ᐅᑭᒪᑲᓇᐠ ᑲᐃᐧᐣ ᐃᑭᑐᐊᐧᐠ ᐃᐁᐧᓂ ᐅᓇᑯᓂᑫᐃᐧᐣ 191

ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐅᑭᐸᑯᐢᑲᓇᐊᐧ ᐅᓇᑯᓂᑫᐃᐧᐣ 191, ᑭᒋ ᑭᐁᐧᑎᓄᐠ ᐅᓇᑯᓂᑫᐃᐧᐣ, ᐁᑲᐧ ᑕᐢ ᐊᓂᔑᓇᐯ ᐊᐢᑭ ᑭᒋ ᐅᑭᒪᑲᐣ ᐢᑕᐣ ᐯᔭᑎ ᐃᑭᑐ ᒪᐊᐧᐨ ᑕᓂ ᐊᓂᒥᓭ ᑭᐢᐱᐣ ᐅᓇᑯᓂᑫᐃᐧᐣ 191 ᐊᓂᒪᑕᓄᑭᒪᑲᐠ.
ᑭᐢᐱᐣ ᐅᐁᐧ ᐅᓇᑯᓂᑫᐃᐧᐣ ᔕᐳᓭᐠ, ᑕᐅᐣᒋ ᒪᒋᓭᐊᐧᐣ ᑫᑯᓇᐣ ᐁᐧᑎ ᑭᐁᐧᑎᓄᐣᐠ, ᐯᔭᑎ ᑭᐃᑭᑐ. ᑲᐃᐧᐣ ᑫᑯᐣ ᑕᑲᐧᔭᑫᐧᐣᑕᑲᐧᓯᓄᐣ ᐃᒪ ᐅᑭᒪᑫᐃᐧᓂᓇᐣᐠ ᒥᓇ ᐃᑫᐧᓂᐊᐧᐠ ᑭᒋᐊᓂᑭᐃᐧᓇᐣ ᑲᐱᒧᑐᐊᐧᐨ.
ᐯᔭᑎ ᑭᐃᑭᑐ ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᐅᑭ ᓇᑭᐢᑲᐊᐧᐊᐧᐣ ᕑᐃᐣᑕ ᒉᑊᕑᐃ, ᑭᒋ ᐊᒥᑯᑭᒪᑫᐧ, ᐊᑲᐢᐟ 12 ᐁᑭ ᐊᐣᑐᑕᒧᐊᐧᐨ ᑲᐃᐧ ᐃᔑ ᑲᑫᐧ ᐊᐣᑕᒋᑲᑌᐠ ᐅᓇᑯᓂᑫᐃᐧᐣ, ᔕᑯᐨ ᑕᐢ ᑲᐃᐧᐣ ᒋᐅᐣᒋ ᓇᐦᐁᐣᑕᒧᐊᐧᐨ ᐊᓂᔑᓇᐯ ᐊᐢᑭ ᐊᑭᒪᑲᓇᐠ ᐃᐁᐧ ᑲᑭᐃᔑᓄᐣᑕᒧᐊᐧᐨ.
ᐊᓂᔑᓇᐯ ᐊᐢᑭ ᐅᑭᒪᑲᓇᐠ, ᑕᔑᑫᐃᐧᓇᐣ, ᐊᓂᔑᓂᓂᐊᐧᐠ ᒪᒪᐃᐧ ᐃᐧᒋᐃᐧᑎᐊᐧᐠ, ᐯᔭᑎ ᑭᐃᑭᑐ ᐊᑲᐢᐟ 13 ᒣᑲᐧᐨ ᑲᑭ ᐸᐸᔑ ᒪᐊᐧᒋᐦᐃᑎᓇᓂᐊᐧᐠ ᑕᐣᑐᕑ ᐯ.ᒥᐦᐃ ᐁᐃᔑ ᑭᒋ̇ᑭᑎᔭᐣᐠ ᐁᑭᐸᑯᐢᑲᒪᐠ ᐅᓇᑯᓂᑫᐃᐧᐣ 191.
ᐯᔭᑎ ᐅᓇᐣᑕᐁᐧᓂᒪᐣ ᑲᑭᓇ ᐊᓂᑭᐃᐧᓇᐣ ᑲᐱᒧᑐᐊᐧᐨ ᒥᓇ ᐊᐦᑭᑲᐠ ᑲᐃᔑ ᓇᓇᑲᒋᒋᑫᐊᐧᐨ ᒋᑭᐱᑎᓇᒧᐊᐧᐨ ᐃᐁᐧᓂ ᑲᐃᐧᒋᑲᐸᐃᐧᑕᒧᐊᐧᐨ ᐅᓇᑯᓂᑫᐃᐧᐣ 191 ᐃᐁᐧ ᐅᐣᒋ ᐁᑲ ᑲᑭᐅᐣᒋ ᓇᑭᐢᑲᐊᐧᐊᐧᐨ ᐅᑭᒪ ᑕᓫᑕᐣ ᒪᐠᑭᐣᑎ ᑲᑭ ᓇᑯᒥᐸᐣ ᒋᒥᓄᐃᐧᑕᓄᑭᒪᐨ ᐊᓂᔑᓂᓂᐊᐧᐣ.
ᐊᒥᐱᑯ ᒧᔕᐠ ᐊᓇ ᐃᔑ ᐯᑌᑕᑲᐧᒧᑐᔭᐠ ᑲᐃᔑ ᒪᒥᑎᓀᐣᑕᒥᐦᐃᑯᔭᐠ ᐅᐁᐧ ᐅᓇᑯᓂᑫᐃᐧᐣ 191 ᔕᑯᐨ ᑕᐢ ᐅᐣᑌᕑᐃᔪ ᐅᑭᒪᐃᐧᐣ ᑲᐃᐧᐣ ᒋᐅᐣᒋ ᓇᑫᐧᑕᑯᔭᐠ ᐅᐁᐧ ᓂᑎᓯᓭᐃᐧᓇᐣ, ᐯᔭᑎ ᐃᑭᑐ, ᐁᑭ ᐃᐧᐣᑕᐠ ᐊᓂᔑᓇᐯ ᐊᐢᑭ ᐁᑭ ᐱᒥᐊᓂᑲᑕᐠ ᐅᓇᑯᓂᑫᐃᐧᐣ 191 ᒋᑕᑯᓂᑲᑌᐠ ᐃᔑᑭᔑᐁᐧᐃᐧᐣ ᒥᓇ ᑫᑯᓇᐣ ᑫᑭ ᐅᐣᒋ ᐃᐧᒋᐦᐃᑯᐊᐧᐸᐣ ᐊᓂᔑᓇᐯ ᐅᑎᐯᐣᒋᑫᐃᐧᓇᐣ ᒥᓇ ᐅᑎᓇᐣᑭᓱᐃᐧᓂᐊᐧ. ᐅᐁᐧ ᑲᓇᐸᓀᓭᐠ ᐅᓇᒋᑫᐃᐧᐣ ᐅᐁᐧ ᑲᐃᐧ ᐃᔑ ᐊᐣᑕᒋᑲᓂᐊᐧᐠ ᐅᒪ ᐊᓂᔑᓇᐯ ᐊᐢᑭ ᑎᐯᐣᒋᑫᐃᐧᓂᐠ ᑲᐃᐧᐣ ᐃᒪ ᒋᐃᔑᐃᐧᒋᐦᐃᐁᐧᒪᑲᐠ ᐊᐦᒐᑯᐠ ᒥᓇ ᑲᔦ ᐃᐁᐧ ᐅᑭᒪᐃᐧᐣ ᐅᑕᐦᔑᑕᒪᑫᐃᐧᓇᐣ 9 ᒥᓇ 5. ᐊᒥᑕᐢ ᐁᐃᔑᓇᑲᐧᐠ ᐊᐱᒥᑯ ᐊᐦᐸᐣ ᒋᐸᓱᑯᐧᐃᐧᑕᒪᐠ ᒋᑭᐱᑎᓇᒪᐠ ᐅᐁᐧ ᐅᓇᑯᓂᑫᐃᐧᐣ.
ᐅᓇᑯᓂᑫᐃᐧᐣ 191 ᐃᔓᓇᑌ ᐃᐁᐧ ᓂᓴᐧ ᒋᐊᔭᒥᓂᐣᒋᑲᑌᐠ ᐁᐧᑎ ᐅᐣᑌᕑᐃᔪ ᐅᓇᑯᓂᑫᐃᐧᑲᒥᑯᐠ ᐊᐧᑌᐸᑲᐃᐧᐱᓯᑦ 16, ᐃᐁᐧ ᑕᐢ ᑕᐃᓯᓭ ᐅᐁᐧ ᐅᓇᑯᓂᑫᐃᐧᐣ ᐊᒥᐦᐃ ᐁᐦᑕ ᑫᐃᔑᓇᐣᑕᐁᐧᐣᑕᑲᐧᐠ ᑭᒋ ᐅᑭᒪ ᐅᑭᔑ ᐸᑭᑕᔑᐊᐧᒋᑫᐃᐧᐣ ᒋᐊᒋᑲᑌᐠ ᒥᓂᑯᐠ ᑫᑭ ᒪᑕᓄᑭᒪᑲᐠ ᐃᐁᐧ ᐅᓇᑯᓂᑫᐃᐧᐣ.
ᐊᓂᔑᓇᐯ ᐊᐢᑭ ᐅᑭᒪᑲᓇᐠ ᑭᒪᐊᐧᒋᐦᐃᑎᐊᐧᐠ ᓂᔑᑭᔑᑲ ᐸᐸᔑ ᐅᑭᒪᑲᓇᐠ ᐅᒪᐊᐧᒋᐦᐃᑎᐃᐧᓂᐊᐧ ᐊᑲᐢᐟ 12-13 ᑲᐃᓇᑭᓯᐨ ᐃᑭ ᓇᓇᐣᑕᐃᐧᑭᐣᑕᒧᐊᐧᐨ ᐊᓂᐣ ᑫᑭᐃᔑ ᐊᓂᑲᑕᒧᐊᐧᐸᐣ ᒋᑭᐱᑎᓂᑲᑌᐠ ᐅᓇᑯᓂᑫᐃᐧᐣ 191.
ᐯᔭᑎ ᐃᑭᑐ ᐃᐁᐧ ᑲᐃᔑ ᐊᓂᑲᑕᒧᐊᐧᐨ ᐊᓂᔑᓇᐯ ᐊᐣᐢᑭ ᐃᐢᑯᓂᑲᓇᐣ ᐊᐦᑭ ᑲᐃᐧ ᐃᓇᐸᑕᐠ ᐅᓇᒋᑫᐃᐧᐣ ᑲᐃᐧᐣ ᐃᐧᓂᑯ ᐃᐁᐧ ᐁᐃᐧᒋᑲᐸᐃᐧᑕᒧᐊᐧᐨ ᐃᐁᐧ ᐅᓇᑯᓂᑫᐃᐧᐣ 191.
ᐅᐣᑌᕑᐃᔪ ᐃᓯᓭᓂ ᒋᑲᑫᐧ ᓂᓯᑕᐃᐧᓇᒧᐊᐧᐨ ᐊᓂᔑᓇᐯᐃᐧᑭᒪᐃᐧᐣ: ᐱᐟᓫᐃᕑ
ᐊᒥᑕᐢ ᑲᔦ ᑲᑭᐃᑭᑐᐨ ᐃᐁᐧ ᐅᓇᑯᓂᑫᐃᐧᐣ ᑲᔭᓂᒧᑌᐠ ᑕᑭᐱᒋᓭᐊᐧᐣ ᐊᓂᑭᒋᑫᐃᐧᓇᐣ ᐁᐧᑎ ᑭᒋᑭᐁᐧᑎᓄᐣᐠ.
ᐯᔭᑎ ᐃᑭᑐ ᐅᓇᑯᓂᑫᐃᐧᐣ 191 ᐅᒪᑲᒪᐣ ᐊᓂᔑᓇᐯ ᐊᐢᑭ ᐃᐢᑯᓂᑲᓇᐣ ᐅᑕᑭᒥᐊᐧᐣ ᐁᑲ ᑎᐸᐦᐃᑫᐃᐧᐣ ᐁᒥᓂᐣᑕᐧ ᒥᓇ ᑲᔦ ᐁᑲ ᐁᐧᑎ ᓂᑲᐣ ᐁᐃᔑ ᑲᓇᐊᐧᐸᒋᑫᒪᑲᐠ ᓂᑲᐣ ᐃᐁᐧᓂᐊᐧᐣ ᐊᓂᔑᓇᐯ ᐊᐢᑭ ᑕᔑᑫᐃᐧᓇᐣ.
ᑭᑲᐅᓇᑐᒥᐣ ᑭᑕᑭᐦᒥᓇᐣ ᒥᓇ ᑲᔦ ᒋᐊᓂᑲᑕᒪᐠ ᑭᑎᐯᐣᒋᑫᐃᐧᓂᓇᐣ ᒋᑭᔓᓀᐣᑕᒪᐠ ᐊᓂᐣ ᑲᐃᐧ ᐃᔑ ᐊᓂᑲᑕᒪᐠ ᑭᑕᑭᒥᓇᐣ ᐅᒪ ᑭᐁᐧᑎᓄᐣᐠ. ᐊᒥᐦᐃᐁᐧ ᐅᑭᒪᐃᐧᐣ ᑲᑭ ᐃᔑ ᐊᔑᑕᒪᑯᔭᑭᐸᐣ ᐁᑲᐧ ᑕᐢ ᑲᔭᓂᑲᑕᒥᐣ ᐅᐁᐧ ᑭᒥᓂᑯᐃᐧᓂᓇᐣ.
ᓀᐣᑲᐃᐧᓴᑲᐦᐃᑲᓂᐠ ᐅᑭᒪᑲᐣ ᐊᑕᑦ ᐱᐟᓫᐃᕑ ᑭᐃᑭᑐ ᐅᑭᒪᑲᓇᐠ ᒥᓇ ᑕᔑᑫᐃᐧᓇᐣ ᑲᐃᔑ ᒪᒥᑎᓀᐣᑕᒧᐊᐧᐨ ᒥᓇ ᑲᑭᐃᔑ ᓂᓯᑎᑕᒧᐊᐧᐨ, ᐅᐣᑌᕑᐃᔪ ᐅᑭᒪᐃᐧᐣ ᐊᒥᐦᐃ ᐁᐃᔑᓇᑲᐧᐠ ᐁᐦᐊᓂ ᐅᓇᑐᐨ ᐯᔑᐠ ᑲᑭᒋᒥᔕᐠ ᐅᑭᒪᐃᐧᐣ ᑲᒪᓇᓇᒋᑐᐨ ᐊᐦᑭᓂ.
ᐊᒥᐦᐃ ᑲᔦ ᐁᐃᓯᓭᐠ ᐁᒪᑲᒥᑯᔭᐠ ᑲᑎᐯᐣᑕᒪᑭᐣ ᑫᑯᓇᐣ, ᐁᑲᐧ ᓂᐢᑕᑦ ᐃᑫᐧᓂᐊᐧᐣ ᑲᒪᓇᒋᑕᒪᓯᔭᐠ ᑭᑕᐦᑭᒥᓇᐣ ᐁᑲᐧ ᑕᐢ ᑲᔦ ᒋᓇᓇᐣᑎᓂᑲᑌᑭᐣ ᐊᐣᑎ ᑫᑭ ᐊᓂᔑ ᐃᐧᒋᐦᐃᐣᑕᐧᐸᐣ ᑫᐅᐣᒋᐱᒪᒋᐦᐅᐊᐧᐨ ᐊᐦᑭᑲᐠ ᐊᓂᔑᓂᓂᐊᐧᐠ ᐁᐧᑎ ᓂᑲᐣ, ᐱᐟᓫᐃᕑ ᑭᐃᑭᑐ. ᐊᓂᔑᓇᐯ ᐃᐢᑯᓂᑲᓇᐣ ᐸᑲᐣ ᐅᑎᔑᓇᓇᐣᑎᓇᓇᐊᐧ ᑫᐊᓂᔑᒋᑫᐊᐧᐨ ᐯᐸᑲᐣ ᓂᑕᔭᐱᒋᐢᑲᒥᐣ ᔕᑯᐨ ᑕᐢ ᐃᐁᐧ ᐃᓯᓭ ᐁᐊᐧᓇᒋᑲᑌᐠ ᐅᑭᒪᐃᐧᐣ ᑲᑎᐯᐣᑕᐠ ᐊᐦᑭ ᑲᐅᑕᐱᓇᒪᑯᔭᐠ ᐃᑫᐧᓂᐊᐧᐣ ᑲᑎᐯᐣᑕᒪᑭᐣ.
ᐊᐧᐃᐟ ᐊᐧᑎᕑ ᓴᑲᐦᐃᑲᐣ ᐅᑭᒪᑲᐣ ᐊᕑᓫᐃᐣ ᓯᓫᐃᐳᕑᒐᐠ ᐃᐁᐧᓂ ᐅᑕᔑᑫᐃᐧᐣ ᐅᔓᓂᔭᐃᐧ ᒪᒋᑕᐃᐧᓇᐣ ᐱᒧᒋᑫᐃᐧᓇᐣ ᐊᔕ ᐁᑭ ᐊᐧᓂᑐᐊᐧᐨ ᐊᐦᐱ ᐅᑕᔑᑫᐧᐃᓂᐊᐧ ᑲᑭ ᐊᐧᑲᐢᑲᑯᐊᐧᐨ ᐃᐁᐧᓂ ᐊᐧᐸᑭᒥ ᐅᑭᒪᐃᐧᐣ ᑲᑎᐯᑕᐠ ᐊᐦᑭ, 1983 ᑲᑭᒪᒋᒋᑲᑌᑭᐸᐣ ᐃᐁᐧ ᑲᑭ ᐊᓂᓇᐣᑭᑎᐸᐦᐊᑲᑌᐠ ᑐᑲᐣ ᐊᐧᐸᓄᐣᐠ ᓀᑫ ᑲᔭᑭᐣ ᑭᒋᒥᓂᐦᑎᑯᐣ 1997 ᑲᔭᑭᐦᐊᐧᐠ.
ᐊᐧᐃᐟ ᐊᐧᑎᕑ ᐃᐢᑯᓂᑲᐣ ᒥᑐᓂ ᐱᑯ ᐅᑭᐸᑯᐢᑲᓇᐊᐧ ᐅᓇᑯᓂᑫᐃᐧᐣ 191, ᓯᓫᐃᐳᕑᒐᐠ ᐃᑭᑐ. ᐊᒥᐦᐃ ᑲᔦ ᑲᑭᐃᑭᑐᐨ ᐅᑕᓂᔑᓂᓂᒪᐣ ᑲᐃᐧᐣ ᒋᐊᔭᓂᐨ ᐊᓂᑭᐃᐧᓇᐣ ᒥᓇ ᑲᐯᔑᐃᐧᓇᐣ ᒥᓇ ᑲᔦ ᐃᒪ ᐃᔑᑕᐊᐧᐠ ᓀᓇᐤ ᐊᐧᐸᑭᒥ ᐅᑭᒪᐃᐧᐣ ᑲᑎᐯᑕᐠ ᐊᐦᑭᓂ.
ᓂᑯᑕᐧᓯᔕᑊ ᐊᐦᑭ ᐅᐱᒥ ᐱᑯᓇᓇᐊᐧ ᐅᓇᑯᒧᐃᐧᓂᐊᐧ ᐅᑭᒪᐃᐧᐣ, ᓯᓫᐃᐳᕑᒐᐠ ᐃᑭᑐ, ᐁᑭᐃᑭᑐᐨ 899 ᐃᓂᑯᐠ ᐊᐦᑭᐃᐧ ᑎᐸᐦᐊᑲᐣ ᐁᑭᐅᑕᐱᓇᒪᐃᐧᐣᑕᐧ ᐅᑕᑭᒥᐊᐧ ᐃᒪ ᑕᐢ ᐁᑭᐃᔑ ᐊᒋᑲᑌᓂᐠ ᐅᑭᒪᐃᐧᐣ ᑲᑎᐯᐣᑕᐠ ᐊᐦᑭᓂ.. ᒥᑐᓂ ᓂᑭᐱᐢᑲᑯᒥᐣ ᐅᐣᑌᕑᐃᔪ ᐅᑭᒪᐃᐧᐣ ᑲᑎᐯᐣᑕᐠ ᐊᐦᑭᐃᐧ ᐱᒧᒋᑫᐃᐧᐣ ᐁᑲᐧ ᑕᐢ ᒥᓇ ᐅᐁᐧ ᓄᑯᑦ ᐅᓇᑯᓂᑫᐃᐧᐣ 191 ᑲᐊᓂᒧᑌᐠ ᐊᐊᐧᔑᒣ ᐃᐁᐧ ᓇᒪᒋᓭᐦᐃᑯᒥᐣ.
ᐁᐱᑭᔕᒋᑲᑌᐠ 225,000 ᐊᐦᑭᐃᐧ ᑎᐸᐦᐊᑲᓇᐣ ᐁᐧᑎ ᑭᐁᐧᑎᓄᐣᐠ ᐅᐣᑌᕑᐃᔪ, ᐱᐟᓫᐃᕑ ᐅᑌᐯᐧᑕᐣ ᐅᐣᑌᕑᐃᔪ ᐅᑭᒪᐃᐧᐣ ᒥᐦᐃᐁᐧᓂ ᐃᐢᑲᐧᔭᐨ ᒋᑭᐅᐣᒋ ᑲᑫᐧ ᐃᐧᒋᐦᐃᑎᓱᐸᐣ ᒋᑭ ᑲᑫᐧ ᒪᓇᒋᑐᐸᐣ ᐅᑕᑭᒥᐊᐧ, ᑲᐅᐣᒋ ᐸᑭᑕᓇᒧᔭᐠ ᒥᓇ ᓂᐦᐱ ᑲᑭᓂᔕᐧᓇᒋᒋᑲᑌᑭᐣ ᐁᐧᑎ ᔕᐊᐧᓄᐣᐠ.
ᐊᒥᑕᐢ ᐁᐃᓯᓭᐊᐧᐨ ᑭᑕᓂᔑᓂᓂᒥᓇᐣ, ᑭᒋᔭᐦᐊᐠ, ᒥᓇ ᐅᑕᓇᐠ ᑲᑭᐱᐱᒪᑎᓯᐊᐧᐨ, ᐅᑭᑫᐣᑕᓇᐊᐧ ᑫᐃᔑ ᒪᓇᒋᑐᐊᐧᐨ ᐅᑕᑭᐊᐧ ᐁᑲᐧ ᑲᔦ ᒥᓯᐁᐧ ᐊᐦᑭ ᑲᐃᔑ ᑲᑫᐧᒪᓇᒋᒋᑲᑌᐠ, ᐱᐟᓫᐃᕑ ᐃᑭᑐ. ᐊᐊᐧᔑᒣ ᑭᒋᒥᑕᓱᒥᑕᓇ ᐊᐦᑭᐃᐧᐣ ᐅᑐᐣᒋ ᑐᑕᓇᐊᐧ.
ᐱᐟᓫᐃᕑ ᐃᑭᑐ ᑲᐅᑭᒪᐃᐧᐊᐧᐨ ᐃᐢᑯᓂᑲᓇᐣ ᐁᐧᑎ ᑭᒋᑭᐁᐧᑎᓄᐣᐠ ᓇᐣᑕᐁᐧᐣᑕᑲᐧᐣ ᒋᑭ ᑲᑫᐧ ᓂᓯᑕᐃᐧᓂᑲᑌᑭᐣ, ᐃᐁᐧ ᒪᐊᐧᐨ ᑲᐱᒪᓄᑲᑌᐠ ᐊᐦᑭ ᑲᐃᐧ ᐃᓇᐸᑕᐠ ᐅᓇᒋᑫᐃᐧᐣ ᒥᓇ ᐅᓀᐣᒋᑫᐃᐧᓇᐣ.
ᐊᐱ ᑕᐢ ᒪᒋᓭᐠ ᐃᐁᐧ ᐅᓇᑯᓂᑫᐃᐧᐣ 191, ᑭᒪᓂᑐᐃᐧ ᒥᓂᑯᐃᐧᓇᐣ ᒥᓇ ᑲᐃᓇᑭᑌᐠ ᑭᑕᑭᒥᓇᐣ ᒥᑐᓂ ᑲᒪᑲᒥᑯᒥᐣ ᐁᑲ ᒋᑭᐅᓇᔓᐊᐧᑕᒪᐠ ᐊᓂᐣ ᑫᐊᓂᑐᒋᑲᑌᑭᐣ ᑭᑕᑭᒥᓇᐣ, ᐱᐟᓫᐃᕑ ᐃᑭᑐ.
ᒉᓯᑲ ᐁᐟᐊᐧᕑᐟᐢ, ᐅᑲᑭᑐᑕᒪᑫ ᐊᓂᔑᓇᐯ ᐊᐢᑭ ᐅᐢᑲᑎᓴᐠ ᑭᐃᑭᑐ ᐊᓂᔑᓇᐯ ᐅᐢᑲᑎᓴᐠ ᓄᑯᑦ ᑲᑭᔑᑲᐠ ᒥᐢᑕᐦᐃ ᐅᑭᑫᐣᑕᓇᐊᐧ ᑲᐃᓯᓭᑭᐣ ᐅᑕᑭᒥᐊᐧ ᒥᓇ ᑲᐃᔑ ᒥᓇᑲᓄᐊᐧᐨ ᐅᒪᓂᑐᐃᐧ ᒪᐢᑲᐃᐧᓯᐃᐧᓂᐊᐧ ᐅᑕᑭᒥᐊᐧ ᐅᐣᒋ.
ᒪᐊᐧᐨ ᑭᒋᓀᐣᑕᑲᐧᐣ ᒋᐊᔭᒥᑕᒪᐠ ᑭᑕᑭᒥᓇᐣ ᐊᓂᐣ ᑲᐃᐧ ᐃᓇᐸᒋᑐᔭᐠ ᒥᓇ ᐊᓂᐣ ᑫᐃᓇᐸᒋᑐᐊᐧᐨ ᓂᑲᐣ ᑫᐊᓂᐱᒪᑎᓯᐊᐧᐨ, ᐁᐟᐊᐧᕑᐟᐢ ᑭᐃᑭᑐ. ᑫᑭᓇᐃᐧᐣᐟ ᑲᐊᓂᔑᓂᓂᐃᐧᔭᐠ ᐅᒪ ᐊᓂᔑᓇᐯ ᐊᐢᑭ ᐅᐢᑲᑎᓯᐃᐧ ᐅᑕᐱᑕᒪᑫᐠ ᐣᑫᓂᓇᐃᐧᐣᐟ ᓇᐃᐧᒋᑕᐧᒥᐣ ᒋᑭᐸᑯᐢᑲᒪᐠ ᐅᓇᑯᓂᑫᐃᐧᐣ 191.
ᑕᐧᓇ ᐅᕑ, ᐊᓂᔑᓇᐯ ᐊᐢᑭ ᐃᑫᐧᐊᐧᐠ ᐅᑕᐱᑕᒪᑫᐠ ᑲᑭ ᑲᑭᑐᑕᒪᑫᐨ, ᑭᐃᑭᑐᐊᐧᐠ ᐊᓂᓂᑯ ᑫᐊᓂᓯᓭᐠ ᐊᒥᐱᑯᐦᐃ ᑫᐃᔑ ᐃᐧᒋᑕᐧᐊᐧᐨ ᑫᐃᐧᓂᐊᐧ ᐅᐁᐧ ᑭᑎᐯᐣᒋᑫᐃᐧᓂᓇᐣ ᐅᐱᒪᑎᓯᐃᐧᓂᐊᐧ ᑫᐃᓯᓭᓂᐠ ᒋᒪᓇᒋᒋᑲᑌᑭᐣ ᐁᐧᑎ ᓂᑲᐣ.
ᐁᑲᐧ ᑕᐢ ᓂᐣ ᐁᐅᒪᒪᐃᐧᔭᐣ, ᐊᒥᐦᐃ ᑫᓂᐣ ᐁᐃᓯᓭᐠ ᒋᓇᓇᑲᑕᐁᐧᓂᒪᑲᐧ ᓂᓂᒐᓂᔕᐠ ᑫᐃᐧᓇᐊᐧ ᒋᐅᓀᐣᑕᒪᓯᐊᐧᐨ ᐊᓂᐣ ᒥᓇ ᐊᓇᐱ ᑫᐃᓇᐸᑕᓂᐠ ᐅᑕᑭᒥᐊᐧ, ᐅᕑ ᐃᑭᑐ. ᑲᐃᐧᐣ ᐃᓯᓭᓯᓄᐣ ᐅᐣᑌᕑᐃᔪ ᐅᑭᒪᐃᐧᐣ ᒋᐅᓀᐣᑕᒧᑯᔭᐠ ᐅᐁᐧᓂ.