ᑲᓇᑕ ᑭᒋᐅᑭᒪᑲᐣ ᐊᐟᓫᐃᔪ ᐃᑭᑐ ᐊᔕ ᐅᒋᒋᓭ ᒋᐁᐧᐱᓂᑲᑌᐠ ᐊᓂᔑᓇᐯ ᐅᓇᑯᓂᑫᐃᐧᐣ

ᑲᓇᑕ ᑭᒋᐅᑭᒪᑲᐣ ᔕᐧᐣ ᐊᐟᓫᐃᔪ ᒥᓯᐁᐧ ᑭᐃᐧᒋᑲᑌᓂ ᑎᐸᒋᒧᐃᐧᓂᐠ ᑲᑭᐃᑭᑐᐨ ᐊᔕ ᐅᒋᒋᓭ ᑭᒋᐁᐧᐱᓂᑲᑌᓂᑭᐸᐣ ᐅᑭᒪᐅᐣ ᐅᓇᑯᓂᑫᐃᐧᐣ ᑲᐃᔑᑲᓇᐊᐧᐸᒪᐨ ᐊᓂᔑᓂᓂᐊᐧᐣ.
ᐁᑲᐧ ᒣᑲᐧᐨ ᒥᓯᐁᐧᑲᒥᐠ ᑲᓇᑕ ᐅᑭᒪᑲᓇᐠ ᑲᑭᒪᐊᐧᒋᐦᐃᑐᐊᐧᐸᐣ ᒣᑲᐧᐨ ᐅᐸᐡᑯᐃᐧᐱᓯᑦ 20 ᐱᓂᐡ 22 ᑲᐃᓇᑭᓱᐨ ᐁᐧᑎ ᐃᐧᓂᐯᐠ ᒪᓂᑐᐸ, ᐊᐟᓫᐃᔪ ᑭᐃᔑᑲᑫᐧᒋᒥᐁᐧ, ᐊᔕ ᓇᐦ ᐃᓯᓭᐸᐣ ᒋᑭᐅᓀᐣᑕᐸᑭᐸᐣ ᓂᔓᔭᑭ ᐊᑯᓇᐠ ᓂᔭᓄᔭᑭ ᐁᑲ ᐊᐊᐧᔑᒣ ᒋᑭᐱᒧᓂᑯᔭᑭᐸᐣ ᐊᓂᔑᓇᐯ ᐅᑯᓂᑫᐃᐧᐣ.
ᐅᑭᐊᓂᒧᑕᐣ ᑲᔦ ᐊᓂᐣ ᐁᐱᒥᑐᒋᑫᒪᑲᐠ ᐊᓂᔑᓇᐯ ᐅᓇᑯᓂᑫᐧᐃᐣ ᐅᑭᒪᐅᓂᐠ ᑲᐅᒋᐱᒥᐅᓇᔓᐊᐧᑌ. ᒥᑕᐡ ᐅᓄᐁᐧᓂᐊᐧᐣ ᑲᐱᒥᑐᒋᑫᒪᑲᑭᐣ ᒪᐊᐧᐨ ᒥᔑᐣ ᐁᐅᒋᓂᓯᑎᓱᐊᐧᐨ ᐊᓂᔑᓂᓂᐊᐧᐠ, ᒪᐊᐧᐨ ᒥᔑᐣ ᐊᓂᔑᓂᓂᐊᐧᐠ ᐁᑭᐸᐦᐅᐣᑕᐧ ᐅᒪ ᑲᐊᐱᑕᑲᒥᑲᐠ ᑲᓇᑕ, ᒪᐊᐧᐨ ᐁᓇᐊᐧᒋᓄᐊᐧᐨ ᑲᑭᔑᐃᐡᑯᓄᐊᐧᐨ ᒥᓇ ᐸᐣᑭ ᐁᔓᓂᔭᑫᑲᐡᑭᑕᒪᓱᐊᐧᐨ, ᑭᐃᑭᑐ.
ᐁᑲᐧ ᑕᐡ ᐊᐱᐨ ᐃᐧᐣ ᐅᑭᒪᐅᓂᐠ ᐅᒋᐱᐃᐧᓂᑯᔭᐠ ᑲᐊᓂᔑᓂᓂᐃᐧᔭᐠ, ᑭᐃᑭᑐ ᓇᐊᐧᐨ ᒋᑭᑲᑫᐧᑐᑕᑭᐸᐣ ᑲᓇᑕ ᐅᑭᒪ ᒋᑭᐅᓇᓴᐸᐣ ᒋᐅᑭᒪᐃᐧᐦᐃᑕᐧ ᐊᓂᔑᓂᓂᐤ ᐅᑭᒪᐠ ᑫᑭᐅᒋ ᐃᐧᑕᓄᑭᒪᐊᐧᐸᐣ ᑭᒋᐅᑭᒪᐊᓄᑭᓇᑲᓇᐠ, ᐊᔑᐨ ᑲᔦ ᑫᑭᐅᒋ ᐊᓄᑲᑕᒧᐊᐧᐸᐣ ᑭᒋᐊᔓᑕᒪᑫᐃᐧᓇᐣ ᒪᒥᓄ ᑲᓄᒋᑫᑕᒪᓱᐃᐧᐣ ᑲᐅᒋᐊᓄᑲᑕᒧᐊᐧᐨ. ᒥᑕᐡ ᐃᓂᐁᐧᓂᐊᐧᐣ ᐊᔕ ᑭᒋᐁᐧᐡᑲᐨ ᑲᐅᒋ ᐱᒥᑭᑲᑌᑭᐣ ᐊᔓᑕᒪᑫᐃᐧᓇᐣ ᑲᑭᐃᓇᐧᑌᑭᐸᐣ ᒋᐅᒋ ᒥᓄᐡᑲᒪᑲᑭᐣ ᐊᑯᓯᐃᐧ ᐃᐧᒋᐦᐃᑯᐃᐧᓇᐣ ᒥᓇ ᐱᑯ ᐊᐦᑭ ᑫᐃᔑᑲᐯᔑᓇᓂᐊᐧᐠ, ᑭᐃᑭᑐ.
ᐅᐁᐧ ᐊᓂᔑᓇᐯ ᐅᓇᑯᓂᑫᐃᐧᐣ ᑲᐃᒋᑲᑌᐠ ᒪᐊᐧᐨ ᓂᐢᑕᑦ ᑭᐅᓇᒋᑲᑌᐸᐣ 1876 ᑲᔭᑭᐊᐧᐠ, ᒥᐦᐅᒪ ᐁᐅᒋᑲᓇᐊᐧᐸᒋᑲᑌᑭᐣ
ᓇᑕᐁᐧᑕᑲᐧᐣ ᒋᐊᐣᒋᓭᑭᐣ ᑫᑯᓇᐣ ᑫᑭᐅᒋ ᐃᐧᒋᐦᐃᐁᐧᒪᑲᐠ ᐊᓂᔑᓂᓂᐃᐧ ᐱᒧᓂᑎᓱᐃᐧᐣ
ᐊᐁᐧᓀᐣ ᑫᐊᓂᔑᓂᓂᐊᐧᑭᒪᑲᓂᐃᐧᐨ, ᐃᐡᑯᓂᑲᓂᐠ ᑫᐃᔑᐱᒥᐃᐧᒋᑲᑌᐠ, ᑫᐃᔑᐱᒧᒋᑲᑌᐠ ᓂᑲᓂᑕᒪᑫᐃᐧᐣ, ᑫᐃᔑᐱᒥᐃᐧᒋᑲᑌᐠ ᐱᐣᒋᐃᐡᑯᓂᑲᐣ ᒥᓇ ᔓᓂᔭ ᑫᐃᔑᐱᒥ ᐸᐸᑭᑎᓂᐨ. ᐁᑲᐧ ᑲᒪᐧᔦ ᐅᓇᒋᑲᑌᑭᐸᐣ ᐅᐁᐧ ᐅᓇᑯᓂᑫᐃᐧᐣ ᑎᐸᐣ ᐅᑭᐊᔭᓇᐊᐧ ᐅᑐᓇᑯᓂᑫᐃᐧᓂᐊᐧ ᐊᓂᔑᓂᓂᐊᐧᐠ ᑲᑭᐱᒥᐃᐧᓂᑯᐊᐧᐨ ᑲᔭᐡ ᐊᓂᔑᓂᓂᐊᐧᐠ.
ᑲᓂᑲᓂᑕᒪᑫᐊᐧᐨ ᑭᐁᐧᑎᓄᐠ ᐅᐣᑌᕑᐃᔪ ᐊᔕ ᑲᐧᔭᐣᒋᐊᐧᐠ ᒋᐊᐣᑕᒋᑲᑌᓂᐠ ᑫᑯᓇᐣ.
ᐊᑎᑲ ᐊᑯ ᑲᐊᔭᑭᓀ ᑭᐅᑫᔭᐣ ᑕᔑᑫᐃᐧᓇᐣ ᒥᓇ ᑲᓄᑕᐊᐧᑲᐧ ᑭᒋᐦᐊᐠ ᑲᓇᓄᑕᑯᓯᐊᐧᐨ, ᑭᔭᑦ ᐁᑲ ᐁᐊᓇᑭ ᓂᓯᑐᑕᒧᐊᐧᐨ ᐊᓂᔑᓇᐯ ᐅᓇᑯᓂᑫᐃᐧᓂ ᑲᐃᒋᑲᑌᓂᐠ, ᔕᑯᐨ ᐃᑯ ᐅᓂᓯᑕᐁᐧᐣᑕᓇᐧᐊ ᐅᑭᒪᐃᐧᓂᐠ ᐁᐅᐣᒋᓭᓂᐠ, ᐃᑭᑐ ᒪᐡᑭᑯᐊᐧᐠ ᑭᒋᐅᑭᒪᑲᐣ ᐢᑕᐣ ᓫᐅᑎᐟ. ᐅᓂᓯᑐᑕᓇᐊᐧ ᐸᑲᐣ ᐁᐃᓇᑌᓂᐠ ᓇᐣᑕ ᒥᓇ ᐁᓂᓯᑕᐃᐧᓂᑫᒪᑲᓂᐠ ᐊᓂᔑᓂᓂᓇᐠ ᐁᑕ ᐁᐃᔑᑲᓇᐊᐧᐸᐣᒋᑫᒪᑲᐠ, ᐊᓇᐃᐧᐣ ᑕᐱᐡᑯᐠ ᐃᑯ ᐁᒧᒋᐸᒥᐃᐁᐧᒪᑲᐠ. ᑭᒋᐦᐊᐠ ᐅᑎᔑᑲᓇᐊᐧᐸᑕᓇᐊᐧ ᒋᑭᐃᐧᑕᓄᑭᒪᑲᓂᐃᐧᐸᐣ ᐅᑭᒪᐃᐧᐣ.
ᓫᐅᑎᐟ ᑫᐃᐧᐣ ᐅᐃᐧᒋᑲᐸᐃᐧᑕᐣ ᑲᐃᐧᑲᑫᐧ ᐊᐣᒋᒋᑲᑌᐠ ᓂᑲᓂᑕᒪᑫᐃᐧᐣ.
ᑭᐡᐱᐣ ᑲᓇ ᑌᐯᐧ ᐃᔑᓇᑲᐧᐠ ᐅᒪ ᐅᒋᐃᐧᒋᑲᐸᐃᐧᒋᑲᑌᑭᐣ 633 ᐃᐡᑯᓂᑲᓇᐣ ᑲᐊᔭᑭᐣ (ᐊᔑᐨ ᒪᐡᑭᑯ ᐃᐡᑯᓂᑲᓇᐣ), ᐅᐁᐧ ᒋᑲᑫᐧᐁᐧᐱᓂᑲᑌᐠ ᐊᓂᔑᓇᐯ ᐅᓇᑯᓂᑫᐃᐧᐣ, ᒥᑕᐡ ᐃᑯ ᑫᑭᐃᔑᐃᐧᒋᑕᐧᔭᑭᐸᐣ ᒥᓇ ᐱᒥᐃᐧᑐᔭᐸᑭᐸᐣ. ᐁᑲᐧ ᒥᓇ ᒋᓇᓇᑕᐊᐧᐸᑕᒪᐠ ᐊᓂᐣ ᑫᐃᔑᒪᒥᓇᐧᑐᔭᐠ. ᑭᐡᐱᐣ ᑕᐡ ᐃᐧᓀᑕ ᐱᒪᓄᑲᐊᐧᐨ ᐅᑭᒪᐃᐧᓇᐣ, ᑲᐃᐧᐣ ᑕᐊᓄᑭᓭᓯᐣ, ᒥᑕᐡ ᓇᐱᐨ ᐁᔑᑭᒋᓀᑕᐠ ᓫᐅᑎᐟ ᒋᐊᐣᒋᒋᑲᓂᐊᐧᓂᐠ.
ᒪᑎ ᑲᐅᐣᑎᓇᒥᐣ ᑫᐅᒋ ᒪᒪᐃᐧᔭᓄᑲᑕᒧᐊᐧᐨ ᐅᐁᐧᓂ. ᒪᒪᐤ ᒥᓯᐁᐧᑲᒥᐠ ᒋᐅᐣᑎᓇᑭᑕᐧ ᒋᐅᒋ ᐱᒪᓄᑲᑕᒧᐊᐧᐨ, ᐁᑲᐧ ᔕᑯᐨ ᐃᒪ ᑫᒋᐊᐧᐠ ᐊᓂᔑᓂᓂᐊᐧᐠ ᐅᑎᓀᐣᑕᒧᐃᐧᓂᐊᐧ ᒋᑭᐅᒋᒪᑲᓂᑭᐸᐣ ᒋᐃᐧᑕᓄᑭᒪᐊᐧᐨ ᑭᒋᐦᐊᐠ ᒥᓇ ᑲᓂᑲᓂᑕᒪᑫᐊᐧᐨ, ᐃᑭᑐ ᓫᐅᑎᐟ.
ᐊᓂᔑᓇᐯ ᐊᐢᑭ ᑭᒋᐅᑭᒪᑲᐣ ᐢᑕᐣ ᐯᕑᑎ ᐅᑭᔭᓂᒧᑕᐣ ᐸᑫᐱᐦᐃᑲᐣ 35 ᑭᒋᐅᓇᑯᓂᑫᐃᐧᓂᐠ ᑲᐃᔑᐱᐦᐃᑲᑌᐠ ᑲᓂᓯᑕᐃᐧᓂᑲᑌᐠ ᒥᓇ ᐁᐃᑭᑐᒪᑲᐠ ᐊᓂᔑᓂᓂ ᒥᓇ ᓇᑯᒥᑐᐃᐧ ᑎᐱᓇᐁᐧᐃᐧᓯᐃᐧᓇᐣ ᐊᔕ ᑲᑭᐃᑭᑐᐨ ᐊᐟᓫᐃᔪ.
ᐊᑎᑲ ᐊᐱ ᑲᑭᒪᓯᓇᐦᐅᑎᓱᔭᑭᐸᐣ ᒋᕑᐃᑎ ᓇᑯᒥᑐᐃᐧᓇᐣ, ᐊᒥ ᑲᑭᐃᔑᐊᐧᐸᑕᒧᐊᐸᐧᐣ ᑭᒥᔓᒥᓇᐸᓂᐠ ᑲᐧᔭᐠ ᒋᐃᐧᐃᔑᓇᑲᐧᐠ ᑭᑲᓇᐊᐧᐸᒥᑯᐃᐧᓂᓇᐣ, ᑲᐧᔭᐠ ᒋᐃᐧᒋᑕᒥᑎᓇᓂᐊᐧᐠ, ᐃᑭᑐ ᐯᕑᑎ. ᑲᑭᓇ ᐊᐃᐧᔭ ᐃᒪ ᒋᐅᒋ ᒥᓄᓭᐊᐧᑫᐨ ᐊᐦᑭᑲᐠ ᑲᐅᒋᐁᐧᓄᒋᓭᐊᐧᑲᓄᐊᐧᐠ ᑲᐃᐧᐣ ᑕᐡ ᒋᑭᐃᓯᓭᐠ ᐊᓂᐡ ᑭᓇᑲᐡᑲᑯᒥᐣ ᐊᓂᔑᓇᐯ ᐅᓇᑯᓂᑫᐃᐧᐣ.
ᑭᐊᐧᐸᑕᒥᐣ ᓇᐱᐨ ᑭᒋᒥᐢᑕᐦᐃ ᐁᐧᓄᑎᓯᐃᐧᐣ ᐁᐅᒋᒪᑲᐠ ᐊᐦᑭᑲᐠ ᑲᐅᐣᑎᓂᑲᑌᑭᐣ, ᑭᒋᒥᐢᑕᐦᐃ ᔓᓂᔭᐣ ᐃᒪ ᐅᐣᑎᓇᑲᓂᐃᐧ, ᒥᑕᐡ ᐁᑲ ᑲᐃᐧᐅᒋ ᐱᓯᐢᑫᐣᑕ ᑭᒋᐅᑭᒪ ᐃᐁᐧᓂ ᐸᑫᐱᐦᐃᑲᐣ 35.
ᐁᑲᐧ ᒥᓇ ᑲᐃᐧᐣ ᐊᓂᔑᓂᓂ ᐁᐧᓄᒋᓭᓯᐣ ᐅᒪ ᑲᐅᒋᒪᑲᑭᐣ ᐁᐧᓄᒋᓭᐃᐧᓇᐣ, ᒥᐱᑯ ᑭᔭᐱᐨ ᐁᔑᐱᒥ ᑭᑎᒪᑭᓇᑯᓯᐊᐧᐨ ᐊᓂᔑᓂᓂᐊᐧᐠ, ᐃᑭᑐ.
ᐃᐁᐧ ᐅᑐᑕᐣ ᐅᑭᒪᐃᐧᐣ ᐁᑲ ᐁᐧᓴ ᒋᐅᓴᒥᐸᐊᐧᓂᐦᐃᑯᔭᐠ ᑲᐊᓂᔑᓂᓂᐃᐧᔭᐠ, ᔕᑯᐨ ᒥᐱᑯ ᑭᔭᐱᐨ ᐁᔑᑲᑫᐧᐱᒪᑎᓯᔭᐠ, ᐃᑭᑐ ᐯᕑᑎ. ᑫᑭᓇᐃᐧᐟ ᐃᑕᐡ ᒋᑭᑲᑫᐧ ᑲᐡᑭᑕᒪᓱᔭᑭᐸᐣ ᑫᐅᒋᐱᒪᒋᐦᐃᑎᓱᔭᐠ. ᒥᐦᐅᐁᐧᓂ ᑕᐡ ᑫᑭᑲᑫᐧ ᓂᓯᑕᐃᐧᓇᑭᐸᐣ ᓄᑯᑦ ᐅᑭᒪᐃᐧᐣ ᑫᑭᓇᐃᐧᐟ ᐁᐊᔭᔭᐠ ᑲᐡᑭᐦᐅᐃᐧᐣ ᐅᐁᐧ ᒋᑭᑐᒋᑫᑕᒪᓱᔭᑭᐸᐣ ᒋᐱᒥᐃᐧᓂᑎᓱᔭᐠ. ᐊᓂᐡ ᑲᐃᐧᐣ ᐃᐧᑲ ᑭᑭᐅᒋ ᐸᑭᑎᓇᒥᐣ ᑭᑐᓀᓂᒥᑎᓱᐃᐧᓂᓇᐣ ᐁᑲᐧ ᒥᓇ ᒋᑭᐊᔭᔭᑭᐸᐣ ᑫᐅᒋ ᐱᒥᐃᐧᓂᑎᓱᔭᐠ.
ᐊᑎᐟ ᐅᑭᒪᑲᓇᐠ ᐅᑭᐃᐧᒋᐃᓀᑕᒧᒪᐊᐧᐣ ᐊᐟᓫᐃᔪ ᑲᑭᐃᑭᑐᓂᐨ.
ᐁᐦᐊ, ᐣᑌᐯᐧᑕᐊᐧ ᔕᐧᐣ ᐊᐟᓫᐃᔪ, ᐃᐁᐧ ᑲᐃᑭᑐᐨ, ᐃᑭᑐ ᒪᑕᑲᒥ ᐅᑭᒪᑲᐣ ᐊᐧᓫᑐᕑ ᓀᐳ. ᑭᐡᐱᐣ ᑲᐯᐦᐃ ᔓᓂᔭᐃᐧᑭᒪᑲᐠ ᐅᒋᑲᓇᐊᐧᐸᒥᑯᔭᐠ, ᒥᐱᑯ ᒧᔕᐠ ᑫᐱᒥᐃᓯᓭᔭᐠ ᐁᑲ ᐃᐧᑲ ᒋᑌᐱᓭᔭᐠ ᔓᓂᔭ ᑲᐊᓂᔑᓂᓂᐃᐧᔭᐠ.
ᓀᐳ ᐅᑭᐃᐧᐣᑕᐣ ᑭᒋᐦᐊᐣ ᐁᑭᓄᐣᑕᐊᐧᐸᐣ ᐁᓂᑲᓇᒋᒧᓂᐨ.
ᑭᐃᑭᑐᐸᐣ ᑭᒋᐦᐊ: ᐊᓂᔑᓂᓂᐊᐧᐠ ᑭᐃᑭᑐᐊᐧᐠ ᔓᓂᔭᐃᐧᑭᒪ ᐸᐸᑭ ᒋᔭᓂᐱᒥ ᐊᔭᒋᐃᐧᓇᐠ ᑭᑕᓂᔑᓂᓂᐃᐧ ᒪᓯᓇᐦᐃᑲᐣ ᐱᓂᐡ ᐁᑲ ᑫᑯᐣ ᒋᓇᑲᐧᐠ, ᐸᓂᒪ ᐱᑯ ᐁᑕ ᒥᑐᓂ ᑭᐁᐧᒥᑎᑯᔑᐊᐧᑭᓱᔭᐣ.
ᒥᐦᐅᐁᐧᓂ ᓀᐳ ᑲᑲᓄᑫᐨ ᑭᒋᐦᐊᐣ ᑲᑭᐃᑭᑐᓂᐨ.
ᒥᑐᓂ ᑕᐡ ᐃᑯ ᐊᐧᐊᐧᓀᑕᑲᐧᐣ ᐅᐁᐧ ᒣᑲᐧᐨ ᑲᐱᒥᐃᓯᓭᐠ ᑐᑲᐣ ᒋᕑᐃᑎ ᑲᔭᓂᐊᐣᑯᐡᑲᒪᑲᐠ ᑌᐯᐧ ᒋᔭᓂᐃᓯᓭᐠ. ᐊᓂᐅᑕᐱᓇᒪᑫᐊᐧᐠ ᐊᔓᑕᒪᑫᐃᐧᓇᐣ ᓇᐊᐧᐨ ᒋᑭᑲᑫᐧ ᒪᓇᒋᑕᒪᑫᐊᐧᐸᐣ.
ᒥᔑᓇᐧ ᑲᔦ ᐃᓯᓭ ᐊᓂᔑᓂᓂᐊᐧᐠ ᐁᐃᓀᓂᒥᑕᐧ ᒪᐊᐧᐨ ᐁᐁᐧᓄᑎᓯᐊᐧᐨ, ᐃᑭᑐ ᓀᐳ.
ᐊᐃᐧᔭᐠ ᐅᑎᓀᑕᓇᐊᐧ ᐁᐁᐧᓄᑎᓯᔭᐠ, ᐁᑲᐧ ᔕᑯᐨ ᑲᐃᐧᐣ ᑭᑌᐱᓭᒥᐣ ᐊᐧᑲᐦᐃᑲᓇᐣ ᒥᓇ ᐊᓄᑭᐃᐧᓇᐣ. ᑕᐱᐡᑯᐨ ᑲᓇᓇᐱᐊᐸᒋᑐᔭᐠ ᑫᑯᓇᐣ ᑭᑎᔑᓇᑯᒋᑫᒥᐣ. ᑲᐃᐧᓂᐣ ᒪᔭᑦ ᑫᑯᓇᐣ ᑭᑭᐅᐣᑎᓇᒪᓱᓯᒥᐣ. ᐊᓂᐡ ᐃᐧᐣ ᔓᓂᔭᐃᐧᑭᒪ ᐅᐣᑕᒥ ᔓᓂᔭᑫᑕᒪᓱ ᐁᒪᓂᔓᓂᔭᐊᐧᓇᐨ ᐊᓂᔑᓂᓂᐊᐧᐣ, ᐃᑭᑐ ᓀᐳ.
ᓀᐳ ᐅᐸᑯᓭᐣᑕᐣ ᐅᑭᒪᑲᓇᐠ ᒋᐃᐧᒋᑲᐸᐃᐧᑕᑎᐊᐧᐨ ᒋᐅᒋ ᒥᓄᓭᐊᐧᐨ ᐅᑕᐣᒋᒋᑫᐃᐧᓂᐊᐧ ᐁᐧᑎ ᐊᓂᓂᑲᐣ ᒋᒥᓄᓭᐦᐃᑯᐊᐧᐨ.
ᒋᔭᓂ ᓇᑲᑕᒪᐊᐧᔭᐠ ᑭᑲᐧᔭᐣᑕᒋᑫᑕᒪᑫᐃᐧᓂᓇᐣ. ᐁᐃᔑᓂᑲᑕᒪᐣ ᒥᓯᐁᐧ ᐊᓂᔑᓂᓂᐃᐧ ᐅᑦᐱᑲᐸᐃᐧᐃᐧᐣ, ᐊᐧᐸᓄᐠ, ᔕᐊᐧᓄᐠ, ᓀᐣᑲᐱᐦᐊᓄᐠ ᒥᓇ ᑭᐁᐧᑎᓄᐠ. ᐅᐣᒋᑕᐱᑯ ᒋᐱᒥᐃᐧᑐᔭᐠ ᐃᐧᒋᑲᐸᐃᐧᑕᑎᐃᐧᐣ. ᐁᐧᓴ ᐊᔕ ᑭᓇᐧᑲᐡ ᑭᐱᒥᑲᑲᐧᑕᑭᐦᐃᑯᒥᐣ.
ᑲᐃᐧᓂᐣ ᑐᑲᐣ ᑲᐃᓯᓭᑭᐣ ᐃᐡᑯᓂᑲᓇᐣ ᔓᓂᔭᐃᐧᑭᒪ ᑲᐅᒋᑲᓇᐁᐧᑕᑭᐣ, ᐯᔑᐠ ᐃᐁᐧ ᐃᐡᑯᓂᑲᐣ ᐊᐊᐧᔑᒣ ᐅᐣᒋᐊᓂᒥᓭ ᐊᓂᐡ ᐁᑲ ᐅᑕᔑᑫᐃᐧᓂᐊᐧ ᐁᑲ ᔓᓂᔭᐃᐧᑭᒪᑲᐠ ᐁᐅᒋ ᐃᐧᒋᒋᑲᑌᓂᐠ.
ᐊᐧᔾᐟᐊᐧᑐᕑ ᐅᑭᒪᑲᐣ ᐊᕑᓫᐃᐣ ᓯᐳᒐᐠ ᐅᓂᑲᓂᑕᒪᐊᐧᐣ 110 ᐊᓂᔑᓂᓂᐊᐧᐣ ᐅᑕᔑᑫᐃᐧᓂᐠ. ᐃᒪ ᐅᑎᐡᑯᓂᑲᓂᐠ 60 ᑭᓫᐊᒥᑐᕑᐢ ᐊᐱᓯᓇᑲᐧᓂ ᑭᐁᐧᑎᓄᐠ ᐃᓀᑫ ᐊᕑᒥᐢᑕᕑᐊᐣᐠ ᒋᕑᐃᑎ 9 ᑎᐯᐣᒋᑫᐃᐧᓂᐠ ᐁᑲᐧ ᑌᑎᐸᐦᐃ ᐊᐧᐸᑲᒥ ᐅᑭᒪᐃᐧᓂ ᐊᐦᑭ ᐅᒋᐯᔓᓇᑲᐧᓂ.
ᒥᐦᐅᒪ ᐁᑲᐯᔑᔭᐠ ᐣᑕᑭᒥᓇᓂᐠ, ᔕᑯᐨ ᑲᐃᐧᐣ ᔓᓂᔭᐃᐧᑭᒪ ᐅᐱᓯᐢᑫᐣᑕᓯᐣ, ᐃᑭᑐ ᓯᐳᒐᐠ. ᑲᐃᐧᐣ ᑲᓇᑫ ᓂᐃᐧᒋᐦᐃᑯᓯᒥᐣ ᐊᓂᔑᓇᐯ ᐅᓇᑯᓂᑫᐃᐧᐣ. ᐃᐁᐧ ᐱᑯ ᑕᑲᐧᐨ ᐃᓯᓭ, ᐊᐣᒋᑯ ᓂᑭᐱᑎᓂᑯᒥᐣ ᐁᑲ ᑫᑯᐣ ᒋᑭᐃᔑᒪᒋᓂᐡᑲᔭᐠ. ᑲᐃᐧᐣ ᑕᐡ ᒋᒥᓄᑐᑕᑯᐊᐧᐨ ᐊᓂᔑᓂᓂᐊᐧᐠ ᐅᐁᐧᓂ. ᑲᓇᑕ ᑭᒋᐅᑭᒪ ᐃᐧᐣ ᐅᑐᓀᑕᐣ ᐊᓂᐣ ᑫᐃᔑᐱᒥᐃᐧᓇᐨ ᐊᓂᔑᓂᓂᐊᐧᐣ.
ᑭᐡᐱᐣ ᑕᐡ ᐊᓂᔑᓇᐯ ᐅᓇᑯᓂᑫᐃᐧᐣ ᐁᐧᐱᓂᑲᑌᑭᐸᐣ, ᐁᑲᐧ ᒥᓇ ᑭᐡᑭᓇᑲᓂᐃᐧᐸᐣ ᔓᓂᔭᐣ ᐃᒪ ᑲᐅᒋᐸᑭᑎᓇᑲᓂᐃᐧᐨ ᑲᐃᐧᓂᐣ ᓇᐣᑕ ᑕᐃᔑᐊᓂᒥᓭᓯᐣ ᐅᒪ ᐣᑕᔑᑫᐃᐧᓂᐠ.
ᐊᐧᔾᐟᐊᐧᑐᕑ ᐊᓂᔑᓂᓂᐊᐧᐠ ᐅᒋᐸᑫᐧᓇᒪᐊᐧᐠ ᔓᓂᔭᐣ ᑲᓯᓄ ᕑᐊᒪ ᐸᑫᐧᓇᒪᑫᐃᐧ ᓇᑯᒥᑐᐃᐧᐣ. ᐁᑲᐧ ᑕᐡ ᑲᐃᐧᐣ ᑯᑕᐠ ᐃᐧᒋᐦᐃᑯᐃᐧᐣ ᐅᑕᔭᓯᓇᐊᐧ ᑲᐃᔑᒥᓂᑕᐧ ᑲᐅᒋ ᑎᐯᐣᑕᑯᓯᐊᐧᐨ ᑕᐱᐡᑯᐨ ᐃᐡᑯᓄᐃᐧᒋᐦᐃᑯᐃᐧᐣ ᒥᓇ ᐊᐧᑲᐦᐃᑫᐃᐧᐣ.
ᓯᐳᒐᐠ ᐃᑭᑐ ᐅᓄᐁᐧᓂᐊᐧᐣ ᐸᕑᐠ ᐅᓇᑯᓂᑫᐃᐧᓇᐣ ᒥᓇ ᑯᑕᑭᔭᐣ ᐅᓇᑯᓂᑫᐃᐧᓀᓴᐣ ᑕᑭᑲᑫᐧ ᓂᑲᑌᓂᑲᑌᐸᓂᐣ.
ᐅᑭᐱᐡᑲᑯᓇᐊᐧ ᒋᑭᑲᐯᔑᐊᐧᐨ ᐅᑕᑭᒥᐊᐧᐠ ᓇᐣᑕ ᒋᑭᐸᑫᐡᑲᐊᐧᐨ ᐃᐡᑯᓂᑲᓂᐠ, ᐃᑭᑐ. ᒣᑎᓂᑫᐊᐧᐠ ᔓᓂᔭᐣ ᑭᐡᐱᐣ ᑲᓇᑕᐁᐧᑕᒧᐊᐧᐨ ᐃᐡᑯᓂᑲᓂᐠ ᒋᐅᒋ ᑎᐯᐣᑕᑯᓯᐊᐧᐨ.
ᓯᐳᒐᐠ ᐃᑭᑐ ᑎᐱᓇᐁᐧ ᐱᒥᐃᐧᓂᑎᓱᐃᐧᐣ ᓇᐊᐧᐨ ᑕᑭᒥᓄᓭᐸᐣ ᒋᐱᒥᐃᐧᓂᑯᐨ ᐊᓂᔑᓂᓂ ᐊᐱᐨ ᐃᐧᐣ ᐊᓂᔑᓇᐯ ᐅᓇᑯᓂᑫᐃᐧᐣ.
ᐣᐸᑯᓭᑕᐣ ᑎᐱᓇᐁᐧ ᐱᒥᐃᐧᓂᑎᓱᐃᐧᐣ ᒋᐃᔑᐅᓇᑌᑭᐸᐣ ᑭᓇᐃᐧᐟ ᒋᐅᓇᓀᑕᐠ ᑫᐃᔑᐱᒥᐃᐧᓂᑎᓱᔭᐠ. ᑭᑭᐱ ᐊᔭᓂᑫ ᐱᒥᐃᐧᓂᑯᒥᐣ ᑭᑐᓇᔓᐁᐧᐃᐧᓂᓇᐣ ᐁᐧᑎ ᐱᑯ ᑲᔭᐡ ᐅᑕᓇᐠ ᑲᑭᐱ ᐊᐸᒋᑐᐊᐧᐨ. ᑲᐃᐧᐣ ᑕᐡ ᐃᐧᑲ ᒋᑭᐱᐅᒋ ᐊᓂᒥᓴᐦᐃᑯᔭᐠ.