ᐅᐡᑲᑎᓴᐠ ᑲᑭᐸᐦᐅᐣᑕᐧ ᑭᑭᓄᐦᐊᒪᐊᐧᐊᐧᐠ ᑫᑭᔭᓄᒋᑲᐡᑭᐦᐅᐊᐧᐨ ᐃᒪ ᐃᓀᑫ ᒪᐣᑐ ᐅᒣᑕᐁᐧᐃᐧᓂᐠ

ᐊᓂᔑᓂᓂᐃᐧ ᐅᐡᑲᑎᓴᐠ ᑲᑭᐸᐦᐅᐣᑕᐧ ᑕᐣᑐᕑ ᐯ ᐅᑌᓇᐠ ᑭᐊᐧᐸᑕᐦᐊᐊᐧᐠ ᓂᑲᓂᑕᒪᓱᐃᐧᐣ ᒥᓇ ᑲᐡᑭᑕᒪᓱᐃᐧᐣ ᑫᑭᐅᐣᒋ ᑭᑫᐣᑕᒧᐊᐧᐨ ᐯᔑᑯᐱᒥᑯᓇᑲ ᐁᑭ ᑭᑭᓄᐦᐊᒪᐃᐧᑕᐧ ᐸᑲᐦᐊᑐᐦᐃᐁᐧᓂ.
ᐅᑯᐁᐧᓂᐊᐧᐠ ᑲᓇᐦᐃᐊᐧᐨ ᐊᓂᔑᓂᓂᐃᐧ ᑐᐦᐁᐃᐧᓂ ᑭᐃᔕᐊᐧᐠ ᒐᐢᑎᐢ ᕑᐊᓄᐟ ᓫᐁᐢᑐᕑ ᐅᐡᑲᑎᓴᐠ ᑲᑕᔑᑲᓇᐁᐧᐣᑕᑯᓯᐊᐧᐨ, ᒣᑲᐧᐨ ᐊᐧᑌᐸᑲᐃᐧᐱᓯᑦ 10 ᐊᑯᓇᐠ 14 ᐁᑭᐊᐣᑕᐃᐧ ᑭᑭᓄᐦᐊᒪᐊᐧᐊᐧᐨ ᐅᐡᑲᑎᓴᐠ ᐃᒪ ᑲᑲᓇᐁᐧᐣᑕᑯᓯᐊᐧᐨ.
ᑭᐃᓇᐧᑌ ᐅᐁᐧ ᑲᑭᐅᐣᒋ ᐃᔑᒋᑲᓂᐊᐧᐠ ᒋᐅᒋ ᑭᑫᐣᑕᒧᐊᐧᐨ ᐅᐡᑲᑎᓴᐠ ᓂᑲᓂᑕᒪᓱᐃᐧᐣ ᐊᐱ ᐸᑭᑎᓂᑕᐧ, ᒥᓇ ᒋᐃᔑᐃᐧᑐᐊᐧᐨ ᐅᐁᐧᓂ ᑐᑲᓂ ᒣᑕᐁᐧᐃᐧᓂ ᐅᑕᔑᑫᐃᐧᓂᐊᐧᐠ ᑲᐅᒋᐊᐧᐨ.
“ᒣᑕᐁᐧ ᐃᔑᒋᑫᐦᐃᑯᐃᐧᓂᐠ ᐅᑲᑭᐅᒋ ᐃᐧᒋᐦᐃᑯᓇᐊᐧ ᐅᐡᑲᑎᓴᐠ ᑫᑯᓂ ᐃᑯ ᒋᔭᓂᔑ ᑲᐡᑭᐦᐅᐊᐧᐨ,” ᑭᐃᑭᑐ ᓫᐊᕑᐃᐣ ᓯᑦᓴᐣ, ᑲᓂᑲᓂ ᐱᒧᑐᐨ ᐅᒣᑕᐁᐧᐦᐃᑯᐃᐧᓂᐊᐧ ᐅᐡᑲᑎᓴᐠ.
ᓯᑦᓴᐣ ᑭᐃᑭᑐ ᐅᐁᐧ ᑭᑭᓄᐦᐊᒪᑫᐃᐧᐣ ᑲᔦ ᐃᓇᓄᑭᒪᑲᐣ ᐁᐅᒋ ᐃᐧᒋᒋᑲᑌᑭᐣ ᐊᓄᑭᐃᐧ ᐃᐧᒋᐦᐃᐁᐧᐃᐧᓇᐣ ᐁᐧᑎ ᓄᐱᒪᑲᒥᐠ ᑲᐊᔭᑭᐣ ᐃᐡᑯᓂᑲᓇᐣ ᑲᑕᓇᓄᑭᐊᐧᐨ ᑲᐅᒋᐃᐧᒋᐦᐊᐊᐧᐨ ᐅᐡᑲᑎᓴᐣ.
“ᐊᐱ ᑲᐸᑭᑎᓂᑕᐧ ᐅᒪ ᑲᑭᐸᐦᐅᑕᐧ, ᐅᑲᑭᑫᐣᑕᓇᐊᐧ ᑲᑭᐃᔑ ᑭᑭᓄᐦᐊᒪᐃᐧᑕᐧ ᑐᐦᐁᐃᐧᓂᐠ ᒥᓇ ᑯᑕᑭᔭᐣ ᑭᑭᓄᐦᐊᒪᑫᐃᐧᓇᐣ ᑲᑭᐱᒥ ᐊᐧᐸᑕᐦᐃᑕᐧ ᐁᑲᐧ ᒥᓇ ᒋᑭᐁᐧᐃᐧᑐᐊᐧᐨ ᐸᑲᐦᐊᑐᐦᐃᐁᐧᓂ ᐅᑕᔑᑫᐃᐧᓂᐊᐧᐠ ᒋᐅᒋ ᐃᐧᒋᐃᐧᑎᐊᐧᐨ ᐃᒪ ᐃᓀᑫ ᒣᑕᐁᐧᐃᐧᓂᐠ, ᒥᓇ ᐱᑯ ᑫᐊᔭᓂᐨ ᑫᓇᒋᐸᐦᐃᐊᐧᓇᐊᐧᐨ,” ᑭᐃᑭᑐ.
ᐁᑲᐧ ᐅᐁᐧ ᐸᑲᐦᐊᑐᐦᐁᐃᐧᐣ ᑲᔭᐸᑕᐠ ᒋᐅᒋ ᑭᑭᓄᐦᐊᒪᐃᐧᑕᐧ ᐅᐡᑲᑎᓴᐠ ᐅᑭᐅᐣᒋ ᒪᒪᐃᐧ ᐅᓇᑐᓇᐊᐧᐸᐣ ᐁᑭᐃᐧᒋᐦᐃᑎᐊᐧᐨ ᐃᒪ ᑲᐱᒧᑐᐊᐧᐨ ᐅᒣᑕᐁᐧᐦᐃᑯᐃᐧᓂᐊᐧ ᐅᐡᑲᑎᓴᐠ, ᐅᑭᒪᐅᐣ ᑲᐅᒋᐱᒥᐊᓴᐧᐸᒪᐨ ᐊᐊᐧᔑᔕᐣ ᒥᓇ ᐅᐡᑲᑎᓴᐣ, ᒥᓯᐁᐧᑲᒥᐠ ᐸᑲᐦᐊᑐᐦᐁᐃᐧᐣ ᐁᑲᐧ ᒥᓇ ᑕᐣᑐᕑ ᐯ ᐸᑲᐦᐊᑐᐦᐁᐃᐧᐣ.
ᐅᒣᑕᐁᐧᐦᐃᑯᐃᐧᓂᐊᐧ ᐅᐡᑲᑎᓴᐠ ᑲᐱᒧᑐᐊᐧᐨ ᓄᑯᒥᑫ ᑫᑲᐟ ᐯᔑᑲᐧᐣ ᐅᑭᑐᑕᓇᐊᐧᐸᐣ ᑲᑭᐸᐸᒥ ᑭᑭᓄᐦᐊᒪᑫᐊᐧᐸᐣ 45 ᐊᓂᔑᓂᓂᐃᐧ ᑕᔑᑫᐃᐧᓇᐣ, ᓇᐣᑕ ᐱᑯ 20 ᑲᐊᔭᑭᐣ ᓄᐱᒪᑲᒥᐠ ᑭᐁᐧᑎᓄᐠ ᐅᐣᑌᕑᐃᔪ. ᒥᐦᐅᐁᐧ ᐁᑫᐧᓇᐠ ᐃᒪ ᐅᐡᑲᑎᓯᐃᐧ ᑭᐸᐦᐅᑐᐃᐧᑲᒥᑯᐠ ᐁᑭᐸᑭᑎᓂᑲᑌᐠ ᐅᐁᐧ ᑐᑲᐣ ᑭᑭᓄᐦᐊᒪᑫᐃᐧᐣ.
ᐅᑭᒪᐅᐣ ᑲᐅᒋᐱᒥᐊᓴᐧᐸᒪᐨ ᐊᐊᐧᔑᔕᐣ ᒥᓇ ᐅᐡᑲᑎᓴᐣ ᑲᐅᑭᒪᐃᐧᐨ ᕑᐊᐣᑎ ᓴᐣᐟᐱᐠ ᑭᐃᑭᑐ ᐅᑭᑲᑫᐧᒋᒪᐊᐧᐸᓂᐣ ᐅᒣᑕᐁᐧᐦᐃᑯᐃᐧᓂᐊᐧ ᐅᐡᑲᑎᓴᐠ ᑲᐱᒧᑐᐊᐧᐨ ᐃᐁᐧᓂ ᐁᐱᒥᓂᔕᐦᐊᒧᐊᐧᐨ ᐯᔑᐠ ᑲᐃᔑᑲᑫᐧ ᐃᐧᒋᐦᐃᐁᐧᐨ ᐊᐧᐁᐧ ᐅᑭᒪᐅᐣ.
“ᒥᐦᐅᐁᐧᓂ ᐯᔑᐠ ᐅᑭᒪᐅᐣ ᑲᐱᒥᓂᔕᐦᐊᐠ ᐅᑕᓄᑭᐃᐧᐣ ᒋᐊᔐᓭᓂᐠ ᑲᓇᓇᐱ ᒪᓂᐊᐧᐨ ᐅᐡᑲᑎᓴᐠ ᒋᑭᑭᓄᐦᐊᒪᐃᐧᑕᐧ ᐊᐣᑎ ᑫᑭᐅᐣᒋ ᑭᑫᐣᑕᒧᐊᐧᐨ ᓂᑲᓂᑕᒪᓱᐃᐧᓂ ᒋᐃᐧᒋᐦᐃᑯᐊᐧᐨ ᑲᒥᓄᓭᓂᐨ ᑭᒋᐦᐊᐣ,” ᑭᐃᑭᑐ.
ᓴᐣᐟᐱᐠ ᑭᐃᑭᑐ ᑲᑭ ᓇᓇᑕᐃᐧᑭᑫᒋᑲᑌᑭᐸᐣ ᑭᐃᔑᒥᑭᑫᒪᑲᐣ ᑭᐡᐱᐣ ᐅᐡᑲᑎᓴᐠ ᑲᐸᑭᑎᓂᑕᐧ ᒋᐃᐧᒋᐃᐧᑯᐊᐧᐨ ᑲᒪᐡᑲᐃᐧᑲᐸᐃᐧᓂᐨ ᐊᐃᐧᔭᐣ ᒥᓇ ᑫᑕᔑᒣᑕᐁᐧᐊᐧᐨ, ᑌᐯᐧ ᐱᑯ ᑭᑫᐣᑕᑯᓯᐊᐧᐠ ᐁᑲ ᒥᓇᐊᐧ ᐁᒪᒪᓂᐊᐧᐨ.
ᐯᔑᐠ ᐃᒪ ᐅᐡᑲᑎᐢ ᑲᑭᐅᑕᐱᓇᐠ ᐅᐁᐧᓂ ᑭᑭᓄᐦᐊᒪᑫᐃᐧᓂ ᑭᐃᑭᑐ ᒣᑕᐁᐧᐸᐣ ᐊᑯ ᐸᑲᐦᐊᑐᐦᐁᐃᐧᓂ ᐁᑲᐧ ᓄᑯᑦ ᒪᐊᐧᐨ ᐅᒥᓀᐧᑕᐣ ᐅᒪ ᐁᒣᑕᐁᐧᐨ. ᒪᐊᐧᐨ ᐃᑯ ᐅᑐᒋᒪᒥᓀᐧᑕᐣ ᐁᐧᐃᒋᒣᐁᐧᒪᐨ ᐅᐃᐧᒋ ᐅᐡᑲᑎᓯᒪᐣ ᐃᒪ ᑲᑲᓇᐁᐧᐣᑕᑯᓯᐊᐧᐨ ᒥᓇ ᐯᑭᐡ ᐁᐅᒋ ᐱᒥ ᑭᑫᐣᑕᒧᐊᐧᐨ ᑲᐊᐃᑐᒋᑲᑌᐠ ᒥᓇ ᑲᐅᒋ ᑭᑭᓄᐦᐊᒪᑫᒪᑲᐠ ᓂᑲᓂᑕᒪᓱᐃᐧᐣ ᐅᒪ ᒣᑕᐁᐧᐃᐧᓂᐠ.
“ᓇᐊᐧᐨ ᐃᒪ ᐣᑐᒋ ᑲᑭᑫᓂᒪᐠ ᑲᐃᐧᒋᒣᑕᐁᐧᒪᑲᐧ,” ᑭᐃᑭᑐ ᐯᔑᐠ ᐅᐡᑲᑎᐢ, ᑲᐃᐧᐣ ᐸᑭᑎᓂᑲᑌ ᒋᐃᐧᒋᑲᑌᓂᐠ ᐁᔑᓂᑲᓱᐨ ᑲᐃᓇᑌᐠ ᐅᐡᑲᑎᓯᐃᐧ ᐅᓇᑯᓂᑫᐃᐧᓂᐠ. “ᐣᑭᒥᓀᐧᑕᒥᐣ ᐁᑭᐊᔭᒥᐦᐃᑎᔭᐣᐠ ᒥᓇ ᐁᐸᐸᐱᔭᐣᐠ.”
ᒥᓇ ᑭᐃᑭᑐ ᐊᑎᐟ ᐅᐡᑲᑎᓴᐠ ᑲᐃᐧᐣ ᓂᐢᑕᑦ ᒋᐃᐧᒣᑕᐁᐧᐊᐧᐸᐣ ᔕᑯᐨ ᐊᐱ ᑲᐃᐧᐣᑕᒪᑯᐊᐧᐨ ᐃᐧᒋ ᐅᐡᑲᑎᓴᐣ ᐁᒥᓀᐧᑕᑲᐧᓂᐠ, ᐊᒥ ᐊᐱᐣ ᓇᑫ ᑫᐃᐧᓇᐊᐧ ᑲᑭᔭᓂ ᒣᑕᐁᐧᐊᐧᐨ.
“ᐁᑲᐧ ᓄᑯᑦ ᓂᐊᐧᐸᒪᐠ ᐁᒪᒪᐃᐧ ᒣᑕᐁᐧᐊᐧᐨ ᒥᓇ ᐁᔭᓂ ᓇᑲᒋᑐᐊᐧᐨ ᐸᑲᐦᐅᑐᐦᐁᐃᐧᓂ,” ᑭᐃᑭᑐ.
ᐊᐧᐁᐧ ᐅᐡᑲᑎᐢ ᑭᐃᑭᑐ ᐁᑲ ᐃᐧᑲ ᐁᑭᐅᒋᐃᓀᓂᒥᑎᓱᐨ ᓂᑲᓂᑕᒪᓱᐃᐧᓂᐠ ᒋᐃᔑᑲᐡᑭᐦᐅᐨ, ᐊᓇᐃᐧᐣ ᐅᑭᐱᑐᑕᐣ ᐅᑕᓇᐠ ᑯᑕᑭᔭᐣ ᐁᑭᐱ ᑲᑲᑫᐧᒋᒪᐨ ᑯᑕᑭᔭᐣ ᐸᑲᐣ ᑐᐦᐁᐃᐧᓂ ᒋᑲᐧᑫᒋᑐᓂᐨ ᒥᓴᐊᐧᐨ ᐁᑲ ᐁᔭᓇᑭ ᓇᑲᒋᑐᓂᐨ.
“ᓂᐃᐧᑕᒪᐊᐧᐠ, ᑲᐃᐧᓂᐣ ᓇᐣᑕ ᒥᐱᑯ ᐃᔑᒪᒣᑕᐁᐧᐣ,” ᑭᐃᑭᑐ.
ᐁᑲᐧ ᒥᓇ ᑭᐃᑭᑐ ᓂᐢᑕᑦ ᑲᐃᐧᐣ ᒋᑭᐅᐣᒋ ᓴᓴᐯᐣᑕᐠ ᐅᐁᐧᓂ ᐸᑲᐦᐊᑐᐦᐁᐃᐧ ᑭᑭᓄᐦᐊᒪᑫᐃᐧᓂ ᐊᐱ ᑲᔭᓂ ᒪᒋᒋᑲᑌᓂᐠ.
“ᔕᑯᐨ ᐣᑭᒪᒪᑲᑌᐣᑕᐣ ᐊᐃᐧᔭᐠ ᐁᑭᐱᔕᐊᐧᐨ ᐁᑭᐱ ᑭᑭᓄᐦᐊᒪᑯᔭᑭᑕᐧ ᒥᓇ ᐁᐱᐧᐃᒋᐃᐧᑯᔭᐠ ᐅᒪ ᑲᑕᔑᑭᐸᐦᐅᑯᔭᐣᐠ,” ᑭᐃᑭᑐ.
ᐅᑭᐅᐣᒋ ᐃᐧᒋᐦᐃᑯᐣ ᑕᐡ ᒋᔭᓄᒋ ᑲᐡᑭᑐᐨ ᐊᐣᑎ ᑫᐃᔑ ᓇᓇᑐᓂᑫᐨ ᑫᑯᓇᐣ ᐅᑕᔑᑫᐃᐧᓂᐠ ᐁᑲᐧ ᒥᓇ ᐃᔑᐸᑯᓭᐣᑕᑦ ᒋᔭᓂ ᒪᒋᑐᐨ ᒣᑕᐁᐧᐃᐧᑫᑯᓂ ᐊᐱ ᑭᑭᐁᐧᐨ.
“ᑭᐡᐱᐣ ᐃᒪ ᐅᐣᒋᐃᐧᒋᐦᐃᑯᔭᐣ ᐅᐡᑲᑎᓴᐠ ᐅᒣᑕᐁᐧᐦᐃᑯᐃᐧᓂᐊᐧ ᑲᐅᒋᐱᒧᒋᑲᑌᐠ,” ᑭᐃᑭᑐ. “ᒪᐊᐧᐨ ᐃᑯ ᐣᑕᒥᓀᐧᑕᐣ ᒋᑭᑕᔑ ᒣᑕᐁᐧᔭᐸᐣ ᐁᐧᑎ ᑲᐅᒋᔭᐣ.”
ᓯᑦᓴᐣ ᑭᐃᑭᑐ ᐅᐡᑲᑎᓴᐠ ᐅᒣᑕᐁᐧᐦᐃᑯᐃᐧᓂᐊᐧ ᐅᑕᔭᓇᐊᐧ ᒪᓯᓇᐦᐃᑫᐃᐧᑲᒥᑯᓂ ᐃᒪ ᑕᐣᑐᕑ ᐯ ᐁᑲᐧ ᒥᓇ ᐅᑕᓄᑭᐠ ᐃᒪ ᐸᐯᔑᐠ ᑕᔑᑫᐃᐧᓂᐠ ᐃᔑᓂᑲᓱᐊᐧᐠ ᑕᔑᑫᐃᐧᓂᐠ ᑲᑭᑭᓄᐡᑲᒪᑫᐊᐧᐨ, ᐁᐊᓄᑭᐦᐃᐣᑕᐧ ᒋᐃᐧᒋᐦᐃᐁᐧᐊᐧᐨ ᐅᒪ ᐊᓄᑭᐃᐧᓂᐠ. ᐁᑲᐧ ᒥᓇ ᑕᑲᐧᔭᐣᒋᔭᐊᐧᐠ ᒋᐅᒋ ᐃᐧᒋᐦᐊᐊᐧᐨ ᐅᐡᑲᑎᓴᐣ ᑫᑯᐣ ᑲᐃᐧᑲᑫᐧ ᒪᒋᑐᓂᐨ ᐊᐱ ᐊᓂᑭᐁᐧᐊᐧᐨ ᐅᑕᔑᑫᐃᐧᓂᐊᐧᐠ.
ᓯᑦᓴᐣ ᑭᐃᑭᑐ ᐅᐁᐧ ᒣᑕᐁᐧᐃᐧᐣ ᐸᑲᐦᐊᑐᐦᐁᐃᐧᐣ ᑲᑭᐅᐣᒋᐅᑕᐱᓂᑲᑌᐠ ᐊᓂᔑᓂᓂᑲᐠ ᓂᐢᑕᑦ ᐁᑭᐅᐣᒋᒪᑲᐠ.
ᐊᓫᐊᐣ ᑕᐅᓂ, ᑲᑭᑭᔑᑐᐨ ᐅᑭᒋᐃᐡᑯᓄᐃᐧᐣ ᒥᓇ ᑲᑭᑭᓄᐦᐊᒪᑫᐨ ᐃᒪ ᐃᐧᓫᑊᕑᐁᐟ ᓫᐊᕑᐃᔦ ᔪᓂᐯᕑᓯᑎ, ᑫᐃᐧᐣ ᐃᒪ ᑭᐊᔭ ᑲᐅᒋ ᐱᒧᒋᑲᑌᐠ ᐅᐡᑲᑎᓴᐠ ᐅᒣᑕᐁᐧᐦᐃᑯᐃᐧᓂᐊᐧ. ᐁᑲᐧ ᒥᓇ ᐅᑎᐸᒋᒧᒪᓯᓇᐦᐊᐣ ᐃᐁᐧᓂ ᐸᑲᐦᐊᑐᐦᐁᐃᐧᓂ ᐃᒪ ᐊᓂᔑᓂᓂᐃᐧ ᑕᔑᑫᐃᐧᓇᐣ.
“ᐅᑎᔑᓂᑲᑕᓇᐊᐧ ᒪᐣᑐ ᐅᒣᑕᐁᐧᐃᐧᐣ ᒪᐊᐧᐨ ᐃᑯ ᓂᐢᑕᑦ ᑲᑕᑲᐧᐠ ᐱᒪᑎᓯᐃᐧᐣ ᑭᐱᐊᔭᒪᑲᐣ ᐅᐁᐧ ᒣᑕᐁᐧᐃᐧᐣ, ᔕᑯᐨ ᐊᔕ ᑭᒋᒥᔑᓇᐧ ᒥᑕᓱᒥᑕᓇ ᑕᓱᔭᑭᐃᐧᐣ ᐅᒪ ᐃᓀᑫ ᐅᑭᐱᐅᒋ ᒣᑕᐊᐧᑕᓇᐊᐧ ᐊᓂᔑᓂᓂᐊᐧᐠ,” ᑭᐃᑭᑐ ᑕᐅᓂ, ᑲᐅᐣᑕᑲᓀᓯᐨ ᓇᐠᐊᑊᑎ ᐊᓂᔑᓂᓂᐊᐧᐠ ᐁᐧᑎ ᓀᐣᑲᐱᐦᐊᓄᐠ.
ᐸᑲᐦᐊᑐᐦᐁᐃᐧᐣ ᑭᐱᒣᑕᐊᐧᑌ ᒥᓯᐁᐧ ᑲᓇᑕ ᐊᐦᑭᐠ ᒥᓇ ᐱᓂᐡ ᐁᐧᑎ ᔕᐊᐧᓄᐠ ᒣᐠᓯᑯ ᑲᒪᐧᔦ ᑕᑯᔑᓄᐊᐧᐨ ᐁᐧᒥᑎᑯᔓᐊᐧᐠ. ᐁᑲᐧ ᐱᓂᐡ ᑫᐃᐧᓇᐊᐧ ᐁᐧᒥᑎᑯᔓᐊᐧᐠ ᑭᔭᓂᒣᑕᐁᐧᐊᐧᐠ 1884 ᑲᔭᑭᐊᐧᓂᐠ ᐃᒪ ᒪᐣᐠᕑᐃᐊᓫ.
“ᑭᒋᓀᐣᑕᑲᐧᐣ ᐁᐊᐧᐸᒥᐣᑕᐧ ᐊᐣᑎ ᑫᑭᔭᓄᒋ ᒪᐡᑲᐃᐧᑲᐸᐃᐧᐦᐃᑕᐧ ᑭᑐᐡᑲᑎᓯᒥᓇᓂᐠ ᑲᔭᐸᑕᑭᐣ ᐊᓂᔑᓂᓂᓇᐠ ᑲᑭᐱᐅᐣᒋᒪᑲᑭᐣ ᑫᑯᓇᐣ,” ᑭᐃᑭᑐ. “ᒥᐦᐅᐁᐧ ᐁᔑᒥᑭᐁᐧᒪᑲᐠ ᒣᑕᐁᐧᐃᐧᐣ. ᒥᑕᐡ ᑲᔦ ᐃᒪ ᑫᑭᐅᐣᒋ ᒪᒪᐃᐧ ᒋᑭᑲᒥᑭᓯᐊᐧᑫᔭᑭᐸᐣ.”
ᐅᐁᐧ ᐸᑲᐦᐊᑐᐦᐁᐃᐧ ᑭᑭᓄᐦᐊᒪᑫᐃᐧᐣ ᑲᑭᐸᑭᑎᓂᑲᑌᐠ ᐯᔑᑲᐧ ᐁᑕ ᐃᔑᒋᑲᓄᐊᐧᐣ ᐃᒪ ᐅᐡᑲᑎᓯᐃᐧ ᑭᐸᐦᐅᑐᐃᐧᑲᒥᑯᐠ ᐁᑲᐧ ᐃᐧᐣ ᔕᑯᐨ ᐅᐡᑲᑎᓴᐠ ᐅᒣᑕᐁᐧᐦᐃᑯᐃᐧᓂᐊᐧ ᒥᓇ ᐅᑭᒪᐃᐧᐣ ᑲᐅᒋᐊᓴᐧᐸᒪᐨ ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᐅᐸᑯᓭᐣᑕᓇᐊᐧ ᒥᓇᐊᐧ ᒋᔭᓂᑫᑐᒋᑲᑌᐠ ᐅᐁᐧ ᐁᐧᑎ ᐊᓂᓂᑲᐣ.