ᐊᓴᐸᐱᐡᑯᓯᐊᐧᑲᐣᐠ ᐅᐡᑲᑎᓴᐠ ᐃᓇᐦᐊᑐᐊᐧᐠ ᑐᕑᐊᐣᑐ ᑭᒋᐅᑌᓇᐠ

ᐊᐱ ᐁᐟᒪᐣᐟ ᒐᐠ ᐁᓂᓱᔕᐳᔭᑭᐃᐧᓀᐸᐣ, ᑭᑕᑭᐧᐸᐣ ᑲᑭᐃᓇᐦᐊᑐᐊᐧᐸᐣ ᑐᕑᐊᐣᑐ ᑭᒋᐅᑌᓇᐠ ᐅᐱᒧᓭᐠ ᐊᓴᐸᐱᐡᑯᓯᐊᐧᑲᐣᐠ ᑕᔑᑫᐃᐧᓂᐠ ᑲᐅᐣᒋᐊᐧᐨ ᑲᑭᐃᔑᐃᐧᑐᐊᐧᐸᐣ ᐅᑎᐸᒋᒧᐃᐧᓂᐊᐧ ᐃᐁᐧᓂ ᐅᒋ ᐅᑭᒋᔭᓂᒥᓭᐃᐧᓂᐊᐧ ᑲᓇᑭᐡᑲᒧᐊᐧᐨ ᐅᑕᔑᑫᐃᐧᓂᐊᐧᐠ.
ᐊᐱ ᒐᐠ ᑲᑭᔭᓂ ᑕᑯᐃᐧᒋᐊᐧᐨ ᐃᐧᒋᐅᐡᑲᑎᓴᐣ ᐁᑭᑕᑯᓇᐠ ᐅᓂᒪᑲᐧᐦᐃᑲᐣ ᐃᒪ ᑐᕑᐊᐣᑐ ᑭᒋᐅᑌᓇᐠ, ᐊᒥ ᑲᑭᐃᑯᐨ ᑭᒋᔭᐦᐊᐠ ᑌᐯᐧ ᐱᑯ ᐁᓂᓯᑕᐃᐧᓇᑯᓯᐨ ᐁᐅᑲᐡᑭᐦᐅᐃᐧᓂᐨ ᓂᑲᓂᑕᒪᑫᐃᐧᓂᐠ ᐃᓀᑫ.
“ᑭᐃᑭᑐᐊᐧᐠ, ᐊᐱ ᑲᐊᐧᐸᐣᑕᒪᐣ ᑫᑯᐣ ᒋᐃᔑᑲᑫᐧᐊᓄᑲᑌᐠ, ᐃᓯᓭ ᐱᑯ ᒋᑲᑫᐧᑐᑕᒪᐣ, ᐊᓂᐡ ᐃᔑᓇᑲᐧᐣ ᐁᑲ ᐊᐃᐧᔭ ᒋᑐᑕᐠ,” ᑭᐃᑭᑐ ᐅᐡᑲᑎᐢ 17 ᐁᑕᓱᔭᑭᐃᐧᓀᐨ.
ᒐᐠ ᐅᐃᐧᐣᑕᒪᑯᐃᐧᐣ ᐅᑭᐅᑕᐱᓇᐣ ᐁᑲᐧ ᑕᐡ ᓂᐅᔭᑭᐃᐧᐣ ᑲᔭᓂᓯᓭᓂᐠ, ᐃᐧᐣ ᐅᓂᑲᓂᐡᑲᐊᐧᐣ ᓂᔭᓇᐣ ᐃᐧᒋᐅᐡᑲᑎᓴᐣ 2,000 ᑭᓫᐊᒥᑐᕑᐢ ᒋᐃᓇᐦᐊᑐᐊᐧᐨ ᐁᐧᑎ ᑐᕑᐊᐣᑐ ᐁᐃᐧᑭᑫᐣᑕᒧᓂᐁᐧᐊᐧᐨ ᐱᒋᐳᐃᐧᐣ ᑲᐊᔭᒪᑲᓂᐠ ᐅᑕᔑᑫᐃᐧᓂᐊᐧᐠ ᐊᓴᐸᐱᐡᑯᓯᐊᐧᑲᐣᐠ ᐃᐡᑯᓂᑲᓂᐠ ᑲᐅᒋᐨ.
ᒣᑲᐧᐨ ᐊᐱ ᒥᑭᓯᐃᐧᐱᓯᑦ 1962 ᑲᔭᑭᐊᐧᐠ, ᑎᕑᐊᔾᑎᐣ ᑫᒥᑯᐢ ᐯᐸᓄᑫᐃᐧᓂᐠ ᐊᓄᑭᐃᐧᐣ ᐅᑭᔭᓂ ᓴᓯᑭᐁᐧᐱᓇᓇᐊᐧ ᐃᒪ ᐱᑯ ᓇᐣᑕ 10 ᒣᐟᕑᐃᐠ ᑐᐣᐢ ᐱᒋᐳᐃᐧᐣ ᐊᐧᐱᑯᐣ ᓯᐱᐠ, ᐁᑲᐧ ᐊᐱᐣ ᑭᓄᔐᐠ ᐁᑭᔭᓂ ᐱᒋᐳᐃᐧᐡᑲᑯᐊᐧᐨ ᐃᒪ ᑲᑭᐅᐣᑕᒋᐦᐅᐊᐧᐸᐣ ᐊᓂᔑᓂᓂᐊᐧᐠ ᓂᐦᓯᐣ ᑕᔑᑫᐃᐧᓇᐣ, ᐊᔑᐨ ᐃᐁᐧ ᐊᓴᐸᐱᐡᑯᓯᐊᐧᑲᐣᐠ, ᐊᐧᐸᓯᒧᐣᐠ ᒥᓇ ᐊᑎᐟ ᐊᓂᔑᓂᓂᐊᐧᐠ ᑲᑲᐯᔑᐊᐧᐨ ᐊᐧᐸᐢᑲᐣᐠ ᑲᑭᑲᐯᔑᐊᐧᐸᐣ ᑭᐧᐯᓫ. ᐁᑲᐧ ᑕᐡ ᐊᔕ ᓂᔭᓄᒥᑕᓇ ᑕᓱᔭᑭ ᓂᐢᑕᑦ ᑲᑭᐃᐧᓂᒋᑲᑌᓂᐠ ᐅᓯᐱᒥᐊᐧ, ᐅᑯᐁᐧᓂᐊᐧᐠ ᐊᓂᔑᓂᓂᐊᐧᐠ ᐅᑕᔑᑫᐃᐧᓂᐊᐧᐠ ᑭᔭᐱᐨ ᐅᐱᒥᐃᐧᒋᐃᐧᑯᓇᐊᐧ ᐃᐁᐧᓂ ᐱᒋᐳᐃᐧᓂ.
ᒐᐠ ᑭᐃᑭᑐ ᐃᐁᐧ ᐱᒋᐳᐃᐧᐣ ᐃᒪ ᐃᔑᒪᒋᑐᑕᑫᒪᑲᐣ ᑲᐃᐧᐣᒋᑫᒪᑲᐠ ᐃᐧᔭᐤ ᑫᐃᓇᓄᑭᒪᑲᒪᐠ ᒥᓇ ᑲᐅᐣᒋᐊᐧᐱᓇᓂᐊᐧᐠ, ᒥᓇ ᐅᐊᐧᐸᒪᐣ ᐅᑕᓂᔑᓂᓂᒪᐣ ᐅᑕᔑᑫᐃᐧᓂᐠ ᑭᔭᐱᐨ ᐁᐱᒥ ᒪᒋᑐᑕᑯᐊᐧᐨ.
“ᓂᓂᐣᑭᐡᑲᐊᐧᐠ ᒥᓇ ᑭᐡᐱᐣ ᑫᑯᐣ ᑲᑲᑫᐧ ᐅᑕᐱᓇᒧᐊᐧᐨ, ᐅᐸᓂᐱᑐᓇᐊᐧ,” ᑭᐃᑭᑐ.
ᒐᐠ ᑲᔦ ᑭᐃᑭᑐ ᐅᐡᑭ ᐊᐊᐧᔑᔕᐠ ᐅᐣᒋᐊᐧᓂᑭᐊᐧᐠ.
“ᐃᑭᐁᐧᓂᐊᐧᐠ ᑲᓂᑕᐃᐧᑭᐊᐧᐠ, ᑲᐃᐧᐣ ᒪᐡᑯᐨ ᐅᑭᑭᐡᑲᑯᓇᐊᐧᑐᐠ ᐃᐁᐧᓂ ᐱᒋᐳᐃᐧᓂ ᔕᑯᐨ ᐃᑯ ᓂᓯᑕᐃᐧᓇᑯᓯᐊᐧᐠ ᐁᑭᑭᓂᑕᐃᐧᑭᐊᐧᐨ ᑲᐃᓇᐱᓀᐡᑲᑫᒪᑲᐠ ᐃᐁᐧ ᐱᒋᐳᐃᐧᐣ.”
ᒐᐠ ᑲᔦ ᐅᑭᐸᑯᓭᐣᑕᐣ ᒋᑭᑫᐣᑕᒧᐊᐧᐨ ᐊᐃᐧᔭᐠ ᐃᐁᐧ ᐱᒋᐳᐃᐧᐣ ᐁᑲ ᐃᐧᓂᑯ ᐁᑕ ᐃᒪ ᓂᐱᑲᐠ ᒥᓇ ᑭᓄᔐᐠ ᐁᔑᐃᐧᓂᒋᑫᒪᑲᐠ, ᒥᓯᐁᐧ ᐱᑯ ᑲᐃᔑᓇᑲᐧᐠ ᐊᐦᑭᑲᐠ ᐃᔑᒥᓯᑌᐡᑲᒪᑲᐣ ᐊᓂᐡ ᓂᐱ ᒥᓯᐁᐧ ᐃᔕᒪᑲᐣ.
“ᑲᐃᐧᐣ ᑲᔦ ᑲᓇᑫ ᒋᑭᐊᒪᐧᔭᐣᐠ ᐊᐃᐧᔭᔑᔕᐠ ᐊᐧᑭᒪᑲᒥᑲᐠ ᑲᐸᐸᒥᔭᐊᐧᐨ ᐁᑯᑕᒪᐠ ᒋᐅᒋ ᐱᒋᐳᔭᐣᐠ, ᐊᓂᐡ ᐱᑯ ᑫᑯᐣ ᑲᐅᐣᒋ ᒪᒋᑐᑕᑯᔭᐠ ᑫᐃᐧᓇᐊᐧ ᐱᑯ ᐊᐱᐣ ᐊᐃᐧᔭᔑᔕᐠ ᐅᑐᐣᒋ ᒪᒋᑐᑕᑯᓇᐊᐧ ᑕᐱᓇᑲ ᑫᐃᐧᓇᐊᐧ ᐅᒥᓂᑲᐧᑕᓇᐊᐧ ᓂᐱᓂ ᑫᓂᓇᐃᐧᐟ ᑲᒥᓂᑲᐧᑕᒪᐠ,” ᑭᐃᑭᑐ.
ᐯᔑᑯᐱᓯᑦ ᐅᑕᓇᐠ ᒐᐠ ᐅᑭᐱ ᒪᒥᑐᓀᑕᐣ ᐁᐃᐧᐱᒧᓭᐃᐧᓂᑫᐨ ᐁᑲᐧ ᑕᐡ ᐅᑭᑲᑫᐧᒋᒪᐣ ᐅᒪᒪᒪᐣ ᐊᐣᑎ ᑫᐅᐣᑎᓇᐠ ᐃᐧᐣᑕᒪᑫᐃᐧᓂ, ᐅᑕᓇᐠ ᑭᐱᐃᔑᒋᑫᐸᓂᐣ ᐁᑭᐱ ᐅᓇᑐᐸᐣ ᐅᐱᒧᓭᐃᐧᐣ. ᐅᑭᐃᐧᒋᐃᐧᑯᐣ ᑕᐡ ᐃᒪ ᐱᑯ ᐅᑕᔑᑫᐃᐧᓂᐠ ᑲᐅᒋᓂᐨ ᐅᐡᑲᑎᓴᐣ ᔑᓂᐢ ᑎᐢᕑᐅᓭ ᒥᓇ ᒍᓫᐃᐣ ᐅᑭᒪᐃᐧᓫᐃᓫᐃᐣ, ᐁᑲᐧ ᐊᔑᐨ ᑯᑕᑭᔭᐠ ᐸᑲᐣ ᑕᔑᑫᐃᐧᓂᐠ, ᓂᐣᓄᑕᐊᐧ ᕑᐃᒋᕑᐟ ᒥᓇ ᑭᓫᐃᐳᕑᐟ ᐊᑯᐱ.
ᐁᐟᕑᐃᔭᐣ ᐊᑯᐱ ᐁᐧᑎ ᐢᐅᐧᐣ ᓫᐁᐠ ᒪᓂᑐᐸ ᐁᐅᒋᐨ ᐅᑭᐅᓀᐣᑕᐣ ᒋᑕᑭᐧᐨ ᐱᒧᓭᐃᐧᓂᐠ ᐊᐱ ᑲᑭᐃᐡᑲᐧ ᐊᔭᒥᑐᐸᐣ ᒐᐠ ᐅᑎᐸᒋᒧᐃᐧᐣ ᐃᒪ ᐱᐊᐧᐱᑯᐠ ᑲᐅᒋ ᒪᓯᓇᐦᐊᒪᑎᓇᓄᐊᐧᐠ.
“ᑫᓂᐣ ᐣᑭᓇᑕᐁᐧᐣᑕᐣ ᒋᐃᐧᒋᑕᐧᔭᐣ ᐅᒪ ᑭᒋᑫᑯᐣ ᑲᐃᔑᒋᑫᐊᐧᐨ ᒥᓇ ᐱᑯ ᐁᐃᐧᐅᒋ ᐱᒥᐊᓱᐡᑲᐊᐧᐠ, ᒥᑕᐡ ᑲᑭᐊᐣᑕᐃᐧ ᓇᑭᐡᑲᐊᐧᐠ ᐁᐧᑎ ᐊᓴᐸᐱᐡᑯᓯᐊᐧᑲᐣᐠ, ᐣᑭᔭᓂᑭᑫᓂᒥᑎᒥᐣ, ᒥᓇ ᐣᑭᔭᓂᑭᑫᓂᒥᒪᐣ ᐅᑐᑌᒪᐣ ᐁᑲᐧ ᓄᑯᑦ ᐣᑐᑌᒪᐠ ᐃᑭᐁᐧᓂᐊᐧᐠ,” ᑭᐃᑭᑐ 23 ᑕᓱᔭᑭᐃᐧᓀ. “ᒪᐊᐧᐨ ᑭᒋᑫᑯᐣ ᓂᐱ ᐁᑲᐧ ᐣᑕᔕᐊᐧᐸᐣᑕᐣ ᒋᐃᐧᑭᔑᑐᔭᐣ ᐅᐁᐧ ᐱᒧᓭᐃᐧᐣ.”
ᐅᐱᒧᓭᐠ ᑭᒪᒐᐊᐧᐠ ᐊᓴᐸᐱᐡᑯᓯᐊᐧᑲᐣᐠ ᒣᑲᐧᐨ ᓂᑭᑯᐱᓯᑦ 29 ᑲᐃᓇᑭᓱᓂᐨ. ᒐᐠ ᐃᑭᑐ ᓂᐢᑕᑦ ᑲᐱᒥᑯᓇᑲᐠ ᒪᐊᐧᐨ ᑭᔭᓂᒪᐣ ᐁᑲ ᐁᐧᓴ ᑲᑭᐅᑐᑕᐸᓂᐊᐧᐨ ᒥᓇ ᐁᑲ ᐁᑭᐅᔓᓂᔭᒥᐊᐧᐨ. ᐯᔑᑲᐧ ᐁᑎᐱᑲᓂᐠ, ᑲᐃᐧᐣ ᐅᑐᐣᒋᐊᔭᓯᓇᐊᐧ ᑫᐃᔑᓂᐸᐊᐧᐨ ᒥᓇ ᑫᒥᒋᐊᐧᐨ, ᐊᑲᐧᒋᐠ ᑭᐊᔭᐊᐧᐠ ᒣᑲᐧᐨ ᐁᑭᒋᒪᒋᑭᔑᑲᓂᐠ.
“ᐊᑲᐧᒋᐠ ᓂᑭᓂᐸᒥᐣ ᒪᐊᐧᐨ ᐁᑭ ᑭᒋᑕᑲᔭᐠ ᐁᑲᐧ ᐊᐱᐣ ᓂᐣᑭᔭᓂᒪᒋᐦᐊᑐᒥᐣ ᑲᔭᓂᑭᔐᐸᔭᐠ,” ᑭᐃᑭᑐ ᒐᐠ. “ᐃᑫᐧ ᓂᐣᑭᐅᑕᐱᓂᑯᒥᐣ ᓂᑭᐃᔑᐃᐧᓂᑯᒥᐣ ᐊᐧᔾᐟᐱᐡ ᐯ ᐁᑭᐱᐣᑎᑲᓂᑯᔭᐣᐠ ᒥᓇ ᐁᑭᐊᔕᒥᑯᔭᐣᐠ.”
ᐁᑲᐧ ᐊᐱᐣ ᓇᑫ, ᐅᑯᐁᐧᓂᐊᐧᐠ ᐅᐱᒧᓭᐠ ᐅᑭᐃᐧᒋᐦᐃᑯᐊᐧᐣ ᒐᐠ ᐅᑯᒪᐣ ᒣᕑᐃᔭᐣ ᐢᐁᐧᔾᐣ, ᐃᐧᐣ ᑕᐡ ᐅᐱᒥᐱᓱᑕᒪᑯᐊᐧᐣ.
ᒣᑲᐧᐨ ᒪᑯᐱᓯᑦ 22, ᑭᑕᑯᔑᓄᐠ ᑕᐣᑐᕑ ᐯ ᐁᑲᐧ ᓂᔓᑎᐱᑲ ᑭᐊᔭᐊᐧᐠ ᐃᒪ ᐅᑌᓇᐠ ᐁᑭᐊᓀᐧᔑᓄᐊᐧᐨ ᒥᓇ ᐁᑭᐊᔭᒥᐦᐊᐊᐧᐨ ᐅᐡᑲᑎᓴᐣ ᐊᓂᐣ ᐁᓯᓭᐊᐧᐨ ᐅᑕᔑᑫᐃᐧᓂᐊᐧᐠ. ᒐᐠ ᑭᐃᑭᑐ ᒋᔭᓂ ᑲᑭᐱᒋᐊᐧᐨ ᐊᑎᐟ ᑕᔑᑫᐃᐧᓇᐣ ᑲᔭᓂᐃᔕᐊᐧᐨ ᒋᐊᓂᑕᑎᐸᒋᒧᐊᐧᐨ.
“ᐣᑲᑫᐧᑐᑕᐣ ᑫᑭᐅᐣᒋ ᐊᔭᒥᐦᐊᑲᐧ ᐊᐃᐧᔭᐠ,” ᒐᐠ ᑭᐃᑭᑐ. “ᐊᒥ ᐁᓀᐣᑕᒪᐣ ᑲᐱᒥᐃᐧᑐᔭᐣᐠ ᐣᑎᐸᒋᒧᐃᐧᓂᓇᐣ ᒋᒪᐡᑲᐃᐧᑕᑲᐧᐠ ᐊᓂᐡ ᐁᐅᐡᑲᑎᓯᔭᐣᐠ.”
ᑭᐅᓇᒋᑫᐊᐧᐠ ᒋᔭᓂ ᑭᐱᒋᐊᐧᐨ ᐃᒪ ᐱᐠ ᓯᐱᐠ, ᒥᒋᐱᑯᑎᐣ, ᓱᓭᐣᐟ ᒪᕑᐃ, ᓱᕑᐱᐣᐟ ᓯᐱ, ᓴᐟᐯᕑᐃ ᒥᓇ ᐳ ᓱᓫᐃ ᐃᐡᑯᓂᑲᓂᐠ.
ᒐᐠ ᐃᑭᑐ ᐊᒋᑕᐨ ᑭᔭᓂᐸᐧᑕᐃᐧᓭᓂ ᐅᐱᒧᓭᐃᐧᓂᐊᐧ ᓂᐢᑕᑦ ᑲᔭᓂᒪᒋᑕᐊᐧᐨ, ᐁᑲᐧ ᔕᑯᐨ ᐊᔕ ᐅᑕᔭᐊᐧᐊᐧᐣ ᐅᑕᐸᓇᐣ ᒥᓇ ᐅᑕᓂᑌᐱᓇᓇᐊᐧᐣ ᐸᑭᑎᓂᑫᐃᐧᓇᐣ, ᐊᒥ ᑲᑭᐃᓀᐣᑕᐠ ᒋᔭᓂ ᑕᑯᔑᓄᐊᐧᐨ ᑐᕑᐊᐣᑐ ᒣᑲᐧᐨ ᑲᑭᒋᐱᒥᐸᐦᐃᑎᓇᓄᐊᐧᐠ 2012 ᓴᑭᐸᑲᐃᐧᐱᓯᑦ 4 ᐃᓇᑭᓱᓂᐨ, ᒥᐦᐃᒪ ᑕᐡ ᐊᐱ ᑫᐃᔑᐸᑭᑎᓇᐠ ᐅᑎᐸᒋᒧᐃᐧᐣ.
ᒐᐠ ᐅᐸᑯᓭᐣᑕᐣ ᒋᐱᒥᔭᓄᑕᐠ ᐅᑲᓄᑫᒥᐁᐧᐃᐧᐣ ᒋᒪᓇᒋᒋᑲᑌᐠ ᓂᐱ ᐃᒪ ᐊᓂᔑᓂᓂᐃᐧ ᑕᔑᑫᐃᐧᓇᐣ ᑲᐃᔑᑕᑲᐧᑭᐣ.
“ᐃᓀᐣᑕᑲᐧᐣ ᐃᐧᐸᐨ ᐃᑯ ᒋᔭᓂᐊᐧᓂᑫᐣᑕᒧᐊᐧᐨ ᐊᐃᐧᔭᐠ, ᒥᑕᐡ ᑲᐅᐣᒋ ᐃᓀᐣᑕᒪᐣ ᒋᐱᒥᐃᐧᑐᔭᐣ ᐅᐁᐧ ᐃᐧᐣᑕᒪᑫᐃᐧᐣ ᑲᐯᐦᐃ ᐱᑯ ᒋᒪᐡᑲᐃᐧᑕᑲᐧᐠ, ᒋᒪᒥᑲᒋᑲᑌᐠ ᑭᓂᐱᒥᓇᐣ,” ᑭᐃᑭᑐ.