ᐅᑕᑲᐊᐧᑕᐣ ᒥᓇᐊᐧ ᒋᑭᑭᐁᐧᐸᐣ ᐅᑕᔑᑫᐃᐧᓂᐠ

ᒪᑭ ᓱᐱᔭ ᐊᔕ ᐊᐊᐧᔑᒣ ᓴᐣᑲᓱᔭᑭ ᐊᐱᐣ ᑲᑭᑭᐁᐧᐸᐣ ᐅᑕᔑᑫᐃᐧᓂᐠ ᓂᐱᓇᒥᐠ.
ᑯᑕᑭᔭᐠ ᐃᐧᐣ ᐊᐃᐧᔭᐠ ᐊᐱᐱᑯ ᐅᑐᓇᑐᓇᐊᐧ ᐅᐱᒥᔭᐃᐧᓂᐊᐧ ᑲᐃᐧᑭᐅᑫᐊᐧᐨ ᐃᐡᑯᓂᑲᓂᐠ, ᐁᑲᐧ ᐃᐧᐣ ᒪᑭ, 23 ᑕᓱᔭᑭᐃᐧᓀ ᑲᐃᐧᐣ ᐃᐧᐣ ᒋᑭᐃᓯᓭᓂᐠ ᐃᐁᐧ ᒋᑭᑐᑕᐣᐠ.
ᒣᑲᐧᐨ ᐊᐱ ᐁᐯᔑᑯᔕᐳᔭᑭᐃᐧᓀᐸᐣ, ᒪᑭ ᑭᐊᐣᑕᐃᐧᑲᐯᔑᐸᓂᐠ ᓂᑲᑌᐦᐃ ᑕᔑᑫᐃᐧᓂᐠ. ᐁᑲᐧ ᑭᐸᐧᑕᐃᐧᑕᑯᔑᓄᐠ ᐃᒪ ᑲᑭᐊᐣᑕᐃᐧᐃᔑᑲᐯᔑᐊᐧᐨ, ᒪᑭ ᐅᑭᑲᑫᐧᒋᒪᐣ ᐅᒪᒪᒪᐣ ᐁᐃᐧᑲᐸᔑᒧᐨ ᐊᔕ ᑫᑲᐟ ᐁᔭᓂᐸᐣᑭᔑᒧᓂᐠ.
“ᐁᑲᓄᑫᔭᐣ ᓂᐦᓴᓱᔭᑭᐃᐧᓀᐸᐣ ᐣᑐᔑᒥᑫᐧᑦ ᐁᑊᕑᐅ ᐃᐁᐧ ᐊᐱ, ᑲᐃᐧᐣ ᒋᑲᐡᑭᑐᐸᐣ ᑫᑐᑕᐠ ᒋᑯᑭᐨ” ᑭᐃᑭᑐ. “ᐣᑲᑫᐧ ᑭᑭᓄᐦᐊᒪᐊᐧᐸᐣ ᑕᐡ ᐁᑲᐧ ᐊᐱᐣ ᑲᐃᔑᐊᔑᑭᒋᑯᑭᐸᓂᐦᐅᔭᐣ. ᑲᐃᐧᐣ ᐣᑐᒋᐸᐸᒣᑕᓯᐣ ᐃᐁᐧ ᑲᑭᑐᑕᒪᐣ.”
ᑲᐃᐧᐣ ᐱᓇᒪ ᓂᑲᐣ ᒋᑭᐅᐣᒋᓇᓇᑲᒋᑐᐨ ᐊᐣᑎ ᑲᐃᐧᐃᔑᑯᑭᐨ, ᒥᐱᑯᐊᐱᐣ ᒪᑭ ᑲᐃᔑᐊᔑᑭᒋᐸᓂᐦᐅᐨ ᐁᐃᐧᐊᔑᑭᒋᑯᑭᐨ, ᑭᒥᔕᑭᑎᑲᐧᓀᔑᐣ ᐃᒪ ᑲᐃᔑᑕᐸᓴᐣᑎᒪᓂᐠ. ᒥᑕᐡ ᑲᐃᔑᐁᐧᐱᔑᒧᓄᐨ ᐁᑭ ᑭᐱᐡᑭᐁᐧᐱᓯᓂᐠ ᐅᑲᐧᔭᐁᐧᑲᓂᐠ ᑲᐅᐣᒋᓇᐱᑲᓀᓯᓂᐠ ᐁᑭ ᑭᐱᐡᑭᐁᐧᐱᓯᓂᐠ, ᑯᑕᑭᓂ ᐃᒪ ᑲᐅᐣᒋᐊᓂᑯᑲᓀᓯᓂᐠ ᑭᐸᓴᐸᓀᓯᓂ ᒥᓇ ᑭᐸᑭᐁᐧᐱᓯᓂ ᐅᐊᐧᐃᐧᑲᓀᔭᑊ. ᔐᒪᐠ ᐃᐁᐧ ᑲᐃᐡᑲᐧ ᐃᓯᓭᐨ ᒥᓇ ᑲᐃᐧᐣ ᔐᒪᐠ ᒋᑭᐅᐣᒋᑭᑫᐣᑕᐠ, ᒥᓯᐁᐧ ᑲᐃᓂᑭᓂᐨ ᑭᓂᐳᐃᐧᓭ ᐊᑯᓇᐠ ᐅᑲᐧᔭᐊᐧᐣᐠ.
“ᐣᑭᐊᑲᐧᓯᐱᓂᑯᐠ ᒥᑕᐊᐧᐣᑲᐣᐠ ᐁᑭᐱᒥᔑᒥᑯᔭᐣ,” ᐃᑭᑐ ᒪᑭ ᐁᑭᐁᐧᑲᓄᑫᐨ. “ᐣᑐᓯᐢ ᑌᓯ ᒣᑲᐧᐨ ᐊᐱ ᐃᐁᐧ ᒪᐡᑭᑭᐃᐧᑫᐧᐃᐧᐸᐣ ᐁᑲᐧ ᐅᑭ ᑭᑫᐣᑕᐣ ᑫᑐᑕᐣᐠ.”
ᐅᐊᐧᑯᒪᑲᓇᐣ ᐅᑭᐊᐧᐃᐧᒋᐦᐃᑯᐣ ᐁᑭᓯᑐᑫᐧᔑᒪᑲᓄᐨ ᐁᑲᐧ ᐊᐱᐣ ᒋᒪᓂᐠ ᑭᐅᐣᒋᑭᐁᐧᐃᐧᓇᑲᓄᐨ ᑕᔑᑫᐃᐧᓂᐠ ᐁᑭᐃᔑᑭᐁᐧᐃᓇᑲᓄᐨ. ᑭᑭᒋᐱᓀᓯᐊᐧᐣ ᐁᐧᑎ ᔕᐊᐧᓄᐠ ᑲᐃᐧᐣ ᑕᐡ ᐊᐱᐣ ᒋᑭᐅᐣᒋ ᑕᑯᓭᒪᑲᐠ ᐊᑯᓯᐃᐧᐱᒥᓭᐃᐧᐣ, ᒪᑭ ᑭᑲᓇᐁᐧᓂᒪᑲᓂᐃᐧ ᐊᑯᓯᐃᐧᑲᒥᑯᐠ ᐯᔑᑯᑎᐱᑲ ᐃᒪ ᓂᐱᓇᒥᐠ. ᐁᑲᐧ ᐊᐱᐣ ᑲᔭᓂᐊᐧᐸᓂᐠ ᐃᐧᓂᐯᐠ ᐊᐊᐧᔑᔑᐃᐧᐊᑯᓯᐃᐧᑲᒥᐠ ᑭᐃᔑᐃᐧᓇᑲᓂᐃᐧ, ᒥᐦᐃᒪ ᑲᑭᐃᑭᑐᐊᐧᐨ ᑭᒋᒪᐡᑭᑭᐃᐧᓂᓂᐊᐧᐠ ᐁᑲᐃᐧᑲ ᒥᓇᐊᐧ ᒋᐅᐣᒋᐊᐧᑲᐃᐧᐨ. ᓇᑫ ᐊᐱ, ᒪᑭ ᐅᐦᐸᓇᐣ ᑲᐃᐧᐣ ᒋᑭᐅᐣᒋᐊᓄᑭᓭᓂᐨ ᐁᑲᐧ ᑭᒧᒋᐸᑭᑕᓇᑯᑕᐣᑕᐊᐧᑲᓂᐃᐧ. ᑭᑲᓇᐁᐧᐣᑕᑯᓯ ᐊᑯᓯᐃᐧᑲᒥᑯᐠ ᐃᒪ ᑲᐃᔑᓇᓂᓴᓂᓯᐊᐧᐨ ᐅᑕᑯᓯᐠ ᒥᔑᓄᐱᓯᑦ.
ᒪᑭ ᐅᑭᔕᐳᐡᑲᐣ ᐅᐁᐧᓂ ᑲᑭᐃᔑᐁᐧᐱᓯᐸᐣ ᐁᑭᔭᓂᒪᒥᓄᔭᐨ. ᑭᑭᒋᒪᒋᔕᐧᑲᓂᐃᐧ ᒥᓇ ᒥᔑᓄᔭᑭ ᑭᐱᒥ ᑲᑫᐧᒋᐦᐊᑲᓂᐃᐧ ᑲᑫᐧᒋᐃᐧᓂᐠ, ᐁᑲᐧ ᓄᑯᑦ ᒪᑭ ᐅᑲᐡᑭᑐᐣ ᒋᐊᐧᐊᐧᑲᐃᐧᑎᑲᐧᓀᓂᐨ ᒥᓇ ᒋᐊᐧᐊᐧᑲᐃᐧᓂᑫᓂᐨ. ᐃᒪ ᑲᔦ ᑌᓴᐱᐃᐧᓂᐠ ᐃᔑᔭᐱ ᐁᑭᐃᔑᒋᑲᑌᓂᐠ ᒋᐃᔑᔭᐱᐨ, ᐁᑲᐧ ᒥᓇ ᐯᔑᑯᑲᐯᔑ ᐯᑭᐡ ᐁᐅᐣᒋ ᐱᒥᐃᐧᒋᐦᐊᑲᓂᐃᐧᐨ ᑕᐣᑐᕑ ᐯ ᑲᒪᑭᓯᐊᐧᐨ ᑲᐅᐣᒋᐃᐧᒋᐦᐃᑕᐧ ᒋᐅᒋ ᑲᐡᑭᑐᐨ ᒋᑭᐯᔑᑯᑲᐯᔑᐨ. ᐁᑲᐧ ᑲᔦ ᐅᑕᔭᐣ ᒪᒪᑕᐃᐧᐱᐊᐧᐱᑯᓂ ᑲᒪᒪᑯᓂᑲᑌᓂᐠ ᒋᐅᒋ ᐅᓇᑯᓇᐠ ᑫᔭᓂᐊᐱᒋᑭᔑᑌᓂᐠ ᐱᐣᑎᑲᒥᐠ ᑲᐃᔑᑕᐨ ᒥᓇ ᒋᑕᐊᐧᑯᓇᐠ ᑎᐱ ᒪᓯᓇᑌᓯᒋᑲᓂ.
ᒣᑲᐧᐨ ᐃᐧᓂᑯ ᐅᓇᐦᐁᐣᑕᐣ ᐅᐁᐧᓂ ᑲᐃᔑᓇᐧᑲᓂᐠ ᒪᑭ ᐅᐱᒪᑎᓯᐃᐧᐣ, ᔕᑯᐨ ᐅᔑᑲᑌᐣᑕᐣ ᐅᑕᔑᑫᐃᐧᐣ. ᓂᐅᔕᐳᐊᐦᑭᐃᐧᓀᐸᐣ ᐃᐡᑲᐧᔭᐨ ᑲᑭ ᑭᐁᐧᐸᐣ.
“ᓂᐃᐧᑭᐁᐧ ᒥᓇᐊᐧ ᐁᐃᐧᐊᐧᐸᐣᑕᒪᐣ ᐣᑕᔑᑫᐃᐧᐣ, ᒥᓇ ᓂᐊᐧᑯᒪᑲᓇᐠ,” ᑭᐃᑭᑐ. “ᐃᐁᐧ ᒥᓇ ᒪᐊᐧᐨ ᐱᑲᐧᑕᑭᐣᐠ ᑲᐊᐃᔑᓇᑲᐧᐠ, ᒥᐦᐅᐁᐧ ᒪᐊᐧᐨ ᑲᑫᐧᓇᐁᐧᐣᑕᒪᐣ.”
ᒪᐊᐧᐨ ᐅᑕᓂᒣᐣᑕᐣ ᓇᐱᐨ ᑲᔭᓂᒪᓂᐠ ᒥᓇᐊᐧ ᒋᑭᑭᐁᐧᐨ ᑲᑭᐱᐅᐣᒋᐨ ᐅᑕᔑᑫᐃᐧᓂᐠ.
“ᒪᐊᐧᐨ ᐊᓂᒪᐣ ᐱᒥᔭᐃᐧᓂᐠ ᑲᒪᑭᓯᓇᓂᐊᐧᐠ,” ᑭᐃᑭᑐ ᒪᑭ. “ᒥᔑᐣ ᑫᑯᓇᐣ ᐊᔭᐊᐧᐣ ᐁᑭᐱᐡᑭᑫᒪᑲᑭᐣ.”
ᐊᑎᑲ ᑐᑲᐣ, ᐃᐁᐧ ᒪᐊᐧᐨ ᐃᔑᐊᓂᒪᐣ ᒋᑭᐃᔑᐳᓯᐦᐊᑲᓂᐃᐧᐨ ᐱᒥᓭᐃᐧᓀᓯᐠ ᑲᐃᓇᑯᑌᐠ ᓂᐱᓇᒥᐠ.
ᑯᑕᑭᔭᐣ ᐊᔭᐊᐧᐣ ᑫᑯᓇᐣ ᑫᑭᐅᐣᒋᐊᓂᒥᓭᐸᐣ ᐅᐱᒥᔭᐃᐧᓂᐠ ᒪᑭ ᑭᐡᐱᐣ ᐊᔭᐸᐣ ᐃᒪ ᑕᔑᑫᐃᐧᓂᐠ. ᑲᐃᔑᓀᐊᐧᐣᑯᐊᐧᑕᒧᓂᐠ ᐁᐧᓴ ᑕᑭᑲᐧᑲᐧᐡᑫᐧᓯᓂ ᐅᑌᓴᐱᐃᐧᐣ ᐁᑲᐧ ᒥᓇ ᑫᑲᐟ ᑲᑭᓇ ᐊᐧᑲᐦᐃᑲᓇᐣ ᑲᐃᐧᐣ ᐃᔑᒋᑲᑌᓯᐊᐧᐣ ᒋᑌᓯᓴᑭᓂᑲᑌᑭᐣ ᑫᑭᐅᐣᒋ ᐱᐣᑎᑫᔭᑕᐦᐁᓂᑲᑌᑭᐣ ᑌᓴᐱᐃᐧᓇᐣ.
ᐁᑲᐧ ᒥᓇ ᐃᐁᐧ ᒪᑭ ᑲᐃᔑᔭᐨ ᐅᐱᒪᑎᓯᐃᐧᓂᐠ ᒪᐊᐧᐨ ᐃᑯ ᐁᐊᐧᑫᐃᐧᓂᓂᒋᔭᐨ ᓇᐣᑕ ᒋᐅᒋᐃᓯᓭᐨ.
“ᐊᑎᑲ ᐁᐧᑎ ᑲᐃᔕᔭᐣ ᑕᔑᑫᐃᐧᓂᐠ, ᐁᑲᐧ ᐊᐱᐣ ᐅᐣᒋᐊᑯᓯᔭᐣ, ᒥᐱᑯ ᐁᑕ ᐁᓯᓭᐠ ᒪᐡᑭᑭᐃᐧᑲᒥᑯᓯᐠ ᒋᐃᔕᔭᐣ, ᑲᐃᐧᐣ ᑫᑯᐣ ᒪᐡᑭᑭᐃᐧ ᐃᐧᒋᐦᐃᐁᐧᐃᐧᐣ ᐊᔭᓯᐣ ᓇᐣᑕ ᒥᓇ ᒪᐡᑭᑭᐃᐧᓂᓂᐊᐧᐠ ᐃᒪ ᒋᐊᔭᐊᐧᐨ,” ᑭᐃᑭᑐ. “ᒥᑐᓂ ᑕᐡ ᓂᓂᑌᐣᑕᑲᐧᐣ ᐁᐧᑎ ᒋᐊᐣᑕᐃᐧᐊᔭᔭᐣ, ᐁᐧᓴ ᐁᓂᓇᒥᓯᔭᐣ.”
ᔕᑯᐨ ᒪᑭ ᐅᐃᐧᑲᑫᐧᑐᑕᐣ ᒋᑭᐅᑌᐨ ᐅᑕᔑᑫᐃᐧᓂᐠ ᑲᑭᑕᔑᐅᑦᐱᑭᐨ. ᐅᑭᐅᓀᐣᑕᐣ ᒋᐃᔕᐨ ᓂᐱᓇᒥᐠ ᐊᐱᑕᐊᐧᑭᓱᓂᐨ ᐊᑲᐢᐟ ᐱᓯᑦ ᐣᑯᑕᐧᓱᑯᐣ ᒋᐊᐣᑕᐃᐧᐊᔭᐨ ᐁᑲᐧ ᐊᔕ ᐊᓂᑲᐧᐣᔭᒋ ᑲᐃᐧᑭᐅᑌᐨ.
ᐅᐊᐧᑯᒪᑲᓇᐣ ᐅᐃᐧᒋᐦᐃᑯᐣ ᐁᔭᓂᒪᐊᐧᐣᑐᓇᒧᐊᐧᐨ ᑫᓇᑕᐁᐧᐣᑕᐠ ᒋᔭᐸᒋᑐᐨ ᒣᑲᐧᐨ ᐊᐣᑕᐃᐧᑭᐅᑌᐨ, ᑐᑲᐣ ᓂᐯᐃᐧᐣ ᒥᓇ ᑌᓴᐱᐃᐧᐣ. ᐁᑲᐧ ᒥᓇ ᑫᐅᐣᒋ ᐸᐸᒥᐃᐧᓇᑲᓂᐃᐧᐨ, ᐅᑲᐅᐣᑎᓇᓇᐊᐧ ᐱᒥᑕᐸᒋᑲᓂ ᑲᓴᑭᐱᒋᑲᑌᓂᐠ.
“ᑎᑎᐱᐁᐧᐱᐡᑭᑲᓂᐠ ᑲᐃᔑᐊᐧᑭᑕᒋᑲᑌᐠ ᐃᔑᓇᑲᐧᐣ, ᐁᑲᐧ ᓂᔑᐣ ᐊᐃᐧᔭᐠ ᐣᑲᑭᐸᐸᒥᑲᐣᑎᓂᑯᐠ ᒋᒧᒋᐯᔑᑯᓯᑌᔭᐠ,” ᑭᐃᑭᑐ. “ᑎᑎᐱᓂᑲᓂᐠ ᐃᔑᓇᑲᐧᐣ. ᒥᓇᐧᔑᐣ ᑲᔦ.”
ᑯᑕᑭᔭᐣ ᑲᔦ ᐊᐸᒋᒋᑲᓇᐣ ᐅᑕᔭᓇᐊᐧ ᑫᐅᐣᒋ ᐃᐧᒋᐦᐃᑯᐊᐧᐨ ᒋᐊᔭᔓᐃᐧᓇᑲᓂᐃᐧ, ᑐᑲᐣ ᑫᐅᐣᒋᐊᔕᐧᑕᐦᐁᓇᑲᓂᐃᐧᐨ ᒥᓇ ᒋᐅᑦᐱᓇᑲᓂᐃᐧᐨ.
ᒪᑭ ᑭᐃᑭᑐ ᐁᐃᐧᐃᔕᐨ ᐊᑎᐟ ᑲᑭᓂᑕᐃᔕᐸᐣ ᐊᐱ ᑭᑭᐁᐧᐨ ᓂᐱᓇᒥᐠ.
“ᒪᐊᐧᐨ ᐣᑭᒥᓴᐁᐧᐣᑕᐣ ᒋᑭᐁᐧᐡᑲᔭᐣ ᐃᒪ ᑲᑭᑕᔑᐃᐧᓴᑭᔑᓇᐣ, ᑲᐯᐦᐃ ᐱᑯ ᐣᑎᓀᑕᐣ ᒥᓇᐊᐧ ᐁᐧᐃᐃᔕᔭᐣ,” ᑭᐃᑭᑐ. “ᒥᐢᑕᐃ ᐣᑕᔭᐣ ᒪᐡᑲᐃᐧᓯᐃᐧᐣ ᑲᐅᐣᒋᑲᐡᑭᑐᔭᐣ ᒋᐊᐣᑕᐃᐧ ᐊᐧᐸᐣᑕᒪᐣ ᑲᑭᐃᔑᐃᐧᓴᑭᔑᓇᐣ.”
ᐁᑲᐧ ᒥᓇ ᑯᑕᐠ ᐸᑲᐣ ᐁᓀᐊᐧᐣᑯᑎᓇᓂᐠ ᐊᑲᐧᒋᐠ ᑕᔑᑫᐃᐧᓂᐠ ᒪᑭ ᐁᑭᒋᓀᐣᑕᐠ. ᑭᑲᓄᑫ ᐯᔑᑲᐧ ᐁᑭᐃᓇᑫᐧᐸᐦᐅᑎᓱᐸᐣ ᐁᒥᑕᓱᔭᑭᐃᐧᓀᐸᐣ ᐁᑭᐊᐃᓇᐱᐨ ᐊᐧᑭᑕᑎᓇᐠ ᒣᑲᐧᐨ ᐁᔭᓄᓇᑯᔑᓂᐠ.
“ᐣᑲᓇᐊᐧᐸᒪ ᐱᓯᑦ ᐁᑲᐧ ᐣᑭᓇᓇᑲᑕᐁᐧᐣᑕᐣ ᑲᓂᑲ ᑫᐃᔑᓇᑲᐧᓄᑫᐧᐣ ᓂᐱᒪᑎᓯᐃᐧᐣ ᐁᐧᑎ ᐊᓂᓂᑲᐣ,” ᑭᐃᑭᑐ, ᐁᔓᐃᐧᐣᑫᐧᓂᐨ. “ᐣᑕᒐᑯᐠ ᐣᑭᑲᓄᓂᑯᐃᐧᐢ ᐃᐁᐧ ᐊᐱ. ᒥᑕᐡ ᐃᐁᐧ ᐁᑲ ᐃᐧᑲ ᑲᐊᐧᓂᑫᔭᐣ ᐊᑯᓇᐠ ᐊᐱᐣ ᑲᑭᐃᐧᓴᑭᔑᓇᐸᐣ.”
ᒪᑭ ᒣᑲᐧᐨ ᐅᑕᓄᑲᑕᐣ ᐯᔑᐠ ᐃᐁᐧᓂ ᑲᐃᔑᒥᓴᐁᐧᐣᑕᐠ ᑲᑲᑫᐧᑲᒋᑎᓇᐠ. ᐅᑕᓇᐠ ᓯᑲᐧᓄᐠ ᐊᔕ ᐯᔑᑯᔭᑭ ᐅᑭᑭᔑᑐᐣ ᐃᒪ ᑲᐧᐣ ᑲᐧᓫᐃᐨ ᑲᐱᒥᐃᐡᑯᓄᐃᐧᐨ ᓂᔓᔭᑭ ᒪᓯᓇᑌᓯᒋᑫᐃᐧ ᑭᑭᓄᐦᐊᒪᑯᐃᐧᐣ.
ᐊᔕ ᐅᑭᒪᑕᓄᑲᑕᐣ ᐃᐧᓂᑯ ᑎᐱᓇᐁᐧ ᐁᔭᓄᑲᑕᐠ ᐅᒪᓯᓇᑌᓯᒋᑫᐃᐧ ᑎᐸᒋᒧᐃᐧᐣ ᑲᐃᐧᑭᐅᑌᐨ ᓂᐱᓇᒥᐠ.
ᐃᐁᐧᓂ ᑕᐡ ᐅᐃᐧᑐᑕᐣ, ᒪᑭ ᐁᐃᐧᑎᐸᒋᒪᐨ ᐊᐃᐧᔭᐠ ᑲᒪᑭᓯᐊᐧᐨ.
“ᑲᐃᐧᐣ ᓇᐱᐨ ᒋᑎᐸᒋᒥᑕᐧ ᐊᐃᐧᔭᐠ ᒪᑭᓯᐃᐧᐣ ᑲᑭᑭᐡᑲᑯᐊᐧᐨ ᐁᑲᐧ ᑕᐡ ᐣᑎᓀᑕᐣ ᒋᑭᑲᑫᐧ ᐊᐣᒋᓭᒋᑲᑌᑭᐸᐣ ᐅᐁᐧ ᑲᐃᓯᓭᐠ,” ᑭᐃᑭᑐ. ᐁᑲᐧ ᒥᓇ ᑭᐃᑭᑐ ᐁᐃᐧᐅᔑᑐᐨ ᒪᓯᓇᑌᓯᒋᑫᐃᐧᐣ ᐃᐧᓂᑯ ᒋᐱᒥᑎᐸᒋᒥᑎᓱᐨ.
“ᑕᓴᐧ ᑲᓇᓇᑲᑕᐁᐧᐣᑕᒪᐣ ᑲᐃᔑᓇᓇᑭᐡᑲᒪᐣ ᑫᑯᓇᐣ ᓂᐱᒪᑎᓯᐃᐧᓂᐠ, ᒥᐱᑯ ᐁᐃᓀᐣᑕᒪᐣ ᒋᑭᒪᓯᓇᑌᓭᔭᐸᐣ,” ᑭᐃᑭᑐ. “ᑲᐯᐦᐃ ᑲᔦ ᓂᒥᓴᐁᐧᐣᑕᐣ ᒋᑭᐸᑭᓇᑫᔭᐸᐣ ᐊᐢᑲᐧᕑ ᓂᑎᐸᒋᒧᐃᐧᓂᑫᐃᐧᐣ.”
ᐊᒥ ᐁᔑᑲᓇᐊᐧᐸᒥᑎᓱᐨ ᑫᐃᐧᐣ ᐃᑯ ᐁᐸᐱᒪᑎᓯᐨ ᐁᑲᐧ ᔕᑯᐨ ᒪᐊᐧᐨ ᐁᒥᔕᓂᐠ ᐅᒥᓴᐁᐧᐣᑕᒧᐃᐧᐣ, ᒪᑭ ᑲᔦ ᐅᐸᑯᓭᐣᑕᐣ ᒋᑭᐅᒋ ᒋᑫᐣᑕᒥᐦᐊᐸᐣ ᑯᑕᑭᔭᐠ ᐊᐃᐧᔭᐣ.
“ᐃᐁᐧ ᒪᐊᐧᐨ ᐣᑎᔑᒥᓴᐁᐧᐣᑕᐣ ᒋᒋᑫᐣᑕᒥᐦᐊᑲᐧ ᐊᐃᐧᔭᐠ ᑫᐃᐧᓇᐊᐧ ᒋᐱᒥᓂᔕᐦᐊᒧᐊᐧᐨ ᑲᐃᔑᒥᓴᐁᐧᐣᑕᒧᐊᐧᐨ ᒥᓇ ᑫᑭᐅᐣᒋ ᑲᓇᐊᐧᐸᐣᒋᑲᑌᓂᐠ ᐅᑎᔑᒋᑫᐃᐧᓂᐊᐧ ᑫᐧᐃᓇᐊᐧ ᑯᑕᑭᔭᐠ ᒋᔭᓂᑐᑕᒧᐊᐧᐨ,” ᑭᐃᑭᑐ. “ᑭᐡᐱᐣ ᐃᔑᐊᐧᐸᒥᔑᔭᐣ ᐁᑲᐡᑭᑐᔭᐣ ᑫᑯᐣ ᐁᑐᑕᒪᐣ, ᑫᑭᐣ ᑲᑭᑲᐡᑭᑐᐣ.”