ᐊᐊᐧᔑᒣ ᐊᓂᓯᐣᑌᐣᑕᑲᐧᐣ ᐱᐊᐧᐱᑯᑲᐣ ᐅᐣᒋ

ᒪᑕᐊᐧ ᐅᑭᒪᑲᓇᐠ ᑲᑭᐃᑭᑐᐊᐧᐸᐣ ᐁᓇᑕᐁᐧᐣᑕᒧᐊᐧᐨ ᐁᑲ ᐁᐧᓴ ᒋᑲᑫᐧᑭᔕᑕᐸᓄᑲᑕᒧᐊᐧᐨ ᐅᑐᓇᒋᑫᐃᐧᓂᐊᐧ ᐅᑯᐁᐧᓂᐊᐧᐠ ᐱᐊᐧᐱᑯᑫᐃᐧ ᐱᒧᒋᑫᐃᐧᓇᐣ ᑲᑲᓇᐊᐧᐸᑕᒧᐊᐧᐨ ᐁᑲᐧ ᒥᓇ ᑲᐸᐸᔑᒥᐣᑕᐧ ᒋᔭᓂ ᐅᓀᐣᑕᒧᐊᐧᐨ ᐱᐊᐧᐱᑯᑫᐃᐧᓂ ᐅᐣᒋ ᐊᔕ ᐅᑭᐱᐃᐧᐣᑕᒪᑯᐊᐧᐣ ᒋᐃᐧᒋᑲᐸᐃᐧᑕᑯᐊᐧᐨ ᑯᑕᑭᔭᐠ ᐊᓂᔑᓂᓂᐊᐧᐠ ᐅᒪ ᑌᑎᐸᐦᐃ ᑲᑲᐯᔑᐊᐧᐨ ᐃᐡᑯᓂᑲᓇᐣ ᑭᐁᐧᑎᓄᐠ ᐅᐣᑌᕑᐃᔪ.
ᐅᑕᓇᐠ ᑲᑭᐱᒥᑯᓇᑲᓂᐠ ᐅᑭᐸᑭᑎᓇᓇᐊᐧ ᐅᒪᓯᓇᐦᐃᑲᓂᐊᐧ ᐊᓂᔑᓇᐯ ᐊᐢᑭ ᐱᒧᒋᑫᐃᐧᓂᐠ ᒥᓇ ᒪᐡᑭᑯᐊᐧᐠ ᐅᑭᒪᑲᓇᐠ ᐁᐃᐧᐣᑕᒧᐊᐧᐨ ᐁᐃᐧᒋᑲᐸᐃᐧᑕᐊᐧᐊᐧᐨ ᒪᑕᐊᐧ ᐅᑭᒪᑲᓇᐠ ᑲᐃᔑᐸᑯᓭᓂᒧᐊᐧᐨ.
ᒪᐡᑭᑯᐊᐧᐠ ᑭᒋᐅᑭᒪᑲᐣ ᐢᑕᐣ ᓫᐅᑎᐟ ᑭᐃᑭᑐ ᑲᑭᐃᔑ ᐊᔓᑕᒪᐃᐧᑕᐧᐸᐣ ᐸᐣᑭ ᐁᑕ ᒋᒥᓂᑕᐧ ᑎᐸᐦᐊᒪᑯᐃᐧᐣ ᐃᑭᐁᐧᓂᐊᐧᐠ ᐊᓂᔑᓂᓂᐊᐧᐠ ᐃᒪ ᐯᔓᐨ ᐅᑲᐯᔑᐃᐧᓂᐊᐧᐠ ᑲᐃᐧᑕᓇᓄᑲᑌᓂᐠ ᐱᐊᐧᐱᑯᑲᓂ ᐁᐧᓴ ᓄᐣᑕ ᐃᔑᓇᑲᐧᓂ, ᐁᑲᐧ ᑕᐡ ᒥᓇ ᓇᑕᐁᐧᐣᑕᑲᐧᐣ ᐊᓂᔑᓂᓂᐊᐧᐠ ᒋᑭᓇᑐᑕᐃᐧᐣᑕᐧᐸᐣ ᑫᐃᐧᓇᐊᐧ ᑲᐃᓀᐣᑕᒧᐊᐧᐨ ᒥᓇ ᐊᓂᐣ ᐊᐱ ᑫᓇᐦᐃᓭᐊᐧᑫᐣᑕᒧᐊᐧᐨ ᒋᒪᑕᓄᑲᑌᓂᐠ ᐱᐊᐧᐱᑯᑲᓂ ᑭᐁᐧᑎᓄᐠ ᐅᐣᑌᕑᐃᔪ.
“ᑫᓂᓇᐃᐧᐟ ᒥᑐᓂ ᓂᐊᐧᐊᐧᓀᐣᑕᒥᐦᐃᑯᒥᐣ ᐅᐁᐧ ᑲᔭᓂᐸᐸᔑ ᒪᑕᓄᑲᑕᒧᐊᐧᐨ ᐁᑲ ᑲᓇᑫ ᓴᑫᐣ ᑲᐱᓯᐢᑫᓂᒪᑲᓄᐨ ᐊᓂᔑᓂᓂ ᑫᐃᐧᐣ ᑲᐃᔑᑲᓇᐊᐧᐸᒥᑯᐃᐧᓯᐨ ᒥᓇ ᑲᐃᐦᑯᓭᓂᐠ ᐅᑕᑭᐃᐧᑎᐯᐣᒋᑫᐃᐧᐣ,” ᑭᐃᑭᑐ ᓫᐅᑎᐟ.
ᑭᒋᐅᑭᒪᑲᐣ ᑭᐃᑭᑐ ᒪᐡᑭᑯᐊᐧᐠ ᐅᑭᒪᑲᓇᐠ ᑕᔭᔓᑲᐸᐃᐧᐊᐧᐠ ᑫᒋᐊᐧᐠ ᐃᑯ ᒋᒪᐃᐧᓀᐡᑲᐊᐧᐊᐧᐨ ᑭᒋᑲᑦᐸᓂᐠ ᐅᒪ ᑲᐅᒋ ᐸᐸᒥᓯᐊᐧᐨ ᐊᐧᑲᐦᐃ ᑲᐃᐧᐃᔑᑲᑫᐧᒪᒋᑐᐊᐧᐨ ᐱᐊᐧᐱᑯᑲᓂ ᒋᓇᑯᑐᐊᐧᐨ ᐁᐃᐧᒋᑲᐸᐃᐧᑕᐊᐧᐊᐧᐨ ᒪᑕᐊᐧ ᑕᔑᑫᐃᐧᓇᐣ.
“ᓂᑲᐧᔭᐣᒋᒥᐣ ᒋᔭᓂᐃᐧᒋᑲᐸᐃᐧᑕᐊᐧᑭᑕᐧ ᓂᐢᑌᓯᓇᐣ ᒥᓇ ᓂᑕᐁᐧᒪᓇᐣ ᒋᓄᐣᒋᑲᑌᓂᐠ ᐅᑕᔭᒥᐃᐧᓂᐊᐧ,” ᑭᐃᑭᑐ ᓫᐅᑎᐟ. “ᐊᔕ ᐣᑕᓇᑭᐱᑲᑫᐧᒋᑐᒥᓇᐸᐣ ᐅᐁᐧ, ᑲᐃᐧᐣ ᑕᐡ ᐊᐃᐧᔭ ᒋᑭᐅᐣᒋ ᐱᓯᐣᑕᑯᔭᐣᐠ. ᒥᐣᒋᓇᐁᐧᐣᔦᑕᑲᐧᐣ ᐅᐁᐧ ᑲᑐᑕᑯᔭᐠ ᔕᑯᐨ ᒥᐱᑯ ᐁᑕ ᐁᔑᓇᑲᐧᐠ ᐅᐁᐧ ᒋᑭᑐᑕᒪᐠ.”
ᐊᒥᐦᐅᐁᐧᓂ ᑲᑭᐃᑭᑐᐸᐣ ᓫᐅᑎᐟ ᐯᔑᑯᐱᓯᑦ ᐃᔑᓇᑫ ᐊᐱ ᐊᐧᐁᐧ ᓀᐡᑲᐣᑕᑲ ᐅᑭᒪᑲᐣ ᐱᑕᐣ ᒧᓂᔭᐢ ᑲᑭᐃᑭᑐᐸᐣ ᐅᐱᒪᑎᓯᐃᐧᐣ ᒋᔭᐸᒋᑐᐨ ᒋᑭᐸᑯᐡᑲᐠ ᑲᐃᐧᐅᔑᒋᑲᑌᐠ ᐊᔓᑲᐣ ᒋᐅᒋᐊᔓᑕᒧᒋᑲᑌᐠ ᐅᑕᐸᓂᒥᑲᓇ ᐃᒪ ᐊᑕᐊᐧᐱᐢᑲᐟ ᓯᐱᐠ.
ᐁᑲᐧ ᑫᐃᐧᓇᐊᐧ ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᑭᒪᓯᓇᐦᐅᑎᓱᐸᓂᐠ ᒣᑲᐧᐨ ᓴᑭᐸᑲᐃᐧᐱᓯᑦ 25 ᐁᑭᐃᑭᑐᐊᐧᐨ ᒋᐃᐧᒋᑲᐸᐃᐧᑕᐊᐧᐊᐧᐨ ᒪᑕᐊᐧ ᐅᑭᒪᑲᓇᐠ ᑲᓇᑕᐁᐧᐣᑕᒥᓂᐨ ᐱᓇᒪ ᒋᑭᐱᑎᓂᑲᑌᐠ ᐊᓄᑭᐃᐧᐣ ᒥᓇ ᐱᐊᐧᐱᑯᑲᓂ ᑲᑦᐸᓂᐠ ᒋᓴᑭᒋᓂᔕᐦᐅᐣᑕᐧ ᐃᒪ ᑲᐃᐧᐃᔑ ᒪᑕᓄᑭᐊᐧᐨ.
ᐁᐃᓇᓯᓇᐦᐃᑲᑌᓂᐠ ᑲᑭᒪᓯᓇᐦᐅᑎᓱᐊᐧᐨ, ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐅᑭᑲᓄᓇᐊᐧᐣ ᑲᓇᑕ ᐅᑭᒪᐅᐣ, ᐅᐣᑌᕑᐃᔪ ᐅᑭᒪᐅᐣ ᐁᑲᐧ ᒥᓇ ᑲᑦᐸᓂ ᒋᐊᔑᑎᓇᐊᐧᐨ ᒪᑕᐊᐧ ᐃᒪ ᐃᓀᑫ “ᑲᐃᐧᔭᓂᔑ ᒪᑕᓄᑲᑕᒧᐊᐧᐨ ᑫᑯᓇᐣ ᐯᑭᐡ ᒋᐅᒋ ᑎᐸᐸᐣᑕᒧᐊᐧᐨ ᑲᐃᔑᑲᓇᐧᐊᐸᒥᑯᓯᐊᐧᐨ ᓂᑲᐣ ᒋᑲᑫᐧᒋᒪᐊᐧᐨ ᐁᒪᐧᔦ ᑫᑯᐣ ᐃᐧᔭᓂᔑᒪᑕᓄᑲᑕᒧᐊᐧᐨ ᐅᑕᓄᑭᐃᐧ ᐅᓇᒋᑫᐃᐧᓂᐊᐧ ᐃᒪ ᑲᐧᐃᐃᔑᒪᑕᓄᑲᑌᐠ ᐱᐊᐧᐱᑯᑲᐣ.”
ᐊᓂᔑᓇᐯ ᐊᐢᑭ ᒪᓯᓇᐦᐅᑎᓱᐃᐧᐣ ᑲᑭᐊᐧᑲᐃᐧᓇᐣᐠ ᐊᐧᑯᔑᐠ ᐅᑭᒪᑲᐣ ᑌᐱᐟ ᐯᐱᐣ ᐁᑲᐧ ᑯᑕᐠ ᑲᑭᐊᐧᑲᐃᐧᓇᐣᐠ ᐱᑕᐯᑯᐠ ᐅᑭᒪᑲᐣ ᐊᐣᑕᓄ ᓴᐧᓫᐊᒪᐣ.
ᓴᐧᓫᐊᒪᐣ ᑭᐃᑭᑐ ᐅᑯᐁᐧᓂᐊᐧᐠ ᑭᒋᐅᑭᒪᐠ ᒥᓇ ᑲᑦᐸᓂ ᒥᐱᑯ ᑭᔭᐱᐨ ᐁᑐᑕᒧᐊᐧᐨ ᐁᑲ ᐁᐱᓯᐢᑫᐣᑕᒧᐊᐧᐨ ᐊᓂᔑᓂᓂᐊᐧᐠ ᑫᐃᐧᓇᐊᐧ ᑲᐃᔑᐱᒧᓂᑎᓱᐊᐧᐨ ᐃᒪ ᐅᑕᑭᒥᐊᐧᐠ ᒥᓇ ᐃᒪ ᓴᑲᐦᐃᑲᓇᐣ ᐁᐧᑎ ᑭᐁᐧᑎᓄᐠ ᐅᐣᑌᕑᐃᔪ ᑲᑕᔑᑫᐊᐧᐨ.
“ᑫᑲᐱ ᑕᐃᓯᓭ ᒋᔭᐸᒋᑐᔭᐣᐠ ᑲᑭᐃᔑᒥᓂᑯᐃᐧᓯᔭᐣᐠ ᐣᐱᒧᑕᒪᓱᐃᐧᓂᓇᐣ, ᑲᐃᐦᑯᓭᐠ ᒋᔭᑯᑎᐯᐣᒋᑫᔭᐣᐠ ᒥᓇ ᑲᑎᐯᐣᑕᒪᐣᐠ ᐣᑕᑭᒥᓇᐣ ᒥᓇ ᓴᑲᐦᐃᑲᓇᐣ,” ᑭᐃᑭᑐ ᓴᐧᓫᐊᒪᐣ.
ᐣᑯᑕᐧᓱ ᒪᑕᐊᐧ ᐃᐡᑯᓂᑲᓇᐣ ᐅᑭᐸᑭᑎᓇᓇᐊᐧ ᐅᑎᐸᒋᒧᐃᐧᓂᐊᐧ ᒣᑲᐧᐨ ᓴᑭᐸᑲᐃᐧᐱᓯᑦ 25 ᒋᐅᔑᑐᐊᐧᐨ ᐅᒪᓯᓇᐦᐃᑲᓂᐊᐧ ᐁᑲᓄᓂᑕᐧ ᒋᓂᑲᑌᐡᑲᐊᐧᐨ ᑲᑭᓇ ᑲᑦᐸᓂᐣ ᑲᓇᓇᑕᐊᐧᓯᓂᐁᐧᐊᐧᐨ ᒥᓇ ᑲᑭᐃᔑ ᑲᑲᐯᔑᐃᐧᓂᑫᐊᐧᐨ ᐃᒪ ᒪᑕᐊᐧ ᐊᓂᔑᓂᓂᐃᐧᐊᐦᑭᐣᐠ.
“ᑭᓫᐃᑊᐢ, ᓇᐧᕑᐊᐧᐣᐟ ᒥᓇ ᑲᑭᓇ ᑯᑕᑭᔭᐣ ᐱᐊᐧᐱᑯᑲᓂ ᑲᑦᐸᓂᐊᐧᐣ ᑕᒥᓇᐊᐧᐠ 30 ᑕᓱᑭᔑᑲ ᒥᓂᑯᐠ ᐊᐱ ᑲᑭᐸᑭᑎᓂᑲᑌᐠ ᒪᓯᓇᐦᐃᑲᐣ ᒋᔭᓂᓴᑲᑭᓂᑫᐊᐧᐨ ᐁᑲᐧ ᒋᔭᓂ ᓂᑲᑌᐡᑲᐊᐧᐨ ᐣᑕᑭᒥᓇᐣ,” ᑭᐃᑭᑐ ᐁᕑᐅᓫᐊᐣᐟ ᐅᑭᒪᑲᐣ ᓴᐣᓂ ᑲᐣᔭᐣ ᒣᑲᐧᐨ ᓴᑭᐸᑲᐃᐧᐱᓯᑦ 28.
ᐁᑲᐧ ᒥᓇ ᓀᐡᑲᐣᑕᑲ ᐊᓂᔑᓂᓂᐊᐧᐠ ᑕᐃᔕᐊᐧᐠ ᑐᕑᐊᐣᑐ ᒣᑲᐧᐨ ᒍᓫᐊᔾ ᐱᓯᑦ 5, ᒋᑲᑫᐧᒋᒪᐊᐧᐨ ᑭᒋᐊᓯᓂᑫᐃᐧᐸᑦᑲᓂᐃᐧᑭᒪᐣ ᑫᐃᐧᓇᐊᐧ ᐱᑯ ᑎᐸᐣ ᐊᓂᔑᓂᓂᐊᐧᐠ ᒋᐱᑭᓯᓄᐊᐧᐨ ᒋᐅᐣᒋ ᐅᓀᐣᑕᒧᐊᐧᐨ ᐁᑲ ᑲᐃᔑᓇᐦᐃᓭᐠ ᐅᓀᐣᑕᒧᐃᐧᐣ ᑲᐃᐧᐃᓇᒧᒋᑲᑌᐠ ᐱᐊᐧᐱᑯᑲᓂᐠ.
ᓫᐅᑎᐟ ᑭᐃᑭᑐ ᐃᐁᐧ ᑲᔭᓄᒋᓇᐣᑭᐦᐅᒪᑲᐠ ᓇᓀᓯᓇᒥᑲᓇᐊᐧᐸᒥᑐᐃᐧᐣ ᐱᐊᐧᐱᑯᑫᐃᐧᐣ ᐅᒋ ᐃᑭᐁᐧᓂᐊᐧᐠ ᐃᑯ ᐊᓯᓂᑫᐃᐧᑭᒪᐠ ᒥᓇ ᑭᒋᐅᑭᒪᐠ ᑲᑐᑕᒧᐊᐧᐨ ᐁᑲ ᑲᐱᓯᐢᑫᓂᒪᐊᐧᐨ ᐊᓂᔑᓂᓂᐊᐧᐣ ᑫᐃᐧᐣ ᑲᐃᔑᓇᑕᐁᐧᐣᑕᒥᓂᐨ ᐃᒪ ᐱᐊᐧᐱᑯᑲᓂ ᐊᓄᑭᐃᐧᓂᐠ.
ᓫᐅᑎᐟ ᑭᐃᑭᑐ ᐊᓂᔑᓂᓂᐊᐧᐠ ᑲᑭᐃᐧᐣᑕᒧᐊᐧᐸᐣ ᐊᓂᐣ ᐁᔑᓇᑕᐁᐧᐣᑕᒧᐊᐧᐨ ᐁᑲ ᑲᑭᐅᐣᒋ ᐱᓯᐢᑫᒋᑲᑌᓂᐠ ᒥᐅᓄᐁᐧᓂᐊᐧᐣ ᒪᒪᐤ ᒋᐅᒋ ᑭᐁᐧᑲᓇᐊᐧᐸᒋᑲᑌᑭᐣ ᐊᐦᑭᐃᐧ ᓇᓇᑕᐃᐧᑭᑫᐣᒋᑫᐃᐧᐣ; ᑲᑭᓇᑐᑕᒪᓄᐊᐧᐠ ᒋᐅᔑᒋᑲᑌᐠ ᐊᓯᓂᐠ ᑲᑕᔑᐅᔑᐦᐃᑕᐧ ᐃᒪ ᒋᐃᔑᐅᔑᒋᑲᑌᐠ ᒪᑕᐊᐧ ᐊᐦᑭᐠ; ᑲᑭᓇᑐᑕᒪᓄᐊᐧᐠ ᔓᓂᔭ ᑫᑭᐅᐣᒋ ᑲᐡᑭᐦᐅᐊᐧᐨ ᐊᓂᔑᓂᓂᐊᐧᐠ ᒋᑕᑭᐧᐊᐧᐨ ᓇᓇᑕᐃᐧᑭᑫᐣᒋᑫᐃᐧ ᐃᔑᒋᑫᐃᐧᓂᐠ; ᐁᑲᐧ ᒥᓇ ᑲᑭᓇᑕᐁᐧᐣᑕᒧᐊᐧᐨ ᐅᑯᐁᐧᓂᐊᐧᐠ ᓇᐧᕑᐊᐧᐣᐟ ᒥᓇ ᑭᓫᐃᑊᐢ ᒋᒪᓯᓇᐦᐅᑎᓱᐊᐧᐨ ᒋᐅᒋ ᑲᓇᐊᐧᐸᑕᒧᐊᐧᐨ ᐊᓂᔑᓂᓂᐊᐧᐠ ᐁᑲ ᑲᐃᔑᓇᐦᐁᐣᑕᒧᐊᐧᐨ ᑫᑯᓇᐣ.