᓇᐣ ᑭᑕᑯᓂᑲᑌ ᒋᐅᓇᒋᑲᑌᐠ ᑫᒪᑕᓄᑭᑕᒧᐗᐨ ᐊᐱᑕᒪᑫᐠ ᒥᓇ ᒋᐅᓇᒋᑲᓂᐗᐠ ᑫᐅᒋ ᐎᑕᒪᐗᐨ ᐊᐱᑕᒪᑫᐠ ᐃᓂᐌᓂᐗᐣ ᑭᒋᑎᐸᑯᓂᑫᐎᐣ ᐅᑭᒪᐎᐣ᙮
ᑭᒋᑎᐸᑯᓂᑫ ᐅᑭᒪᐎᐣ ᑲᓂᑲᓂᐢᑲᐠ ᒑᐣ ᑫᕒᐃᐟᓴᐣ ᐅᑭᑌᐺᑕᐣ ᐎᐸᐨ ᒋᒪᑕᓄᑭᓇᓂᐗᐠ ᑲᑭᐎᒋᑲᑌᑭᐣ ᓂᔑᐣ ᐃᓂᐌᓂᐗᐣ ᐃᑭᑐᐎᓇᐣ᙮
“ᐁᑲᒋᑭᒥᓄᓭᐠ ᐊᓂᔑᓂᓂᐗᐠ ᒋᑭᐎᒋᑐᐗᐨ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᑲᐎᒪᑕᓄᑭᒋᑲᑌᐠ ᐊᓂᔑᓂᓂᐗᐠ ᒋᑭᑕᑯᓇᑲᓀᐗᐨ, ᑲᐅᓇᓴᒥᐣ ᑫᒪᑕᓄᑭᑕᒧᐗᐨ ᐊᐱᑕᒪᑫᐠ ᒋᑕᑯᓇᑲᓀᐗᐨ ᐊᓂᔑᓂᓂᐗᐠ ᒥᓇ ᐅᑭᒪᐎᐣ ᐊᓄᑭᑕᒪᑫᐠ,” ᑫᕒᐃᐟᓴᐣ ᐃᑭᑐ, ᐊᐗᔑᒣ ᐁᑭᐃᑭᑐᐨ ᒋᐅᓇᐱᐗᐨ ᐅᐣᐟᕒᐃᔪ ᐊᓂᔑᓂᓂᐗᐠ ᐊᐱᑕᒪᑫᐎᐣ ᒋᓇᓇᑲᒋᑐᐗᐨ ᐊᓂᔑᓂᓂᐤ ᑎᐸᑯᓂᑫᐎᐣ ᐃᓯᓭᐎᓇᐣ᙮
ᐊᔭᑯᐳᒋ ᑭᐃᑭᑐ ᐃᐃᒪ ᐅᑎᐸᒋᒧᐎᓂᐠ ᐁᑭᑭᑫᑕᐠ ᐃᐃᒪ ᑲᑭᐃᔕᐨ ᐊᓂᔑᓂᓂᐗᐠ ᑲᔑᑲᐯᔑᐗᐨ ᐁᑭᐸᔭᑌᔭᐸᑕᐠ ᐎᑕᒪᑫᐎᓇᐣ: ᒥᑕᐦᐃ ᒥᓇ ᐊᐣᒋ ᑲᓇᐗᐸᒋᑫᐎᐣ ᐃᐃᒪ ᒪᒪᓂᐎ ᑎᐸᑯᓂᑫᐎᓂᐠ ᒋᔑᑲᓇᐗᐸᒋᑲᑌᐠ ᒋᑭᑕᑯᓇᑲᓀᐗᐨ ᐊᓂᔑᓂᓂᐗᐠ ᐃᐃᒪ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᐅᐅᒪ ᐅᐣᑌᕒᐃᔪ᙮
“ᐃᐃᐌ ᑕᐡ ᑲᓇᑲᐡᑭᑫᒪᑲᐠ ᒋᑭᑕᑯᓇᑲᓀᐗᐨ ᐊᓂᔑᓂᓂᐗᐠ ᐃᐃᒪ ᑲ ᐊᐱᑕᒧᐗᐨ ᑎᐸᑯᓂᑫᐎᓇᐣ ᐅᐅᒪ ᐅᐣᑌᕒᐃᔪ ᐃᐃᐌ ᑲᑭᒪᒋᓭᐦᐃᑯᐗᐨ ᒪᒪᓂᐎᐣ ᑎᐸᑯᓂᑫᐎ ᐱᒥᐎᒋᑫᐎᐣ ᐃᐃᐌᓂ ᐅᐱᒪᑎᓯᐎᓂᐗ, ᐅᑎᓇᑎᓯᐎᓂᐗ, ᑭᒋᓀᑕᑯᒋᑲᓇᐣ, ᒥᓇ
ᐅᑎᓇᑯᓂᑫᐎᓂᐗ ᐅᐅᐌᑎ ᐅᑕᓇᐠ,” ᐊᔭᑲᐳᒋ ᐃᔑᐱᐦᐃᑫ ᐅᑎᐸᒋᒧᐎᓂᐠ᙮ “ᑭᐊᓂᓂᔑᑕᐎᓇᑯᐣ ᑲ ᐊᔭᒥᐦᐊᑾ ᐅᓂᑲᓂᑕᒪᑫᐠ, ᑭᒋᔭᔭᐠ, ᒥᓇ ᑯᑕᑭᔭᐠ ᒣᑾᐨ ᑲᑭᓇᓇᑐᑭᑫᒋᑲᓂᐗᐠ᙮ ᒪᒪᐤ ᑭᐃᑭᑐᐗᐠ ᑲᐃᔑᑲᓇᐗᐸᑕᒧᐗᐨ, ᒋᐊᒋᒋᑲᑌᐠ ᒪᒪᓂᐎ ᑎᐸᑯᓂᑫᐎᐣ, ᐃᐃᐌ ᐃᓯᓭᐎᐣ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᒋᐎᒋᑐᐗᐨ ᐊᓂᔑᓂᓂᐗᐠ ᑲᐎᐣ ᑕᑭᒥᓄᓭᓯᐣ᙮”
ᐅᓂᑲᓂᑕᒪᑫᐠ ᒥᓯᓭ ᑭᐌᑎᓄᐠ ᐃᑭᑐᐗᐠ ᐎᐸᐨ ᒋᒪᑕᓄᑭᒋᑲᑌᑭᐣ ᐃᑭᑐᐎᓇᐣ᙮
ᑫᓄᕒᐊ ᕒᐁᓂ ᓯᐱ ᐅᐣᑌᕒᐃᔪ ᐅᑭᒪᐎᐣ ᑲᔭᐱᑕᒪᑫᐨ ᓭᕒᐊ ᑲᒼᐯᓬ ᐃᑭᑐ ᐅᐣᑌᕒᐃᔪ ᐅᑭᒪᐎᐣ ᑲᐎᐣ ᑕᑭᐹᑕᐎᒪᒋᑕᓯᐗᐠ ᐅᓄᐌᓂᐗᐣ ᐃᑭᑐᐎᓇᐣ᙮
“ᐃᐃᐌ ᑎᐸᑯᓂᑫᐎ ᐱᒥᐎᒋᑫᐎᐣ ᒪᒋᓭᐦᐃᑯᔭᐠ, ᐊᓂᔑᓂᓂᐗᐠ ᑲᐎᐣ ᑕᐎᐎᒋᑐᓯᐗᐠ ᒥᓇ ᐃᐃᐌ ᐃᓯᓭᐎᐣ ᑲᐎᐣ ᐁᑕ ᑕᑲᓇᐗᐸᒋᑲᑌᓯᓄᐣ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ,” ᑲᒼᐯᓬ ᐃᑭᑐ᙮ ᓂᔑᓇᐯ ᐊᐢᑭ ᑭᒋᐅᑭᒪᑲᓀᐢ ᐊᓬᐱᐣ ᐱᑎᓬᐅᕒ ᐃᑭᑐ ᒪᑕᓄᑭᐎᐣ ᒋᔭᔭᒪᑲᐠ ᐃᓂᐌᓂᐗᐣ ᐃᑭᑐᐎᓇᐣ, ᐁᑭᐎᑕᐠ ᐃᑭᐌᓂᐗᐠ ᑫᒪᑕᓄᑭᑕᒧᐗᒋᐣ ᐃᑭᑐᐎᓇᐣ ᑭᐅᓇᓴᑲᓀᐸᓂᐠ 2007 ᐃᐳᕒᐗᐡ ᓇᓇᑐᑭᑫᒋᑫᐎᐣ “ᐊᐱᑕ ᐁᑕ
ᐃᓯᓭᐗᐣ” ᒋᒪᑕᓄᑭᒋᑲᑌᑭᐣ ᐃᑭᑐᐎᓇᐣ᙮
“ᓂᐎᐗᐸᑕᒥᐣ ᑫᐅᒋ ᓇᓇᑲᒋᒋᑲᑌᐠ ᐊᓄᑭᐎᐣ,” ᐱᑎᓬᐅᕒ ᐃᑭᑐ᙮ “ᓂᓇᑕᐌᑕᒥᐣ ᑲᒪᑕᓄᑭᐗᐨ ᐎᐸᐨ ᓇᐗᐨ ᒋᐅᓇᐱᒪᑲᓀᐗᐨ ᒋᐎᑕᒪᑯᔭᐠ ᑫᓂᓇᐎᐟ ᒥᓇ ᒋᐅᓇᓴᑲᓀᐨ ᔓᓂᔭ ᑫᐅᒋ ᒪᑕᓄᑭᐗᐨ᙮”
ᓂᔑᓇᐯ ᐊᐢᑭ ᐅᑭᑲᒋᓂᔕᐦᐊᓇᐗ ᒋᓇᓇᑲᒋᒋᑲᑌᐠ ᑲᐅᓇᐸᒪᑲᓀᐗᐨ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᐃᐃᒪ ᑲᑭᐅᒋ ᒥᑭᑲᑌᐠ ᐃᐃᐌ ᐃᓯᓭᐎᐣ ᑲᔕᒋᐗᐣ ᓇᓇᑐᑭᑫᒋᑫᐎᐣ ᒥᓇ ᐁᑲ ᑲᓇᑫ ᐯᔑᐠ ᑲᔕᒋᐗᐣ ᐊᓂᔑᓂᓂ ᐁᑭᑕᑯᓇᑲᓀᐨ ᑲᐃᔑ ᐱᓯᑕᒧᐗᐨ ᑎᐸᑯᓂᑫᐎᓇᐣ ᒥᓇ ᑫᓅᕒᐊ ᑎᐸᑯᓂᑫᐎᐣ ᑎᐯᒋᑫᐎᐣ ᑲᔑᐅᓇᐸᒪᑲᓀᐗᐨ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᐅᓴᒼ ᐃᑯ ᐁᑕ 14 ᐃᐢᑯᓂᑲᓇᐣ ᐃᔑᓂᑲᓱᐎᓇᐣ ᑕᑯᓂᑲᑌᐗᐣ ᑲᐅᔑ ᐅᓇᐸᒋᑫᓇᓂᐗᐠ ᐊᓂᐡ 49 ᑕᓯᓄᐗᑊᐣ ᓂᔑᓇᐯ ᐊᐢᑭ ᐃᐡᑯᓂᑲᓇᐣ᙮ “ᐅᐅᐌ ᑎᐸᒋᒧᐎᐣ ᑭᒋᓀᑕᑯᐣ ᒋᐅᒋ ᓴᑭᓯᒋᑲᑌᐠ ᐊᓂᔑᓂᓂ ᑲᑲᑕᑯᓇᑲᓀᐨ ᐃᐃᒪ ᑎᐸᑯᓂᑫᐎᓂᐠ ᒥᓇ ᑲᑲᓇᑲᒋᐦᐊᑲᓀᐨ ᐊᓂᔑᓂᓂ ᐃᐃᒪ ᑎᐸᑯᓂᑫᐎᓂᐠ ᐱᒥᐎᒋᑫᐎᐣ,” ᐃᑭᑐ ᒍᓬᐃᔭᐣ ᐸᓬᑯᓄᕒ, ᓂᔑᓇᐯ ᐊᐢᑭ ᐅᑕᔭᒥᑕᒪᑫ᙮ “ᐅᑎᐸᑯᓂᑫ ᐊᔭᑲᐳᒋ ᐅᑭᐸᔭᑌᐎᑕᐣ ᑫᓯᒪᑕᓄᑭᓇᓂᐗᐠ᙮ ᐅᑭᒪᐎᐣ ᒥᓇ ᐅᑭᒪᐎᐣ ᒋᔑ ᑲᓇᐗᐸᒥᑎᓇᓂᐗᐠ ᐎᒋᐎᑎᐎᐣ ᑕᑭᒥᓄᓭ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᒥᓇ ᒪᒪᓂᐎᐣ ᑎᐸᑯᓂᑫᐎᐣ ᐱᒥᐎᒋᑫᐎᐣ ᑕᑭᒥᓄᓭᐗᐣ᙮”
ᐸᓬᑯᓄᕒ ᑭᐃᑭᑐ ᑲᐎᐣ ᑕᑭᒥᓄᓭᓯᐣ ᒋᒥᓄᒋᑲᑌᐠ ᐊᓂᔑᓂᓂᐗᐠ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᒋᑕᑯᓇᑲᓀᐗᐨ, ᒥᓇ ᐎᑕᒪᑫ ᐃᑭᐌᓂᐗᐠ ᐁᒥᔑᓄᐗᐨ ᐊᓂᔑᓂᓂᐤ ᐅᐡᑲᑎᓴᐠ ᐃᐃᒪ ᑭᐸᐦᐅᑎᐎᑲᒥᑯᐠ ᒥᓇ ᐊᓂᔑᓂᓂᐤ ᔑᒪᑲᓂᔑᑫᐎᓇᐣ ᐱᒥᐎᒋᑫᐎᓇᐣ ᐁᑲ ᐁᐱᒥᐎᒋᑲᑌᐠ ᑎᐸᑯᓂᑫᐎᐣ ᒥᓇ “ᐁᓄᑌᓭᐗᐨ” ᔓᓂᔭᓇᐣ᙮
“ᐅᓄᐌᓂᐗᐣ ᐃᓯᓭᐎᓇᐣ ᐅᒋᓯᓭ ᐊᓂᔑᓂᓂᐗᐠ ᐁᑲ ᐁᐎᐎᒋᑐᐗᐨ ᒪᒪᓂᐎ ᑎᐸᑯᓂᑫᐎᐣ ᐱᒥᐎᒋᑫᐎᓂᐠ,” ᐸᓬᑯᓄᕒ ᐃᑭᑐ᙮ “ᑲᑭᓇ ᐅᓄᐌᓂᐗᐣ ᓇᓇᐱᓭᐗᐣ -- ᑲᐎᐣ ᑕᑭ ᐯᐯᓯᑯᐊᓂᒧᑌᓯᐗᐣ᙮”
ᓂᔑᓇᐯ ᐊᐢᑭ ᒥᓇ ᓂᔑᐣ ᐊᓂᔑᓂᓂᐤ ᑎᐯᒋᑫᐎᓇᐣ ᑭᐸᑭᓇᑫᐸᓂᐠ ᑫᐌ ᓇᓇᑲᒋᒋᑫᐎᐣ ᐃᓇᑯᓂᑲᐣ ᒣᑾᐨ ᒫᕒᐨ 2011 ᐁᑭᓂᓯᑕᐎᓂᑲᑌᐠ ᐁᑎᐯᑎᓱᐗᐨ ᒋᑭᓇᓇᑲᒋᒋᑫᐗᐨ ᑲᐱᓯᑕᒧᐗᐨ ᑎᐸᑯᓂᑫᐎᓇᐣ ᒋᑭᐊᐱᑕᒧᐗᐨ ᐃᐃᒪ ᑕᐣᑐᕒ ᐯ ᑎᐸᑯᓂᑫᐎᐣ
ᑎᐯᒋᑫᐎᓂᐠ᙮
ᑭᐌᓇᓇᑲᒋᒋᑫᐎᓇᐣ ᑭᓇᓇᑲᒋᒋᑲᑌᐗᐣ ᐁᑲᐅᒋᐱᓯᑕᐠ ᑲᐊᐱᑕᒧᐗᐨ ᓇᓇᑲᒋᒋᑫᐎᓇᐣ ᑲᑭᐃᐡᑾᐱᒪᑎᓯᐸᐣ ᕒᐁᒋ ᐳᔑ ᒥᓇ ᓇᓇᑲᒋᒋᑫᐎᐣ ᑲᑭᐃᐡᑾᐱᒪᑎᓯᐨ ᒉᓯ ᐱᐁᕒ ᒋᓇᑐᒪᑲᓀᐗᐨ ᑎᐸᑯᓂᑫ ᐊᓄᑭᓇᑲᐣᐠ ᑲᐅᓇᒋᑫᐗᐨ ᑲᐅᓇᐸᒪᐗᐨ ᑕᐣᑐᕒ ᐯ ᑫᐱᓯᑕᒧᐗᐨ ᑎᐸᑯᓂᑫᐎᓇᐣ, ᒋᑭᐎᑕᒧᐗᐸᐣ ᐊᓂᔑᓂᓂᐗᐠ ᐃᓇ ᑕᑯᓇᐗᐠ᙮
ᐊᔭᑲᐳᒋ ᒥᓯᓭ ᐅᑎᐸᒋᒧᐎᐣ ᑲᑭᐗᐸᑕᐣ ᐃᐃᒪ ᐱᐗᐱᑯᐠhttp://www.attorneygeneral.jus.gov.on.ca/english/about/pubs/default.asp#...