ᕑᐊᐣᑎ ᐊᐧᐸᐢ ᑭᐁᐧ ᒥᐦᑲᐃᐧ ᐅᑕᑕᒪᐣ ᐅᐊᐧᓂᐦᑫᐃᐧᐣ

ᓂᐱᓇᒥᐠ ᑭᒋᔭᐦᐊ ᒪᐃᐠ ᐊᐧᐸᐢ ᐅᑭ ᐅᔑᑐᓇᐸᐣ ᐊᐧᑲᐦᐃᑲᓂ ᐃᒪ ᐅᐸᑭᑕᓇᒧᐃᐧᓂᐠ, ᓂᔭᓄᑎᐸᐦᐊᑲᐣ ᓂᑲᑌ ᐃᐢᑯᓂᑲᓂᐠ ᒋ̇ᒪᓂᐠ ᐁᐦᑕ ᐁᐅᐣᒋ ᐊᔕᐃᐧᐢᑲᓂᐊᐧᐠ, ᒣᑲᐧᐨ 1990 ᑲᑭ ᐱᒥ ᐊᐦᑭᐊᐧᐠ.
ᐊᐧᐸᐢ ᑭᐃᓀᐣᑕᒧᐸᐣ ᒋᑭ ᐃᔑᐃᐧᓇᑲᓄᐊᐧᐸᐣ ᐅᐢᑲᑎᓴᐠ ᐱᑲᐧᒋᔭᐦᐃᐣᐠ ᒋᑭᑭᓄᐦᐊᒪᐊᐧᑲᓄᐊᐧᐸᐣ ᐊᓂᐣ ᑫᐃᔑ ᐱᒪᒋᐦᐅᐊᐧᐸᐣ ᐃᒪ ᐱᑲᐧᒋᔭᐦᐃᐣᐠ.
ᐃᒪ ᓂᐢᑕᑦ ᑲᑭ ᐅᐣᒋ ᒪᒋᓭᑭᐸᐣ ᐯᔑᐠ ᐊᐧᑲᐦᐃᑲᐣ ᑭᐅᔑᒋᑲᑌᐸᐣ ᐱᓂᐢ ᓂᐦᓯᐣ ᐊᐧᑲᐦᐃᑲᓇᐣ ᑭᐊᓂ ᐅᔑᒋᑲᑌᐊᐧᐣ ᔭᐦᐃ ᐯᔑᐠ ᐃᐧᓯᓂᐃᐧᑲᒥᐠ
ᒥᓇ ᑲᔦ ᑫᑕᔑᓂᑲᒧᓇᓂᐊᐧᐠ. ᐅᐸᑭᑕᓇᒧᐃᐧᓂᐠ ᓄᑯᑦ ᐊᒥᐦᐃᒪ ᑲᑕᔑ ᒪᐊᐧᒋᐦᐊᑲᓄᐊᐧᐠ ᐅᐢᑲᑎᓴᐠ, 1999 ᑲᔭᑭᐊᐧᐠ ᑲᑭ ᐅᐣᒋ ᒪᒋᒋᑲᑌᐠ.
“ᐊᒥᐦᐃ ᑲᑭ ᐃᓀᐣᑕᑭᐸᐣ ᒋᐅᔑᑐᐨ ᐊᐧᑲᐦᐃᑲᓂ ᐁᑭ ᒪᒥᑎᓀᓂᒪᐸᐣ ᐅᐢᑲᑎᓴᐣ ᒋᐃᔑᐃᐧᓇᑲᓄᐊᐧᐨ ᐱᑲᐧᒋᔭᐦᐃᐣᐠ, ᔕᑯᐨ ᑕᐢ ᑭᐃᓀᐣᑕᒧᐸᐣ ᐱᓇᒪ ᒋᐅᔑᒋᑲᑌᑭᐣ ᐊᐧᑲᐦᐃᑲᓇᐣ,” ᐃᑭᑐ ᕑᐊᐣᑎ ᐊᐧᐸᐢ, ᒪᐃᐠ ᐅᑯᓯᓴᐣ.
“ᐅᑭ ᐃᐧᒋᐦᐃᑯᐸᓂᐣ ᑯᑕᑭᔭᐣ ᑭᒋᔭᐦᐊᐣ ᒋᐅᔑᑐᐊᐧᐨ ᐊᐧᑲᐦᐃᑲᐣ ᒥᓇ ᑲᔦ ᒋᑭ ᐊᓂᔭᑭᐸᐣ ᑫᑕᔑ ᒪᐊᐧᒋᐦᐊᑲᓄᐊᐧᐠ ᐅᐢᑲᑎᓴᐠ ᓄᑯᑦ ᑲᐃᔑᓇᑲᐧᐠ ᑲᐊᐧᐸᑕᒣᐠ, ᒋᑭ ᐅᐣᒋ ᑭᑫᐣᑕᒧᐊᐧᐸᐣ ᑫᐃᔑ ᐱᒪᒋᐦᐅᐊᐧᐨ ᑐᑲᐣ ᒋᓂᐦᑕ ᓇᓇᐣᑕᐁᐧᐣᒋᑫᐊᐧᐨ, ᒋᓂᐦᑕ ᐊᐧᓂᐦᐃᑫᐊᐧᐨ ᒥᓇ ᒋᓂᐦᑕ ᓄᒋᑭᓄᔐᐁᐧᐊᐧᐨ ᒥᓇ ᒋᓂᐦᑕ ᐸᑭᑕᐦᐁᐊᐧᐨ.
ᓂᑕᑕ ᑭᐃᔑ ᑌᐯᐧᑕᑦ ᐃᐧᐸᐨ ᐊᐧᐃᔭ ᑫᑭ ᐃᔑ ᑭᑫᐣᑕᐣᑭᐸᐣ ᑫᑯᓇᐣ ᑫᒋᐊᐧᐠ ᐱᑯ ᒋᑭᑭᓄᐦᐊᒪᐊᐧᑲᓄᐨ, ᐁᑲ ᐃᐧᓂᑯ ᒋᑭ ᒧᐦᒋ ᑲᓇᐊᐧᐱᐨ ᐱᑯ ᐁᐦᑕ ᒋᑲᑫᐧ ᑐᑕᐣᐠ.” ᐊᐧᐸᐢ ᐃᑭᑐ.
ᐃᐁᐧ ᓂᐢᑕᑦ ᐊᐧᑲᐦᐃᑲᐣ ᑲᑭ ᐅᔑᑐᐨ ᒪᐃᐠ ᐊᐧᐸᐢ ᓇᐣᑕ ᓂᔑᐣ ᓇᐣᑕ ᑲᔦ ᓂᐦᓯ ᐱᒧᑯᓇᑲ ᑭᐃᓯᓭᓂ ᒋᐱᒥᑲᒧᐊᐧᐨ ᐁᑭ ᐃᐧᒋᐦᐊᑲᓄᐨ.
“ᒪᐊᐧᐨ ᑭᐸᐯᒋᓭ ᒋᐅᔑᒋᑲᑌᐠ ᐅᐁᐧ ᑭᑭᓄᐦᐊᒪᑫᐃᐧᑲᒥᐠ ᔓᑯᐨ ᑕᐢ ᑭᐊᓂ ᐃᓯᓭ ᒋᐊᓂᑭᔑ ᐃᔑᓇᑲᐧᐠ ᓄᑯᑦ ᑲᑭᔑᑲᐠ ᑲᐃᔑᓇᑲᐧᐠ,” ᕑᐊᐣᑎ ᐊᐧᐸᐢ ᑭᐃᑭᑐ.
ᕑᐊᐣᑎ ᐊᐧᐸᐢ ᐊᔕ ᓂᑯᑕᐧᓯ ᐊᐦᑭ ᑲᐯᔑ ᐊᐧᓇᒪᐣᓴᑲᐦᐃᑲᓂᐠ. ᐊᒥᐦᐃ ᐸᐢᑲᐣ ᐯᔑᑲᐧ ᐁᑭ ᐃᔕᐨ ᐊᔕ ᓂᐅᐧᐊᐦᑭ ᑲᐅᐣᒋ ᐱᒥᐸᓂᒋᑲᑌᐠ ᐅᐢᑲᑎᓴᐠ ᑲᐃᔑ ᒪᐊᐧᒋᐦᐃᐣᑕᐧ, ᒣᑲᐧᐨ ᐅᐸᐢᑯᐃᐧᐱᓯᑦ 12-17 ᑲᑭ ᐃᓇᐣᑭᓯᐨ.
“ᐁᑲᐧ ᑕᐢ ᒪᐊᐧᐨ ᓄᑯᑦ ᐊᓂ ᒥᐦᔕ ᐅᐁᐧ ᐅᐊᐧᓂᐦᐃᑫᐃᐧᑲᒥᐠ ᓂᑕᑕ ᑲᑭ ᒪᒋᑐᐸᐣ. ᐊᓂᒥᔑᓇᑎᓄᐣ ᐊᐧᑲᐦᐃᑲᓇᐣ ᒥᓇ ᑲᔦ ᒥᔑᐣ ᐊᐃᐧᔭᐠ ᐊᓂᐸ̇ᐱᔕᐊᐧᐠ,” ᑭᐃᑭᑐ.
ᕑᐊᐣᑎ ᐅᑭ ᐱ̇ᒋᐃᐧᓇᐣ ᓂᓴᐧᓯ ᐊᐧᓇᒪᓂᓴᑲᐦᐃᑲᓂᐃᐧ ᐅᐢᑲᑎᓴᐣ ᓂᔑᐣ ᒋᒪᓇᐣ ᐁᑭ ᐊᐸᒋᑐᐊᐧᐨ. ᐅᑭ ᒥᓴᐁᐧᐣᑕᐣ ᒋᑭ ᐅᐣᒋ ᑭᑫᐣᑕᒧᐊᐧᐸᐣ ᑫᑯᓇᐣ ᐅᐁᐧ ᐊᐧᓂᐦᐃᑫᐃᐧ ᑭᑭᓄᐦᐊᒪᑫᐃᐧᑲᒥᐠ ᑲᐸᑭᑎᓂᑲᑌᐠ.
ᐃᐁᐧ ᑕᐢ ᒪᐊᐧᐨ ᑲᓂᓯᑕᐃᐧᓇᐣᐠ ᓂᔓᔕᑊ ᐊᐦᑭ ᐅᑕᓇᐣᐠ ᐊᐦᐱ ᑲᑭ ᒪᒋᒋᑲᑌᑭᐸᐣ ᐅᐢᑲᑎᓯᐃᐧ ᒪᐊᐧᒋᐦᐃᑎᐃᐧᐣ ᐃᐁᐧ ᐊᔕ ᐁᐊᓂ ᒥᔕᐠ ᐊᐱ ᓂᐢᑕᑦ ᐊᐊᐧᔑᔕᐠ ᑲᑭ ᒪᒋᐸᐱᔕᐊᐧᐸᐣ ᐅᑫᐧᓂᐊᐧᐠ ᑕᐢ ᓄᑯᑦ ᐁᐊᓂ ᐱᒥᐸᓂᑕᐧᐊᐧᐨ ᐅᐁᐧ ᑭᑭᓄᐦᐊᒪᑫᐃᐧᐣ.
“ᐁᑭ ᑭᑭᓄᐦᐊᒪᐃᐧᐣᑕᐧᐸᐣ ᓂᐢᑕᑦ ᑲᒪᒋᒋᑲᑌᑭᐸᐣ ᒥᓇ ᑲᔦ ᐃᐧᓇᐊᐧ ᐊᐦᐱᐣ ᐁᐦᐊᓂ ᐱᒥᐸᓂᑕᐧᐊᐧᐨ ᑲᐯᐱᒧᑯᓇᑲ ᑲᑐᒋᑲᑌᐠ,” ᕑᐊᐣᑎ ᐃᑭᑐ.
ᒪᐃᐠ ᐊᐧᐸᐢ ᑭᐃᐢᑲᐧᐱᒪᑎᓯᐸᐣ 2003 ᑲᑭ ᐸᐣᑭᓯᑭᐸᐣ ᐱᒥᓭᐃᐧᐣ ᐊᑲᐧᒋᔭᐦᐃ ᓂᐱᓇᒥᐠ.
“ᒥᐦᐃ ᐁᐃᓀᐣᑕᒪᐣ ᑭᐢᐱᐣ ᐊᐧᐸᑕᑭᐸᐣ (ᐅᐊᐧᓂᐦᐃᑫᐃᐧᑲᒥᐠ) ᓄᑯᑦ ᒪᐊᐧᐨ ᑫᒋᐣ ᐅᑕᑭᒋ̇ᓀᐣᑕᒧᐦᐃᑯᐣ,” ᕑᐊᐣᑎ ᐃᑭᑐ.
“ᒪᐊᐧᐨ ᐅᑕᑭ ᒥᓄᐧᐁᐧᐣᑕᒧᐦᐃᑯᓇᐸᐣ ᐅᐢᑲᑎᓴᐣ ᑲᑲᐢᑭᑐᓂᐨ ᒋᐱᒥᐸᓂᑕᐧᐊᐧᐨ ᒥᓇ ᒋᐱᒧᑐᓂᐨ ᐅᐸᐊᐧᒧᐃᐧᓂ. ᒪᐊᐧᐨ ᐅᑕᑭ ᑭᒋ̇ᓀᐣᑕᓇᐸᐣ ᐅᐢᑲᑎᓴᐣ ᑲᑭ ᓂᐢᑕᑦ ᑭᑭᓄᐦᐊᒪᐃᐧᐣᑕᐧᐸᐣ ᐃᐧᓇᐊᐧ ᐁᐱᒧᑐᓂᐨ,” ᑭᐃᑭᑐ.
“ᓂᒥᓄᓇᐣ ᑲᐃᔑ ᐊᐧᐸᑕᒪᐣ,” ᕑᐊᐣᑎ ᐃᑭᑐ.
“ᑭᔭᐸᐨ ᐊᓂᔑᓂᓂᐊᐧᐠ ᐅᒥᓴᐁᐧᐣᑕᓇᐊᐧ ᒋᐱᒥᓭᐠ ᐅᐁᐧ ᐅᐢᑲᑎᓴᐠ ᑲᑕᔑ ᑭᑭᓄᐦᐊᒪᐊᐧᑲᓄᐊᐧᐨ ᐁᐧᑎ ᓂᑲᐣ ᑫᐊᐧᓂ ᐊᐦᑭᐊᐧᐠ.”