ᕑᐃᐠ ᑫᕑᐃᐠ ᐊᐧᐊᐧᑌ ᐊᒋᒧᐃᐧᐣ

ᐃᔭᐱᒪᑐᐠ ᑲᐅᒋᐨ ᒪᓂ ᒐᑲᐱ ᐅᑭᐃᐧᑕᐣ ᐊᔕ ᒋᑭᑭᐱᑎᓂᑲᑌᑭᐸᐣ ᑭᒋᔭᐦᐊ ᑲᒪᒋᑐᑕᐊᐧᑲᓄᐃᐧᐨ ᐁᐦᐊᐠ ᐃᐧᑫᐧᑐᐣᐠ ᔑᒪᑲᓂᔑᐃᐧ ᐱᒧᒋᑫᐃᐧᐣ ᑲᑭᐸᑭᑎᓇᒧᐊᐧᐨ ᐅᐅᐁᐧᓂ ᑭᒋᔭᐦᐊ ᑲᒪᒋᑐᑕᐊᐧᑲᓄᐃᐧᐨ ᒪᓯᓇᑌᓯᒋᑲᐣ᙮
“ᑭᐡᐱᐣ ᐁᐊᐧᐸᑫᔭᐣ ᑫᑯᐣ ᐁᐃᓇᑲᒥᑲᐠ ᓇᐣᑕ ᐃᑭᑐᐣ,” ᐃᑭᑐ ᒐᑲᐱ ᐅᐅᐁᐧᓂ ᑲᑭᐃᓂᐁᐧᑐᐨ ᒪᓯᓇᑌᓯᒋᑲᓂ᙮ “ᑲᐧᓂᐣ ᔕᑫᐧᓂᒧᐣ᙮”
ᒐᑲᐱ ᐁᑲᐧ ᐃᐧᑫᐧᑐᐣᐠ ᔑᒪᑲᓂᐡ ᑕᔭᐣ ᒪᐠᓫᐊᓫᐃᐣ ᐅᑭᐸᑭᑎᓇᓇᐊᐧ ᐅᐅᐁᐧ ᒪᓯᓇᑌᓯᒋᑲᐣ ᒥᑲᐧᐨ ᓂᐃᐧᔕᐨ ᓂᑭᐱᓯᑦ ᑲᐃᓇᑭᔑᐨ ᐁᐃᐧᐃᐧᑕᒧᐊᐧᐨ ᐁᑕᑲᐧᐠ ᐅᐅᐃᐧ ᐃᔑᒋᑫᐃᐧᐣ ᒥᓇ ᐱᑯ ᒍᒋᑭᑫᐣᑕᒧᐊᐧᐨ ᐊᓂᔑᓇᐯᐠ᙮
“ᑭᐡᐱᐣ ᐁᑕ ᔑᒪᑲᓂᐡ ᐅᐅᐁᐧᓂ ᑲᓄᑕᐠ ᑲᐧᓂᐣ ᐊᑯ ᒥᔑᐣ ᐊᐃᐧᔭᐠ ᒋᐃᐧᓇᑐᑕᒧᐊᐧᐨ,” ᒐᑲᐱ ᐃᑭᑐ᙮ “ᐁᑲᐧᐃᐧᐣ ᑭᐡᐱᐣ ᐊᓂᔑᓇᐯ ᓇᐣᑕ ᑲᔭ ᑯᑕᐠ ᐊᐃᐧᔭ ᐅᐅᐁᐧᓂ ᐊᓂᒧᑕᐠ ᑫᒋᓇᐨ ᐸᑲᐣ ᐊᐃᐧᔭᐣ ᐅᑲᓇᑐᑕᑯᐊᐧᐣ,”

ᑲᐃᐧᒋᐦᐃᐁᐧᐊᐧᐨ ᑲᐊᓂᒥᓭᓂᐠ ᑭᐃᔕᐊᐧᐠ ᐃᐃᒪ ᐊᐧᓂᒪᐣ ᑕᔑᑫᐃᐧᓂᐠ ᐁᑭᑕᐃᐧ ᐃᐧᒋᑕᐧᐊᐧᐨ ᐊᐱᐣ ᑲᓄᒋᑲᑌᐠ ᓂᔑᐣ ᐃᑫᐧᓭᓴᐠ ᒥᓇ ᐅᐡᑭᓂᑭᑫᐧ ᑲᑭᐃᐡᑲᐧᐱᒪᑎᓯᐊᐧᐨ ᐃᐃᒪ ᑲᑭᐃᔑᓴᑭᑌᐠ ᐊᐧᑲᐦᐃᑲᐣ ᐃᐃᐁᐧ ᒣᑲᐧᐨ ᒪᑯᐱᓯᑦ ᐁᐃᓇᓀᐤ ᑲᐃᓇᑭᓯᐨ᙮
“ᓂᔑᑕᓇ ᐯᔑᑯᔕᑊ ᐁᑕᓴᑭᐃᐧᓀᐨ ᐅᐡᑲᑎᓯᐃᐧᑫᐧ ᒥᓇ ᓂᑯᑕᐧᓱ ᐁᑕᓴᐧᑭᐃᐧᓀᐨ ᐃᑫᐧᓭᐢ ᒥᓇ ᑯᑕᐠ ᐁᐯᔑᑯᔭᑭᐃᐧᓀᐨ ᐃᑫᐧᓭᐢ ᐅᑭᐊᐧᓂᑐᓇᐊᐧ ᐅᐱᒪᑎᓱᐃᐧᓂᐊᐧ ᐃᐃᒪ ᑲᑭᐃᔑᓴᑭᑌᐠ ᐊᐧᑲᐦᐃᑲᐣ” ᐃᑭᑐ ᐊᐧᓇᒪᐣ ᐅᑭᒪᑲᐣ ᕑᐊᐟ ᐃᐧᐣᓂᐱᑕᐧᐣᑲ᙮ “ᐅᐅᐁᐧ ᑕᔑᑫᐃᐧᐣ ᒥᓇ ᐱᑯ ᐅᓂᑲᓂᑕᒪᑫᐠ ᒪᐊᐧᐨ ᐅᑭᒋᐱᑫᐧᐣᑕᓇᐊᐧ ᒥᓇ ᐅᑭᑭᒥᐡᑲᑯᓇᐊᐧ ᐅᐅᐁᐧ ᐊᐱᐣ ᑲᑭᐅᒋᐊᐧᓂᔭᐊᐧᐨ ᐅᑐᐡᑲᑎᓯᒥᐊᐧᐣ᙮”

ᐊᓴᐸᐱᐡᑯᓯᐊᐧᑲᐣᐠ ᑲᐅᒋᐨ ᒍᑎ ᑕ ᓭᓫᐸ ᑭᑭᐦᑭᓇᐊᐧᒋᐦᐃᐊᑲᓄᐃᐧ ᐊᐦᐃ ᐁᑭᒥᓇᑯᓄᐃᐧᐨ ᒉᕑᒪᐣ ᐅᐃᐧᒋᐦᐃᐁᐧᐃᐧ ᑭᑭᓇᐊᐧᒋᐦᐃᐁᐧᐃᐧᐣ ᐊᐦᐃ ᐅᑕ ᒪᐊᐧᐨ ᒥᐡᑕᐦᐃ ᑲᐊᐧᐃᐧᒋᑕᐧᐨ ᐃᐃᒪ ᐅᑕᔑᑫᐃᐧᓂᐠ ᑲᑭᐅᒋᒥᓇᑲᓇᐃᐧᐨ᙮
“ᒪᒪᑲᑌᓂᑕᑲᐧᐣ ᐅᐅᐁᐧ ᓂᑭᑭᓇᐊᐧᒋᐦᐃᑯᐃᐧᐣ ᐊᐦᐃᐠ ᐊᑲᒪᑭᐠ ᒉᕑᒪᓂ ᑲᐃᒋᑲᑌᐠ ᑲᑭᐅᒋᒥᓂᑯᔭᐣ,” ᑕ ᓭᓫᐸ ᑭᐃᑭᑐ ᐃᐃᐁᐧ ᒣᑲᐧᐨ ᓴᑭᐸᑲᐃᐧᐱᓯᑦ ᓂᑯᑕᐧᓱ ᑲᑭᐃᓇᑭᓯᓂᐨ ᐊᐦᐃ ᑲᔭ ᐃᐃᐁᐧ ᒣᑲᐧᐨ ᓂᔑᑕᓇ ᓂᔓᔕᑊ ᑲᑭᑕᐃᐧᐃᐡᑲᐧᑭᐃᐧᑌᐨ ᐃᐃᒪ ᒉᕑᒪᓂ ᐊᑭᑲᐠ᙮ “ᐁᑲᐧ ᐅᐅᐁᐧ ᑲᑕᓯᐊᐧᐨ ᐊᐧᐃᐧᔭᐠ ᑲᐧᓂᐣ ᐃᐧᑲ ᓂᑐᒋᓀᐣᑕᓯᐣ ᐅᐅᐁᐧ ᒋᒥᓂᑯᔭᐣ᙮”

ᐁᑲᐧ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐊᓂᔑᓇᐯᐃᐧ ᐊᐃᐢᑯᓫ ᐃᐡᑯᓄᐃᐧᑲᒥᐠ ᐊᔕ ᒥᓇ ᑕᓂᒪᒋᐃᐡᑯᓄᓇᓂᐊᐧᐣ ᐁᑲᐧ ᐅᑎᐢᑯᓂᐠ ᐊᐦᐃᐠ ᐸᑯᔭᐣᑎ ᑕᐅᒋᑕᐸᓯᐊᐧᐠ ᐁᐦᐊᐣ ᑭᒋᐅᑌᓇᐃᐧ ᐸᐢ ᑲᐸᐸᒥᐱᓯᓂᐨ ᒋᐊᐸᒋᐦᐊᐊᐧᐨ᙮ “ᐁᑲᐧ ᒪᐊᐧᐨ ᒥᓀᐣᑕᑲᐧᐣ ᒥᓇ ᐱᑯ ᐁᑲᑫᐧᒋᑲᓂᑎᓇᓂᐊᐧᐠ ᐁᑲᐧ ᒥᓇ ᒪᐊᐧᐨ ᐅᒧᓀᐣᑕᓇᐊᐧ ᐅᐅᐁᐧ ᑲᑐᑕᒧᐊᐧᐨ,” ᐃᑭᑐ ᐅᑎᐢᑯᓄᐦᐃᐁᐧ ᑫᑎ ᓴᔾ᙮ “ᒥᓇ ᐱᑯ ᐅᑭᑫᐣᑕᓇᐊᐧ ᐊᓂᐣ ᑫᑐᑕᒧᐊᐧᐨ ᐸᐸᒥᔭᐊᐧᐨ
ᑭᒋᑕᐃᐧᓂᐠ ᐁᑲᐧ ᑲᔭ ᒪᐊᐧᐨ ᐅᐅᐁᐧ ᑭᒋᓀᐣᑕᑲᐧᐣ᙮”